EBE NA GBẸN GIE IVBI E FILIPAI

1 E Pọl vbe Timoti ni re eviẹn e Kristi Jesu, giotuẹ emwa ni huanrẹn hia ni rre Filipai ni gu e Kristi Jesu rrọọ vbe akugbe, kevbe avbe ediọn* kevbe eguọmwadia iwinna:

2 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.

3 Ẹghẹ hia ẹre I ya kpọnmwẹ Osanobua mwẹ vbe I gha ye uwa rre. 4 Ẹghẹ ke ẹghẹ ne I ya ya ekhọe hia na erhunmwu ne uwa hia ẹre I ya ru ọna, ekhọe ọyẹnmwẹ ẹre I vbe ya na erhunmwu ne uwa. 5 Emwi nọ ya mwẹ ru ọna, ọre rhunmwuda iyobọ ne uwa ru, na mieke na sẹtin ya iyẹn nọ maan wewe, ke ẹdẹ nokaro gha dee do sẹ ebanban. 6 Rhunmwuda, I wa rẹn wẹẹ, Osanobua nọ suẹn iwinna esi vbe egbe uwa, gha ye gha ru ẹre khian, rhinrin ọ te ya ru ẹre fo, vbe ẹdẹ e Kristi Jesu. 7 Emwi nọ khẹke nọ, ne ẹmwẹ uwa hia gha ye vberriọ vbe ekhọe mwẹ, ugbẹnvbe a miẹn wẹẹ, I mwẹ ẹmwẹ uwa vbe orhiọn; wa ẹre ọ gu mwẹ ghae vbe ẹse ne kpataki* ọghe Osanobua, vbọ gha de ọghe iyobọ ne uwa ru mẹ vbe eghan ne I ye, kevbe iyobọ ne uwa ru mẹ vbe ẹmwẹ iyẹn nọ maan, vbe nọ dekaẹn na sinmwi oseghe yọ kevbe na ya uhi arriọba ye ẹre ike.

8 Osanobua rẹnrẹn wẹẹ ẹmwata ẹre I ta vbe I gha kha wẹẹ, ẹmwẹ uwa hia wa da mwẹ, rhunmwuda agiẹngiẹn ne I mwẹ daa uwa, egbe ne Kristi Jesu vbe mwẹ. 9 Erhunmwu ne I na ne uwa vbe ẹghẹ hia ọre ne ahoẹmwọmwa ne uwa mwẹ gha wegbe yọ, ne uwa gha mwẹ irẹnmwi nọ gbae, wa ghi vbe sẹtin gha rẹn otọ emwi ẹse; 10 ne uwa miehe na sẹtin gha rẹn avbe emwi ni ru ekpataki sẹ ya ru. Ẹghẹ nii, wa ghi gha re emwa nẹi mwẹ orra, wa i khian vbe rrua emwa ọvbehe owẹ, a te miẹn wẹẹ, ọ sẹ ẹdẹ e Kristi. 11 Erhunmwu ne I vbe na ne uwa ọre wẹẹ, ne ẹdagbọn uwa vuọn ne emwi nọ maan na miẹn lekpa e Jesu Kristi; ọna gha rhie uyi kevbe urhomwẹ gie Osanobua.

12 Etẹn, I hoo ne I gi uwa rẹn wẹẹ, emwi hia ni sunu vbe egbe mwẹ, wa ya iyẹn nọ maan gha mu otọ yọ. 13 Te ivbiyokuo hia ni khẹ ẹguae kevbe emwa hia nikẹre ghi rẹn wẹẹ, rhunmwuda e Kristi ẹre a na mu mwẹ ye eghan. 14 Te etẹn nibun sẹ ni ga Enọyaẹnmwa ghi mwẹ udinmwẹ rhunmwuda eghan ne I ye; te iran ghi wa ya udinmwẹ ta ẹmwẹ Osanobua ma emwa sayọ vbene ohan i na mu iran.

