EBE JEMS

1 E Jems ne ọviẹn Osanobua kevbe ọghe Enọyaẹnmwa e Jesu Kristi, ẹre ọ gbẹn ebe na gie uniẹn iweva (12) ni zagha lele ehe ughughan:

I tuẹ uwa hia oo!

2 Etẹn mwẹ, wa gha sọyẹnmwẹ vbe uwa gha miẹn edanmwẹ ughughan, 3 rhunmwuda, wa rẹnrẹn wẹẹ, amuẹtinyan ọghe uwa gha sẹtin la edanmwẹ vberriọ gberra, ọ ghi do ya uwa gha mwẹ izinegbe. 4 Sokpan, wa ghi gi izinegbe winna iwinna rẹn fo, ne uwa mieke na gha re nọ gba na kevbe nọ fo na vbe emwi hia, vbe nẹi na mwẹ ehe nọ kẹ uwa yi.

5 Nọnaghiyerriọ, adeghẹ ọmwa rhọkpa vbe uwu uwa gualọ ẹwaẹn, we nọ ye gha nọ Osanobua, Osanobua gha rhie nẹẹn; rhunmwuda, irẹn keghi viọ emwi ne emwa hia wọrhọwọrhọ, ẹ i vbe yae gbe ọmwa okan.* 6 Sokpan, we nọ ye gha ya amuẹtinyan nọ Osanobua, vbe nẹi na gbe awawẹ, rhunmwuda, te ọmwa nọ gbe awawẹ yevbe okun ne ẹhoho bi yo bi rre. 7 Uhiẹn, ọ ma khẹke ne ọmwa vberriọ ya aro ye emwi rhọkpa vbe obọ e Jehova;* 8 ọmwa nọ bọ iro eveva nọ, nọ vbe gbe yo gbe rre.

9 Sokpan, we ne ọtẹn ne obọ ma sẹ ọre gha sọyẹnmwẹ,* rhunmwuda uyi na mu ye ọre egbe. 10 Sokpan, we ne ọmwa nọ fe gha ghọghọ, rhunmwuda na na si ẹre ke otọ, rhunmwuda, vbe na ghee obobo nọ rre oha, ọ gha do ọghẹe gberra. 11 Ovẹn gha yan rre, kẹ kevbe owowo nọ lelẹe khian, ọ ghi ya emwiokọ nii khian enọ luẹlua, obobo ni rre uhunmwu ẹnrẹn ghi khuọn kua, ẹghẹ nii, ose ẹre ghi la ọrhiae rrie. Erriọ ẹre ọmwa nọ fe nii khian vbe la ọrhiae rrie, vbe ọ ghaa khu ẹfe khian.

12 Oghọghọ nọ ne ọmwa nọ zin egbe edanmwẹ, rhunmwuda, a gha ghi miẹn ọmwa vberriọ yi nẹ, a ghi mu ẹrhu ẹde ọghe arrọọ nẹẹn, ọni ọre emwi ne Jehova* yan rẹn wẹẹ, irẹn gha mu ne emwa hia ni ma gi ahoẹmwọmwa ne iran mwẹ ne irẹn fafa. 13 Ọmwa ghaa miẹn edanmwẹ, we nẹ ghẹ kha wẹẹ: “Osanobua ẹre ọ wa danmwẹ mwẹ ghee na.” Rhunmwuda, a i sẹtin ya ọkhọ danmwẹ Osanobua ghee, irẹn tobọre i vbe danmwẹ ọmwa rhọkpa ghee. 14 Sokpan, emwi ne dọmwadẹ ọghẹe hoo vbe ekhọe, ẹre ọ danmwẹ ọnrẹn ghee, emwi nọ hoo nii ghi muẹn vbe na ghee ifi. 15 Emwi nọ hoo nii gha ghi gha hanmwa nẹ, ọ ghi biẹ orukhọ; ọ gha ghi ru orukhọ nii nẹ, uwu ẹre ọ ghi kẹrikian.

