EBE NA GBẸN GIE IVBI E HIBRU

1 Vbe ẹghẹ nọ kpẹẹ fua, Osanobua keghi loo avbe akhasẹ ya gha gu avbe erha ima odede guan; ẹghẹ nibun ẹre ọ ya ru ọna, odẹ ughughan ẹre ọ vbe ya ru ẹre. 2 Sokpan, vbe ẹdẹ okiekie na nian, Ovbi ẹre, ẹre irẹn ghi loo ya gu ima guan, ọni ọre ọmwa ne irẹn zẹ nọ rri emwi hia vbe ukhu, ne irẹn vbe la obọ ẹre yi agbọn ne ima ye na. 3 Irẹn ọre awanwan ọghe uyi Osanobua, te ọ wa vbe yevbe na ghee Osanobua zẹẹ, irẹn ẹre ọ ya ẹmwẹ ne unu ẹnrẹn nọ mwẹ ẹtin da emwi hia yi, ne iran ye gha rrọọ. Vbe ọ ghi kpe ima huan hin orukhọ ọghe ima rre nẹ, ọ na ya tota ye obọ erha ọmwa Oghodua nọ rre ehe nọ yo sẹ. 4 Irẹn keghi do sẹ avbe odibosa, ugbẹnvbe a miẹn wẹẹ, irẹn ẹre ọ ghi rri eni nọ hin usi sẹ ọghe iran vbe ukhu.

5 Vbe igiemwi, de odibosa ọkpa ne Osanobua he ka tama wẹẹ: “Ovbi mwẹ ẹre u khin; ke ẹrẹna kpa, erhaa ẹre I ghi khin”? De odibosa ọkpa ne Osanobua he vbe kha vbekpa ẹre wẹẹ: “I gha khian erhae, irẹn ghi vbe do gha re ovbi mwẹ”? 6 Sokpan, vbe ẹghẹ nọ khian ya werriegbe gie Ọmọ Ọdiọn ọghẹe gha die agbọn na, ọ keghi kha wẹẹ: “Gi avbe odibo Osanobua hia, gha gbe uhunmwu kotọ nẹẹn.”

7 Deba ọni, vbe ọ ghi guan kaẹn avbe odibosa, ọ na wẹẹ: “Ọ yi avbe odibo ẹre ne iran gha re emwa orhiọn, ọ na yi eguọmwadia ẹre, ne iran gha re erhẹn nọ giẹn.” 8 Sokpan, vbe ọ ghi guan kaẹn Ovbi ẹre, ọ na wẹẹ: “Osanobua ọre ẹkete ruẹ vbe etẹbitẹ ya sẹ etẹghori, ọkpọ ọghe Arriọba ruẹ, ọre ọkpọ ọghe ata. 9 U hoẹmwẹ iruemwiẹse, sokpan, emwi dan na ru kegha sọnnọ ruẹ. Ọni ẹre ọ si ẹre ne Osanobua, nọ re Osa ruẹ na ya ori hannọ ruẹ zẹ, ọ na rhie oghọghọ nọ sẹ ọghe ihua nuẹn.” 10 Ọ na vbe rhie te ẹre wẹẹ: “Eo Enọyaẹnmwa, vbe ẹghẹ omuhẹn, u keghi gbe ẹyotọ uhunmwu otagbọn, iwinna obọ ruẹ ẹre ẹrinmwi khin. 11 A gha ho ehia bẹkun, sokpan, wẹ gha ye gha rrọọ; ehia gha wiẹn rua vbe na ghee ukpọn, 12 u gha vbuọ iran vbene a vbuọ ẹwu ne guọrọ, a gha vbe fi iran werriẹ vbe na ghee ukpọn. Sokpan, wẹ i fi werriẹ ẹdẹ, arrọọ ruẹ i khian vbe sẹ ufomwẹ.”

13 Sokpan, de odibosa ọkpa ne Osanobua he ka tama wẹẹ: “Tota ye obọ erha ọmwa mwẹ, a te miẹn wẹẹ, I ya avbe eghian ruẹ ru ukhuerhe* ne u viọ owẹ yan”? 14 Ẹ i re emwa orhiọn ni ru iwinna nọhuanrẹn ẹre avbe odibosa hia khin ra? Ẹ i re iran ẹre Osanobua gie nọ ya gha ru iyobọ ne emwa ni khian miẹn fan ra?

2 Ọni ẹre ọ si ẹre nọ na ru ekpataki ne ima kakabọ rhie ekhọe ye emwi ne ima họẹn, ne ima ghẹ miehe na rẹnrẹn fua. 2 Adeghẹ ẹmwẹ na loo avbe odibosa ya ta, gele gha ye vbene iran tae, kevbe wẹẹ, ọmwaikọmwa nọ rra uhi kevbe nọ ma họn ẹmwẹ, a vbe rri ọre oya vbene ọ khẹke, 3 vbe ima khian ghi ya miẹn uhunmwu hẹ, deghẹ ima ma zẹ ye ẹmwẹ imiẹnfan nọ hin usi vbenian? Enọyaẹnmwa ẹre ọ ka suẹn gha ta ẹmwẹ imiẹnfan na, emwa ni họn ẹmwẹ nọ tae, keghi do gi ima rẹn wẹẹ ẹmwata nọ. 4 Erriọ vbe ye, Osanobua keghi vbe deba iran sẹ osẹ na, lekpa nọ na winna iwinna ama kevbe iwinna ọyunnuan ughughan, kevbe orhiọn nọhuanrẹn nọ ghae ne eguọmwadia ẹre zẹvbe nọ gua iho ọghẹe ro.

5 Ẹ i re avbe odibosa ẹre ọ we nọ gha khaevbisẹ yan agbọn nọ dee, ne ima guan kaẹn na. 6 Sokpan, osẹ ọkpa keghi gbẹn ọnrẹn yotọ vbe ako ọkpa wẹẹ: “Gha re ọmwa nagbọn, ne u na mu ẹmwẹ ọnrẹn roro? De emwi ne ovbi ọmwa khin, ne uwẹ na gbaroghe ẹre? 7 U keghi ru ẹre ne avbe odibosa sẹ ọre kherhe; u na ya uyi kevbe ọghọ ru ẹrhu ẹde ye ọre uhunmwu, u na vbe zẹ ọre nọ gha khaevbisẹ yan emwi ne u ya obọ ru. 8 U keghi viọ emwi hia ye ototọ owẹ ọre.” Ugbẹnvbe a miẹn wẹẹ Osanobua viọ emwi hia ye ototọ ẹre nẹ, emwi ọkpa i rrọọ nọ sẹrae nẹi rre ototọ ẹre. Sokpan, banbanna nian, ma ma he miẹn wẹẹ emwi hia wa gele rre ototọ ẹre nẹ. 9 Sokpan, nọ ne Jesu, na ya khian ọmwa ne avbe odibosa ya ekherhe sẹ, ma wa bẹghe irẹn nian, a mu ẹrhu ẹde ọghe uyi kevbe ọghọ ye ọre uhunmwu, rhunmwuda nọ na rri oya ya sẹ ẹdẹ uwu; te irẹn wu ne emwa hia rhunmwuda ẹse ne kpataki* ọghe Osanobua.

10 Ne ọmwa nii ne emwi hia la obọ ẹre gha rrọọ kevbe ne iran vbe rrọọ na, mieke na mu uyi ye emọ nibun egbe, ọ keghi ya Ọkaolotu nọ su iran rrie imiẹnfan khian enọ gbae, lekpa nọ na gi ẹre rri oya; emwi nọ khẹke, ẹre ọ ru na. 11 Ke ọmwa nii nọ ya emwa khian nọhuanrẹn kevbe emwa ne irẹn ya khian nọhuanrẹn, erha ọkpa ẹre ehia mwẹ, rhunmwuda ọni, ekhue i muẹn vbe ọ gha tie iran etẹn. 12 Uhiẹn, irẹn vbe kha wẹẹ: “I gha ya eni ruẹ wewe ma etẹn mwẹ; I gha so ihuan urhomwẹ guẹ vbe uwu iko.” 13 Ọ vbe kha wẹẹ: “I gha mu ẹtin yan rẹn.” Ọ na vbe wẹẹ: “Ghee! Mẹ vbe emọ ne giẹrẹ ne Jehova* viọ mẹ.”

14 Nọnaghiyerriọ, ugbẹnvbe a miẹn wẹẹ emwa nagbọn ni mwẹ esagiẹn kevbe efun ẹre “emọ ne giẹrẹ” nii khin, irẹn na vbe do khian ọmwa nagbọn, na mieke na miẹn wẹẹ, lekpa uwu ọghe irẹn rre, irẹn ghi ya ọmwa nii nọ sẹtin si uwu khian enọ gbẹro, ọmwa nii ọre Esu. 15 Ọ ghi vbe sẹtin fan iran fua ighẹ emwa hia ni te yevbe eviẹn vbe ẹdagbọn iran hia, rhunmwuda ohan uwu nọ mu iran. 16 Ẹ i wa re avbe odibosa ẹre irẹn gele ru iyobọ na, sokpan, ivbi Ebraham* ẹre irẹn ru iyobọ na. 17 Ọna ẹre ọ si ẹre na na miẹn wẹẹ, te ọ khẹke ne irẹn do yevbe “etiọnrẹn” vbe odẹ hia fẹẹrẹ, ẹghẹ nii, irẹn ghi gha re ogie ohẹn nọ mwẹ itohan kevbe nọ gia mu ẹtin yan vbe emwi ke emwi nọ ghi ginna Osanobua nẹ, nọ mieke na zọ ese* ye orukhọ ọghe emwa, ne iran mieke na sẹtin gu Osanobua ru adọlọ. 18 Ugbẹnvbe a miẹn wẹẹ irẹn tobọ irẹn rri oya nẹ vbe ẹghẹ na ya danmwẹ ọnrẹn ghee, irẹn gha vbe sẹtin ru iyobọ ne emwa ni ya egbe miẹn edanmwẹ.

3 Rhunmwuda ọni, etẹn ni huanrẹn, na tiere nọ gha die ẹrinmwi, wa mu ẹmwẹ e Jesu roro, nọ re ukọ kevbe ogie ohẹn ne ima mu ẹtin yan, ne ima vbe ya ẹmwẹ ọnrẹn wewe. 2 Ọmwa nọ gia mu ẹtin yan ghaa nọ vbe odaro Ọmwa nii nọ zẹ ọre, vbene Mozis vbe gha ye, vbe ọ winna vbe igiowa Ọmwa nii hia. 3 Irẹn* ẹre ọ khẹke na rhie uyi na sẹ e Mozis, ugbẹnvbe a miẹn wẹẹ, ọmwa nọ bọ owa ẹre uyi rre ọre egbe sẹ owa nii tobọre. 4 Ẹmwata nọ rrọọ ọre wẹẹ, owa hia mwẹ ọmwa nọ bọe, sokpan, Osanobua ẹre ọ yi emwi hia. 5 Ọguọmwadia nọ gia mu ẹtin yan ẹre Mozis ghaa khin vbe ọ winna vbe igiowa Ọmwa nii hia, nọ mieke na gha re osẹ ọghe emwi na khian guan kaẹn vbe ẹdẹ ghaa rrie ẹdẹ, 6 sokpan, e Kristi kegha re ọmọ nọ gia mu ẹtin yan, nọ gbaroghe igiowa Osanobua. Igiowa Osanobua ẹre ima khin, ọni ọre deghẹ ima na ye sẹtin gha si agbada vbe unu guan, kevbe deghẹ ima na ye sẹtin daeyi gbain ya sẹ ufomwẹ ighẹ emwi ne ima ya aro yi, ne ima ya rhuọ.

