EBE NOKARO NA GBẸN GIE IVBI E TẸSALONAIKA

1 E Pọl, e Silvenọs* kevbe Timoti giotuẹ iko nọ rre Tẹsalonaika, ni gu Osanobua ne Erha mwa kevbe Enọyaẹnmwa e Jesu Kristi rrọọ vbe akugbe:

Te uwa gha miẹn ẹse ne kpataki* kevbe ọfunmwegbe nọ ke obọ Osanobua rre.

2 Ẹghẹ hia ẹre ima ya kpọnmwẹ Osanobua vbe ima ghaa so eni uwa hia vbe erhunmwu, 3 rhunmwuda, ẹghẹ hia ẹre ima ya ye ẹre rre vbe odaro Osanobua ne Erha mwa ighẹ iwinna esi ọghe uwa, ẹsọn ne uwa miẹn rhunmwuda ahoẹmwọmwa ne uwa mwẹ, kevbe izinegbe ne uwa mwẹ rhunmwuda ne uwa na mu ẹtin yan Enọyaẹnmwa e Jesu Kristi. 4 Etẹn ne Osanobua hoẹmwẹ ọnrẹn, ma rẹnrẹn wẹẹ Osanobua zẹ uwa nẹ, 5 rhunmwuda, ẹ i wa re ẹmwẹ ne unu ọkpa ẹre ima ya kporhu iyẹn nọ maan ma uwa, sokpan, ẹtin ẹtin ẹre ima ya kporhu ẹre, orhiọn nọhuanrẹn na vbe ru iyobọ; wa na vbe bẹghe ẹre wẹẹ, ma tobọ ima vbe ya ẹmwẹ ne ima ghaa ta yi, zẹvbe ne uwa vbe rẹn vbene ima ya gha yin hẹ rhunmwuda uwa, vbe ẹghẹ ne ima na gha rre ehe ne uwa ye. 6 Wa na do gha ya egbe taa ima kevbe Enọyaẹnmwa, lekpa ne uwa na ya oghọghọ ne orhiọn nọhuanrẹn rhie ne ọmwa miẹn ẹmwẹ Osanobua yi, agharhemiẹn wẹẹ, wa ghaa rre uwu ọlọghọmwa, 7 sẹrriọ wẹẹ, wa na do gha re igiemwi esi ne emwa iyayi hia ni rre Masẹdonia kevbe Akeya.

8 Gberra wẹẹ, wa ya ẹmwẹ ọghe Jehova* wewe vbe Masẹdonia kevbe Akeya, amuẹtinyan ọghe uwa keghi vbe re na họn ẹmwẹ ọnrẹn vbe ehe hia, sẹrriọ wẹẹ, ma i ghi mwẹ ẹmwẹ ọvbehe ne ima khian ghi ta. 9 Iran tobọ iran wa vbe tae khian, vbene ima ya miẹn uwa hẹ vbe ẹghẹ okaro kevbe vbene uwa ya kie werriegbe hẹ vbe ẹbọ ne uwa ga, do gha ga Osanobua ọghe ẹmwata nọ rrọọ, 10 kevbe ne uwa na vbe do gha mudia khẹ Ovbi ẹre nọ ke ẹrinmwi rre, ne irẹn huẹn kpaegbe vbe idin; ọni ọre Jesu, nọ re ọmwa nọ miẹn ima fan vbe izohu nọ dee.

2 Etẹn, wa tobọ uwa rẹnrẹn wẹẹ, emwi nibun wa ke otuẹ ne ima mu rre ladian. 2 Agharhemiẹn wẹẹ ima ka rri oya kevbe wẹẹ, a vbe ru ima emwi oya vbe Filipai zẹvbe ne uwa rẹnrẹn, ma keghi ya udinmwẹ bu uwa gha dee do kporhu iyẹn nọ maan ọghe Osanobua ma uwa, rhunmwuda ne Osanobua na rhie ẹtin ne ima; vbe uwu ena hia, te emwa wa kakabọ gha gbe ima odan.* 3 Rhunmwuda, ibude ne ima rhie ne uwa i re ọghe dan, ẹ i re nọ ma huan ra ọghe erẹrẹ, 4 sokpan, te ima guan zẹvbe emwa ne Osanobua zẹ nọ gha kporhu iyẹn nọ maan. Rhunmwuda ọni, ẹ i re emwi nọ gha yẹẹ emwa nagbọn ẹre ima ta, sokpan, emwi nọ gha yẹẹ Osanobua nọ ghee ekhọe ẹre ima ta.

