EBE NOGIEVA NA GBẸN GIE IVBI E KỌRINT

1 E Pọl na tiere nọ do gha re ukọ ọghe Kristi Jesu zẹvbe nọ gua iho ọghe Osanobua ro, kevbe Timoti ne ọtẹn ima nokpia giotuẹ iko ọghe Osanobua nọ rre Kọrint, kevbe emwa ni huanrẹn hia ni rre otọ Akeya:

2 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.

3 Uyi nọ ne Osanobua kevbe Erha ọghe Enọyaẹnmwa e Jesu Kristi, irẹn ọre Erha nọ mwẹ itohan nọkhua kevbe Osanobua ne ifuẹko hia ke obọ ẹre rre, 4 irẹn ẹre ọ fu ima ẹko rre* vbe uwu ọlọghọmwa* hia ne ima la gberra, ne ima mieke na sẹtin vbe gha fu emwa ọvbehe ẹko rre vbe ọlọghọmwa* ne iran rhirhi gha ye, lekpa ifuẹko ne ima miẹn vbe obọ Osanobua. 5 Zẹvbe ne oya ne ima re rhunmwuda e Kristi ya muan yọ, erriọ ẹre ifuẹko ne ima la obọ e Kristi miẹn vbe ya muan yọ. 6 Adeghẹ ima na gha rre uwu ọlọghọmwa,* ne uwa mieke na miẹn ifuẹko kevbe imiẹnfan ẹre nọ; adeghẹ a na fu ima ẹko rre, ne uwa mieke na vbe miẹn ifuẹko ẹre nọ, ifuẹko na ẹre ọ ru iyobọ ne uwa ya zin egbe oya ne ima vbe ya egbe miẹn. 7 Ẹghẹ ọkpa i rrọọ ne ima ya gbe awawẹ ye ilẹkẹtin ne ima mwẹ yan uwa, ma rẹnrẹn wẹẹ, zẹvbe ne uwa vbe mwẹ oghae vbe oya ne ima re, erriọ ẹre uwa khian vbe gha mwẹ oghae vbe ifuẹko ne ima miẹn.

8 Etẹn, ma hoo ne uwa rẹn vbekpa ọlọghọmwa ne ima ya egbe miẹn vbe ikinkin ọghe Esia. Ọlọghọmwa ne ima ya egbe miẹn wegbe sẹ ima, ọ wegbe sẹrriọ wẹẹ, ma ma ghi te yayi wẹẹ ima gha miẹn uhunmwu vbọ. 9 Ọ na yevbe na miẹn wẹẹ, a bu ohiẹn uwu gbe ima nẹ. Sokpan, te ọ sunu vberriọ, ne ima ghẹ mieke na mu ẹtin yan egbe ima, sokpan, ne ima mu ẹtin yan Osanobua nii nọ huẹn emwa ni wulo kpaegbe. 10 Ọ keghi miẹn ima fan vbe uwu agbanmwẹ idin ne ima ghaa ye; ọ gha ye vbe miẹn ima fan vbe odaro. Ma vbe mu ẹtin yan rẹn wẹẹ, te ọ khian ye gha miẹn ima fan. 11 Wa sẹtin vbe gha na erhunmwu ne ima rhunmwuda, iyobọ nọkhua ẹre ọ khian gha ye ne ima. Ẹghẹ nii, emwa nibun ghi gha kpọnmwẹ Osanobua ye iyobọ nọ ru ne ima, rhunmwuda nọ na họn erhunmwu ne emwa nibun na ne ima.

12 Emwi ne ima ya rhuọ ọre wẹẹ, ekhọe ima tama ima wẹẹ, te ima wa yin ẹse vbe agbọn na, katekate vbe ima rre uwu ẹbu uwa. Ma keghi yin uyinmwẹ nọhuanrẹn, ma ma vbe fi ibeleku, erriọ ẹre Osanobua ya ma ima emwi. Ẹ i re ẹwaẹn ọghe emwa nagbọn ẹre ima ya ru ọna, sokpan, ẹse ne kpataki* ọghe Osanobua nọ. 13 Emwi ne uwa gha sẹtin tie,* ne uwa gha vbe sẹtin rẹn otọ re ọkpa, ẹre ima gbẹn gie uwa, vbọ gberra ọni, emwi ọvbehe i rrọọ. I ya aro yọ wẹẹ, wa gha ye rẹn otọ avbe emwi na sayọ,* 14 zẹvbe ne eso vbe uwu uwa rẹnrẹn wẹẹ, emwa ne uwa gha sẹtin ya hio ẹre ima khin; erriọ ẹre ima khian vbe ya uwa hio vbe ẹdẹ Enọyaẹnmwa e Jesu.

15 Ilẹkẹtin na ẹre I mwẹ, ọni ẹre ọ si ẹre ne I na gha hoo ne I ka do miẹn uwa, ne uwa mieke na dọlegbe gha sọyẹnmwẹ;* 16 rhunmwuda, I te gha hoo ne I do miẹn uwa vbe I ghaa rrie Masẹdonia, I ghi vbe werriegbe do miẹn uwa vbe I ghaa ke Masẹdonia dee, ẹghẹ nii, wa ghi su mwẹ sẹ odẹ vbe I ghaa rrie Judia. 17 Wa rẹnrẹn wẹẹ, vbe ẹghẹ ne I na gha ru emwamwa na, I ma ghee ẹre emwi eghẹrẹ. Ra, te uwa roro ẹre wẹẹ, ọmwa nọ rẹn ọghe enegbe ẹre ọkpa ẹre I khin ra? Nọ gha ghi ta “Ẹẹn” nẹ, ọ ghi vbe do fi ẹre werriẹ khian “Ẹo” ra? 18 Wa gha sẹtin mu ẹtin yan Osanobua wẹẹ ẹmwata ẹre ima tama uwa; ma i khian wẹẹ “ẹẹn,” ne ima vbe do kha wẹẹ “ẹo.” 19 Rhunmwuda, Jesu Kristi ne Ovbi Osanobua, ne imẹ vbe Silvenọs* kevbe Timoti kporhu ẹre ma uwa, i re ọmwa nọ gha ta “ẹẹn” nẹ, ọ ghi do yae khian “ẹo,” sokpan, ọ gha ta “ẹẹn” nẹ, ọ ghi gele gha re “ẹẹn.” 20 Agharhemiẹn wẹẹ, emwi hia ne Osanobua yan rẹn bun, ehia keghi do khian “ẹẹn” lekpa e Jesu. Ọni ẹre ọ si ẹre ne ima na lekpa eni Jesu gbe “Isẹ” ye erhunmwu ne ima na gie Osanobua; ọna keghi rhie uyi gie Osanobua. 21 Sokpan, Osanobua ọre ọmwa nọ mu olọ gbe ẹre wẹẹ, ọghe Kristi ẹre ima vbe uwa khin, Osanobua ẹre ọ vbe hannọ ima zẹ. 22 Ọ keghi vbe rhie iyama ọghẹe ye ima egbe, ọ na vbe rhie ama ọghe emwi nọ dee* ne ima; ọni ọre orhiọn nọhuanrẹn nọ rhie ye ima ekhọe.

23 Osanobua rẹnrẹn wẹẹ, te I tohan uwa,* ọni ẹre ọ si ẹre ne I ma na he ye rrie Kọrint. 24 Ẹ i re ima ẹre ọ khaevbisẹ yan amuẹtinyan ọghe uwa,* sokpan, emwa ni deba uwa winna ne uwa mieke na gha ghọghọ ẹre ima khin; amuẹtinyan ọghe uwa, ẹre ọ ya uwa mudia gbain.

2 I tae nẹ wẹẹ, I gha ghi werriegbe rre, I i khian ya ẹko rriara uwa. 2 Adeghẹ imẹ na ya ẹko gha rriara uwa, de ọmwa nọ khian ghi ya mwẹ gha ghọghọ, vbọ gberra uwa ne imẹ ya ẹko rriara? 3 Emwi nọ si ẹre ne I na gbẹn emwi ne I gbẹn gie uwa ọre wẹẹ, I ma hoo na miẹn wẹẹ I gha rre, ẹko ghi do gha rriara mwẹ rhunmwuda uwa, wa nọ te khẹke nọ gha ya mwẹ ghọghọ; rhunmwuda, I mwẹ ilẹkẹtin wẹẹ, emwi nọ ya mwẹ ghọghọ, ẹre ọ vbe ya uwa ghọghọ. 4 Vbe uwu ọlọghọmwa kevbe akhiẹ nọ vuọn mwẹ ekhọe kẹ kevbe ameve, ẹre I ya gbẹn ebe gie uwa; I ma gbẹn ọnrẹn ne I mieke na ya ẹko rriara uwa, sokpan, te I we ne I ya rhie ẹre ma vbene I hoẹmwẹ uwa hẹ ẹsẹsẹmwẹse.

5 Adeghẹ ọmwaikọmwa ya ẹko rriara ọmwa, ẹ i re imẹ ẹre ọmwa nii ya ẹko rriara, sokpan, wa hia wa mobọ nọ; vbọrhirhighayehẹ, I ma hoo ne I do ta ẹmwẹ nọ wegbe gbe. 6 Oya ne nibun sẹ vbe uwa rri okpia nii re, vbe sẹ vberriọ; 7 vbene ọ ghi ye na nian, ọ khẹke ne uwa yabọe, ne uwa vbe fu ẹre ẹko rre, ne egbe ghẹ do wọọ ọre* rhunmwuda akhiẹ nọ vuọn ọnrẹn ẹko. 8 Nọnaghiyerriọ, wa lahọ, wa gi ẹre rẹn wẹẹ uwa hoẹmwẹ ọnrẹn. 9 Emwi ọvbehe nọ ya mwẹ gbẹn ebe gie uwa, ọre ne I mieke na rẹn deghẹ uwa mu egbe ne uwa ya gha họn ẹmwẹ vbe ẹghẹ hia. 10 Adeghẹ uwa na yabọ ọmwaikọmwa vbe emwi ke emwi nọ ru, mẹ vbe yabọe nẹ. Uhiẹn, I gha yabọ ọmwa, rhunmwuda uwa ẹre I na ru ẹre sirra e Kristi (ọni ọre deghẹ abakuru rhọkpa gele rrọọ ne ọmwa ru, ne I khian gu yabọe). 11 Ẹghẹ nii, obọ e Setan i ghi ke ukhunmwu ne ima, rhunmwuda, ma rẹn odẹ ughughan nọ ya rẹrẹ emwa.*

12 Ẹghẹ ne I ya sẹ e Troas ne I ya kporhu iyẹn nọ maan vbekpa e Kristi, ẹkpotọ keghi kie mẹ ne I ya winna iwinna Enọyaẹnmwa, 13 orhiọn mwẹ ma ghi sotọ, rhunmwuda ne I ma na miẹn e Taitọs ne ọtẹn mwẹ. Ẹre I na ghi gbe ọ khian ẹdẹ hia ne iran vba, I na ghi kpa gha rrie Masẹdonia.