16 Etẹn mwẹ ni ghaan, wa ghẹ rẹrẹ egbe uwa.* 17 Ẹse nọ maan hia kevbe ọhẹ hia nọ gbae, ẹrinmwi ẹre ọ ke rre; obọ Erha ọghe avbe uwanmwẹ ni rre orere iso, ẹre ehia ke rre. Irẹn i fi werriẹ vbe na ghee aghọnghọn nọ mu yo mu rre. 18 Irẹn keghi lekpa ẹmwẹ ẹmwata yi ima zẹvbe nọ gua iho ọghẹe ro, ne ima mieke na gha re emwa okaro ne irẹn zẹ vbe uwu emwi nọ yi.

19 Etẹn mwẹ ni ghaan, wa ghi ye ọna rre oo: Dọmwadẹ ọghẹe vbe uwu uwa ghi gha re nọ rherhe danmwehọ ẹmwẹ, sokpan, nẹi rherhe guan kevbe nẹi rherhe mu ohu, 20 rhunmwuda, izohu ọmwa nagbọn i biẹ ọmọ esi vbe aro Osanobua. 21 Nọnaghiyerriọ, wa gbe ukhu emwi osọnnọ hia rua kevbe emwi dan nọ rhirhi gha khin nọ rre ẹdagbọn uwa,* wa ghi vbe gha mu egbe rriotọ, ne uwa gi Osanobua kọ ẹmwẹ ọnrẹn nọ gha sẹtin miẹn uwa fan ye uwa orhiọn.

22 Vbọrhirhighayehẹ, wa gha ya ẹmwẹ Osanobua ru emwi, ẹ i re ne uwa gha rẹrẹ egbe uwa, ne uwa gha ya ehọ viọ ọre kẹkan. 23 Rhunmwuda, adeghẹ ọmwaikọmwa na gha họn ẹmwẹ nii kẹkan, vbe nẹi na yae ru emwi, te ọ yevbe ọmwa nọ ghee ugbaro ọre vbe ughegbe. 24 Ọ ghi ghee egbe ẹre nẹ, ọ na wa kpa; vbe ọwara ọkpa nii, ọ na mianmian aro ọmwa ne irẹn khin. 25 Sokpan, adeghẹ ọmwa na gha gbarokotọ ghee uhi nọ gbae, nọ ya ọmwa khian enọ yan egbe ẹre, ọ na vbe yae gha ru emwi, ọmwa nii i wa re ọmwa nọ gha họn ẹmwẹ, ọ ghi mianmiaẹn, sokpan, ọ keghi re ọmwa nọ ya emwi nọ họn ru emwi; te ọmwa vberriọ khian gha ghọghọ vbe emwi hia nọ ru.

26 Adeghẹ ọmwaikọmwa na wẹẹ irẹn ga Osanobua, sokpan, ẹ i gua dia aranmwẹ ọnrẹn,* te ọmwa vberriọ rẹrẹ egbe ẹre, ugamwẹ ọnrẹn i vbe mwẹ esa. 27 Ugamwẹ nọhuanrẹn kevbe nẹi mwẹ orra vbe odaro Osanobua ne Erha mwa ẹre na khin: na gha gbaroghe avbe udefiagbọn* kevbe ikhuo ni dẹgbẹe vbe usẹ* ne iran ye, a ghi vbe gha hia, na gban egbe ne uyinmwẹ nọ ma huan ọghe agbọn na.

