EBE NA GBẸN GIE IVBI ẸFISỌS

1 E Pọl nọ re ukọ ọghe Kristi Jesu zẹvbe nọ gua iho ọghe Osanobua ro, ẹre ọ gbẹn ebe na gie emwa ni huanrẹn ni rre Ẹfisọs ni mudia ẹse zẹvbe ne iran ya gu e Kristi Jesu rrọọ vbe akugbe:

2 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.

3 Uyi nọ ne Osanobua kevbe Erha ọghe Enọyaẹnmwa e Jesu Kristi, rhunmwuda nọ na loo orhiọn nọhuanrẹn ọghẹe ya tue afiangbe hia ni rre ẹrinmwi yan ima, zẹvbe ne ima ya gu e Kristi rrọọ vbe akugbe. 4 Vbene a te bu agbọn na, Osanobua keghi zẹ ima ne ima gha gu e Kristi rrọọ vbe akugbe, ne ima mieke na gha rhie ahoẹmwọmwa ma, ma ghi vbe gha re emwa ni huanrẹn kevbe nẹi mwẹ orra vbe odaro ọre. 5 Rhunmwuda, Osanobua tae yotọ nẹ wẹẹ irẹn gha la obọ e Jesu Kristi ya ima ye ọmọ zẹvbe nọ yẹẹ ọre kevbe zẹvbe ne irẹn hoo, 6 ne emwa mieke na gha rhie uyi nẹẹn rhunmwuda ẹse ne kpataki* ọghẹe nọkhua ne irẹn la obọ Ovbi ẹre ne irẹn hoẹmwẹ ọnrẹn ru ne ima. 7 Esagiẹn Ovbi ẹre nii ẹre ọ ya dẹ ima werriegbe, ne ima mieke na gha re emwa na fan, ọ na ya orukhọ ima bọ ima rhunmwuda ẹse ne kpataki* ọghẹe ne wọrhọwọrhọ.

8 Ọ keghi ru ẹse ne kpataki* na ne ima ẹsẹse, ọ na ya ẹwaẹn hia kevbe a rẹn otọ emwi we ima, 9 lekpa nọ na gi ima rẹn ẹmwẹ oro nọhuanrẹn nọ dekaẹn emwamwa ne irẹn mwamwaẹn. Ẹmwẹ oro nọhuanrẹn na keghi re nọ yẹẹ ọre, irẹn vbe mwamwaẹn nẹ vbe ekhọe ọre wẹẹ, 10 irẹn gha ru emwamwa vbe ẹghẹ nọ rhie yọ gha gba, ne irẹn ya si emwi hia koko ne iran do ya egbe ba e Kristi, ke emwi ni rre ẹrinmwi kevbe ni rre agbọn; ehia ghi ya egbe ba ẹre, 11 ọni ọre irẹn nii ne ima gu rrọọ vbe akugbe zẹvbe emwa ne ive ne Osanobua ve khian sẹ ọre obọ, ugbẹnvbe a miẹn wẹẹ a zẹ ima yotọ nẹ zẹvbe nọ gua emwamwa ọghe Osanobua ro, rhunmwuda, vbene irẹn we ne emwi gha ye, erriọ ẹre ọ ye. 12 Ẹghẹ nii, ma ni ka wa gha mu ẹtin yan e Kristi ghi gha ru emwi nọ gha rhie urhomwẹ gie Osanobua. 13 Sokpan, wa keghi vbe mu ẹtin yan e Kristi vbe uwa ghi họn ẹmwẹ ẹmwata nẹ, nọ re iyẹn nọ maan nọ dekaẹn imiẹnfan ọghe uwa. Wa ghi yayi nẹ, Osanobua keghi la obọ e Kristi rhie orhiọn nọhuanrẹn ne uwa zẹvbe nọ yan rẹn. Orhiọn nọhuanrẹn na, ọre iyama ne irẹn rhie ye uwa egbe. 14 Nene orhiọn nọhuanrẹn ọre ama* nọ sẹ osẹ yọ wẹẹ, emwi ne Osanobua ve emwa rẹn re gha sẹ ima obọ vbe odaro. Te Osanobua ru ọna nọ mieke na ha osa ya fan emwa rẹn, ẹghẹ nii, a ghi gha rhie urhomwẹ nẹẹn ẹsẹsẹmwẹse.

