EBE NOGIEVA NA GBẸN GIE TIMOTI

1 E Pọl nọ re ukọ ọghe Kristi Jesu zẹvbe nọ gua iho ọghe Osanobua ro, zẹvbe nọ vbe guaẹro ighẹ eyan ọghe arrọọ nọ khian la obọ e Kristi Jesu rre, 2 ẹre ọ gbẹn ebe na gie Timoti ne ọmọ ne I hoẹmwẹ ọnrẹn:

Te u gha miẹn ẹse ne kpataki,* itohan, kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Kristi Jesu rre.

3 I kpọnmwẹ Osanobua, nọ re ọmwa ne I rhie ugamwẹ nọhuanrẹn na zẹvbe ne avbe erha mwẹ odede vbe ru ẹre; ekhọe nọhuanrẹn ẹre I ya gae. Ẹghẹ hia ẹre I ya ye ruẹ rre, vbe I ghaa ya ekhọe hia na erhunmwu gie Osanobua, asọn kevbe avan. 4 I ma mianmian eve ne u viẹ, rhunmwuda ọni, I wa hoo ne I do miẹn ruẹ, ne ekhọe mwẹ miehe na vuọn ne ọyẹnmwẹ. 5 I ma mianmian amuẹtinyan ọghe ẹmwata ne u mwẹ, egbe ne I ka miẹn vbe egbe iyuẹ nọkhua ighẹ e Lọis kevbe iyuẹ ighẹ e Yunis; I wa rẹn wẹẹ, egbe amuẹtinyan vberriọ ẹre ọ vbe guẹ.

6 Rhunmwuda ọna, I hoo ne I ye ruẹ ẹre rre, ne u ye gi ẹre gha gbe ruẹ otiti, ẹse ọhẹ ne Osanobua ya we ruẹ vbe ẹghẹ ne I ya viọ obọ yan ruẹ, u ghi gi ẹre gha yọn vbe na miẹn wẹẹ te u hie erhẹn yọ. 7 Rhunmwuda, Osanobua ma rhie orhiọn ọghe avbiẹrẹ ne ima, sokpan, ọghe ẹtin, ahoẹmwọmwa kevbe ọghe ekhọe na ya roro emwi ẹse ẹre ọ rhie ne ima. 8 Rhunmwuda ọni, ghẹ gi ekhue ẹmwẹ Enọyaẹnmwa na kporhu ẹre gha mu ruẹ, ghẹ vbe gi ekhue imẹ na mu ye eghan ba ẹmwẹ Enọyaẹnmwa gha mu ruẹ, sokpan, gha mwẹ oghae vbe oya na re ye ẹmwẹ iyẹn nọ maan, lekpa ne u gha na mu ẹtin yan Osanobua. 9 Ọ keghi miẹn ima fan, ọ na tie ima ne ima do gha re emwa rẹn ni huanrẹn; ọ ma tie ima rhunmwuda iwinna ne ima ru, sokpan, te ọ tie ima rhunmwuda emwamwa rẹn kevbe ẹse ne kpataki* ọghẹe. Vbe ẹghẹ nọ kpẹẹ fua, ẹre ọ ya la obọ e Kristi Jesu ru ẹse na ne ima. 10 Banbanna nian, te ẹse na ghi wa dewarorua, rhunmwuda ne Ọmiọnmwafan mwa ighẹ e Kristi Jesu na rhiegbe ma. Irẹn ẹre ọ wabọ uwu rua fẹfẹfẹ, ọ na vbe lekpa iyẹn nọ maan gi ima rẹn vbene ima khian ya gha mwẹ arrọọ hẹ kevbe egbe nẹi sẹtin kẹkẹ. 11 Iyẹn nọ maan na ẹre a zẹ mwẹ ba ne I gha kporhu ẹre, ẹre a gu vbe zẹ mwẹ ne I gha re ukọ kevbe ọmamwaemwi.