15 Ẹmwata nọ wẹẹ, igbọvo kevbe osuan ẹre ọ ya emwa eso kporhu vbekpa e Kristi, sokpan, eso wa vbe ya ẹkoata kporhu. 16 Nọ ne iran na ni ya ẹkoata kporhu vbekpa e Kristi, ahoẹmwọmwa ẹre ọ ya iran ru ẹre, rhunmwuda, iran rẹnrẹn wẹẹ, te a zẹ mwẹ ne I gha sinmwi oseghe ye iyẹn nọ maan. 17 Sokpan, nọ ne iran nikẹre, emwi nọ ya iran ru ẹre ọre rhunmwuda ne iran na mwẹ ekhọe na ya khọn, iran i ya ẹkoata ru ẹre, iran ma hoo ne egbe rọkhọ mwẹ vbe eghan ne I ye. 18 Vbe a ghi lae miẹn? Ọre ẹkoata ẹre iran ya kporhu, ra ẹ i re ọre, te emwa ghi họn iyẹn nọ maan vbekpa e Kristi; ọna wa ya ọyẹnmwẹ sẹ mwẹ. Vbene ẹmwata, te ọyẹnmwẹ khian ye gha sẹ mwẹ, 19 rhunmwuda, I rẹnrẹn wẹẹ, ọna gha ya mwẹ miẹn fan rhunmwuda erhunmwu ne uwa ya ekhọe hia na mẹ kevbe rhunmwuda iyobọ orhiọn nọhuanrẹn ne Jesu Kristi rhie ne ọmwa. 20 Te ọna wa vbe guaẹro ighẹ emwi ne I wa ya ekhọe hia khẹ kevbe emwi ne I ya aro yi; ọni nọ wẹẹ, ne efa ghẹ la mwẹ egbe vbe odẹ ke odẹ, sokpan, ne I sẹtin gha si agbada vbe unu guan. Ẹghẹ nii, a ghi gha la egbe mwẹ rhie uyi gie Kristi zẹvbe nọ ka ye dee yi, ọre te I rre agbọn, ra te I wu nẹ.

21 Vbe ọghe imẹ, I ghaa rre agbọn, te I rre agbọn ne Kristi, sokpan, adeghẹ I na wu, ọni ẹre ọ kue wa maan sẹ. 22 Sokpan, adeghẹ I na ye gha rre agbọn, ọni rhie ma wẹẹ, I gha ye gha ru iwinna mwẹ khian; ọrheyerriọ, I i khian ta ene I khian zẹ vbọ. 23 Te ada ghi khian eva, ọ te wa khọn mwẹ na fan mwẹ fua, ne I bu e Kristi; vbene ẹmwata, ọni ẹre ọ wa maan sẹ. 24 Vbọrhirhighayehẹ, te ọ wa khẹke ne I ye gha rre agbọn, rhunmwuda uwa. 25 Rhunmwuda ne I na mwẹ ilẹkẹtin vbenian, I rẹnrẹn wẹẹ, I gha ye gha rre agbọn; ẹghẹ nii, I ghi ye gu uwa gha rrọọ, ne I mieke na ru iyobọ ne uwa ya gha mwẹ alaghodaro, ne ọyẹnmwẹ vbe gha sẹ uwa rhunmwuda amuẹtinyan ne uwa mwẹ. 26 Ẹghẹ nii, I gha ghi werriegbe bu uwa gha dee, ọyẹnmwẹ nọ khian gha sẹ uwa zẹvbe erhuanegbe Kristi Jesu ne uwa khin, ghi gha muan yọ.