2 Etẹn mwẹ, ọ gha gia na kha wẹẹ, wa ye mu ẹtin yan Enọyaẹnmwa e Jesu Kristi nọ mwẹ uyi ra, vbene uwa i na ya obọ ọkpa mu emwa hia? 2 Gia kha wẹẹ, okpia nọ viọ oroka ọghe igoru ye obọ, nọ vbe hẹ ukpọn ighobioye ye egbe, la uwu iko ọghe uwa, sokpan, okpia ne ovbiogue nọ yọ ukpọn ne sẹlẹkẹ na vbe rre, 3 de ne uwa gha mu uyi ye ọre egbe vbọ? Te uwa khian ghi tama okpia nọ yọ ukpọn ighobioye nii wẹẹ, “Do tota ye ehe nọ mose na,” ne uwa vbe tama ovbiogue nọ rrọọ wẹẹ, “Wẹ wa gha rre imudia,” ra, “Ya tota ye ọkpẹn ukhuerhe* nii ne I viọ owẹ yan” ra? 4 Ọ ghaa yerriọ, ẹ i re te uwa ghi gbe ewanmwẹ ghee obọ ọkpa vberriọ? Ẹ i re te uwa ghi vbe bu ohiẹn eku* vberriọ?

5 Wa danmwehọ, etẹn mwẹ ni ghaan. Ẹ i re emwa ne agbọn ghee ẹre ivbiogue ẹre Osanobua zẹ, ne iran do gha mwẹ amuẹtinyan nọ wegbe ra? Ẹ i re iran ẹre irẹn vbe zẹ, ne iran gha re emwa ni khian rri Arriọba ọghẹe vbe ukhu, zẹvbe ne irẹn yan ma emwa ni hoẹmwẹ irẹn ra? 6 Sokpan, wa i ya ọghọ ne ivbiogue. Ẹ i re emwa ni fe ẹre ọ ya obọ yẹnyẹn uwa mu otọ, iran ghi vbe silo uwa gha rrie ekọtu ra? 7 Ẹ i re iran ẹre ọ vbe ya unu rhia eni esi ne uwa ya wan egbe ra? 8 Adeghẹ uwa na gha lele uhi ọba* nọ rre ebe nọhuanrẹn, nọ khare wẹẹ: “Te u gha hoẹmwẹ ogieva ruẹ zẹvbe ne u hoẹmwẹ egbuẹ,” emwi esi ẹre uwa ru. 9 Sokpan, adeghẹ uwa i ya obọ ọkpa mu emwa hia, orukhọ ẹre uwa ru, nene uhi ghi vbe mu uwa,* zẹvbe emwa ni rra uhi.

10 Adeghẹ ọmwaikọmwa na gha lele Uhi hia, sokpan, ọ na rra ọkpa vbọ, te ọmwa vberriọ rra ehia fẹẹrẹ. 11 Rhunmwuda, ọmwa nii nọ khare wẹẹ, “Ghẹ ghẹẹ,”* ẹre ọ vbe kha wẹẹ, “Ghẹ do izigha.” Adeghẹ u ma ghẹẹ,* sokpan, u na do izigha, te u ye rra uhi. 12 Wa ye gha guan, ne uwa ye gha ru emwi zẹvbe emwa ni lele uhi ọghe emwa ni yan egbe iran,* rhunmwuda, uhi nii ẹre a khian ya bu ohiẹn uwa. 13 Rhunmwuda, ọmwa nẹi tohan emwa, a i khian vbe tohan rẹn vbe a ghaa bu ohiẹn ọnrẹn. Itohan ẹre ọ khọnmiotọ yan ibuohiẹn.

14 Etẹn mwẹ, de esa nọ ye deghẹ ọmwa na gha kha wẹẹ irẹn mwẹ amuẹtinyan, vbe nẹi na rhie ẹre ma vbe emwi nọ ru? Amuẹtinyan vberriọ gha sẹtin miẹn ọnrẹn fan ra? 15 Adeghẹ etẹn nikpia ra etẹn nikhuo nọ rhirhi gha khin, ma miẹn ukpọn rhuan,* iran ma vbe miẹn evbare ẹdẹ re, 16 sokpan, ọkpa vbe uwa na tama iran wẹẹ, “Wa gha khian, ọfunmwegbe gu uwa rrọọ; wa ghẹ bannọ egbe yotọ, wa rri evbare ne ẹko vuọn.” De esa ne ọni ye, adeghẹ uwa ma rhie emwi na ya gaga egbe ne iran? 17 Erriọ vbe ye, amuẹtinyan ne iwinna ma lele, ikun orinmwi nọ.

