EBE NA GBẸN GIE IVBI E KỌLỌSI

1 E Pọl nọ re ukọ ọghe Kristi Jesu zẹvbe nọ gua iho ọghe Osanobua ro, kevbe Timoti ne ọtẹn ima nokpia, 2 giotuẹ etẹn ni huanrẹn, ni mudia ẹse ni rre Kọlọsi, ni gu e Kristi rrọọ vbe akugbe:

Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa rre.

3 Ẹghẹ hia ẹre ima ya kpọnmwẹ Osanobua ne Erha Enọyaẹnmwa e Jesu Kristi, vbe ima ghaa na erhunmwu ne uwa, 4 rhunmwuda, ma họn wẹẹ, wa mu ẹtin yan e Kristi Jesu, ma vbe họn wẹẹ, wa hoẹmwẹ emwa ni huanrẹn hia, 5 rhunmwuda afiangbe ne uwa ya aro yi, nọ khẹ uwa vbe ẹrinmwi. Ẹghẹ na ya kporhu iyẹn nọ maan ma uwa, ọni ọre iyẹn ẹmwata ne uwa họn, ẹre uwa ya rẹn vbekpa afiangbe na ne uwa ghi do ya aro yi. 6 Zẹvbe ne iyẹn nọ maan na, na kporhu ẹre sẹ ehe ne uwa ye ya biẹ ọmọ esi vbe agbọn na kevbe zẹvbe nọ vbe ya mu otọ yọ, erriọ ẹre ọ vbe ye vbe uwu ẹbu uwa, ke ẹdẹ ne uwa ya họn vbekpa ẹse ne kpataki* ọghe Osanobua gha dee, wa na vbe do rẹn vbene ẹse nii gele ye hẹ. 7 Ọni ọre emwi ne uwa ruẹ re vbe obọ Ẹpafras, ne ọtẹn ima nọ ghaan ne ima gba re eguọmwadia e Kristi; ekhọe hia ẹre ọ ya winna ne Kristi, iwinna nọ te khẹke ne ima ru, ẹre irẹn ru. 8 Ọ vbe gi ima rẹn wẹẹ, orhiọn nọhuanrẹn wa vbe ru iyobọ ne uwa ya gha rhie ahoẹmwọmwa ma.

9 Ọni ẹre ọ si ẹre na na miẹn wẹẹ, ke ẹdẹ ne ima ya họẹn gha dee, ẹghẹ hia ẹre ima wa ya na erhunmwu ne uwa, ma ghi gha rinmwian Osanobua nọ ru iyobọ ne uwa ya rẹn emwi ne irẹn gele hoo, kevbe ne uwa vbe gha mwẹ ẹwaẹn hia kevbe irẹnmwi ne orhiọn nọhuanrẹn ọghẹe rhie ne ọmwa, 10 ne uwa mieke na gha yin vbe odẹ nọ khẹke emwa ọghe Jehova,* odẹ vberriọ, wa ghi gha ya ẹko rhiẹnrhiẹn ọnrẹn ẹsẹsẹmwẹse, zẹvbe ne iwinna nọ maan hia ne uwa ru ya biẹ ọmọ esi, kevbe zẹvbe ne uwa ya mwẹ irẹnmwi nọ gbae ọghe Osanobua sayọ; 11 te Osanobua gha vbe loo ẹtin ẹnrẹn nọ vuọn ne uyi ya ya uwa wegbe, ne uwa mieke na sẹtin ya izinegbe ya egbe miẹn emwi hia, wa ghi vbe gha sọyẹnmwẹ, 12 zẹvbe ne uwa ya kpọnmwẹ Evbavba, nọ zẹe ighẹ uwa gbegba nọ gha mwẹ oghae vbe arevbukhu ọghe emwa ni huanrẹn ni rre uwu ukpa.