14 Sokpan, ekpọnmwẹ nọ ne Osanobua nọ viọ ima khian vbe ẹghẹ hia zẹvbe ivbiyokuo ni khọnmiotọ vbe okuọ, ke ima kevbe Kristi. Irẹn ẹre ọ vbe loo ima ya ya irẹnmwi ọghẹe wewe vbe ehe hia, zẹvbe emwi nọ winhin. 15 Rhunmwuda, vbe odaro Osanobua, te ima yevbe emwi nọ winhin ọghe Kristi vbe uwu ẹbu emwa na khian miẹn fan kevbe emwa ni khian fuan; 16 nọ ne iran ni khian fuan, te uwinhinmwẹ na yevbe ẹwia ọghe uwu nọ vbe si uwu, sokpan, nọ ne iran na khian miẹn fan, te uwinhinmwẹ na yevbe uwinhinmwẹ ọghe arrọọ nọ vbe rhie arrọọ ne ọmwa. De ọmwa nọ gele gbegba nọ gha ru avbe emwi na? 17 Ma nọ, rhunmwuda, ma i khiẹn ẹmwẹ Osanobua* vbene emwa nibun ru ẹre, sokpan, ẹkoata ẹre ima ya ta ẹmwẹ Osanobua zẹvbe emwa ne Osanobua gie ẹre uhunmwu; odaro Osanobua ẹre ima na winna iwinna na zẹvbe eguọmwadia e Kristi.

3 Eban ẹre ima khian ghi werriegbe do gha gie egbe ima ma uwa ra? Ra, vbene ọ ye ne emwa eso, te ọ vbe khẹke na gbẹn ebe lele ima, na ya gie ima ma uwa ra? Ra, te uwa khian ghi vbe gbẹn lele ima? 2 Wa tobọ uwa ọre ebe na gbẹn vbekpa ima, ekhọe ima ẹre a gbẹn nene ebe yi, emwa hia rẹn ọnrẹn, iran vbe tie ẹre. 3 Ọ dewarorua wẹẹ, wa ọre ebe nọ ke obọ e Kristi rre ne ima gbẹn zẹvbe emwa ni winna ne Osanobua. Ẹ i re ẹmu* ẹre a ya gbẹnnẹ ọnrẹn, sokpan, orhiọn ọghe Osanobua nọ rrọọ ẹre a ya gbẹnnẹ ọnrẹn; ẹ i vbe re uhanhan okuta ẹre a gbẹnnẹ ọnrẹn yi, sokpan, ekhọe ọghe emwa nagbọn ẹre a gbẹnnẹ ọnrẹn yi.*

4 Ma keghi mwẹ ilẹkẹtin vbenian vbe odaro Osanobua lekpa e Kristi. 5 Ẹ i re wẹẹ, te ima tobọ ima gbegba nọ gha winna iwinna rhọkpa, sokpan, Osanobua ọre ọmwa nọ ya ima khian enọ gbegba. 6 Irẹn ẹre ọ zẹe ighẹ ima sẹtin gbegba zẹvbe eguọmwadia ile ọghe ọgbọn. Ma i re emwa ne uhi na gbẹnnẹ yotọ dia, sokpan, orhiọn nọhuanrẹn ẹre ọ dia ima; nọ ne uhi na gbẹnnẹ yotọ, uwu ẹre ọ si rre, sokpan, orhiọn nọhuanrẹn keghi rhie arrọọ ne ọmwa.

7 Uhi na nọ si uwu rre keghi re na gbẹnnẹ ye uhanhan okuta. Vbe ẹghẹ na ya rhie ẹre ne emwa, uyi nọkhua ẹre ọ lelẹe rre. Uyi nọ lelẹe rre kpọlọ sẹrriọ wẹẹ, Ivbi Izrẹl ma ghi sẹtin tọn aro mu ghee Mozis rhunmwuda awanwan nọ ghaa rre ugbaro ọre. Sokpan, uyi nii kegha re emwi nọ khian fafaa vbe odaro. Adeghẹ uyi nọkhua lele uhi vberriọ rre, 8 inu ghi nọ ne orhiọn nọhuanrẹn? Ẹ i re uyi nọ sẹre ẹre ọ khẹke nọ lelẹe rre ra? 9 Adeghẹ uyi lelẹe rre ighẹ uhi nọ bu ohiẹn gbe ọmwa, inu ghi nọ ne iwinna nọ ru iyobọ ne ọmwa ya khian ọmwa ata vbe odaro Osanobua? Ẹ i re uyi nọ sẹre ẹre ọ khẹke nọ lelẹe rre ra? 10 Uhiẹn, emwi nọ te ka mwẹ uyi khian nẹi ghi mwẹ uyi nẹ, rhunmwuda, emwi nọ mwẹ uyi sẹ ọre rrọọ nẹ. 11 Adeghẹ uyi lele emwi na khian wabọ ọre rua rre, inu ghi nọ ne emwi nọ khian gha rrọọ khian? Ẹ i re uyi nọ sẹre ẹre ọ khẹke nọ lelẹe rre ra?

12 Rhunmwuda emwi ne ima ya aro yi na, ma keghi si agbada vbe unu guan, vbene ohan i na mu ima. 13 Ma i yevbe Mozis nọ ghaa mu ukpọn gue aro, ne Ivbi Izrẹl ghẹ mieke na bẹghe awanwan nii, nọ re emwi nọ khian fafaa vbe odaro. 14 Sokpan, ekhọe iran keghi gbin. Te ekhọe iran wa ye gbin do fi ẹdẹnẹrẹ, vbene a miẹn wẹẹ, te a mu ukpọn gue ẹre; rhunmwuda ọni, iran i ghi sẹtin rẹn otọ ile nẹdẹ vbe a gha tie ẹre, rhunmwuda, e Kristi ọkpa ẹre ọ khian sẹtin rhie ukpọn nii hin ekhọe iran rre. 15 Uhiẹn, do fi ẹdẹnẹrẹ, te ukpọn nii wa ye degue ekhọe iran, rhunmwuda ọni, ẹghẹ ke ẹghẹ na ya tie emwi ne Mozis gbẹnnẹ, iran i rẹn otọ re. 16 Sokpan, ọmwa gha bu e Jehova* gha dee, a ghi rhie ukpọn nii hin ọnrẹn ekhọe rre. 17 Orhiọn ẹre Jehova* khin, ehe ne orhiọn ọghe Jehova* ye, afanvbirri rre evba. 18 Ma hia keghi rhie uyi ọghe Jehova* ma, vbe na ghee ughegbe nọ fi wainwain; a ma vbe mu ukpọn gue ima aro. A keghi fi ima werriẹ, ne ima do gha yevbe Osanobua, ne ima vbe gha rhie uyi ẹre ma sayọ, zẹvbe ne Jehova* nọ re Orhiọn vbe tobọre ru ẹre.*

4 Nọnaghiyerriọ, ugbẹnvbe a miẹn wẹẹ, te Osanobua tohan ima, nọ na waa iwinna na ne ima, ma i khian gi ẹtin fo ima. 2 Sokpan, ma keghi fi iyeke gbe emwi ekhue na ru vbe ẹkhokho, ma i fi ibeleku, ma i vbe gua ẹmwẹ Osanobua; sokpan, ẹmwata ẹre ima tama emwa. Odẹ vberriọ, te ima rhie ẹre ma vbe odaro Osanobua wẹẹ ima ru emwi nọ khẹke, ne ekhọe emwa hia mieke na gha ta ẹmwẹ ima nọ maan. 3 Uhiẹn, deghẹ iyẹn nọ maan ne ima kporhu ẹre yevbe emwi na tọn ukpọn gue, uwu ẹbu emwa ni khian fuan ẹre ọ na ye vberriọ. 4 Iran na ma yayi, iran keghi re emwa ne osa ọghe agbọn na* gue ekhọe iran, ne awanwan* ghẹ mieke na baa sẹ ekhọe iran, ọni ọre awanwan ọghe iyẹn nọ maan nọ vuọn ne uyi nọ dekaẹn Kristi, nọ re ọmwa nọ ya ima rẹn vbene Osanobua ye hẹ. 5 Ma ghaa kporhu, ẹ i re ẹmwẹ egbe ima ẹre ima kporhu ẹre, sokpan, te ima gi emwa rẹn wẹẹ, Jesu Kristi ọre Enọyaẹnmwa kevbe wẹẹ, eviẹn uwa ẹre ima khin rhunmwuda e Jesu. 6 Rhunmwuda, Osanobua ẹre ọ tae wẹẹ: “Gi ukpa baa ladian vbe uwu ebiebi.” Ọ gele ru ẹre nẹ, ne ukpa nii baa sẹ ekhọe ima, ne awanwan ọghe irẹnmwi Osanobua mieke na gha rre ekhọe ima zẹvbe nọ ya wan ladian vbe ugbaro e Kristi; irẹnmwi Osanobua na keghi re nọ vuọn ne uyi.

7 Vbọrhirhighayehẹ, agharhemiẹn wẹẹ, te ima yevbe akhe kẹkan na ya obuẹ ma, ma keghi mwẹ emwi ighobioye na vbe uwu ima, nọ mieke na dewarorua wẹẹ, ẹtin nẹi re ọghe kẹkan ne ima mwẹ, obọ Osanobua ẹre ọ ke rre, ẹ i re obọ ima. 8 Ọlọghọmwa gba ima aro gba ima iyeke, sokpan, ma ye sẹtin zẹ obọ zẹ owẹ; emwi sunsun ye ima aro, sokpan, ọni ma rhie ma wẹẹ, ọghe ima wa fo ye evba;* 9 a zẹ ima kpokpo, sokpan, a ma yangbe ima; a rhie ima kinmwi otọ, sokpan, ma ma wu. 10 Ẹghẹ hia ẹre ima ya ya egbe miẹn oya nọ sẹtin si uwu, egbe ne Jesu vbe ya egbe miẹn, ne ẹdagbọn e Jesu mieke na vbe rhiegbe ma vbe egbe ima. 11 Ma ni rrọọ nian, ẹghẹ hia ẹre ima ya rre agbanmwẹ idin rhunmwuda e Jesu, ne ẹdagbọn e Jesu mieke na rhiegbe ma vbe egbe ima na, nọ sẹtin wu. 12 Ọni rhie ma wẹẹ, uwu winna vbe uwu ima, sokpan, arrọọ winna vbe uwu uwa.

