EBE NOKARO ỌGHE JỌN

1 Ẹmwẹ ọmwa nii nọ rrọọ ke omuhẹn gha dee, ẹre ima gbẹn gie uwa na, ma họn ẹmwẹ nọ tae, ma ya aro ima miẹn ọnrẹn nẹ, te aro ima wa gele sotọ vbe egbe ẹre, ma vbe ya obọ kaan rẹn nẹ; irẹn ọre ẹmwẹ arrọọ. 2 (Vbene ẹmwata, te a mu arrọọ ọghe etẹbitẹ na ma ima, ma na vbe ya aro ima bẹghe ẹre. Te ima ghi vbe sẹ osẹ yọ, erriọ ẹre ima vbe yae wewe ma uwa. Obọ Evbavba ẹre arrọọ ọghe etẹbitẹ na ke rre, a keghi vbe muẹn ma ima.) 3 Emwi ne aro ima sẹ kevbe ne ehọ ima họẹn, ẹre ima tama uwa, ne uwa mieke na vbe do gu ima gha mu obọ. Ma tobọ ima vbe gu Evbavba kevbe Ovbi ẹre ighẹ e Jesu Kristi mu obọ. 4 Te ima gbẹnnẹ avbe emwi na gie uwa, ne ọyẹnmwẹ nọ sẹ ima mieke na gha re nọ sẹ otọ ẹko.

5 Ẹmwẹ ne ima họn vbe unu e Jesu, ne ima vbe ya wewe ma uwa na khin: Ukpa ẹre Osanobua khin, ebiebi i vbe rre eke nọ ye hiehie.* 6 Adeghẹ ima na kha wẹẹ, “Ma gu ẹre mu obọ,” vbene ima na ye rre uwu ebiebi, ohoghe ẹre ima ta, ma i vbe ya ẹmwata ru emwi. 7 Sokpan, adeghẹ ima na gha khian vbe uwu ukpa, vbene irẹn tobọ irẹn vbe rre uwu ukpa, ọni rhie ma wẹẹ, ma gu egbe mu obọ, kevbe wẹẹ, esagiẹn ọghe Jesu ne Ovbi ẹre keghi kpe ima huan hin orukhọ hia rre.

8 Adeghẹ ima na kha wẹẹ, “Ma i mwẹ orukhọ,” te ima rẹrẹ egbe ima, ẹmwata i vbe rre ekhọe ima. 9 Sokpan, adeghẹ ima na miẹn orukhọ ọghe ima kue, ọ gha ya orukhọ ọghe ima bọ ima, ọ ghi vbe kpe ima huan hin abakuru hia ne ima ru rre, rhunmwuda, ọmwa nọ gia mu ẹtin yan kevbe ọmwa esi ẹre nọ. 10 Adeghẹ ima na kha wẹẹ, “Ma ma he ru orukhọ ẹdẹ,” te ima ghi ya irẹn khian ọhọnhoghe vberriọ, ma ma vbe ya ẹmwẹ ọnrẹn yi vbe ekhọe ima.

2 Ivbi mwẹ ni ghaan,* te I gbẹnnẹ avbe emwi na gie uwa, ne uwa ghẹ miehe na ru orukhọ. Ọrheyerriọ, adeghẹ ọmwaikọmwa na ru orukhọ, ma mwẹ ọyọmwabọ* nọ rre ehe ne Evbavba ye, ọni ọre Jesu Kristi ne ọmwa ata. 2 Irẹn ẹre a ya zọ ese* ye orukhọ ọghe ima, ne ima miehe na sẹtin gu Osanobua ru adọlọ, sokpan, ẹ i wa re orukhọ ọghe ima ọkpa, a vbe yae zọ ese ye orukhọ ọghe agbọn hia. 3 Ma ghaa lele uhi ẹre, ọ ghi dewarorua wẹẹ ima gele rẹn ọnrẹn. 4 Ọmwa ghaa kha wẹẹ, “I rẹn ọnrẹn nẹ,” vbe nẹi na lele uhi ẹre, ọhọnhoghe ẹre ọmwa nii khin, ẹmwata i vbe rre ekhọe ọre. 5 Sokpan, ọmwaikọmwa ghaa ya ẹmwẹ ọnrẹn ru emwi, ahoẹmwọmwa ọghe Osanobua ne ọmwa nii mwẹ vbe ekhọe ọre, khian enọ gbae nẹ. Ọna ẹre ima ya rẹn wẹẹ, ma gu ẹre rrọọ vbe akugbe. 6 Ọmwa ghaa kha wẹẹ irẹn gu ẹre rrọọ vbe akugbe, we nọ gha yin zẹvbe ne ọmwa nii vbe ya yin; emwi nẹi mwẹ a ma ru nọ.