27 Sokpan ọkpa ghi nọ, wa gha yin zẹvbe nọ khẹke emwa ni kporhu iyẹn nọ maan vbekpa e Kristi. Ẹghẹ nii, ọre te I rre do miẹn uwa, ra I ma rre, I ghi gha họn wẹẹ, wa mudia gbain vbe uwu akugbe, wa vbe mwẹ ekhọe ọkpa zẹvbe ne uwa ya winna kugbe, ne uwa mieke na ye mu ẹtin yan iyẹn nọ maan, 28 vbene uwa i khian na vbe gi ohan eghian uwa gha mu uwa. Ọna gha rhie ẹre ma wẹẹ ọfuan ẹre ọ khẹ iran, sokpan, ọ ghi rhie ẹre ma wẹẹ, imiẹnfan khẹ uwa; obọ Osanobua ẹre ọna ke rre. 29 Na na rhunmwuda e Kristi kie ẹkpotọ ne uwa, ne uwa ya mu ẹtin yan rẹn kevbe ne uwa gha rhunmwuda ẹre rri oya, uyi nọkhua ẹre a yae mu ye uwa egbe. 30 Egbe ọlọghọmwa ne I sirra uwa la gberra, ẹre uwa wa vbe ye na; zẹvbe ne uwa rẹnrẹn, ọlọghọmwa nii ẹre I wa ye ye na.

2 Adeghẹ uwa mwẹ ẹmwẹ igiọdu ne uwa khian ta zẹvbe emwa ni gu e Kristi rrọọ vbe akugbe, adeghẹ uwa khian ya ahoẹmwọmwa fu egbe ẹko rre, ọ gha de ọghe na ya egbe rhorho egbe zẹvbe etẹn na gba ga,* ọ gha vbe de ọghe agiẹngiẹn kevbe ẹnina na mwẹ daa egbe, 2 wa hia ne uwa ya ẹko rhiẹnrhiẹn mwẹ fo lekpa ne uwa gha mwẹ ekhọe ọkpa kevbe ne uwa gha hoẹmwẹ egbe,* wa ghi gha mwẹ akugbe vbe emwi hia, wa ghi vbe gha mwẹ iziro ọkpa. 3 Wa ghẹ ya okhọn ra itengbemu ru emwi rhọkpa, sokpan, wa gha mu egbe rriotọ, ne uwa gha ghee emwa ọvbehe wẹẹ, iran sẹ uwa; 4 wa ghẹ wa rẹn ọghe enegbe uwa ọkpa, sokpan, wa vbe gha mu ọghe emwa ọvbehe roro.

5 Wa gha mwẹ egbe ekhọe na, ne Kristi Jesu ghaa mwẹ. 6 Agharhemiẹn wẹẹ, egbe ne Osanobua mwẹ ẹre ọ vbe gha mwẹ, ọ ma mwẹ ẹghẹ ọkpa nọ ya roro ẹre wẹẹ irẹn khian gu Osanobua mwa ẹrrẹe.* 7 Ọ ma ru vberriọ, sokpan, ọ keghi sẹ emwi hia nọ mwẹ rae, ọ na mu akpa ọviẹn yọ, ọ na do khian ọmwa nagbọn.* 8 Yevbesọni, vbe ọ ghi rre zẹvbe ọmwa nagbọn,* ọ na mu egbe ẹre rriotọ, ọ na họn ẹmwẹ ne Osanobua ya sẹ ẹdẹ uwu, ọni ọre uwu nọ wu vbe uhunmwu erhan irrioya.* 9 Rhunmwuda ọni, Osanobua keghi muẹn ye ukpo nọ yo sẹ nọ ka gha ye, ọ na vbe mu eni nọ sẹ eni hia nẹẹn, 10 ne iran ni rre ẹrinmwi, iran ni rre agbọn kevbe ni rre uwu otọ mieke na fan fi iguẹ vbe eni Jesu. 11 Emwa hia ghi vbe miẹn kue wẹẹ, Jesu Kristi ọre Enọyaẹnmwa, ẹghẹ nii, a ghi lekpa ọni gha rhie uyi ne Osa ne Erha mwa.