7 Nọnaghiyerriọ, zẹvbe ne orhiọn nọhuanrẹn khare, “Vbe ẹdẹnẹrẹ, adeghẹ uwa na họn ẹmwẹ nọ tae, 8 wa ghẹ ze vbe udu, ne uwa do ya ohu mu mwẹ, zẹvbe ne avbe erha uwa odede ya ohu mu mwẹ, iran na danmwẹ mwẹ ghee vbe uwu ato. 9 Evba nii ẹre avbe erha uwa odede na danmwẹ mwẹ ghee, agharhemiẹn wẹẹ, iran bẹghe iwinna ne I sirra iran ru vbe ọwara ukpo iyeva (40). 10 Ọna ẹre ọ si ẹre ne ẹmwẹ orre na, na gha sọnnọ mwẹ, I na wẹẹ: ‘Ẹghẹ hia ẹre iran ya ba odẹ ku vbe ekhọe iran, iran ma he ye rẹn mwẹ.’* 11 Ẹre I na ghi ya ohu yan wẹẹ: ‘Iran i khian la ikẹtin ọghomwẹ.’”*

12 Wa gha begbe etẹn, na ghẹ ya miẹn wẹẹ, ọkpa vbe uwu uwa do gha mwẹ ekhọe dan nẹi mwẹ amuẹtinyan, rhunmwuda nọ na fẹko gha khian rree ne Osanobua nọ rrọọ; 13 sokpan, wa ye gha rhie igiọdu ne egbe vbe ẹdẹgbegbe, ugbẹnvbe a miẹn wẹẹ, a tie ẹre “Ẹdẹnẹrẹ” nẹ, ne erẹrẹ nọ lele orukhọ khian* ghẹ do ya uwa khian ne ekhọe ọre wegbe. 14 Rhunmwuda, emwi ọkpa nọ khian ya ima gha mwẹ oghae vbe emwi nọ sẹ e Kristi obọ, ọre deghẹ ima na gha mwẹ egbe ilẹkẹtin ne ima ghaa mwẹ vbe omuhẹn. 15 Ebe Nọhuanrẹn khare wẹẹ, “Vbe ẹdẹnẹrẹ, adeghẹ uwa na họn ẹmwẹ nọ tae, wa ghẹ ze vbe udu, ne uwa do ya ohu mu mwẹ, zẹvbe ne avbe erha uwa odede ya ohu mu mwẹ.”

16 De emwa ni họn urhu ẹre, ni ya ohu muẹn? Ẹ i re emwa hia ne Mozis viọ ladian vbe otọ Igipt nọ ra? 17 Yevbesọni, de emwa ne ẹmwẹ ọnrẹn ghaa sọnnọ Osanobua vbe ọwara ukpo iyeva (40)? Ẹ i re emwa ni ru orukhọ nọ, ni wulo kẹkua ye uwu ato? 18 Ẹghẹ nọ ya yan wẹẹ, iran i khian la ikẹtin ọghe irẹn,* de emwa nọ ghaa kha? Ẹ i re emwa ni ma họn ẹmwẹ nẹẹn nọ ra? 19 Ma miẹn ọnrẹn nian wẹẹ, iran ma sẹtin laọ, rhunmwuda ne iran ma na gha mwẹ amuẹtinyan.

4 Nọnaghiyerriọ, ugbẹnvbe a miẹn wẹẹ Osanobua yan rẹn wẹẹ, ma gha ye sẹtin la ikẹtin ọghe irẹn,* gi ima gha begbe oo,* na ghẹ do miẹn wẹẹ ẹkpotọ vberriọ la eso vbe uwu uwa ban. 2 Rhunmwuda, a vbe kporhu iyẹn nọ maan na ma ima, vbene a vbe kporhu ẹre ma iran; sokpan, ẹmwẹ ne iran họẹn ma gha mwẹ iyobọ ọkpa nọ ghaa ye ne iran, rhunmwuda, iran ma gha mwẹ egbe amuẹtinyan ne emwa ni yae ru emwi ghaa mwẹ. 3 Ma ni rhie ẹre ma wẹẹ, ma mwẹ amuẹtinyan, keghi la ikẹtin ọghẹe,* sokpan, nọ ne iran nikẹre, ọ keghi kha wẹẹ: “Ẹre I na ghi ya ohu yan wẹẹ, ‘Iran i khian la ikẹtin ọghomwẹ.’”* Ọ ta ẹmwẹ na agharhemiẹn wẹẹ, ọ winna iwinna rẹn fo nẹ ke na ya bu agbọn tu agbọn gha dee. 4 Vbe ọ ghi guan kaẹn ikpẹdẹ nogie ihinrọn nii, ọ na tae vbe ako ọkpa vbe Ebe Nọhuanrẹn wẹẹ: “Osanobua keghi hẹwẹ vbe iwinna rẹn hia vbe ikpẹdẹ nogie ihinrọn.” 5 Ọ na vbe dọlegbe tae wẹẹ: “Iran i khian la ikẹtin ọghomwẹ.”*

6 Nọnaghiyerriọ, ugbẹnvbe a miẹn wẹẹ, ẹkpotọ ye kie ne emwa eso ya laọ, kevbe wẹẹ, iran na te ka kporhu iyẹn nọ maan ma, ma ghi sẹtin laọ rhunmwuda iyenhọ ọghe iran, 7 ọni ẹre ọ si ẹre na na miẹn wẹẹ, vbọ ghi kpẹẹ fua nẹ, Osanobua na tae vbe psalm ọghe Devid zẹvbe na ka tae sin wẹẹ, “Vbe ẹdẹnẹrẹ, adeghẹ uwa na họn ẹmwẹ nọ tae, wa ghẹ ze vbe udu.” Te irẹn ghi bu ẹdẹ ọkpa ne irẹn tie ẹre “Ẹdẹnẹrẹ.” 8 Akpawẹ te Jọsua su iran gha rrie ehe na na kẹtin,* Osanobua i ghẹ te bu ẹdẹ ọvbehe vbe okiekie. 9 Rhunmwuda ọni, ẹdẹ ikẹtin* ọkpa ye rrọọ ne emwa Osanobua. 10 Ọmwa gha la ikẹtin ọghe Osanobua,* te ọmwa vberriọ vbe hẹwẹ vbe iwinna rẹn, zẹvbe ne Osanobua vbe hẹwẹ vbe ọghẹe.

11 Nọnaghiyerriọ, gi ima hia vbe odẹ ke odẹ ne ima la ikẹtin ọghe Osanobua,* ne ọmwa rhọkpa ghẹ do zẹ utun vbe ehọ vbene iran vbe gha ye. 12 Ẹmwẹ Osanobua keghi re nọ rrọọ, erriọ ẹre ọ vbe ya zẹ ẹtin; ọ mu sẹ agbada ke agbada nọ mwẹ unu eva, te ọ fian egbe* kevbe orhiọn* sẹ ehe nọ sẹ, ọ ghi wannọ iran, ọ vbe wannọ akhuẹn egbe hin ẹvbi nọ rre uwu ugboloko rre, ọ ghi vbe sẹtin rẹn emwi nọ rre ọmwa ekhọe kevbe iro ne ọmwa zẹ. 13 Emwi ọkpa i rrọọ na yi, nọ lẹre ne Osanobua, te emwi hia wa bannọ ruan vbe odaro ọre, ne irẹn i bẹghe i rrọọ; irẹn ẹre ima khian na iyẹn egbe ima ma.

14 Nọnaghiyerriọ, ugbẹnvbe a miẹn wẹẹ ima mwẹ ogie ohẹn nọkhua nọ kpa gha rrie ẹrinmwi nẹ, nọ re Jesu ne Ovbi Osanobua, wa gi ima ye gha tama emwa vbe nọ dekaẹn emwi ne ima yayi vbekpa ẹre. 15 Ogie ohẹn ne ima mwẹ i re nẹi mwẹ ẹnina ọmwa, ọ rẹn vbene ima vburriẹ hẹ; irẹn keghi re na la odẹ hia danmwẹ ghee nẹ, sokpan, ọ ma ru orukhọ. 16 Rhunmwuda ọni, wa gi ima gha die odaro ẹkete ọghe Osanobua nọ ru ẹse ne kpataki* ne ọmwa, ne ima gha ya unu hia na erhunmwu gie ẹre; evba nii ẹre ima khian na miẹn itohan kevbe ẹse ne kpataki,* nọ gha ru iyobọ ne ima vbe ẹghẹ ne ima ya gualọe zẹẹ.

5 Ogie ohẹn na rhirhi zẹ vbe uwu ẹbu emwa nagbọn, te a zẹ ọre nọ gha ru iyobọ ne emwa vbe emwi nọ ghi kaan ugamwẹ Osanobua nẹ, nọ mieke na gha ru izọhẹ, ọ ghi vbe gha zọ ese ye orukhọ ne emwa ru. 2 Ugbẹnvbe a miẹn wẹẹ, ọ ma vbe gba ne irẹn fo, irẹn ghi vbe sẹtin gha tohan emwa* ni ma rẹn enaye kevbe emwa ni ru orukhọ.* 3 Rhunmwuda ọni, te ọ khẹke ne irẹn zọ ese ye orukhọ ọghe irẹn, zẹvbe ne irẹn vbe zọ ese ye orukhọ ọghe emwa ọvbehe.

4 Orhunmwu ọkpa i khian wa sẹtin ladian, nọ gha kha wẹẹ ogie ohẹn ẹre irẹn ghi khin, vbe ẹ i re te Osanobua zẹ ọre, vbene ọ vbe zẹ Erọn. 5 Erriọ vbe ye, e Kristi ma khian ogie ohẹn nọ ya mu uyi ye egbe ẹre egbe, sokpan, Ọmwa nii nọ tama rẹn wẹẹ: “Ovbi mwẹ ẹre u khin; ke ẹrẹna kpa, erhaa ẹre I ghi khin,” ẹre ọ mu uyi ye ọre egbe. 6 Ọ vbe tae vbe ako ọvbehe wẹẹ: “Ohẹn ẹre u khin vbe ẹdẹdẹmwẹdẹ, zẹvbe ne Mẹlkizẹdẹk ghaa ye.”

7 Vbe Kristi rre agbọn na, utumwẹ nọkhua kevbe ameve ẹre ọ ya gha nọ emwi vbe obọ Ọmwa nii nọ gha sẹtin miẹn ọnrẹn fan vbe obọ uwu, ọ na gha rinmwiaẹn; a keghi họn erhunmwu ẹnrẹn, rhunmwuda nọ na gha mwẹ imuohan Osanobua. 8 Agharhemiẹn wẹẹ ovbi Osanobua nọ, ọ keghi lekpa oya nọ re, ruẹ vbene a ya họn ẹmwẹ hẹ. 9 Vbe a ghi yae khian ọmwa ne emwi hia gba na nẹ, irẹn keghi do khian ọmwa ne emwa gha la obọ ẹre miẹn imiẹnfan ọghe etẹbitẹ, ọni ọre emwa ni họn ẹmwẹ nẹẹn. 10 Rhunmwuda, Osanobua zẹ ọre nẹ, nọ gha re ogie ohẹn vbene Mẹlkizẹdẹk ghaa ye.

