EBE NOGIEVA ỌGHE PITA

1 E Saimọn Pita ne ọviẹn e Jesu Kristi, nọ vbe re ukọ ọghẹe, ẹre ọ gbẹn ebe na gie emwa hia ni mwẹ iyayi ọghe ighobioye ne ima vbe mwẹ; emwi nọ si ẹre ne ima na mwẹ iyayi na, ọre rhunmwuda ne Osanobua mwa kevbe Jesu Kristi ne Ọmiọnmwafan mwa na re emwa ata.

2 Te uwa gha miẹn ẹse ne kpataki* vbe obọ Osanobua ẹsẹse, ọ ghi vbe rhie ọfunmwegbe ne uwa sayọ lekpa ne uwa na mwẹ irẹnmwi nọ gbae ọghe Osanobua kevbe ọghe Enọyaẹnmwa e Jesu. 3 Osanobua keghi loo ẹtin ẹnrẹn ya viọ emwi hia ne ima, nọ gha ru iyobọ ne ima ya gha loo ẹdagbọn ima zẹvbe emwa ni rhiegbe ye ugamwẹ Osanobua. Te ena hia sẹ ima obọ, lekpa irẹnmwi nọ gbae ọghe Ọmwa nii nọ tie ima; te irẹn tie ima, rhunmwuda uyi kevbe umamwẹ ọghẹe. 4 Ọna ẹre ọ si ẹre nọ na ru eyan ma ima wẹẹ, emwi ighobioye nai sẹtin fian ive yi, gha sẹ ima obọ; emwi ne irẹn yan rẹn na, ẹre ọ khian ya uwa ghae vbe uyi ẹre, wa ghi do gha re emwa orhiọn vbene irẹn vbe ye, ugbẹnvbe a miẹn wẹẹ, wa lẹẹ fe nẹ vbe emwi dan ne agbọn ru, rhunmwuda emwi dan ne iran hoo vbe ekhọe.*

5 Rhunmwuda ọni nian, wa hia vbe odẹ ke odẹ, ne uwa rhie umamwẹ ba amuẹtinyan ọghe uwa; wa ghi rhie irẹnmwi ba umamwẹ ọghe uwa, 6 zẹvbe ne uwa ya mwẹ irẹnmwi nii, wa ghi vbe gha da egbe uwa yi; zẹvbe ne uwa ya da egbe uwa yi, wa ghi gha mwẹ izinegbe, wa ghi vbe rhie a rhiegbe ye ugamwẹ Osanobua ba izinegbe ọghe uwa, 7 wa ghi rhie agiẹngiẹn etẹn ba a rhiegbe ye ugamwẹ Osanobua, wa ghi vbe rhie ahoẹmwọmwa ba agiẹngiẹn etẹn ne uwa mwẹ. 8 Adeghẹ uwa na gha mwẹ ena hia, wa na vbe gha rhie ẹre ma vbe uyinmwẹ uwa ẹsẹse, ọ gha ru iyobọ ne uwa, ne uwa ghẹ do khian emwa nẹi ghi sasa egbe, kevbe nẹi sẹtin fian emwi gbua, vbọ gha de ọghe irẹnmwi nọ gbae ọghe Enọyaẹnmwa e Jesu Kristi.

9 Te ọmwaikọmwa nẹi mwẹ emwi na hia rhu aro, te ọ mimi aro, nẹ ghẹ mieke na bẹghe ukpa,* te ọ vbe mianmian vbene a ya kpe ẹre huan hin orukhọ ọghẹe rre hẹ, vbe ẹghẹ nọ kpẹẹ fua. 10 Nọnaghiyerriọ etẹn, ugbẹnvbe a miẹn wẹẹ Osanobua tie uwa nẹ, ọ na vbe hannọ uwa zẹ, wa hia vbe odẹ ke odẹ ne uwa ghẹ mu uyi vberriọ fua. Rhunmwuda, wa ghaa ru avbe emwi na hia, ẹ i mwẹ uwa ma musọe. 11 Vbene ẹmwata, adeghẹ uwa na gha ru vberriọ, a ghi gele fiangbe uwa wọrhọwọrhọ, ọni nọ wẹẹ, wa ghi sẹtin la Arriọba etẹbitẹ ọghe Enọyaẹnmwa kevbe Ọmiọnmwafan mwa ighẹ Jesu Kristi.

