ARHIE MAAN NA MU MA E JỌN

1 Ọna keghi re arhie maan nọ ke obọ e Jesu Kristi rre, ne Osanobua mu ma rẹn, nọ muẹn* ma eguọmwadia ẹre, ne iran mieke na rẹn emwi nọ khian sunu vbe nẹi khian ghi kpẹẹ gbe. Jesu keghi gie odibo ẹre nọ ya mu avbe emwi na ma e Jọn ne ọguọmwadia ẹre, zẹvbe ama. 2 E Jọn keghi sẹ osẹ ye ẹmwẹ Osanobua kevbe emwi hia ne Jesu Kristi sẹ osẹ yi; ọni ọre emwi hia ne aro irẹn sẹ. 3 Oghọghọ nọ ne ọmwa nii nọ tie ẹmwẹ akhasẹ na ladian, oghọghọ vbe nọ ne emwa ni họẹn kevbe ni ya ẹmwẹ na gbẹnnẹ yọ ru emwi, rhunmwuda, ẹghẹ na buru sotọ nẹ.

4 E Jọn ẹre ọ gbẹn ebe na gie iko ihinrọn ni rre ikinkin ọghe Esia:

Te uwa gha miẹn ẹse ne kpataki* kevbe ọfunmwegbe vbe obọ “Ọmwa nii nọ rrọọ nian, nọ ka rrọọ dee yi, kevbe nọ dee,” kẹ kevbe obọ orhiọn ihinrọn ni rre odaro ẹkete ẹre. 5 Te uwa gha vbe miẹn ẹse ne kpataki* kevbe ọfunmwegbe vbe obọ e Jesu Kristi, nọ re “Ọsosẹ Nọ Gia Mu Ẹtin Yan,” “ọmọ ọdiọn na huẹn kpaegbe vbe idin” kevbe “Enọ Khaevbisẹ yan avbe ọba ọghe agbọn na.”

Irẹn keghi hoẹmwẹ ima, ọ na ya esagiẹn ọnrẹn fan ima hin orukhọ ọghe ima rre, 6 ọ na ya ima ru arriọba, ọ na vbe ya ima ru ohẹn ọghe Osanobua ẹre, nọ vbe re Erhae. Uyi kevbe ẹtin ọre ọghẹe vbe etẹbitẹ. Isẹ.

7 Ghee oo! Ọ gha rre vbe uwu okuku, aro emwa hia ghi bẹghe ẹre, ya sẹ egbe emwa ni ya asoro so ẹre; emwa hia ni rre agbọn ghi gha kinmwi ẹwẹ, zẹvbe ne iran ya khiẹ rhunmwuda ẹre. Erriọ ẹre ọ khian gha ye, Isẹ.

8 Osanobua ne Jehova* khare wẹẹ: “Mẹ ọre Alfa kevbe Omega,* Ọmwa nii nọ rrọọ nian, nọ ka rrọọ dee yi, kevbe nọ dee, nọ vbe re Oghodua.”

9 Mẹ ọre Jọn ne ọtiẹn uwa nokpia; egbe oya ne uwa re ẹre imẹ vbe re, I vbe zin egbe vbene uwa vbe ye, mẹ ẹre ọ vbe gu uwa mwẹ oghae vbe arriọba, rhunmwuda ne I na gu e Jesu mu obọ. Otọ ne amẹ lẹga na tie ẹre Patmọs ẹre I na gha ta ẹmwẹ Osanobua ma emwa, I na vbe gha sẹ osẹ vbekpa e Jesu. 10 Orhiọn nọhuanrẹn keghi hin yan mwẹ, ọ na mu mwẹ gha rrie ẹdẹ Enọyaẹnmwa. I keghi họn vbe urhu ọkpa davan vbe iyeke mwẹ, vbene a miẹn wẹẹ te a kpee okpe, 11 ọ na wẹẹ: “Gbẹnnẹ emwi ne u ya aro ruẹ miẹn ye ebe na kiri, ne u rhie ẹre gie iko ihinrọn na: nọ rre Ẹfisọs, nọ rre Smaina, nọ rre Pẹgamọm, nọ rre Taiataira, nọ rre Sadis, nọ rre Filadefia, kevbe nọ rre Leodisia.”

12 I na we ne I gbaro ghee iyeke, ne I ghee ọmwa nọ gu mwẹ guan, vbe I ghi gbaro ghee iyeke, I keghi bẹghe erhan ọmukpa ọghe igoru ihinrọn. 13 I keghi bẹghe orhunmwu ọkpa nọ yevbe ovbi ọmwa, vbe ọ mudia ye adesẹneva avbe erhan ọmukpa nii, ọ yọ ẹwu ne guọrọ nọ wa tuo sotọ, ọ keghi ya ọza ọghe igoru gbalọ ẹwẹ ọre. 14 Yevbesọni, uhunmwu ẹnrẹn kevbe eto ẹre kegha fua kẹkẹkẹ vbe na ghee ititi oru nọfua, ọ na yevbe isonorhọ, aro ọre na yevbe erhẹn nọ baa. 15 Owẹ ọre keghi yevbe ekọpa ighobioye* nọ fi wainwain vbe uwu erhẹn, urhu ẹre keghi yevbe owogho ọghe ogbigbi amẹ nọ lẹẹ. 16 Orhọnmwẹ ihinrọn kegha rre obọ erha ọmwa rẹn, umozo nọ taẹn nọ mwẹ unu eva, nọ vbe kakabọ mu kegha ke unu ẹnrẹn ladian, ugbaro ọre kegha fi wainwain vbe na ghee ovẹn nọ kakabọ yunmwu vbe ogiavan ogioghogho. 17 Vbe I ghi bẹghe ẹre, I keghi wa de gbe otọ vbe akharha ẹre, vbene a miẹn wẹẹ I wu nẹ.

Ẹre ọ na ghi ya obọ erha ọmwa rẹn kaan mwẹ, ọ na wẹẹ: “Ghẹ gi ohan mu ruẹ. Mẹ ọre Okaro kevbe Okiekie, 18 mẹ ọre ọmwa nọ rrọọ, I te ka wu, sokpan, banbanna nian, I rrọọ nẹ vbe etẹbitẹ ya sẹ etẹghori; isanhẹn ọghe uwu kevbe ọghe Idin* vbe gue mwẹ. 19 Rhunmwuda ọni, gbẹnnẹ avbe emwi ne u bẹghe yotọ, kevbe avbe emwi ni rrọọ nian, kevbe emwi ni khian sunu vbe iyeke enena. 20 Ẹmwẹ oro nọhuanrẹn ọghe orhọnmwẹ ihinrọn ne u bẹghe vbe obọ erha ọmwa mwẹ kevbe erhan ọmukpa ọghe igoru ihinrọn nii na khin: Orhọnmwẹ ihinrọn nii ọre avbe odibosa ọghe iko ihinrọn nii, erhan ọmukpa ihinrọn nọ rrọọ ọre iko ihinrọn nii.

2 “Gbẹn ẹmwẹ na gie odibosa ọghe iko nọ rre Ẹfisọs: Ena ọre ẹmwẹ nọ tae ighẹ ọmwa nii nọ da orhọnmwẹ ihinrọn yi mwẹ obọ erha ọmwa, nọ vbe khian vbe adesẹneva erhan ọmukpa ọghe igoru ihinrọn: 2 ‘I rẹn emwi ne u ru, I vbe rẹn ẹsọn ne u miẹn kevbe vbene u ya zin egbe hẹ. I rẹnrẹn wẹẹ, u i rhan obọ miẹn emwa dan yi; u keghi vbe danmwẹ iran ghee ighẹ emwa nẹi re ukọ ni tie egbe iran ukọ, u na do bẹghe ẹre wẹẹ, ọhọnhoghe ẹre iran khin. 3 U wa vbe zin egbe emwi, erriọ ẹre u vbe ya ziga khian rhunmwuda eni mwẹ, u ma he vbe gi egbe wọọ ruẹ. 4 Vbọrhirhighayehẹ, emwi ne I khian gu ruẹ gui yi ọre wẹẹ, u i ghi mwẹ ahoẹmwọmwa ne u ka gha mwẹ vbe ẹghẹ okaro.

5 “‘Nọnaghiyerriọ, ghẹ mianmian ehe ne u ke de fua. Roro iro fi uyinmwẹ werriẹ, ne u gha ru emwi ne u ka gha ru vbe ẹghẹ okaro. Adeghẹ u ma ru vberriọ, I gha bu ruẹ gha dee, I ghi mu erhan ọmukpa ruẹ hin ehe nọ te ye rre, sokpan a ma wẹẹ u fi werriẹ. 6 Ọrheyerriọ, I gha tian ruẹ ye ọnọna: emwi ne otu e Nikoleyọs ru keghi sọnnọ ruẹ, vbene ọ vbe sọnnọ mwẹ. 7 We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko: Nọ ne ọmwa nọ khọnmiotọ, I gha kue nọ rri ọmọ erhan ọghe arrọọ nọ rre paradais ọghe Osanobua.’

8 “Gbẹn ẹmwẹ na gie odibosa ọghe iko nọ rre Smaina: Ena ọre ẹmwẹ nọ tae ighẹ ọmwa nii nọ re ‘Okaro kevbe Okiekie,’ nọ ka wu nẹ, ọ na vbe dọlegbe gha rrọọ: 9 ‘I rẹn ọlọghọmwa ne u ye, I vbe rẹn usẹ nọ sẹ ruẹ; sokpan, ọmwa nọ fe ẹre u khin. I rẹn ẹmwẹ dan ne emwa ni tie egbe iran Ivbi e Ju ta vbekpa ruẹ; iran i gele re Ivbi e Ju, sokpan, e sinagọg ọghe Setan ẹre iran khin. 10 Ghẹ fian afianma emwi ne u khian rri oya ẹre. Ghee ẹre! Esu gha ye gha filo eso vbe uwu uwa ye eghan, na mieke na danmwẹ uwa sẹ eke na danmwẹ ọmwa sẹ; ọwara ikpẹdẹ igbe ẹre uwa khian ya rri oya. Mudia gbain ya sẹ ẹdẹ uwu, u gha ru vberriọ, I gha mu ẹrhu ẹde ọghe arrọọ nuẹn. 11 We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko: Nọ ne ọmwa nọ khọnmiotọ, uwu nogieva i khian sẹtin kuan rẹn hiehie.’

12 “Gbẹn ẹmwẹ na gie odibosa ọghe iko nọ rre Pẹgamọm: Ena ọre ẹmwẹ nọ tae ighẹ ọmwa nii nọ mwẹ umozo nọ taẹn nọ mwẹ unu eva, nọ vbe kakabọ mu: 13 ‘I rẹn ehe ne u dia, evba nii ẹre ẹkete ọghe Setan ye; ọrheyerriọ, te u wa ye rhikhan mu mwẹ,* u ma vbe kha wẹẹ, u ma ghi mu ẹtin yan mwẹ, uhiẹn vbe ẹghẹ ọghe Antipas ne ọsosẹ mwẹ nọ gia mu ẹtin yan, na gbua vbe ehe ne u ye, nọ re ehe ne Setan dia.

14 “‘Vbọrhirhighayehẹ, emwi eso rrọọ ne I gha gu ruẹ gui yi, ọni nọ wẹẹ, emwa eso rre ehe ne u ye, ni lele imamwaemwi ọghe Belam, nọ tama e Belak nọ ru emwi nọ gha ya Ivbi Izrẹl gha rri emwi na ya zọ ese gie ẹbọ kevbe nọ gha ya iran yin uyinmwẹ alama oghẹ,* ne iran mieke na dele kua. 15 Ẹ i vbe re ọni ọkpa, emwa eso ni lele imamwaemwi ọghe otu e Nikoleyọs vbe rre ehe ne u ye. 16 Nọnaghiyerriọ, ro iro fi uyinmwẹ werriẹ. U ma na ru vberriọ, I dee nuẹn ẹgiẹgiẹ, I ghi ya umozo nọ taẹn nọ rrọ mwẹ unu gu iran khọn.

17 “‘We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko: Nọ ne ọmwa nọ khọnmiotọ, I gha viọ eso nẹẹn vbe mana na viọ lẹre, I ghi rhie ikpẹ okuta nọfua nẹẹn; emwi na gbẹn ye ikpẹ okuta nii keghi re eni ọgbọn ne ọmwa rhọkpa ma rẹn, vbọ gberra ọmwa nii na khian rhie ẹre na.’

18 “Gbẹn ẹmwẹ na gie odibosa ọghe iko nọ rre Taiataira: Ena ọre ẹmwẹ ne Ovbi Osanobua tae, nọ re ọmwa nii ne aro ọre yevbe erhẹn nọ baa, ne owẹ ọre vbe yevbe ekọpa ighobioye:* 19 ‘I rẹn emwi ne u ru, I rẹn ahoẹmwọmwa kevbe amuẹtinyan ne u mwẹ, I vbe rẹn iwinna ne u winna kevbe vbene u ya zin egbe hẹ. I rẹnrẹn wẹẹ, emwi ne u ru vbe okiekie na, ẹre ọ sẹ emwi ne u ka gha ru vbe ẹghẹ okaro.

20 “‘Vbọrhirhighayehẹ, emwi ne I khian gu ruẹ gui yi ọre wẹẹ, u na rhan obọ miẹn okhuo nii yi ighẹ e Jezibẹl, nọ re ọmwa nọ tie egbe ẹre akhasẹ. Ọ keghi rẹrẹ eviẹn mwẹ, ọ ghi gha ma iran ẹre, ne iran gha yin uyinmwẹ alama oghẹ,* ne iran vbe gha rri emwi na ya zọ ese gie ẹbọ. 21 I te rhie ẹghẹ nẹẹn nọ ya ro iro fi uyinmwẹ werriẹ, sokpan, ọ ma mu egbe nọ ya zobọ vbe uyinmwẹ alama oghẹ* nọ yin. 22 Ghee ẹre! I khian mu emianmwẹ ku ọre nian, I ghi vbe si ọlọghọmwa gie emwa ni gu ẹre ru oghẹ, sokpan a ma wẹẹ, iran zobọ vbe uyinmwẹ ne iran gu ẹre yin. 23 I gha ya emianmwẹ dan gbele ivbi ẹre rua, ne iko hia miehe na rẹn wẹẹ, mẹ ọre ọmwa nọ ghee ekhọe, nọ vbe rẹn iro ne ọmwa zẹ;* vbene dọmwadẹ ọghẹe vbe uwu uwa rhirhi ya yin, erriọ ẹre I khian ya ha ẹre osa.

24 “‘Vbọrhirhighayehẹ, nọ ne uwa nikẹre ni rre Taiataira, ọni ọre uwa hia nẹi lele imamwaemwi na, wa ni ma rẹn emwi ne emwa tie ẹre “ẹmwẹ oro nọ dinmwi ọghe Setan,” emwi ne I khian tama uwa na khin: I i khian kun ihẹ ọvbehe ba uwa ihẹ. 25 Sokpan, emwi ne I ta ẹre I ye ta, ọni nọ wẹẹ, wa ghi da emwi ne uwa mwẹ yi kankankan vbene I te rre. 26 Nọ ne ọmwa nọ khọnmiotọ, nọ vbe lele odẹ mwẹ ya sẹ ufomwẹ, I gha rhie asẹ nẹẹn, nọ gha khaevbisẹ yan avbe agbẹnvbo, 27 zẹvbe ne Erha mwẹ vbe rhie asẹ mẹ; ọmwa nii ghi ya ọkpọ ematọn khaevbisẹ yan* emwa, ne iran mieke na rẹnkhuan vbe na ghee akhe na ya obuẹ ma. 28 I gha vbe rhie orhọnmwẹ owiẹ nẹẹn. 29 We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko.’

3 “Gbẹn ẹmwẹ na gie odibosa ọghe iko nọ rre Sadis: Ena ọre ẹmwẹ nọ tae ighẹ ọmwa nii nọ mwẹ orhiọn ihinrọn ọghe Osanobua kevbe orhọnmwẹ ihinrọn: ‘I rẹn emwi ne u ru, I rẹnrẹn wẹẹ, te a wa tae kẹkan wẹẹ u rre agbọn, sokpan, ọghe ne ẹmwata, u wu nẹ. 2 Gha begbe, ne u rhie ẹtin ye iran iwu ighẹ avbe emwi ni ghi dekẹe, ni khian ghi wu; rhunmwuda, aro mwẹ dae wẹẹ, u ma he wa ru emwi hia ne Osanobua mwẹ hoo ne u ru. 3 Rhunmwuda ọni, ghẹ mianmian emwi na rhie nuẹn kevbe emwi ne u he họn; daeyi ẹse, ne u vbe ro iro fi uyinmwẹ werriẹ. Vbene ẹmwata, vbe ẹ i re te u rhiọrre vbe ovbe, I gha rre zẹvbe oyi, u i khian vbe rẹn ẹghẹ ne I khian ya rre hiehie.