11 Emwi te wa bun ne ima khian ta vbekpa ẹre, sokpan, ọ lọghọ na rhan otọ re, rhunmwuda, wa i rherhe rẹn otọ emwi. 12 Agharhemiẹn wẹẹ vbe ẹghẹ na nian,* ọ te khẹke ne uwa gha re emwa ni ma emwa emwi, sokpan, te uwa ye gualọ ọmwa nọ khian werriegbe ke otọ suẹn gha ma uwa avbe emwi okaro na ruẹ vbe ẹmwẹ Osanobua. Ne uwa gha te ya gha rri evbare nọ wegbe, wa na werriegbe ya gha gualọ ewẹn ne uwa khian wẹn. 13 Ọmwaikọmwa nọ ye wẹn, ọvbokhan nọ; ọmwa vberriọ ma rẹn emwi nọ gbae, ne ẹmwẹ Osanobua ma ọmwa ẹre. 14 Sokpan, evbare nọ wegbe, ọghe eniwanrẹn nọ, ọni ọre emwa ni loo ẹrherhe ọghe iran vbe ẹghẹ hia, nọ ghi ya iran rẹn alughaẹn nọ rre emwi nọ maan kevbe nẹi maan.

6 Nọnaghiyerriọ, ugbẹnvbe a miẹn wẹẹ, ma rẹn emwi ne ima ka ruẹ vbe ẹghẹ okaro vbekpa Kristi, gi ima hia ne ima gha mwẹ alaghodaro; ẹ i re eban ẹre ima khian ghi werriegbe do gha gbe ẹyotọ, ne ima gha ruẹ vbene a ya zobọ vbe avbe uyinmwẹ nẹi mwẹ esa kevbe vbene a ya mu ẹtin yan Osanobua hẹ, 2 ra ne ima do gha ruẹ vbekpa imamwaemwi nọ dekaẹn idinmwiamẹ, vbene a ya viọ obọ yan ọmwa hẹ, arhiọkpaegbe ọghe emwa ni wulo kevbe ibuohiẹn ọghe etẹbitẹ. 3 Odaro odaro ẹre ima khian gha ru ghee, deghẹ Osanobua kue yọ.

4 Emwa eso rrọọ ne uwanmwẹ ọghe Osanobua te ka wan sẹ ehe ne iran ye nẹ, ni rẹn vbene ẹse ọhẹ nọ ke ẹrinmwi rre ye hẹ, kevbe ne orhiọn nọhuanrẹn te ka sẹ ọre obọ nẹ, 5 ẹmwẹ nọ maan ọghe Osanobua te ka vbe sẹ iran obọ nẹ, iran vbe miẹn ọnrẹn nẹ ighẹ ẹtin nọ khian rhiegbe ma vbe agbọn nọ dee.* 6 Sokpan, iran dele kua nẹ, a i khian ghi sẹtin ru iyobọ ne iran ya ro iro fi uyinmwẹ werriẹ, rhunmwuda, iran dọlegbe tobọ iran kan Ovbi Osanobua mu erhan, iran na ru ẹre emwi ekhue vbe azagba. 7 Te Osanobua fiangbe otọ, nọ na ru ẹre ne amẹ gha rhọọ yọ vbe ẹghẹ hia, amẹ nii gha ghi rọn la otọ nẹ, emwiokọ ghi zọọ ladian, ọ ghi gha mwẹ iyobọ nọ ye ne emwa ni kọe. 8 Sokpan, deghẹ otọ nii na zọọ igban vbe akọsọ, ọ ghi khian ọrhiae, emwi nọ ghi kẹ, ọre na fi ẹre unu, vbe okiekie, a ghi ya erhẹn giẹn ọnrẹn ruan.

9 Sokpan, nọ ne uwa etẹn ne ima hoẹmwẹ ọnrẹn, agharhemiẹn wẹẹ ima guan vbenian, ma wa mwẹ ilẹkẹtin wẹẹ, emwi nọ maan dee, nọ gha ya uwa gha mwẹ imiẹnfan. 10 Rhunmwuda, Osanobua i re ọmwa nọ ru emwi nọ ma gba, ẹ i khian mianmian iwinna ne uwa ru kevbe vbene uwa ya rhie ẹre ma wẹẹ, wa hoẹmwẹ eni ẹnrẹn, lekpa ne uwa na ru iyobọ ne emwa ni huanrẹn, kevbe ne uwa na ye ru iyobọ ne iran khian. 11 Sokpan, ma hoo ne dọmwadẹ ọghẹe vbe uwu uwa ye gha ya egbe hia winna zẹvbe ne uwa ka ru ẹre dee yi, ẹghẹ nii, vbene ọ te ya sẹ ufomwẹ, wa ghi gha mwẹ ilẹkẹtin wẹẹ, ẹ i mwẹ ne emwi ne uwa ya aro yi ghẹ sẹ uwa obọ. 12 Ma ma hoo ne uwa do khian emwa ni ru emwi muẹn muẹn, sokpan, wa gha ya egbe taa emwa ne ive nii sẹ ọre obọ, rhunmwuda amuẹtinyan kevbe izinegbe ọghe iran.

13 Vbe ẹghẹ ne Osanobua ya ru eyan ma Ebraham, ọ keghi ya eni obọ ẹre ru eyan nii, ugbẹnvbe a miẹn wẹẹ ọmwa rhọkpa i rrọọ nọ sẹ irẹn, ne irẹn khian ya eni ẹnrẹn ru eyan, 14 ọ na kha wẹẹ: “Ẹ i mwẹ I ma fiangbuẹ, I ghi ya uniẹn ruẹ khian nibun.” 15 Ebraham ghi rhie ẹre ma nẹ wẹẹ irẹn mwẹ izinegbe, ẹre eyan ne Osanobua yan rẹn na, na sẹ ọre obọ. 16 Emwa gha khian vẹn ihẹn, ọmwa nọ sẹ iran ẹre iran ya vẹn ihẹn, ihẹn na ẹre a ya bu ẹzọ nọ rre otọ, ugbẹnvbe a miẹn wẹẹ ọni ẹre a ghi ya mu olọ gbe ẹre. 17 Erriọ vbe ye, Osanobua kegha hoo ne emwa ne ive ne irẹn ve khian sẹ ọre obọ rẹn wẹẹ, emwamwa ọghe irẹn i fi werriẹ, ọni ẹre ọ si ẹre nọ na ru eyan ya mu olọ gbe ẹre. 18 Emwi eva na nẹi sẹtin fi werriẹ, ne Osanobua nẹi sẹtin ta ohoghe ru, ẹre ọ rhie igiọdu ne ima ni do lẹẹ gbinna Osanobua, ne ima ye daeyi gbain ighẹ emwi ne ima ya aro yi. 19 Zẹvbe ne adẹn ematọn ya okọ deziẹn vbe uwu amẹ, erriọ ẹre emwi ne ima ya aro yi na vbe ya ima* deziẹn; ẹ i mwẹ ọ ma sẹ obọ, te ọ vbe ye gbain. Emwi ne ima ya aro yi na, ẹre ọ su ima la ehe ne ekọtin ye gberra. 20 Jesu ka ke odaro nẹ, ọ la evba nii nẹ rhunmwuda ima. Irẹn ẹre ọ ghi re ogie ohẹn nọ yevbe Mẹlkizẹdẹk vbe etẹbitẹ.

7 E Mẹlkizẹdẹk na kha na, nọ re ọba ọghe Selẹm, nọ vbe gha re ohẹn ọghe Osanobua Nọ Yo Sẹ keghi miẹn Ebraham, vbe ọ ke ehe nọ na ya gbele ọba eso dee, ọ na fiangbe ẹre. 2 Ebraham keghi ghae emwi hia nọ viọ re vbe okuo ye ihe igbe, ọ na mu obọ ọkpa nẹẹn. Vbe okaro, evba ya eni ẹnrẹn kha ọre “Ọba Ọghe Iruemwiẹse,” irẹn ẹre ọ vbe gha re ọba ọghe Selẹm, ọni ọre “Ọba Ọghe Ọfunmwegbe.” 3 Emwi ọkpa i rrọọ na gbẹnnẹ yotọ vbekpa erhae ra iyẹe, ra uniẹn nọ ke rre, ra vbene a ya biẹ ọre hẹ kevbe vbene ọ ya wu hẹ. Odẹ vberriọ, te irẹn ghi yevbe Ovbi Osanobua, ọ na gha re ohẹn vbe ẹdẹdẹmwẹdẹ.

4 Okpọmwa ẹre okpia na gele wa gha khin! Uhiẹn, Ebraham ne ọkaẹgbẹe* keghi ghae emwi ni ghi maan sẹ nọ viọ re vbe okuo ye ihe igbe, ọ na mu obọ ọkpa nẹẹn. 5 Ẹmwata nọ wẹẹ, Uhi khare wẹẹ, ne Ivbi e Livai na mu iwinna ohẹn na, gha miẹn Ivbi Izrẹl ne etẹn iran obọ ọkpa vbe emwi na ghae ẹre ye ihe igbe, agharhemiẹn wẹẹ, uniẹn Ebraham ẹre iran ke rre.* 6 Sokpan, okpia na nọ ma ke uniẹn e Livai rre, keghi miẹn Ebraham obọ ọkpa vbe emwi na ghae ye ihe igbe, ọ na fiangbe ọmwa nii ne Osanobua ve ẹre emwi. 7 Agbọn hia rẹnrẹn wẹẹ, ọmwa nọ fiangbe ọmwa, ẹre ọ kpọlọ sẹ ọmwa na fiangbe. 8 Nọ ne Ivbi e Livai na zẹ obọ ọkpa vbe emwi na ghae ye ihe igbe na, emwa nagbọn ni sẹtin wu ẹre iran khin, sokpan, nọ ne okpia nii na zẹ obọ ọkpa vbe emwi na ghae ye ihe igbe na, Ebe Nọhuanrẹn khare wẹẹ, ọ ye rrọọ. 9 Ọ gha gia na vbe kha wẹẹ, e Livai na zẹ obọ ọkpa vbe emwi na ghae ye ihe igbe na, vbe la obọ Ebraham zẹ obọ ọkpa vbe emwi na ghae ye ihe igbe, 10 rhunmwuda, ọmọ nọ khian ke uniẹn Ebraham rre vbe odaro* ẹre Livai ghaa khin vbe Mẹlkizẹdẹk miẹn ọnrẹn.

11 Akpawẹ avbe ohẹn ni ke uniẹn e Livai rre gha sẹtin ru ẹre, ne emwa khian ne emwi hia wa gba na fo, esa gha te gha rrọọ ra, na ya kha wẹẹ ohẹn ọvbehe nọ yevbe Mẹlkizẹdẹk gha ladian ra? Ẹ i re te a gha te kha wẹẹ, ohẹn nọ yevbe Erọn ẹre ọ khian ladian ra? (Emwamwa ọghe ohẹn keghi re abọ ọkpa vbe Uhi ne Osanobua gbe ne Ivbi Izrẹl.) 12 Ugbẹnvbe a miẹn wẹẹ a fi emwamwa ọghe ohẹn werriẹ, ọni rhie ma wẹẹ, te ọ vbe khẹke na fi Uhi werriẹ. 13 Nọ ne okpia na ta ẹmwẹ na hia vbekpa ẹre, uniẹn ọvbehe ẹre ọ ke rre, ọmwa rhọkpa i vbe rre ẹgbẹe ọre, nọ he winna vbe ogiukpo ẹdẹ. 14 Agbọn hia rẹnrẹn wẹẹ uniẹn e Juda ẹre Enọyaẹnmwa ke rre, sokpan, e Mozis ma kha wẹẹ avbe ohẹn gha ke uniẹn nii rre.