12 Ọna ẹre ọ si ẹre ne I na rri oya avbe emwi na hia, sokpan, ekhue i mu mwẹ. Rhunmwuda, I rẹn Ọmwa ne I mu ẹtin yan, I vbe mwẹ ilẹkẹtin wẹẹ, ọ gha sẹtin gbaroghe emwi ne I mu ye ọre obọ, vbene ọ te sẹ ẹdẹ ne ẹdẹrriọ. 13 Ye gha rhie owẹ lele ẹmwẹ nọ maan* hia ne I tama ruẹ, u ghi ye gha rhie amuẹtinyan kevbe ahoẹmwọmwa ma zẹvbe ọmwa nọ gu e Kristi Jesu rrọọ vbe akugbe. 14 Ya ẹtin orhiọn nọhuanrẹn nọ loo vbe uwu ima gbaroghe emwi esi na ka yọ ruẹ obọ.

15 U rẹnrẹn wẹẹ iran hia ni rre ikinkin Esia fi iyeke gbe mwẹ nẹ, ya sẹ egbe Faigẹlọs kevbe Hẹmogẹnis. 16 Te Enọyaẹnmwa gha mwẹ itohan daa igiowa ọghe Ọnẹsiforọs, rhunmwuda, ẹghẹ hia ẹre ọ ya gha fu mwẹ ẹko rre, ọ ma gi ekhue eghan ne I ye muẹn. 17 Uhiẹn, vbe ẹghẹ nọ na gha rre Rom, ọ na fẹko gha gualọ mwẹ khian ọ te do miẹn mwẹ. 18 Erhunmwu ne I na ọre ne Enọyaẹnmwa gi ẹre miẹn itohan vbe obọ e Jehova* vbe ẹdẹ ne ẹdẹrriọ. Wẹ wa vbe rẹn ẹsẹse, iwinna hia nọ ru vbe Ẹfisọs.

2 Nọnaghiyerriọ ovbi mwẹ, ye gha rinmwian Osanobua nọ gha rhie ẹtin nuẹn lekpa ẹse ne kpataki* ne Kristi Jesu ru ne ima; 2 emwi hia ne u họn vbe unu mwẹ, ne emwa nibun wa vbe sẹ osẹ yi, ye gha ma emwa nọ gia mu ẹtin yan ẹre, ẹghẹ nii, iran ghi vbe gua gha ma emwa ọvbehe ẹre. 3 Mu egbe ne u ya rri oya zẹvbe ovbiyokuo e Kristi Jesu ọghe ẹmwata. 4 Ovbiyokuo ọkpa i rrọọ nọ hoo nọ ya ẹko rhiẹnrhiẹn ọmwa nọ rhie ẹre ye iwinna, nọ khian gha gbinna igbinna ẹki na do.* 5 Erriọ ẹre iku isasegbe vbe ye, a i khian rhie ive ne ọmwaikọmwa nọ mwẹ obọ vbọ, vbe ẹ i re te ọmwa nii lele uhi hia nọ lelẹe khian. 6 Ọgbugbo* nọ wegbe obọ, ẹre ọ ka danmwẹ emwiokọ nọ rhọ re vbe ugbo. 7 Gha mu emwi ne I tama ruẹ na roro; Enọyaẹnmwa gha ru iyobọ nuẹn* ya rẹn otọ emwi hia.

