EBE NOKARO NA GBẸN GIE IVBI E KỌRINT

1 E Pọl na tiere nọ do gha re ukọ ọghe Kristi Jesu zẹvbe nọ gua iho ọghe Osanobua ro, kevbe Sọstenis ne ọtẹn ima nokpia, 2 giotuẹ iko ọghe Osanobua nọ rre Kọrint, kevbe emwa hia ni rre ehe ughughan ni ghi tie eni Enọyaẹnmwa e Jesu Kristi nẹ; irẹn ọre Arowa iran kevbe ọghe ima. Te Osanobua kpe uwa huan zẹvbe emwa ni gu e Kristi Jesu rrọọ vbe akugbe, ọ na vbe tie uwa ne uwa do gha re emwa ni huanrẹn:

3 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.

4 Ẹghẹ hia ẹre I ya kpọnmwẹ Osanobua mwẹ ye ẹmwẹ uwa, rhunmwuda ẹse ne kpataki* ne Osanobua la obọ e Kristi Jesu ru ne uwa; 5 rhunmwuda, te Osanobua wa ya emwi hia fiangbe uwa rhunmwuda ne uwa na ya egbe ba e Kristi. Rhunmwuda ọni, te uwa ghi sẹtin si agbada vbe unu guan, erriọ ẹre uwa vbe ya mwẹ irẹnmwi ẹsẹse, 6 zẹvbe na vbe ya ikporhu ne uwa họẹn vbekpa e Kristi khian enọ deziẹn vbe uwu ẹbu uwa. 7 Rhunmwuda ọni, ẹse ọhẹ rhọkpa i vbee uwa, zẹvbe ne uwa ya ya ekhọe hia mudia khẹ ẹghẹ ne Enọyaẹnmwa e Jesu Kristi khian ya rhie ẹtin ẹnrẹn ma. 8 Ọ gha vbe ya uwa mudia gbain ya sẹ ufomwẹ, na mieke na miẹn wẹẹ, ọ gha ghi sẹ ẹdẹ Enọyaẹnmwa e Jesu Kristi, wa ghi gha re nẹi mwẹ ozan. 9 Ọmwa nọ gia mu ẹtin yan ẹre Osanobua khin, irẹn ẹre ọ tie uwa, ne uwa do gha gu Enọyaẹnmwa e Jesu Kristi ne Ovbi ẹre mu obọ.

10 Etẹn, I ya eni Enọyaẹnmwa e Jesu Kristi rinmwian uwa, ne uwa gi ẹmwẹ ne uwa ta gha gua egbe ro, ne iwannegbe ghẹ vbe gha rre uwu ẹkpo uwa, sokpan, wa ghi gha mwẹ ekhọe ọkpa, odẹ ne uwa ya roro emwi ghi vbe gha re ọkpa. 11 Etẹn mwẹ, emwa eso ni ke owa e Kloi rre, tama mwẹ wẹẹ, wa wa gu egbe muan ẹmwẹ. 12 Emwi ne I hoo ne I ta ọre wẹẹ, I họn wẹẹ eso vbe uwu uwa kha wẹẹ: “Otu e Pọl ẹre imẹ ye,” eso wẹẹ, “Otu Apọlọs ẹre I ye,” eso wẹẹ, “Otu e Sifas* ẹre I ye,” eso na vbe kha wẹẹ, “Otu e Kristi ẹre I ye.” 13 Te a ghi ghae Kristi ye otu ughughan ra? E Pọl ẹre ọ wu ne uwa vbe uhunmwu erhan ra? Ra, eni e Pọl ẹre uwa ya dinmwiamẹ? 14 I kpọnmwẹ Osanobua wẹẹ, I ma dinmwi uwa rhọkpa ye amẹ, vbọ gberra e Krispọs kevbe Geyọs. 15 Rhunmwuda ọni, ọmwa nọ gha sẹtin kha wẹẹ, eni mwẹ ẹre uwa ya dinmwiamẹ i rrọọ. 16 Ẹn hẹn, I vbe dinmwi igiowa ọghe Stẹfanas ye amẹ. Vbọ gberra iran na, I ma ghi yerre deghẹ I ye dinmwi ọmwa ọvbehe ye amẹ oo. 17 E Kristi ma gie mwẹ ne I ya gha dinmwi emwa ye amẹ, sokpan, iyẹn nọ maan ẹre ọ we ne I ya kporhu ẹre; ọ ma vbe we ne I gha guan vbe na ghee ọmwa nọ rẹn emwi gbe vbe I ghaa kporhu, rhunmwuda, I ghaa ru vberriọ, uwu ne Kristi wu vbe uhunmwu erhan irrioya* ghi khian nẹi mwẹ esa.

18 A ghaa ta ẹmwẹ uwu ne Kristi wu vbe uhunmwu erhan irrioya* ma iran ni ra fuan, emwi ukọnmwẹ ẹre iran ghee ẹre. Sokpan, nọ ne ima ni rre odẹ imiẹnfan nẹ, ma keghi ghee ẹre zẹvbe ẹtin Osanobua. 19 Rhunmwuda, a gbẹn ọnrẹn yotọ wẹẹ: “I gha fuẹn ọnrẹn ruan ighẹ ẹwaẹn ọghe iran ni mwẹ ẹwaẹn, I ghi vbe bi ẹre ghee efọnkpa* ighẹ irẹnmwi ọghe emwa ni rẹn emwi.” 20 De ehe ne avbe umẹwaẹn ọghe agbọn na ghi ye nian? Avbe skraib* vbe vbo? Vbọ vbe ye hẹ ne iran ni gua muan ẹmwẹ vbe agbọn na?* Osanobua ma ya ẹwaẹn ọghe agbọn na khian ukọnmwẹ nẹ ra? 21 Rhunmwuda ne emwa nagbọn na wẹẹ iran mwẹ ẹwaẹn, iran ma sẹtin do rẹn Osanobua. Iran keghi ghee ikporhu ne ima kpee ma iran zẹvbe emwi ukọnmwẹ. Sokpan, emwi ne iran ghee ẹre emwi ukọnmwẹ nii, ẹre Osanobua nọ mwẹ ẹwaẹn, lekpa ẹre miẹn emwa ni yayi fan.

22 Ivbi e Ju gha gualọ ama, Ivbi e Grik na gha gualọ ẹwaẹn; 23 sokpan, uwu ne Kristi wu vbe uhunmwu erhan, ẹre ima kporhu ẹre ma emwa. Ẹmwẹ na keghi rrua Ivbi e Ju owẹ, sokpan, nọ ne ivbi agbẹnvbo ọvbehe, ọ na gha re emwi ukọnmwẹ. 24 Vbọrhirhighayehẹ, nọ ne emwa na tiere, ọre Ivbi e Ju nọ, ra Ivbi e Grik, e Kristi ọre ẹtin Osanobua kevbe ẹwaẹn ọghe Osanobua. 25 Rhunmwuda, emwi Osanobua ne emwa nagbọn ghee ẹre ukọnmwẹ, mwẹ ẹwaẹn sẹ iran; emwi Osanobua ne emwa nagbọn ghee ẹre emwi nọ ma wegbe, wegbe sẹ iran.

26 Etẹn, wa bẹghe ẹre wẹẹ vbe Osanobua tie uwa, ọ ma mobọ tie emwa ne agbọn ghee ẹre umẹwaẹn, ra ni mwẹ ẹtin, ra ni ke ẹgbẹe nọ hin usi rre. 27 Sokpan, emwi ne agbọn ghee ẹre akpa, ẹre Osanobua zẹ, nọ mieke na ya ekhue mu emwa ni mwẹ ẹwaẹn; emwi ne agbọn wẹẹ ọ ma wegbe, ẹre Osanobua vbe zẹ, nọ mieke na ya ekhue mu emwi ni wegbe. 28 Emwi ne agbọn ma ka yọ kevbe ne iran tila rua, nọ vbe yevbe emwi nẹi rrọọ vbe aro iran, ẹre Osanobua zẹ, nọ mieke na ya emwi nọ rrọọ vbe aro iran, khian nẹi ghi rrọọ, 29 ẹghẹ nii, ọmwa* rhọkpa i khian sẹtin rhuọ vbe odaro Osanobua. 30 Sokpan, irẹn ẹre ọ zẹe ighẹ uwa gu e Kristi Jesu rrọọ vbe akugbe. E Kristi ọre ọmwa nọ zẹe ighẹ ima do rẹn ẹwaẹn ọghe Osanobua, irẹn ẹre Osanobua loo ro ya ya ima khian emwa ata kevbe emwa ni huanrẹn. Uwu nọ wu ẹre ọ ya dẹ ima werriegbe, ma na ghi do khian emwa na fan fua. 31 Te ọ wa yevbe emwi ne Ebe Nọhuanrẹn tae, nọ na wẹẹ: “Ọmwa nọ hoo nọ rhuọ, we nọ ya e Jehova* rhuọ.”

2 Etẹn, ọni ẹre ọ si ẹre na na miẹn wẹẹ, vbe ẹghẹ ne I na bu uwa gha dee do kporhu ẹmwẹ oro nọhuanrẹn ọghe Osanobua ma uwa, I ma gha fian okpọta, ra ne I gha ru vbene a miẹn wẹẹ, I wa mwẹ ẹwaẹn ẹsẹse. 2 Rhunmwuda, te I wa tae wẹẹ, I ghaa rre ehe ne uwa ye, I i khian ta ẹmwẹ ọvbehe ma uwa* vbọ gberra ẹmwẹ e Jesu Kristi, kevbe uwu nọ wu vbe uhunmwu erhan. 3 Vbe ẹghẹ ne I vbe ya rrie ehe ne uwa ye, ọmwa nọ vburriẹ ẹre I ghaa khin, erriọ ẹre ohan vbe ya gha mu mwẹ, I na vbe gha guọ zẹzẹzẹ; 4 ẹmwẹ ne I ghaa ta kevbe ikporhu ne I ghaa kpee i re ẹmwẹ ọ rhiẹnrhiẹn ukpẹ, ne avbe umẹwaẹn ya fi emwa ekhọe werriẹ, sokpan, ẹmwẹ ne I ghaa ta keghi rhie ẹre ma vbene orhiọn nọhuanrẹn ọghe Osanobua mwẹ ẹtin hẹ. 5 Ẹghẹ nii, wa i ghi mu ẹtin yan ẹwaẹn ọghe emwa nagbọn, sokpan, wa ghi mu ẹtin yan ẹtin Osanobua.

