EBE NA GBẸN GIE IVBI E GALETIA

1 E Pọl ẹre ọ gbẹn ebe na. Jesu Kristi kevbe Osanobua ne Erha mwa, nọ huẹn Jesu kpaegbe vbe idin, ẹre ọ zẹ mwẹ ne I gha re ukọ, ẹ i re emwa nagbọn. 2 Ke imẹ kevbe etẹn hia ni rre ehe ne I ye, giotuẹ avbe iko ni rre Galetia:

3 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre. 4 Te Kristi wu ye orukhọ ọghe ima, nọ mieke na miẹn ima fan vbe agbọn dan na* ne ima sẹ fi, zẹvbe ne Osanobua ne Erha mwa hoo. 5 Irẹn ẹre a gha rhie uyi na vbe etẹbitẹ ya sẹ etẹghori. Isẹ.

6 Te ọ wa kpa mwẹ odin, vbene uwa ya rherhe fi iyeke gbe Ọmwa nii nọ lekpa ẹse ne kpataki* ọghe Kristi tie uwa, wa na wa miẹn iyẹn ọvbehe yi vbene a miẹn wẹẹ iyẹn nọ maan nọ. 7 Ẹ i re wẹẹ, te iyẹn nọ maan ọvbehe te gele rrọọ; sokpan, emwa eso rrọọ ni ma gi egbe rọkhọ uwa, ni hoo ne iran gua iyẹn nọ maan ne uwa họn vbekpa e Kristi. 8 Sokpan, adeghẹ ọmwa na rre, ọre ọkpa vbe ima nọ, ra odibosa ẹre ọ ke ẹrinmwi rre do gha tama uwa vbekpa iyẹn nọ maan nọ lughaẹn ne ne ima ka tama uwa, te ọ khẹke na fi ẹre unu. 9 Emwi ne ima ka ta, ẹre I khian ye werriegbe ta: Ọmwaikọmwa nọ rre do gha tama uwa vbekpa iyẹn nọ maan nọ lughaẹn ne ne uwa ka miẹn yi, te ọ khẹke na fi ẹre unu.

10 Emwa nagbọn ẹre imẹ hoo nọ gha so eni mwẹ nọ maan ra, ra Osanobua? Ra, te I ghi hoo ne I ya ẹko rhiẹnrhiẹn emwa nagbọn? Adeghẹ emwa nagbọn ẹre I hoo ne I ya ẹko rhiẹnrhiẹn, ọni rhie ma wẹẹ, I i ghi re ọviẹn e Kristi. 11 Etẹn, I hoo ne I gi uwa rẹn wẹẹ, ẹ i re obọ emwa nagbọn, ẹre iyẹn nọ maan ne I ya wewe ma uwa ke rre; 12 I ma miẹn ọnrẹn vbe obọ ọmwa nagbọn rhọkpa, a ma vbe ma mwẹ ẹre, sokpan, Jesu Kristi ẹre ọ muẹn ma mwẹ.

13 Vbene ẹmwata, wa họn vbene I ghaa ru hẹ vbe ẹghẹ ne I na gha rre ugamwẹ ọghe Ivbi e Ju, I na gha ya ẹtin mwẹ hia zẹ iko ọghe Osanobua kpokpo,* I na gha mu ehia rueghe; 14 ọ gha vbe de ọghe ugamwẹ Ivbi e Ju, ẹ i re avbiẹ ẹre I ya sẹ ihua mwẹ ne ima gba re ivbi ẹvbo ọkpa, te imẹ wa vbe mu ilele ọghe avbe erha mwẹ odede yan uhunmwu sẹ iran nikẹre. 15 Sokpan, Osanobua nọ rhie mwẹ ladian vbe uwu ẹko iye mwẹ, nọ vbe tie mwẹ lekpa ẹse ne kpataki* ọghẹe, keghi ru mwẹ ẹse, 16 ọ na zẹ mwẹ, ne I ya kporhu iyẹn nọ maan ma ivbi agbẹnvbo ọvbehe, ne iran mieke na rẹn Ovbi ẹre. Vbe ọ zẹ mwẹ ne I ru iwinna na, I ma bu ọmwa rhọkpa* vbobọvbobọ nii, nọ bu mwẹ ude; 17 I ma vbe bu avbe ukọ ni karo mẹ ni rre Jerusalẹm, sokpan, I na wa gha rrie Arebia, iyeke ọni, I na werriegbe gha die Damaskọs.

18 Vbọ ghi rre ukpo eha vba, I na ya tuẹ e Sifas* vbe Jerusalẹm, I na gbe ikpẹdẹ ekesugie (15) vbe ehe nọ ye. 19 Sokpan, I ma miẹn avbe ukọ nikẹre, vbọ gberra e Jems ne ọtiẹn Enọyaẹnmwa. 20 I hoo ne I gi uwa rẹn wẹẹ, ẹmwata ẹre avbe emwi ne I gbẹn gie uwa na khin; odaro Osanobua ẹre I na ta ẹmwẹ na.

