EBE NOGIEVA NA GBẸN GIE IVBI E TẸSALONAIKA

1 E Pọl, e Silvenọs* kevbe Timoti giotuẹ iko nọ rre Tẹsalonaika, ni gu Osanobua ne Erha mwa kevbe Enọyaẹnmwa e Jesu Kristi rrọọ vbe akugbe:

2 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.

3 Ẹghẹ hia ẹre ima ya kpọnmwẹ Osanobua ne uwa etẹn. Emwi nẹi mwẹ a ma ru nọ, rhunmwuda, te amuẹtinyan ọghe uwa wa wegbe yọ, erriọ ẹre ahoẹmwọmwa ne dọmwadẹ ọghẹe vbe uwu uwa mwẹ ne egbe vbe ya muan yọ. 4 Ọni ẹre ọ si ẹre ne ima na ya uwa hio vbe uwu ẹbu iko ọghe Osanobua, rhunmwuda ne uwa na mwẹ izinegbe kevbe amuẹtinyan, agharhemiẹn wẹẹ, wa miẹn* ukpokpo kevbe ọlọghọmwa* ughughan. 5 Ọna ọre osẹ nọ rhie ẹre ma wẹẹ, ohiẹn ẹmwata ẹre Osanobua bu. Rhunmwuda ọna, a gha ka uwa ba emwa nọ khẹke nọ la Arriọba Osanobua, nọ re emwi ne uwa rri oya ba na.

6 Ohiẹn ne Osanobua buru na keghi re ọghe ata, rhunmwuda, te irẹn khian ya agbọn lọghọ emwa ni ya agbọn lọghọ uwa. 7 Sokpan, wa ni rri oya na, gha khian ne egbe rọkhọe, ke uwa kevbe ima, vbe ẹghẹ ne Enọyaẹnmwa e Jesu gha ya ke ẹrinmwi rhiegbe ma, ke irẹn kevbe avbe odibo ọghẹe ni mwẹ ẹtin, 8 vbe uwu ogidi erhẹn. Ẹghẹ nii, ọ ghi rri emwa ni ma rẹn Osanobua oya, kevbe iran ni ma miẹn ọnrẹn yi ighẹ ikporhu iyẹn nọ maan na kpee re vbekpa Enọyaẹnmwa e Jesu. 9 A gha bu ohiẹn gbe iran na, oya ne iran khian re ọre ọfuan ọghe etẹbitẹ, a ghi wannọ iran hin ehe ne Enọyaẹnmwa ye rre, kevbe ehe ne ẹtin ẹnrẹn nọkhua ye rre. 10 Ẹghẹ ne Enọyaẹnmwa gha ya rre, a gha mu uyi ye ọre egbe, ke irẹn kevbe emwa rẹn ni huanrẹn, emwa hia ni mu ẹtin yan rẹn ghi gha rhie uyi nẹẹn vbe ẹdẹ ne ẹdẹrriọ. Wa gha vbe deba iran, rhunmwuda, ne uwa na ya emwi ne ima tama uwa yi.

11 Ọna ẹre ọ si ẹre ne ima na na erhunmwu ne uwa vbe ẹghẹ hia, ne Osanobua mwa ka uwa ye emwa ni sẹ ne irẹn gha tie, ọ ghi vbe ya ẹtin ẹnrẹn ru emwi nọ maan hia nọ hoo nọ ru ne uwa, ne iwinna hia ne uwa ya amuẹtinyan ru vbe dinna odẹ. 12 Te ima na erhunmwu na, na mieke na la egbe uwa rhie uyi ye eni Enọyaẹnmwa e Jesu, kevbe na vbe lekpa ẹre mu uyi ye uwa egbe, rhunmwuda ẹse ne kpataki* ọghe Osanobua mwa kevbe ọghe Enọyaẹnmwa e Jesu Kristi.

2 Vbọrhirhighayehẹ, etẹn, vbe nọ dekaẹn urremwẹ ọghe Enọyaẹnmwa e Jesu Kristi, kevbe na khian na vbe si ima koko ba ẹre, ma rinmwian uwa, 2 ne uwa ghẹ gi odẹ ne uwa ya roro emwi rherhe wa gha lighi ye uwa aro, ra ne uwa gha fian afianma deghẹ emwa na kha wẹẹ, ẹdẹ ọghe Jehova* rre nẹ. Ọ gha kẹ, iran sẹtin kha wẹẹ, obọ Osanobua* ẹre ẹmwẹ ne iran ta ke rre, a sẹtin vbe miẹn wẹẹ, te iran wa ya unu tae kẹkan, wa sẹtin vbe miẹn ọnrẹn tie vbe ebe ne iran gbẹn, ọ ghi yevbe na miẹn wẹẹ ima ẹre ọ gbẹn ọnrẹn.

