EBE NOKARO ỌGHE PITA

1 E Pita nọ re ukọ ọghe Jesu Kristi, ẹre ọ gbẹn ebe na gie uwa na hannọ zẹ ni re ọrriọvbe, ni zagha lele Pọntọs, e Galetia, e Kapadosia, Esia kevbe Bitinia. 2 Te a hannọ uwa zẹ, zẹvbe ne Osanobua ne Erha mwa mwamwaẹn yotọ, ọ na ya orhiọn nọhuanrẹn ọghẹe kpe uwa huan, ne uwa mieke na gha re emwa ni họn ẹmwẹ kevbe emwa na sanmwẹ esagiẹn ọghe Jesu Kristi yan:

Te uwa gha miẹn ẹse ne kpataki* ọghe Osanobua kevbe ọfunmwegbe ẹsẹse.

3 Uyi nọ ne Osanobua kevbe Erha ọghe Enọyaẹnmwa e Jesu Kristi! Rhunmwuda itohan ọghẹe nọkhua, ọ keghi ru ẹre na werriegbe biẹ ima, ne ima mieke na gha mwẹ emwi ne ima ya aro yi nẹi mwẹ ọ ma sunu, lekpa nọ na huẹn Jesu Kristi kpaegbe vbe idin. 4 Arevbukhu nẹi sẹtin kẹkẹ, nọhuanrẹn kevbe nẹi fafa ẹre Osanobua rhie ne ima. Irẹn mwamwaẹn khẹ uwa nẹ vbe ẹrinmwi, 5 ọni ọre uwa ne Osanobua ya ẹtin ẹnrẹn gbogba ga, rhunmwuda amuẹtinyan ne uwa mwẹ, ne uwa miehe na miẹn imiẹnfan na khian rhie ma vbe ẹghẹ okiekie. 6 Rhunmwuda ọna, ọyẹnmwẹ nọ sẹ uwa i gia gie, agharhemiẹn wẹẹ, ẹ i mwẹ uwa ma vbe rri oya vbe ovbi ẹghẹ kherhe, rhunmwuda ọlọghọmwa ughughan ne uwa ya egbe miẹn. 7 Amuẹtinyan ọghe uwa gha sẹtin la edanmwẹ vberriọ gberra, wa gha miẹn etian, uyi kevbe ọghọ vbe ẹghẹ ne Jesu Kristi khian ya rhiegbe ma. Egbe amuẹtinyan vbenian hin usi sẹ igoru, ọni ọre igoru na miẹn wẹẹ ọ sẹtin rhia, ọ gha khọnrẹn wẹẹ a ya erhẹn kpe ẹre* nẹ. 8 Agharhemiẹn wẹẹ, wa ma he bẹghe Kristi ẹdẹ, wa na ye hoẹmwẹ ọnrẹn. Agharhemiẹn wẹẹ, wa i ye bẹghe ẹre nian, wa na ye mu ẹtin yan rẹn.* Banbanna nian, ọyẹnmwẹ nọ sẹ uwa i gia gie, te ekhọe uwa wa vuọn ne oghọghọ, 9 rhunmwuda, wa rẹnrẹn wẹẹ, te imiẹnfan khian ghi sẹ uwa obọ, rhunmwuda amuẹtinyan ne uwa mwẹ.

10 Ẹmwẹ imiẹnfan na, ẹre avbe akhasẹ wa gha nọ ọta vbekpa ẹre, iran na vbe gha gualọ otọ re khian. Ena ọre avbe akhasẹ ni tae yotọ ighẹ ẹmwẹ ẹse ne kpataki* ne Osanobua ru ne uwa. 11 Osanobua keghi loo orhiọn nọhuanrẹn ọghẹe, ya tama iran yotọ vbekpa vbene Kristi khian ya rri oya hẹ, kevbe vbene a khian ya mu uyi ye ọre egbe hẹ vbe okiekie. Ọna ẹre ọ si ẹre, ne iran na gha gualọ otọ vbene emwi na hia khian ya sunu hẹ vbe egbe Kristi, kevbe ẹghẹ nọ khian ya sunu. 12 Osanobua keghi gi avbe akhasẹ nii rẹn wẹẹ, ẹ i re egbe iran ẹre iran winna na, sokpan, wa ẹre iran winna na. Emwi ne iran ya gha wewe, ẹre emwa ni do kporhu iyẹn nọ maan ma uwa, vbe ya gha wewe ma uwa, lekpa orhiọn nọhuanrẹn nọ ke ẹrinmwi rre. Avbe odibosa keghi hia vbe odẹ ke odẹ, ne iran vbe rẹn avbe emwi na guan kaẹn na.