12 Ọna ẹre ọ si ẹre ne I na hoo ne I gha ye uwa ena hia rre vbe ẹghẹ hia, agharhemiẹn wẹẹ, wa ka rẹn ọnrẹn nẹ, kevbe wẹẹ, wa vbe deziẹn ye uwu ẹmwata ne uwa rẹnrẹn. 13 Sokpan, I ghee ẹre wẹẹ emwi nọ khẹke ne I ru nọ, ne I ye gha ye uwa ẹre rre, vbene I na ye rre ibọkpọ* na, 14 rhunmwuda, I rẹnrẹn wẹẹ, zẹvbe ne I ya ru vberriọ, a gha rherhe mu ibọkpọ mwẹ hin, zẹvbe ne Enọyaẹnmwa e Jesu Kristi gu mwẹ rẹn. 15 I gha hia vbene ẹtin mwẹ sẹ, ne I gha ye uwa ẹre rre vbe ẹghẹ hia, a i rẹn vbe I gha kpa nẹ, wa ghi sẹtin tobọ uwa gha ye avbe emwi na rre.*

16 Ne ima na tama uwa vbekpa ẹtin kevbe urremwẹ ọghe Enọyaẹnmwa e Jesu Kristi, ẹ i re okha ohoghe na wa ta rhiẹnrhiẹnrhiẹn ẹre ima do tama uwa, sokpan, te aro ima wa gele sẹ ukpọlọmwẹ ọnrẹn. 17 Rhunmwuda, irẹn keghi miẹn ọghọ kevbe uyi vbe obọ Osanobua ne Erha mwa nọ mwẹ uyi nọ sẹre, vbe ẹghẹ nọ ya tama rẹn wẹẹ: “Ọna ọre Ovbi mwẹ, ne I hoẹmwẹ ọnrẹn, ọmọ ne imẹ tobọ mwẹ miẹn yi.” 18 Vbene ẹmwata, te ima wa họn ẹmwẹ na vbe urhu nii guan ke ẹrinmwi rre, vbe ẹghẹ ne ima na gha gu ẹre rre oke nọhuanrẹn nii.

19 Ọni ẹre ọ si ẹre ne ima na do kakabọ gha mwẹ ilẹkẹtin wẹẹ, ẹmwẹ akhasẹ hia gha sẹ. Emwi nọ maan nọ, ne uwa na mu aro yọ, vbene a miẹn wẹẹ, ukpa nọ baa vbe uwu ebiebi nọ vbe ekhọe uwa (a te miẹn wẹẹ ẹdẹ gbe, kevbe wẹẹ, orhọnmwẹ ẹdẹ ladian). 20 Vbe okaro, wa rẹnrẹn wẹẹ, ẹmwẹ akhasẹ ọkpa i rre Ebe Nọhuanrẹn nọ ke ekhọe emwa nagbọn rre. 21 Rhunmwuda, ẹghẹ ọkpa i rrọọ ne emwa nagbọn he ya tobọ iran suẹn gha ta ẹmwẹ akhasẹ, sokpan, ẹmwẹ nọ ke obọ Osanobua rre ẹre emwa nagbọn ghaa ta, zẹvbe ne orhiọn nọhuanrẹn ya gha dia iran.

2 Sokpan, avbe akhasẹ ohoghe keghi rhiegbe ma vbe uwu ẹbu emwa nii vbe ẹghẹ nii, zẹvbe ne avbe ọmamwaemwi ohoghe khian vbe gha rre uwu ẹbu uwa. Iran na, ghi hẹko si iwannegbe ye uwu ẹbu uwa, ne iran mieke na gbe amuẹtinyan ọghe uwa mu otọ. Uhiẹn, iran ghi vbe siẹn arowa iran nọ dẹ iran, iran ghi lekpa ọni si ọfuan ọghe udomwurri gie egbe iran. 2 Yevbesọni, emwa nibun gha ya egbe taa iran vbe uyinmwẹ ifavbaro ne iran yin,* emwa ghi vbe rhunmwuda iran gha ya unu rhia odẹ ẹmwata. 3 Deba ọni, iran ghi gha ya ẹmwẹ ohoghe ne iran ta mu uwa ru, rhunmwuda emwa arovbẹmwẹ ne iran khin. Sokpan, ibuohiẹn dee ne iran ẹgiẹgiẹ, ọ kpẹẹ re na ghi ya tae, ẹ i mwẹ a ma fuẹn iran rua.