5 Vbene ẹmwata, wa rẹnrẹn wẹẹ, ọ ma mwẹ ẹghẹ ọkpa ne ima ya ba gha tian uwa, ma ma vbe ba ru vbene a miẹn wẹẹ ima maan gbe, ne ima mieke na miẹn emwi vbe obọ uwa; Osanobua ọre osẹ ọghe ima! 6 Ma ma vbe hoo ne ọmwa rhọkpa tian ima, ọre uwa nọ, ra emwa ọvbehe; zẹvbe ukọ ọghe Kristi ne ima khin, ma gha te sẹtin mu ihẹ egbe ima yan uwa. 7 Nọghayayerriọ, ma keghi do khian emwa ni fu vbe uwu ẹbu uwa, zẹvbe ne iye ọmọmọ ya gbaroghe ivbi ẹre.* 8 Rhunmwuda agiẹngiẹn ne ima mwẹ daa uwa, ma keghi wa mu egbe ne ima ya* kporhu iyẹn nọ maan ọghe Osanobua ma uwa, uhiẹn, ma na vbe mu egbe ne ima ya ya ẹdagbọn ima ru iyobọ ne uwa, rhunmwuda ne ima na hoẹmwẹ uwa ẹsẹse.

9 Etẹn, ẹ i mwẹ uwa ma yerre vbene ima ya winna kevbe vbene ima ya miẹn ẹsọn hẹ. Asọn vbe avan, ẹre ima ya gha winna, ne ima ghẹ do khian ihẹ ne uwa rhọkpa, vbe ẹghẹ ne ima ya gha kporhu iyẹn nọ maan ọghe Osanobua ma uwa. 10 Wa ọre osẹ ọghe ima vbene Osanobua vbe re osẹ ọghe ima, wa rẹnrẹn wẹẹ, ma ma beghe vbe ẹdẹ ọkpa vbe ima rre ehe ne uwa ne emwa iyayi ye, uyinmwẹ esi kevbe uyinmwẹ nẹi mwẹ abe ẹre ima ghaa yin. 11 Wa rẹnrẹn wẹẹ, obọ ne erha ya mu ivbi ẹre, ẹre ima ya gha mu uwa. Ma kegha rhie ibude ne uwa, ma na gha fu uwa ẹko rre, ma na vbe gha ma edọmwadẹ ọghẹe vbe uwu uwa emwi, 12 ne uwa mieke na gha yin zẹvbe nọ yẹẹ Osanobua, nọ re ọmwa nọ tie uwa gha die Arriọba ọghẹe, kevbe ne uwa do ghae vbe uyi ẹre.

13 Uhiẹn, ọna ẹre ọ si ẹre ne ima na vbe kpọnmwẹ Osanobua vbe ẹghẹ hia, rhunmwuda, vbe ẹghẹ ne ima ya do ta ẹmwẹ Osanobua ma uwa, wa keghi miẹn ọnrẹn yi zẹvbe ẹmwẹ Osanobua nọ gele khin, ẹ i re zẹvbe ẹmwẹ ọghe emwa nagbọn; ẹmwẹ Osanobua na, ẹre ọ vbe winna vbe ẹdagbọn uwa ne emwa iyayi. 14 Etẹn, wa keghi do gha ya egbe taa iko ọghe Osanobua ni rre Judia, ni gu e Kristi Jesu rrọọ vbe akugbe, rhunmwuda, wa keghi rri oya vbe obọ ivbi ẹvbo uwa, egbe oya ne iran vbe re nian vbe obọ Ivbi e Ju. 15 Uhiẹn, iran na ẹre ọ gbe Enọyaẹnmwa e Jesu rua kevbe avbe akhasẹ, iran ẹre ọ vbe gha zẹ ima kpokpo. Yevbesọni, emwi ne iran ru i yẹẹ Osanobua, ẹ i vbe mwẹ iyobọ nọ ye ne ọmwa rhọkpa, 16 rhunmwuda, iran keghi hia ne iran da ima obọ yi, ne ima ghẹ ghi tama ivbi agbẹnvbo ọvbehe, emwi nọ gha ya iran miẹn fan. Rhunmwuda ọni, ẹghẹ hia ẹre orukhọ ọghe iran ghi ya vuọn sẹ ukpẹ. Sokpan, izohu Osanobua rhurhẹ yan iran nẹ.