13 A gbẹn ọnrẹn yotọ wẹẹ: “Te I mwẹ amuẹtinyan, ọni ẹre ọ si ẹre ne I na guan”; egbe amuẹtinyan* vberriọ ẹre ima vbe mwẹ. Rhunmwuda ne ima na mwẹ amuẹtinyan, ọni ẹre ọ si ẹre ne ima na vbe guan, 14 vbene ima na rẹn wẹẹ, Ọmwa nii nọ huẹn Jesu kpaegbe gha vbe huẹn ima kpaegbe vbene ọ ya huẹn Jesu kpaegbe; ọ ghi viọ ima kevbe uwa gha die odaro e Jesu. 15 Rhunmwuda uwa ẹre avbe emwi na hia na ye vberriọ, ne ẹse ne kpataki* ọghe Osanobua mieke na gha muan yọ, rhunmwuda ne emwa nibun na rhie ekpọnmwẹ ne Osanobua. Ekpọnmwẹ ne iran rhie nẹẹn na, keghi rhie uyi nẹẹn.

16 Nọnaghiyerriọ, ma i khian gi ẹtin fo ima, ọ gha khọnrẹn wẹẹ ikinnegbe ima fẹko wiẹghua* khian, ẹdẹdẹgbe ẹre ima ya ru ọghe ọgbọn yọ vbe uwu egbe. 17 Agharhemiẹn wẹẹ, ọlọghọmwa* kherhe nẹi khian kpẹẹ vbe otọ ẹre ima ya egbe miẹn nian, ọ gha rhie uyi nọkhua ọghe etẹbitẹ ne ima, nọ kpọlọ sẹ ọlọghọmwa* na ẹsẹse; 18 vbe ẹghẹ na nian, emwi nai bẹghe ẹre ima rhie aro yi, ẹ i re emwi na bẹghe. Rhunmwuda, ovbi ẹghẹ kherhe ẹre emwi na bẹghe ya vbe otọ, sokpan, emwi nai bẹghe keghi rrọọ vbe etẹbitẹ.

5 Ma rẹnrẹn wẹẹ, adeghẹ a na guọghọe sotọ ighẹ ibọkpọ na nọ re owa ima vbe agbọn na, Osanobua gha rhie owa ne ima dia vbe ẹrinmwi, ọni ọre owa nọ khian gha rrọọ vbe etẹbitẹ, ẹ i vbe re owa ne emwa nagbọn ya obọ iran bọ. 2 Te ima wa khiẹkhiẹ egbe vbe owa ne ima ye na nian, ne ima ghi wa mu ena mwamwa khẹ ima vbe ẹrinmwi yọ,* ẹre ekhọe ima ghi wa ye, 3 rhunmwuda, ma gha muẹn yọ nẹ, ma i khian ghi gha rre irhunmwirhun. 4 Ẹmwata nọ rrọọ ọre wẹẹ, ma ni rre ibọkpọ na keghi khiẹkhiẹ egbe, iro vbe gba ima ẹko, rhunmwuda, ma ma hoo ne ima kie nọ gu ima na yotọ, sokpan, ma vbe hoo ne ima mu enọkpa yọ, ne arrọọ mieke na mi emwi nọ sẹtin wu re. 5 Osanobua ọre ọmwa nọ mu ima egbe khẹ emwi na, irẹn ẹre ọ rhie orhiọn nọhuanrẹn ọghẹe ne ima zẹvbe ama ọghe emwi nọ dee.*

6 Ọna ẹre ọ rhie ẹtin ye ima iwu vbe ẹghẹ hia; ma rẹnrẹn wẹẹ, vbe uwu ẹghẹ ne ima rhirhi ya vbe egbe na, ma i rre ehe ne Enọyaẹnmwa ye, 7 amuẹtinyan ẹre ọ ya ima ru emwi ne ima ru, ẹ i re emwi ne ima bẹghe. 8 Sokpan, ma keghi mwẹ ilẹkẹtin; emwi nọ vbe yẹẹ ima sẹ, ọre ne ima sẹ egbe ima na rae, ne ima mieke na ya gu Enọyaẹnmwa dia. 9 Sokpan, ọre te ima gu ẹre dia, ra ma i rre ehe nọ ye, emwi nọ ru ekpataki ne ima sẹ, ọre ne ima gha ru emwi nọ gha yae miẹn ima yi. 10 Rhunmwuda, ẹ i mwẹ ima hia ma mudia ye odaro e Kristi nọ bu ohiẹn ima,* na mieke na ha osa ne dọmwadẹ ọghẹe, zẹvbe nọ ya yin vbene ọ na ye mwẹ egbe ọmwa nagbọn, ọre emwi esi ẹre ọ ru, ra emwi dan.

11 Nọnaghiyerriọ, ugbẹnvbe a miẹn wẹẹ, ma rẹn emwi na yae kha, na gha mu ohan Enọyaẹnmwa, ma keghi hia ne ima fi emwa ekhọe werriẹ, ne iran miehe na yaeyi ighẹ emwi ne ima ma iran ẹre; sokpan, Osanobua wa rẹn ima ẹsẹse. Vbọrhirhighayehẹ, I vbe yayi wẹẹ, vbe uwu ekhọe uwa, wa rẹn aro emwa ne ima khin. 12 Ẹ i re te ima dọlegbe ya ọna tama uwa aro emwa ne ima khin, sokpan, te ima ta ẹmwẹ na, ne uwa mieke na miẹn emwi ya gha rhuọ vbekpa ima; ẹghẹ nii, wa ghi sẹtin zẹ ẹmwẹ wanniẹn emwa ni ya emwi ne iran bẹghe rhuọ, vbene iran i na ya emwi nọ rre ekhọe rhuọ. 13 Adeghẹ ima ru emwi vbe na ghee emwa ne ẹrherhe ma gba na, Osanobua ẹre ima ru ẹre na; adeghẹ ima ru emwi vbe na ghee emwa ne aro hian rẹn, wa ẹre ima ru ẹre na. 14 Ahoẹmwọmwa ne Kristi mwẹ keghi gua ima kpa, rhunmwuda, emwi ne ima ghi rẹn otọ re ọre wẹẹ, orhunmwu ọkpa wu ne emwa hia; nọnaghiyerriọ, emwa hia ẹre ọ wulo. 15 Te ọ wu ne emwa hia, ne emwa ni rre agbọn ghẹ ghi gha rrọọ ne egbe iran, sokpan, iran ghi gha rrọọ ne ọmwa nii nọ wu ne iran, na vbe huẹn kpaegbe.

16 Ke ẹghẹ na kpa, ma i khian ghi gha rhunmwuda emwi ne ima wa bẹghe kha wẹẹ ima rẹn ọmwaikọmwa. Uhiẹn, adeghẹ ima na ka rẹn e Kristi rhunmwuda emwi ne ima bẹghe, ma ma ghi rẹn ọnrẹn vberriọ nian. 17 Nọnaghiyerriọ, ọmwaikọmwa ghaa gu e Kristi rrọọ vbe akugbe, evbayi ọghe ọgbọn ghi nọ; emwi nẹdẹ hia rrie; emwi ọgbọn rre nẹ. 18 Sokpan, obọ Osanobua ẹre emwi hia ke rre, irẹn ọre ọmwa nọ lekpa e Kristi gu ima ru adọlọ, ọ na vbe waa iwinna ne ima, ne ima vbe gha ya emwa ọvbehe khian ọsiọre, 19 ọni nọ wẹẹ, te Osanobua loo e Kristi ya ru iyobọ ne emwa nagbọn ya do khian ọse irẹn, ọ ma ka orukhọ ọghe iran ye iran urhu; ọ na vbe waa iwinna ne ima, ne ima gha tama emwa wẹẹ, iran gha sẹtin do khian ọse irẹn.

20 Rhunmwuda ọni, emwa ne Osanobua ya zẹ ihe egbe zẹvbe edayi ọghe Kristi ẹre ima khin, te ọ yevbe na miẹn wẹẹ, te Osanobua loo ima ya tie emwa. Zẹvbe edayi ọghe Kristi, ma keghi rinmwian emwa wẹẹ: “Wa do gu Osanobua ru adọlọ.” 21 Ọmwa nọ ma ru orukhọ, ẹre Osanobua ya zọ ese ye orukhọ ọghe ima, ne ima mieke na lekpa ọmwa nii do khian emwa ata vbe aro Osanobua.

6 Zẹvbe emwa ni deba Osanobua winna, ma hoo ne ima rinmwian uwa, ne uwa ghẹ gi ẹse ne kpataki* ne Osanobua ru ne uwa gha re na mu rhia. 2 Osanobua khare wẹẹ: “Ẹghẹ ghi sẹ ne I gha ya ru uwa ẹse, I na danmwehọ uwa; ọ ghi vbe sẹ ẹdẹ ne I gha ya miẹn uwa fan, I na ru iyobọ ne uwa.” Banbanna nian, ẹghẹ ne Osanobua gha ya ru uwa ẹse ẹre a wa ye na! Ẹdẹ nọ gha ya miẹn uwa fan vbe na khin!