6 Ma keghi ta ẹmwẹ ẹwaẹn vbe ima ghaa rre uwu ẹbu emwa ne amuẹtinyan ọghe iran wegbe, sokpan, ẹ i re ẹwaẹn ọghe agbọn na,* ra ọghe iran ni khaevbisẹ vbe agbọn na ẹre ima guan kaẹn, rhunmwuda, te enii hia khian gbẹro. 7 Ẹmwẹ ẹwaẹn ne ima guan kaẹn keghi re ẹwaẹn ọghe Osanobua, nọ re ẹmwẹ oro nọhuanrẹn na rhie lẹre, zẹvbe ne Osanobua mwamwaẹn a te miẹn wẹẹ a yi agbọn na, nọ ya mu uyi ye ima egbe. 8 Ọna keghi re ẹwaẹn ne emwa ni khaevbisẹ vbe agbọn na* ma rẹn, ọkpa i rrọọ vbe uwu iran nọ rẹn ọnrẹn, rhunmwuda, akpawẹ iran rẹn ọnrẹn, iran i ghẹ te gbe Enọyaẹnmwa nọ mwẹ uyi rua.* 9 Sokpan, zẹvbe na gbẹn ọnrẹn yotọ: “Aro rhọkpa ma he miẹn emwi ne Osanobua mwamwa khẹ emwa ni hoẹmwẹ irẹn, ehọ rhọkpa ma he vbe họẹn, ọ ma he vbe la ọmwa rhọkpa ekhọe ẹdẹ.” 10 Sokpan, ma ẹre Osanobua loo orhiọn nọhuanrẹn ọghẹe ya ta ẹmwẹ oro na ma, rhunmwuda, orhiọn nọhuanrẹn keghi gualọ otọ emwi hia, ya sẹ egbe emwi ni dinmwi ọghe Osanobua.

11 De ọmwa nọ rẹn emwi nọ rre ọmwa ọvbehe orhiọn, vbọ gberra ọmwa nii tobọre? Erriọ vbe ye, ọmwa rhọkpa ma rẹn emwi nọ rre Osanobua ekhọe, vbọ gberra orhiọn ọghe Osanobua. 12 Ẹ i re orhiọn ọghe agbọn na ẹre a rhie ne ima, sokpan, orhiọn ọghe Osanobua ẹre a rhie ne ima, ne ima mieke na sẹtin rẹn emwi ne Osanobua ya ru ima ẹse. 13 Avbe emwi na ẹre ima vbe guan kaẹn, sokpan, ma ghaa guan kaan rẹn, ma i loo ẹmwẹ ẹwaẹn ne emwa nagbọn ma emwa ẹre, sokpan, ẹmwẹ na ya orhiọn nọhuanrẹn ma ima ẹre,* ẹre ima ya rhan otọ ẹmwata nọ ke obọ Osanobua rre.*

14 Sokpan, ọmwa nọ mwẹ iziro ọghe emwa nagbọn i sẹtin miẹn ọnrẹn yi ighẹ emwi ni dekaẹn orhiọn Osanobua, rhunmwuda, emwi ukọnmwẹ nọ vbe eke nọ ye; ẹ i khian vbe sẹtin rẹn ọnrẹn, rhunmwuda, adeghẹ ọmwa i na mwẹ orhiọn Osanobua, ẹ i khian sẹtin rẹn egbe emwi vberriọ. 15 Vbọrhirhighayehẹ, ọmwa ne orhiọn ọghe Osanobua loo keghi gualọ otọ emwi hia, sokpan, ọmwa nagbọn nọ gha sẹtin bu ohiẹn ọmwa vberriọ, ẹ i rrọọ. 16 Zẹvbe ne Ebe Nọhuanrẹn khare: “De ọmwa nọ rẹn ekhọe Jehova,* nọ khian gha tama rẹn emwi nọ gha ru?” Sokpan, ma mwẹ ekhọe Kristi.

3 Etẹn, I ma sẹtin gu uwa guan zẹvbe emwa ne orhiọn nọhuanrẹn ọghe Osanobua loo. Sokpan, vbene a ya gu emwa kẹkan ọghe agbọn na guan kevbe emwa ni re ibiẹka vbe odẹ iyayi, erriọ ẹre I ya gu uwa guan. 2 Ewẹn ẹre I ya gha koko uwa, ẹ i re evbare nọ wegbe, rhunmwuda, wa ma he sẹ nọ rri evbare nọ wegbe vbe ẹghẹ nii. Uhiẹn, do sẹ vbene a guan na, wa ma he ye sẹ, 3 rhunmwuda, iziro ọghe emwa nagbọn ẹre uwa ye mwẹ. Ugbẹnvbe a miẹn wẹẹ, wa ye gbọvo egbe, kevbe wẹẹ, wa vbe gu egbe khọn, ọni rhie ma wẹẹ, iziro ọghe emwa nagbọn ye gue uwa, vbene iran ya yin ẹre uwa vbe ya yin. 4 Ugbẹnvbe eso vbe uwu uwa kha wẹẹ, “Otu e Pọl ẹre imẹ ye,” vbene eso na kha wẹẹ, “Otu Apọlọs ẹre I ye,” ẹ i re te uwa ghi yin vbe na ghee emwa ni rre uwu agbọn vberriọ?

5 Gha re Apọlọs yi? Gha vbe re imẹ ne Pọl? Ẹ i re eguọmwadia kẹkan ni ru iyobọ ne uwa ya do khian emwa iyayi ẹre ima khin ra? Iwinna ne Enọyaẹnmwa waa ne dọmwadẹ ọghẹe ẹre ọ winnaẹn. 6 Mẹ kọ emwiokọ, Apọlọs na gbe amẹ khakhae, sokpan, Osanobua ẹre ọ ru ẹre nọ na gha waan. 7 Rhunmwuda ọni, ọmwa nọ kọe kevbe nọ gbe amẹ khakhae i mobọ mwẹ esa, sokpan, Osanobua ẹre ọ yae waan. 8 Ọmwa nọ kọe kevbe nọ gbe amẹ khakhae, ọkpa ẹre iran khin,* sokpan, Osanobua gha san edọmwadẹ ọghẹe ẹse ye iwinna nọ winnaẹn. 9 Rhunmwuda, emwa ni deba Osanobua winna ẹre ima khin. Ugbo ne Osanobua na winna ẹre uwa khin, wa ọre owa ne Osanobua bọ khian.

10 Rhunmwuda ẹse ne kpataki* ne Osanobua ru mẹ, I keghi gbe ẹyotọ zẹvbe ọka iwinna nọ guẹ iwinna,* sokpan, ọmwa ọvbehe ẹre ọ ghi bọ yan rẹn. Vbọrhirhighayehẹ, dọmwadẹ ọghẹe ghi gha begbe vbe odẹ nọ ya bọ yan ẹyotọ na. 11 A ya e Jesu Kristi ru ẹyotọ nẹ, rhunmwuda ọni, ọmwa rhọkpa i khian ghi sẹtin gbe ẹyotọ ọvbehe. 12 Adeghẹ ọmwa khian ya igoru, esiliva, avbe okuta ighobioye, erhan, ra irunmwu nọ rhirhi gha khin bọ yan ẹyotọ na, 13 a gha rẹn vbene iwinna edọmwadẹ ọghẹe ye hẹ vbe ẹdẹ na gha wee ehia rua, rhunmwuda, a gha ya erhẹn danmwẹ ọnrẹn ghee, na mieke na rẹn vbene ehia ye hẹ. A gha ghi ya erhẹn danmwẹ ọnrẹn ghee nẹ, a ghi rẹn vbene iwinna edọmwadẹ ọghẹe kha hẹ. 14 Adeghẹ emwi ne ọmwaikọmwa bọ yan ẹyotọ nii na ye mudia vbene erhẹn ma na giẹn ọnrẹn, a gha san ọmwa nii ẹse; 15 adeghẹ iwinna ọmwaikọmwa na giẹn ruan, ọni rhie ma wẹẹ, iwinna ne ọmwa nii ru la ọrhiae rrie, sokpan, ọmwa nii tobọre gha miẹn uhunmwu; ọrheyerriọ, ọ ghi yevbe na miẹn wẹẹ te ọmwa nii miẹn uhunmwu rhie ladian vbe uwu erhẹn.

16 Wa ma rẹn wẹẹ, ọgua Osa ẹre uwa tobọ uwa khin ra? Wa ma vbe rẹn wẹẹ, uwu uwa ẹre orhiọn ọghe Osanobua dia ra? 17 Adeghẹ ọmwaikọmwa na guọghọ ọgua Osa rua, Osanobua gha vbe guọghọ ọmwa nii rua, rhunmwuda, emwi nọhuanrẹn ẹre ọgua Osa khin, wa ẹre ọ vbe re ọgua Osa nii.