15 Ọna keghi wa dewarorua sayọ, vbe ẹghẹ ne ohẹn ọvbehe ya rre, nọ yevbe Mẹlkizẹdẹk. 16 Irẹn keghi re ohẹn, ẹ i re rhunmwuda wẹẹ te ọ la uniẹn ọghe avbe ohẹn rre zẹvbe ne Uhi khare, sokpan, rhunmwuda nọ na mwẹ ẹtin ọghe arrọọ nai sẹtin fuẹn ruan ẹre ọ zẹe nọ na re ohẹn. 17 Rhunmwuda, ako ọkpa vbe Ebe Nọhuanrẹn sẹ osẹ ye ọna, nọ khare wẹẹ: “Ohẹn ẹre u khin vbe ẹdẹdẹmwẹdẹ, zẹvbe ne Mẹlkizẹdẹk ghaa ye.”

18 Nọnaghiyerriọ, te a ghi so iyi nẹdẹ gọ, rhunmwuda, ẹ i ghi mwẹ esa, ẹ i vbe mwẹ iyobọ nọ ye ne ọmwa. 19 Rhunmwuda, Uhi e Mozis ma sẹtin ya emwi rhọkpa khian enọ gbae, sokpan, ayayẹro* nọ maan sẹ, ne ima ghi do gha mwẹ, ẹre ọ ghi ru vberriọ, nọ ghi zẹe ighẹ ima sẹtin sikẹ Osanobua. 20 Deba ọni, a ma ma e Jesu ohẹn, vbene a ma na ka ru eyan yọ nẹ. 21 (Rhunmwuda, emwa eso rrọọ na ma ẹre ohẹn vbene a ma na ru eyan yọ, sokpan, nọ ne Jesu, eyan ẹre a ya ma ẹre ohẹn, ọni ọre ẹghẹ ne Osanobua ya ta ẹmwẹ na vbekpa ẹre, nọ na wẹẹ: “E Jehova* yan rẹn nẹ, ẹ i khian fi ekhọe werriẹ,* ‘Ohẹn ẹre u khin vbe ẹdẹdẹmwẹdẹ.’”) 22 Odẹ vberriọ, Jesu keghi khian ọmwa na ya so igiẹ ye ile ọghe ọgbọn, nọ maan sẹ ọghe nẹdẹ. 23 Yevbesọni, emwa nibun ẹre ọ ghaa re ohẹn vbe uniẹn Erọn, rhunmwuda, ohẹn ọkpa gha wu, ẹ i ghi sẹtin winna iwinna rẹn, ọvbehe ghi vbe rhie ihe ẹre. 24 Sokpan, nọ ne Jesu, ọmwa rhọkpa i khian rhie ihe ẹre zẹvbe ohẹn, rhunmwuda, te ọ khian gha rrọọ vbe etẹbitẹ. 25 Rhunmwuda ọni, irẹn gha sẹtin miẹn iran fan fẹfẹfẹ ighẹ emwa ni la obọ irẹn bu Osanobua gha dee, rhunmwuda, ugbẹnvbe a miẹn wẹẹ irẹn rrọọ vbe etẹbitẹ, ẹghẹ hia ẹre ọ ya rinmwian ne iran.

26 Ọ wa gele khẹke ne ima gha mwẹ ogie ohẹn vberriọ, na gha sẹtin mu ẹtin yan, ne obọ ẹre huanrẹn, nẹi mwẹ orra, nọ lughaẹn ne emwa orukhọ, kevbe na vbe mu ye ukpo nọ yo sẹ ẹrinmwi. 27 Irẹn lughaẹn ne avbe igie ohẹn nikẹre ni zọ ese vbe ẹdẹdẹgbe; irẹn i ka zọ ese ye orukhọ ọghe irẹn nẹ, ọ ke ya zọ ye ọghe emwa ọvbehe, rhunmwuda, esa i rrọọ nọ ya ru vberriọ. Sokpan, uhukpa ẹre irẹn zọ ese ne emwa, vbe ẹghẹ nọ na ya egbe ẹre zọ ese, ẹ i khian ghi vbe dọlegbe ru ẹre. 28 Emwa nọ ma gba na fo, ẹre a ghaa lekpa Uhi e Mozis zẹ ye ukpo ogie ohẹn, sokpan, vbe Osanobua ghi yi Uhi na nẹ, ọ na yan wẹẹ, irẹn gha zẹ Ovbi ẹre nọ gha re ogie ohẹn. Ovbi ẹre na keghi re nọ wa gba na fo vbe ẹdẹdẹmwẹdẹ.

8 Uhunmwu ẹmwẹ ọghe emwi ne ima ta na khin: Ma mwẹ ogie ohẹn vbenian, ọ vbe tota nẹ vbe obọ erha ọmwa ọghe ẹkete Oghodua nọ rre ẹrinmwi. 2 Irẹn ẹre ọ winna* vbe ehe nọhuanrẹn, ọni ọre ibọkpọ ne ibọkpọ* ne Jehova* tobọre bọ, ẹ i re ọmwa nagbọn ẹre ọ bọe. 3 Te a ma edọmwadẹ ogie ohẹn, ne iran gha ru izọhẹ, ne iran vbe gha zọ ese, rhunmwuda ọni, te ọ vbe khẹke ne ogie ohẹn ọghe ima na, gha mwẹ emwi nọ khian ya zọ ese. 4 Akpawẹ agbọn na ẹre ọ ye, ẹ i ghẹ te gha re ohẹn, ugbẹnvbe a miẹn wẹẹ, emwa rrọọ nẹ ni ru izọhẹ zẹvbe nọ gua Uhi ro. 5 Iwinna ne iran winna zẹvbe ohẹn keghi yevbe na ghee ama kevbe aghọnghọn ọghe emwi ni rre ẹrinmwi; te ọ vbe yevbe ẹghẹ ne Mozis khian na bọ ibọkpọ, Osanobua keghi gbe uhi nẹẹn. Ọ na wẹẹ: “U ghi gia miẹn wẹẹ, vbene a ya muẹn ma ruẹ vbe uhunmwu oke, erriọ ẹre u khian ya bọe zẹẹ.” 6 Sokpan, banbanna nian, iwinna na ghi mu ne Jesu ẹre ọ hin usi sẹ, rhunmwuda, irẹn ẹre ọ vbe re ọmwa nọ rre uwu ẹkpo vbe ile nọ maan sẹ ile na ka ta; eyan na ya mu olọ gbe ile na, vbe maan sẹ eyan na ka ru.

7 Akpawẹ te emwi hia wa gba vbe ile nokaro, esa i ghẹ te gha rrọọ na ya ta ile ọvbehe. 8 Te Osanobua miẹn emwi na ma ru ẹse vbe obọ emwa rẹn, ẹre ọ na kha wẹẹ: “‘Ghee ẹre! Ẹdẹ dee ne I gha ya gu igiowa ọghe Izrẹl kevbe igiowa ọghe Juda ta ile ọghe ọgbọn,’ erriọ ẹre Jehova* khare. 9 ‘Ẹ i khian gha yevbe ile ne I gu avbe erha iran odede ta, vbe ẹdẹ ne I rhie iran obọ ladian vbe otọ Igipt, rhunmwuda, iran ma mu ile ne I gu iran ta sẹ, rhunmwuda ọni, I ma ghi gha zẹyọ iran re,’ erriọ ẹre Jehova* khare.

10 “‘Ọna ọre ile ne I khian gu igiowa ọghe Izrẹl ta vbe ẹghẹ nii gha ghi gberra nẹ. I gha rhie uhi mwẹ ye iran ekhọe, I ghi vbe gbẹnnẹ ọnrẹn ye iran orhiọn. I ghi gha re Osanobua iran, iran ghi vbe gha re emwa mwẹ,’ erriọ ẹre Jehova* khare.

11 “‘Iran i khian ghi gha ma edọmwadẹ ivbi ẹvbo iran emwi, dọmwadẹ etẹn i khian ghi vbe gha ma egbe emwi, ne iran gha kha wẹẹ: “Do rẹn e Jehova!”* Rhunmwuda, iran hia fẹẹrẹ gha rẹn mwẹ, ke egbe nọ kanmwa sẹ, ya sẹ egbe nọ kpọlọ sẹ. 12 I gha ya abakuru ne iran ru lekhue iran, I i khian ghi werriegbe ye orukhọ ọghe iran rre.’”

13 Nọ na guan kaẹn “ile ọghe ọgbọn” rhie ma wẹẹ, te irẹn ghi ya ile nẹdẹ khian ọghe ọwiẹyi. Kherhe ẹre ọ ghi kẹ, a i khian ghi gha miẹn emwi nọ khian ọghe ọwiẹyi kevbe nọ kpẹẹ nẹ.

9 Ile nẹdẹ ghaa mwẹ uhi ọghe ugamwẹ nọhuanrẹn na lele, kevbe ehe nọhuanrẹn na na ga vbe agbọn na. 2 Vbe a ghi bọ ibọkpọ, a keghi fian ughugha eva yọ. Erhan ọmukpa, eteburu kevbe ebrẹd na ya zọ ese gie Osanobua* kegha rre ughugha nokaro; a na gha tie ẹre Ehe Nọhuanrẹn. 3 Sokpan, ughugha nọ rre iyeke ekọtin nogieva vbe ibọkpọ nii, ẹre a ghaa tie ẹre Ehe Nọ Huan Sẹ. 4 Emwi nọ ghaa rre uwu ẹre kegha re emwi na ya giẹn eturari na ya igoru ru kevbe ẹkpẹti ile na ya igoru te ẹre egbe hia; emwi nọ ghaa rre uwu ẹkpẹti ile nii, kegha re akhe na ya igoru ru na viọ e mana yi, ọkpọ ọghe Erọn nọ gbe ukhu ladian, kevbe uhanhan okuta na gbẹnnẹ ẹmwẹ ile nii yi. 5 A keghi sa ama ọghe odibosa eva ne mose mose na tie ẹre kiẹrọb ye uhunmwu ẹkpẹti ile nii; iran keghi tan ifuẹn gue ugue ọghe ẹkpẹti nii, nọ re ugue ọghe adọlọ.* Sokpan, ẹ i re ẹghẹ na ẹre ima khian ya ta ẹmwẹ na, ta isi ẹre.

6 Vbe a ghi mwamwa emwi na hia nẹ vbenian, ẹghẹ hia ẹre avbe ohẹn ya gha la ughugha nokaro, ne iran ya gha winna iwinna nọhuanrẹn vba; 7 sokpan, ogie ohẹn ọkpa ẹre ọ la ughugha nogieva; uhukpa vbe ukpo ẹre ọ ya laọ. Ẹ i la evba vbe ẹ i re te ọ mu esagiẹn lele egbe; esagiẹn na ẹre ọ ya zọ ese ne egbe ẹre kevbe emwa hia ni ru orukhọ vbene iran ma na rẹn. 8 Odẹ vbenian ẹre orhiọn nọhuanrẹn ya rhie ẹre ma wẹẹ, a ma he gie odẹ na la la ehe nọhuanrẹn nii ma emwa, vbe ẹghẹ ne ibọkpọ nokaro nii na ye gha rrọọ. 9 Ibọkpọ na keghi re na ya gie ẹghẹ na ye na, kevbe wẹẹ, zẹvbe ne emwamwa na khare, a keghi ru izọhẹ kevbe izọese vbe evba. Sokpan, ena i sẹtin ya ekhọe ọmwa nọ rhie ugamwẹ nọhuanrẹn ne Osanobua khian enọ wa gba fo. 10 Emwi ne avbe izọhẹ kevbe izọese na dekaan ma gberra evbare, evba da, kevbe ilele ughughan na lele ọghe akpehuan.* Avbe uhi ni dekaan ikinnegbe ẹre ena hia khin, te a wa yi avbe uhi na, ne iran gha rre evba nẹ, ọ te sẹ ẹghẹ na khian ya dia emwi hia ye odẹ.