13 Ọ miẹn ima fan vbe ẹtin ebiebi, ọ na viọ ima la arriọba Ovbi ẹre ne irẹn hoẹmwẹ ọnrẹn. 14 Ovbi ẹre na, ẹre ọ dẹ ima werriegbe, nọ ya fan ima vbe obọ orukhọ, ọni nọ wẹẹ, na ya orukhọ ọghe ima bọ ima. 15 Irẹn ọre ọmwa nọ kpa Osanobua nai bẹghe yotọ, irẹn ọre ọmọ ọdiọn vbe uwu emwi hia na yi; 16 rhunmwuda, obọ ẹre, ẹre Osanobua la yi emwi ni rre ẹrinmwi kevbe agbọn, avbe emwi na bẹghe kevbe nai bẹghe, ọre iran ni khaevbisẹ nọ, ra iran ni mwẹ asẹ, ra arriọba, ra iran ni rre ukpo ọdakha. Obọ ẹre, ẹre a la yi emwi hia, irẹn ẹre a vbe yi ehia na. 17 Deba ọni, irẹn rrọọ nẹ emwi hia nikẹre ke gha rrọọ, obọ ẹre, ẹre a vbe la yi emwi hia nikẹre. 18 Irẹn ọre uhunmwuta ọghe iko, nọ re egbe ẹre. Irẹn ọre omuhẹn, ọmọ ọdiọn na huẹn kpaegbe vbe idin, nọ mieke na gha re ọmwa okaro vbe emwi hia; 19 rhunmwuda, Osanobua kegha hoo ne emwi hia gba ne Ovbi ẹre. 20 Ọ vbe gha hoo ne irẹn la obọ Ovbi ẹre gu emwi hia nikẹre ru adọlọ, ke ni rre agbọn na kevbe ni rre ẹrinmwi, lekpa esagiẹn ne Ovbi ẹre da kua vbe uhunmwu erhan irrioya.*

21 Vbene ẹmwata, wa ka khian rree ne Osanobua, wa na vbe gha re eghian rẹn, rhunmwuda ne uwa na rhie ekhọe ye emwi dan na ru. 22 Sokpan, banbanna nian, irẹn keghi gu uwa ru adọlọ lekpa egbe ọghe ọmwa nii nọ wu ne uwa, ne irẹn mieke na viọ uwa gha die odaro ọre, zẹvbe emwa ni huanrẹn, nẹi mwẹ orra kevbe nẹi mwẹ okan rhọkpa vbe aro ọre. 23 Sokpan ọkpa ghi nọ, wa ye gha mwẹ amuẹtinyan, wa ghi deziẹn vbe uwu ẹyotọ nii, wa ghi vbe mudia gbain; wa ghẹ vbe beghe vbe afiangbe ne uwa ghi do ya aro yi vbe ẹghẹ ne uwa ya họn iyẹn nọ maan. Iyẹn nọ maan na, ẹre a vbe kporhu ẹre ma emwa hia ni rre otagbọn na. Iyẹn nọ maan na, ẹre a rhunmwuda ẹre zẹ imẹ ne Pọl, ne I gha kporhu ẹre.

24 Banbanna nian, ọyẹnmwẹ wa sẹ mwẹ rhunmwuda oya ne I re ne uwa; te I wa vbe ya egbe miẹn oya ọghe Kristi, I ma he ye rri oya nii sẹ, sokpan, te I khian ye gha rri oya nii rhunmwuda iko, nọ re egbe Kristi. 25 Osanobua keghi zẹ mwẹ zẹvbe ọguọmwadia nọ khian gha winna ne iko na, rhunmwuda umamwẹ uwa; nene iwinna, ọre ne I gha kporhu ẹmwẹ Osanobua ẹsẹsẹmwẹse. 26 Ẹmwẹ Osanobua ne I kporhu ẹre, keghi re ẹmwẹ oro nọhuanrẹn na rhie lẹre ke ne ẹkpo i mwẹ arria* gha dee, na vbe rhie lẹre ne emwa ni ghaa rrọọ vbe orre nẹdẹ. Sokpan, vbe ẹghẹ na nian, a wee ẹre rua ma emwa ni huanrẹn nẹ, 27 ọ kegha yẹẹ Osanobua, nọ gi iran rẹn ẹmwẹ oro nọhuanrẹn ọghe ighobioye na, vbe uwu ẹbu avbe agbẹnvbo. Ẹmwẹ oro na ọre Kristi nọ gu uwa rrọọ vbe akugbe, ọni rhie ma wẹẹ, wa gha gu ẹre ghae vbe uyi na khian mu ye ọre egbe. 28 Irẹn ẹre ima ya ẹmwẹ ọnrẹn wewe, ma ghi gha ya obọ sekhae ne emwa hia, ma ghi vbe gha ya ẹwaẹn hia ma emwa hia emwi, ne ima mieke na ya emwa hia ni gu e Kristi rrọọ vbe akugbe khian enọ gba na fo vbe odaro Osanobua. 29 Ọna ẹre ọ si ẹre ne I na miẹn ẹsọn kevbe ne I na ziga, rhunmwuda ẹtin ẹnrẹn nọ kakabọ winna vbe uwu imẹ.