15 Ọna ẹre ọ si ẹre na na miẹn wẹẹ, ke ne I ya họn vbekpa vbene uwa ya mu ẹtin yan Enọyaẹnmwa e Jesu kevbe vbene uwa ya rhie ẹre ma hẹ wẹẹ, wa hoẹmwẹ emwa ni huanrẹn hia, 16 I ma he dobọ yi vbe ekpọnmwẹ ne I rhie ne Osanobua ye ẹmwẹ uwa. Ẹghẹ hia ẹre I ya so eni uwa vbe erhunmwu; 17 I keghi rinmwian Osanobua ọghe Enọyaẹnmwa e Jesu Kristi nọ re Erha nọ mwẹ uyi, nọ rhie ẹwaẹn ne uwa, nọ vbe ru iyobọ ne uwa ya rẹn otọ emwi nọ mu ma uwa, ne uwa mieke na rẹn ẹmwata vbekpa irẹn. 18 Ọ rhan uwa ekhọe nẹ, ne uwa mieke na rẹn emwi nọ khẹ uwa vbe odaro ne irẹn tie uwa ba, wa ghi vbe rẹn vbene ọ hin usi sẹ hẹ ighẹ afiangbe ne irẹn mwamwa khẹ emwa ni huanrẹn vbe odaro, 19 kevbe vbene ọ kpọlọ hẹ ighẹ ẹtin ẹnrẹn ne irẹn loo vbe ẹdagbọn ima ne emwa iyayi. Ọna keghi rhiegbe ma vbe iwinna nọ ya ẹtin ẹnrẹn nọkhua ru. 20 Ẹtin ẹnrẹn na, ẹre ọ loo ro vbe ọ huẹn e Kristi kpaegbe vbe idin, ọ na muẹn tota ye obọ erha ọmwa ọghẹe vbe orere ẹrinmwi. 21 Ukpo nọ ghi ye na nian, sẹ ọghe avbe arriọba, asẹ, ẹtin kevbe ọdakha hia kẹ kevbe eni ke eni na ghi miẹn nẹ, ẹ i wa re vbe agbọn na* ọkpa, uhiẹn ya sẹ agbọn nọ dee vbe odaro. 22 Ọ vbe viọ emwi hia ye ototọ owẹ ọre, ọ na vbe yae ru uhunmwuta ọghe emwi hia nọ ghi kaan iko nẹ. 23 Nene iko ọre egbe Kristi, nọ vuọn ne emwi hia nọ ghi dekaan rẹn nẹ; irẹn ne Kristi ẹre ọ ya emwi hia khian enọ gbae.

2 Yevbesọni, Osanobua keghi ya uwa khian enọ ghi rrọọ agharhemiẹn wẹẹ, wa te wulo nẹ rhunmwuda abakuru kevbe orukhọ ọghe uwa. 2 Vbe ẹghẹ nii, wa kegha lele ukpowẹ ọghe emwa ni rre uwu agbọn, wa na gha ru emwi ne ọmwa nọ mwẹ ọdakha yan avbe ẹtin ni rre ẹhoho gualọ, ọni ọre orhiọn nọ winna vbe ekhọe ọghe emwa nẹi họn ẹmwẹ ne Osanobua. 3 Vbene ẹmwata, ma hia ka vbe gha yin vbene iran ya yin, ma na gha ru emwi ne egbe ima gualọ, emwi ke emwi ne egbe ima kevbe ekhọe ima hoo, ẹre ima ghaa ru; ke ẹghẹ na wa ya biẹ ima gha dee, ma kegha re emọ nọ khẹke ne Osanobua tue izohu ẹre yan, zẹvbe ne emwa nikẹre vbe ye. 4 Sokpan, Osanobua nọ vuọn ne itohan, keghi rhunmwuda ahoẹmwọmwa ọghẹe nọkhua nọ mwẹ ghee ima, 5 ya ima khian enọ ghi rrọọ, ọ na ku ima gbe ba e Kristi, agharhemiẹn wẹẹ ima te wulo nẹ rhunmwuda abakuru ọghe ima; ẹse ne kpataki* ọghe Osanobua, ẹre a ya miẹn uwa fan. 6 Yevbesọni, ọ keghi huẹn ima kpaegbe ba e Kristi, ọ na vbe viọ ima tota ba ẹre vbe orere ẹrinmwi, zẹvbe emwa ni gu e Kristi Jesu rrọọ vbe akugbe. 7 Te irẹn ru ọna, na mieke na miẹn wẹẹ, vbe agbọn nọ dee,* ọ ghi rhie ẹre ma wẹẹ, ọwọrhọwọrhọ ẹre ẹse ne kpataki* ọghe irẹn khin, vbe ọ gha ru ẹse ne ima ni gu e Kristi Jesu rrọọ vbe akugbe.

8 Lekpa ẹse ne kpataki* na, a keghi miẹn uwa fan rhunmwuda amuẹtinyan ọghe uwa, sokpan, ẹ i re ẹtin obọ uwa ẹre uwa ya ru ọna; ẹse ne Osanobua ru ne uwa nọ. 9 Ẹ i re iwinna ne ọmwa ru, ẹre a ya miẹn imiẹnfan na; hiehie, ẹ i re ọre, ne ọmwa rhọkpa ghẹ miẹn emwi ya gha rhuọ. 10 Iwinna ne Osanobua ya obọ ẹre ru ẹre ima khin; zẹvbe emwa ni gu e Kristi Jesu rrọọ vbe akugbe, te Osanobua yi ima ne ima gha ru iwinna esi, ne irẹn mwamwa yotọ khẹ ima ne ima gha ru.