13 Nọnaghiyerriọ, wa mu ekhọe uwa egbe yotọ, ne uwa ya winna; wa gi ẹwaẹn gba ne uwa; wa rhie ekhọe ye ẹse ne kpataki* na khian ru ne uwa vbe ẹghẹ ne Jesu Kristi khian ya rhiegbe ma. 14 Zẹvbe emọ ni họn ẹmwẹ, wa ghẹ ghi ru emwi vbene egbe uwa gualọ, zẹvbe ne uwa ka gha ru ẹre vbe ẹghẹ ne uwa ma na rẹn enaye. 15 Sokpan, wa gi uyinmwẹ uwa hia gha re nọhuanrẹn, zẹvbe ne Ọmwa Nọhuạnrẹn nii nọ tie uwa vbe ye, 16 rhunmwuda, a gbẹn ọnrẹn yotọ wẹẹ: “Te ọ khẹke ne uwa gha re emwa ni huanrẹn, rhunmwuda, ọmwa nọhuanrẹn ẹre imẹ vbe khin.”

17 Adeghẹ uwa na gha tu tie Erha mwa nọ re ọbuohiẹn nẹi bu eku, nọ bu ohiẹn edọmwadẹ ọghẹe zẹvbe ne iwinna rẹn khare, wa ghi gi uyinmwẹ uwa gha rhie ẹre ma wẹẹ uwa mu ohan rẹn, vbe ovbi ẹghẹ kherhe ne uwa khian ya vbe agbọn na. 18 Rhunmwuda, wa rẹnrẹn wẹẹ, ẹ i re emwi ni sẹtin kẹkẹ, vbe na ghee esiliva ra igoru, ẹre a ya fan uwa fua* vbe agbọn ọrhiae ne uwa re vbe ukhu vbe obọ avbe erha uwa odede.* 19 Sokpan, esagiẹn nọ hin usi ọghe Kristi, nọ yevbe esagiẹn ọghe oteghe ohuan nẹi mwẹ okan ra ama, ẹre a ya fan uwa. 20 Ọghe ne ẹmwata, a te miẹn wẹẹ a bu agbọn tu agbọn, a ka rẹn ọnrẹn nẹ, sokpan, ọ ghi bu ẹghẹ ufomwẹ, a keghi rhie ẹre ladian rhunmwuda uwa. 21 Lekpa ẹre, ẹre uwa na ya Osanobua yi, nọ re ọmwa nọ huẹn ọnrẹn kpaegbe vbe idin, nọ vbe mu uyi ye ọre egbe, ne Osanobua mieke na gha re ọmwa ne uwa mu ẹtin yan kevbe ne uwa ya aro kọ.

22 Rhunmwuda ne uwa na ya imamwaemwi ọghe ẹmwata ru emwi, te uwa ghi kpe egbe uwa huan; ọna ẹre ọ ghi ya uwa mwẹ ahoẹmwọmwa nẹi re ọghe okpunu daa etẹn. Nọnaghiyerriọ, wa hia vbe odẹ ke odẹ, ne uwa ya ekhọe hia hoẹmwẹ egbe. 23 Te a ghi werriegbe biẹ uwa. Ikpẹ* ne uwa ke zọọ ladian i re nọ sẹtin kẹkẹ, sokpan, nẹi sẹtin kẹkẹ nọ. Ẹmwẹ Osanobua nọ rrọọ, nọ re Osa ọghe etẹbitẹ, ẹre a ya werriegbe biẹ uwa. 24 Rhunmwuda, “te emwa nagbọn* hia yevbe irunmwu, te ose* ọghe iran yevbe obobo ni rre oha; te irunmwu luẹluẹ, obobo ghi vbe khuọn kua, 25 sokpan, ẹmwẹ ọghe Jehova* keghi rrọọ vbe etẹbitẹ.” “Ẹmwẹ” na keghi re iyẹn nọ maan na ya wewe ma uwa.