2 I hoo ne uwa rẹn vbene I miẹn ẹsọn hẹ rhunmwuda uwa, kevbe rhunmwuda iran ni rre Leodisia kevbe emwa hia ni ma he rẹn mwẹ vbe aro. 2 Emwi nọ ya mwẹ miẹn ẹsọn, ọre na miehe na fu iran ẹko rre kevbe na ku iran kugbe vbe uwu ahoẹmwọmwa. Vbe odẹ vberriọ, iran ghi gha re emwa ni fe, ọni nọ wẹẹ, iran ghi gele do rẹn otọ emwi vbene iran i na bọ iro eveva, ne iran mieke na gha mwẹ irẹnmwi nọ gbae ọghe ẹmwẹ oro nọhuanrẹn ọghe Osanobua, ọni ọre Kristi. 3 Uwu irẹn ẹre a fẹko viọ emwi ighobioye hia lẹre yi, ọni ọre ẹwaẹn kevbe irẹnmwi. 4 Te I ta ẹmwẹ na ma uwa, ne ọmwa rhọkpa ghẹ do ya ẹmwẹ ẹkẹ vbe ero mu uwa rẹrẹ. 5 Agharhemiẹn wẹẹ, I i gu uwa rre ehe ne uwa ye, orhiọn mwẹ gu uwa rre evba. Ọyẹnmwẹ wa sẹ mwẹ, rhunmwuda ne I na rẹn wẹẹ, wa ru emwi ẹse, wa vbe ya ekhọe hia mu ẹtin yan e Kristi.

6 Nọnaghiyerriọ, zẹvbe ne uwa ya rhan obọ miẹn Enọyaẹnmwa e Kristi Jesu yi, wa ye gha khian lelẹe zẹvbe emwa ni gu ẹre rrọọ vbe akugbe. 7 Zẹvbe na ma uwa ẹre, wa gi inian ọghe uwa deziẹn ye uwu irẹn, wa ghi bọ ẹdagbọn uwa yan rẹn, wa ghẹ vbe beghe vbe iyayi ọghe uwa; deba ọni, wa ghi vbe gi ẹko uwa vuọn ne ekpọnmwẹ.*

8 Wa gha begbe ne ọmwa rhọkpa ghẹ ya ẹwaẹn ọghe agbọn na kevbe iziro nọ ma khianrẹn ne emwa ya rẹrẹ ọmwa, mu uwa oghunmwu.* Ena hia keghi gua ilele ọghe emwa nagbọn kevbe emwi agbọn na ro, ọ ma gua ọghe Kristi ro; 9 rhunmwuda, emwi hia na rẹn Osanobua yi, te ehia gbae vbe egbe Kristi. 10 Nọnaghiyerriọ, emwi hia gba ne uwa rhunmwuda ẹre, irẹn nii ọre uhunmwuta ọghe arriọba hia kevbe emwa hia ni rre asẹ. 11 Rhunmwuda ne uwa na ya egbe ba ẹre, ẹre uwa na vbe do khian emwa ni rhuẹ re; arhuẹ ọghe uwa i re arhuẹ ne emwa nagbọn ya obọ ru, sokpan, arhuẹ ọghe Kristi tobọre nọ, nọ ya bannọ orukhọ hin uwa egbe rre. 12 Rhunmwuda, te a ree uwa ba irẹn vbe idinmwiamẹ ọghẹe; ne uwa na vbe ya egbe ba ẹre, a keghi vbe huẹn uwa kugbe ba ẹre, rhunmwuda ne uwa na mu ẹtin yan iwinna ọyunnuan ọghe Osanobua nọ huẹn ọnrẹn kpaegbe vbe idin.