3 Ma ma hoo ne ima ru emwi ke emwi nọ gha rrua ọmwa rhọkpa owẹ, na ghẹ do gha zaan iwinna ne ima ru; 4 sokpan, ma keghi hia vbe odẹ ke odẹ, ne ima gha ru emwi nọ gha rhie ẹre ma wẹẹ, eguọmwadia Osanobua ẹre ima khin, lekpa ne ima na zin egbe emwi nibun, ma ya egbe miẹn ọlọghọmwa ughughan, emwi vbe zẹdia vbee ima, emwi vbe wegbe mu ima, 5 ma vbe ya egbe miẹn ugbemwẹ, a vbe mu ima ye eghan, ma vbe dekun emwa ni gbe olighi, ma vbe miẹn ẹsọn, ugbẹnso, ma i miẹn ovbe vbe asọn, ugbẹnso, ma i vbe miẹn evbare re; 6 emwa ni huanrẹn ẹre ima khin, ma mwẹ irẹnmwi, ma mwẹ izinegbe, ma ya obọ esi mu emwa, orhiọn nọhuanrẹn dia ima, ahoẹmwọmwa ne ima mwẹ i re ọghe okpunu, 7 ma ta ẹmwata, ẹtin Osanobua ẹre ima ya egbe kọ, iruemwiẹse ọre emwi igbinna ne ima dayi vbe obọ erha ọmwa* kevbe obọ iye ọmwa,* 8 a keghi mu uyi ye ima egbe, erriọ ẹre a vbe ya ru ima emwi oya, a keghi ta ẹmwẹ dan vbekpa ima, a vbe ta ẹmwẹ ima nọ maan. Emwa ghee ima zẹvbe emwa erẹrẹ, sokpan, ẹmwata ẹre ima ta, 9 emwa ghee ima zẹvbe emwa na ma rẹn, sokpan, a yi ima ẹro, ma yevbe emwa ni khian ghi wu,* sokpan, ma wa ye rre agbọn, emwa ghee ima zẹvbe emwa na rri ọre oya, sokpan, a ma gbele ima rua, 10 emwa ghee ima zẹvbe emwa ni khiẹ, sokpan, ẹghẹ hia ẹre ima ya sọyẹnmwẹ, emwa ghee ima ivbiogue, sokpan, ma ya emwa nibun khian emwa ni fe, emwa ghee ima zẹvbe emwa nẹi mwẹ emwi rhọkpa, sokpan, ma mwẹ emwi hia.

11 Wa ne Ivbi e Kọrint, ma ma mu iyeke ẹmwẹ ma uwa, sokpan, te ima wa fannọ otọ ẹko ima hia ma uwa. 12 Ekhọe hia ẹre ima ya hoẹmwẹ uwa, sokpan, wa ma wa ya ekhọe hia hoẹmwẹ ima. 13 Rhunmwuda ọni, te imẹ ghi gu uwa guan nian zẹvbe ivbi mwẹ: Wa vbe fannọ ekhọe uwa rua.

14 Wa ghẹ ya egbe ba emwa ni ma yayi, rhunmwuda, wa i khian sẹtin gua egbe ro.* De vbene emwi nọ gbae kevbe nọ ma gba khian ya sẹtin gua egbe ro hẹ? Ukpa vbe ebiebi gha sẹtin dia ihe ọkpa ya ra? 15 Deba ọni, e Kristi vbe Bilial* gha sẹtin gha ru emwi kugbe ra? Vbọ kaan ọmwa iyayi* kaan ọmwa nọ ma yayi? 16 De emwi ne avbe ẹbọ khian gha ru vbe ọgua Osa yi? Rhunmwuda, ọgua ọghe Osanobua nọ rrọọ ẹre ima khin. Erriọ ẹre Osanobua wa vbe tae, ọ na wẹẹ: “I gha dia ehe ne iran ye ya, I ghi vbe gha rre uwu ẹbu iran; I ghi gha re Osanobua iran, iran ghi vbe gha re emwa mwẹ.” 17 “E Jehova* khare wẹẹ, ‘Nọnaghiyerriọ, wa ladian hin uwu ẹbu iran rre, ne uwa wannọ egbe hin ehe ne iran ye rre, wa ghẹ ghi ya obọ kaan emwi nọ ma huan’”; “‘I gha vbe miẹn uwa yi.’” 18 “‘I ghi do gha re erha uwa, wa ghi vbe gha re ivbi mwẹ nikpia kevbe ivbi mwẹ nikhuo,’ erriọ ẹre Jehova* ne Oghodua khare.”

7 Nọnaghiyerriọ etẹn ni ghaan, ugbẹnvbe a miẹn wẹẹ, a ru eyan na hia ma ima nẹ, wa gi ima kpe ẹre hin egbe ima rre ighẹ emwi ke emwi nọ gha sẹtin ya egbe ima kevbe orhiọn* ima khian enọ ma huan, ne ima mieke na do gha re emwa ni huanrẹn ẹsẹse, ni mu ohan Osanobua.

2 Wa rhan ekhọe uwa rua ne uwa miẹn ima yi. Ma ma ru ọmwa rhọkpa emwi khọọ, ma ma mu ọmwa rhọkpa rhia, ma ma vbe mu ọmwa rhọkpa ru. 3 I ma ta ọna ne I ya zaan uwa. Rhunmwuda, I ka tae nẹ wẹẹ, ẹghẹ ọkpa i rrọọ ne ẹmwẹ uwa khian ya lahin ima ekhọe rre, uhiẹn ya sẹ ẹdẹ uwu. 4 Te I wa si agbada vbe unu gu uwa guan. Te I wa gele ya uwa hio. A fu mwẹ ẹko rre nẹ ẹsẹsẹmwẹse; vbe uwu ọlọghọmwa hia ne ima ye, te ẹko mwẹ wa ye vuọn ne oghọghọ.

5 Uhiẹn, vbe ima sẹ e Masẹdonia, egbe ma rọkhọ ima, ọlọghọmwa na gba ima aro gba ima iyeke, emwa na gha gu ima khọn, orhiọn ima ma vbe sotọ. 6 Sokpan, Osanobua nọ rhie ifuẹko ne emwa ne iro han rẹn, keghi rhie ifuẹko ne ima vbe ẹghẹ ne Taitọs ghi ya bu ima rre; 7 ẹ i wa re nọ na rre ọkpa ẹre ọ fu ima ẹko rre, emwi ọvbehe nọ vbe fu ima ẹko rre, ọre ifuẹko ne irẹn miẹn rhunmwuda uwa. Vbe ọ ghi tama ima, vbene ẹmwẹ mwẹ da uwa hẹ, vbene uwa khiẹ hẹ, kevbe vbene uwa ya mu ẹmwẹ mwẹ roro,* ẹko hia na werriegbe rhiẹnrhiẹn mwẹ ruan ẹsẹsẹmwẹse.

8 Agharhemiẹn wẹẹ, ebe ne I gbẹn ya ẹko rriara uwa, I ma gbe I ma rẹn wẹẹ I gbẹn ọnrẹn. Uhiẹn, deghẹ I te ka gbe I ma rẹn yọ (rhunmwuda ne ebe nii na ya ẹko rriara uwa, agharhemiẹn wẹẹ ovbi ẹghẹ kherhe ghaa nọ), 9 te ẹko ghi rhiẹnrhiẹn mwẹ nian, ẹ i re rhunmwuda ne ẹko na rriara uwa, sokpan, rhunmwuda ne ẹko nọ rriara uwa na ya uwa ro iro fi uyinmwẹ werriẹ. Te ẹko rriara uwa vbe odẹ nọ yẹẹ Osanobua, ọni ẹre ọ si ẹre ne ẹmwẹ ne ima ta, ma na si obalọ gie uwa. 10 Rhunmwuda, adeghẹ ẹko na rriara ọmwa vbe odẹ nọ yẹẹ Osanobua, ọ ghi ya ọmwa nii ro iro fi uyinmwẹ werriẹ, ẹghẹ nii, ọmwa nii ghi miẹn fan, a i vbe gbe I ma rẹn yọ hiehie; sokpan, adeghẹ ẹko na gha rriara ọmwa vbene ẹko ya rriara emwa ni rre uwu agbọn, uwu ẹre ọ si. 11 Ọ vẹ na rẹn wẹẹ, te ẹko gele rriara uwa vbe odẹ nọ yẹẹ Osanobua, ọna ẹre ọ si ẹre ne uwa na hia vbe odẹ ke odẹ ne uwa ru emwi nọ khẹke, wa keghi dọlọ uyinmwẹ uwa yi, ne emwa ghẹ mieke na gha zaan uwa, wa ma ghọghọ ye emwi dan nọ sunu, wa kegha mu ohan Osanobua, wa na gha hoo ne uwa ro iro fi uyinmwẹ werriẹ, ekhọe hia ẹre uwa ya ga Osanobua, wa keghi ru emwi nọ khẹke, ne uwa ya dọlọ emwi ne uwa ma ru ẹse yi. Vbe nọ dekaẹn ẹmwẹ na, te uwa wa ru emwi hia vbene ọ khẹke.* 12 Agharhemiẹn wẹẹ I gbẹn ebe gie uwa, I ma gbẹn ọnrẹn rhunmwuda ọmwa nọ ru orukhọ, ra rhunmwuda ọmwa na ru khọọ, sokpan, te I gbẹn ọnrẹn ne ẹkpotọ mieke na kie ne uwa ya rhie ẹre ma vbe odaro Osanobua wẹẹ, wa mu egbe ne uwa ya rhie ẹmwẹ ne ima ta. 13 Ọni ẹre ọ si ẹre ne ẹko na fu ima rre.