8 Yerre wẹẹ, Jesu Kristi rhiọ kpaegbe vbe idin, uniẹn e Devid ẹre ọ vbe ke rre, zẹvbe nọ gua iyẹn nọ maan ne I kporhu ẹre ro. 9 Ẹmwẹ iyẹn nọ maan na ẹre I rri oya ba na, ẹre a vbe gu khui mwẹ ye eghan vbe na ghee izigan. Sokpan, a i khian sẹtin mu ẹmwẹ Osanobua gba. 10 Ọna ẹre ọ si ẹre ne I na zin egbe emwi hia rhunmwuda emwa na hannọ zẹ, ne iran tobọ iran mieke na miẹn imiẹnfan na la obọ e Kristi Jesu miẹn, iran ghi vbe miẹn uyi ọghe etẹbitẹ. 11 Ẹmwata ne uhunmwu ẹmwẹ na khin: Vbene ẹmwata, adeghẹ ima na gba wu, ma ghi vbe gba gha rrọọ; 12 adeghẹ ima na ye gha zin egbe khian, ma gha vbe koko kha zẹvbe ọba; adeghẹ ima na siẹn ọnrẹn, irẹn ghi vbe siẹn ima; 13 ọ gha khọnrẹn wẹẹ ima khian emwa nẹi gia mu ẹtin yan, ọmwa nọ gia mu ẹtin yan ẹre irẹn ye khin, rhunmwuda, irẹn i khian sẹtin fi aro ọmwa ne irẹn khin werriẹ.

14 Ye gha ye iran avbe emwi na rre, u ghi tama iran* vbe odaro Osanobua ne iran ghẹ gha muan ẹmwẹ, rhunmwuda, ẹ i mwẹ iyobọ nọ ye hiehie, sokpan, ikuanegbe* ẹre ọ si gie emwa ni danmwehọ. 15 Hia vbe odẹ ke odẹ ne u gha ru emwi nọ gha ya Osanobua rhan obọ miẹn ruẹ yi, zẹvbe ọmwa iwinna ne ekhue iwinna rẹn i muẹn, u ghi gha ya obọ mu ẹmwata Osanobua ẹse. 16 Gban egbe ne avbe ẹmwẹ nọ ma khianrẹn nọ gbodan ghee emwi nọhuanrẹn, rhunmwuda, te iran si ọmwa fi orukhọ sayọ; 17 te ẹmwẹ vberriọ vẹwae khian vbe na ghee okobẹtẹ* nọ vẹ khian vbe egbe. Haiminiọs kevbe Failitọs rre usun iran ni mwẹ obọ vbe avbe ẹmwẹ ni ma khianrẹn na. 18 Ikpia na lahin odẹ ẹmwata rre nẹ; iran tae khian wẹẹ arhiọkpaegbe sunu nẹ, vbene iran na gbe amuẹtinyan ọghe emwa eso rrie. 19 A rhe ta ena ta na, ẹyotọ nọ wegbe ne Osanobua gbe ye mudia gbain, emwi na gbẹn yọ ọre wẹẹ, “E Jehova* rẹn nọ re ọghẹe,” kevbe wẹẹ, “We ne ọmwaikọmwa nọ datie eni e Jehova* zobọ vbe emwi dan.”

20 Vbe owa nọkhua, emwi ughughan na ya ru emwi ẹre ọ rrọọ; eso rrọọ na ya igoru kevbe esiliva ru, eso rrọọ na ya erhan ru, eso vbe rrọọ na ya obuẹ ma, eso rrọọ na loo ye emwi nọ hin usi, eso vbe rrọọ na loo ye emwi nọ ma hin usi. 21 Adeghẹ ọmwa na gban egbe ne emwa ni yevbe emwi na kiekie sunu yi na, ọ ghi gha re ọmwa na gha sẹtin loo ye emwi nọ hin usi, ọ ghi gha re ọmwa na kpe huan, ne enarẹn gha sẹtin loo, kevbe nọ mu egbe nọ ya winna iwinna nọ maan hia. 22 Nọnaghiyerriọ, lẹẹ ne emwi ne avbe igbama rriarria yi, sokpan, u ghi hia vbe odẹ ke odẹ ne u gha ru emwi esi, ne u gha mwẹ amuẹtinyan, ahoẹmwọmwa, kevbe ọfunmwegbe, zẹvbe ne u ya gu emwa ni ya ekhọe nọhuanrẹn datie Enọyaẹnmwa mu obọ.

