EBE NOKARO NA GBẸN GIE TIMOTI

1 E Pọl, nọ re ukọ ọghe Kristi Jesu lekpa asẹ ọghe Osanobua ne Ọmiọnmwafan mwa kevbe ọghe Kristi Jesu, nọ re ayayẹro* ọghe ima, 2 ẹre ọ gbẹn ebe na gie Timoti* ne ọmọ ne ọmọ, ne ima gba rre ugamwẹ Enọyaẹnmwa:

Te u gha miẹn ẹse ne kpataki,* itohan, kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Kristi Jesu rre.

3 Vbe I khian kpa gha rrie Masẹdonia, I na tama ruẹ ne u ye gha rre Ẹfisọs; te I ghi vbe tama ruẹ nian, ne u ye gha rre evba, ne u mieke na ya obọ sekhae ne emwa eso, ne iran ghẹ ghi ma emwa ohoghe. 4 We ne iran ghẹ vbe danmwehọ okha ohoghe kevbe emwi na gbẹnnẹ vbekpa eni avbe erha iran odede. Egbe emwi vberriọ i mwẹ esa nọ ye, sokpan, iyẹn ọwiẹghẹrẹ ẹre ọ si, enii i mwẹ vbene iran ya kaan emwi ne Osanobua rhie ne ọmwa, nọ ya amuẹtinyan ọghe ọmwa wegbe. 5 Evbọzẹe ne I na gbe uhi na, ọre ne ima mieke na sẹtin ya ekhọe nọhuanrẹn kevbe nẹi bu abe gbe ọmwa gha hoẹmwẹ egbe, kẹ kevbe amuẹtinyan nẹi re ọghe abawẹ. 6 Emwa eso ni fi iyeke gbe avbe emwi ne I ya unu kaẹn na, keghi khian ni ghi na iyẹn ọwiẹghẹrẹ khian. 7 Iran hoo ne iran gha ma emwa uhi, sokpan, iran ma rẹn otọ ẹmwẹ ne iran ta, amaiwẹ emwi ne iran si ukankan yi.

8 Ma rẹnrẹn wẹẹ nene Uhi wa maan deghẹ a na loo ẹre vbene ọ khẹke, 9 a na vbe rẹn wẹẹ, ẹ i re rhunmwuda ọmwa esi ẹre a na yi uhi, sokpan, emwi na gu yi uhi ọre rhunmwuda emwa nẹi lele uhi kevbe emwa isọtẹ, emwa nẹi mwẹ imuohan Osanobua kevbe emwa orukhọ, emwa nẹi gia mu ẹtin yan* kevbe ni mu awua ye emwi nọhuanrẹn, emwa ni gbele erha iran vbe iye iran rua, avbe izigha, 10 emwa ni yin uyinmwẹ alama oghẹ,* ikpia ni tie ikpia ne ihua iran vbe ovbe,* iran ni do emwa mu, emwa ohoghe, iran ni sẹ osẹ ohoghe,* kevbe iran ni ru emwi ke emwi nọ ghi lughaẹn ne imamwaemwi nọ maan* nẹ. 11 Imamwaemwi na keghi re ọghe iyẹn nọ maan nọ hin usi nọ ke obọ Osa nọ mwẹ oghọghọ rre, ne irẹn mu yọ mwẹ obọ ne I gha kporhu ẹre.

12 I kpọnmwẹ Enọyaẹnmwa e Kristi Jesu nọ rhie ẹtin mẹ, rhunmwuda, ọ ka mwẹ ye ọmwa na gha sẹtin mu ẹtin yan, ọ na mu iwinna mẹ, 13 agharhemiẹn wẹẹ vbe ẹghẹ nọ gberra, I ghaa filo unu gie Osanobua, I ghaa zẹ emwa rẹn kpokpo, I ma vbe gha ghee ọmwa sẹ ọmwa. Sokpan, a keghi tohan mwẹ, rhunmwuda, I ma rẹn enaye vbe ẹghẹ nii, I ma vbe gha mwẹ amuẹtinyan. 14 Enọyaẹnmwa keghi ru ẹse ne kpataki* mẹ ẹsẹsẹmwẹse, e Kristi Jesu na vbe rhie amuẹtinyan kevbe ahoẹmwọmwa mẹ. 15 Ẹmwata ne uhunmwu ẹmwẹ ẹre I khian ta na, ọ vbe khẹke na ya ekhọe hia miẹn ọnrẹn yi: Te Kristi Jesu rrie agbọn na do miẹn emwa orukhọ fan. Vbe uwu iran hia, mẹ ẹre ọ ghi khọọ sẹ. 16 Agharhemiẹn wẹẹ imẹ ẹre ọ ghi khọọ sẹ, a keghi tohan mwẹ, ne Kristi Jesu mieke na rhie ẹre ma, vbene irẹn mwẹ izinegbe hẹ, ọ na ya mwẹ ru igiemwi ma emwa ni gha do mu ẹtin yan rẹn, ne arrọọ ọghe etẹbitẹ mieke na sẹ iran obọ.