11 Nọnaghiyerriọ, wa na biẹlẹ zẹvbe ivbi agbẹnvbo ọvbehe, wa yerre wẹẹ, ọ ghaa mwẹ ẹghẹ ne iran ne emwa nagbọn ya obọ rhuẹ ya gha tie uwa “emwa ni ma rhuẹ.” 12 Wa ma rẹn e Kristi vbe ẹghẹ nii, wa ma vbe gha mwẹ oghae vbe emwi nọ dekaẹn Ivbi Izrẹl, ọrriọvbe ẹre uwa vbe gha khin vbọ gha de ọghe avbe ile na tae rhunmwuda eyan ọghe Osanobua; te uwa wa gha rre agbọn kẹkan, wa ma rẹn ehe ne uwa rrie ra ehe ne uwa ke dee, wa ma vbe rẹn Osanobua. 13 Sokpan, ne uwa na ghi gu e Kristi Jesu rrọọ vbe akugbe nian, te uwa ni te ka rre urria ghi do sikẹ Osanobua, lekpa esagiẹn e Kristi. 14 Rhunmwuda, e Kristi ọre ọfunmwegbe ọghe ima,* irẹn ẹre ọ ya ẹbu eva nii khian ọkpa; ogba nọ te wannọ iran, ọ na guọghọe sotọ. 15 Ọ na ya egbe ẹre* gbe ukhu ẹre rua ighẹ eghian nọ te rre uwu ẹkpo iran, ọni ọre nene Uhi nọ mwẹ iyi kevbe ilele nibun. Te ọ ru ọna, nọ mieke na ya ẹbu eva na ni gu irẹn rrọọ vbe akugbe do khian orhunmwu ọkpa nọ re ọghe ọgbọn, ne ọfunmwegbe mieke na gha rrọọ, 16 nọ mieke na vbe ru iyobọ ne ẹbu eva na ni ghi do khian egbe ọkpa, ya gu Osanobua ru adọlọ lekpa uwu nọ wu vbe erhan irrioya,* rhunmwuda, ọ ya egbe ẹre gbe ukhu ẹre rua nẹ ighẹ eghian nọ te rre uwu ẹkpo iran. 17 Ọ keghi rre, ọ na do na iyẹn nọ maan ọghe ọfunmwegbe ma uwa ni te khian rree ne Osanobua, ọ na vbe na iyẹn ọfunmwegbe ma iran ni sikẹ Osanobua, 18 rhunmwuda, irẹn ẹre ọ zẹe ighẹ odẹ kie ne ima, ke Ivbi e Ju kevbe emwa nẹi re Ivbi e Ju, ne ima ya bu Evbavba gha dee lekpa orhiọn nọhuanrẹn ọkpa nii.

19 Rhunmwuda ọni, wa i ghi re ọrriọvbe ra erhunmwuyẹn, sokpan, emọ otọ ẹre uwa ghi vbe khin zẹvbe ne emwa ni huanrẹn nikẹre vbe ye, ọkpa vbe igiowa ọghe Osanobua ẹre uwa ghi vbe khin. 20 Ẹyotọ ọghe avbe ukọ kevbe avbe akhasẹ ẹre a bọ uwa yan, vbene Kristi Jesu tobọre na re okuta nọ wa da igiekẹn ọghe ẹyotọ nii yi. 21 Owa nii hia nọ ya egbe ba e Kristi kevbe abọ hia ni rrọọ keghi re na kukugbe; te nene owa ghi kpọlọ sayọ, nọ do khian ọgua Osa nọhuanrẹn ọghe Jehova.* 22 Rhunmwuda ne uwa na gu e Kristi rrọọ vbe akugbe, te a ghi vbe ku uwa kugbe ba iran nikẹre ya khian owa ne Osanobua dia, rhunmwuda ne orhiọn nọhuanrẹn ọghẹe na rre evba.

3 Rhunmwuda ọna, mẹ ne Pọl keghi re oleghan rhunmwuda ne I na re ọrhuanegbe Kristi Jesu kevbe rhunmwuda ne I na ru iyobọ ne uwa ne ivbi agbẹnvbo ọvbehe. 2 Vbe nai na gbe awawẹ, wa họn nẹ wẹẹ, Osanobua mu iwinna mẹ, ne I ru iyobọ ne uwa, ne ẹse ne kpataki* ọghẹe mieke na sẹ uwa obọ. 3 Vbene ẹmwata, Osanobua mu ẹmwẹ oro nọhuanrẹn ma mwẹ nẹ; I ka vbe gbẹn emwi kherhe gie uwa nẹ vbekpa ẹre. 4 Wa gha tie emwi ne I gbẹn na, wa gha rẹn vbene I rẹn otọ ẹmwẹ oro nọhuanrẹn ọghe Kristi hẹ. 5 Vbe ẹghẹ* nọ gberra, Osanobua ma wa mu ẹmwẹ oro na ma emwa nagbọn, vbene ọ ghi ya lekpa orhiọn nọhuanrẹn muẹn ma avbe ukọ kevbe avbe akhasẹ ọghẹe ni huanrẹn vbe ẹghẹ na nian. 6 Nene ẹmwẹ oro na khin: Ivbi agbẹnvbo ọvbehe ni gu e Kristi Jesu rrọọ vbe akugbe gha lekpa iyẹn nọ maan do deba ima ghae vbe arevbukhu nii, ma ghi vbe gha re egbe ọkpa, ẹghẹ nii, ive na ve ghi sẹ ima hia obọ. 7 I keghi do khian ọguọmwadia nọ ya ẹmwẹ oro na wewe, rhunmwuda ẹse ọhẹ ọghe Osanobua, nọ re ẹse ne kpataki* nọ ru mẹ lekpa ẹtin ẹnrẹn.