4 “‘Vbọrhirhighayehẹ, emwa ruẹ eso rre Sadis* ni ma he ya iruẹn sin ukpọn ọghe iran, ukpọn nọfua ẹre iran khian ya gha lele mwẹ khian, rhunmwuda, iran sẹ nọ gha ru vberriọ. 5 Nọ ne ọmwa nọ khọnmiotọ, a gha yọ ọre ukpọn nọfua, I i khian khiẹn eni ẹnrẹn hin ebe arrọọ rre hiehie, sokpan, I gha sirra Erha mwẹ kevbe avbe odibo ẹre miẹn kue wẹẹ, I rẹn eni ẹnrẹn. 6 We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko.’

7 “Gbẹn ẹmwẹ na gie odibosa ọghe iko nọ rre Filadefia: Ena ọre ẹmwẹ nọ tae ighẹ ọmwa nii nọhuanrẹn, nọ re ọmwa ata, nọ mwẹ isanhẹn ọghe Devid, nọ re ọmwa na miẹn wẹẹ, ọ gha ghi kie urho nẹ, ọmwa rhọkpa i ghi sẹtin khui ẹre, ọ gha vbe khui urho nẹ, ọmwa rhọkpa i ghi sẹtin kie ẹre: 8 ‘I rẹn emwi ne u ru. Ghee ẹre! I kie urho ọkpa yotọ nẹ vbe odaro ruẹ, ọmwa rhọkpa i sẹtin khui ẹre. I rẹnrẹn wẹẹ, ẹtin kherhe ẹre u mwẹ, kevbe wẹẹ, u ya ẹmwẹ mwẹ ru emwi, u ma he vbe siẹn mwẹ* ẹdẹ. 9 Ghee ẹre! U ma miẹn avbe ọhọnhoghe nii ni ke sinagọg ọghe Setan rre, ni kha wẹẹ Ivbi e Ju ẹre iran khin vbene iran i na re ọre, I gha ru ẹre ne iran gbe uhunmwu kotọ vbe odaro ruẹ, I ghi gi iran rẹn wẹẹ, I hoẹmwẹ ruẹ. 10 Rhunmwuda ne u na rhie owẹ lele emwi ne u họn vbekpa izinegbe mwẹ,* I gha gbaroghe ruẹ vbọ gha sẹ ẹghẹ edanmwẹ, ọni ọre ẹghẹ na khian ya danmwẹ emwa ni rre uhunmwu otagbọn hia ghee. 11 I dee ẹgiẹgiẹ. U ghi ye da emwi ne u mwẹ yi kankankan, ne ọmwa rhọkpa ghẹ mieke na miẹn ruẹ ẹrhu ẹde ruẹ.

12 “‘Nọ ne ọmwa nọ khọnmiotọ, I gha yae ru orrẹ vbe ọgua ọghe Osanobua mwẹ, ẹ i khian ghi dọlegbe kpa vbe evba nii rre; I gha gbẹn eni Osanobua mwẹ yan rẹn, kẹ kevbe eni ẹvbo ọghe Osanobua mwẹ, nọ re Jerusalẹm Ọghe Ọgbọn, nọ ke ehe ne Osanobua mwẹ ye rre vbe ẹrinmwi. I gha vbe gbẹn eni ọgbọn mwẹ yan rẹn. 13 We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko.’

14 “Gbẹn ẹmwẹ na gie odibosa ọghe iko nọ rre Leodisia: Ena ọre ẹmwẹ nọ tae ighẹ ọmwa nii nọ re Isẹ, nọ re ọsosẹ ọghe ẹmwata kevbe nọ gia mu ẹtin yan, nọ vbe re okaro vbe uwu emwi hia ne Osanobua yi: 15 ‘I rẹn emwi ne u ru, I rẹnrẹn wẹẹ, u i tọn, u i worua. Ọ gha te gha maan akpawẹ te u tọn, ra te u worua. 16 Ugbẹnvbe a ghi miẹn nian wẹẹ, te u ye rẹghẹrẹghẹ, u i tọn, u i vbe worua, te I khian tu ruẹ fua vbe unu mwẹ. 17 U khare wẹẹ: “I fe nẹ, I vbe mwẹ ẹfe nibun nẹ, I i ghi gualọ emwi rhọkpa hiehie.” Sokpan, u ma rẹn agbọn ọrhiae ne u ye, u ma rẹn wẹẹ, ọmwa na gbe ọsọre na, ovbiogue, arhuaro kevbe ọmwa nọ bannọ ruan ẹre u khin. 18 Rhunmwuda ọni, ude ne I khian bu ruẹ re ọre wẹẹ, do dẹ igoru na ya erhẹn kpe vbe obọ mwẹ, ne u mieke na fe; u ghi vbe dẹ ukpọn nọfua vbe obọ mwẹ, ne u mieke na miẹn ukpọn yọ, ne emwa ghẹ do gha ghee ruẹ vbe irhunmwirhun, ẹghẹ nii, ekhue ghi do gha mu ruẹ. U ghi vbe dẹ ukhunmwu eso vbe obọ mwẹ, ne u khian ya gha wuo aro, ne u mieke na gha bẹghe odẹ.

19 “‘Emwa hia ne I hoẹmwẹ ọnrẹn, ẹre I gu gui, ẹre I vbe gbe hin ọkhọ rre. Nọnaghiyerriọ, ro iro fi uyinmwẹ werriẹ, ne u gha ya egbe hia ga Osanobua. 20 Ghee! I mudia ye onurho nẹ, I vbe sobọ nẹ. Adeghẹ ọmwaikọmwa na họn urhu mwẹ, ọ na vbe kie urho mẹ, I gha la owa ẹre, ne I do gu ẹre rri evbare ota, irẹn ghi vbe gu mwẹ rri evbare. 21 Nọ ne ọmwa nọ khọnmiotọ, I gha rhie asẹ nẹẹn nọ ya tota ke mwẹ vbe ẹkete mwẹ, zẹvbe ne imẹ vbe tota ke Erha mwẹ vbe ẹkete ẹre, vbe I ghi khọnmiotọ nẹ. 22 We ne ọmwa nọ mwẹ ehọ họn ẹmwẹ na, ne orhiọn nọhuanrẹn tama avbe iko.’”

4 Vbe iyeke ọni, I keghi bẹghe urho ọkpa nọ kie yotọ vbe ẹrinmwi. Urhu nokaro ne I họẹn, nọ ghaa gu mwẹ guan keghi yevbe na miẹn wẹẹ te a kpee okpe, ọ na wẹẹ: “Hin odukhunmwu ne u gha die emwa, I gha ma ruẹ avbe emwi nẹi mwẹ ọ ma sunu.” 2 Vbe iyeke ọni, orhiọn Osanobua keghi suẹn gha loo mwẹ vbe ọwara ọkpa nii. I ghi ghee, ẹkete ọkpa kegha rre ẹrinmwi; orhunmwu ọkpa na tota ye ẹkete nii. 3 Ọmwa nii nọ tota ye ẹkete nii kegha fi wainwain vbe na ghee okuta e giaspa kevbe okuta e sadiọs.* Ikpin nọ ladian vbe orere iso keghi lẹga ẹkete nii, ọ na gha fi wainwain vbe na ghee okuta ẹmirad.

4 Ẹkete enẹ yan ugie (24) keghi lẹga ẹkete nii. I na vbe bẹghe ediọn enẹ yan ugie (24) ni tota ye avbe ẹkete na. Iran keghi yọ ẹwu ne guọrọ nọfua, ẹrhu ẹde ọghe igoru kegha rre iran uhunmwu. 5 Ayan kegha ke uwu ẹkete nii yan ladian. I keghi vbe họn vbe urhu ughughan guan ke uwu ẹkete nii ladian, I na vbe họn vbe avannukhunmwu vannọ ke uwu ẹkete nii ladian; urhukpa ihinrọn kegha baa vbe odaro ẹkete nii, ena mudia ye ihe orhiọn ihinrọn ọghe Osanobua. 6 Emwi nọ yevbe okun ne ughegbe nọ fi wainwain vbe na ghee kristal kegha rre odaro ẹkete nii.

Evbayi enẹ ni rrọọ kegha rre adesẹneva vbe ehe ne ẹkete nii ye, iran na vbe lẹga ẹkete nii. Aro na wa gba iran egbe hia, ke odaro ke iyeke. 7 Evbayi nokaro nọ rrọọ keghi yevbe oduma, evbayi nogieva nọ rrọọ keghi yevbe ovbi ẹmila, evbayi nogieha nọ rrọọ kegha mwẹ ugbaro ọghe ọmwa nagbọn, evbayi nogienẹ nọ rrọọ keghi yevbe oghohọn nọ tin. 8 Ọkpọkpa vbe evbayi enẹ ni rrọọ nii kegha mwẹ ifuẹn ehan; aro keghi wa gba ifuẹn nii hia, ke odaro ke iyeke. Ẹghẹ hia, ke asọn ke avan ẹre evbayi enẹ ni rrọọ nii ya gha kha wẹẹ: “Nọhuanrẹn, nọhuanrẹn, nọhuanrẹn ẹre Jehova* ne Osanobua ne Oghodua khin. Irẹn ọre Ọmwa nii nọ ka rrọọ dee yi, nọ rrọọ nian, kevbe nọ dee.”

9 Ẹghẹ ke ẹghẹ ne evbayi enẹ ni rrọọ nii ya rhie uyi, ọghọ kevbe ekpọnmwẹ ne Ọmwa nii nọ tota ye ẹkete, nọ vbe rrọọ vbe etẹbitẹ ya sẹ etẹghori, 10 ediọn enẹ yan ugie (24) nii ghi dele gbe otọ vbe odaro Ọmwa nii nọ tota ye ẹkete, nọ vbe rrọọ vbe etẹbitẹ ya sẹ etẹghori, iran ghi gha gae. Iran ghi filo ẹrhu ẹde ọghe iran ku odaro ẹkete nii, iran ghi gha kha wẹẹ: 11 “E Jehova* ne Osanobua mwa, wẹ sẹ nọ gha miẹn uyi, ọghọ kevbe ẹtin, rhunmwuda, wẹ ẹre ọ yi emwi hia; rhunmwuda nọ na re iho ruẹ, ẹre ọ zẹe ne iran na rrọọ, ẹre a gu vbe yi iran.”

5 I keghi bẹghe ebe na kiri ọkpa vbe obọ erha ọmwa ọghe Ọmwa nii nọ tota ye ẹkete. A keghi gbẹnnẹ emwi ye obọ eveva* ọghe ebe na kiri nii; a na vbe ya emwi ihinrọn gbalọe gbua. 2 I keghi bẹghe odibosa ọkpa nọ wegbe, ọ na gha ya urhu nọ la kha wẹẹ: “De ọmwa nọ sẹ nọ gha rhan ebe na kiri nii, kevbe nọ fian emwi na ya gbalọe gbua?” 3 Sokpan, a ma miẹn ọmwa rhọkpa vbe ẹrinmwi, ra vbe agbọn, ra vbe uwu otọ, nọ sẹtin rhan ebe na kiri nii, ra nọ ghee emwi nọ rre uwu ẹre. 4 I na viẹ egbe mwẹ rua ẹsẹse, rhunmwuda, a ma miẹn ọmwa rhọkpa nọ sẹ nọ gha rhan ebe na kiri nii, ra nọ ghee emwi nọ rre uwu ẹre. 5 Sokpan, ọkpa vbe ediọn nii keghi tama mwẹ wẹẹ: “Ghẹ ghi viẹ. Ghee oo! Oduma nọ ke uniẹn e Juda rre, nọ vbe re inian ọghe Devid khọnmiotọ nẹ, rhunmwuda ọni, ọ gha sẹtin rhan ebe na kiri nii kevbe emwi ihinrọn na ya gbalọe gbua.”

6 I keghi bẹghe oteghe ohuan ọkpa nọ mudia ye adesẹneva ọghe ẹkete nii kevbe uwu ẹbu evbayi enẹ ni rrọọ nii, kẹ kevbe uwu ẹbu avbe ediọn nii. Oteghe ohuan nii keghi yevbe oteghe ohuan na gbua, ọ mwẹ igho ihinrọn kevbe aro ihinrọn. Avbe aro nii keghi mudia ye ihe orhiọn ihinrọn ọghe Osanobua na gie la uhunmwu otagbọn hia. 7 Vbe ọwara ọkpa nii, Oteghe Ohuan nii keghi bu Ọmwa nii nọ tota ye ẹkete, ọ na ya miẹn ọnrẹn ebe na kiri nii nọ rre ọre obọ erha ọmwa. 8 Ọ ghi miẹn ọnrẹn ebe na kiri nii, evbayi enẹ ni rrọọ nii kevbe ediọn enẹ yan ugie (24) nii keghi dele gbe otọ vbe odaro Oteghe Ohuan nii. Ọkpọkpa vbe uwu iran keghi da akpata* yi mwẹ obọ kevbe ọkpan igoru ne eturari vuọẹn. (Eturari na keghi mudia ye ihe erhunmwu ọghe emwa ni huanrẹn.) 9 Iran na gha so ihuan ọgbọn, iran na gha kha wẹẹ: “Wẹ sẹ nọ gha rhie ebe na kiri nii, ne u vbe rhan emwi na ya gbalọe gbua, rhunmwuda, te a gbuẹ rua, u na ya esagiẹn ruẹ dẹlẹ emwa gie Osanobua vbe uwu ẹbu emwa ughughan ni ke uniẹn kevbe agbẹnvbo ughughan rre, ni vbe zẹ ẹvbo ughughan. 10 U keghi ya iran ru arriọba, u na vbe ya iran ru ohẹn ne Osanobua mwa, te iran khian gha khaevbisẹ yan uhunmwu otagbọn zẹvbe ọba.”

11 I keghi vbe bẹghe odibosa nibun ni lẹga ẹkete nii kevbe avbe evbayi ni rrọọ nii kẹ kevbe avbe ediọn nii, I na vbe họn urhu ọghe iran. Ohibirri* kevbe arriaisẹn arriaisẹn nibun ẹre iran wa gha khin. 12 Iran kegha ya urhu nọ la kha wẹẹ: “Oteghe Ohuan na te gbua, sẹ nọ khian gha mwẹ ukpọlọmwẹ, ẹfe, ẹwaẹn, ẹtin, ọghọ, uyi kevbe afiangbe.”

13 I keghi họn vbe emwi na yi hia ni rre ẹrinmwi kevbe agbọn, ni rre uwu otọ kevbe okun, kẹ kevbe emwi hia ni rre uwu iran, vbe iran kha wẹẹ: “Afiangbe, ọghọ, uyi kevbe ẹtin ọre ọghe Ọmwa nii nọ tota ye ẹkete kevbe Oteghe Ohuan nii vbe etẹbitẹ ya sẹ etẹghori.” 14 Evbayi enẹ ni rrọọ nii kegha kha wẹẹ: “Isẹ!” Avbe ediọn nii keghi dele gbe otọ, iran na rhie ugamwẹ ne Osanobua.

6 I keghi bẹghe Oteghe Ohuan nii vbe ọ rhan ọkpa vbe emwi ihinrọn na ya gbalọ ebe na kiri nii gbua. I na vbe họn vbe ọkpa vbe evbayi enẹ ni rrọọ nii, ya urhu nọ la vbe na ghee avannukhunmwu kha wẹẹ: “Larre!” 2 I keghi bẹghe ẹsin nọfua ọkpa, ọmwa nọ tota yan rẹn mu uhanbọ mwẹ, a na vbe mu ẹrhu ẹde nẹẹn. Ọ keghi ladian, ọ na gha khọnmiotọ khian, nọ mieke na khọnmiotọ fo fẹfẹfẹ.

3 Ọ ghi rhan emwi nogieva na ya gbalọ ebe na kiri nii gbua, I keghi họn vbe evbayi nogieva nọ rrọọ khare wẹẹ: “Larre!” 4 Ẹsin ọvbehe keghi ladian, ọ na gha mwẹ ẹmu nọ baa vbe na ghee erhẹn. A keghi rhie ẹtin ne ọmwa nọ tota yan rẹn nọ ya rhie ọfunmwegbe hin uhunmwu otagbọn rre, ne emwa miehe na gbele egbe iran rua; a na vbe mu umozo nọkhua nẹẹn.