4 Ọghe ne ẹmwata, Osanobua ma yabọ avbe odibo ni ru orukhọ, sokpan, ọ na rri iran oya, ọ na filo iran ku e Tatarọs,* ọ na ya ọgiọrọ rrọ iran ye uwu ebiebi ne kalokalo, ne iran gha rre evba nẹ, a te do bu ohiẹn iran. 5 Ọ ma vbe yabọ agbọn nẹdẹ ni sọtẹ daa irẹn, sokpan, ọ na rri iran oya, ọ na ya okpamẹ fuẹn iran rua. Sokpan, ọ keghi miẹn e Noa fan, nọ re ọmwa nọ ghaa kporhu vbekpa iruemwiẹse, ọ na vbe miẹn orhunmwu ihinrọn ọvbehe fan ba ẹre. 6 Ọ keghi bu ohiẹn gbe Sọdọm vbe Gomorra, ọ na ya erhẹn fuẹn iran rua; ọ keghi ya iran ru igiemwi ne emwa dan, ne iran mieke na rẹn emwi nọ khian rruan iran vbe odaro. 7 Ọ keghi miẹn e Lọt ne ọmwa esi fan; te uyinmwẹ ifavbaro* ne emwa nẹi lele uhi ghaa yin vbe ẹghẹ nii wa gha kpokpo e Lọt vbe orhiọn. 8 Vbe ẹghẹ ne ọmwa esi nii ya gha rre uwu ẹbu iran, aro ọre kegha sẹ uyinmwẹ dan ne iran yin, ọ na vbe gha ya ehọ họẹn; ẹdẹgbegbe ẹre ọna ya gha kpokpo ẹre vbe orhiọn. 9 Ọna rhie ma wẹẹ, e Jehova* rẹn vbene ọ ya miẹn emwa ni gae fan hẹ vbe uwu edanmwẹ* ne iran ye, sokpan, ọ ghi sẹ emwa dan rae ne iran fuan vbe ẹdẹ ibuohiẹn, 10 katekate, emwa ni hoo ne iran mu awua ye emwa ọvbehe egbe, kevbe ni ya aro tila emwa ni rre asẹ rua.

Te udu iran de gbe, erriọ ẹre iran vbe ya ze vbe udu, iran ghi gha ya unu rhia emwa ne Osanobua mu uyi ye ọre gbe, vbene ohan i na mu iran. 11 Sokpan, nọ ne avbe odibosa ni kpọlọ sẹ iran, ni vbe mwẹ ẹtin sẹ iran, iran i ta ẹmwẹ dan ya ba iran ifiẹzọ, rhunmwuda ọghọ ne iran mwẹ ne Jehova.* 12 Sokpan, te avbe ikpia na yevbe avbe aranmwẹ nẹi roro iro, ni ru emwi vbene egbe wa ya gua iran kpa, te iran yevbe avbe aranmwẹ na biẹlẹ na miehe na gha munọ iran, na vbe gha gbele iran; avbe ikpia na keghi ya unu rhia emwi ne iran tobọ iran ma rẹn vbekpa ẹre. Ọfuan dee ne iran, rhunmwuda uyinmwẹ dan ne iran yin. 13 Iran gha vbe rri oya rhunmwuda odẹ dan ne iran zẹ ne egbe iran.

Na wa gha rri orhiẹnrhiẹn agbọn, ọre iwinna nọ mu iran, uhiẹn, vbe ogiavan ogioghogho. Orra kevbe okan ẹre iran khin uwa ẹre. Emwi nọ ya ẹko rhiẹnrhiẹn iran ọre ne iran gha ya imamwaemwi ohoghe mu emwa rẹrẹ,* vbe iran ghaa gu uwa rri evbare. 14 Iwinna oghẹ ẹre ọ mu iran,* iran i ghi sẹtin ban orukhọ ẹdẹ, erriọ ẹre iran vbe ya rẹrẹ emwa ni ma he wa deziẹn. Arovbẹmwẹ ẹre iran ya ma ekhọe iran emwi. Emọ na fi ẹre unu ẹre iran khin. 15 Iran keghi sẹ odẹ nọ diae rae, iran na ghi khian emwa na bibi ẹre odẹ. Odẹ ne Belam ne ovbi e Biọ lae ẹre iran vbe la khian, na na miẹn wẹẹ, aro ọre na viẹn ye emwi na khian ya san rẹn ẹse ye emwi dan nọ khian ru. 16 Sokpan, a keghi gu ẹre gui ye abakuru nọ ru. Ekẹtẹkẹtẹ* nẹi te guan ẹre ọ ghi ya urhu ọmwa nagbọn gu ẹre guan, nọ mieke na gbe ẹre hin ọnrẹn egbe rre ighẹ uyinmwẹ ọzuọ nọ khian te yin.