18 Vbọrhirhighayehẹ, orhunmwu ọkpa sẹtin kha wẹẹ: “Wẹ mwẹ amuẹtinyan, sokpan, mẹ mwẹ iwinna. Tama mwẹ vbene u gha ya sẹtin gha mwẹ amuẹtinyan hẹ vbene u i na winna lelẹe, mẹ gha vbe lekpa iwinna ne I ru rhie ẹre ma ruẹ wẹẹ, I mwẹ amuẹtinyan.” 19 U yayi wẹẹ Osanobua ọkpa ẹre ọ rrọọ, ra ẹ i re erriọ? Emwi nọ maan ẹre ọni khin. Sokpan, u ghi yerre wẹẹ, avbe orhiọn dan vbe ya ọni yi, erriọ ẹre iran vbe ya guọ zẹzẹzẹ. 20 Wẹ ne ogbe nọ ma rẹn enaye! Wẹ kue rẹn wẹẹ, ọmwa ghaa mwẹ amuẹtinyan vbe nẹi na winna lelẹe, amuẹtinyan ọghẹe i mwẹ esa? 21 Ẹ i re emwi ne Ebraham ru, ẹre a gu kae ye ọmwa ata ra? Ọni ọre ẹghẹ nọ na mu Aizik ne ovbi ẹre ye uhunmwu aka, nọ yae zọ ese gie Osanobua. 22 U ma bẹghe ẹre wẹẹ, ọ ghaa mwẹ amuẹtinyan, iwinna na vbe deba ẹre? Iwinna ne irẹn winnaẹn, ẹre ọ ghi ya amuẹtinyan ọghẹe khian enọ gbae. 23 Erriọ ẹre ẹmwẹ ne ebe nọhuanrẹn tae ghi ya sẹ, nọ na kha wẹẹ: “Ebraham mu ẹtin yan e Jehova,* ẹre a na kae ye ọmwa ata,” a na do gha tie ẹre ọsie Jehova.*

24 Wa bẹghe ẹre nian wẹẹ, emwi ne ọmwa ru, ẹre a ya kae ye ọmwa ata, ẹ i wa re rhunmwuda amuẹtinyan ọkpa. 25 Ẹ i re erriọ ẹre a vbe ka e Rehab ne igbiragia ye ọmwa ata, rhunmwuda emwi nọ ru ra? Ọ keghi rhan obọ miẹn iran yi ighẹ avbe ukọ ni do ba otọ iran ghee, ọ na ghi gie odẹ ọvbehe ma iran, ne iran khian la kpa. 26 Ọmwa nẹi ghi hiọnrọn,* ikun orinmwi nọ; erriọ vbe ye, amuẹtinyan ne iwinna ma lele, ikun orinmwi vbe nọ.

3 Etẹn mwẹ, ọ ma khẹke ne uwa nibun gha re ọmamwaemwi, rhunmwuda, wa rẹnrẹn wẹẹ, ohiẹn na khian bu ima re, ẹre ọ khian wegbe sẹ.* 2 Ẹghẹ hia ẹre ima ya ba emwi ku. Adeghẹ ọmwaikọmwa ma ba emwi ku vbe ẹmwẹ nọ ta, ọni rhie ma wẹẹ, te ọ wa gba ne ọmwa nii fo, ọ vbe sẹtin da egbe ẹre yi. 3 Te ima rrọ ekagha ye unu ẹsin,* ne iran miehe na gha họn ẹmwẹ ne ima, ẹghẹ nii, ma ghi sẹtin gha ta ẹmwẹ nọ sẹ vbe egbe iran. 4 Wa vbe ghee avbe okọ nikhua: Agharhemiẹn wẹẹ iran wa kakabọ kpọlọ kevbe wẹẹ, ogbigbi ẹhoho ẹre ọ vbe bi iran khian, emwi nekherhe na ya dia okọ ye odẹ, ẹre oziguẹ loo ya mu ẹre uhunmwu daa ehe nọ rhirhi hoo nọ mu ẹre uhunmwu ghee.