11 Vbọrhirhighayehẹ, vbe ẹghẹ ne Kristi ya rre zẹvbe ogie ohẹn ọghe emwi ni maan ni sunu nẹ, ọ na la uwu ibọkpọ nọ hin usi sẹ ibọkpọ nẹdẹ nii, kevbe ne emwi hia vbe gba na sẹ; ẹ i re obọ kẹkan ẹre a ya bọ ibọkpọ na, ẹ i vbe rre usun emwi ne Osanobua yi ye agbọn. 12 Vbe ọ la ehe nọhuanrẹn, ọ ma mu esagiẹn ọghe ẹwe kevbe ọghe ivbi ẹmila laọ, sokpan, esagiẹn ọghe egbe ẹre, ẹre ọ mu lele egbe nọ ya zọ ese ne ima uhukpa, ne ima mieke na miẹn imiẹnfan* ọghe etẹbitẹ; ẹ i khian ghi werriegbe zọ ese na. 13 Adeghẹ esagiẹn ọghe ẹwe kevbe ọghe ẹmila kevbe emuẹn ọghe ovbi ẹmila na giẹnrẹn, ne avbe ohẹn sanmwẹ yan emwa ne awua rre ọre egbe, sẹtin ya iran khian emwa ni huanrẹn, 14 inu ghi nọ ne esagiẹn ọghe Kristi, nọ ya egbe ẹre nẹi mwẹ orra zọ ese gie Osanobua lekpa orhiọn etẹbitẹ? Ẹ i re te ọ gha vbe kpe ekhọe ima huan hin avbe uyinmwẹ nẹi mwẹ esa rre, ne ima mieke na sẹtin gha rhie ugamwẹ nọhuanrẹn ne Osanobua nọ rrọọ ra?

15 Ọni ẹre ọ si ẹre na na miẹn wẹẹ, irẹn ọre ọmwa nọ rre uwu ẹkpo vbe ile ọghe ọgbọn, nọ mieke na ya uwu nọ wu dẹ iran werriegbe, ọ ghi fannọ iran hin obọ orukhọ ne iran ru rre, vbe ẹghẹ ne iran na gha rre ototọ ile nẹdẹ. Ẹghẹ nii, eyan ọghe afiangbe* ọghe etẹbitẹ ne Osanobua yan rẹn, ghi sẹ emwa na tiere obọ. 16 A gha ghi ta ile nẹ, uwu ọghe ọmwa nagbọn nọ rhie obọ ye ile nii keghi mwẹ esa, 17 rhunmwuda, uwu ẹre a ya mu olọ gbe ile, ugbẹnvbe a miẹn wẹẹ, ile nii i khian sẹtin gha mwẹ esa, vbene ọmwa nagbọn nọ rhie obọ yọ na ye rre agbọn. 18 Rhunmwuda ọni, esagiẹn ẹre a vbe ya mu olọ gbe ile nẹdẹ nii. 19 Vbe Mozis ghi ta ẹmwẹ Uhi hia ma Ivbi Izrẹl hia nẹ, ọ na ghi mu esagiẹn ọghe ivbi ẹmila kevbe ọghe ẹwe, kẹ kevbe amẹ, oru nọ baa, kevbe hisọp, ọ na sanmwẹ ọnrẹn ku ebe* ọghe ile nii kevbe emwa nii hia, 20 ọ na wẹẹ: “Ọna ọre esagiẹn ọghe ile ne Osanobua we ne uwa mu sẹ.” 21 Erriọ ẹre ọ vbe sanmwẹ esagiẹn nii yan ibọkpọ nii kevbe emwi hia na ghi loo nẹ vbe ugamwẹ nọhuanrẹn. 22 Vbene ẹmwata, zẹvbe ne Uhi khare, iyobe emwi hia ẹre a ya esagiẹn kpe huan; vbe ẹ i re te a vbe da esagiẹn kua, a i sẹtin ya orukhọ bọ emwa.

23 Nọnaghiyerriọ, te ọ khẹke na kpe avbe emwi ni re ama ọghe emwi ni rre ẹrinmwi huan vbe odẹ vbenian, sokpan, nọ ne emwi ni rre ẹrinmwi, ese nọ maan sẹ ẹre ọ khẹke na zọ yọ. 24 Rhunmwuda, e Kristi ma la ehe nọhuanrẹn na ya obọ ru, nọ re emwi nọ khọ ọghe ẹmwata nọ rrọọ, sokpan, ẹrinmwi ẹre irẹn wa gha rrie; ọni ẹre ọ si ẹre na na miẹn wẹẹ, vbene a wa guan na, irẹn wa rre ehe nọ na mudia ne ima nian vbe odaro Osanobua. 25 Ẹ i re te Kristi khian gha ya egbe ẹre zọ ese kugba ke ẹghẹ, vbene ogie ohẹn ya gha la ehe nọhuanrẹn vbe ukpukpo, nọ ya gha ya esagiẹn nẹi re ọghẹe zọ ese. 26 Akpawẹ erriọ nọ, ẹghẹ hia ẹre ọ gha te ya gha rri oya, ke na ya bu agbọn tu agbọn gha dee. Sokpan, irẹn keghi rhiegbe ẹre ladian uhukpa vbe ẹghẹ ufomwẹ agbọn, ọ na ya egbe ẹre zọ ese nọ ya kpe orukhọ kua, ẹ i khian ghi vbe dọlegbe ru ẹre. 27 Dọmwadẹ ọghẹe gha wu vbe ẹdẹ ọkpa; uhukpa ẹre ọmwa wu, iyeke ọni, a ghi bu ohiẹn ọnrẹn. 28 Erriọ vbe ye, uhukpa ẹre Kristi ya egbe ẹre zọ ese, nọ ya mu orukhọ ọghe emwa nibun gha rrie, ẹ i khian ghi werriegbe zọ ese na; ọ gha ghi werriegbe rre, ẹ i re iwinna orukhọ na rhie hin ẹre ọ khian ghi muẹn,* sokpan, te ọ khian rhiegbe ma emwa ni ya ekhọe hia rhie aro ye odẹ gha khẹ ọre, nọ do miẹn iran fan.

10 Ugbẹnvbe a miẹn wẹẹ nene Uhi keghi re ama ọghe emwi ni maan ni dee, sokpan, ẹ i wa re emwi nii tobọre, ẹ i khian sẹtin* ya emwa ni bu Osanobua gha dee khian emwa ni gbae lekpa ese na zọ ke ukpo ya fi ukpo. 2 Akpawẹ erriọ nọ, esa i ghẹ te gha rrọọ na ya gha zọ ese nii kugba ke ẹghẹ, rhunmwuda, ekhọe ọghe emwa ni rhie ugamwẹ nọhuanrẹn ne Osanobua i ghẹ te gha bu abe gbe iran wẹẹ iran ru orukhọ, vbe a gha ghi kpe iran huan nẹ. 3 Nọghayayerriọ, avbe ese na ne iran ghaa zọ vbe ukpukpo, keghi ye emwa ẹre rre wẹẹ, emwa orukhọ ẹre iran khin, 4 rhunmwuda, esagiẹn ẹmila kevbe ọghe ẹwe i khian sẹtin kpe orukhọ kua.

5 Ọni ẹre ọ si ẹre na na miẹn wẹẹ, vbe ọ ghi rrie agbọn na, ọ na wẹẹ: “‘U ma gha gualọ izọese kevbe izọhẹ, sokpan, u keghi rhie egbe* ọkpa mẹ. 6 U ma miẹn ọnrẹn yi ighẹ ese na giẹn ruan kevbe ese na zọ ye orukhọ.’ 7 Ẹre I na ghi kha wẹẹ: ‘Eo Osanobua, ghee mwẹ! Te I rre do ru iho ruẹ.’ (A vbe gbẹn ẹmwẹ na yotọ* vbekpa mwẹ.)” 8 Ọ na ka kha wẹẹ: “U ma gha gualọ izọese kevbe izọhẹ kevbe ese na giẹn ruan kẹ kevbe ese na zọ ye orukhọ, amaiwẹ te u khian vbe miẹn iran yi.” Ena ọre avbe ese na zọ zẹvbe ne Uhi khare. 9 Iyeke ọni, ọ na ghi kha wẹẹ: “Ghee mwẹ! Te I rre do ru iho ruẹ.” Te ọ wabọ emwi nokaro rua nọ mieke na mu emwi nogieva gbọọ. 10 Zẹvbe nọ gua “iho” ọghe Osanobua na ro, a keghi kpe ima huan lekpa ese ne Jesu Kristi ya egbe ẹre zọ vbe uhukpa, nẹi khian ghi dọlegbe ru.

11 Deba ọni, ẹdẹgbegbe ẹre dọmwadẹ ohẹn ya ru iwinna nọhuanrẹn nọ ru, ọ ghi gha ru izọese ọkpọkpa yan egbe yan egbe, sokpan, avbe izọese na i sẹtin kpe orukhọ kua fẹfẹfẹ. 12 Sokpan, nọ ne Kristi, ọ keghi zọ ese ọkpa ye orukhọ, izọese nii keghi re nẹi khian ghi werriegbe ru; iyeke ọni, ọ na ya tota ye obọ erha ọmwa ọghe Osanobua. 13 Ke ẹghẹ nii kpa, irẹn keghi mudia khẹ ẹghẹ na khian ya ya eghian rẹn ru ukhuerhe* nọ viọ owẹ yan. 14 Ese ọkpa ne irẹn zọ re, ẹre ọ ya ya emwa na kpe huan khian enọ gbae vbe ẹdẹdẹmwẹdẹ. 15 Yevbesọni, orhiọn nọhuanrẹn vbe sẹ osẹ ma ima, vbọ ghi kha nẹ wẹẹ: 16 “‘Ọna ọre ile ne I khian gu iran ta vbe ẹghẹ nii gha ghi gberra nẹ. I gha rhie uhi mwẹ ye iran orhiọn, I ghi vbe gbẹnnẹ ọnrẹn ye iran ekhọe,’ erriọ ẹre Jehova* khare.” 17 Ọ na vbe kha wẹẹ: “I i khian ghi werriegbe ye orukhọ ọghe iran rre kevbe uyinmwẹ dan ọghe iran.” 18 Adeghẹ a na ghi ya orukhọ vbenian bọ ọmwa nẹ, esa i ghi rrọọ na khian ya gha zọ ese ye orukhọ.