7 Etẹn ni ghaan, ẹ i re iyi ọgbọn ẹre I gbẹn gie uwa na, sokpan, iyi nẹdẹ ne uwa họn ke otọ gha dee nọ. Iyi nẹdẹ na ọre ẹmwẹ ne uwa họẹn. 8 Ọrheyerriọ, iyi ne I gbẹn gie uwa na, ọghe ọgbọn vbe nọ. Iyi na ẹre ọmwa nii lele, ọna ẹre uwa vbe lele, rhunmwuda, ukpa ọghe ẹmwata nii baa nẹ, ebiebi rrie.

9 Ọmwa gha kha wẹẹ irẹn rre uwu ukpa, vbene ọmwa nii na khẹko ọtiọnrẹn, uwu ebiebi ẹre ọmwa nii ye ye. 10 Ọmwa nọ hoẹmwẹ ọtiọnrẹn, uwu ukpa ẹre ọ ye, emwi rhọkpa i khian vbe rrua ẹre owẹ.* 11 Sokpan, ọmwa nọ khẹko ọtiọnrẹn, uwu ebiebi ẹre ọ ye, uwu ebiebi ẹre ọ na vbe khian, ọ ma rẹn ehe nọ rrie, rhunmwuda, ebiebi so gue ẹre aro nẹ.

12 Ivbi mwẹ ni ghaan,* te I gbẹn ebe gie uwa na rhunmwuda, a ya orukhọ ọghe uwa bọ uwa nẹ, rhunmwuda ọmwa nii.* 13 Wa ne avbe erha, te I gbẹn ebe gie uwa, rhunmwuda ne uwa na do rẹn ọmwa nii nọ rrọọ ke omuhẹn gha dee. Wa ne igbama, te I gbẹn ebe gie uwa, rhunmwuda ne uwa na khọnmiotọ yan ọmwa dan nii. Wa ne ibiẹka, te I gbẹn ebe gie uwa, rhunmwuda ne uwa na do rẹn Evbavba. 14 Wa ne avbe erha, te I gbẹn ebe gie uwa, rhunmwuda ne uwa na do rẹn ọmwa nii nọ rrọọ ke omuhẹn gha dee. Wa ne igbama, te I gbẹn ebe gie uwa, rhunmwuda ne uwa na wegbe kevbe ne ẹmwẹ Osanobua na ye rre uwu uwa, ne uwa na vbe khọnmiotọ yan ọmwa dan nii.

15 Wa ghẹ hoẹmwẹ agbọn na ra emwi ni rre agbọn na. Adeghẹ ọmwaikọmwa na hoẹmwẹ agbọn na, ẹ i mwẹ ahoẹmwọmwa ọghe Evbavba; 16 rhunmwuda, emwi hia ni rre agbọn na, vbe na ghee emwi ne egbe gualọ, emwi ne aro wu yi kevbe emwi na mwẹ na ya ghagha, erhọkpa nọ ke obọ Evbavba rre, ẹ i rrọọ, sokpan, obọ agbọn na ẹre ehia ke rre. 17 Yevbesọni, te agbọn na kevbe emwi ne agbọn na gualọ rhie gberra khian, sokpan, ọmwa nọ ru emwi ne Osanobua hoo ghi gha rrọọ vbe etẹbitẹ.