17 Ọghọ kevbe uyi nọ ne Ọba ọghe etẹbitẹ nẹi sẹtin wu ẹdẹ, kevbe nai bẹghe, ne irẹn ọkpa re Osanobua. Erriọ ẹre ọ khian gha ye vbe etẹbitẹ ya sẹ etẹghori. Isẹ.

18 E Timoti ne ovbi mwẹ, te I gbe uhi na nuẹn zẹvbe nọ gua ẹmwẹ akhasẹ na tae vbekpa ruẹ ro; ena gha ru iyobọ nuẹn ya gha khọn okuo nọ maan nii khian. 19 Zẹvbe ne u ya ru ọna, u ghi gi amuẹtinyan ruẹ ye gbain, u ghi vbe gha mwẹ ekhọe nẹi bu abe gbe ọmwa, ne emwa eso mu fua, nọ ghi gbe amuẹtinyan ọghe iran mu otọ, vbe na ghee okọ nọ ni ye uwu ẹzẹ. 20 E Haiminiọs kevbe Alẹkzanda rre usun iran na; I viọ iran ye obọ e Setan nẹ, na mieke na gbe iran hin ọkhọ rre, ne iran ya rẹn wẹẹ, ọ ma khẹke na gha rhoo.

2 Nọ ghi sẹ ehia, I rhie igiọdu ne emwa hia, ne iran gha mu ẹmwẹ emwa ughughan ye erhunmwu, ne iran gha rinmwian Osanobua ne iran, ne iran gha nọ iyobọ vbe obọ Osanobua ne iran, iran ghi vbe gha kpọnmwẹ Osanobua ye ẹmwẹ iran, 2 ya sẹ egbe avbe ọba kevbe emwa hia ni rre ukpo nọ yo,* ne ima mieke na sẹtin gha ru ọghe ima khian, egbe ghi vbe rọkhọ ima. Ẹghẹ nii, ma ghi sẹtin rhiegbe ye ugamwẹ Osanobua, ma ghi vbe mu aro yọ. 3 Emwi nọ maan na khin vbe aro Osanobua ne Ọmiọnmwafan mwa, ọ wa vbe yẹẹ ọre. 4 Irẹn hoo ne emwa ughughan hia miẹn fan, ne iran vbe gha mwẹ irẹnmwi nọ gbae ọghe ẹmwata. 5 Osanobua ọkpa ẹre ọ rrọọ, orhunmwu ọkpa ẹre ọ vbe rre uwu ẹkpo Osanobua kevbe emwa nagbọn, ọni ọre Kristi Jesu. Okpia na 6 ẹre ọ ya arrọọ ọghẹe ha osa nọ khẹke, nọ ya dẹ emwa hia* werriegbe; ọna ọre emwi na khian sẹ osẹ yi vbọ gha sẹ ẹghẹ. 7 Rhunmwuda osẹ na ẹre a na zẹ mwẹ, ne I gha kporhu kevbe ne I gha re ukọ, ne I mieke na gha ma ivbi agbẹnvbo ọvbehe emwi vbekpa amuẹtinyan kevbe ẹmwata. Ẹmwata ẹre I ta na, I ma ta ohoghe.