13 Yevbesọni, agharhemiẹn wẹẹ, te uwa te wulo ye uwu orukhọ ọghe uwa kevbe uwu egbe uwa na ma rhuẹ, Osanobua keghi ya uwa khian enọ ghi rrọọ, ne uwa gha gu e Kristi rrọọ vbe akugbe. Ọ keghi tohan ima, ọ na ya orukhọ hia ne ima ru bọ ima. 14 Ọ keghi khiẹn ọnrẹn rua ighẹ avbe ilele na gbẹnnẹ ye ebe, nọ te yae dewarorua wẹẹ emwa orukhọ ẹre ima khin. Ọ keghi wabọ ọre rua fẹfẹfẹ, ọ na ya kan rẹn mu erhan irrioya.* 15 Ọ keghi lekpa ẹre* bannọ avbe arriọba kevbe emwa hia ni rre asẹ ruan, ọ na viọ iran ladian idagbo, ne emwa mieke na bẹghe ẹre wẹẹ a khọnmiotọ yan iran nẹ, ọ na gha silo iran khian zẹvbe oghunmwu na munọ vbe okuo.

16 Nọnaghiyerriọ, wa ghẹ gi ọmwa rhọkpa bu ohiẹn uwa vbe nọ dekaẹn emwi ne uwa re, ra emwi ne uwa da, ra vbe nọ dekaẹn ugie ne emwa do vbe ukpukpo, ra ugie ọghe uki ọgbọn ra ọghe ẹdẹ ikẹtin. 17 Te avbe emwi na hia yevbe aghọnghọn ọghe emwi ni dee vbe odaro, sokpan, e Kristi ẹre ọ wa gele re enakha. 18 Wa ghẹ gi ọmwa rhọkpa nọ ba ru wẹẹ irẹn mu egbe rriotọ kevbe nọ mwẹ obọ vbe ugamwẹ ọghe avbe odibosa mu idobo ye uwa egbe, ne ive nii ghẹ ghi sẹ uwa obọ. Emwi ne ọmwa vberriọ bẹghe ọkpa, ẹre ọ “dayi gbangbangban,”* ọ ghi gha ya emwi nọ ma khianrẹn nọ rre ọre ekhọe rhuọ. 19 Te ọmwa vberriọ yevbe egbe nọ ma sikan mu uhunmwu; uhunmwu nii ẹre ọ mu egbe hia khian, irẹn ẹre egbe hia sikan mu, egbe na miẹn wẹẹ avbe akhuẹn kevbe emwi hia ni da akhuẹn yi kukugbe, ọ ghi do waan lekpa ẹtin Osanobua.

20 Ugbẹnvbe uwa ghi deba e Kristi wu nẹ, vbe nọ dekaẹn avbe emwi ni ma khianrẹn ọghe agbọn na, vbọ ghi zẹ ne uwa na yin vbene a miẹn wẹẹ ọghe agbọn na ẹre uwa ye khin? Vbọzẹ ne uwa na ye ya avbe iyi na ru emwi: 21 “Ghẹ da ọna yi, ghẹ ya aranmwẹ kaan ọna, ghẹ ya obọ kaan ọna”? 22 Ena keghi re emwi na gha ghi loo nẹ, iran ghi la ọrhiae rrie, ilele ne emwa nagbọn mu gbọọ kẹkan kevbe ne iran ma emwa ẹre, ẹre iran khin. 23 Agharhemiẹn wẹẹ, te avbe emwi na yevbe emwi ne ẹwaẹn ye vbe a ghaa ghee ẹre, iran keghi re ugamwẹ ne ọmwa tobọre zẹ ne egbe ẹre kevbe imuegberriotọ ọghe abawẹ, ẹki na ya obọ nọ tọn mu egbe ọmwa nọ; ena rhọkpa i mwẹ iyobọ ne iran ye vbe nọ dekaẹn na da egbe ọmwa yi vbe emwi ne egbe rriarria yi.