12 Nọnaghiyerriọ, etẹn mwẹ ni ghaan, ugbẹnvbe a miẹn wẹẹ, ẹghẹ hia ẹre uwa ya họn ẹmwẹ, ẹ i re vbe I ghaa rre ehe ne uwa ye ọkpa, uhiẹn, vbe ẹghẹ ne I i ya rre ehe ne uwa ye nian, ẹre uwa ghi kue ya họn ẹmwẹ sẹ, rhunmwuda ọni, wa ye gha ya ohanmumwẹ kevbe uguọmwẹ winna ye imiẹnfan ọghe uwa. 13 Osanobua ọre ọmwa nọ rhie ẹrhiọn ne uwa rhunmwuda, emwi nọ yẹẹ ọre ni khin, ọ ghi rhie aguakpa kevbe ẹtin ne uwa ya gha zẹ emwi ru. 14 Wa ye gha ru emwi hia vbe nai na vian kevbe nai na muan ẹmwẹ, 15 ne uwa mieke na gha re ivbi Osanobua nẹi mwẹ orra, ne obọ ẹre huanrẹn, nẹi mwẹ okan kevbe ni vbe fi wainwain vbe agbọn na, vbe uwu ẹbu orre dan ni ba odẹ ku. 16 Wa ghi vbe daeyi gbain ighẹ ẹmwẹ ọghe arrọọ. Ẹghẹ nii, I ghi miẹn emwi ne I khian gha ghọghọ yi vbe ẹdẹ e Kristi, vbene I na rẹn wẹẹ, I ma rhulẹ kua kẹkan, I ma vbe miẹn ẹsọn kua kẹkan. 17 Vbọrhirhighayehẹ, ọ gha khọnrẹn ne I gha yevbe ayọn na ya zọ ese na tue ye uhunmwu ogiukpo, te imẹ ru iyobọ ne uwa vberriọ, vbe izọese ne uwa ru kevbe iwinna nọhuanrẹn* ne uwa ru, rhunmwuda amuẹtinyan ne uwa mwẹ. Rhunmwuda ọni, ọyẹnmwẹ keghi sẹ mwẹ, I vbe ghọghọ ne uwa hia. 18 Erriọ ẹre ọ vbe khẹke ne ọyẹnmwẹ gha sẹ uwa, wa ghi vbe gu mwẹ gha ghọghọ.

19 I ya aro yọ wẹẹ Enọyaẹnmwa e Jesu gha kue ne I gie Timoti bu uwa gha dee vbe nẹi khian ghi kpẹẹ gbe, ne I mieke na gha mwẹ igiọdu vbe I gha họn ẹmwẹ uwa. 20 Rhunmwuda, I i mwẹ ọmwa ọvbehe nọ yevbe ọre, nọ gha ya ekhọe hia gbaroghe uwa. 21 Emwa hia nikẹre, ẹmwẹ enegbe iran ọkpa ẹre iran rẹnrẹn, iwinna e Jesu Kristi ma mu iran. 22 Wa tobọ uwa miẹn vbene ọ ya rhie aro ọmwa ne irẹn khin ma hẹ, rhunmwuda, te imẹ vbe ọre wa gha winna kugbe, zẹvbe ọmọ vbe erha, ne iyẹn nọ maan miehe na gha mu otọ yọ. 23 Rhunmwuda ọni, irẹn ẹre I mwẹ vbe ekhọe ne I khian gie gha dee; I gha ghi rẹn nẹ vbene emwi khian gha ye hẹ mẹ, I ghi wa gie ẹre rre vbobọvbobọ. 24 Vbene ẹmwata, I vbe mwẹ ilẹkẹtin wẹẹ, Enọyaẹnmwa gha kue ne imẹ tobọ mwẹ rherhe do miẹn uwa.