3 Wa ghẹ gi ọmwa rhọkpa la odẹ ke odẹ mu uwa rẹrẹ,* rhunmwuda, ẹdẹ nii i khian rre, vbe ẹ i re te isọtẹ* nii ka sunu nẹ, a ghi vbe do rẹn ọmwa nii nẹi lele uhi, ọni ọre ovbi ọfuan. 4 Ọ keghi gbodan ghee emwi hia ne emwa ghi tie ẹre osa nẹ kevbe emwi hia ne emwa ghi gho nẹ, ọ ghi mu egbe ẹre ye ukpo nọ yo sẹ ọghe iran, sẹrriọ wẹẹ, ọ ghi tota ye ọgua ọghe Osanobua, ọ ghi gha ru vbe na miẹn wẹẹ osa ẹre irẹn khin. 5 I ka gha ta ẹmwẹ na ma uwa vbe I ghaa rre ehe ne uwa ye, ra te uwa ghi mianmian ra?

6 Nian, te uwa ghi rẹn emwi nọ he da ọmwa nii obọ yi, nọ zẹe ighẹ a ma he rẹn ọnrẹn nian, vbe ẹ i re te ọ sẹ ẹghẹ ọre nẹ. 7 Vbene ẹmwata, isọtẹ nii fẹko khian nẹ vbe uwu obọ vbene ọ ma na he wa vẹ ne emwa rẹn, sokpan, ẹ i khian he dewarorua nian, vbe ẹ i re te ọmwa nii nọ de gbe ẹre odẹ lahin odẹ rre nẹ. 8 Ẹghẹ nii, ọmwa isọtẹ nii ghi do vẹ na rẹn, ọni ọre ọmwa ne Enọyaẹnmwa e Jesu gha ya ẹmwẹ ne unu ẹnrẹn* wabọ ọre rua, ọ ghi vbe yae khian otọ nọ gbẹvbi vbe ẹghẹ ne irẹn gha ya rre. 9 Sokpan, Setan ẹre ọ loo ọmwa isọtẹ nii, ọ ghi yae gha winna iwinna ọyunnuan ughughan nọ ya mu emwa rẹrẹ, 10 ọ ghi gha loo erẹrẹ dan ughughan ne iran ni khian fuan; ibuohiẹn na khian rhie ne iran na khin, rhunmwuda, iran ma rhan obọ miẹn ẹmwata yi rhunmwuda ne ẹmwata i na yẹẹ iran. Iran kpa ru vberriọ, te iran gha te miẹn fan. 11 Ọni ẹre ọ si ẹre ne Osanobua na sẹ iran rae, na mu iran rẹrẹ, ne iran mieke na ya ohoghe yi. 12 Ẹghẹ nii, a ghi bu ohiẹn iran hia, rhunmwuda, iran ma ya ẹmwata yi, sokpan, emwi dan ẹre ọ ghaa yẹẹ iran.

13 Sokpan, ẹ i mwẹ ima ma kpọnmwẹ Osanobua ne uwa vbe ẹghẹ hia, etẹn mwẹ ne Jehova* hoẹmwẹ ọnrẹn, rhunmwuda, ke otọ gha dee, ẹre Osanobua ya zẹ uwa, nọ mieke na miẹn uwa fan, lekpa nọ na ya orhiọn rẹn kpe uwa huan kevbe ne uwa na ya ẹmwata yi. 14 Iyẹn nọ maan ne ima kporhu ẹre ma uwa ẹre Osanobua ya tie uwa ye ọna, ne uwa mieke na gha mwẹ uyi ọghe Enọyaẹnmwa e Jesu Kristi. 15 Nọnaghiyerriọ, etẹn, wa mudia gbain, ne uwa ye daeyi ighẹ ilele na ma uwa ẹre, ọre ne ima ya ẹmwẹ ne unu ta nọ, ra ne ima gbẹnnẹ ye ebe gie uwa. 16 Yevbesọni, Osanobua ne Erha mwa hoẹmwẹ ima, ọ vbe rhie ifuẹko ọghe etẹbitẹ ne ima, ọ na vbe ya ima gha mwẹ emwi nọ maan ne ima ya aro yi, lekpa ẹse ne kpataki* nọ ru ne ima. Te irẹn kevbe Enọyaẹnmwa e Jesu Kristi tobọre 17 gha fu uwa ẹko rre, iran ghi vbe ya uwa deziẹn,* ne emwi ne uwa ru kevbe ẹmwẹ ne uwa ta mieke na gha re nọ maan.