18 Ivbi mwẹ ni ghaan,* ẹghẹ* nokiekie ẹre ima ye na. A ka tama uwa wẹẹ, oghian e Kristi gha rre, sokpan, banbanna nian, eghian e Kristi nibun rhiegbe ma nẹ, rhunmwuda ọni, ma rẹnrẹn wẹẹ, ẹghẹ* nokiekie ẹre ima ye na. 19 Uwu ẹbu ima ẹre iran na kpa, sokpan, iran i re ọkpa vbe uwu ima,* rhunmwuda, akpawẹ ọkpa vbe uwu ima ẹre iran khin, iran i ghẹ te kpa sẹ ima rae. Sokpan, te iran kpa sẹ ima rae, ne aro miehe na dae wẹẹ, ẹ i re emwa hia ọre ọkpa vbe uwu ima. 20 Ọmwa nọhuanrẹn nii ya orhiọn nọhuanrẹn hannọ uwa zẹ nẹ, wa hia fẹẹrẹ vbe mwẹ irẹnmwi. 21 Ẹ i re rhunmwuda wẹẹ, wa ma rẹn ẹmwata, ẹre ọ ya mwẹ gbẹn ebe gie uwa, sokpan, emwi nọ ya mwẹ gbẹn ọnrẹn, ọre rhunmwuda ne uwa na rẹn nene ẹmwata, kevbe rhunmwuda ne ohoghe i khian na sẹtin ke uwu ẹmwata ladian.

22 Gha re ọhọnhoghe nii? Ẹ i re ọmwa nii nọ ma kue yọ wẹẹ Jesu ọre Kristi nọ? Ọnọna ọre oghian e Kristi, rhunmwuda, ọ ma rhan obọ miẹn Evbavba kevbe Ọmọ yi. 23 Ọmwaikọmwa gha siẹn wẹẹ irẹn ma rẹn Ọmọ, ọmwa nii i gu Evbavba rrọọ vbe akugbe. Sokpan, ọmwaikọmwa nọ khare wẹẹ irẹn rẹn Ọmọ, gu Evbavba rrọọ vbe akugbe. 24 Sokpan, nọ ne uwa, wa gi emwi ne uwa họẹn vbe ẹghẹ omuhẹn ye gha rre ekhọe uwa. Adeghẹ emwi ne uwa họẹn vbe ẹghẹ omuhẹn na ye gha rre ekhọe uwa, ẹghẹ nii, wa ghi ye gha gu Ọmọ kevbe Evbavba rrọọ vbe akugbe. 25 Yevbesọni, emwi ne irẹn tobọ irẹn ve ima re ọre arrọọ ọghe etẹbitẹ.

26 Te I gbẹn avbe emwi na gie uwa, rhunmwuda ne emwa eso na hoo ne iran mu uwa rẹrẹ. 27 Sokpan, nọ ne uwa, Osanobua ya orhiọn nọhuanrẹn hannọ uwa zẹ nẹ, orhiọn nii ye gu uwa rrọọ. Nọnaghiyerriọ, wa i gualọ ọmwa ọvbehe nọ khian do gha ma uwa emwi; sokpan, Osanobua keghi loo orhiọn nii ya ma uwa emwi vbekpa emwi hia. Ẹmwata ẹre ọ ma uwa ẹre, ẹ i re ohoghe. Wa ye gha gu ọmwa nii nọ hannọ uwa zẹ rrọọ vbe akugbe, zẹvbe ne orhiọn nii ma uwa ẹre. 28 Nọnaghiyerriọ, ivbi mwẹ ni ghaan,* wa ye gha gu ẹre rrọọ vbe akugbe, a i rẹn vbe ọ gha rhiegbe ma, ma ghi sẹtin si agbada vbe unu guan. Ẹghẹ nii, ma i khian ghi gha si egbe vbe ehe nọ ye rhunmwuda ekhue, vbe ẹghẹ nọ gha ya rre. 29 Ugbẹnvbe a miẹn wẹẹ, wa rẹnrẹn wẹẹ ọmwa ata nọ, wa ghi vbe la evba rẹn wẹẹ, ọmwaikọmwa nọ ru emwi ata, ovbi ẹre nọ.