25 Sokpan, vbe ẹghẹ na nian, I ghee ẹre wẹẹ, te ọ khẹke ne I gie Ẹpafrodaitọs bu uwa gha dee; ọtẹn mwẹ nọ, ọmwa ne ima gba winna vbe nọ, ovbiyokuo vbe nọ, vbene imẹ vbe ye. Irẹn ọre ukọ ne uwa gie ẹre uhunmwu kevbe ọguọmwadia nọ ru iyobọ mẹ. 26 Ọ wa hoo nọ do miẹn uwa hia, rhunmwuda, ẹmwẹ uwa wa dae; iro vbe han rẹn rhunmwuda nọ na rẹn wẹẹ, wa họn wẹẹ irẹn khuọnmwi. 27 Ọghe ne ẹmwata, ọ wa gele khuọnmwi, te ọ te wu; sokpan, Osanobua keghi tohan rẹn, erriọ ẹre ọ vbe tohan imẹ, ne akhiẹ ọvbehe ghẹ vbe do deba ne I ka ye. 28 Rhunmwuda ọni, I khian wa gie ẹre bu uwa gha dee nian vbobọvbobọ, ne ọyẹnmwẹ mieke na werriegbe gha sẹ uwa vbe uwa gha miẹn ọnrẹn, ẹghẹ nii, mẹ i khian vbe si osi gbe. 29 Rhunmwuda ọni, wa ya oghọghọ rhan obọ miẹn ọnrẹn yi, zẹvbe ne uwa ka vbe ru ẹre ne erhuanegbe Enọyaẹnmwa. Wa ghẹ ya ẹmwẹ ikpia vberriọ ku hiehie. 30 Rhunmwuda, te ọ te wa wu ba ẹmwẹ iwinna e Kristi,* erriọ ẹre ọ vbe rhie uhunmwu mwẹ atata obọ rhunmwuda mwẹ, nọ mieke na ru iyobọ mẹ, ugbẹnvbe a miẹn wẹẹ, wa i rre emwa na, ne uwa ru iyobọ nii mẹ.

3 Vbe okiekie ehia, etẹn mwẹ, wa ye gha sọyẹnmwẹ zẹvbe erhuanegbe Enọyaẹnmwa ne uwa khin. Ọ gha khọnrẹn ne I gbẹn emwi ọkpa gie uwa inugba nọ khin, ẹ i zẹdẹ re ẹsọn mẹ, te I vbe yae ru iyobọ ne uwa, ne uwa ghẹ de ye ẹbe.

2 Wa gha begbe vbe egbe avbe ekita; wa gha begbe vbe egbe emwa ni rhie ikuanegbe ne emwa; wa vbe gha begbe vbe egbe emwa ni giagia egbe. 3 Ma ẹre a gele rhuẹ vbene a rhuẹ, ọni ọre ima ni rhie ugamwẹ nọhuanrẹn ne Osanobua zẹvbe ne orhiọn nọhuanrẹn ya dia ima, ma ni ya e Kristi Jesu hio, ma ni ma vbe mu ẹtin yan emwi agbọn na.* 4 Ọ gha de ọghe ne ọmwa mu ẹtin yan emwi agbọn na, mẹ wa mwẹ emwi nibun ne I gha mu ẹtin yan.