2 Nọnaghiyerriọ, wa wabọ emwi dan hia hin ẹdagbọn uwa rre, kevbe ero, uyinmwẹ okeke, igbọvo kevbe ọtakhọ. 2 Vbe na ghee emobọ, wa gi ewẹn ọghe ẹmwẹ Osanobua na ma gua* gha khọn uwa, nọ mieke na ya uwa waan, wa ghi do miẹn imiẹnfan. 3 Ọni ọre deghẹ uwa tobọ uwa miẹn ọnrẹn* nẹ wẹẹ, ọmwa nọ mwẹ ekhọe esi ẹre Enọyaẹnmwa khin.

4 Irẹn ọre okuta nọ mwẹ arrọọ ne emwa nagbọn he, sokpan, Osanobua keghi miẹn ọnrẹn yi, ẹ i vbe ya ẹmwẹ ọnrẹn ku. Zẹvbe ne uwa ya bu ẹre dee, 5 wa tobọ uwa keghi re okuta ni mwẹ arrọọ, a na vbe ya uwa bọ owa, ọni ọre owa na ya orhiọn nọhuanrẹn ọghe Osanobua bọ, ne uwa mieke na gha re ohẹn; ẹghẹ nii, wa ghi gha la obọ e Jesu Kristi zọ ese gie Osanobua zẹvbe emwa ne orhiọn nọhuanrẹn loo, Osanobua ghi vbe miẹn izọese ọghe uwa yi. 6 Rhunmwuda, a tae vbe Ebe Nọhuanrẹn wẹẹ: “Ghee oo! I gha hannọ okuta ọkpa zẹ, I ghi yae gbe ẹyotọ vbe Zaiọn, ọni ọre okuta ighobioye na ya gbe ẹyotọ igiekẹn owa, ọmwa rhọkpa i rrọọ nọ mu ẹtin yan rẹn,* nọ khian gbe I ma rẹn hiehie.”*

7 Nọnaghiyerriọ, emwi ighobioye ẹre irẹn khin ne uwa, rhunmwuda, emwa iyayi ẹre uwa khin; sokpan, nọ ne iran ni ma yayi, Ebe Nọhuanrẹn khare wẹẹ, “okuta ne iran ni bọ owa he, ẹre ọ ghi do khian okuta a ma miẹn a i ru”* 8 kevbe “okuta nọ rrua ọmwa owẹ, kẹ kevbe okuta nọkhua nọ mu ọmwa gbe otọ.” Iran keghi rrua owẹ, rhunmwuda ne iran i na ya ẹmwẹ Osanobua ru emwi. Ọna ọre emwi na ta yotọ, nọ khian rruan iran vbe okiekie. 9 Sokpan, wa ọre “uniẹn na hannọ zẹ, avbe ohẹn ni vbe re ọba, agbẹnvbo nọhuanrẹn, emwa ni hin usi vbe aro Osanobua ne irẹn ya ru ọghẹe; te irẹn zẹ uwa, ne uwa mieke na gha tama emwa khian vbekpa umamwẹ”* ọghe Ọmwa nọ tie uwa ladian vbe uwu ebiebi gha die awanwan ọyunnuan ọghẹe. 10 Wa i te ka re emwa Osanobua, sokpan, emwa rẹn ẹre uwa ghi khin nian; a ma te ka tohan uwa, sokpan, te a ghi tohan uwa nian.

11 Etẹn mwẹ ne I hoẹmwẹ ọnrẹn, I rinmwian uwa zẹvbe ọrriọvbe kevbe erhunmwuyẹn ne uwa khin, ne uwa gha bi egbe ne emwi ne egbe gualọ, nọ gu uwa khọn vbe uwu egbe. 12 Wa ye gha yin uyinmwẹ esi vbe uwu ẹbu emwa ni rre uwu agbọn; iran gha dobọ ba uwa ifiẹzọ wẹẹ, wa ru emwi dan, iran sẹtin bẹghe uyinmwẹ esi ọghe uwa, ẹghẹ nii, iran ghi gha rhie uyi gie Osanobua vbe ẹdẹ nọ gha do bu ohiẹn.*