3 U miẹn vbene Evbavba hoẹmwẹ ima hẹ! Ọ hoẹmwẹ ima sẹrriọ wẹẹ, te a ghi tie ima ivbi Osanobua. Vbene ẹmwata, ivbi ẹre, ẹre ima gele khin. Ọni ẹre ọ si ẹre ne agbọn ma na rẹn ima, rhunmwuda, iran ma rẹn Osanobua. 2 Etẹn ni ghaan, ivbi Osanobua ẹre ima ghi khin nian, sokpan, ọ ma he wa vẹ ne ima rẹn, vbene ima khian gha ye hẹ. Vbọrhirhighayehẹ, emwi ne ima rẹnrẹn ọre wẹẹ, ọ gha ghi rhiegbe ma nẹ, ma ghi gha ye vbene irẹn ye, rhunmwuda, te ima khian miẹn ọnrẹn, vbene ọ wa ye zẹẹ. 3 Ọmwaikọmwa nọ ya aro ye emwi vbenian vbe obọ ẹre, te ọmwa vberriọ gha vbe kpe egbe ẹre huan rhunmwuda, ọmwa nọhuanrẹn ẹre ọmwa nii khin.

4 Ọmwaikọmwa nọ fuẹn vbe uwu orukhọ, ọmwa vberriọ i mu uhi sẹ, rhunmwuda, te ọmwa nọ ru orukhọ rra uhi. 5 Wa vbe rẹn wẹẹ, te Jesu Kristi rre,* nọ mieke na do rhie orukhọ ọghe ima hin, kevbe wẹẹ, irẹn i vbe mwẹ orukhọ. 6 Ọmwaikọmwa nọ ghi gu ẹre rrọọ nẹ vbe akugbe i fuẹn vbe uwu orukhọ; ọmwaikọmwa nọ ghi fuẹn vbe uwu orukhọ nẹ, ma he miẹn ọnrẹn, ọ ma he vbe rẹn ọnrẹn. 7 Ivbi mwẹ ni ghaan,* wa ghẹ gi ọmwa rhọkpa mu uwa rẹrẹ; ọmwaikọmwa nọ ghi ru emwi esi nẹ, ọmwa esi nọ, zẹvbe ne ọmwa nii vbe ya re ọmwa esi. 8 Ọmwaikọmwa nọ ghi fuẹn nẹ vbe uwu orukhọ, ọghe Esu nọ, rhunmwuda, ke otọ gha dee* ẹre Esu ke ru orukhọ. Ọna ẹre ọ si ẹre ne Ovbi Osanobua na rre, nọ do fuẹn iwinna Esu rua.

9 Ọmwaikọmwa nọ re ovbi Osanobua i fuẹn vbe uwu orukhọ, rhunmwuda, ikpẹ* Osanobua rre uwu ọmwa nii; ọmwa vberriọ i khian sẹtin gha fuẹn vbe uwu orukhọ, rhunmwuda, ovbi Osanobua nọ. 10 Ọna ọre alughaẹn nọ rre ẹkpo ivbi Osanobua kevbe ivbi Esu: Ọmwaikọmwa nẹi ru emwi esi, ẹ i re ọghe Osanobua, erriọ ẹre ọmwa nọ ma hoẹmwẹ ọtiọnrẹn vbe ye. 11 Rhunmwuda, iyi ne uwa wa họn ke otọ gha dee, ọre ne ima gha hoẹmwẹ egbe; 12 ọ ma khẹke ne ima gha yevbe Ken. Ọghe ọmwa dan nii ẹre irẹn ghaa khin, ọ na gbe ọtiọnrẹn rua. Vbọ gu gbe ẹre rua? Rhunmwuda, emwi ne irẹn ru ma gba, sokpan, emwi ne ọtiọnrẹn ru kegha re nọ gbae.