5 Ọ ghi rhan emwi nogieha na ya gbalọ ebe na kiri nii gbua, I keghi họn vbe evbayi nogieha nọ rrọọ khare wẹẹ: “Larre!” I na bẹghe ẹsin nekhui, ọmwa nọ tota yan rẹn keghi da umwan* nọ mwẹ unu eva yi mwẹ obọ. 6 I keghi họn emwi nọ yevbe urhu ọmwa vbe ehe ne evbayi enẹ ni rrọọ nii ye, ọ na wẹẹ: “E dinariọs* ọkpa ẹre a ya khiẹn e kuọt ọkpa* ọghe wit. E dinariọs ọkpa ẹre a vbe ya khiẹn e kuọt eha ọghe ebali; uwa ghẹ rhia ofigbọn ọliv kevbe ayọn nọ rrọọ rua.”

7 Ọ ghi rhan emwi nogienẹ na ya gbalọ ebe na kiri nii gbua, I keghi họn vbe evbayi nogienẹ nọ rrọọ khare wẹẹ: “Larre!” 8 I keghi bẹghe ẹsin nọ fua rẹghẹrẹghẹ. A kegha tie ọmwa nọ tota yan rẹn “Uwu.” Idin* kegha lelẹe khian khuankhuankhuan. A keghi rhie asẹ ne iran, ne iran gha mwẹ ọdakha yan obọ ọkpa vbe uhunmwu otagbọn, vbe a gha ghae ẹre ye ihe enẹ, ne iran mieke na ya umozo nọ taẹn, ukhunmwu, emianmwẹ dan kevbe avbe aranmwẹ ni khọọ ni rre uhunmwu otagbọn gbele emwa rua.

9 Ọ ghi rhan emwi nogie isẹn na ya gbalọ ebe na kiri nii gbua, I keghi bẹghe esagiẹn* emwa na gbelua vbe ototọ ogiukpo; ẹmwẹ ọghe Osanobua kevbe osẹ ne iran sẹ, ẹre a gbele iran ba. 10 Iran keghi ya urhu nọ la kha wẹẹ: “Enọyaẹnmwa ne Udazi, ọmwa nọhuanrẹn kevbe ọmwa ẹmwata ẹre u khin. Vbọ khian kpẹẹ sẹ hẹ yi, u ke bu ohiẹn emwa ni rre agbọn, ne u vbe rria ikhi ne ima, rhunmwuda esagiẹn ima ne iran da kua?” 11 A keghi mu ẹwu ne guọrọ nọfua ne dọmwadẹ ọghẹe vbe uwu iran, a na vbe tama iran ne iran hẹwẹ nẹ kherhe, a te miẹn wẹẹ, eviẹn ne ihua iran gbae, ọni ọre etẹn iran na khian gbelua vbene a vbe gbele iran rua.

12 I keghi vbe bẹghe Oteghe Ohuan nii vbe ọ rhan emwi nogie ehan na ya gbalọ ebe na kiri nii gbua. Ugbohiotọ nọkhua keghi sunu; owẹn keghi sie rua vbe na ghee ukpọn akhiẹ na ya eto* ru, uki na gha baa vbe na ghee esagiẹn. 13 Avbe orhọnmwẹ ni rre orere iso keghi dele ku otagbọn, vbene ọmọ e fig nọ ma wo vbe ya khuọn kua, vbe okpẹhoho gha mu erhan rẹn rueghe. 14 Ẹrinmwi keghi kpa, a ma ghi miẹn ọnrẹn, ọ na yevbe ebe na kiri hin otọ rre. A keghi vulo oke hia kevbe otọ hia ne amẹ lẹga hin ehe ne iran ye rre. 15 Ẹre avbe ọba ni rre uhunmwu otagbọn, iran ni rre ukpo ọdakha, avbe ọkaokuo, iran ni fe, iran ni wegbe, avbe eviẹn hia kevbe emwa hia nẹi re eviẹn, na ya lẹre ye uwu avbe uvun okuta kevbe avbe okuta nikhua ni rre oke. 16 Iran kegha tama avbe oke nii kevbe avbe okuta nikhua nii wẹẹ: “Wa de rhu ima, ne uwa viọ ima lẹre hin odaro Ọmwa nii nọ tota ye ẹkete rre, ne izohu ọghe Oteghe Ohuan nii ghẹ vbe sẹ eke ne ima ye, 17 rhunmwuda, ẹdẹ izohu nọkhua ọghe iran rre nẹ. De ọmwa nọ khian sẹtin miẹn uhunmwu?”

7 Vbe iyeke ọni, I keghi bẹghe odibosa enẹ vbe iran mudia ye igienenẹ ọghe uhunmwu otagbọn, iran na daeyi gbangbangban ighẹ ẹhoho enẹ nọ ke igienenẹ ọghe uhunmwu otagbọn hoho rre, ne ẹhoho ghẹ mieke na hoho yan otagbọn ra okun ra erhan ke erhan. 2 I keghi vbe bẹghe odibosa ọvbehe vbe ọ ke ọlarre owẹn* dee, ọ kegha mwẹ emwi ne Osanobua nọ rrọọ rhie nẹẹn nọ ya yi emwa ama; ọ keghi ya urhu nọ la tie odibosa enẹ na rhie asẹ na, ne iran ya kuan agbọn kevbe okun, 3 ọ na wẹẹ: “Uwa ghẹ kuan agbọn ra okun ra avbe erhan ni rrọọ, vbe ẹ i re te ima yi ama ye uharo ọghe eguọmwadia Osanobua mwa fo nẹ.”

4 I keghi họn inu emwa na yi ẹre ama. Iran kegha re orhunmwu arriaisẹn enẹ yan ikiọkhọe (144,000); dọmwadẹ uniẹn ọghe Ivbi Izrẹl, ẹre iran na yi ẹre ama na ke rre:

9 Iyeke ọni, I keghi bẹghe oghẹn ne gbii ne ọmwa rhọkpa ma sẹtin ka, ni ke agbẹnvbo hia kevbe uniẹn hia rre, emwa ughughan ni zẹ ẹvbo ughughan ẹre iran vbe khin. Iran keghi mudia ye odaro ẹkete kevbe odaro Oteghe Ohuan nii, iran na yọ ẹwu ne guọrọ nọfua; iran na vbe viọ ewanmwẹ mwẹ obọ. 10 Iran na gha ya urhu nọ la kha wẹẹ: “Obọ Osanobua mwa nọ tota ye ẹkete kevbe ọghe Oteghe Ohuan nii ẹre imiẹnfan mwa ke rre.”

11 Avbe odibosa hia keghi mudia lẹga ẹkete nii, ke iran kevbe avbe ediọn kevbe evbayi enẹ ni rrọọ nii, iran keghi dele viọ aro rhu otọ vbe odaro ẹkete nii, iran na gha ga Osanobua, 12 iran na gha kha wẹẹ: “Isẹ! Osanobua mwa ẹre ọ yan urhomwẹ, uyi, ẹwaẹn, ekpọnmwẹ, ọghọ, ukpọlọmwẹ kevbe ẹtin vbe etẹbitẹ ya sẹ etẹghori. Isẹ.”

13 Ẹre ọkpa vbe ediọn nii na ghi nọ mwẹ wẹẹ: “Iran ni yọ ẹwu ne guọrọ nọfua na, de emwa ne iran khin yi? De ehe ne iran ke rre?” 14 Ẹre I na wa tama rẹn vbe ọwara ọkpa nii wẹẹ: “Enọyaẹnmwẹ, uwẹ ẹre ọ rẹn ewanniẹn ọghe inọta nii.” Ọ na ghi tama mwẹ wẹẹ: “Ena ọre emwa ni sẹtin la orueghe nọkhua nii ladian, iran ya esagiẹn Oteghe Ohuan nii họ ẹwu ne guọrọ ọghe iran nẹ, ọ na do gha fua. 15 Ọni ẹre ọ si ẹre ne iran na mudia ye odaro ẹkete ọghe Osanobua, ne iran na rhie ugamwẹ nọhuanrẹn nẹẹn vbe asọn kevbe avan vbe uwu ọgua Osa; Ọmwa nii nọ tota ye ẹkete gha tan ibọkpọ ọghẹe gue iran. 16 Ohanmwẹ kevbe ovbamẹ i khian ghi dọlegbe gbe iran, ovẹn i khian ghi vbe dọlegbe gbe iran, owowo rhọkpa i khian ghi vbe werriegbe tọn mu iran, 17 rhunmwuda, Oteghe Ohuan nii nọ rre adesẹneva ẹkete nii gha su iran, ọ ghi vbe su iran gha rrie ehe ne amẹ arrọọ nọ lẹẹ ladian vbe okuta ye. Osanobua ghi vbe khiẹn ameve hia hin aro iran rre.”

8 Vbe ọ ghi rhan emwi nogie ihinrọn na ya gbalọ ebe na kiri nii gbua, ẹrinmwi na ye hiẹrẹ la odẹ ifuanro ọgban. 2 I keghi bẹghe avbe odibosa ihinrọn nii, ni mudia ye odaro Osanobua, a keghi viọ okpe ihinrọn ne iran.

3 Odibosa ọvbehe nọ da ọkpan igoru na ya giẹn eturari yi mwẹ obọ keghi rre, ọ na mudia ye ogiukpo; a keghi viọ eturari nibun nẹẹn, nọ mieke na giẹn ọnrẹn vbe uhunmwu ogiukpo ọghe igoru nọ rre odaro ẹkete, vbe uwu ẹghẹ ne erhunmwu ọghe emwa ni huanrẹn hia khian vbe ya sẹ ehe ne Osanobua ye. 4 Ighogho ọghe eturari ne odibosa nii ghaa giẹn keghi deba erhunmwu ọghe emwa ni huanrẹn bu Osanobua gha rrie ẹrinmwi. 5 Sokpan, vbe ọwara ọkpa nii, odibosa nii keghi mu ọkpan eturari nii, ọ na wan erhẹn vbe ogiukpo nii, erhẹn nọ wan rẹn keghi vuọn ọkpan eturari nii, ọ na hihiẹ ẹre ku uhunmwu otagbọn. Avannukhunmwu na gha vannọ, a na gha họn urhu ughughan, ayan kegha yan, ugbohiotọ na vbe sunu. 6 Avbe odibosa ihinrọn nii, ni ghaa mwẹ okpe, keghi mu egbe ne iran ya kpee okpe nọ gue iran.

7 Odibosa nokaro ghi kpee okpe ọghẹe, a keghi rhurhẹ esia kevbe erhẹn na ya esagiẹn gua yan uhunmwu otagbọn; obọ ọkpa vbe uhunmwu otagbọn, vbe a gha ghae ẹre ye ihe eha keghi giẹn ruan; a gha vbe ghae avbe erhan ye ihe eha, obọ ọkpa vbọ keghi giẹn ruan, emwiokọ hia na vbe giẹn ruan.

8 Odibosa nogieva ghi kpee okpe ọghẹe, a keghi rrua emwi nọ yevbe na ghee oke nọkhua nọ giẹn, fi uwu okun. Obọ ọkpa vbe okun nii, vbe a gha ghae ẹre ye ihe eha keghi khian esagiẹn; 9 a gha ghae emwi hia ni mwẹ arrọọ* ni rre uwu okun ye ihe eha, obọ ọkpa vbọ keghi wulo; a gha vbe ghae avbe okọ nii rre okun ye ihe eha, obọ ọkpa vbọ keghi ni.

10 Odibosa nogieha ghi kpee okpe ọghẹe, orhọnmwẹ nọkhua nọ baa vbe na ghee urhukpa keghi de ke ẹrinmwi rre, ọ keghi de ye obọ ọkpa vbe ẹzẹ, vbe a gha ghae ẹre ye ihe eha, kevbe eke ne amẹ na lẹẹ ladian vbe okuta. 11 Eni orhọnmwẹ nii ọre Orriara. A gha ghae amẹ ye ihe eha, obọ ọkpa vbọ keghi khian enọ rriara, emwa nibun ni wọn amẹ nii keghi wulo, rhunmwuda na na yae khian enọ rriara.

12 Odibosa nogienẹ ghi kpee okpe ọghẹe, a keghi kinmwi obọ ọkpa vbe owẹn vbe a gha ghae ẹre ye ihe eha, a na kinmwi obọ ọkpa vbe uki vbe a gha ghae ẹre ye ihe eha, a na vbe kinmwi obọ ọkpa vbe avbe orhọnmwẹ vbe a gha ghae iran ye ihe eha, ne avbe obọ na kinmwi vbọ mieke na so ebiebi. Ẹghẹ nii, obọ ọkpa vbe ẹdẹ i khian ghi gha mwẹ awanwan vbe a gha ghae ẹre ye ihe eha, erriọ ẹre asọn khian vbe gha ye.

13 I keghi vbe bẹghe oghohọn ọkpa vbe ọ tin khian vbe ideghedeghe iso, I na vbe họn vbe ọ ya urhu nọ la kha wẹẹ: “Orueghe, orueghe, orueghe nọ ne iran ni rre uhunmwu otagbọn, rhunmwuda okpe ne avbe odibosa eha nikẹre khian kpee vbe nẹi khian ghi kpẹẹ gbe!”

9 Odibosa nogie isẹn ghi kpee okpe ọghẹe, I keghi bẹghe orhọnmwẹ ọkpa nọ de ke ẹrinmwi gha die uhunmwu otagbọn. A keghi rhie isanhẹn ọghe ehe na la la uvun nẹi mwẹ otọ nẹẹn. 2 Ọ ghi kie ehe na la la uvun nẹi mwẹ otọ nii, ighogho keghi vẹ ladian vbọ, vbe na ghee ighogho nọ ke ogidi erhẹn ladian. Ighogho nọ ke uwu ẹre ladian keghi ya owẹn kevbe iso* so ebiebi. 3 Avbe Irhiso keghi ke uwu ighogho nii vẹ ku uhunmwu otagbọn. A keghi rhie asẹ ne iran, egbe asẹ ne avbe ekpakpahuangan ni rre uhunmwu otagbọn vbe mwẹ. 4 A keghi tama iran ne iran ghẹ kuan avbe irunmwu, ra emwiokọ rhọkpa, ra erhan ke erhan, sokpan, emwa ne iran khian kuan ọre emwa nẹi mwẹ ama ọghe Osanobua vbe uharo ọghe iran.

5 A ma rhie asẹ ne avbe irhiso nii ne iran ya gbele iran rua, sokpan, asẹ na rhie ne iran, ọre ne iran ya agbọn lọghọ iran la uki isẹn. Obalọ ne iran na ghaa ye* keghi yevbe obalọ ne ọmwa miẹn vbe ekpakpahuangan gha sa ọmwa. 6 Vbe uwu ẹghẹ nii, emwa nibun ghi gha gualọ uwu, sokpan, iran i khian miẹn, iran ghi gha hoo ne iran wulo, sokpan, uwu ghi lẹẹ ne iran.

7 Avbe irhiso nii keghi yevbe ẹsin na mu ẹre egbe okuo; iran kegha mwẹ emwi ni yevbe ẹrhu ẹde ọghe igoru vbe uhunmwu iran, ugbaro iran keghi yevbe ugbaro ọghe emwa nagbọn. 8 Eto iran keghi yevbe eto ikhuo. Akọn iran keghi yevbe ọghe oduma. 9 Uhanhan ẹwẹ nọ yevbe uhanhan ẹwẹ ọghe ematọn kegha rre iran ẹwẹ. Owogho ọghe ifuẹn iran keghi yevbe owogho ọghe ikẹkẹ ne avbe ẹsin si khian vbe iran ghaa rrie okuo. 10 Deba ọni, iran kegha mwẹ ẹrhunrhunmwu nọ mwẹ obi, nọ yevbe ọghe ekpakpahuangan. Asẹ na rhie ne iran, ne iran ya si obalọ ye emwa egbe la uki isẹn, ẹrhunrhunmwu iran ẹre ọ ye. 11 Iran kegha mwẹ ọba nọ khaevbisẹ yan iran, ọni ọre odibosa nọ gbaroghe uvun nẹi mwẹ otọ nii. Vbe Hibru, eni ẹnrẹn ọre Abadọn,* sokpan, vbe Grik, eni ẹnrẹn na gha re Apoliọn.*

12 Orueghe ọkpa gberra nẹ. Ghee oo! Orueghe eva ọvbehe ye dee vbe iyeke ọna.

13 Odibosa nogie ehan ghi kpee okpe ọghẹe, I keghi họn vbe urhu ọkpa la ladian vbe uwu avbe igho ni rre oguikpo ọghe igoru nọ rre odaro Osanobua. 14 Urhu nii keghi tama odibosa nogie ehan nii, ne okpe rre ọre obọ wẹẹ: “Rhan odibosa enẹ na mu gba vbe Yufretis ne okpẹzẹ.” 15 Ẹre a na rhan odibosa enẹ nii, na mu ẹre egbe yotọ khẹ ẹghẹ, ẹdẹ, uki kevbe ukpo na zẹ yotọ, ne iran mieke na gbele obọ ọkpa, vbe a gha ghae emwa nagbọn ye ihe eha.