23 Yevbesọni, ghẹ gha mwẹ obọ vbe imuanẹmwẹ nọ ma khianrẹn ọghe akpa vbe abobo, rhunmwuda, u rẹnrẹn wẹẹ, emwi vberriọ ẹre ọ si okhọn. 24 Ọ ma khẹke ne ọguọmwadia* Enọyaẹnmwa gha khọn, sokpan, te ọ khẹke nọ gha re ọmwa nọ fu* nọ ya obọ nọ maan mu emwa hia, ọ ghi gua gha ma emwa emwi, ọ ghi sẹtin gha gbe ibiẹ rrie vbe a gha ru ẹre khọọ, 25 ọ ghi vbe sẹtin gha ya urhu ne khuẹrhẹ ma emwa ni gbodan emwi. Egbọre, Osanobua gha rhie ẹkpotọ ne iran ya ro iro fi uyinmwẹ werriẹ, ẹghẹ nii, iran ghi do gha mwẹ irẹnmwi nọ gbae ọghe ẹmwata. 26 Aro ghi vbe do gbannọ iran, iran ghi vbe sẹtin lẹẹ fe vbe ifi ọghe Esu, ugbẹnvbe a miẹn wẹẹ, iran rẹn nẹ wẹẹ, Esu te ka ya ifi munọ iran, ọ na gha loo iran ya ru ọghe enegbe ẹre.

3 Sokpan, I hoo ne u rẹn wẹẹ, ẹghẹ nọ wegbe ẹre ẹdẹ okiekie khian gha khin, te emwi hia khian gha lọghọ. 2 Rhunmwuda, emwa gha hoẹmwẹ egbe iran ọkpa,* iran ghi hoẹmwẹ igho, iran ghi gha rhuọ, iran ghi gha tọn egbe mu, iran ghi gha rhoo, emọ i ghi họn ẹmwẹ ne evbibiẹ iran, emwa i ghi kpọnmwẹ ẹse, emwa i ghi mwẹ ẹkoata, 3 emwa i ghi mwẹ ẹnina, emwa i ghi hoo ne iran ru adọlọ,* emwa ghi gha ta ọtakhọ, emwa i ghi sẹtin da egbe iran yi, aro emwa ghi gha kpannọ ugiọnmwẹ erhẹn, emwa ghi khian ne emwi nọ maan i yẹẹ, 4 emwa ghi gha ya emwa dẹ, emwa ghi ze vbe udu, uhiomwẹ ghi rhu iran aro, iran ghi hoẹmwẹ orhiẹnrhiẹn agbọn ne iran gha te ya hoẹmwẹ Osanobua, 5 iran ghi mu ugamwẹ Osanobua gue aro, sokpan, iran i ru emwi nọ khẹke;* gha lẹẹ ne emwa vbenian. 6 Ikpia eso vbe uwu iran na keghi ya ẹkẹ vbe ero la igiowa emwa, iran ghi ya gha rẹrẹ ikhuo ni vburriẹ ni fuẹn vbe uwu orukhọ, ni ru emwi ughughan ne egbe iran gualọ. 7 Iran ghi gha ruẹ emwi vbe ẹghẹ hia, sokpan, vbene iran ruẹ sẹ, iran i khian sẹtin gha mwẹ irẹnmwi nọ gbae ọghe ẹmwata ẹdẹ.

8 Zẹvbe ne Janis vbe Jambris ya gha gbodan ghee Mozis, erriọ ẹre ikpia na vbe gbodan ghee ẹmwata. Te ekhọe iran wa kulo, iran i ghi mwẹ evbọ gia ya ru, vbọ gha de ọghe ẹmwẹ iyayi. 9 Vbọrhirhighayehẹ, iran i khian ghi sẹtin ru ghee aro, rhunmwuda, te agbọn hia khian rẹn vbene iran kọn hẹ, zẹvbe nọ vbe gha ye ne ikpia eva nii. 10 Sokpan, nọ ne uwẹ, te u wa fẹko rhie owẹ lele emwi ne I ma emwa ẹre, odẹ ne I ya ru emwi, kevbe emwi ne I ya ẹdagbọn mwẹ khu khian; u vbe lele igiemwi ne I rhie yotọ vbe nọ dekaẹn amuẹtinyan, izinegbe, ahoẹmwọmwa kevbe vbene I ya ya egbe miẹn emwi hia. 11 Yevbesọni, u rẹn ukpokpo ne I miẹn kevbe oya ne I re, egbe ne I miẹn vbe Antiọk, Aikoniọm kevbe Listra. I keghi zin egbe avbe ukpokpo na, Enọyaẹnmwa na vbe miẹn mwẹ fan vbe uwu ena hia. 12 Ọghe ne ẹmwata, nọ ne emwa hia ni lele Kristi Jesu, ni hoo ne iran rhiegbe ye ugamwẹ Osanobua, a gha zẹ iran kpokpo. 13 Sokpan, emwa dan kevbe emwa okeke ghi gha rhia yọ rhia yọ, iran ghi gha mu emwa rẹrẹ, a ghi vbe gha mu iran rẹrẹ.