21 Iyeke ọni, I na gha rrie ikinkin ọghe Siria kevbe Silisia. 22 Vbe ẹghẹ na kha na nian, avbe iko ọghe Kristi* ni rre Judia ma he rẹn mwẹ vbe aro. 23 Emwi ọkpa ne iran ghaa họn vbekpa mwẹ ọre: “Okpia nii nọ te zẹ ima kpokpo, ẹre ọ ghi kporhu iyẹn nọ maan vbekpa iyayi ne irẹn te ka gbodan ghee.” 24 Ẹre iran na suẹn gha rhie urhomwẹ gie Osanobua rhunmwuda mwẹ.

2 Ukpo iwenẹ (14) ghi gberra nẹ, I na werriegbe gha rrie Jerusalẹm, ke imẹ kevbe Banabas, I na vbe rhie Taitọs lele egbe. 2 Te I ghaa khian rhunmwuda emwi na mu ma mwẹ, I na ya gi iran rẹn vbekpa iyẹn nọ maan ne I kporhu ẹre ma ivbi agbẹnvbo ọvbehe. Sokpan, I ma wa ru ọna vbe idagbo, avbe adazẹ ẹre I ta ẹmwẹ iyẹn nọ maan na ma, rhunmwuda, I ma hoo ne iwinna ne I ru vbe obọ, ra ne I ka ru nẹ do khian ena ru kua kẹkan. 3 Uhiẹn, agharhemiẹn wẹẹ Ovbi e Grik ẹre Taitọs nọ ghaa lele mwẹ khian khin, a ma gbagbae ye ọre egbe nọ rhuẹ. 4 Sokpan, ẹmwẹ nii keghi tọn ukpẹ mu rhunmwuda emwa eso ni ba ru vbe na ghee etẹn, na gie rre ne iran fẹko rẹnrẹn la uwu ẹbu ima, ne iran do ba ima ghee zẹvbe emwa na fan, ni ya egbe ba e Kristi Jesu, ne iran mieke na ya ima khian eviẹn; 5 ma ma rhie ẹghẹ ne iran, uhiẹn vbe ovbi ẹghẹ kherhe,* ne ẹmwata ọghe iyẹn nọ maan mieke na ye gha gu uwa rrọọ.

6 Sokpan, nọ ne iran ne emwa ghee ẹre okpọmwa, vbe uwu emwi hia ne iran tama mwẹ, ne I ma ka rẹn i rrọọ. Emwi ke emwi ne iran ka gha khin, ọni ma kaan mwẹ, rhunmwuda, ẹ i re ikpakpa ẹre Osanobua ghee. 7 Sokpan, iran keghi bẹghe ẹre wẹẹ, te a gie mwẹ ne I ya kporhu iyẹn nọ maan ma emwa ni ma rhuẹ, zẹvbe na vbe gie Pita nọ ya kporhu iyẹn nọ maan ma emwa ni rhuẹ re. 8 (Ọmwa nii nọ rhie ẹtin ne Pita, nọ ya gha re ukọ na gie gie emwa ni rhuẹ re, ẹre ọ vbe rhie ẹtin mẹ ne I ya gha re ukọ na gie gie ivbi agbẹnvbo ọvbehe.) 9 Vbe iran ghi vbe bẹghe ẹse ne kpataki* ne Osanobua ru mẹ, e Jems, e Sifas* kevbe Jọn ne emwa wa ghee zẹvbe emwa ni da iko yi, keghi so imẹ vbe Banabas obọ, ne iran ya rhie ẹre ma wẹẹ, emwa ni gba winna kugbe ẹre ima hia khin,* ne ima mieke na bu ivbi agbẹnvbo ọvbehe gha khian, iran ghi vbe bu emwa ni rhuẹ re gha khian. 10 Emwi ọkpa ne iran ghi tama ima, ọre ne ima gha mwẹ ẹmwẹ ivbiogue vbe orhiọn, ọna ọre emwi ne imẹ tobọ imẹ vbe hia ne I gha ru.

11 Sokpan, vbe Sifas* ghi sẹ Antiọk, I na gu ẹre gui ghee mwẹ ghee ruẹ, rhunmwuda, te ọ wa dewarorua wẹẹ, emwi nọ ru ma khẹke. 12 Ẹghẹ ne emwa ne Jems gie rre ma na he rre, ọ kegha gu ivbi agbẹnvbo ọvbehe rri evbare; sokpan, vbe iran ghi rre nẹ, ọ na dobọ yi, ọ ma ghi gha gu iran mu obọ, rhunmwuda ne ohan emwa ni rhuẹ re na gha muẹn. 13 Ivbi e Ju nikẹre na vbe deba ẹre vbe uyinmwẹ okeke na, vbe ya sẹ egbe Banabas. 14 Sokpan, vbe I ghi bẹghe ẹre wẹẹ iran i ru emwi lele uviẹn ọghe ẹmwata nọ dekaẹn iyẹn nọ maan, I na ghi sirra iran hia tama e Sifas* wẹẹ: “Adeghẹ uwẹ ne Ovbi e Ju na gha yin vbe na ghee ivbi agbẹnvbo ọvbehe, sokpan, u i ru emwi vbe na ghee Ovbi e Ju, vbua khian ghi ya sẹtin tama ivbi agbẹnvbo ọvbehe hẹ, ne iran gha lele ilele ọghe Ivbi e Ju?”