19 Nọnaghiyerriọ, etẹn, esagiẹn Jesu fan obọ ẹre ne ima nẹ, ne ima sẹtin gha la ehe nọhuanrẹn nii, vbene ohan i na mu ima. 20 Odẹ ne irẹn kie ne ima na, keghi re odẹ ọgbọn na la miẹn arrọọ. Odẹ nọ ya ru ọna, ọre nọ na la ekọtin gberra; ekọtin nii, ọre egbe ẹre. 21 Ugbẹnvbe a miẹn wẹẹ ima mwẹ ohẹn nọkhua nọ gbaroghe igiowa ọghe Osanobua, 22 wa gi ima ya ẹkoata kevbe amuẹtinyan nẹi beghe bu Osanobua gha dee, ugbẹnvbe a miẹn wẹẹ, a kpe ekhọe ima huan nẹ, emwi dan rhọkpa i ghi vbe rre ima ekhọe, kevbe wẹẹ, a vbe ya amẹ nọ hianrẹn kpe egbe ima huan nẹ. 23 Wa gi ima ye gha ya emwi ne ima ya aro yi wewe, vbene ima i na bọ iro eveva, rhunmwuda, ọmwa na sẹtin mu ẹtin yan, ẹre ọ ru eyan nii. 24 Wa gi ima vbe gha mu ẹmwẹ egbe roro,* ne ima mieke na gua egbe kpa ya gha mwẹ ahoẹmwọmwa, kevbe na vbe gha winna iwinna esi. 25 Wa ghẹ gi ima dobọ iko ne ima koko do yi, zẹvbe nọ gua emwa eso obọ ro, sokpan, wa gia gha rhie igiọdu ne egbe, katekate, vbene a ghi na miẹn nian wẹẹ, ẹdẹ Enọyaẹnmwa sotọ nẹ.

26 Adeghẹ ima na ye gha rhan aro ru orukhọ, vbene ima na mwẹ irẹnmwi nọ gbae ọghe ẹmwata nẹ, ese ọvbehe i ghi rrọọ na khian zọ ye orukhọ ọghe ima. 27 Sokpan, emwi ọkpa nọ ghi kẹ, ọre ne afianma ibuohiẹn nọ dee gha fian ima, kevbe ọghe izohu nọ yevbe ogidi erhẹn nọ dee ne emwa ni gbodan ghee Osanobua. 28 Ọmwaikọmwa gha rra Uhi e Mozis, orhunmwu eva ra eha na sẹ osẹ yọ wẹẹ ọ gele ru vberriọ, a ghi gbe ọmwa nii rua, vbe nai na tohan rẹn. 29 Inu ghi nọ ne ọmwa nii nọ ya owẹ rhilo Ovbi Osanobua ginna otọ, nọ ma kae ye emwi rhọkpa ighẹ esagiẹn ọghe ile na ya kpe ẹre huan, nọ vbe kpamisikan ku orhiọn ọghe Osanobua nọ ru ẹse ne kpataki* ne ọmwa? Ẹ i re oya na khian rri ọmwa nii re, ẹre ọ khian khọọ sẹ? 30 Rhunmwuda, ma rẹn Ọmwa nii nọ khare wẹẹ: “Mẹ ẹre ọ khian rria ikhi; I gha ha ẹre werriegbe.” Ọ vbe kha wẹẹ: “E Jehova* gha bu ohiẹn emwa rẹn.” 31 Emwi nọ wegbe nọ, ne ọmwa de ye obọ Osanobua nọ rrọọ.

32 Vbọrhirhighayehẹ, wa ghẹ mianmian ẹghẹ nọ gberra, vbene uwa ya zin egbe oya ni wegbe nibun hẹ vbe uwanmwẹ ọghe Osanobua ghi wan sẹ ehe ne uwa ye nẹ. 33 Ẹghẹ eso ghaa rrọọ na ya ru uwa emwi oya vbe azagba,* a na vbe ya agbọn lọghọ uwa. Ọ vbe gha mwẹ ẹghẹ eso ne uwa ya gu emwa ni rri oya vberriọ ghae vbe oya ne iran re.* 34 Wa keghi gbe ọsọre ne iran ni rre eghan; vbe ẹghẹ na vbe ya fu uwa emwi viọ, wa ma suku aro ye uhunmwu, rhunmwuda, wa rẹnrẹn wẹẹ, wa mwẹ emwi nọ maan sẹ enii, nẹi khian fo vbe otọ.

35 Nọnaghiyerriọ, wa ye gha mwẹ udinmwẹ,* rhunmwuda, a gha san uwa ẹse yọ ẹsẹsẹmwẹse. 36 Te ọ khẹke ne uwa gha mwẹ izinegbe, na mieke na miẹn wẹẹ, wa gha ghi ru iho ọghe Osanobua nẹ, emwi nọ yan rẹn ghi sẹ uwa obọ. 37 Rhunmwuda, “vbe nẹi khian ghi kpẹẹ gbe,” “ọmwa nọ dee nii gha rre, ẹ i khian vbe si obọ ẹgogo ghee iyeke.” 38 “Sokpan, amuẹtinyan ọghe ọguọmwadia mwẹ ne ọmwa ata, ẹre ọ khian yae gha rrọọ,” sokpan, “adeghẹ ọ na si egbe ghee iyeke, ẹmwẹ ọnrẹn i khian gha yẹẹ mwẹ.” 39 Ma i rre usun emwa ni si egbe ghee iyeke, ni khian fuan, sokpan, ma keghi re emwa ni mwẹ amuẹtinyan nọ gha sẹtin miẹn ima fan.

11 Amuẹtinyan ọre ne ọmwa gha mwẹ ilẹkẹtin wẹẹ, emwi nọ ya aro yi gha gele sunu, kevbe ne ekhọe ọmwa mu emwi nai bẹghe, rhunmwuda osẹ nọ rhie ẹre ma wẹẹ, emwi nii gele rrọọ. 2 Rhunmwuda amuẹtinyan na, ne emwa ni ghaa rrọọ vbe ẹghẹ nẹdẹ* ghaa mwẹ, a keghi sẹ osẹ ma iran.

3 Amuẹtinyan ẹre ọ ya ima rẹn wẹẹ, ẹmwẹ ne unu ẹre Osanobua ya yi emwi ni rre ẹrinmwi kevbe agbọn, na na miẹn wẹẹ, Osanobua keghi loo emwi nai bẹghe ya yi emwi na bẹghe.

4 Amuẹtinyan ẹre ọ ya Ebẹl zọ ese nọ hin usi sẹ ọghe Ken gie Osanobua; lekpa amuẹtinyan nii, ẹre a na sẹ osẹ ma rẹn wẹẹ, ọmwa ata ẹre nọ, rhunmwuda, Osanobua keghi rhan obọ miẹn izọhẹ ọghẹe yi.* Agharhemiẹn wẹẹ ọ wu nẹ, te irẹn ye guan lekpa amuẹtinyan ọghẹe.

5 Amuẹtinyan ẹre ọ zẹe ighẹ a mu Inọk kpa, nẹ ghẹ mieke na miẹn uwu, a ma ghi werriegbe miẹn ọnrẹn rhunmwuda, Osanobua muẹn kpa nẹ; sokpan, a te miẹn wẹẹ a muẹn kpa, a keghi sẹ osẹ ma rẹn wẹẹ, ọ ya ẹko rhiẹnrhiẹn Osanobua ẹsẹsẹmwẹse. 6 Yevbesọni, deghẹ ọmwa i na mwẹ amuẹtinyan, ẹ i khian sẹtin ya ẹko rhiẹnrhiẹn Osanobua ẹse, rhunmwuda, ọmwaikọmwa nọ rhirhi bu Osanobua gha dee, te ọ gha yayi wẹẹ Osanobua rrọọ, kevbe wẹẹ, ọ vbe san iran ẹse ighẹ emwa ni ya ekhọe hia gualọe.

7 Amuẹtinyan ẹre ọ ya e Noa gha mwẹ imuohan Osanobua, ọ na kan okọ nọ mieke na ya miẹn igiowa ẹre fan, vbe Osanobua ghi tama rẹn yotọ nẹ vbekpa emwi nọ khian sunu, na ma he bẹghe; amuẹtinyan ọghẹe ẹre ọ vbe ya bu abe gbe agbọn na, ọ na do khian ọmwa na ka ye ọmwa ata, rhunmwuda amuẹtinyan ọghẹe.

8 Amuẹtinyan ẹre ọ ya Ebraham họn ẹmwẹ ne Osanobua vbe Osanobua tie ẹre, ọ na gha rrie ehe ne Osanobua yan rẹn wẹẹ, irẹn gha mu nẹẹn; agharhemiẹn wẹẹ ọ ma rẹn ehe nọ rrie, ọ na gele gha khian. 9 Amuẹtinyan ẹre ọ yae gha rre otọ ne Osanobua yan rẹn wẹẹ irẹn gha mu nẹẹn, ọ na gha rre evba zẹvbe ọrriọvbe; uwu ibọkpọ ẹre ọ ghaa dia, ke irẹn kevbe Aizik kevbe Jekọb, ni vbe re emwa ne Osanobua ve ẹre emwi vberriọ. 10 Te irẹn ghaa mudia khẹ ẹvbo nọ mwẹ ẹyotọ nọ gele deziẹn, nọ re ẹvbo ne Osanobua buru, nọ vbe tobọre mwamwa.

11 Amuẹtinyan ẹre ọ zẹe ighẹ e Sera sẹtin hanmwa,* agharhemiẹn wẹẹ ọ fian ehe nẹ,* rhunmwuda nọ na yayi wẹẹ, Ọmwa nọ ru eyan nii keghi re nọ gia mu ẹtin yan. 12 Ọna ẹre ọ si ẹre na na miẹn wẹẹ, okpia na gha sẹtin kha wẹẹ, egbe ẹre wu nẹ, na do gha mwẹ emọ ọrhẹnrhẹn na biẹlẹ nẹẹn, ni wa bun vbe na ghee avbe orhọnmwẹ ni rre orere iso, kẹ kevbe ikpekhae nai sẹtin ka ni rre ọkpẹn okun.

13 Te iran na hia wa gha mwẹ amuẹtinyan, ya sẹ ẹdẹ uwu, agharhemiẹn wẹẹ, emwi na ve ma sẹ iran obọ; iran keghi ke urria bẹghe avbe ive nii, iran na rhan obọ miẹn ọnrẹn yi, iran na vbe gi emwa rẹn wẹẹ, ọrriọvbe kevbe erhunmwuyẹn ẹre iran khin vbe otọ ne iran ghaa ye. 14 Rhunmwuda, te emwa ni guan vbenian rhie ẹre ma wẹẹ, iran ya egbe hia gualọ ehe ọghe obọ iran ne iran gha dia. 15 Ọrheyerriọ, akpawẹ te iran ye gha mu ẹmwẹ eke ne iran ke kpa roro, iran gha te sẹtin werriegbe. 16 Sokpan, ehe nọ maan sẹ ẹre iran rhie aro yi, ọni ọre ọghe ẹrinmwi. Nọnaghiyerriọ, ekhue iran i mu Osanobua vbe a gha tie irẹn Osa ọghe iran, rhunmwuda, irẹn mwamwa ẹvbo ọkpa khẹ iran nẹ.

17 Amuẹtinyan ẹre ọ zẹe na na miẹn wẹẹ, Ebraham te ya Aizik zọ ese fo nẹ, vbe ẹghẹ na ya danmwẹ ọnrẹn ghee. Ebraham na ọre ọmwa ne Osanobua ve ẹre emwi, nọ vbe ya ekhọe ọyẹnmwẹ miẹn ọnrẹn yi, ọ na ye mu egbe nọ ya ovbi ẹre ne ukpọmọkpa zọ ese, 18 agharhemiẹn wẹẹ, a ka tama rẹn nẹ wẹẹ: “Emọ* ni ke uniẹn Aizik rre, ẹre a khian gha tie ẹre ivbuẹ.” 19 Sokpan, Ebraham yayi wẹẹ, Osanobua gha sẹtin huẹn ọnrẹn kpaegbe vbe ọ gha wu. Ọ gha gia na vbe kha wẹẹ, Osanobua gele huẹn ọnrẹn kpaegbe; ọna keghi re igiemwi ọghe emwi nọ khian sunu vbe odaro.