5 Erriọ vbe ye, aranmwẹ rre usun emwi nọ ghi kanmwa sẹ vbe egbe, ọrheyerriọ, orhuọ nọ rhuọ i re nekherhe. Vbene ẹgbo kpọlọ sẹ, ovbi erhẹn kherhe ẹre ọ giẹn ọnrẹn! 6 Te aranmwẹ vbe yevbe erhẹn. Vbe uwu abọ ughughan ne ima mwẹ vbe egbe, aranmwẹ keghi re nọ vuọn ne emwi dan, ọ keghi mu awua ye egbe hia, ọ ghi vbe mu erhẹn ye ẹdagbọn ọmwa, ọni ọre erhẹn nọ ke Gẹhẹna* rre. 7 Aranmwẹ oha ọkpa i rrọọ ne emwa nagbọn i sẹtin ma ẹre emwi, ya sẹ egbe avbe ahianmwẹ, aranmwẹ ni ya ẹko hiọrọ,* kevbe aranmwẹ ni rre okun; emwa nagbọn ka vbe ru ọna dee yi. 8 Sokpan, ọmwa nagbọn rhọkpa i rrọọ nọ gha sẹtin dia aranmwẹ nọ ya guan. Emwi dan nọ, ẹ i gia dayi, obi ughughan ẹre ọ vuọẹn. 9 Aranmwẹ na, ẹre ima ya rho e Jehova* ne Erha mwa, sokpan, nene aranmwẹ ẹre ima vbe ya rhovbiẹ emwa na yi “ni khọ Osanobua.” 10 Unu ẹre afiangbe kevbe ihẹn ke ladian.

Sokpan, ọ ma khẹke nọ gha yerriọ, etẹn mwẹ. 11 Amẹ nọ rhiẹnrhiẹn kevbe amẹ nọ rriara gha sẹtin gha tue ladian vbe eke ọkpa ra? 12 Etẹn mwẹ, erhan e fig vbe mọ ọliv ra? Erhan e vaẹn gha vbe sẹtin mọ e fig ra? Ẹzẹ umwẹ i khian vbe sẹtin lẹẹ amẹ nọ gia wọn ladian.

13 Ọmwa rrọọ vbe uwu uwa nọ mwẹ ẹwaẹn kevbe nọ rẹn otọ emwi ra? We nọ gha ru emwi esi, ọ ghi vbe gha ya ekhọe ọmẹhẹ ru emwi, nọ gha rhie ẹre ma wẹẹ ọmwa ẹwaẹn nọ. 14 Sokpan, adeghẹ uwa mwẹ ekhọe igbọvo, wa na vbe gha mwẹ ekhọe na ya khọn,* ọ ma khẹke ne uwa gha rhuọ, ne uwa vbe gha ta ẹmwẹ nọ gbodan ghee ẹmwata. 15 Ọna i re ẹwaẹn nọ ke ẹrinmwi rre; ọghe agbọn na nọ, ọghe aranmwẹ oha kevbe ọghe avbe orhiọn dan. 16 Rhunmwuda, ehe ke ehe ne igbọvo kevbe okhọn ye,* olighi kevbe emwi dan hia ẹre a miẹn vba.