15 Ivbi e Ju eseserese ẹre ima khin, ma i yevbe emwa orukhọ ni ke agbẹnvbo ọvbehe rre. 16 Ma rẹnrẹn wẹẹ, ẹ i re ọmwa lele uhi ẹre a ya kae ye ọmwa ata, sokpan, ọmwa gha mu ẹtin yan e Jesu Kristi ẹre a khian na kae ye ọmwa ata. Rhunmwuda ọni, ma mu ẹtin yan e Kristi Jesu, na mieke na ka ima ye emwa ata rhunmwuda ne ima na mu ẹtin yan e Kristi, ẹ i re rhunmwuda wẹẹ ima lele uhi; rhunmwuda, ọmwa* rhọkpa i rrọo na khian ka ye ọmwa ata rhunmwuda wẹẹ ọ lele uhi. 17 Adeghẹ te a ghi ghee ima zẹvbe emwa orukhọ, rhunmwuda ne ima na hoo na lekpa e Kristi ka ima ye emwa ata, te ọni ghi rhie ma wẹẹ, e Kristi ẹre ọ ghi bọ ima ye orukhọ ra? Hiehie! 18 Adeghẹ emwi ne I te ka guọghọ sotọ, ẹre I ghi werriegbe bọ, ọni rhie ma wẹẹ ọmwa nọ rra uhi ẹre I khin. 19 Rhunmwuda ne I na gha lele uhi, I keghi wu vbe nọ dekaẹn ẹmwẹ uhi, ne I mieke na gha rre agbọn, ne I sẹtin gha ga Osanobua.* 20 Te a kan mwẹ mu erhan ba e Kristi. Rhunmwuda ọni, ẹ i re imẹ ẹre ọ ghi rre agbọn, sokpan, e Kristi ẹre ọ ghi rrọọ vbe uwu imẹ. Vbene ẹmwata, vbe agbọn ne I ye na, emwi ne I ya ẹdagbọn mwẹ hia ru, ọre ne I yae mu ẹtin yan Ovbi Osanobua, irẹn ọre ọmwa nọ hoẹmwẹ mwẹ, ọ na vbe ya ẹdagbọn rẹn fiohan mẹ. 21 I ma he ẹre yotọ* ighẹ ẹse ne kpataki* ọghe Osanobua. Adeghẹ rhunmwuda wẹẹ ọmwa lele uhi ẹre a khian ya kae ye ọmwa ata, ọni rhie ma wẹẹ, te Kristi wu kua kẹkan.

3 Wa ne Ivbi e Galetia ne ẹwaẹn wiri! De ọmwa nọ wa sẹtin bibi uwa odẹ vbenian? Wa na wa rhan otọ re ma ẹsẹsẹmwẹse, vbene a ya kan e Jesu Kristi mu erhan hẹ. 2 I hoo ne I nọ uwa ọta ọkpa:* Rhunmwuda ne uwa na gha lele uhi, ẹre ọ ya orhiọn nọhuanrẹn sẹ uwa obọ ra, ra rhunmwuda ne uwa na mu ẹtin yan emwi ne uwa họẹn? 3 Erriọ ẹre uwa kọẹn ra? Wa ne orhiọn nọhuanrẹn wa gha loo vbe uwa da suẹn, vbe a ghi na miẹn nian wẹẹ, vbe okiekie, wa na do gha ya iziro ọghe emwa nagbọn ru emwi? 4 Vbene uwa rri oya sẹ! Te uwa ghi wa rri oya nii hia kua kẹkan ra? Mẹ ma yayi wẹẹ, te uwa rriọẹ kua kẹkan. 5 De emwi ne uwa yayi wẹẹ, ọ ya Osanobua rhie orhiọn nọhuanrẹn ne uwa, kevbe nọ na winna iwinna ọyunnuan ughughan vbe ehe ne uwa ye? Rhunmwuda ne uwa na lele uhi nọ ra, ra rhunmwuda ne uwa na mu ẹtin yan emwi ne uwa họẹn? 6 Te ọ wa vbe yevbe emwi nọ sunu daa Ebraham, ọ keghi “mu ẹtin yan e Jehova,* ẹre a na kae ye ọmwa ata.”

7 Vbene ẹmwata, wa rẹnrẹn wẹẹ, emwa ni mwẹ amuẹtinyan ọre ivbi Ebraham. 8 Osanobua ka tae yotọ vbe ebe nọhuanrẹn wẹẹ, irẹn gha ka ivbi agbẹnvbo ọvbehe ye emwa ata rhunmwuda amuẹtinyan ne iran mwẹ. Vbene ọ te sẹ ẹghẹ, ọ na ka na iyẹn nọ maan na ma Ebraham, vbe ẹghẹ nọ na kha wẹẹ: “A gha la obọ ruẹ fiangbe agbẹnvbo hia.” 9 Rhunmwuda ọni, a gha fiangbe emwa ni mwẹ amuẹtinyan, zẹvbe na vbe fiangbe Ebraham nọ ghaa mwẹ amuẹtinyan.