17 Etẹn, vbe ẹghẹ ne ima ya sẹ uwa rae vbe ovbi ẹghẹ kherhe (orhiọn ima wa ye gha rre evba, agharhemiẹn wẹẹ ima i ghi gu uwa rre evba), ma keghi hia vbe odẹ ke odẹ ne ima do miẹn uwa aro, rhunmwuda ne ẹmwẹ uwa na gha da ima. 18 Ọni ẹre ọ si ẹre ne ima na gha hoo ne ima bu uwa gha dee, uhiẹn, igba eva ẹre imẹ ne Pọl te vbe hia ne I rre; sokpan, Setan keghi mu idobo yọ. 19 De emwi ne ima ya aro yi, ra nọ ya ima sọyẹnmwẹ, ra nọ re ẹde ne ima khian ya hio vbe odaro Enọyaẹnmwa e Jesu vbe ẹghẹ nọ gha ya rre? Ẹ i re uwa nọ? 20 Vbene ẹmwata, wa ọre uyi nọ rre ima egbe, wa ẹre ọ vbe re ọyẹnmwẹ nọ sẹ ima.

3 Ugbẹnvbe ima ma ghi sẹtin zin egbe, ma na ghi wẹẹ, ọ gha wa maan sẹ ne ima ọkpa ye gha rre Atẹns; 2 ẹre ima na ghi gie Timoti ne ọtẹn ima, nọ vbe re ọguọmwadia Osanobua* nọ kporhu iyẹn nọ maan vbekpa e Kristi, nọ bu uwa gha dee, nọ do rhie ẹtin ye uwa iwu,* nọ vbe fu uwa ẹko rre, ne amuẹtinyan ọghe uwa mieke na wegbe, 3 ne ọmwa rhọkpa ghẹ mieke na beghe, rhunmwuda avbe ọlọghọmwa na. Wa tobọ uwa rẹnrẹn wẹẹ, ẹ i mwẹ ima ma ya egbe miẹn avbe emwi vbenian.* 4 Rhunmwuda, vbe ẹghẹ ne ima na gha rre ehe ne uwa ye, ma na gha tama uwa yotọ wẹẹ, ma gha ya egbe miẹn ọlọghọmwa; wa rẹnrẹn wẹẹ, ọni ẹre ọ wa re emwi nọ sunu zẹẹ. 5 Ọni ẹre ọ si ẹre na na miẹn wẹẹ, ugbẹnvbe I ma ghi sẹtin zin egbe, I keghi gie Timoti bu uwa gha dee, nọ do ghee vbene amuẹtinyan ọghe uwa ghi vbe ye hẹ, a i rẹn deghẹ ọmwa nii Nọ Danmwẹ Ọmwa danmwẹ uwa nẹ, ne ẹsọn ne ima miẹn ghẹ do khian nọ dihoi rua.

6 Sokpan, vbene a wa guan na, e Timoti ke ehe ne uwa ye bu ima gha dee nẹ, ọ vbe na iyẹn esi ma ima nẹ vbekpa amuẹtinyan kevbe ahoẹmwọmwa ne uwa mwẹ; ọ vbe gi ima rẹn wẹẹ, wa wa ye ima rre vbe ẹghẹ hia, kevbe wẹẹ, wa hoo ne uwa miẹn ima, zẹvbe ne ima vbe hoo ne ima miẹn uwa. 7 Etẹn, ọni ẹre ọ si ẹre na na miẹn wẹẹ, vbe uwu ibavbaro kevbe ọlọghọmwa hia ne ima ye, ẹko wa fu ima rre rhunmwuda uwa kevbe rhunmwuda amuẹtinyan ne uwa rhie ma. 8 Rhunmwuda, ma gha họn wẹẹ, wa ye mudia ẹse vbe odẹ ọghe Enọyaẹnmwa, orhiọn ghi werriegbe la ima iwu. 9 Ma gha zẹ unu ga egbe, ẹ i sẹ ima ya kpọnmwẹ Osanobua ye ọyẹnmwẹ nọ sẹ ima vbe odaro Osanobua mwa rhunmwuda uwa. 10 Asọn vbe avan ẹre ima ya ya ekhọe hia rinmwian Osanobua, nọ gi ima sẹtin do miẹn uwa aro, ne ima vbe sẹtin ru iyobọ nọ khẹke ne uwa, ne amuẹtinyan ọghe uwa mieke na wegbe.