13 Etẹn, wa ghẹ gi ẹre kpa uwa odin wẹẹ agbọn na khẹko uwa. 14 Ma rẹnrẹn wẹẹ ima la uwu gberra gha rrie arrọọ nẹ, rhunmwuda, ma hoẹmwẹ etẹn ima. Ọmwa nẹi mwẹ ahoẹmwọmwa, ọmwa nọ wu ẹre ọmwa nii ye khin. 15 Ọmwaikọmwa nọ khẹko ọtiọnrẹn, izigha nọ, wa rẹnrẹn wẹẹ, izigha rhọkpa nọ khian gha mwẹ arrọọ ọghe etẹbitẹ i rrọọ. 16 Rhunmwuda ne ọmwa nii na wu ne ima, ẹre ọ ya ima rẹn emwi ne ahoẹmwọmwa gele khin, rhunmwuda ọni, te ọ vbe khẹke ne ima mu egbe ne ima ya wu ne etẹn ima, emwi nẹi mwẹ a ma ru nọ. 17 Sokpan, adeghẹ ọmwaikọmwa na gha mwẹ ẹfe ọghe agbọn na, ọ na bẹghe ọtiọnrẹn vbe ọ rri oya, sokpan, ọ ma tohan rẹn, de vbene ọmwa nii ghi ya hoẹmwẹ Osanobua hẹ? 18 Ivbi mwẹ ni ghaan,* ọ ma khẹke ne ahoẹmwọmwa ọghe ima gha re ọghe okpunu, ra ọghe ẹmwẹ ne unu, sokpan, te ọ khẹke nọ gha re ọghe ẹmwata, ma ghi vbe gha rhie ẹre ma vbe emwi ne ima ru.

19 Ọna ẹre ima khian ya rẹn wẹẹ ọghe ẹmwata ẹre ima khin; ma ghi gi ekhọe ima gele rẹn* wẹẹ, Osanobua hoẹmwẹ ima, 20 ọ gha khọnrẹn ne ekhọe ima gha bu abe gbe ima ye emwi ke emwi, rhunmwuda, Osanobua sẹ ekhọe ima, ọ vbe rẹn emwi hia. 21 Etẹn ni ghaan, adeghẹ ekhọe ima i bu abe gbe ima, ma gha sẹtin ya unu hia gu Osanobua guan; 22 emwi ke emwi ne ima nọ re, ọ gha ru ẹre ne ima, rhunmwuda ne ima na lele uhi ọghẹe kevbe ne ima na ru emwi nọ maan vbe aro ọre. 23 Vbene ẹmwata, uhi ne irẹn yi ne ima na khin: ne ima mu ẹtin yan eni Ovbi ẹre ighẹ Jesu Kristi kevbe ne ima hoẹmwẹ egbe, zẹvbe nọ yi ẹre iyi ne ima. 24 Yevbesọni, ọmwa ghaa lele uhi ẹre, ọmwa nii ghi gu ẹre gha rrọọ vbe akugbe, irẹn ghi vbe gu ọmwa nii gha rrọọ vbe akugbe. Ma rẹnrẹn wẹẹ irẹn ye gu ima rrọọ vbe akugbe, rhunmwuda orhiọn ne irẹn rhie ne ima.

4 Etẹn ni ghaan, emwa gha mu imamwaemwi* nọ rhirhi gha khin rre, iran na gha kha wẹẹ obọ Osanobua* ẹre ọ ke rre, wa ghẹ yaeyi, sokpan, wa ghi ka ghee ẹre ẹse,* deghẹ obọ Osanobua* ẹre ọ ke rre, rhunmwuda, avbe akhasẹ ohoghe nibun vẹ la uwu agbọn nẹ.