13 Wa rhunmwuda Enọyaẹnmwa gha mu egbe rriotọ ne emwa hia ni sẹ uwa, na ghi mu ye ukpo ọdakha nẹ vbe agbọn na, ọre ọba nọ, 14 ra e gọvinọ ne irẹn gie nọ do rri emwa ni ru emwi dan oya, kevbe nọ gha tian emwa ni ru emwi esi. 15 Ẹghẹ nii, emwa ni kọn, ni talọ ẹmwẹ ogbe gha ghi bẹghe uyinmwẹ esi ọghe uwa, iran i ghi miẹn ẹmwẹ ta.* Emwi ne Osanobua gualọ ẹre ọna wa khin. 16 Wa gha ru emwi zẹvbe ọmwa nọ yan egbe ẹre; sokpan, wa ghẹ mu asẹ ne uwa mwẹ na gue aro, ne uwa yae gha zẹ iba, nọghayayerriọ, wa gha loo ẹre ya ru emwi zẹvbe eviẹn Osanobua. 17 Wa gha rhie ọghọ ne emwa hia, wa hoẹmwẹ etẹn hia ne uwa gba ga, wa gha mu ohan Osanobua, wa gha rhie ọghọ ne ọba.

18 We ne avbe eguọmwadia gha gbe uhunmwu kotọ ne arowa iran, iran ghi vbe gha mu ohan iran vbene ọ khẹke; ẹ i re arowa nọ maan kevbe nọ mwẹ amuroro ọkpa ẹre iran khian gha ru ọna daa, sokpan, iran ghi vbe gha ru ẹre daa arowa ne ẹmwẹ ọnrẹn lọghọ. 19 Adeghẹ ọmwa na gha zin egbe oya,* a na vbe gha zẹ ọre kpokpo rhunmwuda nọ ma na hoo nọ ru emwi nọ gha ya ekhọe ọre gha bu abe gbe ẹre vbe odaro Osanobua, ọna keghi ya ẹko rhiẹnrhiẹn Osanobua. 20 De ere nọ rrọọ, adeghẹ a na gbe uwa ye orukhọ ne uwa ru, wa na vbe zin egbe ẹre? Sokpan, adeghẹ uwa na zin egbe oya rhunmwuda emwi esi ne uwa ru, emwi nọ maan nọ vbe aro Osanobua.

21 Uhiẹn, ọna ẹre Osanobua tie uwa ba, rhunmwuda, e Kristi tobọre vbe rri oya ne uwa, ọ na rhie igiemwi esi yotọ ne uwa, ne uwa gha lele ukpowẹ ọre khuankhuankhuan.* 22 Ọ ma ru orukhọ rhọkpa, ẹmwẹ erẹrẹ ma vbe ke unu ẹnrẹn ladian. 23 Vbe ẹghẹ ne emwa ya rhovbiẹ ọre,* ọ ma rhovbiẹ* iran werriegbe. Vbe ẹghẹ nọ ya gha rri oya, ọ ma zaro mu ọmwa rhọkpa, sokpan, ọ keghi sẹ emwi hia rae ye obọ Ọmwa nii, nọ re ọbuohiẹn nẹi bu eku. 24 Irẹn tobọre keghi ya egbe miẹn orukhọ ọghe ima vbe uhunmwu erhan, ne ima miehe na gha re nọ wu vbọ gha de ọghe orukhọ, sokpan, ma ghi gha re nọ rrọọ vbọ gha de ọghe iruemwiẹse. “Ẹwẹn ọghẹe* ẹre a ya mu uwa egbe rran.” 25 Rhunmwuda, te uwa te yevbe ohuan nọ te bibi odẹ khian, sokpan, banbanna nian, te uwa ghi bu ọsuohuan ọghe uwa gha dee, nọ re ọmwa nọ gbaroghe arrọọ ọghe uwa.

3 Erriọ vbe ye zẹẹ, wa ne amwẹ, wa gha gbe uhunmwu kotọ ne ọdafẹn uwa, a i rẹn deghẹ eso rrọọ nẹi ya ẹmwẹ Osanobua ru emwi, uyinmwẹ esi ọghe uwa ne ọvbokhan iran ghi fi iran ekhọe werriẹ, vbene uwa i na ta ifiẹmwẹ rhọkpa, 2 rhunmwuda uyinmwẹ uwa nọhuanrẹn ne iran bẹghe kevbe ọghọ vbe ute ne uwa mwẹ. 3 Wa ghẹ gi ose ọghe uwa gha re emwi na wa bẹghe vbe egbe ọkpa, vbe na ghee eto na ru, igoru na ya te egbe, ra ukpọn ighobioye na ya haan, 4 sokpan, te ọ khẹke ne ose ọghe uwa gha re ọghe ekhọe, wa ghi ya ufumwẹ kevbe ekhọe ọmẹhẹ gha te egbe, rhunmwuda, ọna ọre emwi nọ hin usi sẹ vbe aro Osanobua; ose vbenian i vbe fafa. 5 Erriọ ẹre avbe ikhuo nẹdẹ ni huanrẹn, ni mu ẹtin yan Osanobua ya gha te egbe, iran na gha gbe uhunmwu kotọ ne ọdafẹn iran. 6 Erriọ ẹre Sera wa vbe ru ẹre zẹẹ, ọ na gha họn ẹmwẹ ne Ebraham, ọ na gha tie ẹre enaẹmwẹ. Ivbi ẹre, ẹre uwa ghi vbe khin, ọni ọre deghẹ uwa na ye gha yin ẹse, wa ma na vbe gi ohan mu uwa.