Adeghẹ ọmwa rhọkpa roro ẹre wẹẹ, irẹn mwẹ emwi vbe agbọn na, ne irẹn gha mu ẹtin yan, ne imẹ mwẹ sẹ ọghẹe: 5 ọ ghi rre ikpẹdẹ erẹnrẹn vbe a biẹ mwẹ, a na rhuẹ mwẹ. Ovbi Izrẹl nọ ke uniẹn e Bẹnjamin rre ẹre I khin. Ovbi e Hibru eseserese ẹre I khin, ẹre evbibiẹ mwẹ vbe khin; ọ gha de ọghe uhi na lele, e Farisi ẹre I khin; 6 ọ gha de ọghe oyaya na ya ru emwi, I mwẹ ọnrẹn sẹrriọ wẹẹ, I na gha zẹ iko kpokpo; ọ gha de ọghe na ru emwi ẹse zẹvbe ne uhi khare, I i zẹdẹ mwẹ okan hiehie. 7 Ọrheyerriọ, avbe emwi ne imẹ te ghee wẹẹ, ọ ru ekpataki mẹ, te imẹ ghi ka ehia ye nẹi mwẹ esa,* rhunmwuda e Kristi. 8 Ẹ i vbe re ọni ọkpa, I keghi vbe ka emwi hia ye nẹi mwẹ esa, rhunmwuda irẹnmwi nai sẹtin fian ive yi ọghe Enọyaẹnmwẹ e Kristi Jesu. I keghi rhunmwuda e Kristi sẹ emwi hia rae, I na ka ehia ba iku,* ne I mieke na gha mwẹ e Kristi, 9 I ghi vbe gu ẹre gha rrọọ vbe akugbe. Ẹ i re rhunmwuda ne I na lele emwi ne Uhi khare, ẹre a na ka mwẹ ye ọmwa ata, sokpan, ne I na mu ẹtin yan e Kristi ẹre a gu ka mwẹ ye ọmwa ata; Osanobua ẹre ọ ka ọmwa ye ọmwa ata rhunmwuda amuẹtinyan ne ọmwa mwẹ. 10 Emwi ne I ghi hoo ne I ru, ọre ne I rẹn e Kristi kevbe ẹtin arhiọkpaegbe ọghẹe, ne I vbe rri oya vbene irẹn vbe rri oya, ne I vbe wu vbene irẹn vbe wu, 11 ne I mieke na ghee ẹre deghẹ I gha sẹtin gha mwẹ oghae vbe arhiọkpaegbe nokaro.

12 Ẹ i re wẹẹ te ive nii sẹ mwẹ obọ nẹ, ra te I ghi kha wẹẹ a ya mwẹ khian ọmwa nọ gbae nẹ, sokpan, te I hia vbe odẹ ke odẹ ne I mieke na ghee ẹre deghẹ I gha vbe sẹtin dobọ mu emwi nii ne Kristi Jesu rhunmwuda ẹre zẹ mwẹ.* 13 Etẹn, ẹ i re te I ghee ẹre wẹẹ I dobọ muẹn nẹ; sokpan, ẹmwata nọ rrọọ ọre wẹẹ: I keghi hia ne I mianmian emwi ni rre iyeke, ne I ziga, ne I mieke na dobọ mu emwi ni rre odaro. 14 I keghi hia vbe odẹ ke odẹ ne ive nii sẹ mwẹ obọ, ọni ọre ive ne ima khian miẹn rhunmwuda itie ne Osanobua tie ima re gha die ẹrinmwi lekpa e Kristi Jesu. 15 Nọnaghiyerriọ, ọ khẹke ne ima ni wẹro gha mwẹ egbe ekhọe vbenian; sokpan, deghẹ emwi ọvbehe nọ rhirhi gha khin rre eso vbe uwu uwa ekhọe, Osanobua gha muẹn ma uwa, egbe ekhọe nọ khẹke ne uwa gha mwẹ. 16 Vbe nọ rhirhi gha ye hẹ, vbene ima he mwẹ alaghodaro sẹ na, wa gi ima ye rhie owẹ lele ukpowẹ ne ima la dee sin.