17 Te iran na yevbe ẹzẹ nọ kae kevbe evbu ne okpẹhoho mu rre; ebiebi ne kalokalo ẹre a mwamwa khẹ iran. 18 Iran ghi gha ta ẹmwẹ nọ rhiẹnrhiẹn vbe ukpẹ, sokpan, ẹ i mwẹ esa. Iran ghi gha loo emwi ne egbe hoo kevbe uyinmwẹ ifavbaro* ya mu emwa rẹrẹ; emwa ne iran mu rẹrẹ na, keghi re emwa ni wa da ladian vbe uwu ẹbu emwa orukhọ. 19 Iran ghi gha yan ma iran wẹẹ, iran gha khian emwa ni yan egbe iran, sokpan, iran tobọ iran ni ta ẹmwẹ na, eviẹn orukhọ ẹre iran khin; rhunmwuda, obọ ọmwa gha ghi gba ọmwa nẹ, ọviẹn ọmwa nii ẹre a ghi khin.* 20 Adeghẹ emwa na sẹtin lẹẹ fe vbe emwi awua ọghe agbọn na nẹ, rhunmwuda ne iran na mwẹ irẹnmwi ọghe Enọyaẹnmwa kevbe Ọmiọnmwafan mwa ighẹ Jesu Kristi, a na ghi miẹn wẹẹ emwa vberriọ werriegbe do gha mwẹ obọ vbe emwi awua ne iran te ka sẹrae, kevbe wẹẹ, avbe emwi nii ẹre ọ ghi kha yan ẹdagbọn iran, ẹdagbọn emwa vberriọ ghi do kulo sẹ vbene ọ te ka gha ye. 21 Ọ gha te wa maan sẹ, akpawẹ iran ma rẹn odẹ ẹmwata na na ru emwi ẹse, na khian ya miẹn wẹẹ, iran ghi rẹn ọnrẹn nẹ, iran na ghi fi iyeke gbe avbe iyi nọhuanrẹn na yi ne iran. 22 Emwi nọ sunu vbe egbe iran ghi rhie ẹre ma wẹẹ ẹmwata ẹre itan na khin: “Ekita dọlegbe ya rri ekpa nọ kpae, elẹdẹ na vbe dọlegbe gha ya egbe fuẹn ọrho vbe a khuẹ ọre nẹ.”

3 Etẹn ni ghaan, ọna ọre ebe nogieva ne I gbẹn gie uwa. Vbe ebe na, I hoo ne I ye uwa ẹre rre, emwi ne uwa ka rẹn, ne I miehe na ru iyobọ ne uwa ya gha roro emwi ẹse, zẹvbe ne I ka ru ẹre vbe ebe nokaro ne I gbẹn. 2 I hoo ne uwa yerre, ẹmwẹ ne avbe akhasẹ ni huanrẹn tae,* kẹ kevbe iyi ne Enọyaẹnmwa kevbe Ọmiọnmwafan mwa la obọ avbe ukọ yi ne uwa. 3 Vbe okaro, wa ghi rẹn wẹẹ, vbọ gha sẹ ẹdẹ okiekie, emwa ni ya emwa gbogiẹ gha rre, iran ghi do gha ya emwa gbogiẹ; emwi dan ne iran hoo ne iran ru, ẹre iran khian gha ru. 4 Iran ghi gha kha wẹẹ: “A ma wẹẹ e Kristi werriegbe dee? Irẹn ghi vbo nian? Ọ kpẹẹ re na ke tae, uhiẹn, avbe erha ima odede wulo nẹ, vbene emwi ye ke na ya bu agbọn tu agbọn gha dee, erriọ ẹre ọ ye ye.”

5 Ke ẹghẹ nọ kpẹẹ fua gha dee, ẹre ẹrinmwi kevbe agbọn ke rrọọ, lekpa ẹmwẹ ne unu ọghe Osanobua, otagbọn na keghi ladian vbe uwu amẹ, ọ na do gha rre adesẹneva amẹ. Iran rẹn ẹmwata ne uhunmwu ẹmwẹ na, sokpan, iran keghi yangbe ẹre; 6 iran vbe rẹn wẹẹ, avbe emwi na sunu yi na ẹre a ya fuẹn emwa ni ghaa rrọọ vbe ẹghẹ nẹdẹ rua, ọni ọre ẹghẹ ne Osanobua na ya okpamẹ fuẹn agbọn nẹdẹ rua. 7 Sokpan, ẹmwẹ ne unu nii, ẹre a ya sẹ ẹrinmwi kevbe agbọn ni rrọọ vbe ẹghẹ na rae khẹ ẹghẹ na khian ya ya erhẹn fuẹn ọnrẹn rua; te a sẹrae khẹ ẹdẹ ibuohiẹn kevbe ẹghẹ na khian ya fuẹn emwa nẹi mwẹ imuohan Osanobua rua.