18 We ne ọmwa rhọkpa ghẹ rẹrẹ egbe ẹre: Adeghẹ ọmwaikọmwa vbe uwu uwa na gha roro ẹre wẹẹ irẹn mwẹ ẹwaẹn vbe agbọn na,* we nọ khian ọzuọ, nọ mieke na do gha re ọmwa nọ gele mwẹ ẹwaẹn. 19 Rhunmwuda, emwi ne emwa nagbọn tie ẹre ẹwaẹn, emwi ukọnmwẹ nọ vbe odaro Osanobua, rhunmwuda, a gbẹn ọnrẹn yotọ wẹẹ: “Te Osanobua mu iran ni wẹẹ iran mwẹ ẹwaẹn vbe ero ne iran ru.” 20 A vbe gbẹn ọnrẹn yotọ wẹẹ: “E Jehova* rẹnrẹn wẹẹ, iro ne avbe umẹwaẹn zẹ, erhọkpa i mwẹ esa.” 21 Nọnaghiyerriọ, wa ghẹ ya emwa nagbọn rhuọ; rhunmwuda, wa ẹre ọ yan emwi hia, 22 ọre Pọl nọ, ra Apọlọs, ra e Sifas,* ra agbọn na, ra arrọọ, ra uwu, ra emwi ni rrọọ nian, ra emwi ni dee vbe odaro, ọghe uwa ẹre ehia khin; 23 sokpan, ọghe Kristi ẹre uwa khin; e Kristi na gha re ọghe Osanobua.

4 Te ọ khẹke ne emwa gha ghee ima zẹvbe eguọmwadia e Kristi, na viọ ẹmwẹ oro nọhuanrẹn ọghe Osanobua na. 2 Emwi na gualọ vbe obọ emwa na mu iwinna ye ọre obọ, ọre ne iran gha re emwa nọ gia mu ẹtin yan. 3 Nọ ne imẹ, ọ ma kaan mwẹ deghẹ uwa, ra avbe ọbuohiẹn ni rre ekọtu na gha bu ohiẹn mwẹ. Uhiẹn, mẹ tobọ mwẹ i vbe bu ohiẹn egbe mwẹ. 4 Emwi ọkpa i rrọọ ne I ru, ne ekhọe mwẹ gu mwẹ gui yi, sokpan, I ma ya ọna kha wẹẹ, I i ba emwi ku; e Jehova* ọre ọmwa nọ tae deghẹ I rriabe ra I rriase. 5 Nọnaghiyerriọ, wa ghẹ bu ohiẹn ọmwa* rhọkpa, ọ te sẹ ẹghẹ na bu yọ, sokpan, wa mudia khẹ ẹghẹ ne Enọyaẹnmwa khian ya rre. Irẹn gha vẹ ọre rua, emwi ẹkhokho hia na ru vbe uwu ebiebi, ọ ghi vbe vẹ ọre rua, iro ne emwa zẹ vbe ekhọe. Ẹghẹ nii, Osanobua ghi tian edọmwadẹ ọghẹe ye iwinna nọ ru.

6 Etẹn, rhunmwuda uwa, ẹre I na ta ẹmwẹ imẹ vbe Apọlọs sin, ne uwa mieke na miẹn emwi ruẹ vbọ, ẹghẹ nii, wa ghi do rẹn ilele na nọ khare wẹẹ: “Wa ghẹ rhie obọ gberra emwi na gbẹnnẹ yotọ,” ne uwa ghẹ mieke na gha tọn egbe mu, ne uwa ghẹ vbe gha gbe ewanmwẹ ghee obọ ọkpa. 7 Vbọ ya ruẹ lughaẹn ne emwa ọvbehe? Gia gele ghee ẹre, de emwi ne u mwẹ, na ma rhie nuẹn? Adeghẹ te a gele rhie ẹre nuẹn, de emwi ne uwẹ ghi rhuọ ba, vbene a miẹn wẹẹ, ẹ i re te a yae ru ruẹ ẹse?

8 Te emwi hia ne uwa gualọ ghi sẹ uwa obọ nẹ ra? Te uwa ghi fe nẹ ra? Te uwa ghi rri ọba nẹ ra, vbene ima ma na deba uwa ra? Ọ gha te yẹẹ mwẹ gbe, deghẹ uwa gele suẹn gha kha nẹ zẹvbe ọba, ne ima mieke na vbe deba uwa gha kha. 9 Ọ ye mwẹ wẹẹ, ma ne avbe ukọ, ẹre Osanobua kiekie viọ ladian vbe iko ọba iko ẹvbo zẹvbe emwa na khian ya gbelua,* rhunmwuda, te ima ghi yevbe emwa ni rre ọgbẹlẹzẹ na na ghee ughe, ne emwa ni rre agbọn na kevbe avbe odibosa kpee ghee. 10 Emwa ghee ima ọzuọ rhunmwuda e Kristi, sokpan, te uwa ghee egbe uwa zẹvbe emwa ni mwẹ ẹwaẹn, rhunmwuda ne uwa na lele Kristi; emwa ghee ima enọ ma wegbe, sokpan, wa na gha re nọ wegbe; emwa ghee uwa gidii, sokpan, iran i ka ima yọ. 11 Do sẹ vbene a guan na, te ohanmwẹ kevbe ovbamẹ wa ye gbe ima, ma i miẹn ukpọn agbọn yọ,* a vbe gbe ima,* ma i vbe mwẹ owa ne ima dia, 12 erriọ ẹre ima vbe ya miẹn ẹsọn, obọ ma gbe ima. Emwa ghaa rhovbiẹ ima, ma ghi na erhunmwu ne iran; emwa ghaa zẹ ima kpokpo, ma ghi hẹko zin egbe ẹre; 13 emwa gha mu ima eni rhia, ma ghi ya urhu ne khuẹrhẹ zẹ ẹmwẹ wanniẹn iran; do sẹ vbene a guan na, emwa ne agbọn he, ni yevbe iku kẹkan nẹi mwẹ evbọ gia ya ru, ẹre ima khin.

14 Ẹ i re rhunmwuda wẹẹ, I hoo ne ekhue gha mu uwa, ẹre ọ ya mwẹ gbẹn ebe na gie uwa, sokpan, te I gbẹn ọnrẹn ne I ya bu uwa ude zẹvbe emọ ne I hoẹmwẹ ọnrẹn. 15 Ọ gha khọnrẹn ne uwa gha mwẹ orhunmwu arriaisẹn igbe (10,000) ni ma uwa vbene a ya lele Kristi hẹ, wa i mwẹ erha nibun; sokpan, erha uwa ẹre imẹ ghi khin, rhunmwuda, mẹ ẹre ọ kporhu iyẹn nọ maan vbekpa e Kristi Jesu ma uwa. 16 Rhunmwuda ọni, wa lahọ, wa gha ya egbe taa mwẹ. 17 Ọni ẹre ọ si ẹre ne I khian na gie Timoti bu uwa gha dee, rhunmwuda, ọmọ ne I hoẹmwẹ ọnrẹn kevbe nọ gia mu ẹtin yan ẹre ọ khin mwẹ re vbe ugamwẹ Enọyaẹnmwa. Ọ gha ma uwa odẹ ne I ya ru emwi zẹvbe ọguọmwadia e Kristi Jesu, vbene imẹ vbe ya ma emwa emwi vbe iko ni rre ehe hia.

18 Eso vbe uwu uwa tọn egbe mu, rhunmwuda, iran roro ẹre wẹẹ, I i khian rre do miẹn uwa. 19 Sokpan, I gha rherhe do miẹn uwa deghẹ iho ọghe Jehova* nọ; I gha rre, ẹ i re ẹmwẹ ne iran ni tọn egbe mu ta, ẹre I hoo ne I họn, sokpan, I gha hoo ne I rẹn eke nọ khua ye iran re. 20 Rhunmwuda, Arriọba Osanobua i re ọghe ẹmwẹ ne unu, sokpan, ọghe ẹtin nọ.* 21 De nọ yẹẹ uwa sẹ vbọ? Ne I rhie asan bu uwa gha dee ra, ra ne I ya ahoẹmwọmwa kevbe ekhọe ọmẹhẹ bu uwa gha dee?

5 I họn ẹmwẹ alama oghẹ* nọ rhiegbe ma vbe uwu ẹbu uwa, ọghe okpia ọkpa ne irẹn vbe amwẹ erhae gba rrọọ.* Emwa ni rre uwu agbọn i kue vbe yin egbe uyinmwẹ alama oghẹ* vberriọ. 2 Te uwa ghọghọ ye ọviẹviẹ na ra? Ẹ i re te ọ khẹke ne uwa gha khiẹ, ne uwa rhie okpia nọ ru a i ghẹ ru na, hin uwu ẹbu uwa rre ra? 3 Agharhemiẹn wẹẹ I i gu uwa rre evba, orhiọn mwẹ gu uwa rre evba; I vbe bu ohiẹn okpia nọ ru a i ghẹ ru na nẹ, vbene a miẹn wẹẹ I gu uwa rre evba. 4 Adeghẹ uwa na si egbe koko vbe eni Enọyaẹnmwa e Jesu, vbene uwa na rẹn wẹẹ orhiọn mwẹ* kevbe ẹtin Enọyaẹnmwa e Jesu gu uwa rre evba, 5 wa ghi rhie okpia vberriọ ne Setan, na mieke na fuẹn ikinnegbe nii rua, ne emwi rhọkpa ghẹ mieke na mu orhiọn emwa ni rre iko rhia vbe ẹdẹ Enọyaẹnmwa.