17 Etẹn, wa hia koko gha ya egbe taa mwẹ, wa gha rhie aro sotọ vbe egbe emwa ni rhie owẹ lele igiemwi ne ima rhie yotọ ne uwa. 18 Rhunmwuda, ẹ i re avbiẹ emwa ẹre ọ gbodan ghee uwu ne Kristi wu vbe uhunmwu erhan irrioya.* Ẹghẹ hia ẹre I te ya gha ta ẹmwẹ iran, sokpan, ẹghẹ ke ẹghẹ ne I ghi ya so eni iran nian, eve eve ẹre I ghi viẹ. 19 Ọfuan ọre okiekie iran, ẹko iran ọre osa ne iran ga; emwi nọ khẹke ne ekhue ẹre gha mu iran, ẹre iran ya ghagha, emwi agbọn na ọkpa ẹre iran mu roro. 20 Sokpan, emọ otọ ọghe ẹrinmwi ẹre ima khin, ma vbe rhie aro ye odẹ gha khẹ ọmiọnmwafan nọ ke odọ nii dee, ọni ọre Enọyaẹnmwa e Jesu Kristi. 21 Irẹn gha fi egbe ima ne mitan mitan na werriẹ, nọ do gha yevbe ọghe irẹn* nọ vuọn ne uyi; ẹtin ẹnrẹn nọkhua nọ ya viọ emwi hia ye ototọ asẹ ọghẹe, ẹre ọ khian ya ru ọna.

4 Rhunmwuda ọni nian, etẹn mwẹ ne I hoẹmwẹ ọnrẹn, wa mudia gbain vbe odẹ vbenian zẹvbe eguọmwadia Enọyaẹnmwa; I hoẹmwẹ uwa gbe! Erriọ ẹre ẹmwẹ uwa vbe ya da mwẹ. Wa ẹre ọ ya mwẹ ghọghọ, te uwa vbe yevbe ẹrhu ẹde nọ rrọ mwẹ uhunmwu.

2 I hoo ne I rinmwian e Yuodia kevbe Sintiki, ne iran gha mwẹ ekhọe ọkpa zẹvbe eguọmwadia Enọyaẹnmwa. 3 I vbe hoo ne uwẹ ne ogieva mwẹ ne ekhọe esi, ne ima gba winna kugbe* ye gha ru iyobọ ne ikhuo na. Egbe hia ẹre ikhuo na ya deba mwẹ miẹn ẹsọn ye ẹmwẹ iyẹn nọ maan, ke iran kevbe Klẹmẹnt kẹ kevbe etẹn hia nikẹre; eni iran hia wa rre ebe arrọọ.

4 Wa gha sọyẹnmwẹ ye ẹmwẹ Enọyaẹnmwa vbe ẹghẹ hia. I werriegbe tae, Wa gha sọyẹnmwẹ! 5 Wa gi emwa hia rẹn uwa ye emwa ni mwẹ amuroro. Enọyaẹnmwa sikẹ ima. 6 Wa ghẹ si osi ye emwi rhọkpa, sokpan, wa gha nọ emwi hia ne uwa gualọ vbe obọ Osanobua vbe erhunmwu, wa ghi gha rinmwiaẹn, wa ghi vbe gha kpọnmwẹ ọnrẹn; 7 ẹghẹ nii, ọfunmwegbe ọghe Osanobua nọ gberra ne ọmwa gha sẹtin rẹn otọ re, gha gbogba ga ekhọe uwa kevbe iziro ọghe uwa, lekpa e Kristi Jesu.

8 Vbe okiekie ehia etẹn, emwi ke emwi nọ re ọghe ẹmwata, emwi ke emwi nọ ru ekpataki, emwi ke emwi nọ re ọghe ata, emwi ke emwi nọhuanrẹn,* emwi ke emwi nọ gha yẹẹ emwa, emwi ke emwi na ta ẹmwẹ ọnrẹn ẹse, emwi ke emwi nọ re ọghe esi, kevbe emwi ke emwi nọ mwẹ uyi, wa ye gha mu avbe emwi na hia roro. 9 Avbe emwi ne uwa ruẹ re vbe obọ mwẹ kevbe ne uwa miẹn yi, kẹ kevbe avbe emwi ne uwa họẹn kevbe ne uwa bẹghe wẹẹ I ru, wa gha ru avbe emwi na hia; wa gha ru vberriọ, Osa ọghe ọfunmwegbe gha gu uwa gha rrọọ.