10 Emwa hia ni roro ẹre wẹẹ, emwi ọvbehe i ghi rrọọ vbọ gberra na wa gha lele uhi, te a fi iran unu, rhunmwuda, Ebe Nọhuanrẹn khare wẹẹ: “Ọmwaikọmwa nẹi ya emwi hia na gbẹnnẹ ye ebe Uhi ru emwi vbe ẹghẹ hia, te a gha fi ẹre unu.” 11 Yevbesọni, ọ vẹ na rẹn wẹẹ, ẹ i re na gha lele uhi ẹre ọ khian ya Osanobua ka ọmwa ye ọmwa ata, rhunmwuda, “amuẹtinyan ne ọmwa ata mwẹ, ẹre ọ khian yae gha rrọọ.” 12 Uhi e Mozis ma hẹnhẹn egbe yan amuẹtinyan.* Nọghayayerriọ, a gbẹn ọnrẹn yotọ wẹẹ, “ọmwaikọmwa nọ ru avbe emwi na, gha lekpa iran gha rrọo.” 13 E Kristi keghi dẹ ima werriegbe, ọ na fan ima vbe obọ ihẹn nọ lele Uhi khian, irẹn tobọ irẹn na ya uhunmwu ẹnrẹn mu ihẹn nii nọ te khẹke ima, rhunmwuda, a gbẹn ọnrẹn yotọ wẹẹ: “Ọmwaikọmwa na si rrọ ye uhunmwu erhan, te a fi ẹre unu.” 14 Te ọ sunu vberriọ, ne afiangbe ne Osanobua ve Ebraham re mieke na la obọ e Kristi Jesu sẹ ivbi agbẹnvbo ọvbehe obọ, ne orhiọn nọhuanrẹn ne Osanobua ve ima re mieke na vbe lekpa amuẹtinyan ne ima mwẹ sẹ ima obọ.

15 Etẹn, I khian ya emwi na miẹn vbe ẹdẹgbegbe ru igiemwi ma uwa: A gha ghi mu olọ gbe ile nẹ, ọ gha khọnrẹn wẹẹ ọmwa nagbọn ẹre ọ mu olọ gbe ẹre, ọmwa rhọkpa i sẹtin so ẹre gọ, ra nọ rhie ba ẹre. 16 Ebraham kevbe ovbi ẹre,* ẹre Osanobua ru eyan ma. Vbe ọ ru eyan nii, ọ ma kha wẹẹ, “kevbe ivbuẹ,”* vbene a miẹn wẹẹ emwa nibun ẹre ọ ru eyan nii ma. Sokpan, ọ na wẹẹ, “kevbe ovbuẹ,”* ọni rhie ma wẹẹ, orhunmwu ọkpa ẹre ọ guan kaẹn, ọni ọre Kristi. 17 Emwi ne I khian vbe rhie ba ẹre na khin: Uhi e Mozis na ghi do mu gbọọ vbe iyeke ukpo ọgban nọ ya yan iyisẹn enẹ (430), ma so ẹre gọ ighẹ ile ne Osanobua ka ta, nọ do ya eyan ne Osanobua yan rẹn khian nẹi ghi mwẹ esa. 18 Adeghẹ uhi ẹre ọ ya arevbukhu ne Osanobua rhie ne ọmwa sẹ ọmwa obọ, ẹ i ghi re rhunmwuda eyan nọ yan rẹn ẹre arevbukhu nii na ghi sẹ ọmwa obọ; sokpan, te Osanobua ya ekhọe hia rhie ẹre ne Ebraham rhunmwuda eyan nọ yan ma rẹn.

19 Vbe a ghi gu yi Uhi nii ne emwa? Te a yi Uhi nii na mieke na rẹn eke na na ru khọọ, a te miẹn wẹẹ ọ rre ighẹ ọmọ* nii na ru eyan nii ma; obọ avbe odibosa ẹre Osanobua la rhie Uhi nii rre, vbene ọmwa na gha rre uwu ẹkpo iran. 20 Ọ ghaa re orhunmwu ọkpa kẹkan nọ, a i vbe gualọ ọmwa nọ khian gha rre uwu ẹkpo, sokpan, ọkpa ẹre Osanobua khin. 21 Te nene Uhi ghi gbodan ghee eyan ọghe Osanobua ra? Hiehie! Rhunmwuda, adeghẹ uhi nọ gha sẹtin ya ọmwa gha rrọọ ẹre a yi, ọni rhie ma wẹẹ, a gha sẹtin ka ọmwa ye ọmwa ata deghẹ ọ na gha lele uhi. 22 Sokpan, Ebe Nọhuanrẹn keghi viọ emwi hia ye obọ orukhọ nọ gha khaevbisẹ yan iran, ne iran ni mwẹ amuẹtinyan mieke na miẹn ive na ve emwa hia ni mu ẹtin yan e Jesu Kristi re.