3 Vbe okiekie ehia, etẹn, wa gha na erhunmwu ne ima, ne ẹmwẹ ọghe Jehova* mieke na gha vẹwae yọ ẹgiẹgiẹ, emwa ghi vbe gha ya ọghọ rhan obọ miẹn ọnrẹn yi, zẹvbe ne uwa vbe ru ẹre. 2 Wa vbe gha na erhunmwu, ne Osanobua miẹn ima fan vbe obọ emwa dan ne ekhọe iran wegbe, rhunmwuda, emwa hia i khian sẹtin gha mwẹ amuẹtinyan. 3 Sokpan, ọmwa nọ gia mu ẹtin yan ẹre Enọyaẹnmwa khin, ọ gha ya uwa wegbe, ọ ghi vbe gbaroghe uwa, ne obọ ọmwa dan nii ghẹ gba uwa. 4 Yevbesọni, zẹvbe erhuanegbe Enọyaẹnmwa ne ima hia khin, ma mwẹ ilẹkẹtin wẹẹ, wa wa ru emwi hia ne ima tama uwa, kevbe wẹẹ, te uwa khian ye gha ru ẹre khian. 5 Enọyaẹnmwa nọ lahọ nọ ye gha dia ekhọe uwa, ne uwa miehe na hoẹmwẹ Osanobua, ne uwa vbe gha mwẹ izinegbe, ne uwa miehe na sẹtin gha lele Kristi khian.

6 Nian etẹn, ma ya eni Enọyaẹnmwa e Jesu Kristi tama uwa, ne uwa gban egbe ne ọtẹn ke ọtẹn nọ yin pirhipirhi, nẹi ya ilele* ne ima rhie yotọ ne uwa* ru emwi. 7 Wa tobọ uwa rẹn emwi ne uwa gha ru ne uwa ya ya egbe taa ima, rhunmwuda, ma ma gha yin pirhipirhi vbe ima rre ehe ne uwa ye, 8 ma ma vbe rri evbare ọmwa rhọkpa vbe ọghe ọhẹ.* Sokpan, asọn vbe avan ẹre ima ya gha winna, ma na vbe gha miẹn ẹsọn, ne ima ghẹ mieke na khian ihẹ ne uwa rhọkpa. 9 Ẹ i re te ima i te mwẹ asẹ ne ima khian ya ru vberriọ, sokpan, te ima ghaa hoo ne ima rhie igiemwi esi yotọ ne uwa, ne uwa gha lele. 10 Uhiẹn, vbe ẹghẹ ne ima na gha rre ehe ne uwa ye, ẹghẹ hia ẹre ima ya gha tama uwa wẹẹ: “Ọmwaikọmwa nọ ma hoo nọ winna, we nẹ ghẹ rri evbare.” 11 Ma họn wẹẹ, eso vbe uwu uwa wa yin pirhipirhi, iran i ghi zẹdẹ ya obọ ru hiehie, sokpan, emwi nọ ma kaan iran ẹre iran fi ukpẹ yi. 12 Ma ya eni Enọyaẹnmwa e Jesu Kristi bu emwa vberriọ ude, ne iran fẹko gbe ọghe iran ye egbe, ne iran gha winna, ne iran miehe na rri ere okhuan ne iran khuaẹn.

13 Nọ ne uwa etẹn, wa ghẹ gi egbe emwi esi na ru wọọ uwa. 14 Sokpan, adeghẹ ọmwa rhọkpa rrọọ nọ ma lele ẹmwẹ ne ima tae vbe ebe ne ima gbẹn gie uwa na, wa yi ọmwa vberriọ ẹro, ne uwa ghẹ ghi gu ẹre mu obọ, ne ekhue egbe ẹre mieke na gha muẹn. 15 Ọrheyerriọ, wa ghẹ ya eghian so ẹre, sokpan, wa ye gha bu ẹre ude zẹvbe ọtẹn.

16 Te Enọyaẹnmwa ọghe ọfunmwegbe gha tobọre rhie ọfunmwegbe ne uwa vbe emwi hia, ọ ghi vbe gha ru ọna vbe ẹghẹ hia. Enọyaẹnmwa gu uwa hia rrọọ.

17 Mẹ ne Pọl giotuẹ uwa, mẹ tobọ mwẹ ẹre ọ ya obọ mwẹ gbẹn ọnrẹn. Erriọ ẹre I ya gbẹn ebe mwẹ hia, ne uwa mieke na rẹn wẹẹ imẹ ẹre ọ gbẹn ọnrẹn.

18 Te Enọyaẹnmwa e Jesu Kristi gha ru ẹse ne kpataki* ne uwa hia.