16 A keghi tama mwẹ inu ivbiyokuo ni hin ẹsin khian, iran kegha re ẹbo iyisẹn eva (200,000,000). 17 Vbene avbe ẹsin nii kevbe emwa ni tota yan iran ghaa ye hẹ, vbe umian ne I miẹn na khin: Iran kegha mwẹ uhanhan ẹwẹ nọ mwẹ ẹmu nọ baa vbe na ghee erhẹn, nọ ye raghoragho* kevbe nọ vboro* vbe na ghee sọlfọ.* Uhunmwu avbe ẹsin nii keghi yevbe uhunmwu oduma; erhẹn, ighogho kevbe sọlfọ* keghi ke unu iran ladian. 18 Orueghe eha na, nọ re erhẹn, ighogho kevbe sọlfọ* nọ ke unu iran ladian, keghi gbele obọ ọkpa vbe a gha ghae emwa nagbọn ye ihe eha. 19 Asẹ ne avbe ẹsin nii mwẹ, unu iran kevbe ẹrhunrhunmwu iran ẹre ọ ye; te ẹrhunrhunmwu iran yevbe ẹyẹn, avbe ẹrhunrhunmwu na vbe mwẹ uhunmwu, ẹre iran vbe loo ya kuan emwa.

20 Sokpan, nọ ne emwa ni dekẹe, ne avbe orueghe na ma gbele, iran ma fi werriẹ vbe emwi ne iran ru; iran ma da obọ ẹre yi ighẹ avbe orhiọn dan na gho, kevbe amazẹ ọghe igoru, ọghe esiliva, ọghe ekọpa, ọghe okuta kevbe ọghe erhan ne iran gho, avbe ẹbọ nẹi sẹtin bẹghe, nẹi họn ẹmwẹ, kevbe nẹi sẹtin khian. 21 Iran ma vbe zobọ vbe izigha ne iran do, orhiọn dan ne iran gu mu obọ, uyinmwẹ alama oghẹ* ne iran yin kevbe oyi ne iran rhaa.

10 Iyeke ọni, I keghi bẹghe odibosa ọvbehe nọ wegbe vbe ọ tuorre ke ẹrinmwi dee. Ọ na ya okuku mu egbe,* ikpin nọ ladian vbe orere iso kegha rre uhunmwu ẹnrẹn; ugbaro ọre keghi yevbe ovẹn, owẹ ọre na vbe yevbe orrẹ ọghe erhẹn. 2 Ovbi ebe na kiri na rhan rẹn yotọ kegha rre ọre obọ. Ọ na rhie owẹ erha ọmwa rẹn yan okun, sokpan, ọ na rhie owẹ iye ọmwa rẹn yan otagbọn. 3 Ọ keghi ya urhu nọ la davan vbe na ghee oduma. Ẹghẹ nọ ya davan, I keghi họn urhu ọghe avannukhunmwu ihinrọn.

4 Avbe avannukhunmwu ihinrọn nii ghi guan, I khian te wa gbẹnnẹ ẹmwẹ ne iran tae yotọ, sokpan, I keghi họn urhu nọ ke ẹrinmwi rre nọ khare wẹẹ: “Gi ẹmwẹ ne avbe avannukhunmwu ihinrọn nii tae gha re ẹmwẹ oro, ghẹ vbe gbẹn ọnrẹn yotọ.” 5 Odibosa nii ne I bẹghe, nọ rhie owẹ yan okun kevbe otagbọn, keghi tọn obọ erha ọmwa ọghẹe mu ghee ẹrinmwi. 6 Odibosa nii keghi ya eni Ọmwa nii nọ rrọọ vbe etẹbitẹ ya sẹ etẹghori yan, ọni ọre Ọmwa nii nọ yi ẹrinmwi kevbe emwi hia ni rrọọ, nọ vbe yi agbọn kevbe emwi hia ni rrọọ, kẹ kevbe okun kevbe emwi hia ni rrọọ, ọ na wẹẹ: “A i khian ghi si obọ ẹgogo ghee iyeke. 7 Sokpan, ọ gha sẹ ẹghẹ ne odibosa nogie ihinrọn khian ya kpee okpe ọghẹe, iyẹn nọ maan ọghe ẹmwẹ oro nọhuanrẹn ne Osanobua ya wewe ma avbe akhasẹ ne eviẹn ọnrẹn ghi khian ena mu sẹ.”

8 Iyeke ọni, urhu ne I ka họn nọ ke ẹrinmwi guan rre, keghi dọlegbe gu mwẹ guan, ọ na wẹẹ: “Gha khian, ne u ya rhie ebe na kiri nii na rhan rẹn yotọ, vbe obọ odibosa nii nọ rhie owẹ yan okun kevbe otagbọn.” 9 I na bu odibosa nii gha khian, I na we nọ rhie ovbi ebe na kiri nii mẹ. Ọ na tama mwẹ wẹẹ: “Miẹn, ne u rriọẹ. Te ọ khian gha rriara vbe ẹko ruẹ, sokpan, ọ ghi gha rhiẹnrhiẹn vbe unu ruẹ vbe na ghee owọn.” 10 Ẹre I na ghi miẹn odibosa nii ovbi ebe na kiri nii, I na rriọẹ. Ọ na gele gha rhiẹnrhiẹn vbe unu mwẹ vbe na ghee owọn, sokpan, I ghi rriọẹ nẹ, ọ na gha rriara vbe ẹko mwẹ. 11 Iran na tama mwẹ wẹẹ: “Te u gha werriegbe ya ta ẹmwẹ akhasẹ vbekpa emwa ughughan, agbẹnvbo ughughan, ẹvbo ughughan na zẹ kevbe avbe ọba nibun.”

11 A keghi rhie erhan* nọ yevbe ọkpọ mẹ, ọ na tama mwẹ wẹẹ: “Kpaegbe, ne u ya mwa ọgua Osa kevbe ogiukpo nọ rrọọ, u ghi vbe ka inu emwa ni ga vba. 2 Sokpan, nọ ne ẹghodo nọ rre orere vbe ọgua Osa nii, ghẹ mwa rẹn, wa sẹrae vberriọ, rhunmwuda, a muẹn ne avbe agbẹnvbo nẹ, iran gha vbe ya owẹ rhilo ẹvbo nọhuanrẹn nii ginna otọ vbe ọwara uki eva yan iyeva (42). 3 I gha gie ọsosẹ mwẹ eva, ne iran ya ta ẹmwẹ akhasẹ vbe ọwara ikpẹdẹ iyeha yan iyisẹn eva nọ ya yan arriaisẹn ọkpa (1,260), iran ghi yọ ukpọn akhiẹ.” 4 Iran ẹre erhan ọliv eva nii kevbe erhan ọmukpa eva nii mudia ye ihe ẹre, iran keghi mudia ye odaro enọ yan uhunmwu otagbọn.

5 Adeghẹ ọmwaikọmwa hoo nọ kuan iran, erhẹn ghi ke uwu unu iran ladian, ọ ghi giẹn eghian iran ruan. Erriọ ẹre a khian ya gbe ọmwaikọmwa nọ hoo nọ kuan iran rua. 6 Iran keghi mwẹ asẹ ne iran gha ya khui iso,* ne amẹ ghẹ rhọọ vbe uwu ẹghẹ ne iran ya ta ẹmwẹ akhasẹ, iran vbe mwẹ asẹ yan amẹ, iran gha sẹtin ru ẹre nọ khian esagiẹn, iran vbe mwẹ asẹ ne iran gha ya hihiẹ orueghe ughughan yan uhunmwu otagbọn inugba nọ rhirhi khọn iran ne iran ru vberriọ.

7 Iran gha ghi sẹ osẹ fo nẹ, aranmwẹ oha nọ ke uwu uvun nẹi mwẹ otọ ladian ghi gu iran khọn, ọ ghi vbe khọnmiotọ yan iran, ọ ghi gbele iran rua. 8 Ikun iran ghi gha rre idunmwu nọ rre adesẹ orere ẹvbo vbe okpẹvbo nii, ọni ọre ẹvbo na na kan enọ yan iran mu erhan. Ẹvbo na guan kaẹn na ẹre Sọdọm kevbe Igipt mudia ye ihe ẹre. 9 Emwa ughughan ni ke uniẹn kevbe agbẹnvbo ughughan rre, kevbe ni zẹ ẹvbo ughughan ghi gha ghee ikun iran vbe otọ vbe ọwara ikpẹdẹ eha vbe ukhiọnmwẹ, iran i kue na ya ree ikun iran ye idin. 10 Emwa ni rre uhunmwu otagbọn ghi gha ghọghọ rhunmwuda ighẹ iran wulo nẹ, iran ghi gha bọbọ ugie, iran ghi gha ha oko gie egbe, rhunmwuda, akhasẹ eva na, wa ya agbọn lọghọ emwa ni rre uhunmwu otagbọn.

11 Vbe ikpẹdẹ eha vbe ukhiọnmwẹ nii ghi gberra nẹ, uhiọnrọnmwẹ* ọghe arrọọ nọ ke obọ Osanobua rre keghi la uwu iran, iran na kpaegbe mudia, orrirri keghi gbe ku emwa hia ni miẹn iran. 12 Iran keghi họn urhu nọ la, nọ guan ke ẹrinmwi rre, ọ na tama iran wẹẹ: “Wa larre vbe ediran.” Erriọ ẹre iran ya la uwu okuku kpa gha rrie ẹrinmwi, eghian iran keghi bẹghe iran.* 13 Vbe uwu ẹghẹ nii zẹẹ, ugbohiotọ nọkhua keghi sunu. A gha ghae ẹvbo nii hia ye ihe igbe, obọ ọkpa vbọ keghi rẹnkhuan; orhunmwu arriaisẹn ihinrọn (7,000) ẹre ugbohiotọ nii miẹn ọnrẹn uhunmwu, ohan keghi kakabọ mu emwa ni ghi dekẹe, iran na gha rhie uyi gie Osanobua nọ rre ẹrinmwi.

14 Orueghe nogieva gberra nẹ. Ghee oo! Orueghe nogieha wa dee ẹgiẹgiẹ.

15 Odibosa nogie ihinrọn ghi kpee okpe ọghẹe, a kegha họn urhu ughughan ni la vbe ẹrinmwi, iran na gha kha wẹẹ: “Arriọba ọghe agbọn na khian Arriọba ọghe Enọyaẹnmwa nẹ kevbe ọghe Kristi ne irẹn zẹ, ọ ghi gha kha zẹvbe ọba, vbe etẹbitẹ ya sẹ etẹghori.”

16 Ediọn enẹ yan ugie (24) ni tota ye ẹkete ọghe iran vbe odaro Osanobua keghi dele viọ aro rhu otọ, iran na gha ga Osanobua, 17 iran na wẹẹ: “E Jehova* ne Osanobua ne Oghodua, nọ rrọọ nian kevbe nọ ka vbe rrọọ dee yi, ma kpọnmwọọn rhunmwuda ne u na ya ẹtin ruẹ nọkhua suẹn gha kha zẹvbe ọba. 18 Sokpan, ohu keghi suẹn gha mu avbe agbẹnvbo, izohu ruẹ na vbe rre, ọ keghi sẹ ẹghẹ na mwamwa yọ na khian ya bu ohiẹn emwa ni wulo, kevbe ẹghẹ na khian ya san eguọmwadia ruẹ ne akhasẹ ẹse, kevbe emwa ni huanrẹn, kẹ kevbe iran ni mu ohan eni ruẹ, ke ni kpọlọ, ke ni kanmwa, u ghi vbe fuẹn iran ruan ighẹ iran ni fuẹn agbọn na.”

19 Ọgua Osa nọ rre ẹrinmwi keghi kie yotọ, a kegha bẹghe ẹkpẹti ile nọ rre uwu ọgua Osa nii. Ayan kegha yan, a na gha họn urhu ughughan, avannukhunmwu na gha vannọ, ugbohiotọ na vbe sunu, esia ni kọnkọn na vbe gha dele.

12 Iyeke ọni, ama nọkhua keghi rhiegbe ma vbe ẹrinmwi: Okhuo ọkpa kegha rre evba. Owẹn ọre ukpọn nọ yọe, uki kegha rre ototọ owẹ ọre, ẹrhu ẹde na ya orhọnmwẹ iweva (12) ru kegha rre ọre uhunmwu. 2 Okhuo na kegha hanmwa. Emwi ubiẹmwẹ kegha ru ẹre, ọ na gha tu utumwẹ obalọ.

3 Ama ọvbehe keghi rhiegbe ma vbe ẹrinmwi. Ugbogiorinmwi ne gẹdẹgbẹ nọ mwẹ ẹmu nọ baa vbe na ghee erhẹn, nọ mwẹ uhunmwu ihinrọn kevbe igho igbe kegha rre evba; ẹrhu ẹde kegha rre dọmwadẹ uhunmwu ihinrọn nii. 4 Ẹrhunrhunmwu ẹnrẹn keghi kpolo obọ ọkpa, vbe a gha ghae avbe orhọnmwẹ ni rre iso ye ihe eha, ọ na kpolo iran ku otagbọn. Ugbogiorinmwi nii keghi mudia ke okhuo nii ne emwi ubiẹmwẹ ru, nọ mieke na gbe ẹre ọmọ re, vbe ọ gha wa biẹ ọre sotọ.

5 Ọ keghi biẹ ọmokpia, ọna ọre ọmọ nọ khian ya ọkpọ ematọn khaevbisẹ yan* agbẹnvbo hia. A keghi sanmwẹ ọmọ nii rhie, gha rrie ehe ne Osanobua ye kevbe ẹkete ẹre. 6 Okhuo nii keghi lẹẹ gha rrie ehe ne Osanobua mwamwa khẹ ọre vbe uwu ato, na khian na vbe koko ẹre la ikpẹdẹ iyeha yan iyisẹn eva nọ ya yan arriaisẹn ọkpa (1,260).

7 Okuo keghi mu sa vbe ẹrinmwi: E Maikẹl* kevbe avbe odibo ẹre keghi gu ugbogiorinmwi nii khọn, ugbogiorinmwi nii kevbe avbe odibo ẹre na vbe gu iran khọn, 8 sokpan, obọ iran ma ke ukhunmwu,* a ma ghi vbe kue ne iran gha rre ẹrinmwi. 9 Erriọ ẹre a ghi ya fi ugbogiorinmwi ne gẹdẹgbẹ nii fua gha die uhunmwu otagbọn; irẹn ọre ẹyẹn nẹdẹ nii na tie ẹre Esu kevbe Setan, irẹn ẹre ọ mu otagbọn hia rẹrẹ. A keghi fi ẹre fua gha die uhunmwu otagbọn, ke irẹn kevbe avbe odibo ẹre. 10 I keghi họn urhu ọkpa nọ la vbe ẹrinmwi, nọ khare wẹẹ:

“Banbanna nian, imiẹnfan ọghe Osanobua rre nẹ, ẹtin ẹnrẹn rhiegbe ma nẹ, a vbe mu Arriọba ọghẹe gbọọ nẹ, e Kristi ne irẹn zẹ, vbe suẹn gha khaevbisẹ nẹ, rhunmwuda, a fi ẹre fua gha die uhunmwu otagbọn nẹ ighẹ ọmwa nii nọ ba etẹn ima ifiẹzọ ke asọn ke avan vbe odaro Osanobua mwa! 11 Iran keghi khọnmiotọ yan rẹn rhunmwuda esagiẹn Oteghe Ohuan nii kevbe rhunmwuda ẹmwẹ ne iran ya gha sẹ osẹ ma emwa, ohan egbe* iran ma vbe to iran, sokpan, iran keghi mu egbe ne iran ya wu. 12 Rhunmwuda ọni, we ne ẹrinmwi gha ghọghọ kevbe emwa ni rrọọ! Sokpan, ọ gha baa su uhunmwu otagbọn kevbe okun gbe, rhunmwuda, Esu tuorre bu uwa gha dee nẹ, ohu dan wa vbe muẹn, rhunmwuda, ọ rẹnrẹn wẹẹ ovbi ẹghẹ kherhe ẹre irẹn ghi mwẹ.”

13 Ugbogiorinmwi nii ghi bẹghe ẹre wẹẹ, a fi irẹn fua gha die uhunmwu otagbọn nẹ, ọ na suẹn gha zẹ okhuo nii nọ biẹ ọmokpia nii kpokpo. 14 Sokpan, a keghi viọ ifuẹn eva ọghe oghohọn nọkhua nii ne okhuo nii, nọ mieke na tin gha rrie ehe na mwamwa khẹ ọre vbe uwu ato, evba nii ẹre a khian na koko ẹre la ẹghẹ ọkpa kevbe ẹghẹ eva kevbe ukhiọnmwẹ ẹghẹ* vbe ehe ne ẹyẹn nii i khian na sẹtin miẹn ọnrẹn.