8 Agharhemiẹn wẹẹ, mẹ kherhe sẹ enọ ghi kanmwa sẹ vbe uwu emwa ni huanrẹn hia, Osanobua keghi ru ẹse ne kpataki* na mẹ, ne I mieke na ya kporhu iyẹn nọ maan ọghe afiangbe ne wọrhọwọrhọ ọghe Kristi ma ivbi agbẹnvbo ọvbehe, 9 ne I vbe gi emwa hia rẹn vbene Osanobua nọ yi emwi hia khian ya muẹn sẹ hẹ ighẹ ẹmwẹ oro nọhuanrẹn nọ rhie lẹre ke ẹghẹ gha dee. 10 Na mieke na miẹn wẹẹ, vbe ẹghẹ na nian, avbe arriọba kevbe avbe ọdakha ni rre orere ẹrinmwi ghi do la obọ iko rẹn odẹ ughughan ne Osanobua ya loo ẹwaẹn ọghẹe. 11 Ọna keghi guaẹro ighẹ emwamwa ọghe etẹbitẹ, ne irẹn lekpa e Kristi ne Enọyaẹnmwa e Jesu mwamwa yotọ. 12 Irẹn ẹre ọ zẹe ighẹ ima sẹtin si agbada vbe unu guan kevbe ne ima na sẹtin sẹ odaro Osanobua vbene ima i na fian afianma, rhunmwuda ne ima na mu ẹtin yan rẹn. 13 Rhunmwuda ọni nian, te I ghi rinmwian uwa, ne uwa ghẹ gi oya ne I re rhunmwuda uwa gbe uwa orhiọn mu otọ, rhunmwuda, wa gha lekpa ẹre gha mwẹ uyi.

14 Ọna ẹre ọ si ẹre ne I na fan fi iguẹ vbe odaro Evbavba, 15 nọ re ọmwa nọ zẹe ighẹ ẹgbẹe hia ni rre ẹrinmwi kevbe agbọn mwẹ eni. 16 Erhunmwu ne I na ọre ne Osanobua nọ vuọn ne uyi, lekpa orhiọn rẹn rhie ẹtin ne uwa, ne uwa mieke na gha re nọ wegbe vbe uwu egbe, 17 ne Kristi kevbe ahoẹmwọmwa vbe miẹn agba dia vbe ekhọe uwa, rhunmwuda amuẹtinyan ne uwa mwẹ. Erhunmwu ne I na ọre ne uwa gbọzinian kevbe ne uwa deziẹn vbe ẹyotọ nii nọ wegbe, 18 ne uwa kevbe emwa ni huanrẹn hia mieke na gele rẹn otọ uvbẹmwẹ, utanmwẹ, uyomwẹ kevbe udinmwimwẹ ọghe ẹmwata nọ dekaẹn Osanobua, 19 ne uwa vbe rẹn ahoẹmwọmwa ọghe Kristi nọ sẹ irẹnmwi, ẹghẹ nii, wa ghi vuọn ne emwi nọ maan hia ne Osanobua viọ ne ọmwa.

20 Osanobua ne ẹtin ẹnrẹn winna vbe uwu ima, gha sẹtin ru gberra emwi ne ima nọ rẹn, ra ne ima mu roro vbe ekhọe, ọ ghi kue vbe ru enọ sẹ ọni; 21 te a gha lekpa iko kevbe lekpa e Kristi Jesu rhie uyi nẹẹn ke orre ya sẹ orre, vbe etẹbitẹ ya sẹ etẹghori. Isẹ.

4 Nọnaghiyerriọ, te imẹ nọ re oleghan rhunmwuda Enọyaẹnmwa ghi rinmwian uwa nian, ne uwa gha yin ẹse zẹvbe nọ khẹke utiemwẹ na tie uwa re. 2 Wa gha mu egbe rriotọ vbe ẹghẹ hia, wa ghi vbe gha re emwa ni fu, wa vbe gha mwẹ izinegbe, wa ghi vbe gha mu emwi ne emwa ọvbehe ru wuo egbe rhunmwuda ahoẹmwọmwa. 3 Wa ghi vbe hia vbe odẹ ke odẹ, ne uwa ye gha rrọọ vbe uwu akugbe ne orhiọn nọhuanrẹn rhie ne uwa, lekpa ọfunmwegbe nọ dee uwa hia kugbe. 4 Egbe ọkpa ẹre ọ rrọọ, orhiọn ọkpa ẹre ọ vbe rrọọ, zẹvbe ne ayayẹro* ọkpa vbe rrọọ na tie uwa ba; 5 Enọyaẹnmwa ọkpa ẹre ọ rrọọ, iyayi ọkpa ẹre ọ rrọọ, idinmwiamẹ ọkpa ẹre ọ vbe rrọọ; 6 Osanobua ọkpa ẹre ọ rrọọ, irẹn ẹre ọ vbe re Erha ọghe emwa hia, irẹn sẹ emwa hia, irẹn ẹre ọ ya emwa hia winna, irẹn ẹre ọ vbe winna vbe uwu emwa hia.