6 Ọ ma khẹke ne uwa gha rhuọ. Wa ma rẹn wẹẹ, eyist kherhe na rhie ye eflawa na fuẹn yotọ, ẹre ọ yae hue ra? 7 Wa rhie eyist nẹdẹ hin ehe ne uwa ye rre, ne uwa mieke na do yevbe eflawa ọghe ọgbọn na fuẹn yotọ, ugbẹnvbe a miẹn wẹẹ, wa i ghi mwẹ eyist vbe egbe. Rhunmwuda, a ya e Kristi ne oteghe ohuan Alagberra ọghe ima zọ ese ne ima nẹ. 8 Nọnaghiyerriọ, wa ghẹ gi ima ya eyist nẹdẹ, ra eyist emwi dan kevbe ọkhọ do ugie, sokpan, wa gi ima loo ebrẹd ẹkoata kevbe ebrẹd ẹmwata na ma ya eyist ru ya do ugie.

9 Vbe ebe ne I gbẹn gie uwa, I na tama uwa wẹẹ, ne uwa ghẹ ghi gu emwa ni mwẹ obọ vbe alama oghẹ* mu obọ. 10 Ẹ i re te I ya ọna kha wẹẹ, ne uwa wa gban egbe ne iran fo fẹfẹfẹ ighẹ iran ni rre uwu agbọn ni gbe alama oghẹ,* ra ni re emwa arovbẹmwẹ, ra ni khiẹn ọmwa obọ miẹn ọmwa emwi, ra ni ga ẹbọ. Rhunmwuda, ọ ghaa yerriọ, ọni rhie ma wẹẹ, te uwa khian wa kpa hin agbọn na rre fẹfẹfẹ. 11 Sokpan, te imẹ ghi gbẹn ebe gie uwa nian, ne uwa ghẹ ghi gu ọmwaikọmwa na ghi rẹn ye ọtẹn nẹ, nọ mwẹ obọ vbe alama oghẹ* mu obọ, ra nọ re ọmwa arovbẹmwẹ, ra ọmwa nọ ga ẹbọ, ra ọmwa nọ ya unu rhia ọmwa,* ra ọmwa nọ da ayọn gbe egbe, ra ọmwa nọ khiẹn ọmwa obọ miẹn ọmwa emwi; wa ghẹ kue gu ọmwa vberriọ rri evbare. 12 Vbọ ghi kaan mwẹ kaan emwa ni rre uwu agbọn, ne I khian na gha bu ohiẹn iran? Ẹ i re emwa ni rre uwu iko, ẹre ọ khẹke ne uwa gha bu ohiẹn ọnrẹn ra, 13 ne uwa sẹ emwa ni rre uwu agbọn rae, ne Osanobua bu ohiẹn iran? “Wa rhie ọmwa dan hin uwu ẹbu uwa rre.”

6 Adeghẹ ọkpa vbe uwu uwa kevbe ọtiọnrẹn mwẹ egbe ẹzọ, te ọ khian ghi mu ẹzọ nii gha rrie ekọtu, ne emwa nẹi lele odẹ Osanobua bu ohiẹn ọnrẹn ra? Ẹ i re emwa ni huanrẹn ẹre ọ te khẹke nọ mu ẹzọ nii gie? 2 Ra, wa ma rẹn wẹẹ emwa ni huanrẹn ẹre ọ khian bu ohiẹn agbọn na ra? Adeghẹ uwa ẹre ọ khian bu ohiẹn agbọn na, wa i khian vbe sẹtin bu ẹzọ nọ ma sẹ emwi ra? 3 Wa ma rẹn wẹẹ ima gha bu ohiẹn avbe odibosa ra? Inu ghi nọ ne ẹmwẹ nọ de rre vbe agbọn na? 4 Adeghẹ ẹmwẹ eso na de rre vbe agbọn na nọ khẹke na guan yi, emwa ne iko ma ka yọ, ẹre uwa khian ghi we nọ guan yọ ra? 5 Te I ta ẹmwẹ na, ne ekhue egbe uwa gha mu uwa. Wa i khian miẹn orhunmwu ọkpa nọ mwẹ ẹwaẹn vbe uwu ẹbu uwa, nọ gha sẹtin bu ohiẹn ne etẹn ni mwẹ egbe ẹzọ ra? 6 Nọghayayerriọ, ọtẹn ghi si ọtẹn ọvbehe gha rrie ekọtu, wa ghi gha ya egbe uwa ma vbe odaro emwa ni ma yayi!

7 Ọghe ne ẹmwata, adeghẹ uwa na gha silo egbe yo ekọtu, egbe uwa ẹre uwa yae ru. Wa ma rẹn wẹẹ, adeghẹ a na ru uwa emwi khọọ, wa fẹko muẹn wuo egbe ẹre ọ maan sẹ ra? Wa ma vbe rẹn wẹẹ, wa fẹko zin egbe na mu uwa ru, ẹre ọ maan sẹ ra? 8 Nọghayayerriọ, wa ẹre ọ ru emwa ọvbehe khọọ, wa ẹre ọ vbe mu iran ru; nọ da ọmwa vbọ ọre wẹẹ, etiẹn uwa rhorhorho ẹre uwa ru vberriọ!

9 Ra, wa ma rẹn wẹẹ, emwa dan i khian sẹtin la Arriọba Osanobua ra? Wa ghẹ rẹrẹ egbe uwa.* Emwa ni mwẹ obọ vbe alama oghẹ,* emwa ni ga ẹbọ, emwa ni ghẹẹ,* ikpia ni kue yọ ne ikpia ne ihua iran gha gu iran ru emwi ọdọ vbe amwẹ, ikpia ni tie ikpia ne ihua iran vbe ovbe,* 10 avbe oyi, emwa arovbẹmwẹ, emwa ni da ayọn gbe egbe, emwa ni ya unu rhia ọmwa,* kevbe emwa ni khiẹn ọmwa obọ miẹn ọmwa emwi, nọ khian la Arriọba Osanobua, ẹ i rrọọ. 11 Erriọ ẹre eso vbe uwu uwa te ka gha ye. Sokpan, a khuẹ uwa huan hin orukhọ ọghe uwa rre nẹ, a vbe kpe uwa huan nẹ; a vbe ka uwa ye emwa ata nẹ vbe eni Enọyaẹnmwa e Jesu Kristi, lekpa orhiọn ọghe Osanobua mwa.

12 I mwẹ asẹ ne I khian ya ru emwi nọ rhirhi khọn mwẹ, sokpan, ẹ i re emwi hia ẹre ọ mwẹ iyobọ nọ ye ne ọmwa. I mwẹ asẹ ne I khian ya ru emwi nọ rhirhi khọn mwẹ, sokpan, I i khian kue ne emwi rhọkpa gha loo mwẹ vbe na ghee ọviẹn.* 13 Ẹko ẹre ọ yan evbare, evbare ẹre ọ vbe yan ẹko, sokpan, Osanobua gha fuẹn eveva rua. A ma yi egbe na yae gha gbe alama oghẹ,* sokpan, te a yi ẹre na yae gha ru iwinna Enọyaẹnmwa, Enọyaẹnmwa ẹre ọ vbe kpemehe emwi ne egbe gualọ. 14 Sokpan, Osanobua keghi ya ẹtin ẹnrẹn huẹn Enọyaẹnmwa kpaegbe, ọ gha vbe ya ẹtin ẹnrẹn huẹn ima kpaegbe vbe ima gha wu.

15 Wa ma rẹn wẹẹ, te a ku egbe uwa kugbe ba ọghe Kristi ra? Nọnaghiyerriọ, ohan gha gu mwẹ rhie vbe egbe Kristi, ne I ya ku ẹre kugbe ba ọghe igbiragia ra? A wa wua! 16 Wa ma rẹn wẹẹ, ọmwaikọmwa nọ ya ku egbe ẹre kugbe ba ọghe igbiragia, ọkpa ẹre irẹn vbe igbiragia nii ghi khin ra? Rhunmwuda, Osanobua khare wẹẹ, “iran eva ghi do gha re ọkpa.”* 17 Sokpan, ọmwaikọmwa nọ ku egbe ẹre kugbe ba ọghe Enọyaẹnmwa, irẹn vbe Enọyaẹnmwa ghi do gha mwẹ orhiọn* ọkpa. 18 Wa lẹẹ ne alama oghẹ!* Orukhọ ke orukhọ ne ọmwa rhirhi ru, ẹ i mobọ wa mwẹ emwi nọ ru egbe* re, sokpan, ọmwaikọmwa nọ mwẹ obọ vbe alama oghẹ, te ọ ru egbe* ẹre khọọ. 19 Wa ma rẹn wẹẹ, egbe uwa ẹre orhiọn nọhuanrẹn ne Osanobua rhie ne uwa dia ra? Deba ọni, wa ma yan egbe uwa, 20 rhunmwuda, te a dẹ uwa ha osa. Nọnaghiyerriọ, wa hia vbe odẹ ke odẹ, ne uwa gha loo egbe uwa ya rhie uyi ne Osanobua.