8 Vbọrhirhighayehẹ etẹn ni ghaan, wa ghẹ mianmian wẹẹ, ikpẹdẹ ọkpa vbe aro e Jehova* ọre ukpo arriaisẹn ọkpa, ukpo arriaisẹn ọkpa na yevbe ikpẹdẹ ọkpa vbe aro ọre. 9 E Jehova* i si obọ ẹgogo ghee iyeke, vbọ gha de ọghe nọ mu eyan rẹn sẹ, zẹvbe ne emwa eso roro ẹre. Sokpan, te irẹn zin egbe rhunmwuda uwa, rhunmwuda, irẹn ma hoo ne ọmwa rhọkpa fuan, sokpan, irẹn hoo ne emwa hia roro iro fi uyinmwẹ werriẹ. 10 Sokpan, ẹdẹ ọghe Jehova* gha rre zẹvbe oyi. Vbe ẹdẹ ne ẹdẹrriọ, owogho nọkhua ẹre ẹrinmwi khian ya khian ena ho bẹkun, sokpan, avbe emwi ni kakabọ tọn ni rre ẹrinmwi kevbe agbọn ghi ranran, uhunmwu otagbọn na kevbe avbe iwinna na ru vbọ ghi khian ena wee rua.*

11 Ugbẹnvbe a miẹn wẹẹ, a gha fuẹn avbe emwi na hia rua vbe odẹ vbenian, wa muẹn roro, aro emwa nọ khẹke ne uwa gha khin, wa ghi hia ne uwa gha mwẹ uyinmwẹ nọhuanrẹn, wa ghi vbe gha yin vbe odẹ nọ gha rhie ẹre ma wẹẹ, emwa ni rhiegbe ye ugamwẹ Osanobua ẹre uwa khin, 12 zẹvbe ne uwa ya mudia khẹ ẹghẹ ne ẹdẹ ọghe Jehova* khian ya rre, zẹvbe ne uwa vbe ya rhie ẹre ye ekhọe.* Ọ gha sẹ ẹdẹ ne ẹdẹrriọ, a ghi ya erhẹn fuẹn ẹrinmwi rua, emwi hia ni rre ẹrinmwi kevbe agbọn ghi ranran, rhunmwuda owowo nọ kakabọ yọn! 13 Sokpan, ẹrinmwi ọgbọn kevbe agbọn ọgbọn ne Osanobua wẹẹ irẹn gha mu rre, ẹre ima mudia khẹ, evba nii ẹre iruemwiẹse khian na miẹn agba dia.

14 Nọnaghiyerriọ etẹn ni ghaan, ugbẹnvbe a miẹn wẹẹ avbe emwi na ẹre uwa mudia khẹ, wa hia vbe odẹ ke odẹ, ne uwa gha re emwa ni huanrẹn kevbe nẹi mwẹ orra vbe aro Osanobua, ne uwa vbe gu ẹre gha rrọọ vbe ọfunmwegbe. 15 Yevbesọni, wa gha ka izinegbe ọghe Enọyaẹnmwa ye ẹkpotọ ne uwa khian ya miẹn fan, zẹvbe ne ọtẹn ima nọ ghaan ighẹ e Pọl gbẹn gie uwa, rhunmwuda ẹwaẹn ne Osanobua ya we ẹre. 16 Te ọ wa guan kaẹn avbe emwi na vbe ebe hia nọ gbẹnnẹ. Vbọrhirhighayehẹ, emwi eso nọ guan kaẹn vbe ebe nọ gbẹn keghi lọghọ na rẹn otọ re; iran ni ma rẹn enaye* kevbe ni ma deziẹn keghi rhan otọ avbe ẹmwẹ na ghee ihan. Erriọ ẹre iran vbe ru ako nikẹre vbe Ebe Nọhuanrẹn, sokpan, ọfuan ẹre iran khian lae miẹn.

17 Ne uwa na ghi rẹn ọna nẹ nian etẹn ni ghaan, wa gha begbe, ne emwa nii nẹi lele uhi ghẹ do ya uyinmwẹ ne iran yin bibi uwa odẹ, ne uwa ghẹ do khian emwa ni de fua, ni ma ghi mudia ẹse. 18 Nọghayayerriọ, wa ye gha ru emwi nọ gha ya Enọyaẹnmwa kevbe Ọmiọnmwafan mwa ighẹ Jesu Kristi gha ru ẹse ne kpataki* ne uwa sayọ, wa ghi vbe hia ne uwa rẹn ọnrẹn sayọ. Irẹn ẹre a gha rhie uyi na vbe ẹghẹ na nian, ya sẹ etẹbitẹ. Isẹ.