8 Nọnaghiyerriọ, I hoo ne ikpia gha na erhunmwu vbe ehe hia, iran ghi viọ obọ iran nọhuanrẹn daa odukhunmwu, vbene iran i na mu ohu, ra ne iran gha muan ẹmwẹ. 9 Erriọ vbe ye, I hoo ne ikhuo gha mu egbe ẹse, odẹ ne iran ya mu egbe ghi gha rre oreghe, ọ ghi vbe rhie ẹre ma wẹẹ, iran roro emwi ẹse.* Ẹ i re ne iran gha ru eto ọghe uwa do ghee, ra ne iran gha ya igoru ra okuta ighobioye* te egbe, ra ne iran gha yọ ukpọn aghanghan. 10 Sokpan, iran ghi gha mu egbe zẹvbe nọ khẹke ikhuo ni wẹẹ iran rhie ugamwẹ ne Osanobua. Egbe nọ ghi maan sẹ ne iran gha mu, ọre ne iran gha yin uyinmwẹ esi.*

11 Ọ khẹke ne ikhuo hunwan* vbe iran ghaa ruẹ emwi, iran ghi vbe gha ya ekhọe hia mu egbe rriotọ. 12 I ma kue yọ ne okhuo gha ma emwa emwi, ra nọ gha ta ẹmwẹ nọ sẹ vbe egbe okpia, sokpan, te ọ khẹke nọ gha hunwan.* 13 Rhunmwuda, Adam ẹre a ka gha yi, a ke yi Ivi. 14 Deba ọni, a ma mu Adam rẹrẹ, sokpan, okhuo nọ rrọọ ẹre a wa gele mu rẹrẹ, ọ na ghi khian ọmwa orukhọ. 15 Vbọrhirhighayehẹ, emwi nọ khian zẹ vbe egbe okhuo, ọre deghẹ ọ na biẹ; sokpan ọkpa ghi nọ, ọ* ghi ye gha mwẹ amuẹtinyan, ahoẹmwọmwa kevbe uyinmwẹ nọhuanrẹn, ọ* ghi vbe gha roro emwi ẹse.*

3 Ẹmwata ne uhunmwu ẹmwẹ na khin: Adeghẹ okpia na gha hia vbe odẹ ke odẹ nọ gha re ọdiọn* vbe iko, iwinna esi ẹre ọ hoo nọ ru. 2 Nọnaghiyerriọ, ọ khẹke ne ọdiọn* gha re ọmwa nẹi mwẹ ozan, ọ ghi gha re okpia nọ mwẹ okhuo ọkpa, nọ ru emwi ye oreghe, nọ roro emwi ẹse,* nọ ru emwi ye uhẹn, nọ gua mu ọghọ ye emwa egbe, kevbe nọ gua ma emwa emwi. 3 Ọ ma khẹke nọ gha re ọdayọn, ra ọmwa nọ zaro igbinna,* sokpan, ọ ghi gha re ọmwa nọ mwẹ amuroro, nẹi gualọ ẹzọ kevbe nọ ma hoẹmwẹ igho. 4 Ọ ghi sẹtin gha gbaroghe igiowa ẹre ẹse, ọ ghi vbe gha mwẹ emọ ni họn ẹmwẹ kevbe ni rẹn enegbe 5 (rhunmwuda, deghẹ ọmwa ma sẹtin gbaroghe igiowa ẹre, vbọ khian ghi ya sẹtin gbaroghe iko ọghe Osanobua hẹ?), 6 ọ ma khẹke nọ gha re ọmwa nọ da khian ovbi iyayi, nẹ ghẹ mieke na do gha hio, na ghẹ do miẹn wẹẹ, ohiẹn na buru gbe Esu, ẹre a khian ghi vbe bu gbe ẹre. 7 Yevbesọni, ọ vbe khẹke ne emwa ni rre uwu agbọn gha ta ẹmwẹ ọnrẹn nọ maan, ne emwa ghẹ do gha zaan rẹn,* nẹ ghẹ vbe ya de ye ifi Esu.

8 Ọ vbe khẹke ne eguọmwadia iwinna gha re emwa ni rẹn enegbe, ọ ma khẹke ne iran gha re emwa nai miẹn ẹmwata vbe unu ẹnrẹn, ọ ma khẹke ne iran gha da ayọn gbe, ra ne iran gha re emwa arovbẹmwẹ ni gualọ ọghe enegbe iran ọkpa, 9 iran ghi vbe daeyi gbain ighẹ ẹmwata Osanobua ne iran yayi, nọ re ẹmwẹ oro nọhuanrẹn, vbene ekhọe iran i na bu abe gbe iran.