11 Erhunmwu ne ima na ọre ne Osanobua ne Erha mwa tobọre kevbe Enọyaẹnmwa e Jesu kie odẹ ne ima, ne ima sẹtin bu uwa gha dee. 12 Yevbesọni, ma na erhunmwu ne Enọyaẹnmwa gi ahoẹmwọmwa ne uwa mwẹ ne egbe kevbe ne uwa mwẹ ne emwa hia gha mu otọ yọ, zẹvbe ne ima vbe hoẹmwẹ uwa ẹsẹse, 13 nọ mieke na ya ekhọe uwa khian enọ deziẹn, wa ghi vbe gha re nẹi mwẹ orra, kevbe nọhuanrẹn vbe odaro Osanobua ne Erha mwa vbe ẹghẹ ne Enọyaẹnmwa e Jesu gha ya rre, ke irẹn kevbe emwa rẹn hia ni huanrẹn.

4 Vbe okiekie ehia etẹn, wa ruẹ ọre nẹ vbe obọ ima, vbene ọ khẹke ne uwa ya gha yin vbe odẹ nọ yẹẹ Osanobua; erriọ ẹre uwa wa gele ru ẹre. Nọnaghiyerriọ, ma ya eni Enọyaẹnmwa e Jesu rinmwian uwa, ne uwa ye gha ru ẹre sayọ. 2 Rhunmwuda, wa rẹn emwi ne ima ma uwa ẹre* vbe eni Enọyaẹnmwa e Jesu.

3 Emwi ne Osanobua hoo ọre wẹẹ, ne uwa gha re nọhuanrẹn kevbe ne uwa lẹẹ ne alama oghẹ.* 4 Te ọ khẹke ne dọmwadẹ ọghẹe vbe uwu uwa rẹn vbene ọ ya da egbe ẹre yi hẹ, ne uwa mieke na gha re emwa ni huanrẹn kevbe ni mwẹ uyi; 5 ọ ma khẹke ne uwa gha ya arovbẹmwẹ fifi ye emwi ọdọ vbe amwẹ, vbene emwa ni rre uwu agbọn ni ma rẹn Osanobua ru ẹre. 6 Ọ ma khẹke ne ọmwa rhọkpa khian gberra uwu, ra nọ gbe ọtiọnrẹn miẹn ọnrẹn emwi* vbe nọ dekaẹn ẹmwẹ na, rhunmwuda, emwa hia ni mwẹ obọ vbe avbe emwi na hia, e Jehova* gha rri iran oya. Ma ka ta ẹmwẹ na ma uwa nẹ, ma na vbe kakabọ ya obọ sekhae ne uwa. 7 Rhunmwuda, Osanobua ma tie ima ne ima do gha yin uyinmwẹ osọnnọ, sokpan, te ọ tie ima ne ima do gha yin uyinmwẹ nọhuanrẹn. 8 Nọnaghiyerriọ, ọmwaikọmwa nọ ma ka ẹmwẹ na yọ, Osanobua nọ rhie orhiọn nọhuanrẹn ọghẹe ne uwa, ẹre ọmwa nii ma ka yọ, ẹ i re ọmwa nagbọn.