15 Ẹyẹn nii keghi tue amẹ nọ yevbe ẹzẹ ladian vbe unu ẹnrẹn, ọ na tue ẹre lele okhuo nii vbe iyeke, ne ẹzẹ nii mieke na mu okhuo nii. 16 Sokpan, otọ keghi do ru iyobọ ne okhuo nii, otọ nii na rhan unu ẹnrẹn rua, ọ na mu ẹzẹ nii wọn, ọni ọre ẹzẹ nii nọ ke unu ugbogiorinmwi nii ladian. 17 Ohu okhuo nii na ghi suẹn gha mu ugbogiorinmwi nii, ọ na kpa, ọ na ya gha gu ivbi okhuo nii* ni dekẹe khọn, ọni ọre iran ni ya uhi Osanobua ru emwi kevbe na we nọ gha sẹ osẹ vbekpa e Jesu.

13 Ọ* keghi mudia hii ye uhunmwu ekhae nọ rre okun.

I keghi bẹghe aranmwẹ oha ọkpa vbe ọ ladian vbe uwu okun, ọ mwẹ igho igbe kevbe uhunmwu ihinrọn, ẹrhu ẹde kegha rre dọmwadẹ igho igbe nii, avbe eni na ya fi unu gie Osanobua kegha rre uhunmwu ẹnrẹn. 2 Aranmwẹ oha ne I bẹghe keghi yevbe ẹkpẹn, sokpan, owẹ ọre na yevbe owẹ akpakomiza,* unu ẹnrẹn keghi yevbe unu oduma. Ugbogiorinmwi nii ẹre ọ rhie ẹtin kevbe ẹkete ọghe aranmwẹ oha nii nẹẹn, kẹ kevbe asẹ nọkhua nọ mwẹ.

3 I keghi bẹghe ẹre wẹẹ, ọ yevbe na miẹn wẹẹ, a wa kakabọ kuan ọkpa vbe uhunmwu aranmwẹ oha nii. Sokpan, ama ẹwẹn nọ khian te gbe ẹre rua nii keghi rrie; emwa hia ni rre uhunmwu otagbọn na gha kpee lele aranmwẹ oha nii. 4 Iran na gha ga ugbogiorinmwi nii rhunmwuda asẹ nọ rhie ne aranmwẹ oha nii; iran na vbe gha ga aranmwẹ oha nii, iran na gha kha wẹẹ: “Gha yevbe aranmwẹ oha nii? De ọmwa nọ gha sẹtin gu ẹre khọn?” 5 A keghi rhie unu nọ talọ ẹmwẹ ni kọnkọn kevbe nọ rhoo ne aranmwẹ oha nii, a na vbe rhie asẹ nẹẹn nọ ya ru emwi nọ hoo nọ ru vbe ọwara uki eva yan iyeva (42). 6 Ọ keghi suẹn gha ya unu ẹnrẹn kpamisikan ku Osanobua kevbe eni ẹnrẹn, kẹ kevbe ehe nọ dia, uhiẹn, ọ na vbe gha filo unu gie emwa ni rre ẹrinmwi. 7 A keghi rhie ẹghẹ nẹẹn nọ ya gu emwa ni huanrẹn khọn, nọ vbe khọnmiotọ yan iran, a na vbe rhie asẹ nẹẹn nọ ya gha kha yan emwa ughughan ni ke uniẹn kevbe agbẹnvbo ughughan rre, ni vbe zẹ ẹvbo ughughan. 8 Emwa hia ni rre uhunmwu otagbọn gha gae. Ke na ya bu agbọn tu agbọn, ọkpa i rrọọ vbe uwu iran, na gbẹn eni ẹnrẹn ye ebe na kiri ọghe arrọọ ọghe Oteghe Ohuan na gbua.

9 Ọmwa nọ mwẹ ehọ, gi ẹre họn. 10 Ọmwaikọmwa na wẹẹ a khian mu ye imu, ẹre ọ khian gha rre imu. Adeghẹ ọmwaikọmwa na ya umozo gbe ọmwa rua,* umozo ẹre a khian vbe ya gbe ẹre rua. Ọna ẹre ọ si ẹre nọ na khẹke ne emwa ni huanrẹn gha mwẹ izinegbe kevbe amuẹtinyan.

11 I keghi vbe bẹghe aranmwẹ oha ọvbehe vbe ọ ke otagbọn ladian, ọ kegha mwẹ igho eva vbe na ghee oteghe ohuan, sokpan, ọ keghi suẹn gha guan vbe na ghee ugbogiorinmwi. 12 Ọ keghi sirra aranmwẹ oha nokaro gha loo asẹ hia ne aranmwẹ oha nokaro nii mwẹ. Ọ keghi ru ẹre ne uhunmwu otagbọn kevbe emwa ni rrọọ gha ga aranmwẹ oha nokaro nii; ọni ọre aranmwẹ oha ne ama ẹwẹn nọ khian te gbe ẹre rua ghi do rrie. 13 Ọ keghi winna iwinna ọyunnuan ughughan, uhiẹn, ọ na we ne erhẹn gha ke ẹrinmwi dele ye uhunmwu otagbọn sirra emwa nagbọn.

14 Ọ keghi mu emwa ni rre uhunmwu otagbọn rẹrẹ rhunmwuda iwinna ọyunnuan na rhie ẹghẹ nẹẹn ya winna sirra aranmwẹ oha nii, ọ na vbe tama emwa ni rre uhunmwu otagbọn, ne iran ma amazẹ ne aranmwẹ oha nii na te ya umozo kuan, nọ ghi miẹn uhunmwu. 15 A keghi vbe rhie asẹ ne aranmwẹ oha nogieva nii, nọ ya hiọnrọn arrọọ ye uwu amazẹ ọghe aranmwẹ oha nokaro, ne amazẹ ọghe aranmwẹ oha nokaro nii mieke na sẹtin gha guan, nọ vbe sẹtin gbele emwa hia ni ma ya uhunmwu rhanmwẹ otọ ne irẹn.

16 Ọ keghi we na yi ama ye obọ erha ọmwa, ra uharo ọghe emwa hia, ke ni kpọlọ, ke ni kanmwa, ke ọdafẹn, ke ovbiogue, ke ni yan egbe iran kevbe eviẹn. Ọ na wẹẹ, emwi nẹi mwẹ a ma ru na khin. 17 Ọ na wẹẹ, ọmwa rhọkpa i khian sẹtin dẹ emwi, ẹ i khian vbe sẹtin khiẹn, vbe ẹ i re te ọ mwẹ ama nii, ọni ọre eni ọghe aranmwẹ oha nii, ra olaba ọghe eni ẹnrẹn. 18 Emwa na ẹre ọ na khẹke na loo ẹwaẹn oo: We ne ọmwa nọ mwẹ ẹwaẹn roro olaba ọghe aranmwẹ oha na kugbe, rhunmwuda, olaba ọghe ọmwa nagbọn nọ, olaba na ọre ehan yan iyeha nọ ya yan iyisẹn ehan (666).

14 Iyeke ọni, I keghi bẹghe Oteghe Ohuan nii, ọ mudia yan uhunmwu Oke Zaiọn; orhunmwu arriaisẹn enẹ yan ikiọkhọe (144,000) keghi mudia kẹ, a keghi gbẹn eni ẹnrẹn kevbe eni Erhae ye iran uharo. 2 I keghi họn owogho nọ ke ẹrinmwi rre, ọ yevbe owogho ọghe ogbigbi amẹ kevbe owogho ọghe avannukhunmwu nọ kakabọ van; owogho ne I họn keghi yevbe ọghe ẹbu emwa ni so ihuan, ni vbe kpee akpata* ba ẹre. 3 Iran kegha so ihuan nọ yevbe ihuan ọgbọn vbe odaro ẹkete nii kevbe odaro evbayi enẹ ni rrọọ nii, kẹ kevbe odaro avbe ediọn nii. Ọmwa rhọkpa ma sẹtin ruẹ vbene a ya so ihuan nii hẹ, vbọ gberra orhunmwu arriaisẹn enẹ yan ikiọkhọe (144,000) nii, na dẹ ke uhunmwu otagbọn rre. 4 Iran na keghi re emwa ni ma gu ikhuo yin uyinmwẹ usankanmwẹ; uhiẹn, iran ma he rẹn okhuo. Iran na, ẹre ọ wa lele Oteghe Ohuan nii khian vbe ehe nọ rhirhi la. Uwu ẹbu emwa nagbọn ẹre a na dẹ iran, zẹvbe emọ nokaro na ya zọ ese gie Osanobua kevbe Oteghe Ohuan nii. 5 A ma miẹn ẹmwẹ erẹrẹ vbe unu iran; iran i vbe mwẹ orra rhọkpa.

6 I keghi vbe bẹghe odibosa ọvbehe vbe ọ tin khian vbe ideghedeghe iso, ọ kegha mwẹ iyẹn nọ maan ọghe etẹbitẹ nọ khian ya wewe ma emwa ni rre uhunmwu otagbọn, ọni ọre emwa ughughan ni ke uniẹn kevbe agbẹnvbo ughughan rre, ni vbe zẹ ẹvbo ughughan. 7 Ọ na gha ya urhu nọ la kha wẹẹ: “Wa gha mu ohan Osanobua, ne uwa vbe gha rhie uyi nẹẹn, rhunmwuda, ẹghẹ nọ khian ya bu ohiẹn emwa sẹ nẹ. Nọnaghiyerriọ, wa ga Ọmwa nii nọ yi ẹrinmwi kevbe otagbọn, kevbe okun kevbe eke ne amẹ na lẹẹ ladian vbe okuta.”

8 Odibosa nogieva keghi vbe lelẹe, ọ na wẹẹ: “Ọ de guọghua nẹ! E Babilọn Nọkhua de guọghua nẹ, irẹn nii nọ ya agbẹnvbo hia da vbe ayọn ọghe orriarria* uyinmwẹ alama oghẹ* nọ yin!”

9 Odibosa nogieha keghi vbe lele iran, ọ na ya urhu nọ la kha wẹẹ: “Adeghẹ ọmwaikọmwa ga aranmwẹ oha nii kevbe amazẹ ọghẹe, a na vbe yi ama ye ọmwa nii uharo ra obọ ẹre, 10 ọmwa nii gha vbe wọn vbe ayọn na ma gua ọghe izohu Osanobua, na tuere ye uwu ukpu ọghe izohu ọghẹe; a ghi ya erhẹn kevbe sọlfọ* rri ọmwa nii oya vbe odaro avbe odibosa ni huanrẹn kevbe odaro Oteghe Ohuan nii. 11 Ighogho ọghe erhẹn na ya rri iran oya ghi gha yo odukhunmwu vbe etẹbitẹ ya sẹ etẹghori, egbe i khian rọkhọ iran ke asọn ke avan, ọni ọre emwa ni ga aranmwẹ oha nii kevbe amazẹ ọghẹe, kẹ kevbe ọmwaikọmwa na yi ẹre ama ọghe eni amazẹ nii. 12 Ọna ẹre ọ si ẹre nọ na khẹke ne emwa ni huanrẹn gha mwẹ izinegbe, ọni ọre emwa ni ya uhi Osanobua ru emwi, kevbe ni daeyi gbain ighẹ amuẹtinyan ọghe Jesu.”

13 Iyeke ọni, I keghi họn urhu ọkpa nọ ke ẹrinmwi guan rre, ọ na wẹẹ: “Gbẹn ẹmwẹ na yotọ: Oghọghọ nọ ne emwa ni wulo nẹ, ọni ọre emwa ni gu Enọyaẹnmwa rrọọ vbe akugbe ni wulo ke ẹghẹ na kpa. Orhiọn nọhuanrẹn khare wẹẹ, te ọ khẹke ne iran ya hẹwẹ vbe ẹsọn ne iran miẹn, rhunmwuda, emwi esi ne iran ru lele iran khian.”

14 Iyeke ọni, I keghi bẹghe okuku nọfua. Ọmwa nọ tota yan okuku nii keghi yevbe ovbi ọmwa, ẹrhu ẹde ọghe igoru kegha rre ọre uhunmwu, abẹ nọ mu na ya rhọ emwi okọ kegha rre ọre obọ.

15 Odibosa ọvbehe keghi ke uwu ọgua Osa ladian, ọ na ya urhu nọ la datie ọmwa nii nọ tota yan okuku, ọ na tama rẹn wẹẹ: “Suẹn gha loo abẹ ruẹ ya rhọ emwiokọ, rhunmwuda, ẹghẹ na ya rhọ emwiokọ sẹ nẹ; emwiokọ ni rre uhunmwu otagbọn sẹ na rhọ nẹ.” 16 Ọmwa nii nọ tota yan okuku keghi fi abẹ nọ ya rhọ emwiokọ la uhunmwu otagbọn, ọ keghi rhọ emwiokọ ni rre uhunmwu otagbọn.

17 Odibosa ọvbehe na vbe ladian vbe ọgua Osa nọ rre ẹrinmwi, ọ na vbe gha mwẹ abẹ nọ mu na ya rhọ emwiokọ.

18 Odibosa ọvbehe keghi ke uwu ogiukpo ladian, ọ kegha mwẹ asẹ yan erhẹn. Ọ na ya urhu nọ la datie odibosa nii nọ mwẹ abẹ nọ mu na ya rhọ emwiokọ, ọ na tama rẹn wẹẹ: “Suẹn gha loo abẹ ruẹ nọ mu ya rhọ ititi e vaẹn ni rre uhunmwu otagbọn, rhunmwuda, avbe ọmọ ni rre uhunmwu ẹnrẹn vboo nẹ.” 19 Odibosa nii keghi fi abẹ nọ ya rhọ emwiokọ la uhunmwu otagbọn, ọ na yae rhọ e vaẹn ni rre uhunmwu otagbọn; ọ keghi silo ehia gha die uvun nọkhua na na ru ayọn, nọ mudia ye ihe izohu ọghe Osanobua. 20 A kegha minọ ọmọ e vaẹn nii vbe ako na na ru ayọn, vbe a gha ladian hin orere ẹvbo rre nẹ, esagiẹn nọ ke ako na na ru ayọn nii ladian, gha yo sẹ ehe na rrọ ekagha yi* vbe unu ẹsin; eke ne esagiẹn nii lẹẹ sẹ, gha sẹ ibiriki enẹ yan iyenẹ nọ ya yan iyisẹn (184).*

15 I keghi bẹghe ama ọvbehe vbe ẹrinmwi, ọni ọre avbe odibosa ni da orueghe ihinrọn yi mwẹ obọ, ama nọkhua kevbe ọghe ọyunnuan ghaa nọ. Ena ọre orueghe nokiekie, rhunmwuda, avbe orueghe na gha ghi sẹ ufomwẹ, izohu Osanobua ghi vbe fo.

2 I keghi vbe bẹghe emwi nọ yevbe okun ne ughegbe, na ya erhẹn gua. I na vbe bẹghe emwa ni khọnmiotọ yan aranmwẹ oha nii kevbe amazẹ ọghẹe kevbe olaba ọghe eni ẹnrẹn, iran keghi mudia ye ọkpẹn okun ne ughegbe nii, iran na vbe da akpata* ọghe Osanobua yi mwẹ obọ. 3 Iran na gha so ihuan e Mozis ne ọguọmwadia Osanobua kevbe ihuan ọghe Oteghe Ohuan nii, iran na gha kha wẹẹ:

“E Jehova* ne Osanobua ne Oghodua, nọ kpọlọ kevbe nọ yan ọmwa unu ruan ẹre iwinna ruẹ khin. Wẹ ọre Ọba ọghe etẹbitẹ, emwi hia ne u ru keghi re nọ gbae kevbe ọghe ata. 4 E Jehova,* de ọmwa nẹi khian gele mu ohan ruẹ, nẹi khian vbe rhie uyi ye eni ruẹ? Wẹ ọkpa kẹkan ọre ọmwa na gha sẹtin mu ẹtin yan. Agbẹnvbo hia gha rrie odaro ruẹ, iran ghi do gha rhie ugamwẹ nuẹn, rhunmwuda, aro iran sẹ ibuohiẹn ata ruẹ.”