10 Deba ọni, a ghi ka danmwẹ iran ghee nẹ deghẹ iran gbegba;* iyeke ọni, a ghi zẹ iran ye iwinna, ugbẹnvbe a miẹn wẹẹ iran i mwẹ ozan.

11 Ọ vbe khẹke ne ikhuo rẹn enegbe, ẹ i re ne iran gha ta ọtakhọ, sokpan, iran ghi gha ru emwi ye oreghe, iran ghi vbe gha re nọ mudia ẹse vbe emwi hia ne iran ru.

12 Okhuo ọkpa ẹre ọ khẹke ne eguọmwadia iwinna gha mwẹ, iran ghi gha gbaroghe ivbi iran kevbe igiowa iran ẹse. 13 Adeghẹ ikpia na gha winna iwinna ugamwẹ ọghe iran vbe odẹ nọ maan, emwa ghi gha ta ẹmwẹ iran ẹse, iran ghi vbe sẹtin gha si agbada vbe unu guan, vbe iran ghaa guan kaẹn emwi ne iran yayi vbekpa e Kristi Jesu.

14 Agharhemiẹn wẹẹ I gha rherhe do miẹn ruẹ, te I gbẹn ebe na guẹ, 15 a i rẹn deghẹ I ma na ghi rherhe rre, u ghi rẹn vbene u khian ya gha yin hẹ vbe igiowa ọghe Osanobua, ọni ọre iko ọghe Osanobua nọ rrọọ, nọ re orrẹ kevbe ẹyotọ ọghe ẹmwata. 16 Vbene ẹmwata, ọ dewarorua wẹẹ, ẹmwẹ oro nọhuanrẹn ọghe na rhiegbe ye ugamwẹ Osanobua keghi re nọ wa hin ukhuan: ‘Jesu rhiegbe ma zẹvbe ọmwa nagbọn, a kae ye ọmwa ata zẹvbe ọmwa orhiọn, ọ rhiegbe ma avbe odibo, a ya ẹmwẹ ọnrẹn wewe ma avbe agbẹnvbo, emwa ni rre uhunmwu otagbọn keghi yaeyi, a keghi miẹn ọnrẹn yi vbe ẹrinmwi, a na mu uyi ye ọre egbe.’

4 Vbọrhirhighayehẹ, ẹmwẹ nọ ke obọ Osanobua rre khare wẹẹ, ẹdẹ ghaa rrie ẹdẹ, emwa eso gha dele hin odẹ iyayi rre, iran ghi gha danmwehọ ẹmwẹ erẹrẹ* kevbe imamwaemwi ni ke obọ avbe orhiọn dan rre, 2 obọ emwa okeke ni ta ohoghe ẹre imamwaemwi na ke rre, ọni ọre emwa ne ekhọe iran gbin vbe na miẹn wẹẹ, te a mu ematọn ye erhẹn ya tọẹn. 3 Iran we na ghẹ ghi ru orọnmwẹ, iran na vbe yi uhi yọ na ghẹ ghi rri evbare ne Osanobua yi na gha re. Sokpan, te Osanobua yi avbe evbare na, ne emwa ni mwẹ amuẹtinyan kevbe ni rẹn ẹmwata ẹsẹse gha rriọẹ, iran ghi vbe gha kpọnmwẹ irẹn yọ. 4 Emwi hia fẹẹrẹ ne Osanobua yi wa maan, ọkpa i rrọọ nọ khẹke na rhie fua vbọ, ọni ọre deghẹ a na ya ekhọe ọkpọnmwẹse miẹn ọnrẹn yi, 5 rhunmwuda, ẹmwẹ Osanobua kevbe erhunmwu na na yọ, yae khian nọhuanrẹn nẹ.