9 Vbọrhirhighayehẹ, ẹ i re eban ẹre ima khian ghi do gha gbẹnnẹ ebe gie uwa vbe nọ dekaẹn vbene uwa khian ya gha hoẹmwẹ egbe hẹ zẹvbe etẹn, rhunmwuda, Osanobua tobọre ma uwa ẹre nẹ, vbene uwa khian ya gha hoẹmwẹ egbe hẹ. 10 Vbene ẹmwata, obọ vberriọ ẹre uwa ya mu etẹn hia ni rre Masẹdonia. Sokpan, te ima ghi rhie igiọdu ne uwa nian etẹn, ne uwa ye gha ru ẹre sayọ. 11 Wa hia vbe odẹ ke odẹ ne uwa fẹko gha ru ọghe uwa khian, wa ghi gi iwinna egbe uwa mu uwa, wa ghi vbe gha ya obọ uwa winna zẹvbe ne ima tama uwa, 12 ne emwi ne uwa ru mieke na gha ya emwa ni rre uwu agbọn ta ẹmwẹ uwa nọ maan, ẹghẹ nii, emwi rhọkpa i khian vbee uwa.

13 Yevbesọni, etẹn, ma ma hoo ne uwa khian ogbe* vbekpa ẹmwẹ iran ni wulo nẹ,* ne uwa ghẹ do gha khiẹ vbe na ghee emwa nẹi mwẹ ayayẹro.* 14 Adeghẹ ima na gele yayi wẹẹ, Jesu wu kevbe wẹẹ ọ rhiọ kpaegbe, ọni rhie ma wẹẹ, emwa hia ni gu e Jesu rrọọ vbe akugbe ni wulo,* Osanobua gha vbe huẹn iran kpaegbe ne iran gu e Jesu gha rrọọ. 15 Rhunmwuda, ẹmwẹ ne Jehova* tae ẹre ima tama uwa na, ọni nọ wẹẹ, ma ni khian ye gha rre agbọn vbe ẹghẹ ne Enọyaẹnmwa khian ya rre i khian karo ne iran ni wulo nẹ;* 16 rhunmwuda, Enọyaẹnmwa tobọre gha ke ẹrinmwi tuorre, ọ ghi ya urhu ọkaolotu avbe odibosa tama emwa emwi ne iran gha ru, ọ ghi da okpe ọghe Osanobua yi, emwa hia ni gu e Kristi rrọọ vbe akugbe ni wulo ghi ka rhiọ kpaegbe. 17 Iyeke ọni, a ghi si ima ni rre agbọn vbe ẹghẹ nii koko ba iran gha rrie uwu okuku, ne ima ya vba Enọyaẹnmwa vbe orere iso; ẹghẹ nii, ma ghi gha gu Enọyaẹnmwa rrọọ vbe etẹbitẹ. 18 Nọnaghiyerriọ, wa gha ya ẹmwẹ na fu egbe ẹko rre.

5 Etẹn, esa i rrọọ ne I khian ya gha gbẹnnẹ ebe gie uwa vbekpa ẹdẹ kevbe ẹghẹ na mwamwa ye avbe emwi na. 2 Rhunmwuda, wa tobọ uwa wa rẹn wẹẹ, zẹvbe ne oyi rre vbe asọn, erriọ ẹre ẹdẹ ọghe Jehova* khian vbe ya rre. 3 Ẹghẹ ke ẹghẹ ne emwa khian ya gha kha wẹẹ, “Ọfunmwegbe kevbe agbẹkunsotọ!” ọfuan ọghe udomwurri ghi rhurhẹ yan iran vbe ọwara ọkpa, zẹvbe ne emwi ubiẹmwẹ ru okhuo nọ hanmwa; ọkpa i rrọọ nọ khian miẹn uhunmwu vbe uwu iran. 4 Nọ ne uwa, etẹn, wa i rre uwu ebiebi, rhunmwuda ọni, ọ ma khẹke ne ẹdẹrriọ do uwa mu, vbene ẹdẹ wan yan avbe oyi vbe udomwurri, 5 rhunmwuda, ivbi ukpa kevbe ivbi uwanmwẹ ẹdẹ, ẹre uwa hia khin. Ma i re ivbi asọn ra ivbi ebiebi.