5 Vbe iyeke ọni, I keghi bẹghe ẹre wẹẹ, a kie ehe nọhuanrẹn nọ rre ibọkpọ ọghe osẹ yotọ vbe ẹrinmwi. 6 Odibosa ihinrọn nii, ni da orueghe ihinrọn yi mwẹ obọ keghi ke uwu ọgua Osa nii ladian, iran keghi ya ukpọn e linẹn nọhuanrẹn sẹsẹsẹ, nọ vbe ye wannawanna haan. Iran na vbe ya ọza ọghe igoru gba ẹwẹ. 7 Ọkpa vbe evbayi enẹ ni rrọọ nii keghi viọ ọkpan igoru ihinrọn nọ vuọn ne izohu Osanobua ne odibosa ihinrọn nii, ọni ọre Osanobua nọ rrọọ vbe etẹbitẹ ya sẹ etẹghori. 8 Ighogho keghi gba ọgua Osa nii, rhunmwuda uyi Osanobua kevbe rhunmwuda ẹtin ẹnrẹn. Ọmwa rhọkpa ma sẹtin la ọgua Osa nii, a te miẹn wẹẹ, orueghe ihinrọn nọ ke obọ odibosa ihinrọn nii rre sẹ ufomwẹ.

16 I keghi họn urhu ọkpa nọ la, nọ ke uwu ọgua Osa guan rre, ọ na tama odibosa ihinrọn nii wẹẹ: “Wa gha khian ne uwa ya rhurhẹ ọkpan ihinrọn ọghe izohu Osanobua yan uhunmwu otagbọn.”

2 Odibosa nokaro keghi kpa, ọ na ya rhurhẹ ọkpan ọghẹe yan uhunmwu otagbọn. Ẹtẹ dan nọ mu ọmwa ohan keghi ladian vbe egbe emwa ni mwẹ ama ọghe aranmwẹ oha nii kevbe ni ga amazẹ ọghẹe.

3 Odibosa nogieva keghi rhurhẹ ọkpan ọghẹe ye uwu okun. Okun nii na khian esagiẹn, ọ na yevbe esagiẹn ọmwa nọ wu, emwi hia ni ghi mwẹ arrọọ nẹ,* ni rre okun nii keghi wulo.

4 Odibosa nogieha keghi rhurhẹ ọkpan ọghẹe ye uwu ẹzẹ kevbe eke ne amẹ na lẹẹ ladian vbe okuta. Iran keghi khian esagiẹn. 5 I keghi họn vbe odibosa nọ gbaroghe amẹ khare wẹẹ: “Wẹ nii nọ rrọọ kevbe nọ ka rrọọ dee yi kevbe nọ gia mu ẹtin yan, ọmwa ata ẹre u khin, rhunmwuda, u bu avbe ohiẹn na nẹ. 6 Te iran da esagiẹn ọghe emwa ni huanrẹn kevbe ọghe avbe akhasẹ kua, ọni ẹre ọ si ẹre ne u na mu esagiẹn ne iran wọn; ọni ẹre ọ wa khẹke iran zẹẹ.” 7 I keghi vbe họn vbe ogiukpo khare wẹẹ: “Vbene ẹmwata, Jehova* ne Osanobua ne Oghodua, ohiẹn ata ẹre u bu, odẹ nọ gbae ẹre u vbe ya bu ẹre.”

8 Odibosa nogienẹ keghi rhurhẹ ọkpan ọghẹe yan ovẹn, a keghi fan obọ ẹre ne ovẹn, nọ ya owowo ẹre giẹn emwa vbe na ghee erhẹn. 9 Owowo ọghe ovẹn nọ kakabọ tọn kegha tọn emwa nii vbe egbe, sokpan, iran kegha ya unu rhia eni Osanobua, nọ re ọmwa nọ mwẹ asẹ yan avbe orueghe na, iran ma fi werriẹ, ne iran gha rhie uyi nẹẹn.

10 Odibosa nogie isẹn keghi rhurhẹ ọkpan ọghẹe yan ẹkete ọghe aranmwẹ oha nii. Arriọba ọghẹe keghi so ebiebi, iran na gha ya akọn rri aranmwẹ ni rre iran unu rhunmwuda obalọ ne iran ghaa ye. 11 Sokpan, iran na gha filo unu gie Osanobua nọ rre ẹrinmwi rhunmwuda obalọ ne iran ye kevbe ẹtẹ nọ rre iran egbe, iran ma vbe zobọ vbe emwi ne iran ru.

12 Odibosa nogie ehan keghi rhurhẹ ọkpan ọghẹe ye Yufretis ne okpẹzẹ; ẹzẹ nii keghi ka, ne avbe ọba ni ke ọlarre owẹn* dee miẹn ehe la.

13 Iyeke ọni, I keghi bẹghe ẹmwẹ ọghe orhiọn eha ni ma huan* ni yevbe ẹkirẹ, vbe iran ke unu ugbogiorinmwi nii ladian kevbe unu aranmwẹ oha nii, kẹ kevbe unu akhasẹ ohoghe nii. 14 Obọ avbe orhiọn dan ẹre avbe ẹmwẹ ọghe orhiọn na ke rre; avbe ẹmwẹ ọghe orhiọn na keghi winna iwinna ọyunnuan ughughan, iran keghi ladian bu avbe ọba ni rre uhunmwu otagbọn hia, ne iran mieke na si iran koko gha die okuo na khian khọn vbe ẹdẹ nọkhua ọghe Osanobua ne Oghodua.

15 “Ghee oo! Te I dee vbe na ghee oyi. Oghọghọ nọ ne ọmwa nii nọ ma vbiẹ, nọ vbe gbaroghe ẹwu nọ yọ ke odukhunmwu ẹse, nẹ ghẹ mieke na gha ya irhunmwirhun khian, ẹghẹ nii, emwa ghi do bẹghe emwi nọ rhuan ukpọn gue.”*

16 Iran keghi si iran koko ye eke ọkpa ne Ivbi e Hibru tie ẹre Amagẹdọn.*

17 Odibosa nogie ihinrọn keghi rhurhẹ ọkpan ọghẹe ye ẹhoho. Ẹre urhu ọkpa nọ la na guan ke ẹkete nọ rre ọgua Osa ladian, ọ na wẹẹ: “A ru ẹre nẹ!” 18 Ayan kegha yan, a na gha họn urhu ughughan, avannukhunmwu na gha vannọ, ugbohiotọ nọkhua keghi sunu, a ma he miẹn egbọre ẹdẹ ke ne emwa nagbọn ke rre agbọn; ọ da otọ, ẹ i re nekherhe, erriọ ẹre ọ vbe ya kakabọ wegbe. 19 Okpẹvbo nii keghi waa ye ihe eha, avbe ẹvbo ni rre agbẹnvbo keghi guọghua; Osanobua keghi ye Babilọn Nọkhua rre, ọ na rhie ukpu ayọn ne izohu ọhanabe ọghẹe ye, ye ọre obọ. 20 A ma ghi miẹn avbe otọ hia ne amẹ te lẹga, a ma ghi vbe miẹn avbe oke. 21 Iyeke ọni, ikpesia ni kọnkọn, ne ukhuamwẹ ọnrẹn gha sẹ odẹ etalẹnt* ọkpa, kegha ke ẹrinmwi dele yan emwa, emwa nii kegha filo unu gie Osanobua rhunmwuda ọfuan ne ikpesia nii si ye iran egbe, rhunmwuda, ọfuan nii wa da otọ, ẹ i re nekherhe.

17 Ọkpa vbe odibosa ihinrọn nii, ni da ọkpan ihinrọn nii yi keghi bu mwẹ gha dee do tama mwẹ wẹẹ: “Larre, I gha ma ruẹ ohiẹn na khian bu gbe igbiragia ne oghogho nii, nọ tota yan amẹ nibun, 2 ne avbe ọba ni rre uhunmwu otagbọn gu yin uyinmwẹ alama oghẹ,* emwa ni rre uhunmwu otagbọn na vbe da vbe ayọn ọghe uyinmwẹ alama oghẹ* nọ yin, ayọn nii na gha gbe iran.”

3 Odibosa nii keghi ya ẹtin orhiọn nọhuanrẹn mu mwẹ gha rrie uwu ato. Evba ẹre I na bẹghe okhuo ọkpa nọ tota yan aranmwẹ oha nọ baa, ne eni na ya fi unu gie Osanobua gba ẹre aro gba ẹre iyeke, ọ vbe gha mwẹ uhunmwu ihinrọn kevbe igho igbe. 4 Ukpọn nọ baa* kevbe ukpọn ododo ẹre okhuo nii ya mu egbe, ọ keghi ya igoru kevbe avbe okuta ighobioye kẹ kevbe avbe ivie ni fi wainwain* te egbe; ọ keghi da ukpu igoru yi mwẹ obọ, nọ vuọn ne emwi osọnnọ ughughan kevbe avbe emwi ni ma huan ọghe uyinmwẹ alama oghẹ* nọ yin. 5 A keghi gbẹn eni na ma rẹn otọ re ye ọre uharo, ọni ọre: “E Babilọn Nọkhua, iye igbiragia hia kevbe iye emwi osọnnọ ni rre uhunmwu otagbọn.” 6 I keghi bẹghe ẹre wẹẹ, esagiẹn emwa ni huanrẹn kevbe ọghe avbe ọsosẹ ọghe Jesu ne okhuo na wọn, kegha gbe ẹre vbe na ghee ayọn.

Vbe I ghi bẹghe ẹre, ọ keghi wa kakabọ kpa mwẹ odin. 7 Ẹre odibosa nii na tama mwẹ wẹẹ: “Vbọzẹ nọ na kpa ruẹ odin yi? I gha tama ruẹ ẹmwẹ oro nọ dekaẹn okhuo na kevbe aranmwẹ oha nọ mwẹ uhunmwu ihinrọn kevbe igho igbe, nọ mu okhuo na khian: 8 Aranmwẹ oha ne u bẹghe te ka gha rrọọ, sokpan, ẹ i ghi rrọọ nian; ọrheyerriọ, te ọ khian ghi ke uwu uvun nẹi mwẹ otọ ladian na, iyeke ọni, a ghi fuẹn ọnrẹn rua. Emwa ni rre uhunmwu otagbọn, na ma gbẹnnẹ eni iran ye ebe na kiri ọghe arrọọ, ke na ya bu agbọn tu agbọn gha dee, gha yan unu ruan vbe iran gha bẹghe vbene aranmwẹ oha nii ka ya gha rrọọ, vbene ẹ i ghi ya rrọọ nian, kevbe vbene ọ khian ya werriegbe rre hẹ.

9 “Ẹwaẹn ẹre a khian ya sẹtin rẹn otọ ẹmwẹ vbenian: Uhunmwu ihinrọn nii keghi mudia ye ihe oke ihinrọn ne okhuo nii tota yan. 10 Ọba ihinrọn ẹre ọ rrọọ: Isẹn dele nẹ vbọ, ọkpa rrọọ nian, nọkẹre ma he rre; sokpan, ọ gha rre, ovbi ẹghẹ kherhe ẹre ọ khian ya vbe otọ. 11 Aranmwẹ oha nii nọ te ka gha rrọọ, sokpan, nẹi ghi rrọọ nian, ẹre ọ vbe re ọba nogie erẹnrẹn; sokpan, uwu ọba ihinrọn nii ẹre ọ na ladian, iyeke ọni, a ghi fuẹn ọnrẹn rua.

12 “Igho igbe ne u bẹghe, keghi mudia ye ihe ọba igbe na ma he mu arriọba na, ne iran gha khaevbisẹ yan, sokpan, a keghi rhie asẹ ne iran, ne iran ya deba aranmwẹ oha nii gha kha zẹvbe ọba la ughaẹdẹ* ọkpa. 13 Emwi ọkpa ẹre ọ rre iran na ekhọe, rhunmwuda ọni, iran keghi rhie ẹtin kevbe asẹ ọghe iran, ne aranmwẹ oha nii. 14 Iran gha gu Oteghe Ohuan nii khọn, sokpan, rhunmwuda ne Oteghe Ohuan nii na re Ọba nọ sẹ ọba, Ogie nọ sẹ ogie,* ọ gha khọnmiotọ yan iran. Erriọ ẹre emwa ni deba ẹre, khian vbe ru ẹre, ọni ọre emwa na tiere, na hannọ zẹ kevbe ni mudia ẹse.”

15 Odibosa nii keghi tama mwẹ wẹẹ: “Amẹ ne u bẹghe nii, ne igbiragia nii tota yan, mudia ye ihe emwa, ẹbu emwa, agbẹnvbo kevbe ẹvbo na zẹ. 16 Igho igbe nii ne u bẹghe kevbe aranmwẹ oha nii, ghi do gha khẹko igbiragia nii, iran ghi fuẹn ọnrẹn rua, iran ghi vbe bannọ ọnrẹn ruan, iran ghi rri efun egbe ẹre, iran ghi ya erhẹn giẹn ọnrẹn ruan fẹfẹfẹ. 17 Rhunmwuda, Osanobua ẹre ọ rhie ẹre ye iran ekhọe, ne iran ru emwi ne irẹn hoo, nọ vbe re emwi nọ rre iran hia ekhọe; ọni nọ wẹẹ, ne iran mu arriọba ọghe iran ne aranmwẹ oha nii, a te miẹn wẹẹ, ẹmwẹ Osanobua do sẹ. 18 Okhuo nii ne u bẹghe, keghi mudia ye ihe okpẹvbo nii nọ khaevbisẹ yan avbe ọba ni rre uhunmwu otagbọn.”

18 Iyeke ọna, I keghi bẹghe odibosa ọvbehe vbe ọ tuorre ke ẹrinmwi dee, ọ kegha mwẹ asẹ nọkhua, awanwan ọghe uyi nọ rre ọre egbe keghi gba otagbọn hia. 2 Ọ keghi ya urhu nọ la datu wẹẹ: “Ọ de guọghua nẹ! E Babilọn Nọkhua de guọghua nẹ, evba ẹre avbe orhiọn dan kevbe avbe orhiọn ni ma huan* hia na ghi miẹn agba dia, evba nii ẹre avbe ahianmwẹ hia ni ma huan kevbe ni hu ọmwa ẹko na ghi vbe lomi! 3 Rhunmwuda ayọn ọghe orriarria* uyinmwẹ alama oghẹ* nọ yin, agbẹnvbo hia keghi de ye ọre obọ, avbe ọba ni rre uhunmwu otagbọn keghi gu ẹre yin uyinmwẹ alama oghẹ, iran ni do okpẹki* ni rre uhunmwu otagbọn keghi khian emwa ni fe rhunmwuda emwi ewe ne okhuo na si gboo, vbene ekhue i na muẹn.”

4 I keghi vbe họn urhu ọvbehe nọ guan ke ẹrinmwi rre wẹẹ: “Wa ke evba ladian, wa ne emwa mwẹ, adeghẹ uwa ma hoo ne uwa gu ẹre gha mwẹ obọ vbe orukhọ ọghẹe kevbe deghẹ uwa ma hoo ne uwa gu ẹre ghae vbe oya na khian rri ọre. 5 Rhunmwuda, orukhọ nọ ru bun gbe, te ọ ghi kue yo sẹ iso! Osanobua keghi ye emwi dan* hia nọ he ru rre. 6 Wa* ru ẹre emwi nọ ru emwa ọvbehe re, wa ha ẹre osa ye emwi nọ ru, uhiẹn, wa ghi ha ukhukhu eva nẹẹn; ayọn ne irẹn gua ye ukpu mu ne emwa wọn, wa ghi mu egbọre eva nẹẹn wọn. 7 Ugbẹnvbe a miẹn wẹẹ, ọ mu egbe ẹre ye ukpo nọ yo, ọ na vbe gha si ẹfe gboo vbene ekhue ma na muẹn, oya kevbe akhiẹ nọ wa vbe khẹke ẹre zẹẹ, ẹre uwa khian si ye ọre egbe. Rhunmwuda, ẹghẹ hia ẹre ọ ya tae vbe ekhọe ọre wẹẹ: ‘I tota zẹvbe oloi, I i re okhuo nọ dẹgbẹe, ẹghẹ ọkpa i rrọọ ne I khian vbe ya khiẹ.’ 8 Rhunmwuda ọni, ẹdẹ ọkpa ẹre avbe orueghe khian hihiẹ yan rẹn, uwu, akhiẹ kevbe ukhunmwu ẹre ọ khian dekun ẹnrẹn, a ghi ya erhẹn giẹn ọnrẹn ruan fẹfẹfẹ, rhunmwuda, Osanobua ne Jehova* nọ bu ohiẹn ọnrẹn keghi re nọ wegbe.

9 “Avbe ọba ni rre uhunmwu otagbọn ni gu ẹre yin uyinmwẹ alama oghẹ,* ni vbe gu ẹre ghae vbe ẹfe nọ si gboo vbene ekhue ma na muẹn, gha khiẹ ye ẹmwẹ ọnrẹn, iran ghi vbe gha ya obọ kinmwi ẹwẹ zẹvbe ne iran ya khiẹ, vbe iran gha bẹghe ighogho nọ ladian vbe erhẹn na ya giẹn ọnrẹn. 10 Iran ghi mudia ye urria, rhunmwuda orrirri nọ khian gbe ku iran vbe iran gha bẹghe oya na rri ọre, iran ghi gha kha wẹẹ: ‘Eu, ọ suẹ! Ọ suẹ! wẹ ne okpẹvbo, wẹ ne Babilọn ne ẹvbo nọ wegbe, rhunmwuda, ughaẹdẹ* ọkpa kẹkan ẹre a wa ya bu ohiẹn ruẹ!’