6 Adeghẹ u na rhie ibude na ne etẹn, u ghi gha re ọguọmwadia e Kristi Jesu nọ maan, u ghi vbe yae gha koko egbuẹ ighẹ ẹmwẹ ọghe amuẹtinyan kevbe imamwaemwi nọ maan ne u zẹ owẹ lele. 7 Sokpan, ghẹ danmwehọ avbe okha ohoghe ne emwa ya filo unu gie Osanobua, egbe ne avbe edede ta. Nọghayayerriọ, gha ma egbuẹ emwi, ne u vbe mu aro ye ẹmwẹ vbene u khian ya rhiegbe ye ugamwẹ Osanobua hẹ. 8 Isasegbe wa maan vbe egbe, sokpan, iyobọ kherhe ẹre ọ ye ne egbe. Sokpan, a gha rhiegbe ye ugamwẹ Osanobua, odẹ hia ẹre ọ na maan, rhunmwuda, a gha lae miẹn afiangbe vbe agbọn na nian kevbe agbọn nọ dee vbe odaro. 9 Ẹmwata ne uhunmwu ẹmwẹ ẹre I ta na, ọ vbe khẹke na ya ekhọe hia miẹn ọnrẹn yi. 10 Ọna ẹre ọ si ẹre ne ima na kakabọ winna, ne ima na vbe ziga, rhunmwuda, Osanobua nọ rrọọ ẹre ima ya egbe kọ, irẹn ọre Ọmiọnmwafan ọghe emwa ughughan hia, katekate emwa ni mu ẹtin yan rẹn.

11 Ye gha gbe uhi na ne emwa, u ghi vbe gha ma iran ẹre. 12 Ghẹ gi ọmwa rhọkpa ya aro tila ruẹ rua rhunmwuda ighẹ ọvbokhan ẹre u khin. Sokpan, gha re igiemwi esi ne iran ni mwẹ amuẹtinyan vbe ẹmwẹ ne u ta, vbe uyinmwẹ, vbe ahoẹmwọmwa, vbe amuẹtinyan, kevbe uhuanmwẹ. 13 Vbene I te rre, ye gha rhiegbe ye ebe na tie vbe idagbo, ibude* na rhie ne emwa kevbe emwi na ma emwa ẹre. 14 Ghẹ ya emwi na ya we ruẹ fialasẹ, na rhie nuẹn vbe ẹghẹ ne ẹbu ediọn ya viọ obọ yan ruẹ, zẹvbe nọ gua ẹmwẹ akhasẹ na tae yotọ vbekpa ruẹ ro. 15 Gha mu avbe emwi na roro; gi ẹre rọn la ruẹ egbe, ne alaghodaro ne u mwẹ mieke na gha re ne aro emwa hia dae. 16 Gha gbarokotọ vbe odẹ ne u ya ru emwi kevbe odẹ ne u ya ma emwa emwi. Gha ru avbe emwi na khian, rhunmwuda, u gha ru vberriọ, u gha miẹn egbuẹ kevbe iran ni danmwehọ ruẹ fan.

5 Ghẹ gha ya ukpẹ zaan okpia nọ khian enọwanrẹn nẹ. Nọghayayerriọ, fẹko gha gu ẹre guan zẹvbe erhaa, u ghi rhie ibiẹka ikpia ni rrọọ zẹvbe etuẹn nikpia, 2 ikhuo ni khian eniwanrẹn ni rrọọ zẹvbe iyuẹ, ibiẹka ikhuo ni rrọọ zẹvbe etuẹn nikhuo; ghẹ gu iran yin uyinmwẹ usankanmwẹ.

3 Gha mwẹ amuroro* daa ikhuo ni gele dẹgbẹe.* 4 Sokpan, adeghẹ okhuo ke okhuo nọ dẹgbẹe mwẹ emọ ra eyẹ, ọ khẹke ne ivbi ẹre ra eyẹ ọre ka rhie ẹre ma nẹ wẹẹ, iran rhiegbe ye ugamwẹ Osanobua vbe igiowa ọghe iran, iran ghi ru emwi nọ khẹke ne evbibiẹ iran, iran ghi vbe ru ne erha iran nọkhua kevbe iye iran nọkhua; emwi nọ maan na khin vbe aro Osanobua. 5 Nọ ne okhuo nọ gele dẹgbẹe nẹi mwẹ enọ gbaroghe ẹre, Osanobua ẹre ọ ya egbe kọ, ọ ghi gha na erhunmwu gie ẹre vbe asọn kevbe avan, ọ ghi vbe gha rinmwiaẹn. 6 Sokpan, nọ ne okhuo nọ fifi ye emwi ne egbe ẹre gualọ, ọ wu nẹ, agharhemiẹn wẹẹ, ọ te ye rre agbọn. 7 Rhunmwuda ọni, ye gha gbe uhi* na ne iran, ne ọmwa rhọkpa ghẹ mieke na zaan iran. 8 Vbene ẹmwata, ọmwaikọmwa nọ ma kpemehe ne emwa rẹn, katekate emwa ni rre igiowa ẹre, te ọmwa vberriọ siẹn iyayi ọghẹe, ọ kue khọọ sẹ ọmwa nẹi mwẹ iyayi.