7 Osanobua keghi ru ẹse ne kpataki* ne dọmwadẹ ọghẹe vbe uwu ima zẹvbe nọ guaẹro ighẹ ẹse ọhẹ ne Kristi rhie ne dọmwadẹ ọghẹe. 8 Ebe Nọhuanrẹn khare wẹẹ: “Ẹghẹ nọ na kpa gha rrie odukhunmwu, ọ keghi viọ avbe oghunmwu* kpa; ọ na ya ikpia ru emwa ẹse.” 9 De emwi na ya ẹmwẹ na kha, na na wẹẹ, ọ “kpa gha rrie odukhunmwu”? Ọ rhie ma wẹẹ, ọ ka tuorre gha die otọ, ọni ọre uhunmwu otagbọn. 10 Ọmwa nọ tuorre gha die agbọn na, ẹre ọ vbe re ọmwa nọ kpa gha rrie ehe nọ yo sẹ ẹrinmwi hia, nọ mieke na mu emwi hia sẹ.

11 Ọ zẹ eso ne iran gha re ukọ, eso akhasẹ, eso emwa ni kporhu,* eso na gha re ọsuohuan kevbe ọmamwaemwi, 12 ne iran miehe na dia emwa ni huanrẹn ye odẹ,* ne iran vbe gha winna iwinna ugamwẹ, iran ghi vbe ya egbe Kristi khian enọ digiẹ. 13 Erriọ ẹre ọ khian gha ye, a te miẹn wẹẹ ima hia do gha mwẹ iyayi ọkpa, kevbe irẹnmwi nọ gbae ọghe Ovbi Osanobua, ẹghẹ nii, ma ghi do de agikpa, ma ghi vbe sekpe vbe emwi hia vbene Kristi vbe ye. 14 Nọnaghiyerriọ, ọ ma khẹke ne ima ye gha re ibiẹka, ne ima gha lele imamwaemwi ohoghe ne emwa erẹrẹ kevbe emwa ẹkẹ vbe iwẹnwẹn ya bibi emwa odẹ, ne ima ghẹ do gha yevbe okọ nọ rre uwu okun ne ẹhoho kevbe amẹ mu yo mu rre. 15 Sokpan, te ọ khẹke ne ima gha ta ẹmwata, ma ghi vbe gha rhie ẹre ma wẹẹ ima mwẹ ahoẹmwọmwa, ẹghẹ nii, ma ghi do sekpe vbe emwi hia zẹvbe ne ima ya ya egbe taa e Kristi nọ re uhunmwuta ọghe ima. 16 Irẹn ẹre ọ zẹe ighẹ abọ hia ni rre egbe sikan mu egbe, iran na vbe gua egbe ro; irẹn ẹre ọ vbe zẹe ighẹ avbe akhuẹn ni rrọọ winna kugbe, ne iran mieke na ru iyobọ ne egbe ya gha winna ẹse. Adeghẹ edọmwadẹ abọ ni rre egbe na gha winna ẹse, egbe hia ghi do gha waan vbe uwu ahoẹmwọmwa.

17 Rhunmwuda ọni, ẹmwẹ ne I ya eni Enọyaẹnmwa tama uwa na khin, I na vbe tua unu muẹn wẹẹ, ne uwa ghẹ ghi ru emwi vbene emwa ni rre uwu agbọn ru, emwi ihoi ẹre iran rhie ekhọe iran yi. 18 Uwu ebiebi ẹre ekhọe iran ye, iran i mwẹ oghae vbe arrọọ ne Osanobua rhie ne ọmwa, rhunmwuda ne iran ma na zẹdẹ rẹn enaye, kevbe ne ekhọe iran na gbin. 19 Iran ma ghi rẹn emwi na tie ẹre ekhue, te iran ghi wa fa vbe aro,* iran keghi yin uyinmwẹ osọnnọ ughughan, vbene ẹko ẹre i na vuọn iran.

20 Sokpan, zẹvbe na ma uwa ẹre, e Kristi i ye vberriọ, 21 adeghẹ uwa gele danmwehọ ọre, ọ na vbe ma uwa emwi, wa gha rẹn ọna, rhunmwuda, ẹmwata ẹre Jesu ma emwa ẹre. 22 A ma uwa ẹre nẹ, ne uwa ban akpa nẹdẹ mu fua, nọ gua vbene uwa te ka ya gha yin ro; uyinmwẹ ne uwa ghaa yin ma gha maan, rhunmwuda, emwi ne egbe uwa gualọ ẹre ọ ghaa mu uwa rẹrẹ. 23 Te ọ vbe khẹke ne odẹ ne uwa ya roro emwi* ye gha ru ọghe ọgbọn yọ vbe ẹghẹ hia, 24 wa ghi vbe mu akpa ọghe ọgbọn yọ, ọni ọre uyinmwẹ ne Osanobua yi zẹvbe nọ gua iho ọghẹe ro, nọ vbe re uyinmwẹ ata kevbe ọghe ẹkoata.