17 Sokpan, vbe okaro, ọmwa nọ mwẹ ẹwaẹn nọ ke ẹrinmwi rre keghi mwẹ uyinmwẹ nọhuanrẹn, ọmwa ọfunmwegbe vbe nọ, ọ vbe mwẹ amuroro, erriọ ẹre ọ vbe ya họn ẹmwẹ, ọmwa nọ tohan emwa ẹsẹse nọ, erriọ ẹre ọ vbe ya ru emwi esi, ẹ i gbe ewanmwẹ ghee obọ ọkpa, ẹ i vbe re ọmwa ẹkẹ vbe iwẹnwẹn. 18 Yevbesọni, emwiokọ ọghe iruemwiẹse ẹre a kọ ye ehe ne ọfunmwegbe ye ne iran ni gualọ ọfunmwegbe.*

4 De emwi nọ si okuo kevbe okhọn ye uwu ẹbu uwa? Ẹ i re emwi ne egbe uwa gualọ, nọ gu egbe uwa khọn vbe ẹghẹ hia, ẹre ọ si ẹre ye uwa egbe? 2 Wa te hoo ne uwa gha mwẹ emwi eso, sokpan, wa i mwẹ ọnrẹn. Wa gha do izigha, wa vbe ya aro ye emwi ẹrrẹe, sokpan, emwi ne uwa gualọ ma ye sẹ uwa obọ. Wa gha gbinna, wa gha khọn vbene a miẹn wẹẹ okuo ẹre uwa ye. Emwi ne uwa gualọ ma ye sẹ uwa obọ, rhunmwuda ne uwa ma na nọ Osanobua. 3 Wa gha dobọ nọ, ẹ i ye sẹ uwa obọ rhunmwuda, ekhọe uwa ma huan, ne uwa mieke na yae gha ru emwi ne egbe uwa gualọ, ẹre uwa gu nọ.

4 Wa nẹi gia mu ẹtin yan,* wa ma rẹn wẹẹ, ọmwa nọ re ọsie agbọn na, oghian Osanobua nọ ra? Nọnaghiyerriọ, ọmwaikọmwa nọ ghi hoo nọ gha gu agbọn na ru ọse, te irẹn ghi ya egbe ẹre khian oghian Osanobua vberriọ. 5 Ra, te uwa roro ẹre wẹẹ, te ebe nọhuanrẹn wa tae kua kẹkan vbe ọ khare wẹẹ: “Ekhọe igbọvo nọ rre uwu ima keghi ya aro ima wu ye emwi ughughan”? 6 Vbọrhirhighayehẹ, ẹse ne kpataki* ne Osanobua ru ne ọmwa keghi kpọlọ ẹsẹse. Ọni ẹre ọ si ẹre ne ebe nọhuanrẹn na kha wẹẹ: “Te Osanobua werriẹ aro nọ khọọ da emwa ni tọn egbe mu, sokpan, irẹn keghi ru ẹse ne kpataki* ne emwa ni mu egbe rriotọ.”

7 Nọnaghiyerriọ, wa zẹ egbe uwa obọ ne Osanobua; sokpan, wa gha gbe Esu odan, ẹghẹ nii, ọ ghi lẹẹ ne uwa. 8 Wa sikẹ Osanobua, irẹn gha vbe sikẹ uwa. Wa kpe obọ uwa huan, wa ne emwa orukhọ, wa ghi vbe kpe ekhọe uwa huan, wa ni bọ iro eveva. 9 Wa gha gbe ọ sẹ mwẹ sẹ egbe mwẹ, wa gha khiẹ, ne uwa vbe gha viẹ. Wa ya ogiẹ ne uwa te giẹ khian eve, ne uwa vbe ya ọyẹnmwẹ nọ sẹ uwa khian akhiẹ. 10 Wa mu egbe uwa rriotọ vbe odaro e Jehova,* irẹn gha tọn uwa mu.