7 Vbe nọ dekaẹn emwi ne uwa gbẹn gu mwẹ, I hoo ne I tama uwa wẹẹ, ọ gha wa maan sẹ ne okpia ghẹ ya obọ kaan okhuo;* 2 sokpan, rhunmwuda alama oghẹ* nọ ghi wa gba ehe hia, we ne dọmwadẹ okpia rhie okhuo, dọmwadẹ okhuo ghi vbe gha mwẹ odọ ẹre. 3 We ne ọdọ gha ru emwi nọ khẹke ọvbokhan rẹn nẹẹn, okhuo ghi vbe gha ru emwi nọ khẹke ọdọ ẹre nẹẹn. 4 Amwẹ ma yan egbe ẹre, sokpan, ọdọ ẹre, ẹre ọ yan rẹn; erriọ vbe ye, ọdọ ma yan egbe ẹre, sokpan, ọvbokhan rẹn ẹre ọ yan rẹn. 5 Wa ghẹ gha ya emwi ọdọ vbe amwẹ na ru mwẹ egbe akhaẹn, sokpan a ma wẹẹ, te uwa gba tae wẹẹ, wa gha dobọ yi nẹ vbe ọwara ẹghẹ eso, ne uwa mieke na miẹn ẹghẹ ya gha na erhunmwu. Iyeke ọni, wa ghi vbe werriegbe suẹn, ne Setan ghẹ mieke na la evba la uwa egbe, rhunmwuda ighẹ uwa ma ghi sẹtin da egbe uwa yi. 6 Vbọrhirhighayehẹ, ẹ i re te I gbe uhi ne uwa, sokpan, te I yae bu uwa ude zẹvbe emwi ne uwa gha vbe sẹtin ru. 7 Sokpan, ọ gha te yẹẹ mwẹ akpawẹ emwa hia wa ye vbene imẹ ye. Vbọrhirhighayehẹ, dọmwadẹ ọghẹe mwẹ emwi ne Osanobua ya we ẹre, ọghe ọna ughaẹn, ọghe nọkpa ughaẹn.

8 Nọ ne iran ni ma he rhie okhuo ra ni ma he rọnmwẹ ọdọ, kevbe emwa ni dẹgbẹe, ọ gha wa maan sẹ deghẹ iran gha sẹtin gha rrọọ khian vberriọ zẹvbe ne imẹ vbe ye. 9 Sokpan, adeghẹ iran ma sẹtin da egbe iran yi, we ne iran ru orọnmwẹ, rhunmwuda, ọ gha maan sẹ ne iran ru orọnmwẹ, na khian ya miẹn wẹẹ, te iran ghi fifi rhunmwuda egbe nọ ru iran rriorriorrio.

10 Nọ ne emwa ni ru orọnmwẹ nẹ, emwi ne I khian tama iran na khin: We ne okhuo ghẹ kpa sẹ ọdọ ẹre rae, sokpan, ẹ i re imẹ ẹre ọ tae oo, ẹmwẹ Enọyaẹnmwa nọ. 11 Sokpan, adeghẹ ọ na ghi kpa sẹ ọdọ ẹre rae, we nẹ ghẹ rọnmwẹ ọdọ ọvbehe, ra ọ ghi wa ya gu ọdọ ẹre ru adọlọ khekherriọ; ọ ma vbe khẹke ne ọdọ sẹ amwẹ ọnrẹn rae.

12 Sokpan, nọ ne emwa nikẹre, emwi ne I khian tama iran na khin: Adeghẹ ọtẹn nokpia mwẹ okhuo nẹi re ọmwa iyayi vbe owa, okhuo nii na vbe kue yọ ne iran ye gba gha rrọọ, we ne ọtẹn nii ghẹ sẹ okhuo nii rae. Sokpan, ẹmwẹ obọ mwẹ na khin, ẹ i re ọghe Enọyaẹnmwa. 13 Adeghẹ okhuo vbe mwẹ ọdọ nẹi re ọmwa iyayi, ọdọ ẹre na vbe kue yọ ne iran ye gba gha rrọọ, we ne okhuo nii ghẹ sẹ ọdọ ẹre rae. 14 Rhunmwuda, te ọdọ nii nẹi re ọmwa iyayi ghi khian ena kpe huan rhunmwuda ọvbokhan rẹn; te okhuo nii nẹi vbe re ọmwa iyayi ghi khian ena kpe huan rhunmwuda ọdọ ẹre nọ re ọmwa iyayi. Akpawẹ ẹ i ye vberriọ, te ivbi iran gha te gha re emọ ni ma huan, sokpan, vbene ọ ghi ye na nian, emọ ni huanrẹn ẹre iran ghi khin. 15 Sokpan, adeghẹ nẹi re ọmwa iyayi nọ rrọọ na wẹẹ irẹn gha kpa, gi ẹre gha khian; ọ ghaa yerriọ, uhi rhọkpa ma ghi mu ọmwa iyayi nọ rrọọ, ọre nokpia nọ ra nokhuo, sokpan, te Osanobua tie uwa, ne uwa gha mwẹ ọfunmwegbe. 16 Wẹ ne amwẹ, wẹ rẹnrẹn deghẹ u gha sẹtin miẹn ọdafọn fan ra? Ra, wẹ ne ọdọ, wẹ rẹnrẹn deghẹ u gha sẹtin miẹn ọvbokhan ruẹ fan ra?

17 Vbọrhirhighayehẹ, gi edọmwadẹ ọghẹe gha yin zẹvbe nọ gua okhuo* ne Jehova* fian nẹẹn ro, ọ ghi ye gha rrọọ zẹvbe nọ ghaa ye vbe Osanobua tie ẹre. Emwi vbenian ẹre I vbe we ne iko hia nikẹre gha ru. 18 Ọmwa rhọkpa rrọọ nọ rhuẹ nẹ, a te miẹn wẹẹ Osanobua tie ẹre ra? We nọ ye gha rrọọ vberriọ. Ọmwa rhọkpa rrọọ nọ ma rhuẹ, ne Osanobua tiere ra? We nẹ ghẹ rhuẹ. 19 A rhuẹ re oo, a ma rhuẹ oo, erhọkpa i mwẹ esa; emwi nọ ru ekpataki ọre ne ọmwa gha lele uhi Osanobua. 20 Vbene dọmwadẹ ọghẹe ghaa ye vbe ẹghẹ na ya tie ẹre, we nọ ye gha rrọọ vberriọ. 21 Ọviẹn ẹre u ghaa khin vbe a tie ruẹ ra? Ghẹ kpokpo egbe ye ọni; sokpan, deghẹ ẹkpotọ kie nuẹn ne u ya khian ena fan fua, ghẹ gi ẹkpotọ vberriọ la ruẹ ban. 22 Rhunmwuda, ọviẹn ke ọviẹn na tiere nọ do gha re ọguọmwadia Enọyaẹnmwa, ọmwa na faẹn ghi nọ, ọghe Enọyaẹnmwa ẹre irẹn ghi vbe khin; erriọ vbe nọ, ọmwaikọmwa nọ yan egbe ẹre na tiere, ọviẹn e Kristi ghi nọ. 23 Te a dẹ uwa ha osa; wa ghẹ ghi ya egbe uwa khian eviẹn emwa nagbọn. 24 Etẹn, vbene dọmwadẹ ọghẹe ghaa ye vbe ẹghẹ na ya tie ẹre, we nọ ye gha rrọọ vberriọ vbe odaro Osanobua.

25 Vbe nọ dekaẹn ikhuo ni ma rẹn okpia ra ikpia ni ma he lovbiẹ ke okhuo ẹdẹ,* I i mwẹ iyi rhọkpa nọ ke obọ Enọyaẹnmwa rre ne I khian tama iran, sokpan, I gha ta ẹmwẹ obọ mwẹ ma iran zẹvbe ọmwa na gha sẹtin rhie ẹmwẹ ọnrẹn, rhunmwuda itohan ne Enọyaẹnmwa mwẹ ghee mwẹ. 26 Rhunmwuda vbene emwi ghi wegbe hẹ nian, mẹ ghee ẹre wẹẹ, ọ gha maan sẹ ne okpia wa gha rrọọ khian zẹvbe nọ wa ye. 27 Ọmwa nọ rhie okhuo nẹ ẹre u khin ra? Ghẹ gualọ vbene u gha ya fan egbuẹ hẹ vbe obọ ẹre. Ọmwa nẹi mwẹ okhuo ẹre u khin ra? Ghẹ ghi gualọ okhuo ne u khian rhie. 28 Sokpan, adeghẹ u na dobọ rhie okhuo, u ma ru orukhọ. Adeghẹ okhuo nọ ma rẹn okpia ra okpia nọ ma he lovbiẹ ke okhuo ẹdẹ na ru orọnmwẹ, ọmwa vberriọ ma ru orukhọ. Vbọrhirhighayehẹ, emwa ni ru orọnmwẹ gha họẹn vbe egbe. Ọni ẹre ọ si ẹre ne I na hia ne I bu uwa ude na, ne uwa mieke na sẹtin rhie uhunmwu uwa lẹre.

29 Yevbesọni, etẹn, emwi ne I hoo ne I ta ọre wẹẹ, ovbi ẹghẹ kherhe ẹre ọ ghi kẹ. Ke ẹghẹ na kpa, gi emwa ni rhie okhuo nẹ gha ru vbene a miẹn wẹẹ iran i mwẹ okhuo, 30 emwa ni khiẹ ghi gha ru vbene a miẹn wẹẹ iran i khiẹ, emwa ni ghọghọ ghi gha ru vbene a miẹn wẹẹ iran i ghọghọ, emwa ni dẹlẹ emwi ghi gha ru vbene a miẹn wẹẹ, iran i mwẹ emwi rhọkpa, 31 emwa ni loo emwi agbọn na ghi gha ru vbene a miẹn wẹẹ, iwinna agbọn na ma mu iran; rhunmwuda, te ẹmwẹ agbọn na wa fi werriẹ khian. 32 I ma hoo ne uwa gha si osi ye emwi rhọkpa. Nọ ne okpia nọ ma he rhie okhuo, iwinna Enọyaẹnmwa ẹre ọ muẹn; vbene ọ khian ya gha ru emwi nọ yẹẹ Enọyaẹnmwa, ẹre ọ si osi ba. 33 Sokpan, iwinna ẹmwẹ agbọn na ẹre ọ mu okpia nọ rhie okhuo nẹ; vbene ọ khian ya gha ru emwi nọ yẹẹ ọvbokhan rẹn, ẹre ọ si osi ba, 34 ekhọe ọre i ghi rre ihe ọkpa. Yevbesọni, nọ ne okhuo nọ ma he rọnmwẹ ọdọ kevbe okhuo nọ ma rẹn okpia, iwinna Enọyaẹnmwa ẹre ọ muẹn; vbene ọ khian ya gha mwẹ egbe kevbe ekhọe* nọhuanrẹn ẹre ọ si osi ba. Sokpan, iwinna ẹmwẹ agbọn na ẹre ọ mu okhuo nọ rọnmwẹ ọdọ nẹ; vbene ọ khian ya gha ru emwi nọ yẹẹ ọdọ ẹre, ẹre ọ si osi ba. 35 Umamwẹ ọghe uwa ẹre I gualọ, ọni ẹre ọ si ẹre ne I na ta ẹmwẹ ne I ta na. Ẹ i re te I hoo ne I tama uwa ehe ne uwa gha khian sẹ, sokpan, te I hoo ne uwa ru emwi nọ khẹke, ne uwa vbe sẹtin gha rhiegbe ye iwinna Enọyaẹnmwa vbe ẹghẹ hia, vbene emwi rhọkpa i na rhie uwa ekhọe hin.