23 Sokpan, a te miẹn wẹẹ amuẹtinyan rre, uhi keghi mu ima gba zẹvbe oleghan, ma na gha rre ototọ ẹre, ma na gha khẹ ẹghẹ ne amuẹtinyan khian ya rhiegbe ma. 24 Erriọ ẹre nene Uhi ya khian enọ ghi dia ima,* nọ su ima bu e Kristi, na mieke na ka ima ye emwa ata deghẹ ima na gha mwẹ amuẹtinyan. 25 Ugbẹnvbe amuẹtinyan ghi rre nẹ nian, ma i ghi rre ototọ Uhi nii nọ te dia ima.*

26 Vbene ẹmwata, ivbi Osanobua ẹre uwa hia khin, rhunmwuda ne uwa na mu ẹtin yan e Kristi Jesu. 27 Rhunmwuda, wa hia na dinmwi ye uwu e Kristi, mu e Kristi yọ nẹ. 28 Ọre Ovbi e Ju ẹre u khin ra Ovbi e Grik, ra ọviẹn ra ọmwa nẹi re ọviẹn, ra okpia ra okhuo, alughaẹn i rrọọ, ọkpa ẹre uwa hia khin zẹvbe emwa ni gu e Kristi Jesu rrọọ vbe akugbe. 29 Yevbesọni, adeghẹ ọghe Kristi ẹre uwa khin, ọni rhie ma wẹẹ ivbi Ebraham* ẹre uwa gele khin; emwi ne Osanobua ve gha sẹ uwa obọ.

4 Ọmọ nọ khian rri ukhu erhae gha ye gha re ọvbokhan, ọ ma lughaẹn ne ọviẹn, agharhemiẹn wẹẹ irẹn ẹre ọ yan emwi hia. 2 Nọ na re ọvbokhan, emwa rrọọ ni gbaroghe ẹre kevbe ni ru emwi hia ye ọre obọ, a te miẹn wẹẹ ọ sẹ ẹghẹ ne erhae rhie yọ. 3 Erriọ vbe ye, vbe ima rre ọvbokhan, eviẹn ọghe emwi agbọn na ẹre ima te gha khin. 4 Sokpan, ẹghẹ na rhie yọ ghi gba, Osanobua na gie Ovbi ẹre rre; ọmwa nagbọn ẹre iyẹe ghaa khin, ọmọ nii vbe gha rre ototọ uhi. 5 Te Osanobua gie ẹre rre, nọ mieke na dẹ emwa ni rre ototọ uhi werriegbe, ẹghẹ nii, Osanobua ghi ya ima ye emọ.

6 Ugbẹnvbe a miẹn wẹẹ, ivbi Osanobua ẹre uwa ghi khin, Osanobua keghi rhie orhiọn ọghe Ovbi ẹre ye ekhọe ima; nene orhiọn keghi datu wẹẹ: “Abba,* Evbavba!” 7 Rhunmwuda ọni, wa i ghi re eviẹn, sokpan, emọ ẹre uwa ghi khin; adeghẹ emọ ẹre uwa khin, ọni rhie ma wẹẹ, Osanobua gha vbe ghae ukhu ne uwa zẹvbe emọ.

8 Ọrheyerriọ, vbe ẹghẹ ne uwa ma na rẹn Osanobua, wa na gha re eviẹn ọghe avbe osa ọghe ohoghe. 9 Sokpan, ugbẹnvbe a miẹn wẹẹ, wa rẹn Osanobua nẹ, ra ne I wa kha wẹẹ, vbe Osanobua ghi rẹn uwa nẹ, vbọ ghi zẹ na na miẹn wẹẹ, wa ye hoo ne uwa gha mwẹ obọ vbe avbe emwi agbọn na, ne vburriẹ vburriẹ ni ma khianrẹn ne uwa te ka sẹrae nẹ, ne uwa na vbe hoo ne uwa werriegbe khian eviẹn iran? 10 Ọ mwẹ ẹdẹ eso, uki eso, ẹghẹ eso kevbe ukpo eso ne uwa roro wẹẹ ọ wa ru ekpataki, ekhọe hia ẹre uwa ya do ugie vbọ gha sẹ ẹghẹ vberriọ. 11 Afianma uwa wa fian mwẹ, rhunmwuda, te ọ yevbe na miẹn wẹẹ, te I wa muẹn rhia ighẹ ẹrhiọn hia ne I he loo ya ru iyobọ ne uwa.