11 Etẹn, wa ghẹ gha ya unu rhia egbe. Ọmwaikọmwa nọ ya unu rhia ọtiọnrẹn, ra nọ bu ohiẹn ọtiọnrẹn, uhi ẹre ọmwa vberriọ ya unu rhia, ẹre ọ vbe bu ohiẹn ọnrẹn. Adeghẹ u bu ohiẹn uhi, ọni rhie ma wẹẹ, u i re ọmwa nọ lele uhi, sokpan, ọbuohiẹn ẹre u khin. 12 Osanobua ọkpa ọre Ọyiuhi kevbe Ọbuohiẹn, irẹn ọkpa ẹre ọ sẹtin miẹn ọmwa fan, irẹn ẹre ọ vbe sẹtin fuẹn ọmwa rua. Sokpan, gha re uwẹ, ne u khian na gha bu ohiẹn ogieva ruẹ?

13 Wa larre oo, wa ni kha wẹẹ: “Ma gha mu okhian gha rrie ẹvbo na vbe ẹrẹna ra akhuẹ, ne ima ya gbe ukpo ọkpa vba, ma ghi vbe do ẹki vba, ne ima vbe rri ere ẹre,” 14 wa rẹn vbene ẹdagbọn uwa khian gha ye hẹ vbe akhuẹ ra? Te uwa yevbe evbu nọ gha ladian vbe ovbi ẹghẹ kherhe, vbene ẹghẹ ya khian, a i ghi miẹn ọnrẹn. 15 Ne uwa gha te ya kha vberriọ, wa ghi wẹẹ: “Adeghẹ iho ọghe Jehova* nọ, ma ra gha rre agbọn, ma ghi ru ọna, ma ghi vbe ru enọkpa.” 16 Sokpan, banbanna nian, wa wa tọn egbe mu, erriọ ẹre uwa vbe ya rhuọ. Orhuọ vberriọ i maan hiehie. 17 Nọnaghiyerriọ, adeghẹ ọmwa rẹn emwi nọ khẹke ne irẹn ru, sokpan, ọ ma ru ẹre, orukhọ nọ.

5 Wa larre oo, wa ni fe, wa gha viẹ, ne uwa vbe gha so rhunmwuda ọkhọ nọ khian do rruan uwa. 2 Ẹfe ọghe uwa khian ọrhiae nẹ, arriukpa* vbe rri ukpọn ọghe uwa nẹ. 3 Igoru kevbe esiliva ọghe uwa mọtọn nẹ, ọtọn nii ẹre ọ khian sẹ osẹ gbe uwa, ọ ghi vbe rri efun egbe uwa rua. Te emwi ne uwa si koko khian gha yevbe na ghee erhẹn vbe ẹdẹ okiekie. 4 Ghee ẹre! Ẹghẹ hia ẹre emwa ne uwa ya rhọ emwiokọ vbe ugbo ọghe uwa ya tu ladian, rhunmwuda ne uwa ma na ha iran osa; nọ ne emwa ni rhọ emwiokọ nii, utumwẹ ne iran tu ya nọ iyobọ sẹ ehọ ọghe Jehova* ne Osa ọghe ivbiyokuo nẹ. 5 Adesẹ uwa ẹre uwa wa gha ye, emwi ne egbe uwa rriarria yi vbe agbọn na, ẹre ọ wa vbe mu uwa. Wa re nẹ, te uwa ghi ye gẹdẹgbẹ vbe na ghee aranmwẹ na koko sẹ ẹdẹ na khian gbe ẹre rua. 6 Wa bu ohiẹn gbe emwa; wa vbe gbe ọmwa esi rua. Ẹ i re te irẹn ghi vbe gbe uwa odan nian?

7 Nọnaghiyerriọ etẹn, wa fẹko zin egbe khẹ ẹghẹ ne Enọyaẹnmwa gha ya rre. Ghee ẹre! Te ọgbugbo* zin egbe khẹ ẹghẹ ne otọ khian ya maan emwiokọ. Ọ ghi hẹko zin egbe khẹ ẹghẹ ne amẹ nokaro kevbe amẹ nokiekie khian ya rhọọ. 8 Erriọ ẹre ọ vbe khẹke ne uwa gha zin egbe; wa gi ekhọe uwa ye gbain, rhunmwuda, ẹghẹ ne Enọyaẹnmwa khian ya rre bu otọ nẹ.