25 Nọnaghiyerriọ, ugbẹnvbe a miẹn wẹẹ, wa mu uyinmwẹ erẹrẹ fua nẹ, te ọ khẹke ne dọmwadẹ ọghẹe vbe uwu uwa gha ta ẹmwata ma ogieva ẹre, rhunmwuda, abọ ughughan ni rre egbe ọkpa ẹre ima khin. 26 Wa sẹtin mu ohu, sokpan, wa ghẹ ru orukhọ; wa ghẹ gi owẹn de, vbene ohu na ye rre uwa ẹko; 27 wa ghẹ rhie ẹghẹ ne Esu.* 28 We ne ọmwa nọ te ka rhaa ghẹ ghi rhaa; sokpan, we nọ wegbe obọ, ọ ghi gha ya obọ ẹre winna iwinna esi, nọ mieke na vbe miẹn emwi gha rhie ne ọmwa nọ gualọ iyobọ. 29 Wa ghẹ gi ẹmwẹ nọ kẹkẹ gha ke uwa unu ladian, sokpan, wa gha ta ẹmwẹ nọ gha rhie igiọdu ne ọmwa zẹvbe nọ khẹke, ẹghẹ nii, emwa ni họẹn ghi vbe miẹn ere vbọ. 30 Deba ọni, wa ghẹ gha ru emwi nọ gha ya orhiọn nọhuanrẹn ọghe Osanobua gha khiẹ,* orhiọn nọhuanrẹn na ẹre a ya yi uwa ama khẹ ẹdẹ na khian fan uwa lekpa adẹwerriegbe.

31 Wa gbe ukhu ẹre rua ighẹ ikhẹko nọ rhirhi gha khin, ohu, izohu, ọkan na vannọ, ẹmwẹ ihẹn, kevbe emwi dan hia nọ rhirhi gha khin. 32 Sokpan, wa gha ya obọ esi mu egbe, wa vbe gha ya ekhọe agiẹngiẹn tohan egbe, wa ghi gha ya ekhọe hia yabọ egbe, zẹvbe ne Osanobua vbe ya ekhọe hia yabọ uwa lekpa e Kristi.

5 Nọnaghiyerriọ, wa gha ya egbe taa Osanobua zẹvbe emọ nọ hoẹmwẹ ọnrẹn, 2 wa ghi ye gha rhie ahoẹmwọmwa ma vbe ẹdagbọn uwa, zẹvbe ne Kristi vbe hoẹmwẹ ima,* ọ na ya arrọọ ọghẹe fiohan ne ima,* zẹvbe izọhẹ kevbe izọese nọ winhin vbe odaro Osanobua.

3 Wa ghẹ gia zẹdẹ họn ẹmwẹ alama oghẹ,* uyinmwẹ osọnnọ nọ rhirhi gha khin kevbe arovbẹmwẹ vbe uwu ẹbu uwa, zẹvbe nọ khẹke nọ gha ye ne emwa ni huanrẹn; 4 wa ghẹ vbe gha yin uyinmwẹ efa, ọ ma vbe khẹke na gha họn ẹmwẹ oya ra ọdẹn nọ ma khianrẹn vbe unu uwa, egbe emwi vberriọ ma khẹke hiehie; sokpan, te ọ khẹke ne uwa gha rhie ekpọnmwẹ ne Osanobua. 5 Rhunmwuda, vbe nai na gbe awawẹ, wa tobọ uwa rẹnrẹn wẹẹ, ọmwaikọmwa nọ gbe alama oghẹ,* ra ọmwa nọ ma huan, ra ọmwa arovbẹmwẹ na gha sẹtin vbe tie ẹre ọmwa igẹbọ, nọ gha mwẹ oghae vbe Arriọba e Kristi kevbe ọghe Osanobua, ẹ i rrọọ.

6 Wa ghẹ gi ọmwa rhọkpa ya ẹmwẹ ohoghe mu uwa rẹrẹ, rhunmwuda, Osanobua gha rhunmwuda emwi vberriọ hihiẹ izohu ọghẹe yan emwa nẹi họn ẹmwẹ. 7 Nọnaghiyerriọ, wa ghẹ gu iran mu obọ; 8 uwu ebiebi ẹre uwa ka gha ye,* sokpan, ne uwa na ghi khian ọghe Enọyaẹnmwa nẹ, uwu ukpa ẹre uwa ghi ye.* Nọnaghiyerriọ, wa gha ru emwi zẹvbe ivbi ukpa, 9 rhunmwuda, uwu ukpa ẹre a na miẹn emwi hia nọ maan, nọ khẹke kevbe nọ re ọghe ẹmwata. 10 Wa ye gha hia ne uwa gha rẹn emwi nọ yẹẹ Enọyaẹnmwa; 11 wa ghẹ gha mwẹ oghae vbe emwi oya na ru vbe uwu ebiebi; nọghayayerriọ, wa ghi gha vẹ ọre rua. 12 Rhunmwuda, ekhue i gia sunu ye emwi ne emwa ru vbe ẹkhokho. 13 Ukpa ẹre ọ vẹ emwi hia na ru vbe uwu ebiebi rua, ẹghẹ nii, a ghi do rẹn vbene ehia gele ye hẹ. 14 Rhunmwuda ọni, Ebe Nọhuanrẹn khare wẹẹ: “Rhiọrre, wẹ nọ vbiẹ, ne u kpaegbe, wẹ ne orinmwi, ne awanwan ọghe Kristi mieke na wan yan ruẹ.”

