EBE NA GBẸN GIE TAITỌS

1 E Pọl ne ọviẹn Osanobua, nọ vbe re ukọ ọghe Jesu Kristi ẹre ọ gbẹn ebe na rre. Egbe amuẹtinyan ne emwa ne Osanobua hannọ zẹ mwẹ ẹre imẹ vbe mwẹ, kẹ kevbe irẹnmwi nọ gbae ọghe ẹmwata nọ guaẹro ighẹ ugamwẹ na ya ekhọe hia rhie ne Osanobua. 2 Ena hia hẹnhẹn egbe yan arrọọ ọghe etẹbitẹ ne ima ya aro yi, ne Osanobua nẹi sẹtin ta ohoghe yan rẹn ke ẹghẹ nọ kpẹẹ fua gha dee; 3 sokpan, vbọ ghi sẹ ẹghẹ nọ khẹke, ọ keghi gia ya ẹmwẹ ọnrẹn wewe lekpa iwinna ikporhu nọ mu mẹ ne I ru. Vbene Osanobua ne Ọmiọnmwafan mwa we ne I ru, erriọ ẹre I wa ru ẹre. 4 Wẹ ne Taitọs ne ọmọ ne ọmọ, ne ima gba mwẹ iyayi ọkpa ẹre I gbẹn ebe na gie:

Te u gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Kristi Jesu ne Ọmiọnmwafan mwa rre.

5 Te I sẹ ruẹ rae ye Krit, ne u miehe na dia emwi na ma ru ẹse ye uviẹn,* ne u vbe gha zẹ ediọn ye iko ni rre dọmwadẹ ẹvbo zẹvbe ne I tama ruẹ, 6 ọni ọre deghẹ okpia rhọkpa na gha rre evba nẹi mwẹ ozan, nọ mwẹ okhuo ọkpa, ne ivbi ẹre rre odẹ iyayi, ivbi ẹre ghi vbe gha re na ta ẹmwẹ ọnrẹn ẹse, ẹ i re ne emwa gha tae lele iran wẹẹ iran sakaan ra iran i họn ẹmwẹ. 7 Ugbẹnvbe a miẹn wẹẹ ọmwa ne Osanobua mu iwinna ye ọre obọ, ẹre ọdiọn* nọ rre iko khin, te ọ khẹke nọ gha re ọmwa nẹi mwẹ ozan, ọ ma khẹke nọ gha re ọmwa nọ ze vbe udu, ne egbe balọ, ọdayọn, ọmwa nọ zaro igbinna,* kevbe ọmwa arovbẹmwẹ nọ gualọ ọghe enegbe ẹre ọkpa. 8 Sokpan, ọ ghi gha re ọmwa nọ gua mu ọghọ ye emwa egbe, ne emwi nọ maan yẹẹ, nọ roro emwi ẹse,* nọ mudia ẹse, nọ gia mu ẹtin yan, kevbe nọ sẹtin da egbe ẹre yi, 9 ọ gha de ọghe odẹ nọ ya ma emwa emwi, ọ ghi sẹtin ya obọ da ẹmwẹ Osanobua yi gbangbangban, nọ re ẹmwẹ nọ gia mu ẹtin yan, nọ mieke na sẹtin gha ya imamwaemwi nọ maan* rhie igiọdu* ne emwa, ọ ghi vbe gha dia emwa ni gbodan yọ.

10 Rhunmwuda, emwa wa bun ni re emwa isọtẹ, ni talọ ẹmwẹ nọ ma khianrẹn, kevbe ni mu emwa rẹrẹ, katekate iran ni wa rhiegba ye ẹmwẹ arhuẹ. 11 Te ọ khẹke na gue emwa vberriọ unu, rhunmwuda, ẹghẹ hia ẹre iran ya gbe amuẹtinyan ọghe emwa hia ni rre igiowa ughughan mu otọ, iran ghi gha ma emwa emwi nọ ma khẹke ne iran ma emwa ẹre, rhunmwuda ne iran na re emwa arovbẹmwẹ ni gualọ ọghe enegbe iran ọkpa. 12 Ovbi ẹvbo iran ọkpa nọ re akhasẹ khare wẹẹ: “Ẹghẹ hia ẹre Ivbi e Krit ya ta ohoghe, aranmwẹ oha ni khọọ kevbe emwa oregbe ne obẹrure ẹre iran khin.”