12 Etẹn, wa lahọ, wa do gha yevbe ne imẹ vbe ye, rhunmwuda, mẹ ka vbe gha ye vbene uwa ye. Wa ma ru mwẹ emwi khọọ hiehie. 13 Wa rẹnrẹn wẹẹ, rhunmwuda ne I na gha khuọnmwi vbe asẹ ọkpa, ẹre ọ zẹe ighẹ I miẹn ẹkpotọ ya kporhu iyẹn nọ maan ma uwa. 14 Agharhemiẹn wẹẹ, edanmwẹ nọkhua ẹre emianmwẹ ne I ghaa khuọnmwi ghaa khin ne uwa, wa ma gha ya aro tila mwẹ, ra ne uwa gha ya aro osọnnọ ghee mwẹ;* sokpan, wa na miẹn mwẹ yi vbe na ghee odibo Osanobua, ra e Kristi Jesu. 15 Ọyẹnmwẹ nọ ghaa sẹ uwa vbe ẹghẹ nii ghi vbo? Rhunmwuda, mẹ wa rẹn wẹẹ, akpawẹ te ọ gi uwa ru vbe ẹghẹ nii, te uwa gha te wọlọ aro uwa viọ mẹ. 16 Te I ghi khian oghian uwa nẹ ra, rhunmwuda ighẹ I ta ẹmwata ma uwa ra? 17 Iran nikẹre wa gbe egbe uwa nian, sokpan, emwi nọ rre iran ekhọe i maan; te iran hoo ne iran wannọ uwa hin mwẹ egbe rre, ne uwa mieke na gha hoo ne uwa lele iran. 18 Vbọrhirhighayehẹ, ẹ i re emwi dan, adeghẹ ọmwa na gha gbe egbe uwa, vbene ọmwa nii na mwẹ emwi nọ maan vbe ekhọe; sokpan, ọmwa nii ghi gha ru vberriọ vbe ẹghẹ hia, ẹ i re vbe I ghaa rre ehe ne uwa ye ọkpa. 19 Ivbi mwẹ ni ghaan,* u miẹn vbene ẹmwẹ uwa werriegbe rriọ mwẹ hẹ vbe ekhọe! Te ọ yevbe obalọ ọghe okhuo ne emwi ubiẹmwẹ ru. Erriọ ẹre ọ khian gha ye, a te miẹn wẹẹ, aro ọmwa ne Kristi khin rhiegbe ma vbe egbe uwa. 20 Akpawẹ I wa rre ehe ne uwa ye nian, I gha te gualọ odẹ ọvbehe ya gu uwa guan, rhunmwuda, I ma ghi rẹn vbene I khian ghi khian ẹmwẹ uwa hẹ.

21 Wa ni hoo ne uwa gha rre ototọ uhi, wa tobọ uwa ma rẹn emwi ne nene Uhi khare ra? 22 Vbe igiemwi, a gbẹn ọnrẹn yọtọ wẹẹ, Ebraham ghaa mwẹ emọ ikpia eva, ọkpa na gha re ne ọviẹn biẹ nẹẹn, nọkpa na gha re ne okhuo nẹi re ọviẹn biẹ nẹẹn; 23 ovbi ẹre ne ọviẹn biẹ keghi re na biẹ vbene a ya biẹ kẹkan, sokpan, ovbi ẹre nọkpa ne okhuo nẹi re ọviẹn biẹ, keghi re ne Osanobua ve ẹre. 24 Okha na keghi mwẹ emwi na yae gie; ikhuo eva na keghi mudia ye ihe ile eva, ọkpa kegha re na ru vbe Oke Sainai, ọni ọre Hega, eviẹn ẹre ivbi ẹre hia khin. 25 Emwi na ya e Hega kha ọre Sainai, nọ re oke nọ rre Arebia; ọ keghi mudia ye ihe Jerusalẹm nọ rrọọ vbe ẹdẹnẹrẹ, eviẹn ẹre irẹn vbe ivbi ẹre khin. 26 Sokpan, e Jerusalẹm nọ rre odukhunmwu i re ọviẹn, irẹn ọre iye ima.

27 Rhunmwuda, a gbẹn ọnrẹn yotọ wẹẹ: “Gha ghọghọ, wẹ ne agan nọ ma biẹ; davan, ne u gha wee ne oghọghọ, wẹ ne okhuo ne emwi ubiẹmwẹ ma ru; rhunmwuda, ivbi okhuo na yangbe, ẹre ọ ghi bun sẹ ọghe okhuo ne irẹn vbe ọdọ ẹre gba rrọọ.” 28 Etẹn, emọ na biẹlẹ rhunmwuda eyan ne Osanobua yan rẹn ẹre uwa khin, vbene Aizik vbe gha ye. 29 Vbe ẹghẹ nii, ọmọ na biẹ zẹvbe na wa ya biẹ kẹkan, kegha kpokpo ọmọ nii na lekpa orhiọn nọhuanrẹn biẹ; erriọ ẹre ọ wa vbe ye vbe ẹghẹ na. 30 Sokpan, de emwi ne ebe nọhuanrẹn khare? Ọ wẹẹ: “Khu okhuo nii ne ọviẹn kevbe ovbi ẹre nokpia fua, rhunmwuda, ọmọ ne ọviẹn biẹ i khian sẹtin deba ọmọ ne okhuo nẹi re ọviẹn biẹ rri ukhu erhae.” 31 Rhunmwuda ọni nian etẹn, ma i re ivbi ọviẹn, sokpan, ivbi okhuo nẹi re ọviẹn ẹre ima khin.

5 Ma i ghi re eviẹn, e Kristi fan ima nẹ. Rhunmwuda ọni, wa mudia gbain, ne uwa ghẹ gia dọlegbe ya uwa khian eviẹn.*

2 Ghee ẹre! Mẹ ne Pọl ẹre ọ gu uwa guan na, adeghẹ uwa na rhuẹ, e Kristi i khian gha mwẹ esa nọ ye ne uwa. 3 Te I ghi werriegbe tama uwa nian wẹẹ, ọmwaikọmwa gha rhuẹ, ọ khẹke nọ rẹn wẹẹ, te ọ gha mu Uhi hia sẹ, emwi nẹi mwẹ ọ ma ru na khin. 4 Wa ni hoo ne uwa gha lele uhi, na mieke na ka uwa ye emwa ata, wa wannọ egbe uwa hin ehe ne Kristi ye rre nẹ; rhunmwuda ọni, wa i khian ghi miẹn ẹse ne kpataki* vbe obọ ẹre. 5 Vbe ọghe ima, ma mwẹ emwi ne ima ya ekhọe hia mudia khẹ lekpa orhiọn nọhuanrẹn, ọni ọre na khian na rhunmwuda amuẹtinyan ka ima ye emwa ata. 6 A ghaa gu e Kristi Jesu rrọọ vbe akugbe nẹ, esa i ghi rrọọ deghẹ a rhuẹ re, ra a ma rhuẹ; emwi nọ ru ekpataki ọre ne ọmwa gha mwẹ amuẹtinyan, ọ ghi vbe gha mwẹ ahoẹmwọmwa nọ ya rhie amuẹtinyan nii ma.