14 Sokpan, nọ ne uwẹ, ye gha lele emwi ne u he ruẹ kevbe emwi hia na ma ruẹ ẹre nọ mu ruẹ ekhọe, rhunmwuda, u rẹn obọ emwa ne u na ruẹ avbe emwi na, 15 kevbe wẹẹ, ke egbe ọvbokhan gha dee, ẹre u ghi ya rẹn ebe nọhuanrẹn, nọ gha sẹtin ya ruẹ gha mwẹ ẹwaẹn nọ su ọmwa la imiẹnfan, vbe a gha mu ẹtin yan e Kristi Jesu. 16 Osanobua ẹre ọ dia emwa ya gbẹnnẹ emwi hia ni rre Ebe Nọhuanrẹn yotọ, ọ maan na ya ma ọmwa emwi, na ya gu ọmwa gui ye emwi nọ ma ru ẹse, na ya dia emwi ye odẹ,* na ya gbe ọmwa hin ọkhọ rre nọ gha yin ẹse, 17 ne ọmwa nọ ga Osanobua mieke na gha re nọ gbegba kevbe ne emwi hia gba na, nọ gha ya sẹtin winna iwinna nọ maan hia.

4 Vbe odaro Osanobua kevbe Kristi Jesu, nọ khian bu ohiẹn emwa ni rre agbọn kevbe ni wulo nẹ, vbe ẹghẹ nọ khian ya rhiegbe ma kevbe ẹghẹ nọ khian ya gha kha vbe Arriọba ọghẹe, I yi iyi na nuẹn wẹẹ: 2 Gha ya ẹmwẹ Osanobua wewe; tuabọ yọ, ke ẹghẹ nọ rhiẹnrhiẹn, ke ẹghẹ nọ wegbe; gha gu emwa ni ru emwi dan gui, gha ya obọ sekhae ne emwa, gha bu emwa ude, u ghi gha ya izinegbe ru ena, u ghi vbe gha ru ẹre zẹvbe ọmwa nọ gua ma emwa emwi. 3 Rhunmwuda, ẹghẹ dee ne emwa i khian ghi ya gha lele imamwaemwi nọ maan,* sokpan, iran ghi gha ru emwi nọ rre iran ekhọe, iran ghi silo avbe ọmamwaemwi ga egbe, ni khian gha ta ẹmwẹ nọ rhiẹnrhiẹn iran vbe ehọ.* 4 Iran ghi fi iyeke gbe ẹmwata na danmwehọ ọre, iran ghi ya gha danmwehọ okha ohoghe. 5 Sokpan, nọ ne uwẹ, gha loo ẹwaẹn vbe emwi ne u rhirhi gha ru, gha zin egbe ọlọghọmwa, gha kporhu iyẹn nọ maan,* u ghi vbe hia ne u ru iwinna ugamwẹ ruẹ ẹse.