11 “Deba ọni, iran ni do okpẹki ni rre uhunmwu otagbọn gha viẹ ọre, iran gha vbe khiẹ ọre, rhunmwuda, ọmwa rhọkpa i rrọọ nọ khian ghi dẹ ihẹ hia ne iran khiẹn, 12 a i ghi miẹn nọ khian dẹ igoru ọghe iran, esiliva, avbe okuta ighobioye, avbe ivie ni fi wainwain,* ukpọn e linẹn ọghe ighobioye,* ukpọn nọ baa,* ukpọn esiliki, kevbe ukpọn ododo; kevbe emwi hia na ya erhan nọ winhin ru; kevbe emwi ughughan na ya esanmwa* ru, na ya erhan ighobioye ru, na ya ekọpa ru, na ya ematọn ru, kevbe na ya okuta emabo ru; 13 a i ghi miẹn nọ khian gu iran dẹ e sinamọn, emwi nọ winhin* na miẹn vbe India, eturari, ori nọ winhin, eturari nọfua,* ayọn, ofigbọn ọliv, eflawa nọ maan, e wit, ẹmila, ohuan, ẹsin, ikẹkẹ ẹsin, eviẹn kevbe arrọọ ọghe emwa nagbọn. 14 Vbene ẹmwata, emwi ni maan* ne aro ruẹ te wu yi wii ruẹ nẹ. Evbare esi kevbe emwi ni mose hia khian ena ho bẹkun nẹ vbe ehe ne u ye, u i khian ghi vbe werriegbe miẹn ọnrẹn.

15 “Iran ni do okpẹki ni khiẹnnẹ avbe emwi na, ni vbe fe rhunmwuda okhuo na, gha mudia ye urria, rhunmwuda orrirri nọ khian gbe ku iran, vbe iran gha bẹghe oya na rri ọre, iran ghi gha viẹ, iran ghi vbe gha khiẹ, 16 iran ghi gha kha wẹẹ: ‘Eu, ọsọre! Ọsọre ighẹ okpẹvbo nọ yọ ukpọn e linẹn ọghe ighobioye,* ukpọn nọ baa* kevbe ukpọn ododo, nọ vbe silo emwi itegbe ọghe igoru, okuta ighobioye kevbe avbe ivie ni fi wainwain* ye egbe, 17 rhunmwuda, vbe ughaẹdẹ* ọkpa kẹkan, ẹfe ọrhẹnrhẹn nọ mwẹ keghi wii ẹre!’

“Avbe ọka oziguẹ hia ni rre uwu okọ, avbe ekhẹn hia ni rre uwu okọ, avbe oziguẹ kevbe emwa hia ni ghi khuan igho nẹ vbe okun keghi mudia ye urria, 18 iran na gha so, vbe iran bẹghe ighogho nọ ladian vbe erhẹn na ya giẹn ọnrẹn, iran na wẹẹ: ‘De ẹvbo ọvbehe nọ yevbe okpẹvbo na?’ 19 Iran na gha zẹ ebubẹ ye uhunmwu iran, iran na gha go, iran na gha viẹ, iran na vbe gha khiẹ, iran na wẹẹ: ‘Eu, ọsọre! Ọsọre ighẹ okpẹvbo na! Ẹfe ọghẹe ẹre ọ zẹe ighẹ emwa hia ni mwẹ okọ vbe uwu okun khian eni fe. Ọ na wa ya ughaẹdẹ* ọkpa kẹkan khian otọ nọ gbẹvbi!’

20 “Wa ni rre ẹrinmwi, wa ni huanrẹn, wa ne avbe ukọ kevbe avbe akhasẹ, wa gha ghọghọ ye ọkhọ nọ rruan rẹn, rhunmwuda, Osanobua bu ohiẹn ọnrẹn ye emwi nọ ru uwa ẹre nẹ!”*

21 Odibosa ọkpa nọ wegbe keghi tọn okuta nọ yevbe olọ nọkhua mu, ọ na muẹn fi uwu okun, ọ na wẹẹ: “Erriọ ẹre a khian vbe ya uhukpa rhie Babilọn ne okpẹvbo fianmwẹ otọ, a i khian ghi dọlegbe miẹn ọnrẹn. 22 A i khian ghi vbe dọlegbe họn ẹmwẹ ihuan emwa ni so ihuan kevbe ni kpee akpata* ba ẹre vbe Babilọn, a i khian ghi vbe họn ẹmwẹ avbe ikpezikẹn, iran ni kpee ẹrere* kevbe iran ni kpee okpe vbe evba. A i khian ghi dọlegbe miẹn owinna rhọkpa nọ ghi do ẹki nẹ vbe evba, a i khian ghi vbe họn owogho ọghe emwa ni ya olọ lọ emwi vbe evba. 23 A i khian ghi werriegbe bẹghe awanwan ọghe urhukpa vbe evba, a i khian vbe werriegbe họn urhu ọdafẹn ọha kevbe ovbiọha vbe evba; avbe okpọmwa ni rre uhunmwu otagbọn ẹre emwa rẹn ni do okpẹki ghaa khin, ọ na gha lekpa orhiọn dan na gu mu obọ mu agbẹnvbo hia rẹrẹ. 24 Uhiẹn, a keghi miẹn esagiẹn ọghe avbe akhasẹ vbe ẹvbo nii, kevbe ọghe emwa ni huanrẹn, kẹ kevbe ọghe emwa hia na he gbelua vbe uhunmwu otagbọn.”

19 Iyeke ọna, I keghi họn emwi nọ yevbe owogho ọghe emwa nibun ẹsẹse vbe ẹrinmwi. Iran na wẹẹ: “Wa rho e Jah!* Imiẹnfan, uyi kevbe ẹtin keghi re ọghe Osanobua mwa, 2 rhunmwuda, ohiẹn ata ẹre ọ bu, odẹ nọ gbae ẹre ọ vbe ya bu ẹre. Ọ bu ohiẹn igbiragia ne oghogho nii nẹ, nọ ya uyinmwẹ alama oghẹ* nọ yin mu uhunmwu otagbọn rhia, ọ vbe rria ikhi ye esagiẹn eviẹn ọnrẹn na miẹn vbe obọ igbiragia nii.”* 3 Vbe ọwara ọkpa nii, iran na dọlegbe kha wẹẹ: “Wa rho e Jah!* Te ighogho ọghe erhẹn na ya giẹn igbiragia nii khian gha yo odukhunmwu vbe etẹbitẹ ya sẹ etẹghori.”

4 Ediọn enẹ yan ugie (24) nii, kevbe evbayi enẹ ni rrọọ nii keghi dele gbe otọ, iran na ga Osanobua nọ tota ye ẹkete, iran na wẹẹ: “Isẹ! Wa rho e Jah!”*

5 Urhu ọkpa keghi vbe guan ke ẹkete nii rre wẹẹ: “Wa gha rhie urhomwẹ ne Osanobua mwa, wa ne eviẹn ọnrẹn hia ni mu ohan rẹn, ke ni kpọlọ, ke ni kanmwa.”

6 I keghi vbe họn emwi nọ yevbe owogho ọghe emwa nibun ẹsẹse, kevbe nọ yevbe owogho ọghe ogbigbi amẹ kevbe ọghe avannukhunmwu nọ kakabọ vannọ. Iran na wẹẹ: “Wa rho e Jah,* rhunmwuda, e Jehova* ne Osanobua mwa ne Oghodua suẹn gha kha nẹ zẹvbe ọba! 7 Wa gi ima gha sọyẹnmwẹ, ne ẹko ima vbe vuọn ne oghọghọ, ne ima vbe gha rhie uyi nẹẹn, rhunmwuda, ẹghẹ na khian ya do ugie orọnmwẹ ọghe Oteghe Ohuan sẹ nẹ, ovbiọha ọghẹe vbe mu egbe yotọ nẹ. 8 Vbene ẹmwata, a fan obọ ẹre ne ovbiọha nii nẹ, nọ yọ ukpọn e linẹn nọ fi wainwain, nọhuanrẹn sẹsẹsẹ kevbe ọghe ighobioye.* (Ukpọn e linẹn ọghe ighobioye nii keghi mudia ye ihe uyinmwẹ esi ọghe emwa ni huanrẹn.)”

9 Odibosa nii keghi tama mwẹ wẹẹ: “Gbẹn ẹmwẹ na yotọ: Oghọghọ nọ ne emwa na gie na tie gha die ugie evbare ota ọghe orọnmwẹ Oteghe Ohuan nii.” Ọ na vbe tama mwẹ wẹẹ: “Ena ọre ẹmwata ne uhunmwu ẹmwẹ nọ ke unu Osanobua rre.” 10 Ẹre I na ghi de fi iguẹ vbe akharha ẹre, I na we ne I ya uhunmwu rhanmwẹ otọ nẹẹn, ne I gae. Sokpan, ọ na tama mwẹ wẹẹ: “Mwẹ ẹwaẹn! Ghẹ danmwẹ ọnrẹn! Ọviẹn kẹkan ẹre I khin, vbene uwẹ vbe etuẹn ni ghi kporhu nẹ vbekpa e Jesu vbe ye. Ga Osanobua! Rhunmwuda, evbọzẹe na na ta ẹmwẹ akhasẹ, ọre na mieke na gha sẹ osẹ vbekpa e Jesu.”

11 I keghi bẹghe vbe ẹrinmwi kie yotọ, ẹre I na bẹghe ẹsin nọfua ọkpa. A keghi tie ọmwa nọ tota yan rẹn, Ọmwa Nọ Gia Mu Ẹtin Yan Kevbe Ọmwa Ata; ọ keghi bu ohiẹn ata, odẹ nọ gbae ẹre ọ vbe ya khọn okuo. 12 Aro ọre keghi yevbe erhẹn nọ baa, ẹrhu ẹde nibun kegha rre ọre uhunmwu. A keghi gbẹn eni ọkpa yan rẹn ne ọmwa rhọkpa ma rẹn, vbọ gberra irẹn ọkpa. 13 Esagiẹn keghi* gba ẹwu nọ yọ ke odukhunmwu, Ẹmwẹ Osanobua ọre eni na tie ẹre. 14 Deba ọni, ivbiyokuo ni rre ẹrinmwi kegha hin ẹsin nọfua lelẹe khian vbe iyeke, iran keghi yọ ukpọn e linẹn nọfua, nọhuanrẹn sẹsẹsẹ kevbe ọghe ighobioye.* 15 Umozo nọ taẹn, nọ vbe kakabọ mu keghi ke unu ẹnrẹn ladian, umozo nii ẹre irẹn khian ya khọn avbe agbẹnvbo mu otọ, ọ ghi ya ọkpọ ematọn khaevbisẹ yan* iran. Yevbesọni, ọ kegha ya owẹ mama ako na na ru ayọn ọghe izohu Osanobua ne Oghodua. 16 A keghi gbẹn eni ye ẹwu nọ yọ ke odukhunmwu, odẹ ekuawẹ ọre ẹre a gbẹn ọnrẹn yi; eni na gbẹn yọ ọre, Ọba nọ sẹ ọba, Ogie nọ sẹ ogie.*

17 I keghi vbe bẹghe odibosa ọkpa nọ mudia ye owẹn, ọ na ya urhu nọ la datie avbe ahianmwẹ hia ni tin vbe ideghedeghe iso,* ọ na wẹẹ: “Wa larre, ne uwa do si egbe koko vbe ugie evbare ota nọkhua ọghe Osanobua, 18 ne uwa mieke na rri efun ọghe avbe ọba, efun ọghe avbe ọkaokuo, efun ọghe emwa ni wegbe, efun ọghe avbe ẹsin kevbe emwa ni tota yan iran, efun ọghe emwa hia, ke ni yan egbe iran, ke eviẹn, ke ni kpọlọ, ke ni kanmwa.”

19 I keghi bẹghe aranmwẹ oha nii kevbe avbe ọba ni rre uhunmwu otagbọn kevbe ivbiyokuo iran vbe iran si egbe koko, ne iran mieke na gu ọmwa nọ tota yan ẹsin nii kevbe ivbiyokuo ẹre khọn. 20 A keghi mu aranmwẹ oha nii, ke irẹn kevbe akhasẹ ohoghe nii, nọ sirra aranmwẹ oha nii gha winna iwinna ọyunnuan, nọ ya mu iran rẹrẹ ighẹ emwa na yi ẹre ama ọghe aranmwẹ oha nii kevbe iran ni ga amazẹ ọghẹe. Vbe aranmwẹ oha nii kevbe akhasẹ ohoghe nii ye rre agbọn, a keghi hẹ iran ku uwu odighi erhẹn ne sọlfọ* na giẹn. 21 Sokpan, a keghi ya umozo nọ ladian vbe unu ọmwa nii nọ tota yan ẹsin nii gbele iran nikẹre rua. Avbe ahianmwẹ keghi rri efun iran ne ẹko vuọn.

20 I keghi bẹghe odibosa ọkpa vbe ọ tuorre ke ẹrinmwi dee, ọ da isanhẹn ọghe uvun nẹi mwẹ otọ yi, ọgiọrọ nọkhua na gha rre ọre obọ. 2 Ọ keghi mu ugbogiorinmwi nii, ọni ọre ẹyẹn nẹdẹ nii, nọ re Esu kevbe Setan, ọ na muẹn gba vbe ukpo arriaisẹn ọkpa (1,000). 3 Ọ keghi fi ẹre fi uwu uvun nẹi mwẹ otọ nii, ọ na khui ẹre, ọ na ya emwi khiẹ ọre gbua, nẹ ghẹ ghi mu avbe agbẹnvbo rẹrẹ, a te miẹn wẹẹ ukpo arriaisẹn ọkpa (1,000) nii gbae. Iyeke ọni, a ghi faẹn vbe ovbi ẹghẹ kherhe.

4 I keghi bẹghe avbe ẹkete, a na rhie asẹ ne emwa ni tota yọ ne iran ya bu ohiẹn. Uhiẹn, I keghi bẹghe emwa* na gbelua* rhunmwuda osẹ ne iran sẹ vbekpa e Jesu, kevbe rhunmwuda ne iran na gha ta ẹmwẹ Osanobua. I keghi vbe bẹghe emwa ni ma ga aranmwẹ oha nii, ra amazẹ ọghẹe, kevbe ni ma kue na vin ama ọghe aranmwẹ oha nii ye iran uharo kevbe obọ. Iran keghi rhiọ kpaegbe, iran na deba e Kristi gha kha vbe ọwara ukpo arriaisẹn ọkpa (1,000). 5 Ọna ọre arhiọkpaegbe nokaro. (Emwa nikẹre ni wulo ma rhiọ kpaegbe, a te miẹn wẹẹ, ukpo arriaisẹn ọkpa [1,000] nii gbae.) 6 Oghọghọ nọ ne iran na khian huẹn kpaegbe vbe arhiọkpaegbe nokaro, emwa ni huanrẹn ẹre iran khin; uwu nogieva i mwẹ asẹ yan iran, sokpan, te iran khian gha re ohẹn ọghe Osanobua kevbe ọghe Kristi, iran ghi vbe deba ẹre kha zẹvbe ọba vbe ọwara ukpo arriaisẹn ọkpa (1,000) nii.

7 Ukpo arriaisẹn ọkpa (1,000) nii gha wa gba, a ghi fan e Setan vbe eghan nọ ye. 8 Ọ ghi ya gha mu avbe agbẹnvbo rẹrẹ vbe igienenẹ ọghe uhunmwu otagbọn, ena ọre Gọg kevbe Megọg; ọ ghi silo iran koko khẹ okuo na khian khọn. Iran na keghi bun vbe na ghee ekhae nọ rre okun. 9 Iran keghi vẹ gba uhunmwu otagbọn hia, iran na lẹga agọ ọghe emwa ni huanrẹn kevbe ẹvbo nii na hoẹmwẹ ọnrẹn. Sokpan, erhẹn keghi ke ẹrinmwi rre, ọ na fuẹn iran ruan. 10 A keghi fi Esu nọ ghaa mu iran rẹrẹ fi uwu odighi erhẹn kevbe sọlfọ,* ọni ọre eke ne aranmwẹ oha nii kevbe akhasẹ ohoghe nii, ka ye nẹ; evba nii ẹre iran khian na gha rri oya* ke asọn ke avan, vbe etẹbitẹ ya sẹ etẹghori.