7 Erriọ vbe ye, wa ne avbe ọdọ, wa gi obọ ne uwa ya mu ọvbokhan uwa gha rhie ẹre ma wẹẹ, wa rẹn vbene iran ye hẹ.* Zẹvbe ikhuo ne iran khin, wa gha mu iran tetete, vbe na mu emwi nọ ma wegbe, ugbẹnvbe a miẹn wẹẹ, arrọọ ne Osanobua wẹẹ irẹn gha rhie ne uwa, rhunmwuda nọ na tohan uwa, gha vbe sẹ iran obọ. Wa ghi gha ru vberriọ, ne emwi rhọkpa ghẹ mieke na mu idobo ye erhunmwu ọghe uwa.

8 Vbe okiekie ehia, ọ khẹke ne uwa hia gha mwẹ ekhọe ọkpa,* wa gha daa ne egbe, wa gha mwẹ agiẹngiẹn etẹn, ẹnina kevbe imuegberriotọ. 9 Wa ghẹ ya ọkhọ ha osa ọkhọ, wa ghẹ vbe rhovbiẹ ọmwa nọ rhovbiẹ uwa. Nọghayayerriọ, wa gha ya emwi esi ha iran osa,* rhunmwuda, ọna ẹre a tie uwa ba, ne uwa miehe na miẹn afiangbe.

10 Rhunmwuda, “ọmwaikọmwa nọ hoẹmwẹ ẹdagbọn rẹn, nọ vbe hoo ne agbọn maan irẹn, we nọ gha kọn ẹmwẹ ta, nẹ ghẹ ya ta ẹmwẹ dan, nẹ ghẹ vbe ya unu ẹnrẹn mu emwa rẹrẹ. 11 We nọ kie werriegbe vbe emwi dan na ru, nọ gha ru emwi esi, nọ gha gualọ ọfunmwegbe, ọ ghi vbe hia nọ gu emwa ọvbehe gha rrọọ vbe ọfunmwegbe. 12 Rhunmwuda, aro e Jehova* wa sotọ vbe egbe emwa esi, erriọ ẹre ọ vbe ya họn erhunmwu ne iran ya ekhọe hia na, sokpan, te Jehova* werriẹ aro nọ khọọ daa iran ni ru emwi dan.”

13 Vbene ẹmwata, de ọmwa nọ khian ru uwa emwi dan, deghẹ uwa na gha ya egbe hia ru emwi esi? 14 Sokpan, adeghẹ a na dobọ miẹn wẹẹ, te uwa ghi rri oya ye emwi esi ne uwa ru, te ọ khẹke ne uwa gha ghọghọ. Vbọrhirhighayehẹ, wa ghẹ mu ohan emwi ne iran mu ohan rẹn,* wa ghẹ vbe gi emwi rhọkpa kpokpo uwa orhiọn. 15 Sokpan, wa gha ya ọghọ ne Kristi vbe ekhọe uwa zẹvbe Enọyaẹnmwa; wa mu egbe vbe ẹghẹ hia, ne uwa ya rhie ewanniẹn ne ọmwa nọ rhirhi nọ uwa ọta vbekpa emwi ne uwa ya aro yi, sokpan, wa ghi gha ya ekhọe ọmẹhẹ kevbe ọghọ vbe ute ru ọna.