9 Emwi nọ khian ya okhuo nọ dẹgbẹe gha rre usun emwa na khian gha gbaroghe, ọre deghẹ ọ na sẹ ukpo iyeha (60) nẹ, deghẹ ọdọ ọkpa ẹre ọ ghaa mwẹ, 10 deghẹ a rẹn ọnrẹn ye ọmwa nọ winna iwinna esi, deghẹ ọ na koko ivbi ẹre ẹse, deghẹ ọ na gha re ọmwa nọ gua gha mu ọghọ ye emwa egbe, deghẹ ọ na kpe owẹ emwa ni huanrẹn, deghẹ ọ na ru iyobọ ne emwa ni rre uwu ọlọghọmwa, kevbe deghẹ ọ na rhiegbe ye iwinna nọ maan hia.

11 Sokpan, ghẹ ka ikhuo ni dẹgbẹe ni ma he khian eniwanrẹn ba usun na, rhunmwuda, emwi ọdọ vbe amwẹ gha la iran uhunmwu nẹ, ẹ i ghi re iwinna e Kristi ẹre iran ghi ye, iran ghi gha hoo ne iran rọnmwẹ ọdọ. 12 Ẹghẹ nii, iran ghi do khian enọ rriabe, rhunmwuda ne iran na ghi yangbe ẹmwẹ ne iran te ka ta rhunmwuda amuẹtinyan ne iran ghaa mwẹ.* 13 Ẹ i vbe re ọni ọkpa, iran ghi vbe khian obẹrure ye ẹvbo, iran ghi gha ke owa ọkpa la ọvbehe; ẹ i re te iran wa re obẹrure kẹkan, sokpan, iran ghi gha ta ọta wẹwẹwẹ, iran ghi gha na iyẹn ẹrrẹe, iran ghi vbe gha fi ukpẹ ye emwi nọ ma kaan iran. 14 Rhunmwuda ọni, I hoo ne ikhuo ni dẹgbẹe ni ma he khian eniwanrẹn rọnmwẹ ọdọ, ne iran biẹlẹ emọ, ne iran gha gbaroghe igiowa iran, ne eghian ghẹ do gha la egbe iran zaan ima. 15 Uhiẹn, eso fi iyeke gbe iyayi nẹ, iran na suẹn gha lele Setan. 16 Adeghẹ okhuo nọ re ọmwa iyayi mwẹ ikhuo ni dẹgbẹe vbe ẹgbẹe ọre, we nọ gha ru iyobọ ne iran, na ghẹ mieke na mu ihẹ ne iko. Ẹghẹ nii, iko ghi sẹtin gha gbaroghe ikhuo ni gele dẹgbẹe.*