Gberra wẹẹ ẹko fu ima rre, emwi ne ima ghi ghọghọ yi sẹ ọre ọyẹnmwẹ nọ ghaa sẹ e Taitọs, rhunmwuda ne uwa hia na rhie igiọdu nẹẹn. 14 Wa ma ya ekhue mu mwẹ ne I na ya uwa rhuọ ma e Taitọs; zẹvbe ne ẹmwẹ hia ne ima tama uwa ya re ẹmwata, erriọ ẹre ọ vbe ya re ẹmwata ighẹ orhuọ ne ima rhuọ ma e Taitọs vbekpa uwa. 15 Deba ọni, te ahoẹmwọmwa nọ mwẹ ne uwa ghi wegbe sayọ, rhunmwuda nọ na ye ẹre rre, vbene uwa hia ya họn ẹmwẹ hẹ, kevbe vbene uwa ya ya ọghọ vbe ute rhan obọ miẹn ọnrẹn yi hẹ. 16 U miẹn vbene ọyẹnmwẹ sẹ mwẹ hẹ, ne I na rẹn wẹẹ, emwa ne I gha sẹtin mu ẹtin yan vbe emwi hia ẹre uwa khin!*

8 Etẹn, ma hoo ne uwa rẹn vbekpa vbene Osanobua ya ru ẹse ne kpataki* ne iko ni rre Masẹdonia hẹ. 2 Agharhemiẹn wẹẹ, iran ya egbe miẹn ọlọghọmwa nọ wegbe nọ wa danmwẹ iran ghee ẹsẹse, te iran ye gha ya ekhọe ọyẹnmwẹ rhie ladian, agharhemiẹn wẹẹ ivbiogue sẹlẹkẹ ẹre iran khin; ọna keghi rhie ẹre ma wẹẹ, emwa ni gele zẹ emwi obọ ẹre iran khin. 3 Vbene obọ iran sẹ, erriọ ẹre iran ya rhie ladian, uhiẹn, ọ kue vbe gberra vbene obọ iran sẹ, mẹ gha wa sẹtin sẹ osẹ ye ọna. 4 Ekhọe obọ iran ẹre iran ya rhiegbe ladian wẹẹ iran khian ru iyobọ, iran na gha rinmwian ima, na rhie ẹghẹ ne iran ya ru izọhẹ, ne iran mieke na vbe gha mwẹ obọ vbe iyobọ na ru ne emwa ni huanrẹn. 5 Iran keghi ru gberra vbene ima te ya aro yi. Zẹvbe nọ gua iho ọghe Osanobua ro, iran keghi rhiegbe ye ugamwẹ Enọyaẹnmwa, iran na vbe ru iyobọ ne ima. 6 Rhunmwuda ọni, ma keghi rhie igiọdu ne Taitọs nọ wa koko ẹre fo ighẹ izọhẹ ne uwa ya ekhọe hia ru, ugbẹnvbe a miẹn wẹẹ, irẹn ẹre ọ wa suẹn iwinna na vbe uwu ẹbu uwa. 7 Levba sevba, te emwi hia wa kpọ vbe obọ uwa, wa mwẹ amuẹtinyan nọ wegbe, ẹmwẹ maan uwa unu, wa mwẹ irẹnmwi ẹsẹse, wa vbe ya oyaya ru emwi, wa vbe hoẹmwẹ emwa zẹvbe ne ima vbe ya hoẹmwẹ uwa. Odẹ vberriọ ẹre ima vbe hoo ne uwa ya gha zẹ emwi obọ.

8 Ẹ i re te I ta ẹmwẹ na ne I ya gbe uhi ne uwa, sokpan, te I hoo ne uwa rẹn vbene emwa ọvbehe hia hẹ, ne I vbe rẹn deghẹ ahoẹmwọmwa ne uwa mwẹ sẹ otọ ẹko. 9 Wa rẹn vbekpa ẹse ne kpataki* ọghe Enọyaẹnmwa e Jesu Kristi, ọni nọ wẹẹ, agharhemiẹn wẹẹ ọmwa nọ fe ẹre irẹn ghaa khin, ọ na ya egbe ẹre khian ovbiogue rhunmwuda uwa, ne uwa mieke na do gha re emwa ni fe rhunmwuda ne irẹn na khian ovbiogue.

10 Vbene ọ ye hẹ vbe ekhọe mwẹ na khin: Umamwẹ ọghe uwa nọ deghẹ uwa na ru iwinna na fo, ugbẹnvbe a miẹn wẹẹ, ke ne ukpo gha dee ẹre uwa ghi ya suẹn ọnrẹn kevbe wẹẹ, wa wa vbe rhie ẹre ma wẹẹ, wa hoo ne uwa ru ẹre. 11 Nọnaghiyerriọ, wa hia ne uwa ru emwi ne uwa suẹnrẹn fo, ẹghẹ nii, emwi ne uwa rhirhi rhie ladian zẹvbe ne obọ uwa gba ẹre, ghi rhie ẹre ma wẹẹ, wa gele hoo ne uwa gha zẹ emwi obọ. 12 Izọhẹ ne ọmwa ya ekhọe obọ ẹre rhie ladian ẹre Osanobua rhan obọ miẹn yi, rhunmwuda, emwi ne ọmwa mwẹ, ẹre Osanobua hoo na gha rhie ladian, ẹ i re emwi ne ọmwa i mwẹ. 13 I ma hoo ne I ya emwi gha lọghọ uwa, vbene I na yae khuẹrhẹ ne emwa ọvbehe; 14 sokpan, ne emwi hia mieke na gha rre umwọnmwẹ, wa ya emwi ọrhẹnrhẹn ne uwa mwẹ vbe ẹghẹ na nian ya ru iyobọ emwi ne iran i mwẹ ne iran, ne iran mieke na vbe ya emwi ọrhẹnrhẹn ne iran mwẹ ya ru iyobọ emwi ne uwa i mwẹ ne uwa, ẹghẹ nii, emwi hia ghi do gha rre umwọnmwẹ. 15 Zẹvbe na gbẹn ọnrẹn yotọ: “Ọmwa nọ mwẹ emwi nibun ma ghi mwẹ nọ bun gbe, ọmwa nọ vbe mwẹ emwi kherhe ma ghi vbe mwẹ nọ kherhe gbe.”

16 Ma kpọnmwẹ Osanobua wẹẹ, ẹmwẹ uwa wa vbe rre Taitọs orhiọn vbene ọ vbe rre ima orhiọn, 17 rhunmwuda, ọ rhie ẹmwẹ ne ima tama rẹn, gberra ọni, ọ vbe rre ọre orhiọn, ne irẹn tobọ irẹn vbe ru emwi ne ima we nọ ru, ọni ẹre ọ si ẹre nọ na ya ekhọe obọ ẹre bu uwa dee nian. 18 Sokpan, ma gha vbe gie ọtẹn nokpia ọvbehe lelẹe rre, ọtẹn nokpia na keghi re na wa tian vbe iko hia ye iwinna nọ ru rhunmwuda iyẹn nọ maan. 19 Ẹ i vbe re ọni ọkpa, te iko hia wa vbe zẹ ọre, nọ gha lele ima, zẹvbe ne ima ya ghae izọhẹ ne etẹn. Emwi ne ima ru na keghi rhie uyi ne Enọyaẹnmwa, ọ vbe rhie ẹre ma wẹẹ, ma mu egbe ne ima ya ru iyobọ ne emwa ọvbehe. 20 Ma keghi vbe ya ẹwaẹn ghae izọhẹ na ne uwa ya ekhọe hia ru, ne ọmwa rhọkpa ghẹ mieke na do gha zaan ima. 21 Rhunmwuda, ma hoo ne ima ‘gha ru emwi hia la uro, vbe nai na fi ibeleku, ẹ i wa re vbe odaro e Jehova* ọkpa, sokpan, ma gha vbe gha ru vberriọ vbe odaro emwa nagbọn.’

22 Yevbesọni, ma gha vbe gie ọtẹn ima nokpia ọvbehe lele iran rre. Ma danmwẹ ọtẹn nokpia na ghee nẹ inugba nọ khin, ma na do bẹghe ẹre wẹẹ ọmwa nọ wa fuẹro nọ vbe emwi nibun nọ ru, erriọ ẹre ọ khian vbe ya ya ekhọe hia ru iyobọ ne uwa, rhunmwuda, ọ mu ẹtin yan uwa ẹsẹse. 23 Adeghẹ ọmwa rhọkpa nọ ọta vbekpa e Taitọs, wa ghi gi ọmwa nii rẹn wẹẹ ogieva mwẹ nọ; mẹ vbe ọre, ẹre ọ gba vbe winna rhunmwuda umamwẹ uwa. Adeghẹ ọmwa rhọkpa na vbe nọ ọta vbekpa etẹn nikpia nikẹre, wa ghi gi ọmwa nii rẹn wẹẹ, ukọ ne iko ya zẹ ihe egbe ẹre iran khin, iran vbe rhie uyi ne Kristi. 24 Nọnaghiyerriọ, wa rhie ẹre ma wẹẹ uwa gele hoẹmwẹ iran, wa ghi vbe gi iko hia rẹn evbọzẹe ne ima na ya uwa hio.

9 Esa i wa rrọọ ne I ya gbẹn ebe gie uwa, ne I ya gie uwa rẹn wẹẹ, ọ khẹke ne uwa gha ru iyobọ ne emwa ni huanrẹn, 2 rhunmwuda, mẹ rẹnrẹn wẹẹ, wa wa hoo ne uwa ru iyobọ, I vbe ya uwa rhuọ ma etẹn ni rre Masẹdonia. I tama iran wẹẹ, ukpo ọkpa ẹre ọ ghi wa ye na, ne uwa ni rre Akeya ghi ya mu egbe ne uwa ru iyobọ. Etẹn ni rre Masẹdonia ghi bẹghe vbene uwa ya mu egbe hẹ ne uwa ru iyobọ, nibun sẹ vbe uwu iran na vbe mu egbe ne iran ya ru vberriọ. 3 Sokpan, mẹ gie etẹn nii dee nian, na ghẹ do miẹn wẹẹ, te ima wa ya uwa rhuọ kua kẹkan vbe nọ dekaẹn ẹmwẹ na, wa ghi vbe gele mu egbe yotọ zẹvbe ne I ka tae wẹẹ, wa gha ru ẹre. 4 Vbe ẹ i re erriọ, adeghẹ Ivbi e Masẹdonia na lele mwẹ rre, iran na do miẹn wẹẹ, wa ma mu egbe yotọ, ekhue nọ khian mu ima i re nekherhe, rhunmwuda, ọ kẹ ima ya ya uwa rhuọ nẹ; ẹ i ghi re ekhue nọ khian mu uwa ẹre a ghi kha. 5 Ọna ẹre ọ si ẹre ne I na wẹẹ, ọ khẹke ne I ka gie etẹn nii bu uwa gha dee nẹ vbene ima te rre, ne iran mieke na mwamwa emwi ọrhẹnrhẹn ne uwa wẹẹ uwa khian ya ru ẹse yotọ; ẹghẹ nii, ma gha ghi rre, emwi hia gba nẹ, ọni ghi vbe rhie ma wẹẹ ekhọe obọ uwa ẹre uwa ya ru ẹse ne uwa ru, ẹ i re te a gbe uwa miẹn uwa ẹre.