6 Rhunmwuda ọni, ọ ma khẹke ne ima gha vbiẹ vbene emwa nikẹre ru ẹre, sokpan, wa gi ima khẹ ye egbe, ne ima vbe gha mwẹ ẹwaẹn. 7 Nọ ne iran ni vbiẹ, asọn ẹre iran ya vbiẹ, iran ni da ayọn gbe egbe, asọn ẹre iran ya da ayọn gbe egbe. 8 Sokpan, nọ ne ima ni re ivbi uwanmwẹ ẹdẹ, wa gi ima gha mwẹ ẹwaẹn, ne ima mu amuẹtinyan kevbe ahoẹmwọmwa yọ zẹvbe uhanhan ẹwẹ, ma ghi vbe ya imiẹnfan ne ima ya aro yi ru ẹrhu ematọn mu ye uhunmwu, 9 rhunmwuda, Osanobua ma zẹ ima ne irẹn rhurhẹ izohu ọghẹe yan ima, sokpan, te ọ zẹ ima ne ima miẹn imiẹnfan lekpa Enọyaẹnmwa e Jesu Kristi. 10 Te Jesu wu ne ima, ne ima mieke na sẹtin deba ẹre gha rrọọ, ọre te ima vbiẹ ra ima i vbiẹ.* 11 Nọnaghiyerriọ, wa ye gha rhie igiọdu ne egbe,* ne uwa vbe gha rhie ẹtin ye egbe iwu, zẹvbe ne uwa wa ru ẹre khian na.

12 Banbanna nian, etẹn, ma rinmwian uwa ne uwa gha rhie ọghọ ne iran ni kakabọ winna kevbe ni mu asanikaro vbe uwu ẹbu uwa vbe nọ dekaẹn iwinna Enọyaẹnmwa, iran ẹre ọ vbe bu uwa ude; 13 wa ghi gha daa ne iran ẹsẹse rhunmwuda iwinna ne iran ru, wa ghi vbe hoẹmwẹ iran. Wa gha gu egbe rrọọ vbe ọfunmwegbe. 14 Sokpan, ma rhie igiọdu ne uwa, etẹn, ne uwa gha ya obọ sekhae* ne emwa ni yin pirhipirhi, wa ghi gha ta ẹmwẹ nọ fu ọmwa ẹko rre ma iran ne iro han rẹn,* wa gha ru iyobọ ne emwa ni vburriẹ, wa ghi gha zin egbe vbe egbe emwa hia. 15 Wa ghẹ gia miẹn wẹẹ, wa ya ọkhọ ha osa ọkhọ ne ọmwa rhọkpa, sokpan, wa gha gualọ umamwẹ egbe, kevbe ọghe emwa hia vbe ẹghẹ hia.

16 Wa gha sọyẹnmwẹ vbe ẹghẹ hia. 17 Wa gha na erhunmwu vbe ẹghẹ hia. 18 Wa gha re emwa ni kpọnmwẹ ẹse vbe emwi hia. Ọna ọre emwi ne Osanobua hoo ne uwa gha ru zẹvbe erhuanegbe Kristi Jesu. 19 Wa ghẹ dọ erhẹn ọghe orhiọn nọhuanrẹn yọ. 20 Wa ghẹ gha tila ẹmwẹ akhasẹ rua. 21 Wa gha gbarokotọ vbe emwi hia, ne uwa mieke na rẹn emwi nọ khẹke; wa ghi dobọ mu emwi esi. 22 Wa gha lẹẹ ne emwi dan nọ rhirhi gha khin.

23 Te Osa ọghe ọfunmwegbe gha tobọre ya uwa khian nọhuanrẹn fẹfẹfẹ. Te ọ gha vbe ya orhiọn uwa, arrọọ* ọghe uwa kevbe egbe uwa khian nẹi mwẹ orra hiehie kevbe nẹi mwẹ okan vbe ẹghẹ ne Enọyaẹnmwa e Jesu Kristi gha ya rre. 24 Ọmwa nọ gia mu ẹtin yan ẹre ọmwa nii nọ tie uwa khin, ẹ i mwẹ ọ ma ru vberriọ.

25 Etẹn, wa ye gha mu ẹmwẹ ima ye erhunmwu.

26 Wa tuẹ etẹn hia, ne uwa vbe mu unu soso egbe zẹvbe etẹn.

27 I ya eni Enọyaẹnmwa tama uwa, ne uwa ghẹ mwẹ a ma tie ebe na ma etẹn hia.

28 Te Enọyaẹnmwa e Jesu Kristi gha ru ẹse ne kpataki* ne uwa.