17 Nọ ne ediọn ni winna iwinna iran ẹse, emwa nọ khẹke na gha rhie ọghọ na ẹsẹse ẹre iran khin, katekate iran ni hia vbe odẹ ke odẹ ne iran gha ta ẹmwẹ Osanobua kevbe ne iran vbe yae gha ma emwa emwi. 18 Rhunmwuda, ebe nọhuanrẹn khare wẹẹ, “Wa ghẹ rrọ ekagha ye unu ẹmila* vbọ ghaa wiẹn emwiokọ,” ọ vbe kha wẹẹ, “Te ọ khẹke na ha osa ne ọmwa nọ winnaẹn.” 19 Ghẹ zẹyọ vbe ọmwa gha do gui ẹzọ okpia nọ khian enọwanrẹn nẹ* ma ruẹ, sokpan a ma wẹẹ, orhunmwu eva ra orhunmwu eha sẹ osẹ yọ. 20 Gu ọmwa nọ ru orukhọ gui sirra emwa hia, ne emwa nikẹre mieke na yae wan ne egbe.* 21 Sirra Osanobua kevbe Kristi Jesu kẹ kevbe avbe odibosa na hannọ zẹ, ẹre I na tama ruẹ na, ne u ghẹ mwẹ u ma ya avbe emwi na ru emwi, u ghi vbe gha lelẹe, vbene u i na ya aro gbe ọmwa rhọkpa re, ra ne u gha gbe ewanmwẹ ghee obọ ọkpa.

22 Ghẹ ya okhirhikhirhi viọ obọ yan ọmwaikọmwa uhunmwu;* ghẹ gu ọmwa rhọkpa ghae vbe orukhọ ọghẹe; ghẹ yin uyinmwẹ usankanmwẹ rhọkpa.

23 Ghẹ ghi wọn amẹ,* sokpan, da ayọn kherhe rhunmwuda ẹko ruẹ, kevbe rhunmwuda ne u na huẹhuẹ vbe ẹghẹ hia.

24 Orukhọ ọghe emwa eso keghi re ne emwa wa rẹn, a ghi wa vbe bu ohiẹn iran vbobọvbobọ, sokpan, okiekie ẹre ọghe emwa eso ya vẹ na rẹn. 25 Erriọ ẹre iwinna esi vbe ye, te ọ wa dewarorua ne emwa hia miẹn; uhiẹn, nai rherhe rẹn ni rrọọ i gia rhie lẹre.

6 Gi avbe eviẹn* kọe ye orhiọn vbe ẹghẹ hia wẹẹ, arowa iran sẹ ne iran gha ya ekhọe hia gha rhie ọghọ na, ne emwa ghẹ mieke na do gha zaan eni Osanobua kevbe imamwaemwi ọghẹe. 2 Yevbesọni, ọ ma khẹke ne eviẹn ne arowa iran re emwa iyayi miẹn arowa iran fo, rhunmwuda ighẹ etẹn ẹre iran khin. Nọghayayerriọ, te ọ khẹke ne iran ya ekhọe hia ga arowa iran, rhunmwuda, emwa iyayi ne iran hoẹmwẹ ọnrẹn, ẹre ọ miẹn ere vbe iwinna esi ọghe iran.

Ye gha ma emwa avbe emwi na, u ghi vbe gha rhie ibude na ne iran. 3 Adeghẹ ọmwaikọmwa na gha ma emwa emwi ọvbehe nọ lughaẹn ne imamwaemwi nọ maan* nọ ke obọ Enọyaẹnmwa e Jesu Kristi rre, ra deghẹ emwi nọ ma emwa ẹre i re emwi nọ rhie igiọdu ne ọmwa ya rhiegbe ye ugamwẹ Osanobua, 4 te itengbemu rhu ọmwa vberriọ aro, ọ ma vbe rẹn emwi rhọkpa. Na gha muan ẹmwẹ kevbe na gha si ukankan ye ẹmwẹ ọre iwinna nọ muẹn. Te avbe emwi vbenian si igbọvo, okhọn, ọtakhọ* kevbe idandan nẹi maan na mu. 5 Ọ vbe ya emwa ne ekhọe iran ma huan, ni fi iyeke gbe ẹmwata muan ẹmwẹ ye emwi nọ ma sẹ emwi vbe ẹghẹ hia, iran ghi gha roro ẹre wẹẹ, ugamwẹ Osanobua keghi re na ya gualọ ọghe enegbe ọmwa. 6 Ọghe ne ẹmwata, ere gẹdẹgbẹ wa rrọọ deghẹ ọmwa na rhiegbe ye ugamwẹ Osanobua, sokpan ne emwi nọ mwẹ sẹ ọre ọkẹn. 7 Ma ma rhie emwi rhọkpa rrie agbọn na, amaiwẹ te ima khian rhie emwi rhọkpa kẹ ladian. 8 Nọnaghiyerriọ, ma gha miẹn evbare re,* ma na vbe miẹn ukpọn rhuan,* ọ ghi wa sẹ ima ọkẹn.