6 Vbe nọ dekaẹn ẹmwẹ na, ọmwaikọmwa nọ ya emwiokọ kherhe kọ, ekherhe ẹre ọ khian rhọ, sokpan, ọmwaikọmwa nọ ya emwiokọ nibun kọ, emwiokọ nibun ẹre ọ khian vbe rhọ. 7 Gi edọmwadẹ ọghẹe gha rhie emwi ladian, zẹvbe nọ tae vbe ekhọe ọghẹe, ẹ i re na ya umaro umaro ru, ra na gbagba ye ọmwa egbe, rhunmwuda, ọmwa nọ ya ekhọe ọyẹnmwẹ ru ẹse, ẹre Osanobua hoẹmwẹ ọnrẹn.

8 Yevbesọni, Osanobua gha sẹtin ru ẹre ne ẹse ne kpataki* ọghẹe gha muan yọ muan yọ vbe ẹdagbọn uwa, ne emwi rhọkpa ghẹ mieke na vbee uwa hiehie, ne uwa vbe gha mwẹ emwi nibun nọ gha ya uwa gha ru iwinna esi. 9 (Zẹvbe ne Ebe Nọhuanrẹn khare: “Ọ viọ emwi ne emwa wọrhọwọrhọ; ọ ru ẹse ne ivbiogue. Iruemwiẹse ọghẹe keghi re ọghe etẹbitẹ.” 10 Osanobua nọ viọ ikpẹ nibun ne ọkemwiokọ, nọ vbe kpemehe evbare ne emwa, gha viọ ikpẹ ne uwa, ne uwa ya kọ, ọ ghi vbe muan rẹn ne uwa; ọ ghi vbe ru ẹre ne emwi ne uwa khian rhọ gha bun, rhunmwuda iruemwiẹse ọghe uwa.) 11 Osanobua fiangbe uwa nẹ wọrhọwọrhọ vbe emwi hia, ne uwa miehe na gha ru ẹse ughughan, sẹrriọ wẹẹ, te emwa nibun ghi kpọnmwẹ Osanobua, rhunmwuda emwi ne uwa la obọ ima viọ gie iran; 12 rhunmwuda, iwinna ne uwa ru ya ru iyobọ ne emwa, ẹ i re te uwa ru ẹre ne uwa ya ru iyobọ ne emwa ni huanrẹn ọkpa, sokpan, te uwa vbe ru iwinna na, ne emwa nibun mieke na gha lekpa ẹre rhie ekpọnmwẹ ne Osanobua. 13 Iwinna ne uwa ru na, ya emwa rẹn aro emwa ne uwa khin, te iran ghi vbe rhie urhomwẹ ne Osanobua, rhunmwuda ne uwa na lele emwi ne uwa kporhu ẹre vbekpa e Kristi, kevbe ne uwa na ya emwi ne uwa mwẹ ru ẹse ne emwa ni huanrẹn kevbe emwa hia nikẹre. 14 Te iran ghi vbe na erhunmwu ne uwa, ne iran ya rhie ẹre ma wẹẹ, iran hoẹmwẹ uwa, rhunmwuda ẹse ne kpataki,* na ma he miẹn egbọre ẹdẹ ne Osanobua ru ne uwa.

15 Wa gia kpọnmwẹ Osanobua ye ẹse ọhẹ ọghẹe nẹi gia gie.

10 Ufumwẹ kevbe itohan e Kristi ẹre imẹ ne Pọl ya rinmwian uwa, mẹ ne emwa kha wẹẹ, I ghaa rre ehe ne uwa ye, I ghi gha re ọmwa ọmẹhẹ, sokpan, deghẹ I i rre ehe ne uwa ye, I ghi gha ya obọ nọ tọn mu uwa.* 2 I ya aro yọ wẹẹ, vbene I te rre, emwa ni roro ẹre wẹẹ, iziro ọghe agbọn na ẹre ima ya ru emwi, gha fi ekhọe werriẹ, ne I ghẹ mieke na ya obọ nọ tọn mu iran vbe I gha rre. 3 Ẹmwata nọ wẹẹ, emwa nagbọn ẹre ima khin, sokpan, ma i khọn vbe na ghee emwa nagbọn. 4 Emwi igbinna ne ima ya khọn, ẹ i re ọghe agbọn na, sokpan, emwi igbinna nọ wegbe ne Osanobua viọ ne ima nọ, ne ima mieke na sẹtin yae guọghọ emwi ni wegbe sotọ. 5 Ma keghi guọghọ ehia sotọ, ighẹ avbe iziro ni ma gba kevbe emwi* ni mu idobo ye emwa egbe ne iran ghẹ do rẹn Osanobua. Ma khọn avbe iziro dan mu otọ, ma na viọ iran ye imu, ne iran mieke na gha họn ẹmwẹ ne Kristi; 6 wa gha wa rhie ẹre ma nẹ wẹẹ, emwa ni ya ekhọe hia họn ẹmwẹ ẹre uwa khin, ma wa vbe mu egbe ne ima ya rri ọmwaikọmwa nẹi họn ẹmwẹ oya.

7 Vbene emwi ye hẹ vbe ikinnegbe ẹre uwa ghee. Adeghẹ ọmwaikọmwa ya obọ sudu wẹẹ, ọghe Kristi ẹre irẹn khin, gi ẹre werriegbe mu ẹmwẹ na roro: Vbene irẹn re ọghe Kristi, erriọ ẹre ima vbe ye. 8 Te Enọyaẹnmwa rhie asẹ ne ima, ne ima ya ya uwa khian enọ digiẹ, ẹ i re ne ima ya gbe uwa orhiọn mu otọ; adeghẹ I na we ne I gele wa ya asẹ na rhuọ, ekhue i khian mu mwẹ. 9 I ma hoo nọ yevbe na miẹn wẹẹ, te I ya avbe ebe ne I gbẹnnẹ gie uwa si ohan ye uwa egbe. 10 Emwa eso keghi kha wẹẹ: “E Pọl gha gbẹnnẹ ebe rre, ehe hia ghi mu rueghe, erriọ ẹre ọ vbe ya zẹ ẹtin. Sokpan, irẹn tobọ irẹn gha gu ọmwa mudia, ọ ghi ye vburriẹ vburriẹ, ẹmwẹ nọ ta i vbe mwẹ iyobọ nọ ye ne ọmwa.” 11 Ọ khẹke ne emwa ni guan vbenian rẹn wẹẹ, zẹvbe ne ima gbẹnnẹ ọnrẹn ye ebe gie uwa,* erriọ ẹre ima khian vbe ru ẹre* vbe ima gha rre. 12 Ohan i gi ima mu egbe ima ye ukpo ọghe emwa ni tian egbe iran, ma i vbe ya egbe gie iran. Ilele ne iran tobọ iran rhie yotọ, ẹre iran ya mwa egbe iran, ilele nii ẹre iran vbe ya bu ohiẹn egbe. Ọna rhie ma wẹẹ, a ma rẹn sẹ ẹre ọ lọghọ iran.

13 Vbọrhirhighayehẹ, ma i khian ya emwi ọvbehe rhuọ, vbọ gberra iwinna ne Osanobua mu ne ima; usun enene iwinna na mu ne ima, ẹre uwa vbe khin. 14 Ọghe ne ẹmwata, ma ma ru iwinna ne Osanobua ma waa ima ẹre, vbe ima sẹ ehe ne uwa ye. Sokpan, ma ọre emwa okaro ni do kporhu iyẹn nọ maan vbekpa e Kristi ma uwa. 15 Ẹ i re iwinna na ma waa ima ẹre, ne ọmwa ọvbehe ru, ẹre ima ya rhuọ. Sokpan, ma ya aro yọ wẹẹ, zẹvbe ne amuẹtinyan ọghe uwa ya wegbe yọ, iwinna ima ghi vbe gha mu otọ yọ zẹvbe ne ima ya ru iwinna ne Osanobua mu ne ima. Ẹghẹ nii, iwinna ne ima ru ghi gha bun yọ, 16 ne ima mieke na vbe ya kporhu iyẹn nọ maan vbe avbe ẹvbo ni rree sẹ ọghe uwa, ẹghẹ nii, ma i khian gha ya iwinna ne emwa ọvbehe ru vbe ẹdogbo ne iran na kporhu rhuọ. 17 “Sokpan, ọmwa nọ hoo nọ rhuọ, we nọ ya e Jehova* rhuọ.” 18 Rhunmwuda, ẹ i re ọmwa nọ tian egbe ẹre, ẹre Jehova* miẹn yi, sokpan, ọmwa ne irẹn ta ẹmwẹ ọnrẹn nọ maan ẹre irẹn miẹn yi.

11 Akpawẹ uwa gha sẹtin zin egbe lele mwẹ nian, ọ gha khọnrẹn wẹẹ I ru emwi ukọnmwẹ kherhe. Sokpan, I wa rẹn wẹẹ, wa wa zin egbe lele mwẹ! 2 Te ẹmwẹ uwa wa da mwẹ zẹvbe nọ vbe ya da Osanobua, rhunmwuda, mẹ tobọ mwẹ ẹre ọ wẹẹ I khian ya uwa ne ọdọ ọkpa, I vbe hoo ne I rhie uwa ne ọdọ nii zẹvbe uvbi nọ ma rhia egbe ẹre;* ọdọ nii ọre Kristi. 3 Sokpan, afianma fian mwẹ, ne iran ghẹ ya mu uwa ekhọe rhia, zẹvbe ne ẹyẹn nii ya rẹrẹ Ivi, ẹghẹ nii, wa i khian ghi gha ya ẹkoata kevbe ekhọe nọhuanrẹn lele Kristi zẹvbe nọ te khẹke. 4 Emwi nọ ya mwẹ ta ọna ọre wẹẹ, ọmwaikọmwa gha rre do kporhu ẹmwẹ e Jesu ma uwa, nọ lughaẹn ne ne ima ka kporhu ẹre, ra ọmwa na mu iziro ọvbehe rre nọ lughaẹn ne ne uwa ka mwẹ, ra iyẹn nọ maan nọ lughaẹn ne ne uwa ka miẹn yi, wa keghi wa rhan obọ miẹn ọnrẹn yi vbene uwa i na roro ẹre igba eva. 5 Avbe ukọ ọghe uwa nii ni roro ẹre wẹẹ, a i ta ne iran khin, mẹ ma miẹn emwi rhọkpa ne iran ya maan sẹ mwẹ. 6 Ọ gha khọnrẹn wẹẹ ẹmwẹ i maan mwẹ unu, sokpan, I mwẹ irẹnmwi; wa tobọ uwa vbe bẹghe ẹre vbe emwi hia ne ima ru.