13 Ẹmwata ẹre ẹmwẹ nọ tae khin. Rhunmwuda ọni, ye gha kakabọ gu iran gui, ne amuẹtinyan ọghe iran mieke na wegbe, 14 ne iran ghẹ gha danmwehọ avbe umaranmwẹ* ne Ivbi e Ju ta, kevbe iyi ọghe emwa ni dele hin odẹ ẹmwata rre. 15 Te emwi hia wa huan vbe aro emwa ni huanrẹn; sokpan, nọ ne emwa ni ma huan kevbe nẹi mwẹ amuẹtinyan, a i miẹn emwi nọhuanrẹn vbe aro iran, rhunmwuda, orhiọn iran ma huan, erriọ ẹre ekhọe iran vbe ye. 16 Iran tae khian vbe azagba wẹẹ iran rẹn Osanobua, sokpan, iwinna ne iran ru ghi gha rhie ẹre ma wẹẹ iran ma rẹn ọnrẹn, rhunmwuda, emwa oya emwa osọnnọ ẹre iran khin, erriọ ẹre iran vbe zẹ utun vbe ehọ, iran ma vbe sẹ nọ gha winna iwinna nọ maan rhọkpa.

2 Sokpan, nọ ne uwẹ, ye gha ta ẹmwẹ nọ gua imamwaemwi nọ maan* ro. 2 We ne ikpia ni khian eniwanrẹn nẹ gha re emwa ni ru emwi ye oreghe, ni rẹn enegbe, ni roro emwi ẹse, ni mwẹ amuẹtinyan kevbe ahoẹmwọmwa nọ wegbe, kevbe ni kakabọ zin egbe emwi. 3 Erriọ vbe ye, we ne ikhuo ni khian eniwanrẹn nẹ gi uyinmwẹ iran gha rhie uyi gie Osanobua, ọ ma khẹke ne iran gha ta ọtakhọ, ra ne ayọn nọ bun gbe na da maghan iran,* sokpan, te ọ khẹke ne iran gha ma emwa emwi esi, 4 ne iran mieke na gha bu ikhuo ni ma he khian eniwanrẹn ude, ne iran gha hoẹmwẹ ọdafẹn iran kevbe ivbi iran, 5 ne iran gha roro emwi ẹse, ne iran ghẹ gha re ikhuo ni sakaan,* ne iran gha ru iwinna owa,* ne iran gha ru emwi esi, ne iran gha gbe uhunmwu kotọ ne ọdafẹn iran, ne emwa ghẹ mieke na gha ya unu rhia ẹmwẹ Osanobua.

6 Erriọ vbe ye, ye gha bu avbe igbama* ude ne iran gha roro emwi ẹse. 7 Wẹ tobọ uwẹ ghi vbe gha rhie igiemwi esi yotọ vbe emwi hia ne u ru. Gi emwi ne u ma emwa ẹre gha re nọhuanrẹn* zẹvbe ọmwa nọ rẹn enegbe, 8 u ghi gha ta ẹmwẹ nọ maan,* ne emwa i khian sẹtin gbodan yi, ne ekhue mieke na mu eghian, ẹghẹ nii, iran i ghi miẹn ẹmwẹ dan rhọkpa ta vbekpa ima. 9 We ne eviẹn gha gbe uhunmwu kotọ ne arowa iran vbe emwi hia, iran ghi vbe hia ne iran gha ya ẹko rhiẹnrhiẹn iran, ẹ i re ne iran gha zẹ ẹmwẹ wanniẹn arowa iran. 10 Ọ ma khẹke ne iran gha rhaa iran, sokpan, iran ghi gha re emwa na gba ẹko ẹre vbe emwi hia, ne imamwaemwi ọghe Osanobua ne Ọmiọnmwafan mwa mieke na gha yẹẹ emwa ẹsẹse.

11 Ẹse ne kpataki* ne Osanobua ru ne emwa rhiegbe ma nẹ, nọ zẹe ighẹ emwa ughughan hia gha miẹn fan. 12 Ẹse na keghi ru iyobọ ne ima ya he ẹre yotọ, uyinmwẹ nẹi yẹẹ Osanobua kevbe orriarria ọghe emwi agbọn na, ọ vbe ru iyobọ ne ima ya gha yin vbe odẹ nọ rhie ẹre ma wẹẹ ima roro emwi ẹse, ma ru emwi esi kevbe wẹẹ, ma rhiegbe ye ugamwẹ Osanobua vbe agbọn ne ima ye na,* 13 zẹvbe ne ima ya mudia khẹ emwi ne ima ya aro yi nọ ya ima ghọghọ, kevbe ẹghẹ ne Osanobua ne Oghodua kevbe Ọmiọnmwafan mwa ighẹ e Jesu Kristi khian ya rhie uyi ọghe iran ma. 14 Jesu keghi ya egbe ẹre fiohan ne ima, nọ mieke na fan ima* vbe obọ uyinmwẹ ọkhọ hia, nọ vbe ya ima khian nọhuanrẹn, ne ima mieke na gha re emwa rẹn ni hin usi, ni ya ekhọe hia winna iwinna esi.

15 Ye gha ta ẹmwẹ na hia ma emwa, gha rhie ibude* ne emwa, u ghi vbe gha dia iran ye odẹ, ugbẹnvbe a miẹn wẹẹ u mwẹ asẹ hia na ya ru vberriọ. Ghẹ gi ọmwa rhọkpa ya aro tila ruẹ rua.