3 Vbọrhirhighayehẹ, adeghẹ a huẹn uwa kpaegbe ba e Kristi nẹ, wa ya egbe hia gha gualọ emwi ni rre ẹrinmwi, ọni ọre eke ne Kristi na tota ye obọ erha ọmwa ọghe Osanobua. 2 Wa rhie aro ye emwi ni rre ẹrinmwi, ẹ i re emwi ni rre agbọn na. 3 Rhunmwuda, wa wulo nẹ, a keghi vbe rhie arrọọ ọghe uwa lẹre ba e Kristi, nọ gu Osanobua rrọọ vbe akugbe. 4 E Kristi nọ re arrọọ ọghe ima gha ghi rhiegbe ladian nẹ, wa ghi vbe deba ẹre rhiegbe ladian vbe uyi ọghẹe.

5 Nọnaghiyerriọ, wa gbe ẹre rua ighẹ orriarria emwi agbọn na nọ rre egbe uwa, vbe nọ dekaẹn alama oghẹ,* uyinmwẹ osọnnọ, na na fifi ye emwi ọdọ vbe amwẹ, iba nọ zọọ vbe ẹko ọmwa, kevbe arovbẹmwẹ nọ vbe re igẹbọ. 6 Izohu Osanobua dee ne emwa ni mwẹ obọ vbe avbe emwi vberriọ. 7 Erriọ ẹre uwa tobọ uwa ka ya gha yin vbe ẹghẹ ne uwa ya gha rre uwu agbọn. 8 Banbanna nian, te uwa gha sẹ avbe emwi na hia rae: izohu, ohu, ọkhọ, ẹmwẹ ihẹn, kevbe ẹmwẹ osọnnọ nọ ke ọmwa unu ladian. 9 Wa ghẹ gha ta ohoghe ma egbe. Wa ban akpa* nẹdẹ mu fua kevbe uyinmwẹ ni lelẹe khian, 10 wa ghi mu akpa ọghe ọgbọn yọ, ọni ọre uyinmwẹ na lekpa irẹnmwi nọ gbae ya khian ọghe ọgbọn. Ẹghẹ nii, wa ghi gha yin vbe na ghee Ọmwa nọ yi uwa. 11 Vbe nọ dekaẹn akpa ọghe ọgbọn na, a i lele deghẹ Ovbi e Grik ẹre ọmwa khin ra Ovbi e Ju, deghẹ ọmwa rhuẹ re ra ọ ma rhuẹ, a i vbe lele deghẹ ọrriọvbe ẹre ọmwa khin, ra Ovbi e Sitia,* ra ọviẹn, ra ọmwa nẹi re ọviẹn; sokpan, e Kristi ẹre ọ wa re emwi hia, ọkpa ẹre ima hia vbe khin vbe aro ọre.

12 Ugbẹnvbe a miẹn wẹẹ, emwa ni huanrẹn ne Osanobua hannọ zẹ ẹre uwa khin, kevbe wẹẹ, ọ vbe hoẹmwẹ uwa, wa gha mwẹ ekhọe agiẹngiẹn, ekhọe esi, imuegberriotọ, ufumwẹ, kevbe izinegbe. 13 Wa ye gha mu emwi ne emwa ọvbehe ru wuo egbe, ne uwa gha ya ekhọe hia yabọ egbe, ọ gha khọnrẹn ne ọmwa ru emwi nọ sọnnọ uwa. Te uwa gha ya ekhọe hia yabọ egbe, zẹvbe ne Jehova* vbe ya ekhọe hia yabọ uwa. 14 Gberra ena hia, wa mu ahoẹmwọmwa yọ, rhunmwuda, ahoẹmwọmwa ẹre ọ gba emwi hia kugbe gbain.