2 Ọna ẹre uwa khian ya rẹn imamwaemwi* nọ ke obọ Osanobua rre: Ọmwaikọmwa ghaa ma emwa ẹre wẹẹ, Jesu Kristi rrie agbọn na zẹvbe ọmwa nagbọn, wa ghi rẹn wẹẹ, obọ Osanobua ẹre imamwaemwi* vberriọ ke rre. 3 Sokpan, adeghẹ ọmwaikọmwa na gha ma emwa ẹre wẹẹ, Jesu ma rrie agbọn na zẹvbe ọmwa nagbọn, wa ghi rẹn wẹẹ, ẹ i re obọ Osanobua ẹre imamwaemwi vberriọ ke rre. Yevbesọni, obọ oghian e Kristi ẹre imamwaemwi vberriọ ke rre; wa ka họn wẹẹ, ọ gha ta egbe ẹmwẹ vberriọ, banbanna nian, te ẹmwẹ vberriọ ghi wa la khian vbe uwu agbọn.

4 Ivbi mwẹ ni ghaan,* ọghe Osanobua ẹre uwa khin, wa vbe khọn iran mu otọ nẹ, rhunmwuda, ọmwa nii nọ gu uwa rrọọ sẹ ọmwa nii nọ gu agbọn rrọọ. 5 Ọghe agbọn na ẹre iran khin; ọni ẹre ọ si ẹre ne iran na ta ẹmwẹ ọghe agbọn na, ẹre ọ vbe si ẹre ne agbọn na danmwehọ iran. 6 Ọghe Osanobua ẹre ima khin. Ọmwaikọmwa nọ do rẹn Osanobua, keghi danmwehọ ima; ọmwaikọmwa nẹi re ọghe Osanobua i danmwehọ ima. Ọna ẹre ima ya rẹn alughaẹn nọ rre imamwaemwi ẹmwata kevbe imamwaemwi ohoghe.*

7 Etẹn ni ghaan, wa gi ima ye gha hoẹmwẹ egbe, rhunmwuda, obọ Osanobua ẹre ahoẹmwọmwa ke rre; ọmwaikọmwa nọ mwẹ ahoẹmwọmwa, ovbi Osanobua nọ, ọ vbe rẹn Osanobua. 8 Ọmwaikọmwa nẹi mwẹ ahoẹmwọmwa ma he rẹn Osanobua, rhunmwuda, Osanobua ọre ahoẹmwọmwa. 9 Odẹ ne Osanobua ya rhie ẹre ma wẹẹ, irẹn hoẹmwẹ ima, ọre nọ na gie Ovbi ẹre ne ukpọmọkpa gha die agbọn, ne ima mieke na la obọ ẹre gha mwẹ arrọọ. 10 Vbenian ẹre Osanobua ya rhie ẹre ma wẹẹ, irẹn hoẹmwẹ ima, ẹ i re te ima ka hoẹmwẹ ọnrẹn, sokpan, irẹn ẹre ọ hoẹmwẹ ima, ọ na gie Ovbi ẹre rre nọ do ya egbe ẹre zọ ese* ye orukhọ ọghe ima, ne ima mieke na sẹtin gu irẹn ru adọlọ.

11 Etẹn ni ghaan, adeghẹ Osanobua hoẹmwẹ ima vbenian, te ọ vbe khẹke ne ima hoẹmwẹ egbe; emwi nẹi mwẹ a ma ru na khin. 12 Ọmwa rhọkpa i rrọọ nọ he bẹghe Osanobua ẹdẹ. Adeghẹ ima na ye gha hoẹmwẹ egbe, ọni rhie ma wẹẹ Osanobua ye gu ima rrọọ, kevbe wẹẹ, ahoẹmwọmwa ọghẹe khian enọ gbae nẹ vbe uwu ima. 13 Emwi nọ ya ima rẹn wẹẹ, ma ye gu ẹre rrọọ vbe akugbe, kevbe wẹẹ, irẹn ye gu ima rrọọ vbe akugbe, ọre rhunmwuda wẹẹ, irẹn rhie orhiọn rẹn ne ima nẹ. 14 Deba ọni, ma tobọ ima miẹn ọnrẹn nẹ wẹẹ, Evbavba gie Ovbi ẹre gha die agbọn, nọ do gha re ọmiọnmwafan ọghe agbọn na. Ọna ẹre ima vbe sẹ osẹ yi. 15 Ọmwaikọmwa nọ tae wẹẹ Ovbi Osanobua ẹre Jesu khin, Osanobua ye gu ọmwa vberriọ rrọọ vbe akugbe, ọmwa nii vbe gu Osanobua rrọọ vbe akugbe. 16 Ma tobọ ima do rẹn nẹ wẹẹ Osanobua hoẹmwẹ ima, ma wa vbe yaeyi.