3 Ye gha ye iran ẹre rre ne iran gha mu egbe rriotọ ne avbe arriọba kevbe emwa ni rre asẹ, iran ghi vbe gha họn ẹmwẹ ne iran, iran ghi vbe mu egbe ne iran ya gha ru emwi nọ maan vbe ẹghẹ hia. 2 We ne iran ghẹ ta ọmwa rhọkpa ọtakhọ, ọ ma khẹke ne iran gha re emwa ni gui ẹzọ ẹzọ, sokpan, te ọ khẹke ne iran gha mwẹ amuroro, iran ghi vbe gha re emwa ni fu, ni ya obọ esi mu emwa hia. 3 Rhunmwuda, ẹghẹ vbe gha rrọọ ne ima tobọ ima vbe ya kọn, ma ma gha họn ẹmwẹ, a na bibi ima odẹ, ma kegha re eviẹn ọghe emwi ughughan ne ima gualọ kevbe ọghe orhiẹnrhiẹn agbọn, ma na gha fuẹn vbe uwu emwi dan kevbe igbọvo, emwa oya emwa osọnnọ ẹre ima ghaa khin, ma na vbe gha khẹko egbe.

4 Sokpan, ẹghẹ ne Osanobua ne Ọmiọnmwafan mwa ya tohan ima, ọ na vbe rhie ahoẹmwọmwa nọ mwẹ ne emwa nagbọn ma, 5 ọ keghi miẹn ima fan lekpa nọ na khuẹ ima huan ne ima do gha rrọọ, ọ na vbe loo orhiọn nọhuanrẹn ọghẹe ya ya ima khian ọghe ọgbọn. (Ẹ i re iwinna esi ne ima ru ẹre ọ yae ru ọna ne ima, sokpan, rhunmwuda itohan ọghẹe nọ.) 6 Ọ keghi la obọ e Jesu Kristi ne Ọmiọnmwafan mwa tue orhiọn nọhuanrẹn ọghẹe yan ima wọrhọwọrhọ. 7 Te ọ ru ẹre vberriọ, nọ mieke na lekpa ẹse ne kpataki,* ne ọmwa nii ru ne ima ka ima ye emwa ata, ẹghẹ nii, ma ghi do gha re emwa ni ya aro ye arrọọ ọghe etẹbitẹ ne irẹn yan rẹn.

8 Ẹmwata ne uhunmwu ẹmwẹ ẹre avbe ẹmwẹ na khin, I vbe hoo ne u ye gha nianian avbe ẹmwẹ na, ne emwa ni ya Osa yi mieke na mu aro ye emwi esi na ru. Emwi nọ maan ẹre ena hia khin, erriọ ẹre ọ vbe ya ru iyobọ ne emwa.*

9 Ghẹ gha mwẹ obọ vbe imuanẹmwẹ nọ ma khianrẹn, ra ne u gu emwa gha muan ẹmwẹ ye ẹmwẹ emwi na gbẹnnẹ vbekpa eni avbe erha uwa odede; ghẹ vbe gu ọmwa rhọkpa muan ẹmwẹ ye ẹmwẹ Uhi, ra ne u gu iran gha khọn yọ, rhunmwuda, iran i mwẹ esa ne iran ye, ihoi ẹre ehia khin. 10 Gha lẹẹ ne ọmwa nọ si iwannegbe, adeghẹ a na miẹn wẹẹ, u gu ẹre guan* nẹ vbe okaro kevbe ukpogieva, sokpan, ọ ma rhie, 11 rhunmwuda, ọmwa vberriọ lahin odẹ iyayi rre nẹ, ọmwa orukhọ ghi nọ, ọ vbe bu ohiẹn gbe egbe ẹre nẹ.

12 I gha gie Atẹmas ra Tikikọs bu ruẹ gha dee, u ghi hia ne u do miẹn mwẹ vbe Nikọpolis, rhunmwuda, I tae nẹ wẹẹ, I gha dia evba ya vbe ẹghẹ oni.* 13 Nọ ne Zinas nọ wa rẹn Uhi ẹsẹse, u ghi hia ne u viọ emwi ye ọre ihẹ, ke irẹn kevbe Apọlọs, ne emwi rhọkpa ghẹ mieke na vbee iran vbe okhian ọghe iran. 14 We ne emwa ima vbe hia vbe odẹ ke odẹ, ne iran gha winna iwinna esi, ne iran miehe na sẹtin ru iyobọ, a i rẹn vbe emwi eso gha de rre, ne iran ghẹ do gha re emwa nẹi mwẹ iyobọ ne iran ye.

15 Emwa hia ni gu mwẹ rre emwa gie na tuọ. Gu mwẹ tuẹ emwa hia ni hoẹmwẹ ima, ne ima gba mwẹ iyayi ọkpa.

Te Osanobua gha ru ẹse ne kpataki* ne uwa hia.