36 Sokpan, adeghẹ ọmwaikọmwa na bẹghe ẹre wẹẹ, te irẹn ghi yin uyinmwẹ nọ ma khẹke rhunmwuda ne irẹn ma na he ru orọnmwẹ, a na vbe miẹn wẹẹ, ọmwa vberriọ gberra ẹghẹ ne egbe ya ru igbama rriorriorrio nẹ, emwi nọ khẹke nọ ru na khin: Gi ẹre ru emwi nọ rre ọre orhiọn; ọ ma ru orukhọ. Gi iran ru orọnmwẹ. 37 Sokpan, adeghẹ ọmwaikọmwa na rẹn vbe ekhọe ọre wẹẹ, esa i rrọọ ne irẹn khian ya ru orọnmwẹ, ọ na vbe rẹn wẹẹ irẹn gha sẹtin da egbe ẹre yi, ọ na vbe ta mu olọ yan rẹn wẹẹ irẹn i khian ru orọnmwẹ, ọmwa nii gha wa miẹn ere vbọ. 38 Erriọ vbe ye, ere wa rrọọ ne ọmwaikọmwa nọ rhie okhuo ra nọ rọnmwẹ ọdọ, sokpan, ọmwaikọmwa nọ ma rhie okhuo ra nọ ma rọnmwẹ ọdọ, ẹre ọ khian miẹn ere nọ sẹre.

39 Ọ ma khẹke ne okhuo nọ rre owa ọdọ sẹ ọdọ ẹre rae, vbene ọdọ ẹre na ye rre agbọn. Sokpan, adeghẹ ọdọ ẹre na wu,* ọ sẹtin rọnmwẹ ọmwa nọ khọnrẹn, sokpan, ọ ghi gha re ọrhuanegbe Enọyaẹnmwa.* 40 Sokpan, vbe ọghe imẹ, mẹ ghee ẹre wẹẹ, adeghẹ ọ ma ghi rọnmwẹ ọdọ, ẹre ọ khian fu ẹre egbe rre sẹ; mẹ rẹnrẹn wẹẹ, I wa vbe mwẹ orhiọn nọhuanrẹn ọghe Osanobua.

8 Vbe nọ dekaẹn evbare na ya zọ ese gie ẹbọ, emwi ne I khian ta na khin: Ma rẹnrẹn wẹẹ ima hia mwẹ irẹnmwi. Itengbemu ẹre irẹnmwi si ye ọmwa egbe, sokpan, ahoẹmwọmwa ẹre ọ rhie igiọdu ne ọmwa.* 2 Ọmwaikọmwa nọ roro ẹre wẹẹ irẹn rẹn emwi, ọmwa nii ma he rẹn emwi nii sẹ, vbene ọ khẹke. 3 Sokpan, adeghẹ ọmwaikọmwa na hoẹmwẹ Osanobua, Osanobua rẹn ọmwa nii.

4 Nian, gia guan kaẹn evbare na ya zọ ese gie ẹbọ ne emwa re. Ma rẹnrẹn wẹẹ, ẹbọ i mwẹ esa nọ ye vbe agbọn na kevbe wẹẹ, Osanobua ọkpa ẹre ọ rrọọ. 5 Agharhemiẹn wẹẹ emwi bun ne emwa tie ẹre osa, ọre vbe ẹrinmwi nọ, ra vbe agbọn na, zẹvbe ne “osa” nibun kevbe “arowa” nibun vbe rrọọ, 6 Osa ọkpa kẹkan ẹre ima mwẹ, ọni ọre Evbavba, nọ yi emwi hia, ọghẹe ẹre ima vbe khin; Arowa ọkpa ẹre ọ vbe rrọọ, ọni ọre Jesu Kristi na la obọ ẹre yi emwi hia. Lekpa ẹre, ẹre ima na rre agbọn.

7 Vbọrhirhighayehẹ, ẹ i re emwa hia ẹre ọ rẹn ọna. Sokpan, rhunmwuda ne eso na ka gha ga ẹbọ, iran ghaa rri evbare na ya zọ ese gie ẹbọ, iran ghi gha roro ẹre wẹẹ, te iran ga ẹbọ vberriọ. Rhunmwuda ne ekhọe iran na vburriẹ, ọ ghi gha kpokpo iran. 8 Sokpan, evbare i khian sẹtin si ima kẹ Osanobua sayọ; adeghẹ a ma na re, emwi rhọkpa ma wii ọmwa, a gha vbe re, a i khian vbe miẹn ere rhọkpa vbọ. 9 Sokpan, u ghi mwẹ ẹwaẹn, ne u ghẹ ya ya emwa ni ma wegbe rrua owẹ, rhunmwuda wẹẹ, u mwẹ asẹ ne u khian ya ru emwi nọ rhirhi khọn ruẹ. 10 Adeghẹ ọmwa nọ ma wegbe na bẹghe ẹre wẹẹ, wẹ nọ mwẹ irẹnmwi rri evbare vbe aro ẹbọ, ẹ i re te ekhọe ọre khian ghi gua ẹre kpa, nọ suẹn gha rri evbare na ya zọ ese gie ẹbọ ra? 11 Ẹghẹ nii, u ghi do rhunmwuda irẹnmwi ne u mwẹ rhie ikuanegbe ne ọtuẹn nọ ma wegbe ne Kristi wu na. 12 U gha ru etuẹn khọọ vbe odẹ vbenian, u na ya iran ni ma wegbe ru emwi nọ gha ya ekhọe iran do gha kpokpo iran, te u ru orukhọ daa e Kristi. 13 Rhunmwuda ọni, adeghẹ ẹmwẹ evbare ẹre ọ ya ọtẹn mwẹ rrua owẹ, I i khian ghi werriegbe rri emiowo hiehie, ne I ghẹ mieke na ya ọtẹn mwẹ rrua owẹ.

9 Mẹ i khian sẹtin ru emwi nọ rhirhi khọn mwẹ ra? Ẹ i re ukọ ẹre imẹ khin ra? Mẹ ma vbe miẹn Enọyaẹnmwa e Jesu ra? Ẹ i re ere na miẹn vbe iwinna ne I winna ne Enọyaẹnmwa ẹre uwa khin ra? 2 Ọ gha khọnrẹn wẹẹ, emwa ọvbehe ma ka mwẹ ye ukọ, ukọ ẹre I khin ne uwa! Rhunmwuda, wa ọre ama nọ so igiẹ yọ wẹẹ, ukọ ọghe Enọyaẹnmwa ẹre I khin.

3 Vbene I khian ya zẹ enunu mwẹ ma emwa ni zaan mwẹ na khin: 4 Ma mwẹ asẹ na ya re kevbe na ya da, ra ẹ i re erriọ? 5 A ma wua deghẹ ima na vbe rhie okhuo nọ re ọmwa iyayi,* nọ vbe gha lele ima khian? Ẹ i re erriọ ẹre avbe ukọ nikẹre kevbe etiẹn Enọyaẹnmwa, kẹ kevbe Sifas* vbe ru ẹre ra? 6 Ra, mẹ vbe Banabas ọkpa ẹre a we nọ gha ya obọ ima khuan ne egbe ima ra? Ma i vbe mwẹ asẹ na ya dobọ iwinna vberriọ yi ra? 7 Wa he vbe miẹn ovbiyokuo, nọ tobọre zẹ igho nọ ya gbaroghe egbe ẹre ra? Wa he vbe miẹn ọmwa nọ mu ugbo e vaẹn, nẹi rri ọmọ nọ ke ugbo e vaẹn nii rre ra? Wa he vbe miẹn ọsuohuan nẹi wọn ewẹn na mi ladian vbe ohuan ọghẹe ra?

8 Vbene emwa nagbọn ya roro emwi, ẹre I ya ta ẹmwẹ na ra? Uhi ma vbe guan kaan avbe emwi na ra? 9 Rhunmwuda, Uhi e Mozis khare wẹẹ: “Wa ghẹ rrọ ekagha ye unu ẹmila* vbọ ghaa wiẹn emwiokọ.” Te ọna ghi rhie ma wẹẹ, ẹmwẹ ẹmila ẹre Osanobua ghi mu roro ra? 10 Ra, rhunmwuda ima ẹre Osanobua na ta ẹmwẹ na ra? Ọghe ne ẹmwata, rhunmwuda ima ẹre a na gele gbẹn ẹmwẹ na yotọ, rhunmwuda, ke ọmwa nọ gua kevbe nọ khan emwiokọ, te iran ru ẹre, rhunmwuda, iran ya aro yọ wẹẹ, iran gha vbe miẹn ọghe iran vbọ.