7 Wa te ka gha yin ẹse.* A ghi da uwa obọ yi, ne uwa ghẹ ghi lele imamwaemwi ọghe ẹmwata? 8 Ẹ i re Ọmwa nii nọ tie uwa, ẹre ọ fi uwa ekhọe werriẹ, ne uwa ghẹ ghi lele imamwaemwi ọghe ẹmwata. 9 Eyist kherhe na rhie ye eflawa hia na fuẹn yotọ, ẹre ọ yae hue. 10 I wa mwẹ ilẹkẹtin wẹẹ, wa hia ni gu Enọyaẹnmwa rrọọ vbe akugbe gha kue ye ẹmwẹ ne I ta na; sokpan, ọmwa nọ ma gi egbe rọkhọ uwa, a gha bu ohiẹn ọnrẹn vbene ọ khẹke, ọmwa nọ khọnrẹn we nọ gha khin. 11 Etẹn, adeghẹ imẹ ye tae khian wẹẹ ẹmwẹ arhuẹ ye mwẹ esa nọ ye, vbọzẹ na na ye zẹ mwẹ kpokpo? Akpawẹ erriọ nọ, ẹ i ghẹ te gha si ẹmwẹ ighẹ ikporhu ne I kpee vbekpa uwu ne Kristi wu vbe erhan irrioya.* 12 Nọ ne iran ni hia ne iran mu uwa orhiọn rueghe, ọ gha te yẹẹ mwẹ ne iran wa ya waa egbe iran.*

13 Etẹn, te a tie uwa ne uwa do gha re emwa na fan fua; sokpan ọkpa ghi nọ, wa ghẹ loo ẹkpotọ na, ya gha ru emwi ne egbe uwa hoo, sokpan, wa gha rhunmwuda ahoẹmwọmwa ru ọviẹn lele emwa ne uwa gba ga. 14 A gha lele iyi na nọ khare wẹẹ: “Te u gha hoẹmwẹ ogieva ruẹ zẹvbe ne u hoẹmwẹ egbuẹ,” ọni ọre a mu Uhi hia sẹ nẹ.* 15 Sokpan, adeghẹ uwa na gha ya akọn rri egbe, wa na vbe gha ru egbe emwi khọọ, wa ghi gha begbe, ne uwa ghẹ ya miẹn egbe uhunmwu.

16 Sokpan, emwi ne I khian tama uwa na khin: Wa gi orhiọn nọhuanrẹn ye gha dia ẹdagbọn uwa ye odẹ, ẹghẹ nii, wa i khian gha ru emwi ne egbe uwa hoo hiehie. 17 Rhunmwuda, emwi ne egbe hoo kevbe emwi ne orhiọn nọhuanrẹn hoo ma gua egbe ro; oghian egbe ẹre iran eva khin, ọni ẹre ọ si ẹre ne uwa i na sẹtin ru emwi ne uwa te hoo ne uwa ru. 18 Yevbesọni, adeghẹ orhiọn nọhuanrẹn na gha dia uwa ye odẹ, wa i ghi rre ototọ uhi.

19 Ọwara ọkpa ẹre a ya rẹn avbe uyinmwẹ ni lele emwi ne egbe hoo khian, usun ẹnrẹn ọre, alama oghẹ,* uyinmwẹ osọnnọ, uyinmwẹ ifavbaro,* 20 igẹbọ, orhiọn dan na gu mu obọ,* eghian na ya so egbe, okhọn, igbọvo, izohu, imuanẹmwẹ, iwannegbe, otu ughughan na ghae egbe yi, 21 ikhẹko,* ayọn na da gbe egbe, iku na na gbe izabọbọ ẹwia,* kevbe avbe emwi vbenian. Te I ghi ya obọ sekhae ne uwa na, zẹvbe ne I ka vbe ya obọ sekhae ne uwa wẹẹ, ọmwaikọmwa nọ mwẹ obọ vbe avbe uyinmwẹ na i khian la Arriọba Osanobua.

22 Sokpan, ọmọ ne orhiọn nọhuanrẹn mọ ọre ahoẹmwọmwa, ọyẹnmwẹ, ọfunmwegbe, izinegbe, ekhọe esi, umamwẹ, amuẹtinyan, 23 ufumwẹ, a da egbe ọmwa yi. Uhi rhọkpa i rrọọ nọ gbodan ghee avbe emwi vbenian. 24 Yevbesọni, iran ni re ọghe Kristi Jesu kan egbe orukhọ ọghe iran mu erhan nẹ, kẹ kevbe emwi ne egbe rriarria yi kevbe ne egbe gualọ.