15 Nọnaghiyerriọ, wa gha gbarokotọ ẹse vbe odẹ ne uwa ya ru emwi, ne uwa ghẹ mieke na gha yin zẹvbe emwa nẹi mwẹ ẹwaẹn, sokpan, wa ghi gha yin zẹvbe umẹwaẹn, 16 wa ghi gha loo ẹghẹ ọghe uwa ẹse, rhunmwuda, ẹghẹ ne ima ye na wegbe gbe. 17 Rhunmwuda ọni, wa ghẹ gha ru emwi ukọnmwẹ, sokpan, wa ghi hia ne uwa rẹn emwi ne Jehova* hoo. 18 Deba ọni, wa ghẹ gha da ayọn gbe egbe, rhunmwuda, te ọ ya ọmwa yin uyinmwẹ ọrhiae,* sokpan, wa gha re nọ vuọn ne orhiọn nọhuanrẹn vbe ẹghẹ hia. 19 Wa gha ya ẹmwẹ e psalm gu egbe* guan, wa ghi gha rhie urhomwẹ ne Osanobua, wa ghi vbe gha so ihuan ugamwẹ.* Wa ghi gha so ihuan gie Jehova* vbe ekhọe uwa, wa ghi vbe gha kpee ẹgiọn ba ẹre. 20 Wa ghi gha rhie ekpọnmwẹ ne Osanobua ne Erha mwa ye emwi hia vbe ẹghẹ hia, vbe eni Enọyaẹnmwa e Jesu Kristi.

21 Wa gha mu egbe rriotọ ne egbe, rhunmwuda ne uwa na mu ohan e Kristi. 22 Ọ khẹke ne avbe amwẹ gha gbe uhunmwu kotọ ne ọdafẹn iran, zẹvbe ne iran vbe gbe uhunmwu kotọ ne Enọyaẹnmwa, 23 rhunmwuda, ọdọ ọre uhunmwuta ọghe amwẹ ọnrẹn zẹvbe ne Kristi vbe re uhunmwuta ọghe iko, irẹn ọre ọmiọnmwafan ọghe iko, nọ re egbe ẹre. 24 Vbene iko ya gbe uhunmwu kotọ ne Kristi, erriọ ẹre ọ vbe khẹke ne avbe amwẹ gha gbe uhunmwu kotọ ne ọdafẹn iran vbe emwi hia. 25 Wa ne avbe ọdọ, wa ye gha hoẹmwẹ amwẹ ọghe uwa, zẹvbe ne Kristi hoẹmwẹ iko, nọ na ya arrọọ ọghẹe fiohan nẹẹn, 26 nọ mieke na yae khian nọhuanrẹn, ọ ghi ya amẹ ọghe ẹmwẹ Osanobua kpe ẹre huan, 27 ne iko mieke na gha re nọ mose vbe aro ọre, nẹi mwẹ orra, ra okan rhọkpa, ra emwi ni ye vberriọ, sokpan, ọ ghi gha re nọhuanrẹn kevbe nẹi mwẹ ehe nọ kẹ ọre yi.

28 Erriọ ẹre ọ vbe khẹke ne ikpia vbe hoẹmwẹ ọvbokhan iran vbene iran hoẹmwẹ egbe iran. Okpia nọ hoẹmwẹ ọvbokhan rẹn, egbe ẹre, ẹre ọ hoẹmwẹ ọnrẹn, 29 rhunmwuda, a i miẹn okpia nọ ma hoẹmwẹ egbe ẹre,* sokpan, te ọ koko ẹre, ọ ghi vbe gha gbaroghe ẹre, zẹvbe ne Kristi vbe ru ne iko, 30 rhunmwuda, abọ ughughan ni rre egbe ẹre, ẹre ima khin. 31 “Ọna ẹre ọ si ẹre ne okpia gha na sẹ erhae kevbe iyẹe rae, ọ ghi rhikhan mu ọvbokhan rẹn,* iran eva ghi do gha re ọkpa.”* 32 Ẹmwẹ oro nọhuanrẹn na keghi re nọ hin usi. Ẹmwẹ e Kristi kevbe iko, ẹre imẹ guan kaẹn na. 33 Vbọrhirhighayehẹ, te ọ khẹke ne dọmwadẹ ọghẹe vbe uwu uwa hoẹmwẹ ọvbokhan rẹn zẹvbe nọ hoẹmwẹ egbe ẹre, emwi nẹi mwẹ a ma ru na khin; okhuo ghi vbe kakabọ gha rhie ọghọ ne ọdọ ẹre.

6 Emọ, wa gha họn ẹmwẹ ne evbibiẹ uwa zẹvbe ne Enọyaẹnmwa hoo, rhunmwuda, emwi nọ gbae na khin. 2 “Rhie ọghọ ne erhaa kevbe iyuẹ,” ọna ọre uhi nokaro; eyan nọ lele uhi na ọre wẹẹ: 3 “Ne agbọn miehe na maan ruẹ,* ne u miehe na vbe tọ vbe agbọn na.” 4 Wa ne erha emọ, wa ghẹ gha ru emwi nọ ya ohu mu ivbi uwa,* sokpan, wa gha dia iran ye odẹ, ne uwa vbe gha ma iran emwi zẹvbe ne Jehova* gualọe yi.