15 Deba ọni, wa gi ọfunmwegbe ọghe Kristi gha khaevbisẹ vbe ekhọe uwa,* rhunmwuda, ọfunmwegbe nii ẹre a tie uwa ba vbe egbe ọkpa nii. Wa ghi vbe gha re emwa ni kpọnmwẹ ẹse. 16 Wa gi ẹmwẹ ọghe Kristi vuọn uwa ekhọe, nọ vbe ya uwa gha mwẹ ẹwaẹn. Wa gha ya ẹmwẹ e psalm ma egbe emwi, wa ghi vbe yae gha rhie igiọdu ne egbe,* wa ghi gha rhie urhomwẹ ne Osanobua, wa ghi gha ya ekhọe ọkpọnmwẹse so ihuan ugamwẹ,* wa ghi vbe gha so ihuan gie Jehova* vbe ekhọe uwa. 17 Emwi ne uwa rhirhi gha ru, ọre te uwa guan ra te uwa ru emwi ke emwi, wa gha ru emwi hia vbe eni Enọyaẹnmwa e Jesu, wa ghi gha la obọ ẹre rhie ekpọnmwẹ ne Osanobua ne Erha mwa.

18 Wa ne amwẹ, wa gha gbe uhunmwu kotọ ne ọdafẹn uwa, zẹvbe nọ khẹke emwa ni ya Enọyaẹnmwa yi. 19 Wa ne avbe ọdọ, wa ye gha hoẹmwẹ amwẹ ọghe uwa, wa ghẹ vbe gha mu ohu iran gberra egbe.* 20 Wa ne emọ, wa gha họn ẹmwẹ ne evbibiẹ uwa vbe emwi hia, rhunmwuda, ọna keghi ya ẹko rhiẹnrhiẹn Enọyaẹnmwa. 21 Wa ne erha emọ, wa ghẹ gha ru emwi nọ ya ohu mu ivbi uwa,* ne iro ghẹ ya han iran.* 22 Wa ne eviẹn, wa gha họn ẹmwẹ ne arowa uwa ni rre agbọn na vbe emwi hia, ẹ i re vbe iran ghaa ghee uwa ọkpa, ọghe wẹẹ, na ya ẹko rhiẹnrhiẹn emwa nagbọn,* sokpan, wa ghi gha ya ẹkoata ru ẹre, rhunmwuda imuohan e Jehova* ne uwa mwẹ. 23 Emwi ke emwi ne uwa rhirhi gha ru, wa gha ya ekhọe hia ru ẹre, vbe na miẹn wẹẹ, e Jehova* ẹre uwa ru ẹre na, ẹ i re emwa nagbọn, 24 rhunmwuda, wa rẹnrẹn wẹẹ e Jehova* ẹre ọ khian ya arevbukhu ne irẹn mwamwa yotọ san uwa ẹse. Wa gha ga e Kristi ne Arowa mwa. 25 Vbene ẹmwata, ọmwa nọ ru emwi dan, a gha vbe ha ẹre osa ye emwi dan nọ ru, rhunmwuda, obọ ọkpa ẹre Osanobua ya mu emwa hia.

4 Wa ne arowa, wa gha ya obọ nọ khẹke kevbe nọ maan mu eviẹn uwa, wa ghi yerre wẹẹ, wa tobọ uwa vbe mwẹ Arowa vbe ẹrinmwi.

2 Wa ghẹ gi egbe erhunmwu na na wọọ uwa, wa ghẹ vbe vbiẹ vbọ gha de ọghe erhunmwu na na, wa ghi vbe gha rhie ekpọnmwẹ ne Osanobua. 3 Vbene uwa na erhunmwu nii, wa ghi vbe gha na ne ima oo, ne Osanobua kie odẹ ne ima ya sẹtin ya ẹmwẹ oro nọhuanrẹn nọ dekaẹn e Kristi wewe, nọ re emwi ne imẹ rre eghan ba na. 4 Wa vbe gha na erhunmwu mẹ, ne I sẹtin yae wewe vbe odẹ nọ gha ya la ehọ, zẹvbe nọ khẹke ne I ru ẹre.