11 Ugbẹnvbe a miẹn wẹẹ, ma kọ emwi nọ ke obọ Osanobua rre* ye uwu ẹbu uwa, emwi dan ma nọ,* deghẹ uwa na vbe ru iyobọ emwi na ya yin agbọn ne ima? 12 Adeghẹ emwa ọvbehe mwẹ asẹ vbenian yan uwa, inu ghi nọ ne ima? Sokpan, ma ma he loo asẹ na ẹdẹ, nọghayayerriọ, te ima zin egbe emwi hia, ne ima ghẹ mieke na mu idobo rhọkpa ye iyẹn nọ maan nọ dekaẹn Kristi. 13 Wa ma rẹn wẹẹ, emwa ni winna vbe ọgua Osa, evbare nọ rre ọgua Osa ẹre iran re ra? Wa ma vbe rẹn wẹẹ, emwa ni winna vbe ogiukpo vbe ẹghẹ hia, emwi na ya zọ ese vbe ogiukpo nii vbe sẹ iran obọ ra? 14 Erriọ vbe ye, nọ ne emwa ni kporhu iyẹn nọ maan, Enọyaẹnmwa wẹẹ, ne iran gha ya emwi ne iran miẹn vbe iyẹn nọ maan nii gaga egbe khian.

15 Ọrheyerriọ, I ma he nọ uwa emwi rhọkpa ẹdẹ, agharhemiẹn wẹẹ, I te mwẹ asẹ ne I gha ya ru vberriọ. Ẹ i re te I gbẹn ebe na gie uwa nian, ne uwa mieke na ru avbe emwi na mẹ. I wa wu ẹre ọ maan sẹ, na khian ya miẹn wẹẹ I i ghi sẹtin si agbada vbe unu guan.* 16 Nian, I ghaa kporhu iyẹn nọ maan, ọni ma sẹ nọ gha ya mwẹ gha rhuọ, rhunmwuda, emwi nẹi mwẹ I ma ru nọ. Ọghe ne ẹmwata, ọ gha baa so mwẹ gbe deghẹ I ma na kporhu iyẹn nọ maan! 17 Adeghẹ ekhọe obọ mwẹ ẹre I ya ru ọna, a gha san mwẹ ẹse; sokpan, adeghẹ I na ru ẹre, ọ gha khọnrẹn wẹẹ ọ ma ke ekhọe mwẹ rre, emwi nọ khẹke ne I ru nọ, rhunmwuda, iwinna na mu yọ mwẹ obọ nọ. 18 De ere ne I khian ghi miẹn vbọ khekherriọ? Ere ne I khian miẹn vbọ ọre ne I na sẹtin kporhu iyẹn nọ maan, vbe nai na fian ive yọ. Ẹghẹ nii, I i ghi nọ iyobọ vbe obọ emwa zẹvbe ne I ya kporhu iyẹn nọ maan, ne I ghẹ ya loo asẹ ne I mwẹ ghee ihan.

19 Agharhemiẹn wẹẹ, I i re ọviẹn ọmwa rhọkpa, I keghi ya egbe mwẹ khian ọviẹn emwa hia, ne I miehe na silo emwa nibun ne I gha sẹtin silo ba egbe. 20 I gha miẹn Ivbi e Ju, I ghi ya egbe mwẹ khian Ovbi e Ju, ne I miehe na silo Ivbi e Ju ba egbe. I gha miẹn emwa ni rre ototọ uhi, I ghi ya egbe mwẹ khian ọmwa nọ rre ototọ uhi, ne I miehe na silo iran ni rre ototọ uhi ba egbe, agharhemiẹn wẹẹ, mẹ tobọ mwẹ i rre ototọ uhi. 21 I gha miẹn emwa nẹi mwẹ uhi ne iran lele, I ghi ya egbe mwẹ khian ọmwa nẹi mwẹ uhi nọ lele, ne I miehe na silo iran nẹi mwẹ uhi ne iran lele ba egbe, agharhemiẹn wẹẹ, mẹ lele uhi ọghe Osanobua kevbe wẹẹ, I vbe rre ototọ uhi e Kristi. 22 I gha miẹn emwa ni ma wegbe, mẹ ghi vbe ya egbe mwẹ khian enọ ma wegbe, ne I miehe na silo iran ni ma wegbe ba egbe. Te I ghi ya egbe mwẹ khian emwi hia ne emwa ughughan, ne I mieke na la odẹ ke odẹ miẹn eso fan. 23 Rhunmwuda iyẹn nọ maan ẹre I na ru emwi hia, ne I miehe na kporhu ẹre ma emwa ọvbehe.

24 Wa ma rẹn wẹẹ, vbe ulẹ na na suan, emwa hia gha ghi rhulẹ nẹ, orhunmwu ọkpa kẹkan ẹre ive nọ rrọọ sẹ ọre obọ ra? Wa rhulẹ vbe odẹ ne ive nii gha na sẹ uwa obọ. 25 Emwa hia ni mwẹ obọ vbe iku isasegbe ọghe osuan i ru emwi vbene iran rhirhi miẹn, te iran da egbe iran yi vbe emwi hia ne iran ru. Te iran ru vberriọ, rhunmwuda ẹrhu ẹde nọ sẹtin rhia, nọ khian sẹ iran obọ, sokpan, emwi nọ ya ima ru vberriọ, ọre rhunmwuda ẹrhu ẹde nẹi sẹtin rhia nọ khian sẹ ima obọ. 26 Nọnaghiyerriọ, I i rhulẹ zẹvbe ọmwa nẹi mwẹ ehe nọ rrie; I gha khian fi ekpa, te I kọn rẹn ẹse, ne I ghẹ mieke na gha fi ekpa ye ẹhoho. 27 Sokpan, I keghi kinmwi egbe mwẹ,* I na ru ẹre nọ gha họn ẹmwẹ mẹ zẹvbe ọviẹn, na ghẹ do miẹn wẹẹ, I gha ghi kporhu ma emwa ọvbehe nẹ, mẹ tobọ imẹ ghi do khian ọmwa na ma ghi miẹn yi.*

10 Etẹn, I hoo ne uwa rẹn wẹẹ, te okuku mu aghọnghọn gue avbe erha ima odede hia, iran hia na fian okun rra. 2 A keghi lekpa okuku nọ degue iran kevbe uwu okun ne iran ghaa ye dinmwi iran ye uwu e Mozis. 3 Iran hia keghi rri evbare ọkpa nii nọ ke obọ Osanobua rre,* 4 iran na vbe wọn amẹ ọkpa nii nọ ke obọ Osanobua rre.* Okuta nọkhua nọ ke obọ Osanobua rre* nọ ghaa lele iran khian, ẹre iran na gha wọn amẹ; okuta nii kegha re* Kristi. 5 Ọrheyerriọ, ẹmwẹ iran nibun sẹ ma zẹdẹ gha yẹẹ Osanobua, ọni ẹre ọ si ẹre na na gbele iran rua vbe uwu ato.

6 Emwi nọ sunu daa iran na keghi re igiemwi ne ima, ne ima yae wan ne egbe, ne emwi dan ghẹ do gha yẹẹ ima, vbene ọ vbe gha yẹẹ iran. 7 Wa ghẹ vbe gha re emwa ni ga ẹbọ, vbene eso vbe uwu iran ru ẹre; zẹvbe ne Ebe Nọhuanrẹn khare: “Emwa nii keghi tota gha re, iran na gha da. Iyeke ọni, iran keghi kpaegbe, ne iran miehe na sọyẹnmwẹ egbe.” 8 Ọ ma vbe khẹke ne ima gha mwẹ obọ vbe alama oghẹ,* zẹvbe ne eso vbe uwu iran ru ẹre, nọ ghi ya orhunmwu arriaisẹn vbe ihe eha yan ugie (23,000) vbe uwu iran wulo vbe ẹdẹ ọkpa. 9 Ọ ma vbe khẹke ne ima danmwẹ e Jehova* ghee, zẹvbe ne eso vbe uwu iran ru ẹre, nọ ghi ya ẹyẹn salọ iran gbua. 10 Ọ ma vbe khẹke ne ima gha vian, vbene eso vbe uwu iran vbe gha vian, na na ghi miẹn wẹẹ, iran na fuan vbe obọ odibosa nọ fuẹn emwi rua. 11 Te ena hia sunu daa iran, na yae ma ima emwi; te a gbẹnnẹ ọnrẹn yotọ ne ima ni rrọọ vbe ẹghẹ ufomwẹ agbọn, ne ima mieke na yae wan ne egbe.

12 Nọnaghiyerriọ, we ne ọmwa nọ roro ẹre wẹẹ irẹn mudia, gha begbe nẹ ghẹ ya de. 13 Edanmwẹ ne uwa he miẹn hia, egbe ne emwa ọvbehe vbe miẹn nọ. Sokpan, ọmwa nọ gia mu ẹtin yan ẹre Osanobua khin, ẹ i khian kue ne uwa miẹn edanmwẹ ne uwa i khian sẹtin zin egbe ẹre. Sokpan, vbe uwu edanmwẹ nii, ọ gha vbe kie odẹ ne uwa, ne uwa mieke na sẹtin zin egbe ẹre.

14 Nọnaghiyerriọ, etẹn mwẹ ni ghaan, wa gha lẹẹ ne ẹbọ na ga. 15 Te I gu uwa guan zẹvbe emwa ni mwẹ ẹwaẹn, rhunmwuda ọni, wa ya ekhọe zomwa rẹn, deghẹ ẹmwẹ ne I tae gba, ra ọ ma gba. 16 Ma gha wọn vbe ukpu afiangbe ne ima kpọnmwẹ Osanobua yi, ẹ i re te ima vbe mwẹ oghae vbe esagiẹn e Kristi vberriọ? Ma gha vbe rri ebrẹd ne ima bunnọ, ẹ i re te ima vbe mwẹ oghae vbe efun egbe Kristi vberriọ? 17 Rhunmwuda na na miẹn wẹẹ, ebrẹd ọkpa ẹre ọ rrọọ, agharhemiẹn wẹẹ ima bun, egbe ọkpa ẹre ima khin, rhunmwuda, ebrẹd ọkpa nii ẹre ima hia na re.