11 I keghi bẹghe ẹkete nọkhua ọkpa nọfua, kevbe Ọmwa nọ tota yọ. Ẹrinmwi kevbe agbọn keghi lẹẹ hin odaro ọre rre, ehe rhọkpa ma ghi gua iran. 12 I keghi vbe bẹghe emwa ni wulo, ke ni kpọlọ, ke ni kanmwa, iran na mudia ye odaro ẹkete nii, a keghi rhan avbe ebe na kiri rua. Sokpan, a keghi vbe rhan ebe na kiri ọvbehe rua; ọni ọre ebe na kiri ọghe arrọọ. A keghi ya emwi na gbẹnnẹ ye avbe ebe na kiri na, bu ohiẹn emwa ni wulo, zẹvbe ne iwinna iran khare. 13 Nọ ne emwa ni wulo ni rre uwu okun, okun keghi viọ iran ladian; uwu kevbe Idin* keghi vbe viọ emwa ni wulo ni rre uwu iran ladian, a na bu ohiẹn edọmwadẹ ọghẹe vbe uwu iran zẹvbe ne iwinna iran khare. 14 A keghi fi uwu kevbe Idin* ye uwu odighi erhẹn nii. Emwi na ya odighi erhẹn na kha, ọre uwu nogieva. 15 Yevbesọni, ọmwaikọmwa na ma miẹn eni ẹnrẹn vbe ebe arrọọ nii, a keghi fi ẹre fi uwu odighi erhẹn nii.

21 I keghi vbe bẹghe ẹrinmwi ọgbọn kevbe agbọn ọgbọn; a ho ẹrinmwi nẹdẹ kevbe agbọn nẹdẹ bẹkun nẹ, okun i ghi vbe rrọọ. 2 I na vbe bẹghe ẹvbo nọhuanrẹn nii, nọ re Jerusalẹm Ọghe Ọgbọn, vbe ọ ke ehe ne Osanobua ye vbe ẹrinmwi tuorre dee, a keghi mu ẹre egbe zẹvbe ovbiọha na mu ẹre egbe khẹ ọdọ ẹre. 3 Ẹre I na ghi họn urhu nọ la nọ guan ke ẹkete nii rre wẹẹ: “Ghee oo! Ibọkpọ ọghe Osanobua rre ehe ne emwa nagbọn ye, Osanobua gha gu iran dia, iran ghi vbe gha re emwa rẹn. Osanobua tobọre ghi gu iran gha rrọọ. 4 Ọ gha khiẹn ameve hia hin aro iran rre. Uwu i khian ghi gha rrọọ, ra akhiẹ ra eve ra obalọ. A ho emwi nẹdẹ hia bẹkun nẹ.”

5 Ọmwa nii nọ tota ye ẹkete nii keghi kha wẹẹ: “Ghee oo! I ya emwi hia khian ọghe ọgbọn.” Ọ na vbe kha wẹẹ: “Gbẹnnẹ ẹmwẹ na yotọ, rhunmwuda, ẹmwẹ ẹmwata nọ gia mu ẹtin yan ẹre nọ.” 6 Ọ na vbe tama mwẹ wẹẹ: “Ọ sunu nẹ oo! Mẹ ọre Alfa kevbe Omega,* omuhẹn kevbe ufomwẹ. Ọmwaikọmwa ne ovbamẹ gbe, I gha sa amẹ arrọọ nọ lẹẹ ladian vbe okuta nẹẹn vbe ọghe ọhẹ. 7 Ọmwaikọmwa nọ khọnmiotọ, emwi na hia gha sẹ ọre obọ, mẹ ghi gha re Osanobua ẹre, ọ ghi vbe gha re ovbi mwẹ. 8 Sokpan, nọ ne avbe avbiẹrẹ, emwa nẹi mwẹ amuẹtinyan, iran ni yin uyinmwẹ osọnnọ nọ ma maan, avbe izigha, iran ni gbe alama oghẹ,* iran ni gu orhiọn dan mu obọ, iran ni ga ẹbọ kevbe avbe ọhọnhoghe hia, emwi na khian ya ha iran osa ọre odighi ne erhẹn vbe sọlfọ* na giẹn. Emwi na ya ọna kha, ọre uwu nogieva.”

9 Ọkpa vbe odibosa ihinrọn nii ni da ọkpan ihinrọn yi, ni vuọn ne orueghe ihinrọn nokiekie kegha dee, ọ na tama mwẹ wẹẹ: “Larre, I gha ma ruẹ ovbiọha nọ re amwẹ Oteghe Ohuan nii.” 10 Ẹre ọ na ghi ya ẹtin orhiọn nọhuanrẹn mu mwẹ gha rrie oke nọkhua nọ kakabọ yo, ọ na ma mwẹ ẹvbo nọhuanrẹn nii, nọ re Jerusalẹm, vbe ọ tuorre ke ehe ne Osanobua ye vbe ẹrinmwi dee, 11 uyi Osanobua vbe gha gu ẹre. Ọ na gha fi wainwain vbe na ghee okuta ighobioye nọ kakabọ hin usi, ọ na yevbe okuta e giaspa nọ fi wainwain vbe na ghee kristal. 12 Ọ kegha mwẹ ekẹn nọkhua na gbe lẹga ẹre, nọ kakabọ yo, ọ kegha mwẹ urho iweva (12), odibosa iweva (12) na gha rre evba, ọkpọkpa vbe uwu iran na gha rre dọmwadẹ onurho nii, a keghi gbẹnnẹ eni uniẹn iweva (12) ọghe Ivbi Izrẹl ye avbe urho nii. 13 Urho eha kegha rre odẹ ekẹn,* eha na gha rre odẹ okuọ,* eha na gha rre odẹ ahọ,* eha na vbe gha rre odẹ orrie.* 14 Ekẹn na gbe lẹga ẹvbo nii kegha mwẹ okuta iweva (12) na ya gbe ẹyotọ, a keghi vbe gbẹnnẹ eni iweva (12) ọghe ukọ iweva (12) ọghe Oteghe Ohuan nii lele iran.

15 Ọmwa nii nọ ghaa gu mwẹ guan keghi da erhan ọghe igoru yi zẹvbe emwi na ya mwa emwi, nọ mieke na yae mwa ẹvbo nii kevbe urho ni rrọọ, kẹ kevbe ekẹn na gbe lẹga ẹre. 16 Ẹvbo nii kegha re umwọnmwẹ vbe igienenẹ, vbene ọ ya kakabọ yo, erriọ ẹre ọ vbe ya vbẹ. Ọ keghi ya erhan nii mwa ẹvbo nii, ọ na gha re ibiriki ọkpa i rrọọ vbe iyenẹ yan iyisẹn eha nọ ya yan arriaisẹn ọkpa (1,379);* utanmwẹ ọnrẹn, uvbẹmwẹ ọnrẹn kevbe uyomwẹ ọnrẹn keghi re umwọnmwẹ. 17 Ọ na vbe mwa ekẹn na gbe lẹga ẹre, ọ kegha re ibata igbe nọ ya yan iyisẹn eva (210);* vbene emwa nagbọn ya mwa emwi, erriọ ẹre odibosa nii vbe ya mwa rẹn. 18 E giaspa ẹre a ya gbe ekẹn lẹga ẹre, igoru na ma ya emwi gua, nọ ye sẹnrẹn vbe na ghee ughegbe, ẹre a ya ru emwi hia ni rre ẹvbo nii. 19 Okuta ighobioye ughughan ẹre a ya gbe ẹyotọ ekẹn na gbe lẹga ẹvbo nii: e giaspa ẹre a ya ru ẹyotọ nokaro, nogieva na gha re safaia, nogieha na gha re kalsidoni, nogienẹ na gha re ẹmirad, 20 nogie isẹn na gha re sadoniks, nogie ehan na gha re sadiọs, nogie ihinrọn na gha re krisolait, nogie erẹnrẹn na gha re bẹril, nogie ihinrin na gha re topaz, nogie igbe na gha re krisoprez, nogie owọrọ na gha re haiyasint, nogie iweva na gha re amẹtist. 21 E pẹl* iweva (12) ẹre a ya ru urho iweva (12) ni rrọọ; e pẹl* ọkpọkpa ẹre a ya ru edọmwadẹ urho ni rrọọ. Igoru na ma gua, nọ ye sẹnrẹn vbe na ghee ughegbe, ẹre a ya so ukpo na wa mobọ la vbe ẹvbo nii.

22 I ma bẹghe ọgua Osa vbe ẹvbo nii, rhunmwuda, e Jehova* ne Osanobua ne Oghodua kevbe Oteghe Ohuan nii, ọre ọgua Osa nọ rrọọ. 23 Esa i rrọọ ne ovẹn gha ya yunmwu yan ẹvbo nii, ra ne uki gha ya baa yan rẹn, rhunmwuda, uyi ọghe Osanobua ẹre ọ ghaa re awanwan nọ rre ẹvbo nii; Oteghe Ohuan nii, ẹre ọ vbe gha re ukpa nọ rrọọ. 24 Ukpa nọ rrọọ, ẹre avbe agbẹnvbo khian ya gha bẹghe odẹ ne iran la khian, avbe ọba ni rre uhunmwu otagbọn ghi mu uyi nọ rre iran egbe gha die uwu ẹvbo nii. 25 Ẹghẹ hia ẹre a khian ya gha kie avbe urho ni rre ẹvbo nii yotọ, rhunmwuda, a i khian ghi gha miẹn asọn, avan ọkpa ẹre a khian ghi gha miẹn. 26 Iran gha mu uyi kevbe ọghọ nọ rre agbẹnvbo egbe gha die ẹvbo nii. 27 Sokpan, emwi ke emwi nọ ghi mwẹ awua nẹ, kevbe ọmwaikọmwa nọ ghi ru emwi osọnnọ nẹ kevbe nọ ru ero i khian sẹtin la ẹvbo nii; emwa na gbẹnnẹ eni iran ye ebe na kiri ọghe arrọọ ọghe Oteghe Ohuan nii ọkpa, ẹre ọ khian laọ.

22 Ọ keghi ma mwẹ ẹzẹ ọkpa nọ mwẹ amẹ arrọọ, ọ na ye sẹnrẹn vbe na ghee kristal, ọ kegha ke ẹkete ọghe Osanobua kevbe ọghe Oteghe Ohuan nii lẹẹ ladian, 2 ọ na gha lẹẹ la adesẹneva idunmwu nọ rre adesẹ orere ẹvbo nii. Avbe erhan ọghe arrọọ kegha rre obọ eveva ọghe ẹzẹ nii, igba iweva (12) ẹre avbe erhan nii mọ vbe ukpo, uki uki ẹre iran ya mọ. Avbe ebe ọghe erhan nii keghi re na ya mu agbẹnvbo egbe rran.

3 Ẹvbo nii i khian ghi gha re na fi ẹre unu. Sokpan, ẹkete ọghe Osanobua kevbe ọghe Oteghe Ohuan nii ghi gha rre ẹvbo nii, eviẹn Osanobua ghi gha rhie ugamwẹ nọhuanrẹn nẹẹn; 4 iran gha bẹghe ugbaro ọre, eni ẹnrẹn ghi vbe gha rre iran uharo. 5 Deba ọni, a i khian ghi gha miẹn asọn, iran i khian ghi vbe gha gualọ ukpa ra ovẹn, rhunmwuda, Osanobua ne Jehova* ẹre ọ khian gha re ukpa nọ baa yan iran, iran ghi gha kha zẹvbe ọba vbe etẹbitẹ ya sẹ etẹghori.

6 Ọ keghi tama mwẹ wẹẹ: “Ẹmwẹ ẹmwata nọ gia mu ẹtin yan ẹre ẹmwẹ na khin; vbene ẹmwata, e Jehova,* nọ re Osa nọ tama avbe akhasẹ ẹmwẹ ne iran gha ta, ẹre ọ gie odibo ọghẹe gie eviẹn ọnrẹn, nọ ya gi iran rẹn emwi nọ gha sunu vbe nẹi khian ghi kpẹẹ gbe. 7 Ghee oo! I dee ẹgiẹgiẹ. Oghọghọ nọ ne ọmwaikọmwa nọ ya ẹmwẹ akhasẹ ni rre ebe na kiri na ru emwi.”

8 Mẹ ne Jọn, ẹre ọ họn ẹmwẹ na, mẹ ẹre ọ vbe bẹghe ẹre. Ugbẹnvbe I ghi họẹn, vbe I ghi vbe bẹghe ẹre, I keghi de fi iguẹ vbe akharha odibosa nọ ghaa ma mwẹ avbe emwi na hia, I na we ne I ya uhunmwu rhanmwẹ otọ nẹẹn, ne I gae. 9 Sokpan, ọ keghi tama mwẹ wẹẹ: “Mwẹ ẹwaẹn! Ghẹ danmwẹ ọnrẹn! Ọviẹn kẹkan ẹre I khin, vbene uwẹ vbe etuẹn ni re akhasẹ vbe ye, kẹ kevbe emwa hia ni ya ẹmwẹ ni rre ebe na kiri na ru emwi. Ga Osanobua.”

10 Ọ na vbe tama mwẹ wẹẹ: “Ghẹ rhie ẹmwẹ akhasẹ ni rre ebe na kiri na lẹre zẹvbe ẹmwẹ oro, rhunmwuda, ẹghẹ na mwamwa yọ sotọ nẹ. 11 We ne ọmwa dan gha ru emwi dan nọ ru khian, we ne ọmwa osọnnọ gha ru emwi osọnnọ nọ ru khian; sokpan, we ne ọmwa esi gha ru emwi esi nọ ru khian, we ne ọmwa nọhuanrẹn gha ru emwi nọhuanrẹn nọ ru khian.

12 “‘Ghee oo! I dee ẹgiẹgiẹ, emwi ne I ya san emwa ẹse gue mwẹ, I gha ha osa ne dọmwadẹ ọghẹe zẹvbe ne iwinna rẹn khare. 13 Mẹ ọre Alfa kevbe Omega,* okaro kevbe okiekie, omuhẹn kevbe ufomwẹ. 14 Oghọghọ nọ ne iran ni họ ẹwu ne guọrọ ọghe iran, ne iran mieke na gha mwẹ asẹ ne iran khian ya gha rrie ehe ne avbe erhan ọghe arrọọ nii ye, ne iran mieke na vbe sẹtin la onurho ni rre ẹvbo nii la owa. 15 Avbe ekita,* emwa ni gu orhiọn dan mu obọ, emwa ni gbe alama oghẹ,* avbe izigha, iran ni ga ẹbọ kevbe emwa hia ni ta ohoghe kevbe ne ohoghe vbe yẹẹ, erhọkpa nọ rre uwu ẹvbo nii i rrọọ, orere ẹre iran ye.’

16 “‘Mẹ ne Jesu ẹre ọ gie odibo mwẹ, nọ do sẹ osẹ ma uwa vbekpa avbe emwi na, rhunmwuda umamwẹ iko. Mẹ ọre inian kevbe ovbi uniẹn e Devid, mẹ ẹre ọ vbe re orhọnmwẹ owiẹ nọ kakabọ baa.’”

17 Orhiọn nọhuanrẹn kevbe ovbiọha nii na gha kha wẹẹ, “Larre!” We ne ọmwaikọmwa nọ họn ẹmwẹ na, vbe kha wẹẹ, “Larre!” We ne ọmwaikọmwa ne ovbamẹ gbe vbe gha dee; ọmwaikọmwa nọ hoo, we nọ do wọn amẹ arrọọ vbe ọghe ọhẹ.

18 “Osẹ ne imẹ sẹ ma emwa hia ni họn ẹmwẹ akhasẹ ni rre ebe na kiri na, ọre wẹẹ: Adeghẹ ọmwaikọmwa na rhie ba avbe ẹmwẹ na, Osanobua ghi vbe rhie avbe orueghe na guan kaẹn vbe ebe na kiri na ba ẹdagbọn rẹn; 19 adeghẹ ọmwaikọmwa na vbe rhie emwi rhọkpa hin vbe ẹmwẹ akhasẹ ni rre ebe na kiri na, Osanobua ghi vbe rhie nọ khian sẹ ọre obọ hin vbe avbe emwi na guan kaẹn vbe ebe na kiri na, ọni nọ wẹẹ, ẹ i khian kue nọ gha mwẹ oghae vbe avbe ọmọ erhan ọghe arrọọ nii kevbe ẹvbo nọhuanrẹn nii.

20 “Ọmwa nii nọ sẹ osẹ ye avbe emwi na keghi kha wẹẹ, ‘Ẹẹn, I dee ẹgiẹgiẹ.’”

“Isẹ! Gha dee, Enọyaẹnmwa e Jesu.”

21 Te Enọyaẹnmwa e Jesu gha ru ẹse ne kpataki* ne emwa ni huanrẹn hia.