6 Vbene I wa gu ruẹ guan na, te I yevbe ayọn na ya zọ ese na tue ye uhunmwu ogiukpo, ẹghẹ na gha ya fan mwẹ vbe sotọ nẹ. 7 I gbinna igbinna nọ maan fo nẹ, I rhulẹ sẹ eke na rhulẹ sẹ nẹ, erriọ ẹre I vbe ya mudia gbain vbe odẹ iyayi. 8 Ke ẹghẹ na kpa, a mu ẹrhu ẹde ọghe iruemwiẹse khẹ mwẹ nẹ, ne Enọyaẹnmwa nọ re ọbuohiẹn nẹi bu eku khian ya san mwẹ ẹse vbe ẹdẹ ne ẹdẹrriọ; sokpan, ẹ i re imẹ ọkpa ẹre a khian san rẹn ẹse, ọ gha vbe sẹ egbe iran hia ni ya ekhọe hia mudia khẹ ẹghẹ ne Enọyaẹnmwa khian ya rhiegbe ma.

9 Hia ne u rherhe bu mwẹ gha dee. 10 E Dimas fi iyeke gbe mwẹ nẹ, rhunmwuda ne ẹmwẹ agbọn na* na rhiẹnrhiẹn mu ẹre ukpẹ. Vbene a guan na, ọ kpa gha rrie Tẹsalonaika nẹ, e Krẹsẹns vbe kpa gha rrie Galetia, e Taitọs rrie Dalmetia. 11 E Luk ọkpa ẹre ọ ghi gu mwẹ rre emwa. U ghaa dee, u ghi rhie Mak lele egbe rre, rhunmwuda, ọ wa mwẹ iyobọ nọkhua nọ ye mẹ vbe iwinna Osanobua. 12 Sokpan, I gie Tikikọs gha rrie Ẹfisọs nẹ. 13 U ghaa dee, u ghi mu ẹwu ne guọrọ ne I sẹrae ye ọghe Kapọs vbe Troas gha dee. U ghi vbe viọ ebe na kiri rre, katekate ebe ohian ni rrọọ.

14 U ma miẹn Alẹkzanda ne ogiogun ọghe ekọpa, emwi nọ ru mwẹ re i maan. E Jehova* ẹre ọ khian ha ẹre osa ye emwi nọ ru. 15 Wẹ vbe gha begbe vbe egbe ẹre, rhunmwuda, ọ wa gbodan ghee ikporhu ne ima kpee re, te ọ kue ru ẹre gberra egbe.

16 Vbe ẹghẹ okaro ne I ya gha zẹ enunu mwẹ vbe a gui ẹzọ mwẹ, I ma miẹn orhunmwu ọkpa nọ bu mwẹ rre, sokpan, iran hia keghi fi iyeke gbe mwẹ. Osanobua nọ lahọ, nẹ ghẹ kae ye iran urhu. 17 Sokpan, Enọyaẹnmwa keghi mudia ke mwẹ, ọ na rhie ẹtin mẹ, ne iwinna ikporhu mieke na la egbe mwẹ da otọ ẹsẹse, ne agbẹnvbo hia mieke na vbe họẹn; a keghi vbe miẹn mwẹ fan vbe unu oduma. 18 Enọyaẹnmwa gha miẹn mwẹ fan vbe obọ emwi dan hia, ọ ghi vbe gbogba ga mwẹ, ne I mieke na sẹtin la Arriọba ọghẹe nọ rre ẹrinmwi. Uyi nọ nẹẹn vbe etẹbitẹ ya sẹ etẹghori. Isẹ.

19 Tuẹ e Priska kevbe Akuila mẹ oo, kevbe igiowa ọghe Ọnẹsiforọs.

20 Ẹrastọs dia e Kọrint ya, sokpan, egbe ma rran e Trọfimọs, I sẹrae ye Mailitọs. 21 Hia ne u sẹ ediran vbene ọ te sẹ ẹghẹ oni.*

E Yubiulọs, e Pudẹns, e Lainọs, e Klọdia kevbe etẹn hia nikẹre gie na tuọ.

22 Enọyaẹnmwa gu ruẹ rrọọ rhunmwuda ekhọe esi ne u mwẹ. Te ọ gha ru ẹse ne kpataki* nuẹn.