16 Wa hia ne uwa ghẹ gha ru emwi nọ gha ya ekhọe uwa gha bu abe gbe uwa, a i rẹn deghẹ emwa na gha ya unu rhia uwa vbe odẹ ke odẹ, ekhue ghi mu iran rhunmwuda uyinmwẹ esi ne uwa yin zẹvbe erhuanegbe Kristi. 17 Adeghẹ uwa na gha rri oya, rhunmwuda emwi esi ne uwa ru, ọni ọre deghẹ Osanobua na kue yọ, ọ maan sẹ na rri uwa oya rhunmwuda wẹẹ, wa ru emwi dan. 18 Rhunmwuda, uhukpa ẹre Kristi wu ye orukhọ ọghe emwa hia, ẹ i khian ghi vbe dọlegbe ru ẹre; ọmwa esi keghi wu ne emwa dan, nọ miehe na viọ uwa gie Osanobua. A gbe ẹre rua zẹvbe ọmwa nagbọn, sokpan, a keghi huẹn ọnrẹn kpaegbe zẹvbe ọmwa orhiọn. 19 Egbe ọghe orhiọn nii, ẹre irẹn ya kporhu ma emwa orhiọn ni rre eghan. 20 Ena ọre iran ni sọtẹ vbe ẹghẹ ne Osanobua ya gha zin egbe vbe ẹghẹ e Noa, vbe uwu ẹghẹ na ya gha kan okọ, na na miẹn wẹẹ, ibozẹghẹ emwa ni re orhunmwu* erẹnrẹn ni ghaa rre uwu okọ nii, ẹre ọ ghi miẹn uhunmwu rhie ladian vbe amẹ nii.

21 Idinmwiamẹ nọ miẹn uwa fan nian, lekpa arhiọkpaegbe ọghe Jesu Kristi, ẹre a ya gie emwi nọ sunu vbe ẹghẹ nii. (Idinmwiamẹ i re emwi nọ kpe iruẹn nọ rre ikinnegbe ọmwa kua, sokpan, ọ keghi re erhunmwu ne uwa na gie Osanobua, ne uwa mieke na gha mwẹ ekhọe nọhuanrẹn.) 22 Ugbẹnvbe a miẹn wẹẹ e Kristi kpa gha rrie ẹrinmwi nẹ, irẹn wa rre obọ erha ọmwa ọghe Osanobua nian, a vbe viọ avbe odibo, iran ni rre asẹ kevbe iran ni mwẹ ọdakha ye ototọ ẹre nẹ.

4 Ugbẹnvbe a miẹn wẹẹ e Kristi rri oya vbe ọ rre agbọn na, ọ vbe khẹke ne uwa gha mwẹ egbe ekhọe nọ mwẹ, ne uwa mieke na yae khẹ ye egbe; rhunmwuda, ọmwa nọ rri oya vbe agbọn na, yangbe orukhọ na ru nẹ, 2 nọ mieke na loo ẹghẹ nọ kẹre nọ khian ya vbe agbọn na, ya gha ru emwi ne Osanobua hoo, ẹ i re nọ yae gha ru emwi ne emwa nagbọn gualọ. 3 Ẹghẹ ne uwa ka ya gha mwẹ obọ vbe uyinmwẹ ọghe emwa ni rre uwu agbọn vbe gberra nẹ, ọni ọre ẹghẹ ne uwa na gha yin uyinmwẹ ifavbaro,* wa na gha fifi ye emwi dan, wa na gha da ayọn gbe egbe, wa na gha mwẹ obọ vbe iku na na gbe izabọbọ ẹwia,* ẹbu idayọn na na ya ayọn suan ẹre a na gha miẹn uwa, wa na vbe gha mwẹ obọ vbe uyinmwẹ ọrhiae ọghe igẹbọ.* 4 Te ọ ghi kpa iran odin, rhunmwuda ne uwa i na ghi deba iran vbe uyinmwẹ ọrhiae, uyinmwẹ osọnnọ ne iran yin, ọni ẹre ọ si ẹre ne iran na ya unu rhia uwa. 5 Sokpan, iran na, gha na iyẹn egbe iran ma ọmwa nii nọ mu egbe nọ ya bu ohiẹn emwa ni rre agbọn kevbe ni wulo nẹ. 6 Uhiẹn, ọna ẹre ọ si ẹre na na vbe kporhu iyẹn nọ maan ma iran ni wulo nẹ, ne iran mieke na gha re emwa ni rrọọ vbe aro Osanobua zẹvbe ne orhiọn nọhuanrẹn ya dia ẹdagbọn iran, agharhemiẹn wẹẹ vbene emwa nagbọn ya ghee emwi, ẹre a ya bu ohiẹn iran.