7 Ekhọe hia ẹre I ya kporhu iyẹn nọ maan ọghe Osanobua ma uwa, vbene I ma na miẹn uwa emwi rhọkpa. Emwi dan ẹre I ru ra, ne I na mu egbe mwẹ rriotọ na mieke na tọn uwa mu ra? 8 Iko ọvbehe ẹre ọ ghaa koko mwẹ,* I na gha miẹn iran emwi ne iran mwẹ,* ne I mieke na sẹtin ga uwa. 9 Ọrheyerriọ, vbe ẹghẹ ne I ma na gha mwẹ emwi rhọkpa vbe I rre ehe ne uwa ye, I ma mu ihẹ egbe mwẹ yan uwa, rhunmwuda, te etẹn ni ke Masẹdonia rre wa gha viọ emwi hia ne I gualọ mẹ. Vbene ẹmwata, I keghi hia vbe odẹ ke odẹ ne I ghẹ mu ihẹ egbe mwẹ yan uwa, ẹghẹ ọkpa i rrọọ ne I khian vbe ya ru vberriọ. 10 I i khian dobọ orhuọ ne I rhuọ na yi vbe ikinkin ọghe Akeya, sokpan a ma wẹẹ, I i ghi re ọrhuanegbe Kristi.* 11 Vbọsiẹ? Rhunmwuda wẹẹ I ma hoẹmwẹ uwa nọ ra? Osanobua rẹnrẹn wẹẹ I hoẹmwẹ uwa.

12 Emwa eso rrọọ ni fian yan egbe, ni gualọ odẹ ne iran khian ya mu egbe iran ye ukpo ne ima ye; rhunmwuda ọni, I gha ye gha ru emwi ne I ru khian, ne I mieke na gbe ukhu ẹre rua ighẹ emwi nọ ya iran rhuọ. 13 Emwa vberriọ, ukọ ọghe ohoghe ẹre iran khin, iwinna erẹrẹ ẹre iran ru, iran ghi ba gha ru vbene a miẹn wẹẹ ukọ ọghe Kristi ẹre iran khin. 14 Ọna i zẹdẹ kpa ọmwa odin, rhunmwuda, te Setan tobọre vbe ba ru vbene a miẹn wẹẹ odibo nọ maan* ẹre irẹn khin. 15 Rhunmwuda ọni, ẹ i re ogiemwi hiehie, deghẹ eguọmwadia ẹre na ba gha ru vbene a miẹn wẹẹ emwa esi ẹre iran khin. Sokpan, iran gha rhọ emwi ne iran kọ vbe odaro.

16 Te I ghi werriegbe tama uwa nian wẹẹ: Ọmwa rhọkpa ghẹ roro ẹre wẹẹ I i mwẹ ẹwaẹn. Sokpan, adeghẹ uwa na dobọ ka mwẹ ye ọmwa nẹi mwẹ ẹwaẹn, wa ghi miẹn mwẹ yi vberriọ, ne imẹ mieke na vbe rhuọ kherhe. 17 Ẹ i re igiemwi ọghe Enọyaẹnmwa ẹre I lele vbe ẹmwẹ ne I ta na, sokpan, te I guan vbe na ghee ọmwa ukọnmwẹ nọ rhuọ wẹẹ, ‘vbọ ghi ye ke dee?’ 18 Ugbẹnvbe a miẹn wẹẹ, emwa nibun ya emwi agbọn na rhuọ, mẹ tobọ mwẹ gha vbe rhuọ. 19 Wa ma wẹẹ uwa “mwẹ ẹwaẹn,” vbọ ghi zẹ ne uwa na ya ekhọe hia miẹn emwa ukọnmwẹ yi? 20 Emwa hia ẹre uwa wa miẹn yi, ke ni ya uwa khian eviẹn, ke ni fu uwa emwi viọ, ni gbe uwa miẹn uwa emwi, ni rhie obọ yan uwa uhunmwu kevbe ni gbe ubi ye uwa aro.

21 Emwi ekhue wa nọ ne ima, ne I na ta ẹmwẹ na, ugbẹnvbe a miẹn wẹẹ, ọ sẹtin ya uwa gha roro ẹre wẹẹ, emwa avbiẹrẹ ẹre ima khin.

Sokpan, adeghẹ emwa nikẹre na gha rhuọ vbene ekhue ma na mu iran, mẹ tobọ imẹ gha vbe rhie ekhue hin aro rre ne I gha rhuọ, ọ gha khọnrẹn ne uwa gha roro ẹre wẹẹ ọmwa ukọnmwẹ ẹre I khin. 22 Ivbi e Hibru ẹre iran khin ra? Ẹre imẹ vbe khin. Ivbi Izrẹl ẹre iran khin ra? Ẹre imẹ vbe khin. Ivbi uniẹn Ebraham* ẹre iran khin ra? Ẹre imẹ vbe khin. 23 Eguọmwadia e Kristi ẹre iran khin ra? I gha wa rhie ewanniẹn ye ọni vbe na ghee ọmwẹmwẹ, rhunmwuda, I sẹ iran inugba nọ khin: Iwinna ne I he ru sẹ ọghe iran, inugba na he mu mwẹ ye eghan sẹ ọghe iran, ẹ i re avbiẹ inugba ẹre I ya egbe miẹn ugbemwẹ, ẹ i re avbiẹ inugba ẹre I he miẹn egbe mwẹ vbe agbanmwẹ idin. 24 Igba isẹn ẹre Ivbi e Ju gbe mwẹ asan ọkpa i rrọọ vbe iyeva (39), 25 igba eha ẹre a ya ukpokpo gbe mwẹ, a vbe filo okuta gbe mwẹ uhukpa, igba eha ẹre okọ ne I la re ni, asọn vbe avan ẹre I gbe vbe adesẹ okun; 26 I mu okhian yo ehe ughughan, I rhie uhunmwu mwẹ atata obọ vbe ẹzẹ, vbe obọ avbe izigan, vbe obọ emwa mwẹ, kevbe obọ emwa agbẹnvbo ọvbehe, I vbe rhie uhunmwu mwẹ atata obọ vbe orere ẹvbo, vbe uwu ato, vbe uwu okun kevbe obọ emwa ni ba ru vbene a miẹn wẹẹ etẹn ẹre iran khin, 27 I winnaẹn, I miẹn ẹsọn, ẹghẹ nibun ẹre I ma ya miẹn ovbe vbe asọn, ohanmwẹ gbe mwẹ, ovbamẹ vbe gbe mwẹ, ẹghẹ nibun ẹre I ya gha ya ẹko ohanmwẹ khian, ẹghẹ eso rrọọ ne I ya gha rre uwu oni, kevbe ne I ma ya miẹn ukpọn yọ.*

28 Vbọ gberra avbe emwi na hia, emwi eso rrọọ nọ kpokpo mwẹ vbe orhiọn vbe ẹdẹgbegbe: ọni ọre ne I na si osi ye ẹmwẹ iko hia. 29 Ẹ i re te ọ wa da mwẹ* adeghẹ I na miẹn ọmwa nọ vburriẹ ra? Adeghẹ I na miẹn ọmwa nọ rrua owẹ, ẹ i re te ohu mu mwẹ yọ ra?

30 I gha we ne I gele rhuọ, avbe emwi ni gha rhie ẹre ma wẹẹ ọmwa nọ vburriẹ ẹre I khin, ẹre I khian ya rhuọ. 31 Osanobua kevbe Erha ọghe Enọyaẹnmwa e Jesu, nọ re Ọmwa na khian gha rhie urhomwẹ na vbe etẹbitẹ, rẹnrẹn wẹẹ ẹ i re ohoghe ẹre I ta. 32 Ẹghẹ ne I na gha rre Damaskọs, e gọvinọ nọ ghaa rre ototọ Aritas ne ọba keghi we ne emwa gha khẹ odẹ vbe ẹvbo nii, ne iran mieke na mu mwẹ, 33 sokpan, a keghi ya okhuae mu mwẹ la ewindo nọ rre egbe ekẹn ẹvbo nii tuorre, rhunmwuda ọni, obọ ẹre ma ghi vba mwẹ.

12 I gha wa rhuọ, agharhemiẹn wẹẹ ẹ i mwẹ esa nọ ye, sokpan, ẹmwẹ ne I khian guan kaẹn na, keghi re umian ne Enọyaẹnmwa mu ma mwẹ kevbe oro nọ wee ma mwẹ. 2 I rẹn okpia ọkpa ne irẹn vbe Kristi gba rrọọ vbe akugbe, na mu kpa gha rrie ẹrinmwi nogieha vbe ukpo iwenẹ (14) nọ gberra (sokpan, adeghẹ egbe kẹkan ẹre ọ ya yo, ra ẹ i re egbe kẹkan, I ma rẹn oo, Osanobua ọkpa ẹre ọ rẹnrẹn). 3 Vbene ẹmwata, I rẹn okpia nii na mu gha rrie paradais (sokpan, adeghẹ egbe kẹkan ẹre ọ ya yo, ra ẹ i re egbe kẹkan, I ma rẹn oo, Osanobua ọkpa ẹre ọ rẹnrẹn). 4 Vbe ọ ghi rre paradais, ọ na họn ẹmwẹ nai sẹtin ya unu ta kevbe nọ ma khẹke ne ọmwa nagbọn gbe unu yi. 5 I gha ya okpia vberriọ rhuọ, sokpan, I i khian ya egbe mwẹ rhuọ; emwi ọkpa ne I khian ya rhuọ ọre emwi ni rhie ẹre ma wẹẹ, ọmwa nọ vburriẹ ẹre I khin. 6 I gha we ne I rhuọ, I i khian gha re akpa, rhunmwuda, ẹmwata ẹre I khian ta. Sokpan, I i khian ru vberriọ, ne ọmwa rhọkpa ghẹ do tian mwẹ gberra egbe, ẹghẹ nii, ẹ i ghi re emwi nọ bẹghe vbe egbe mwẹ, ra emwi nọ họn vbe unu mwẹ ẹre ọ ghi tian mwẹ yi, 7 sokpan, ọ ghi do gha tian mwẹ, rhunmwuda ẹmwẹ oro na ma he miẹn egbọre ẹdẹ na mu ma mwẹ.