20 Amuẹtinyan ẹre ọ vbe ya Aizik fiangbe Jekọb kevbe Isọ, vbe nọ dekaẹn emwi nọ khian sunu vbe odaro.

21 Amuẹtinyan ẹre ọ ya e Jekọb fiangbe ivbi e Josẹf ọkpọkpa vbe ọ khian ghi wu; amuẹtinyan ẹre ọ vbe ya e Jekọb ya ọkpọ tua otọ, ọ na ga Osanobua.

22 Amuẹtinyan ẹre ọ ya e Josẹf ta vbene Ivbi Izrẹl khian ya kpa hẹ vbe Igipt vbọ ghi bu ẹghẹ nọ khian ya wu, ọ na vbe tama iran* vbene iran khian ru ugboloko irẹn hẹ.*

23 Amuẹtinyan ẹre ọ ya evbibiẹ e Mozis mu e Mozis lẹre vbe ọwara uki eha vbe a ghi biẹ ọre nẹ, rhunmwuda, iran bẹghe ẹre wẹẹ ọmọ nọ mose nọ, ohan iyi ne ọba yi ma vbe mu iran. 24 Amuẹtinyan ẹre ọ zẹe na na miẹn wẹẹ, vbe Mozis ghi waan nẹ, ọ ma kue na gha tie irẹn, ovbi ovbi e Fero nokhuo. 25 Irẹn ghee ẹre wẹẹ, irẹn deba emwa Osanobua rri oya ẹre ọ maan sẹ, na khian ya miẹn wẹẹ, irẹn rri orhiẹnrhiẹn ọghe ovbi ẹghẹ kherhe na miẹn vbe orukhọ. 26 Rhunmwuda, irẹn ghee ẹre wẹẹ, oya ọghe Kristi ẹre ọ hin usi sẹ ẹfe hia ni rre otọ Igipt; irẹn keghi rhie aro ye ẹse na gha do san irẹn re. 27 Amuẹtinyan ẹre ọ yae kpa hin Igipt rre, sokpan, ọ ma gha fian afianma wẹẹ ohu gha mu ọba, irẹn keghi mudia gbain, ọ na yevbe na miẹn wẹẹ, irẹn bẹghe Ọmwa nii nai bẹghe. 28 Amuẹtinyan ẹre ọ yae do ugie Alagberra, ọ na we na sanmwẹ esagiẹn lele onurho, ne odibosa na gie nọ do gbele emọ ọdiọn rua ghẹ mieke na gbele* emọ ọdiọn ọghe Ivbi Izrẹl.

29 Amuẹtinyan ẹre ọ ya Ivbi Izrẹl fian Okun Nọ Baa rra vbene a miẹn wẹẹ otọ nọ kae nọ, sokpan, vbe Ivbi Igipt khian ghi danmwẹ ọnrẹn ghee, amẹ nii na minọ iran re.

30 Amuẹtinyan ẹre ọ ya ekẹn e Jẹriko dele, vbe Ivbi Izrẹl ghi ya ikpẹdẹ ihinrọn khian lẹga ẹre nẹ. 31 Amuẹtinyan ẹre ọ zẹe na na miẹn wẹẹ, e Rehab ne igbiragia ma deba emwa isọtẹ fuan, rhunmwuda, ọ keghi rhan obọ miẹn iran yi ighẹ emwa ni do ba otọ nii ghee.

32 Inu ẹre I ra sẹtin ta? I gha we ne I suẹn gha ta ẹmwẹ e Gidiọn, e Berak, e Samsin, e Jẹfta, e Devid, ya sẹ egbe Samuẹl kevbe avbe akhasẹ nikẹre, te ebi ro. 33 Amuẹtinyan ẹre ọ zẹe na na miẹn wẹẹ, iran sẹtin khọn avbe arriọba mu otọ, ẹre ọ zẹe ighẹ iran ru emwi nọ khẹke vbe aro Osanobua, ẹre ọ zẹe ighẹ Osanobua ru eyan ma iran, ẹre ọ zẹe ighẹ iran gue avbe oduma unu, 34 ẹre ọ zẹe ighẹ ogidi erhẹn ma mwẹ emwi nọ ru iran re, ẹre ọ zẹe ighẹ iran miẹn uhunmwu vbe obọ umozo na khian te ya gbele iran rua, ẹre ọ zẹe ighẹ iran ni vburriẹ khian eni ghi wegbe, ẹre ọ zẹe ighẹ iran wegbe vbe odaro okuo, ẹre ọ vbe zẹe ighẹ iran sẹtin khulo ivbiyokuo ni te mu okuo rre. 35 Ikhuo keghi miẹn emwa iran ni wulo ni rhiọ kpaegbe, ikpia ni rrọọ keghi ya egbe miẹn oya, rhunmwuda ne iran ma na siẹn iyayi iran, na miehe na fan iran fua; emwi nọ ya iran ru vberriọ, ọre ne iran na rhie aro ye arhiọkpaegbe nọ maan sẹ, nọ khian sẹ iran obọ. 36 Eso vbe gha rrọọ na ya gbogiẹ, na ya asan bolo ẹre egbe rua, yevbesọni, a ya ọgiọrọ rrọ iran, a na filo iran ku eghan. 37 A filo okuta gbe iran, a danmwẹ iran ghee, a va iran ye ihe eva, a ya umozo gbele iran, ohian ọghe ohuan kevbe ọghe ẹwe ẹre ọ ghi gha rre iran ẹkun, iran kegha rre ivbabọ, iran ya egbe miẹn ọlọghọmwa, a na vbe ya obọ dan mu iran; 38 agbọn vbenian ma te zẹdẹ khẹke iran. Iran na gha zozo khian vbe uwu ato kevbe uhunmwu oke, iran kue vbe dia uvun okuta kevbe uvun otọ ya.

39 Vbe uwu ena hia, agharhemiẹn wẹẹ iran miẹn osẹ nọ rhie ẹre ma wẹẹ, emwi ne iran ru ya ẹko rhiẹnrhiẹn Osanobua rhunmwuda amuẹtinyan ọghe iran, emwi ne Osanobua ve ma sẹ iran obọ. 40 Rhunmwuda, Osanobua bẹghe ẹre nẹ wẹẹ, emwi nọ maan sẹ, ẹre irẹn khian ru ne ima vbe odaro, ne iran ghẹ mieke na ka khian emwa ni gbae, a te miẹn wẹẹ ọ do sẹ ima egbe.

12 Nọnaghiyerriọ, ugbẹnvbe a miẹn wẹẹ ima mwẹ osẹ ọkhọngborrie ni lẹga ima, wa gi ima silo ihẹ hia kua kevbe orukhọ nọ rherhe gbalọ ọmwa yotọ, wa gi ima ya izinegbe rhie ulẹ nọ rre ima otọ, 2 zẹvbe ne ima ya rhie aro daa e Jesu, nọ re Ọkaolotu ọghe amuẹtinyan ọghe ima, nọ vbe re ọmwa nọ ru iyobọ ne ima ya gha mwẹ amuẹtinyan nọ wegbe. Rhunmwuda ọyẹnmwẹ nọ ghaa khẹ ọre, ọ keghi zin egbe erhan irrioya,* ọ na rhie ekhue hin aro rre; nian, te irẹn ghi tota ye obọ erha ọmwa ọghe ẹkete Osanobua. 3 Nọnaghiyerriọ, ne egbe ghẹ mieke na wọọ uwa, ne ẹtin ghẹ vbe fo uwa, wa muẹn roro ẹsẹsẹmwẹse, igiemwi ọghe ọmwa nii nọ zin egbe ẹmwẹ nọ wegbe ne emwa orukhọ ghaa talọ ku ọre, vbene iran ma na rẹn wẹẹ, egbe iran ẹre iran yae ru khọọ.

4 Ke ne uwa ke gu orukhọ khọn, ọ ma he wegbe sẹrriọ wẹẹ, te a ghi da uwa esagiẹn kua. 5 Te uwa ghi mianmian ẹmwẹ ibude ne Osanobua tama uwa zẹvbe ivbi ẹre ra? Ọ wẹẹ: “Ovbi mwẹ, e Jehova* gha gbuẹ hin ọkhọ rre, ghẹ ya aro tilae rua, ghẹ vbe gi ẹtin fuẹ vbe ọ gha dia ruẹ ye odẹ; 6 rhunmwuda, ọmwa ne Jehova* hoẹmwẹ ọnrẹn ẹre ọ gbe hin ọkhọ rre, uhiẹn, ọmwa ne irẹn tie ẹre ovbi irẹn, ẹre irẹn gbe ẹre asan.”*

7 Emwi ne uwa rhirhi gha rri oya ẹre, wa zin egbe ẹre, wa ghi gha ghee ẹre zẹvbe odẹ ọkpa na ya ma uwa emwi. Obọ na ya mu ọmọ, ẹre Osanobua ya mu uwa. De ọmọ ne erhae i gbe hin ọkhọ rre? 8 Adeghẹ Osanobua ma he gbe uwa hin ọkhọ rre vbene ọ ru iran nikẹre, wa ghi rẹn wẹẹ, wa i gele re ivbi ẹre, emọ na biẹ ye ido* ẹre uwa khin. 9 Yevbesọni, avbe erha ima ni rre agbọn na* keghi gbe ima hin ọkhọ rre, ọrheyerriọ, te ima ye gha rhie ọghọ ne iran. Inu ghi nọ ne Erha ima nọ rre ẹrinmwi nọ ya orhiọn nọhuanrẹn dia ẹdagbọn ima? Ẹ i re te ọ vbe khẹke ne ima gha họn ẹmwẹ nẹẹn ne ima mieke na gha rrọọ? 10 Ovbi ẹghẹ kherhe ẹre avbe erha ima ni rre agbọn na ya gbe ima hin ọkhọ rre zẹvbe nọ ke yi vbe aro iran. Sokpan, umamwẹ ọghe ima ẹre Osanobua gualọ, ọni ẹre ọ si ẹre nọ na gbe ima hin ọkhọ rre, ne ima mieke na gu ẹre ghae vbe uhuanmwẹ ọnrẹn. 11 Ọghe ne ẹmwata, a gha gbe ọmwa hin ọkhọ rre, ẹko i rhiẹnrhiẹn ọmwa vbobọvbobọ nii, ọ keghi re emwi nọ da ọmwa; sokpan, deghẹ ima na rhan obọ miẹn ọnrẹn yi, emwi nọ maan ghi kẹ ladian vbe okiekie, ma ghi gha mwẹ ọfunmwegbe, a ghi vbe ka ima ye emwa ata.

12 Nọnaghiyerriọ, wa ya avbe obọ ne lughọlughọ kevbe avbe igbọn ni ma wegbe khian eni deziẹn. 13 Wa ye gha la odẹ nọ diae khian, na ghẹ do miẹn wẹẹ, owẹ na te ghẹghẹ khian, khian enọ ghi wa lahin ako rre fo, sokpan, nọ gha re nọ rrie fo. 14 Wa hia vbe odẹ ke odẹ, ne uwa gha gu emwa hia rrọọ vbe ọfunmwegbe, wa ghi vbe hia ne uwa gha re emwa ni huanrẹn, rhunmwuda, ọmwa rhọkpa i rrọọ nọ ma huan, nọ khian sẹtin miẹn Enọyaẹnmwa. 15 Wa khẹ ye egbe, ne ẹse ne kpataki* ọghe Osanobua ghẹ do wii erhọkpa vbe uwu uwa, na ghẹ do miẹn wẹẹ, inian nọ mwẹ obi si ukpẹ ladian do gha si ẹmwẹ, ẹghẹ nii, ọ ghi do mu awua ye emwa nibun egbe; 16 wa vbe gha begbe oo, ne ọmwa nọ yin uyinmwẹ alama oghẹ* ghẹ do gha rre uwu ẹbu uwa, ra ọmwa nẹi gbọyẹmwẹ ye emwi nọhuanrẹn vbene Isọ ghaa ye, nọ khiẹn ukpo ọmọ ọdiọn ọghẹe rhunmwuda evbare nọ khian ya uhukpa re. 17 Wa rẹnrẹn wẹẹ, ẹghẹ nọ ghi te ya gha hoo na fiangbe irẹn, a na he ẹre; ọ te gha hia nọ fi ekhọe erhae werriẹ, ọ na gha viẹ, sokpan, vbene ọ rinmwian sẹ, ọ ma gba re.