Osanobua ọre ahoẹmwọmwa; ọmwaikọmwa ghaa rhie ahoẹmwọmwa ma vbe ẹghẹ hia, ọni rhie ma wẹẹ, ọmwa nii ye gu Osanobua rrọọ vbe akugbe, Osanobua vbe gu ẹre rrọọ vbe akugbe. 17 Odẹ vbenian ẹre ahoẹmwọmwa ya khian enọ gbae vbe uwu ima, ne ima mieke na sẹtin si agbada vbe unu guan* vbe ẹdẹ ibuohiẹn, rhunmwuda, vbene ọmwa nii ye, erriọ ẹre ima tobọ ima vbe ye vbe agbọn na. 18 Ohan i rre ahoẹmwọmwa, sokpan, te ahoẹmwọmwa nọ gbae khu ohan fua, rhunmwuda, te ohan mu idobo ye ima egbe. Uhiẹn, ọmwa ghaa mu ohan, ọni rhie ma wẹẹ, ahoẹmwọmwa nọ mwẹ ma he khian enọ gbae. 19 Rhunmwuda ne irẹn na ka hoẹmwẹ ima, ẹre ọ zẹe ighẹ ima mwẹ ahoẹmwọmwa.

20 Adeghẹ ọmwaikọmwa na kha wẹẹ, “I hoẹmwẹ Osanobua,” vbene ọ na khẹko ọtiọnrẹn, ọhọnhoghe ẹre ọmwa nii khin. Rhunmwuda, ọmwa nọ ma sẹtin hoẹmwẹ ọtiọnrẹn ne irẹn bẹghe, ẹ i khian vbe sẹtin hoẹmwẹ Osanobua nọ ma he bẹghe. 21 Iyi ne irẹn yi ne ima ọre wẹẹ, te ọmwaikọmwa nọ hoẹmwẹ Osanobua gha vbe hoẹmwẹ ọtiọnrẹn.

5 Ọmwaikọmwa nọ yayi wẹẹ, Jesu ọre Kristi, ovbi Osanobua ẹre ọmwa nii khin; ọmwaikọmwa nọ hoẹmwẹ erha nọ biẹ ọmọ, te ọ vbe hoẹmwẹ ọmọ nii na biẹ. 2 Ma gha hoẹmwẹ Osanobua, ma na vbe gha lele uhi ẹre, ma ghi rẹn wẹẹ ima hoẹmwẹ ivbi Osanobua. 3 Rhunmwuda, emwi na ya ahoẹmwọmwa ọghe Osanobua kha, ọre ne ima gha lele uhi ẹre; uhi nọ gbe ne ima i vbe re nọ lọghọ na lele, 4 rhunmwuda, te ọmwaikọmwa* nọ ghi re ovbi Osanobua nẹ, khọnmiotọ yan agbọn na. Emwi ne ima ya khọnmiotọ yan agbọn na, ọre amuẹtinyan ọghe ima.

5 De ọmwa nọ gha sẹtin khọnmiotọ yan agbọn na? Ẹ i re ọmwa nọ yayi wẹẹ Jesu ọre Ovbi Osanobua nọ ra? 6 Jesu Kristi na ọre ọmwa nọ rre lekpa amẹ kevbe esagiẹn, ẹ i re lekpa amẹ ọkpa ẹre ọ ya rre, sokpan, ọ ya amẹ rre, ọ na vbe ya esagiẹn rre. Orhiọn nọhuanrẹn vbe sẹ osẹ yọ, rhunmwuda, ẹmwata ẹre orhiọn nọhuanrẹn khin. 7 Osẹ eha ẹre ọ rrọọ: 8 orhiọn nọhuanrẹn, amẹ kevbe esagiẹn; te eheha wa vbe gua egbe ro.