9 Etẹn, wa ghẹ gha gui ẹzọ egbe khian,* na ghẹ do bu ohiẹn uwa. Wa ghẹ mianmian wẹẹ, ọbuohiẹn rre onurho nẹ. 10 Etẹn, wa gha lele igiemwi esi ọghe avbe akhasẹ ni ghaa guan vbe eni e Jehova.* Wa ghi yerre, vbene iran rri oya hẹ kevbe vbene iran ya zin egbe hẹ. 11 Nọ ne emwa ni zin egbe, emwa ni ghọghọ ẹre ima ka iran yi. Wa họn vbene Job zin egbe hẹ kevbe vbene Jehova* vbe ya fiangbe ẹre hẹ vbe okiekie, nọ ya ima rẹn wẹẹ, Osa nọ mwẹ ekhọe agiẹngiẹn* kevbe itohan ẹre Jehova* khin.

12 Sẹ ehia, etẹn mwẹ, wa ghẹ ghi vẹn ihẹn, wa ghẹ ya ẹrinmwi, ra agbọn, ra emwi ọvbehe nọ rhirhi gha khin vẹn ihẹn. Sokpan, wa gi ‘Ẹẹn’ ọghe uwa gha re ẹẹn, ‘Ẹo’ ọghe uwa ghi vbe gha re ẹo, na ghẹ miehe na bu ohiẹn uwa.

13 Ọmwa rhọkpa rrọọ nọ rre ọlọghọmwa vbe uwu ẹbu uwa ra? We nọ gha na erhunmwu. Ọmwa rhọkpa rrọọ ne ẹko rhiẹnrhiẹn ra? We nọ gha so ihuan urhomwẹ. 14 Ọmwa rhọkpa rrọọ nọ khuọnmwi vbe uwu ẹbu uwa ra? We nọ tie ediọn ni rre iko, ne iran na erhunmwu nẹẹn, iran ghi vbe ya eni e Jehova* nọnọ ori ye ọre uhunmwu. 15 Erhunmwu na ya amuẹtinyan na, gha mu ọmwa nii nọ te khuọnmwi* egbe rran, e Jehova* ghi rhie egberranmwẹ nẹẹn.* Adeghẹ ọ vbe mwẹ orukhọ nọ ru, a ghi yabọe.

16 Nọnaghiyerriọ, wa gha miẹn orukhọ ọghe uwa kue ma egbe, wa ghi vbe gha na erhunmwu ne egbe, ne egbe mieke na rran uwa. Erhunmwu ọghe ọmwa esi wa kakabọ sẹ.* 17 Ọmwa vbene ima ye, ẹre Ẹlaija vbe gha khin; sokpan, vbe ọ ghi ya ekhọe hia na erhunmwu ne amẹ ghẹ rhọọ, amẹ ma gele rhọọ vbe otọ nii vbe ọwara ukpo eha vbe ukhiọnmwẹ.* 18 Ọ ghi werriegbe na erhunmwu, iso keghi tue amẹ ladian, otọ na maan emwiokọ.

19 Etẹn mwẹ, adeghẹ ọmwaikọmwa rre uwu ẹbu uwa, nọ te rre odẹ ẹmwata, na bibi ẹre odẹ, a na ghi miẹn wẹẹ, ọmwa ọvbehe do ru iyobọ nẹẹn ya werriegbe rre, 20 wa ghi rẹn wẹẹ, ọmwaikọmwa nọ ru iyobọ ne ọmwa orukhọ ya kie werriegbe vbe emwi dan, gha miẹn ọmwa orukhọ nii fan vbe obọ uwu, ọ ghi vbe ru iyobọ nẹẹn ya miẹn ayabọ ọghe orukhọ ọrhẹnrhẹn nọ ru.