18 Wa ma sẹ ehe ne emwi na gha sẹtin ya obọ kaan ye, na mu erhẹn yi, ne okuku rhu gue, ne ebiebi so gue kankankan, eke ne okpẹhoho ye, 19 eke na na kpee okpe, na na họn urhu ọmwa nọ guan rẹn; ọ wegbe sẹrriọ wẹẹ, emwa ni họn urhu nii na gha rinmwian wẹẹ, na ghẹ ghi ta ẹmwẹ ọvbehe ma iran. 20 Rhunmwuda, egbe iran ma sẹtin rrọ re, vbe iran ghi họn iyi nọ khare wẹẹ: “Ọ gha khọnrẹn nọ gha re aranmwẹ, ẹre ọ ya egbe kaan oke nii, te a gha filo okuta gbe ẹre rua.” 21 Emwi nọ sunu nii gbe orrirri sẹrriọ wẹẹ, e Mozis na ghi kha wẹẹ: “Ohan mu mwẹ oo, I wa vbe guọ zẹzẹzẹ.” 22 Sokpan, wa sẹ Oke Zaiọn nẹ kevbe ẹvbo Osanobua nọ rrọọ, ọni ọre Jerusalẹm nọ rre ẹrinmwi, wa sẹ eke ne ọkhọngborrie* ọghe avbe odibosa 23 na gbẹbu, wa sẹ eke ne iko ọghe emọ ọdiọn na gbẹnnẹ eni iran yotọ vbe ẹrinmwi ye, wa sẹ eke ne Osanobua nọ re Ọbuohiẹn ọghe emwa hia ye, kẹ kevbe eke ne emwa ata ne orhiọn nọhuanrẹn dia ẹdagbọn iran ye, ọni ọre iran ni ghi do khian enọ gba na fo. 24 Wa vbe sẹ eke ne Jesu ye nẹ, nọ re ọmwa nọ rre uwu ẹkpo vbe ile ọghe ọgbọn, kevbe esagiẹn nọ sanmwẹ, nọ ta ẹmwẹ emwi ni maan sẹ ọghe esagiẹn Ebẹl.

25 Wa ghẹ gia miẹn wẹẹ, wa viọ obọ khiọ ehọ* vbe ọmwa nii ghaa gu uwa guan. Iran ni ma danmwehọ ọmwa nagbọn nọ do gie iran uhunmwu nọ ke ẹrinmwi rre ma sẹtin lẹẹ ọre fe. Inu ghi nọ ne ima, deghẹ ima ma danmwehọ ọmwa nii nọ guan ke ẹrinmwi rre? Ma gha sẹtin miẹn uhunmwu ra? 26 Vbe ẹghẹ nii, urhu ẹre keghi mu agbọn na rueghe, sokpan, vbe ẹghẹ na nian, irẹn keghi yan wẹẹ: “I gha vbe dọlegbe mu agbọn na rueghe uhukpa, I ghi vbe mu ẹrinmwi rueghe ba ẹre.” 27 Nọ na wẹẹ irẹn gha “dọlegbe” ru ẹre uhukpa rhie ma wẹẹ, avbe emwi na mu rueghe ẹre a khian rhie hin, ọni ọre avbe emwi ne Osanobua ma yi, ẹghẹ nii, avbe emwi na ma mu rueghe ẹre ọ khian ghi kẹ. 28 Nọnaghiyerriọ, ugbẹnvbe a miẹn wẹẹ, Arriọba nai khian sẹtin mu rueghe ẹre ọ khian sẹ ima obọ, wa gi ima ye gha rhan obọ miẹn ẹse ne kpataki* ọghe Osanobua yi, ma ghi gha lekpa ẹre ya ohanmumwẹ kevbe ọghọ rhie ugamwẹ nọhuanrẹn ne Osanobua, vbe odẹ nọ gha ya miẹn ọnrẹn yi. 29 Rhunmwuda, erhẹn nọ fuẹn emwi rua, ẹre Osanobua mwa khin.

13 Wa ye gha hoẹmwẹ egbe zẹvbe etẹn. 2 Wa ghẹ mianmian ya gha mu ọghọ ye emwa egbe;* erriọ ẹre emwa eso ya mu ọghọ ye avbe odibosa egbe, vbene iran ma na rẹn. 3 Wa ye gha mwẹ ẹmwẹ emwa ni rre eghan* vbe orhiọn, vbene a miẹn wẹẹ, wa gu iran rre eghan, wa ghẹ vbe mianmian emwa na ya obọ dan mu, ugbẹnvbe a miẹn wẹẹ, egbe ọkpa ẹre uwa khin.* 4 Ọ khẹke ne emwa hia gha ghee orọnmwẹ zẹvbe emwi nọ hin usi, ọ ma khẹke ne ọmwa rhọkpa mu awua ye ebẹdi orọnmwẹ, rhunmwuda, Osanobua gha bu ohiẹn emwa hia ni yin uyinmwẹ alama oghẹ,* kevbe emwa ni fi owẹ ye oha.* 5 Wa ghẹ gha re emwa ni hoẹmwẹ igho, sokpan, wa gi emwi ne uwa mwẹ sẹ uwa ọkẹn. Rhunmwuda, irẹn tae nẹ wẹẹ: “I i khian sẹ ruẹ rae ẹdẹ, I i khian vbe yan gbuẹ hiehie.” 6 Ẹghẹ nii, ma ghi sẹtin gha mwẹ udinmwẹ, ma ghi kha wẹẹ: “E Jehova* ọre enọ yọ mwẹ obọ; ohan i khian mu mwẹ. De emwi ne ọmwa gha sẹtin ru mwẹ re?”

7 Wa ghẹ mianmian iran ni mu asanikaro vbe uwu ẹbu uwa,* ni ta ẹmwẹ Osanobua ma uwa; wa gha mwẹ egbe amuẹtinyan ne iran mwẹ, zẹvbe ne uwa ya ghee uyinmwẹ iran kevbe emwi esi nọ kẹ ladian.

8 Jesu Kristi nọ ghaa rrọọ nodẹ, ẹre ọ vbe rrọọ vbe ẹrẹna, ẹre ọ khian vbe gha rrọọ ya sẹ ẹdẹdẹmwẹdẹ.

9 Wa ghẹ gia ya imamwaemwi ughughan na ma he họn ẹdẹ bibi uwa odẹ, rhunmwuda, ọ gha maan sẹ ne ẹse ne kpataki* ọghe Osanobua ya ekhọe uwa deziẹn, na gha ya miẹn wẹẹ evbare* ẹre ọ ghi yae deziẹn, rhunmwuda, emwa ne iwinna evbare mu, ere rhọkpa i rrọọ ne iran miẹn vbọ.

10 Ma mwẹ ogiukpo; sokpan, emwa ni winna iwinna nọhuanrẹn vbe ibọkpọ i mwẹ asẹ ne iran khian ya rri evbare nọ rre uhunmwu ogiukpo nii. 11 Ogie ohẹn keghi mu esagiẹn ọghe avbe aranmwẹ la uwu ehe nọhuanrẹn, ọ ghi yae zọ ese ye orukhọ. Sokpan, iran ghi ya giẹn ikun avbe aranmwẹ nii ruan, vbe a gha lahin agọ rre nẹ. 12 Ọna ẹre ọ si ẹre ne Jesu na vbe rri oya, vbe a gha ladian vbe onurho ẹvbo nẹ, nọ miehe na ya esagiẹn ọnrẹn kpe emwa huan. 13 Nọnaghiyerriọ, wa gi ima kpa vbe agọ rre ya vba ẹre vbe orere, na vbe ru ima egbe emwi ekhue na ru ẹre, 14 rhunmwuda, ma i mwẹ ẹvbo rhọkpa vbe emwa nọ khian gha rrọọ vbe etẹbitẹ, sokpan, nọ dee nii ẹre ima wa ya egbe hia gualọ. 15 Wa gi ima gha la obọ ẹre rhie urhomwẹ ne Osanobua vbe ẹghẹ hia zẹvbe ese na zọ, ọni nọ wẹẹ, ma ghi gha ya unu ima ta ẹmwẹ eni ẹnrẹn khian vbe azagba. 16 Yevbesọni, wa ghẹ mianmian emwi esi na ru, wa ghẹ vbe mianmian ya gha zẹ emwi obọ ne emwa, rhunmwuda, ena ọre izọese ni yẹẹ Osanobua.

17 Wa gha họn ẹmwẹ ne iran ni mu asanikaro vbe uwu ẹbu uwa,* wa ghi vbe gha ya ekhọe hia ru vbene iran khare, rhunmwuda, iran ẹre ọ gbaroghe uwa, iran gha vbe na iyẹn egbe iran ma Osanobua. Wa gha ru vberriọ, iran ghi gha ya ọyẹnmwẹ winna iwinna iran, vbe ẹ i re erriọ, iran ghi gha ya ẹkorriaramwẹ ru ẹre, ọna i khian gha maan ne uwa.

18 Wa ye gha mu ẹmwẹ ima ye erhunmwu, rhunmwuda, ma wa rẹn wẹẹ, ekhọe ima i bu abe gbe ima, zẹvbe ne ima ya hia ne ima gha re emwa ẹmwata vbe emwi hia. 19 Sokpan, emwi nọ mobọ ya mwẹ we ne uwa gha na erhunmwu, ọre ne I mieke na sẹtin rherhe bu uwa gha dee.

20 Osa ọghe ọfunmwegbe keghi huẹn Enọyaẹnmwa e Jesu kpaegbe vbe idin. Jesu ọre ọmwa ne esagiẹn ile ọghe etẹbitẹ gue, irẹn ẹre ọ vbe re ọsuohuan nọ sẹre. Te Osa ọghe ọfunmwegbe 21 gha viọ emwi ni maan hia ne uwa, ne uwa mieke na sẹtin gha ru emwi nọ hoo. Irẹn keghi lekpa e Jesu Kristi gua ima kpa ya ru emwi nọ yẹẹ irẹn; irẹn ẹre a gha rhie uyi na vbe etẹbitẹ ya sẹ etẹghori. Isẹ.

22 Etẹn, I hoo ne uwa gbehọkotọ danmwehọ ẹmwẹ igiọdu na, rhunmwuda, ebe ne I gbẹn gie uwa na ma tan gbe. 23 I hoo ne I gi uwa rẹn wẹẹ, a fan e Timoti ne ọtẹn ima nẹ vbe eghan. Adeghẹ ọ na rherhe rre, ma eva gha gba do miẹn uwa.

24 Wa giotuẹ emwa hia ni mu asanikaro vbe uwu ẹbu uwa* mẹ, kevbe emwa ni huanrẹn hia. Iran ni rre Itali gie na tuẹ uwa.

25 Te Osanobua gha ru ẹse ne kpataki* ne uwa hia.