5 Wa gha ya ẹwaẹn gu emwa ni rre uwu agbọn yin, wa ghi gha loo ẹghẹ ọghe uwa ẹse. 6 Wa gi ẹmwẹ uwa gha re nọ rhiẹnrhiẹn vbe ehọ vbe ẹghẹ hia, ọ ghi gha re na ya umwẹ yi, ne uwa miehe na rẹn vbene uwa gha ya zẹ ẹmwẹ wanniẹn edọmwadẹ ọghẹe hẹ.

7 E Tikikọs ne ọtẹn mwẹ nọ ghaan, ọguọmwadia Enọyaẹnmwa ne ekhọe esi, ne ima gba koko ga Enọyaẹnmwa, gha tama uwa vbene emwi hia ghi ye mwẹ hẹ. 8 I khian gie ẹre bu uwa gha dee, ne uwa mieke na rẹn vbene emwi hia ghi vbe ye ima hẹ, kevbe nọ fu uwa ẹko rre. 9 Onẹsimọs ne ọtẹn mwẹ nọ ghaan, nọ ke ehe ne uwa ye rre, nọ vbe ya ekhọe hia ga Osanobua gha lelẹe rre; iran gha tama uwa emwi hia fẹẹrẹ nọ sunu vbe ediran.

10 Aristakọs ne ima gba rre eghan we ne I wẹẹ uwa do, erriọ ẹre Mak ne irẹn vbe Banabas gba re eyeyẹ vbe giotuẹ uwa. (E Mak na ẹre I we ne uwa rhan obọ miẹn yi, vbe ọ gha sẹ ehe ne uwa ye.) 11 Jesu na vbe tie ẹre Jọstọs, nọ rre usun emwa ni rhuẹ re vbe giotuẹ uwa. Iran na ọkpa, ọre emwa ne ima gba winna iwinna Arriọba Osanobua; iran na wa fu mwẹ ẹko rre,* ẹ i re nekherhe. 12 Ẹpafras nọ ke ehe ne uwa ye rre, nọ re ọguọmwadia e Kristi Jesu wẹẹ uwa do. Ẹghẹ hia ẹre ọ ya kakabọ na erhunmwu ne uwa, ne uwa mieke na sẹtin mudia gbain zẹvbe emwa ni wẹro, wa ghi vbe gele yaeyi, emwi hia nọ dekaẹn iho ọghe Osanobua. 13 I gha wa sẹtin sẹ osẹ yọ wẹẹ, iwinna nọkhua ẹre ọ winna ne uwa, erriọ ẹre ọ vbe ya winna ne iran ni rre Leodisia kevbe Hairapolis.

14 E Luk ne ọbo ebo ne I ya hio gie na tuẹ uwa, e Dimas vbe gie na tuẹ uwa. 15 Wa tuẹ etẹn ni rre Leodisia mẹ, kevbe ọtẹn nokhuo ighẹ e Nimfa, kẹ kevbe etẹn ni do iko vbe owa ẹre. 16 Wa gha ghi tie ebe na nẹ, wa ghi gia miẹn wẹẹ a vbe tie ẹre vbe iko nọ rre Leodisia, wa ghi vbe tie na gbẹn gie etẹn ni rre Leodisia. 17 Deba ọni, wa tama Akipọs wẹẹ: “Rhiegbe ye iwinna ne Enọyaẹnmwa mu nuẹn, ne u mieke na sẹtin ru ẹre fo.”

18 Mẹ ne Pọl vbe giotuẹ uwa, mẹ tobọ mwẹ ẹre ọ ya obọ mwẹ gbẹn ọnrẹn. Wa ghẹ mianmian wẹẹ I rre eghan. Te Osanobua gha ru ẹse ne kpataki* ne uwa.