5 Wa ne eviẹn, wa gha họn ẹmwẹ ne arowa uwa ni rre agbọn na, wa gha ya ohanmumwẹ, uguọmwẹ kevbe ekhọe ata họn ẹmwẹ ne iran, zẹvbe ne uwa vbe ru lele Kristi, 6 ẹ i re vbe a ghaa ghee uwa ọkpa, ọghe wẹẹ, na ya ẹko rhiẹnrhiẹn emwa nagbọn,* sokpan, wa gha họn ẹmwẹ zẹvbe eviẹn e Kristi ni ya ekhọe hia ru emwi ne Osanobua hoo. 7 Wa gha ya ẹkorhiẹnrhiẹnmwẹ winna iwinna uwa, vbe na miẹn wẹẹ, e Jehova* ẹre uwa ru ẹre na, ẹ i re emwa nagbọn. 8 Wa rẹnrẹn wẹẹ, e Jehova* gha san edọmwadẹ ọghẹe ẹse ye emwi esi nọ rhirhi ru, ọre ọviẹn nọ, ra ẹ i re ọviẹn. 9 Wa ne arowa, obọ vberriọ ẹre ọ vbe khẹke ne uwa ya gha mu iran, wa ghẹ gha yẹnyẹn aro mu iran, rhunmwuda, wa rẹnrẹn wẹẹ, wa vbe iran mwẹ Arowa ọkpa vbe ẹrinmwi, obọ ọkpa ẹre irẹn ya mu emwa hia.

10 Vbe okiekie ehia, wa gi Enọyaẹnmwa gha rhie ẹtin ne uwa vbe uwu ẹtin ẹnrẹn nọkhua. 11 Wa hẹ ọre ye egbe ighẹ emwi igbinna hia nọ ke obọ Osanobua rre, ne egbe uwa mieke na sẹtin rrọ emwi ero ne Esu ru; 12 rhunmwuda, ma mwẹ evẹn ne ima vẹn, ẹ i re emwa nagbọn kẹkan ni mwẹ efun kevbe esagiẹn ẹre ima gu vẹn, sokpan, emwa ne ima gu vẹn ọre avbe arriọba, avbe ọdakha, avbe eni khaevbisẹ ọghe agbọn nọ so ebiebi na, avbe orhiọn dan ni rre ibozo ọghe ẹrinmwi. 13 Rhunmwuda ọni, wa viọ ọre mwẹ ighẹ emwi igbinna hia nọ ke obọ Osanobua rre, ne uwa miehe na sẹtin khẹ ye egbe vbe ẹdẹ nọ wegbe nii, ẹghẹ nii, wa gha ghi ru emwi hia fo nẹ, wa ghi sẹtin mudia gbain.

14 Rhunmwuda ọni, wa mudia gbain, ne uwa ya ugbẹkun ọghe ẹmwata gba ẹkun, wa ghi vbe muẹn yọ ighẹ uhanhan ẹwẹ ọghe iruemwiẹse. 15 Wa ghi gba ibata ye owẹ, ne uwa ya rhie ẹre ma wẹẹ, wa mu egbe ne uwa khian ya kporhu iyẹn nọ maan ọghe ọfunmwegbe. 16 Gberra ena hia, wa ghi muẹn mwẹ ighẹ asa nọkhua ọghe amuẹtinyan, ne uwa khian ya sẹtin dọ ẹre yọ ighẹ avbe ifẹnmwẹ erhẹn ne ọmwa dan nii filo. 17 Deba ọni, wa rhan obọ miẹn ẹrhu ematọn ọghe imiẹnfan yi kevbe umozo ọghe orhiọn, ọni ọre ẹmwẹ Osanobua. 18 Wa vbe gha na erhunmwu ughughan vbe ẹghẹ hia, ya sẹ egbe erhunmwu erinmwian, wa ghi gha naẹn zẹvbe ne orhiọn nọhuanrẹn ya gua uwa kpa. Rhunmwuda ọni, wa gha bodẹ, wa ghi vbe gha mu ẹmwẹ emwa ni huanrẹn hia ye erhunmwu vbe ẹghẹ hia. 19 Wa vbe gha mu ẹmwẹ mwẹ ye erhunmwu, ne Osanobua mieke na rhie ẹmwẹ yọ mwẹ unu vbe I gha khian guan; ẹghẹ nii, I ghi sẹtin gha ya udinmwẹ guan, zẹvbe ne I ya ya ẹmwẹ oro nọhuanrẹn ọghe iyẹn nọ maan wewe. 20 Rhunmwuda iyẹn nọ maan na ẹre a na gie mwẹ ne I gha re ukọ, ẹre a vbe rhunmwuda ẹre ya ọgiọrọ rrọ mwẹ. Wa gha na erhunmwu mẹ ne I sẹtin gha ya udinmwẹ kporhu iyẹn nọ maan na zẹvbe nọ khẹke.

21 E Tikikọs ne ọtẹn nọ ghaan kevbe ọguọmwadia nọ ya ekhọe hia winna ne Enọyaẹnmwa, gha do tama uwa vbekpa mwẹ, ne uwa mieke na rẹn vbene emwi ghi vbe ye mwẹ hẹ, ọ gha na iyẹn emwi hia ma uwa. 22 Ọni ẹre ọ si ẹre ne I na gie ẹre bu uwa dee, nọ miehe na tama uwa vbene ima hia ye hẹ vbe ediran, nọ vbe fu uwa ẹko rre.

23 Te Osanobua ne Erha mwa kevbe Enọyaẹnmwa e Jesu Kristi, gha rhie ọfunmwegbe, ahoẹmwọmwa kevbe amuẹtinyan ne etẹn hia. 24 Te Osanobua gha ru ẹse ne kpataki* ne emwa hia ni mwẹ ahoẹmwọmwa nẹi fafa ghee Enọyaẹnmwa e Jesu Kristi.