10 U miẹn vbene ọyẹnmwẹ sẹ mwẹ hẹ, erriọ ẹre I vbe ya kpọnmwẹ Enọyaẹnmwa wẹẹ, wa werriegbe suẹn gha mu ẹmwẹ mwẹ roro. Ẹ i re te uwa i ka mu ẹmwẹ mwẹ roro, sokpan, ẹkpotọ ma kie ne uwa ya rhie ẹre ma. 11 Ẹ i re te I ta ẹmwẹ na rhunmwuda wẹẹ, I gualọ iyobọ. Sokpan, emwi ne I he miẹn vbe agbọn ma mwẹ ẹre nẹ wẹẹ, ne I gi emwi ne I mwẹ gha sẹ mwẹ ọkẹn, vbene emwi rhirhi gha ye mwẹ hẹ. 12 I rẹn vbene ọ ye hẹ, ne ọmwa gha rre ivbabọ, I vbe rẹn vbene ọ ye hẹ, ne ọmwa gha mwẹ emwi nibun. Te I ghi guẹ vbene a ya mwẹ isọkẹn hẹ, vbe ehe ke ehe ne I na vba egbe mwẹ, ra vbene emwi rhirhi gha ye mwẹ hẹ, ọre te ohanmwẹ gbe mwẹ ra te ẹko vuọn mwẹ, ọre te I mwẹ emwi nibun, ra I i mwẹ hiehie. 13 I mwẹ ẹtin na ya ya egbe miẹn emwi hia, rhunmwuda ọmwa nii nọ rhie ẹtin mẹ.

14 Vbọrhirhighayehẹ, wa wa hia ne uwa ma na sẹ mwẹ rae ye ọlọghọmwa ne I ye. 15 Uhiẹn, wa ne Ivbi e Filipai vbe rẹn wẹẹ, vbe ẹghẹ okaro ne uwa ya họn iyẹn nọ maan, vbe ẹghẹ ne I ya kpa hin e Masẹdonia rre, iko ọvbehe ma ru iyobọ mẹ, vbọ gberra ọghe uwa ọkpa; 16 vbe I rre Tẹsalonaika, ẹ i re uhukpa ẹre uwa viọ emwi ne I gualọ gu mwẹ, sokpan, igba eva nọ. 17 Ẹ i re te I gualọ ọhẹ rhọkpa vbe obọ uwa, sokpan, I hoo ne emwi esi ne uwa ru gha ya aza ọghe uwa vuọn yọ. 18 Vbọrhirhighayehẹ, I mwẹ emwi hia ne I gualọ, uhiẹn, te ọ wa kpọ kua. Emwi ne uwa viọ ne Ẹpafrodaitọs viọ gu mwẹ sẹ mwẹ obọ nẹ; emwi hia wa sẹ mwẹ ọkẹn. Te emwi ne uwa viọ rre na, yevbe emwi nọ winhin na ya zọ ese gie Osanobua, ne irẹn rhan obọ miẹn yi kevbe nọ yẹẹ ọre. 19 Erriọ ẹre Osanobua mwẹ ne ẹfe ẹre kpọ kua* khian vbe loo e Kristi Jesu ya kpemehe emwi hia ne uwa gualọ ne uwa. 20 Uyi nọ ne Osa ne Erha mwa vbe etẹbitẹ ya sẹ etẹghori. Isẹ.

21 Wa we emwa hia ni huanrẹn ni gu e Kristi Jesu rrọọ vbe akugbe do. Etẹn ni gu mwẹ rre emwa wẹẹ uwa do. 22 Emwa hia ni huanrẹn, katekate iran ni rre igiowa ọghe Siza wẹẹ uwa do.

23 Te Enọyaẹnmwa e Jesu Kristi gha ru ẹse ne kpataki* ne uwa rhunmwuda ekhọe esi ne uwa mwẹ.