9 Sokpan, iran ni hoo ne iran fe, keghi de ye edanmwẹ kevbe ifi, iran ghi vbe gha fuẹn vbe uwu emwi ni ma khianrẹn kevbe ni rhie ikuanegbe ne ọmwa; ọfuan kevbe oguọghua ẹre ọ kẹrikian. 10 Rhunmwuda, ahoẹmwẹ igho keghi si emwi dan ughughan, ẹmwẹ na gha mwẹ ọnrẹn mu emwa eso sẹrriọ wẹẹ, te iran ghi fi iyeke gbe iyayi, iran na ghi ya obalọ nibun solo egbe iran rua.

11 Vbọrhirhighayehẹ, wẹ ne ọmwa Osanobua, lẹẹ ne avbe emwi na hia. Sokpan, hia vbe odẹ ke odẹ ne u gha ru emwi esi, ne u rhiegbe ye ugamwẹ Osanobua, ne u vbe gha mwẹ amuẹtinyan, ahoẹmwọmwa, kevbe izinegbe, u ghi vbe fu. 12 Gha gbinna igbinna esi ọghe amuẹtinyan; u ghi dobọ mu arrọọ ọghe etẹbitẹ na tie ruẹ yi, nọ vbe re emwi ne u ya wewe ẹsẹsẹmwẹse vbe idagbo sirra osẹ nibun.

13 Vbe odaro Osanobua nọ zẹe ighẹ emwi hia rrọọ, kevbe odaro e Kristi Jesu nọ sirra emwa sẹ osẹ ẹsẹsẹmwẹse ye emwi nọ yayi vbe odaro e Pọntiọs Pailet, ẹre I na yi iyi na nuẹn, 14 ne u gha lele avbe uhi na vbe odẹ nai kpa itan yi, u ghi vbe gha re nẹi mwẹ ozan zẹvbe ne u ya lelẹe, a te miẹn wẹẹ Enọyaẹnmwa e Jesu Kristi rhie ẹtin ẹnrẹn ma. 15 Irẹn nii nọ mwẹ oghọghọ, ne irẹn ọkpa vbe re Enọ Khaevbisẹ gha rhie ẹre ma vbe ẹghẹ na mwamwa yọ. Irẹn ọre Ọba nọ sẹ ọba, Ogie nọ sẹ ogie,* 16 irẹn ọkpa ọre nẹi sẹtin wu, nọ rre uwu ukpa nai sẹtin sẹ, ne ọmwa rhọkpa ma he miẹn ẹdẹ, a i khian vbe sẹtin ya aro kaan rẹn. Ọghọ kevbe ẹtin etẹbitẹ ọre ọghẹe. Isẹ.

17 Tama iran* ni fe vbe agbọn na,* ne iran ghẹ gha tọn egbe mu, ne iran ghẹ vbe mu ẹtin yan ẹfe ọghe iran nọ mu yo mu rre, sokpan, ne iran mu ẹtin yan Osanobua nọ kpemehe emwi hia ne ima rri orhiẹnrhiẹn ọnrẹn wọrhọwọrhọ. 18 Tama iran ne iran gha ru emwi nọ maan, a ghi vbe rẹn iran ye emwi esi na ru, we ne iran gha zẹ emwi obọ,* iran ghi vbe mu egbe ne iran ya ghae emwi ne iran mwẹ ne emwa ọvbehe. 19 Odẹ vberriọ, te iran khuan khẹ agbọn nọ maan nọ dee vbe odaro, ne iran mieke na dobọ mu arrọọ ọghe ẹmwata.

20 Timoti, ya obọ daeyi ẹse, emwi na ka yọ ruẹ obọ. Gban egbe ne avbe ẹmwẹ nọ ma khianrẹn nọ gbodan ghee emwi nọhuanrẹn, kevbe avbe imamwaemwi ohoghe ne emwa tie ẹre “irẹnmwi.” 21 Rhunmwuda ne emwa eso na gha ya irẹnmwi vberriọ ghagha, iran keghi dele kua vbe odẹ iyayi.

Te Osanobua gha ru ẹse ne kpataki* nuẹn.