7 Sokpan, ufomwẹ ọghe emwi hia sotọ fo nẹ. Nọnaghiyerriọ, wa gha re emwa ni roro emwi ẹse, wa khẹ ye egbe* vbọ gha de ọghe erhunmwu na na. 8 Nọ ghi wa sẹ ehia, wa ya ekhọe hia hoẹmwẹ egbe, rhunmwuda, ahoẹmwọmwa ẹre ọ gue orukhọ nibun. 9 Wa gha mu ọghọ ye emwa egbe, vbene uwa i na vian. 10 Ugbẹnvbe a miẹn wẹẹ, dọmwadẹ ọghẹe mwẹ emwi ne Osa ya we ẹre, wa loo ẹre ya gha ru iyobọ ne egbe zẹvbe eguọmwadia esi ni ru iyobọ ne emwa ya miẹn ẹse ne kpataki* ne Osanobua ru ne ọmwa vbe odẹ ughughan. 11 We ne ọmwaikọmwa nọ guan gha guan vbe odẹ nọ gha rhie ẹre ma wẹẹ, ẹmwẹ nọ ke obọ Osanobua rre ẹre ọ ta; ọmwaikọmwa nọ ru iyobọ ne emwa ọvbehe, we nọ gha ru ẹre zẹvbe ọmwa nọ mu ẹtin yan ẹtin nọ ke obọ Osanobua rre; na miehe na lekpa e Jesu Kristi rhie uyi gie Osanobua vbe emwi hia. Irẹn ọre ọmwa na gha rhie uyi na vbe etẹbitẹ ya sẹ etẹghori. Isẹ.

12 Etẹn ni ghaan, wa ghẹ gi edanmwẹ nọ yọn vbe na ghee erhẹn ne uwa wa miẹn nian, kpa uwa odin vbene a miẹn wẹẹ, emwi na ma he miẹn egbọre ẹdẹ nọ. 13 Nọghayayerriọ, wa gha ghọghọ rhunmwuda ne uwa na rri egbe oya ne Kristi re, ne ọyẹnmwẹ mieke na gha sẹ uwa, ekhọe uwa ghi vbe vuọn ne oghọghọ vbe ẹghẹ na khian ya rhie uyi ọghe Kristi ma. 14 Adeghẹ a na gha zaan* uwa rhunmwuda e Kristi,* te ọ khẹke ne uwa gha ghọghọ, rhunmwuda, orhiọn ọghe Osanobua, nọ re orhiọn ọghe uyi tuorre yan uwa nẹ.

15 Vbọrhirhighayehẹ, ọ ma khẹke ne ọmwaikọmwa vbe uwu uwa gha rri oya rhunmwuda wẹẹ ọ do ọmwa izigha, ra ọ ya rhaa, ra ọ mwẹ obọ vbe emwi dan, ra rhunmwuda nọ na fi ukpẹ ye ẹmwẹ ẹrrẹe. 16 Sokpan, adeghẹ ọmwaikọmwa na gha rri oya rhunmwuda nọ na re Ovbi Otu e Kristi, ọ ma khẹke ne ekhue gha muẹn, sokpan, we nọ ye gha rhie uyi gie Osanobua zẹvbe nọ ya ya eni e Kristi wan egbe. 17 Ẹghẹ sẹ nẹ ne ibuohiẹn khian ya suẹn vbe owa Osanobua. Adeghẹ egbe ima ẹre ibuohiẹn khian ke suẹn, vbọ khian ghi wa gha ye hẹ ne emwa ni ma miẹn iyẹn nọ maan ọghe Osanobua yi? 18 “Adeghẹ ọ lọghọ, ọmwa esi ke miẹn fan, vbọ khian ghi gha ye hẹ ne ọmwa nọ ma rẹn Osanobua kevbe ọmwa orukhọ?” 19 Nọnaghiyerriọ, we ne emwa ni rri oya, rhunmwuda ne iran na ru emwi nọ yẹẹ Osanobua, zẹ egbe iran obọ ne Ayi nọ yi iran, nọ re ọmwa nọ gia mu ẹtin yan, ne iran ye gha ru emwi nọ maan khian.