25 Adeghẹ orhiọn nọhuanrẹn dia ima, gi ima ye gha khian lele odẹ ne orhiọn nọhuanrẹn dia ima la. 26 Wa ghẹ gi ima khian emwa ni ghi tọn egbe mu, ra ne ima gha ru emwi nọ gha si osuan ye uwu ẹbu ima, ra ne ima gha gbọvo egbe.

6 Etẹn, adeghẹ ọmwa na zẹ owẹ ihan vbene ọ ma na rẹn, wa ne orhiọn nọhuanrẹn loo ghi hẹko ya ekhọe ọmẹhẹ dia ẹre ye odẹ. Sokpan, wa tobọ uwa ghi vbe gha begbe oo, ne uwa ghẹ vbe ya de ye edanmwẹ.* 2 Wa gha kpa egbe ihẹ, odẹ vberriọ, te uwa mu uhi e Kristi sẹ. 3 Adeghẹ ọmwa na gha roro ẹre wẹẹ ọmwa kpataki ẹre irẹn khin, vbe nẹi na re emwi rhọkpa, te ọmwa vberriọ mu egbe ẹre rẹrẹ. 4 Sokpan, dọmwadẹ ọghẹe ghi tobọre gha ghee vbene uyinmwẹ ọnrẹn ye hẹ, vbe nẹi na ya egbe ẹre gie ọmwa ọvbehe, ẹghẹ nii, ọyẹnmwẹ egbe ẹre ghi gha sẹ ọre. 5 Rhunmwuda, dọmwadẹ ọghẹe ẹre ọ khian mu ihẹ ọre.*

6 Yevbesọni, ọ khẹke ne ọmwa na ma ẹre ẹmwẹ Osanobua, gu ọmwa nọ ma ẹre emwi ghae vbe emwi nọ maan hia.

7 Wa ghẹ rẹrẹ egbe uwa:* Ọmwa rhọkpa i sẹtin do Osanobua ọzuọ. Evba kọe, ẹre a rhọ; 8 rhunmwuda, ọmwa nọ kọ emwi ne egbe ẹre hoo, ọfuan ẹre ọ khian rhọ vbe obọ emwi ne egbe ẹre hoo, sokpan, ọmwa nọ kọ emwi ne orhiọn nọhuanrẹn hoo, arrọọ ọghe etẹbitẹ ẹre ọ khian rhọ vbe obọ orhiọn nọhuanrẹn. 9 Nọnaghiyerriọ, ọ ma khẹke ne ima gi egbe wọọ ima vbọ gha de ọghe emwi esi na ru, rhunmwuda, adeghẹ ima ma gi egbe wọọ ima,* ma gha rri ere ẹre vbe ẹghẹ nọ khẹke. 10 Rhunmwuda ọni, ẹghẹ ke ẹghẹ ne ẹkpotọ ya kie ne ima, wa gia gha ru emwa hia ẹse, katekate, emwa ne ima gba re ẹgbẹe ọkpa vbe odẹ iyayi.

11 Wa ma miẹn emwi ne I ya obọ mwẹ gbẹnnẹ gie uwa! Te ọ ye gbodoo gbodoo.

12 Emwa hia ni hoo ne iran ya ẹko rhiẹnrhiẹn emwa nagbọn, ẹre ọ hia ne iran kpikpi uwa ne uwa rhuẹ, na ghẹ mieke na gha zẹ iran kpokpo ba ẹmwẹ erhan irrioya* ọghe Kristi. 13 Uhiẹn, emwa ni rhuẹ re nii, iran tobọ iran i lele Uhi, sokpan, te iran hoo ne uwa rhuẹ, ne iran mieke na gha ya ikpakpa egbe ọghe uwa rhuọ. 14 Sokpan, I i khian rhuọ; emwi ọkpa ne I khian ya rhuọ ọre ẹmwẹ Enọyaẹnmwa e Jesu Kristi nọ wu vbe uhunmwu erhan irrioya.* Vbe aro mwẹ, irẹn ẹre a lekpa ẹre bu ohiẹn uwu gbe agbọn,* sokpan, vbe aro agbọn na, a keghi lekpa ẹre bu ohiẹn uwu gbe mwẹ.* 15 Ẹ i zẹdẹ mwẹ esa nọ ye deghẹ ọmwa rhuẹ re, ra ọ ma rhuẹ, emwi nọ ru ekpataki ọre ne ọmwa khian evbayi ọghe ọgbọn. 16 Nọ ne emwa hia ni ya iyi na ru emwi vbe ẹdagbọn iran, ọfunmwegbe kevbe itohan ẹre ọ khian gha gu iran rrọọ, iran na ọre Izrẹl ọghe Osanobua.

17 Ke ẹghẹ na kpa, ọmwa rhọkpa ghẹ ghi kpokpo mwẹ oo, rhunmwuda, ama ni rrọ mwẹ egbe rhie ẹre ma wẹẹ, ọviẹn e Jesu ẹre I khin.

18 Etẹn, Te Enọyaẹnmwa e Jesu Kristi gha ru ẹse ne kpataki* ne uwa rhunmwuda ekhọe esi ne uwa mwẹ. Isẹ.