Ne I ghẹ mieke na do gha tọn egbe mu, a keghi ba igban yọ mwẹ egbe, nọ yevbe odibo e Setan, nọ gha kinmwi mwẹ,* ne I mieke na mu egbe rriotọ. 8 Igba eha ẹre I rinmwian Enọyaẹnmwa vbekpa ẹmwẹ na, I na rinmwiaẹn nọ gi ẹre lahin mwẹ egbe rre. 9 Sokpan, ọ keghi tama mwẹ wẹẹ: “Ẹse ne kpataki* ne I ru nuẹn sẹ, rhunmwuda, ẹghẹ ne ọmwa ma ya wegbe, ẹre ẹtin mwẹ ya gele rhiegbe ma.” Te ọyẹnmwẹ ghi sẹ mwẹ; rhunmwuda ọni, I gha ya evburriẹ mwẹ rhuọ, ne I mieke na ye gha rre ototọ ẹtin e Kristi nọ tan gue mwẹ vbe na ghee ibọkpọ. 10 Rhunmwuda ọni, ọyẹnmwẹ keghi sẹ mwẹ vbe I ghaa vburriẹ, vbe a ghaa rhovbiẹ mwẹ, vbe I ghaa rre ivbabọ, vbe a ghaa zẹ mwẹ kpokpo kevbe emwi gha wegbe mu mwẹ rhunmwuda e Kristi. Rhunmwuda, ẹghẹ ne I ma ya wegbe,* ẹre I ya mwẹ ẹtin.

11 Te I ghi ru vbe na ghee akpa. Sokpan, wa ẹre ọ si ẹre ne I na ru vberriọ, rhunmwuda, te ọ te khẹke ne uwa gha ta ẹmwẹ mwẹ ẹse. Avbe ukọ ọghe uwa ni roro ẹre wẹẹ, a i ta ne iran khin, ma mwẹ emwi rhọkpa ne iran ya maan sẹ mwẹ, ọ gha khọnrẹn wẹẹ, I i re emwi rhọkpa vbe aro uwa. 12 Ọghe ne ẹmwata, I rhie ẹre ma uwa nẹ wẹẹ ukọ ẹre I gele khin. Odẹ ne I ya ru ọna, ọre ne I na kakabọ zin egbe, I na winna iwinna ọyunnuan ughughan, I na vbe ru emwi ughughan na ma he miẹn egbọre ẹdẹ ye uwa aro. 13 De obọ ne I ya mu iko ọvbehe ne I ma ya mu uwa, vbọ gberra ne I ma na mu ihẹ egbe mwẹ yan uwa? Lahọ, wa yabọ mwẹ deghẹ emwi dan ẹre I ya ọni ru.

14 Ghee ẹre! Ọna ẹre ọ ya gba vbe igba eha ne I ya hoo ne I bu uwa gha dee, I i khian vbe mu ihẹ egbe mwẹ yan uwa vbe I gha rre. Ẹ i re emwi ne uwa mwẹ ẹre I ya aro yi, sokpan, wa tobọ uwa ẹre I hoo ne I do miẹn; rhunmwuda, evbibiẹ emọ ẹre ọ khẹke nọ ru yotọ ne emọ, ẹ i re emọ ẹre ọ ru yotọ ne evbibiẹ iran. 15 Vbe ọghe imẹ, ekhọe hia ẹre I khian ya viọ emwi hia ne I mwẹ ne uwa, uhiẹn ya sẹ egbe imẹ tobọ imẹ. Adeghẹ imẹ ya ekhọe hia hoẹmwẹ uwa, ẹ i re te ọ vbe khẹke ne uwa hoẹmwẹ mwẹ vberriọ ra? 16 Vbe nọ rhirhi gha ye hẹ, I ma mu ihẹ egbe mwẹ yan uwa. Sokpan, wa wẹẹ “ọmwa ero” ẹre I khin kevbe wẹẹ, “ẹkẹ vbe iwẹnwẹn” ẹre I ya mu uwa ru. 17 Vbe uwu iran ne I gie bu uwa gha dee, de obọ orhunmwu ọkpa ne I la mu uwa ru vbọ? 18 I rinmwian e Taitọs nọ bu uwa gha dee, I na vbe gie ọtẹn ọkpa lelẹe. E Taitọs mu uwa ru ra? Ẹ i re ekhọe ọkpa ẹre imẹ vbe ọre ya ru emwi ra? Ẹ i re odẹ ọkpa ẹre ima eva vbe ru emwi la ra?

19 Te uwa roro ẹre ke ẹghẹ gha dee wẹẹ, te ima zẹ enunu ima ma uwa ra? Zẹvbe erhuanegbe Kristi ne ima khin, Osanobua bẹghe ẹre wẹẹ ẹmwata ẹre ima ta. Etẹn mwẹ ni ghaan, emwi hia ne ima ru, te ima ru ẹre ne ima ya rhie igiọdu ne uwa.* 20 Afianma wa fian mwẹ wẹẹ, I gha sẹ ehe ne uwa ye, egbọre uyinmwẹ uwa i khian yẹẹ mwẹ, a sẹtin vbe miẹn wẹẹ, ọghe imẹ i khian vbe yẹẹ uwa. Egbọre I gha rre, I gha do vba okhọn, igbọvo, izohu, imuanẹmwẹ, ọtakhọ, ọta wẹwẹwẹ, itengbemu kevbe olighi. 21 Egbọre I gha werriegbe rre, Osanobua mwẹ gha gi ekhue mu mwẹ sirra uwa, ẹghẹ nii, egbọre I ghi gha khiẹ rhunmwuda emwa nibun ni ru orukhọ vbe ẹghẹ nọ gberra, ni ma he ye fi werriẹ vbe uyinmwẹ osọnnọ, alama oghẹ* kevbe uyinmwẹ ifavbaro* ne iran yin.

13 Ọna ẹre ọ ya gba vbe igba eha ne I ya hoo ne I bu uwa gha dee. “Ẹmwẹ ne orhunmwu eva ra orhunmwu eha ghi sẹ osẹ yi nẹ,* a i ghi muan rẹn.” 2 Agharhemiẹn wẹẹ I i gu uwa rre evba nian, wa rhie ẹmwẹ ne I ta na vbene a miẹn wẹẹ, te I werriegbe do miẹn uwa ukpogieva; te I we ne I ka ya obọ sekhae ne emwa ni ru orukhọ vbe ẹghẹ nọ gberra kevbe emwa nikẹre, ne iran miehe na rẹn wẹẹ, adeghẹ I na werriegbe rre, I i khian ghee iran aro, te I khian rri iran oya, 3 ugbẹnvbe a miẹn wẹẹ, uwa gualọ osẹ nọ rhie ẹre ma wẹẹ, e Kristi loo mwẹ ya gu uwa guan. Vbọrhirhighayehẹ, e Kristi i re ọmwa avbiẹrẹ vbe eke ne uwa ye, sokpan, ọ keghi rhie ẹtin ẹnrẹn ma vbe uwu ẹbu uwa. 4 Vbene ẹmwata, a keghi kan rẹn mu erhan zẹvbe ọmwa nagbọn nọ ma wegbe, sokpan, irẹn rrọọ nẹ nian rhunmwuda ẹtin Osanobua. Ọghe ne ẹmwata, ma ma vbe wegbe vbene irẹn vbe gha ye, sokpan, te ima hia khian gha gu ẹre rrọọ rhunmwuda ẹtin Osanobua nọ winna vbe ẹdagbọn uwa.

5 Wa ye gha gualọ otọ egbe uwa ghee, ne uwa mieke na rẹn deghẹ uwa ye mwẹ amuẹtinyan; wa ghi ye gha hia ne uwa rẹn aro ọmwa ne uwa gele khin. Ra, wa ma rẹn wẹẹ, Jesu Kristi gu uwa rrọọ vbe akugbe? Sokpan a ma wẹẹ, a ma ghi miẹn uwa yi. 6 Ọ gha te yẹẹ mwẹ deghẹ uwa na rẹn wẹẹ, emwa na miẹn yi ẹre ima khin.

7 Erhunmwu ne ima na gie Osanobua ọre ne uwa ghẹ ru emwi nọ ma gba; ẹ i re wẹẹ, te ima hoo ne emwa gha ghee ima zẹvbe emwa na miẹn yi, ẹre ọ ya ima na erhunmwu na, sokpan, emwi ne ima gu na erhunmwu na ọre ne uwa mieke na gha ru emwi nọ maan, ọ gha khọnrẹn ne emwa gha ghee ima zẹvbe emwa na ma miẹn yi. 8 Rhunmwuda, ma i ru emwi rhọkpa nọ gha gbodan ghee ẹmwata, sokpan, obọ ọghe ẹmwata ẹre ima ye. 9 Te ima wa ghọghọ vbe a gha miẹn wẹẹ uwa wegbe, ọ gha khọnrẹn wẹẹ ima ma wegbe. Erhunmwu ne ima na, ọre ne uwa gha dia egbe uwa ye odẹ. 10 Ọni ẹre ọ si ẹre ne I na gbẹnnẹ avbe emwi na nian, vbene I i na rre evba, a i rẹn vbe I gha rre, I i khian ghi ya obọ nọ tọn mu uwa vbe I ghaa loo asẹ ne Enọyaẹnmwa rhie mẹ; ẹghẹ nii, I ghi loo asẹ nii ya rhie igiọdu ne uwa, ne I gha te ya gbe uwa orhiọn mu otọ.

11 Etẹn, ẹmwẹ nokiekie ne I khian ghi tama uwa ọre wẹẹ, wa ye gha sọyẹnmwẹ, wa ye gha dia egbe uwa ye uviẹn, a gha fu uwa ẹko rre, wa ghi miẹn ọnrẹn yi, wa gi iziro ọghe uwa gha gua egbe ro, wa ye gha gu egbe rrọọ vbe ọfunmwegbe; ẹghẹ nii, Osa ọghe ahoẹmwọmwa kevbe ọghe ọfunmwegbe ghi gha gu uwa rrọọ. 12 Wa tuẹ egbe, ne uwa vbe mu unu soso egbe zẹvbe etẹn. 13 Emwa ni huanrẹn hia gie na tuẹ uwa.

14 Te Enọyaẹnmwa e Jesu Kristi gha ru ẹse ne kpataki* ne uwa hia; te ahoẹmwọmwa ọghe Osanobua kevbe afiangbe na miẹn vbe obọ orhiọn nọhuanrẹn gha vbe sẹ uwa hia obọ.