5 Nọnaghiyerriọ, zẹvbe ọdiọn ne imẹ vbe khin, ne aro ọre sẹ oya ne Kristi re kevbe nọ khian vbe ghae vbe uyi na khian rhie ma, I hoo ne I rinmwian ediọn* ni rre uwu ẹbu uwa wẹẹ: 2 Wa gha su oghẹn ohuan ne Osanobua viọ ne uwa zẹvbe ne uwa ya winna iwinna ọgbaroghe. Wa ghẹ ya umaro umaro ru ẹre, sokpan, wa gha ya ekhọe hia ru ẹre vbe odaro Osanobua; wa ghẹ ru ẹre, vbene a miẹn wẹẹ, te uwa gualọ ere ọghe enegbe uwa, sokpan, wa gha ru ẹre zẹvbe emwi ne uwa hoo ne uwa gele ru; 3 wa ghẹ gha hoo ne uwa gha ta ẹmwẹ nọ sẹ vbe egbe iran ni re ọghe Osanobua, sokpan, wa gha re igiemwi esi ne oghẹn ohuan ọghe Osanobua. 4 Ẹghẹ ne ogiete ọsuohuan gha ya rhiegbe ma, ẹrhu ẹde ọghe uyi nẹi fafa ghi sẹ uwa obọ.

5 Erriọ vbe nọ zẹẹ, ọ vbe khẹke ne uwa ne avbe igbama gha gbe uhunmwu kotọ ne eniwanrẹn.* Sokpan, wa hia ghi mu imuegberriotọ yọ vbe na ghee ukpọn* zẹvbe ne uwa ya gu egbe yin, rhunmwuda, te ẹmwẹ emwa ni tọn egbe mu sọnnọ Osanobua, sokpan, ọ keghi ru ẹse ne kpataki* ne iran ni mu egbe rriotọ.

6 Nọnaghiyerriọ, wa mu egbe rriotọ vbe ototọ ekuabọ ne olọ ọghe Osanobua, nọ mieke na tọn uwa mu vbọ gha sẹ ẹghẹ. 7 Wa ghi vbe mu emwi hia nọ kpokpo uwa orhiọn ye ọre obọ, rhunmwuda, irẹn gbaroghe uwa.* 8 Wa rhie ẹwaẹn ye uhunmwu, ne uwa gha begbe! Rhunmwuda, oghian uwa nọ re Esu khian yo khian rre vbe na ghee oduma nọ davan, nọ gualọ ọmwa nọ khian gbe re. 9 Sokpan, wa khẹ ye egbe, ne uwa gha gbe ẹre odan, wa ghi gi amuẹtinyan ọghe uwa ye gbain; wa ghi yerre wẹẹ, egbe oya ne uwa re na, ẹre etiẹn uwa ne uwa gba ga, ni rre ehe hia vbe agbọn na vbe ya egbe miẹn. 10 Sokpan, wa gha ghi rri oya nẹ vbe ovbi ẹghẹ kherhe, Osanobua nọ ru ẹse ne kpataki* ne ọmwa, nọ tie uwa gha die uyi ọghe etẹbitẹ ọghẹe rhunmwuda ne uwa na gu e Kristi rrọọ vbe akugbe, gha tobọre ma uwa emwi fo. Ọ gha ya uwa deziẹn, ọ gha ya uwa wegbe, ọ ghi vbe ya uwa khian enọ digiẹ. 11 Irẹn ẹre ọ yan ẹtin vbe ẹdẹdẹmwẹdẹ. Isẹ.

12 Mẹ ẹre ọ we ne Silvenọs,* ne I ka ye ọtẹn nọ gia mu ẹtin yan gu mwẹ gbẹn ebe na nọ ma tan gbe gie uwa, ne I miehe na yae rhie igiọdu ne uwa, ne I vbe gi uwa rẹn wẹẹ, Osanobua gele ru ẹse ne kpataki* ne uwa nẹ. Wa ghẹ gi ẹse na wii uwa. 13 Okhuo nii nọ rre Babilọn, na zẹ vbene a vbe zẹ uwa gie na tuẹ uwa; e Mak ne ovbi mwẹ vbe we ne I wẹẹ uwa do. 14 Wa tuẹ egbe, ne uwa vbe ya ahoẹmwọmwa mu unu soso egbe.

Ọfunmwegbe gu uwa hia ni gu e Kristi rrọọ vbe akugbe rrọọ.