Wa Mwẹ Avbe Olodigba Ne Uwa Ha Osa Na Ra?

Zẹ vbene Ivbiotu e Kristi ni ghaa rrọọ vbe orre nokaro vbe ye, Avbe Osẹe Jehova i re otu nọ mwẹ avbe olodigba kevbe emwa kẹkan ni rre ototọ iran. Avbe Osẹe Jehova hia ni dinmwiamẹ nẹ, keghi re emwa na zẹ ye ukpo iwinna, kevbe iran hia ẹre ọ mwẹ obọ vbe iwinna ikporhu kevbe imamwaemwi ọghe Baibol. Avbe Osẹe Jehova keghi mwẹ dọmwadẹ iko niran ye, ọ sẹ odẹ iran 100 ni rre iko ọkpọkpa. Avbe ikpia ni mwẹ irẹnmwi vbe odẹ ọghe orhiọn ni rre dọmwadẹ iko, keghi ga zẹvbe ‘eniwanrẹn’ ra ediọn. (Taitọs 1:5) Iran keghi ga vbene ai na ha iran osa ye iwinna niran ru.