9 Adeghẹ ima miẹn osẹ ọghe emwa nagbọn yi, osẹ ne Osanobua sẹ, ẹre ọ sẹre. Rhunmwuda, osẹ ne Osanobua sẹ, ọre osẹ nọ sẹ vbekpa Ovbi ẹre. 10 Ọmwa gha mu ẹtin yan Ovbi Osanobua, ọni rhie ma wẹẹ, osẹ ne Osanobua sẹ rre ọmwa nii ekhọe. Adeghẹ ọmwa ma na mu ẹtin yan Osanobua, te ọmwa vberriọ tie Osanobua ọhọnhoghe, rhunmwuda, ọmwa nii ma mu ẹtin yan osẹ ne Osanobua sẹ vbekpa Ovbi ẹre. 11 Nene osẹ na khin: Osanobua rhie arrọọ ọghe etẹbitẹ ne ima, obọ Ovbi ẹre, ẹre ima na miẹn arrọọ na. 12 Ọmwaikọmwa nọ gu Ovbi Osanobua rrọọ vbe akugbe keghi mwẹ arrọọ na; sokpan, ọmwaikọmwa nẹi gu Ovbi Osanobua rrọọ vbe akugbe i mwẹ arrọọ na.

13 Te I gbẹnnẹ avbe emwi na gie uwa, ne uwa mieke na rẹn wẹẹ, wa ni mu ẹtin yan Ovbi Osanobua* mwẹ arrọọ ọghe etẹbitẹ. 14 Ma mu ẹtin yan rẹn wẹẹ,* ma gha nọ rẹn emwi ke emwi nọ gua iho ọghẹe ro, ọ gha họn erhunmwu ima. 15 Adeghẹ ima na rẹn wẹẹ, ọ họn erhunmwu ima vbe ima gha nọ emwi ke emwi, ma ghi rẹn wẹẹ, emwi ne ima nọ rẹn gha sẹ ima obọ, ugbẹnvbe a miẹn wẹẹ ima nọ rẹn nẹ.

16 Adeghẹ ọmwaikọmwa na bẹghe ọtiọnrẹn vbe ọ ru orukhọ nẹi sẹtin si uwu, we nọ na erhunmwu nẹẹn, Osanobua gha rhie arrọọ ne ọtiọnrẹn nii; vbene ẹmwata, ọ gha rhie arrọọ ne iran ni ru orukhọ nẹi si uwu. Sokpan, orukhọ rrọọ nọ sẹtin si uwu. I ma we ne uwa na erhunmwu ne ọmwa nọ ru egbe orukhọ vberriọ. 17 Emwi hia na ma ru ẹse, orukhọ nọ, ọrheyerriọ, orukhọ rrọọ nẹi si uwu.

18 Ma rẹnrẹn wẹẹ, ọmwaikọmwa nọ re ovbi Osanobua i fuẹn vbe uwu orukhọ, sokpan, Ovbi Osanobua* keghi gbaroghe ẹre, obọ ọmwa dan nii i khian sẹtin gba ẹre. 19 Ma rẹnrẹn wẹẹ ọghe Osanobua ẹre ima khin, sokpan, ọmwa dan nii ẹre ọ kha yan agbọn na hia. 20 Sokpan, ma rẹnrẹn wẹẹ Ovbi Osanobua rre nẹ, ọ vbe rhie ẹwaẹn na ya rẹn otọ emwi ne ima, ne ima mieke na rẹn ọmwa ẹmwata nii. Ma vbe gu ọmwa ẹmwata nii rrọọ vbe akugbe, lekpa Ovbi ẹre ighẹ e Jesu Kristi. Ọmwa nii ọre Osa ọghe ẹmwata, obọ ẹre, ẹre a na vbe miẹn arrọọ ọghe etẹbitẹ. 21 Ivbi mwẹ ni ghaan,* wa gha lẹẹ ne amazẹ na gho.