18 Wa ghee Ivbi Izrẹl nian. Ugbẹnvbe a miẹn wẹẹ, iran ghaa rri emwi na ya zọ ese vbe uhunmwu ogiukpo, ẹ i re te iran ghaa gu Osanobua ghae vbe emwi na ya zọ ese gie ẹre vbe uhunmwu ogiukpo vberriọ? 19 De emwi ne I ghi hoo ne I ta na? Te imẹ ghi ya ọna kha wẹẹ, emwi na ya zọ ese gie ẹbọ mwẹ esa nọ ye ra, ra nene ẹbọ tobọre vbe mwẹ esa nọ ye ra? 20 Hiehie; emwi ne I kha ọre wẹẹ, ese ne avbe agbẹnvbo zọ, avbe orhiọn dan ẹre iran zọ ẹre gie, ẹ i re Osanobua; I ma hoo ne uwa gha mwẹ obọ vbe emwi ke emwi nọ ghi kaan avbe orhiọn dan nẹ. 21 Wa i khian sẹtin gha wọn vbe ukpu ọghe Jehova,* ne uwa vbe gha wọn vbe ukpu ọghe avbe orhiọn dan; wa i khian sẹtin gha rri evbare vbe “eteburu ọghe Jehova,”* ne uwa vbe gha rri evbare vbe eteburu ọghe avbe orhiọn dan. 22 Ra, te ima khian ‘ru emwi nọ khian gha da e Jehova* ra’? Ma ma wegbe sẹ ọre?

23 Ma mwẹ asẹ ne ima khian ya ru emwi nọ rhirhi khọn ima, sokpan, ẹ i re emwi hia ẹre ọ mwẹ iyobọ nọ ye ne ọmwa. Ma mwẹ asẹ ne ima khian ya ru emwi nọ rhirhi khọn ima, sokpan, ẹ i re emwi hia ẹre ọ rhie igiọdu ne ọmwa. 24 Ọ ma khẹke ne ọmwa wa rẹn ọghe enegbe ẹre ọkpa, sokpan, ọ khẹke nọ vbe rẹn ọghe emwa ọvbehe.

25 Wa sẹtin rri emwi ke emwi na ghi khiẹn nẹ vbe ẹki na na khiẹn emiowo; wa ghẹ zẹdẹ nọ ọta hiehie, ne ekhọe uwa ghẹ mieke na gha kpokpo uwa, 26 rhunmwuda, “e Jehova* ẹre ọ yan agbọn na kevbe emwi hia ni rre uwu ẹre.” 27 Adeghẹ ọmwa nẹi re ọmwa iyayi na gie na tie uwa, ọ na vbe gha rre uwa ekhọe ne uwa yo, wa ghi rri emwi nọ rhirhi mu yotọ vbe odaro uwa; wa ghẹ zẹdẹ nọ ọta hiehie, ne ekhọe uwa ghẹ mieke na gha kpokpo uwa. 28 Sokpan, adeghẹ ọmwaikọmwa na tama uwa wẹẹ, “Emwi na ya zọ ese gie ẹbọ na khin,” wa ghẹ rriọẹ, rhunmwuda ọmwa nii nọ tama uwa; ẹghẹ nii, ọmwa rhọkpa i rrọọ ne ekhọe ọre khian gha kpokpo. 29 Ẹ i re ekhọe uwa ẹre I kha oo, sokpan, ọghe ọmwa nii. Agharhemiẹn wẹẹ, I gha sẹtin ru emwi nọ rhirhi khọn mwẹ, vbọzẹ ne I gha na ru emwi nọ gha ya ekhọe ọmwa ọvbehe gha bu ohiẹn gbe mwẹ? 30 Ọ gha khọnrẹn wẹẹ, I kpọnmwẹ Osanobua ye evbare mwẹ nẹ, deghẹ evbare nii gha ya emwa ọvbehe zaan mwẹ, ọ ye khẹke ne I rriọẹ ra?

31 Nọnaghiyerriọ, ọre te uwa re, ra te uwa da, ra te uwa ru emwi nọ rhirhi gha khin, wa gi emwi hia ne uwa ru gha rhie uyi gie Osanobua. 32 Wa ghẹ gha ru emwi nọ gha ya Ivbi e Ju, ra Ivbi e Grik, ra emwa ni rre iko ọghe Osanobua rrua owẹ, 33 zẹvbe ne imẹ vbe hia, ne I gha ya ẹko rhiẹnrhiẹn emwa hia vbe emwi hia ne I ru; I i vbe gualọ ọghe enegbe mwẹ ọkpa, ọghe emwa ọvbehe ẹre I gualọ, ne I mieke na ru iyobọ ne emwa nibun ya miẹn fan.

11 Wa gha ya egbe taa mwẹ, zẹvbe ne imẹ vbe ya egbe taa e Kristi.

2 I tian uwa rhunmwuda ne uwa na ye mwẹ rre vbe emwi hia, ne uwa na vbe lele emwi ne I ma uwa ẹre.* 3 Sokpan, I hoo ne I gi uwa rẹn wẹẹ, uhunmwuta ọghe ikpia hia ọre Kristi; erriọ vbe ye, uhunmwuta ọghe okhuo ọre okpia; erriọ vbe ye, uhunmwuta ọghe Kristi ọre Osanobua. 4 Adeghẹ okpia na gha na erhunmwu, ra ọ na gha ta ẹmwẹ akhasẹ, vbene ọ na ya emwi gue uhunmwu, te ọ ya ekhue mu uhunmwu ẹnrẹn;* 5 sokpan, adeghẹ okhuo na gha na erhunmwu ra ọ na gha ta ẹmwẹ akhasẹ, vbene ọ ma na ya emwi gue uhunmwu, te ọ ya ekhue mu uhunmwu ẹnrẹn,* rhunmwuda, te ọ yevbe okhuo nọ zẹ eto ẹre mu otọ. 6 Adeghẹ okhuo ma na ya emwi gue uhunmwu, we nọ wa ya gbe eto ẹre; ugbẹnvbe a miẹn wẹẹ, emwi ekhue nọ ne okhuo gbe eto ẹre, ra nọ khiokhio ẹre mu otọ, we nọ ya emwi gue uhunmwu khekherriọ.

7 Ọ ma khẹke ne okpia ya emwi gue uhunmwu, rhunmwuda, te Osanobua yi okpia nọ gha yevbe irẹn, uyi Osanobua ẹre okpia vbe khin; sokpan, uyi ọghe okpia ẹre okhuo khin. 8 Rhunmwuda, ẹ i re egbe okhuo ẹre okpia ke ladian, sokpan, egbe okpia ẹre okhuo ke ladian. 9 Levba sevba, a ma rhunmwuda okhuo yi okpia, sokpan, rhunmwuda okpia ẹre a na yi okhuo. 10 Ọna ẹre ọ si ẹre nọ na khẹke ne okhuo gha ya emwi gue uhunmwu rhunmwuda avbe odibosa, nọ ya rhie ẹre ma wẹẹ, ototọ asẹ ọghe okpia ẹre irẹn ye.

11 Gberra ọni, vbe iko ọghe Enọyaẹnmwa, okpia mwẹ iyobọ nọ ye ne okhuo, okhuo vbe mwẹ iyobọ nọ ye ne okpia, nẹi mwẹ iyobọ nọ ye i rrọọ. 12 Rhunmwuda, vbene okhuo ke egbe okpia ladian, erriọ ẹre okpia vbe la egbe okhuo ladian; sokpan, obọ Osanobua ẹre emwi hia ke rre. 13 Wa tobọ uwa roro ẹre ghee: Ọ khẹke ne okhuo gha na erhunmwu gie Osanobua, vbene ọ ma na ya emwi rhọkpa gue uhunmwu ra? 14 Wa gha ghee vbene Osanobua ya yi emwi hẹ, wa ma ghi la evba rẹn wẹẹ, emwi ekhue nọ vbe okpia ghaa mwẹ eto nọ taẹn ra? 15 Wa ma ghi vbe la evba rẹn wẹẹ, deghẹ okhuo na gha mwẹ eto nọ taẹn, uyi ẹre eto nii khin nẹẹn ra? Rhunmwuda, te a rhie eto nẹẹn nọ ya gha gue uhunmwu. 16 Sokpan, deghẹ ọmwaikọmwa na gha muan rẹn wẹẹ, ilele na ma deyọ, ọghẹe ẹre ọ ta nii, sokpan, nọ ne ima, ma i mwẹ ilele ọvbehe ne ima lele, erriọ ẹre iko ọghe Osanobua vbe ye.

17 Zẹvbe ne I ya ta emwi na hia ne uwa gha ru ma uwa, I ma zẹdẹ tian uwa hiehie, rhunmwuda, iko ne uwa do i dọlọ emwi yi, sokpan, te ọ rhia emwi. 18 Vbe okaro, I họn wẹẹ, iwannegbe rre uwu ẹkpo uwa vbe ẹghẹ ke ẹghẹ ne uwa ya si egbe koko vbe iko; I rẹnrẹn wẹẹ, ẹmwata rre ẹmwẹ ne I họn na. 19 Ẹ i mwẹ ne otu ughughan ghẹ gha rre uwu ẹbu uwa, na mieke na rẹn emwa ne Osanobua miẹn yi vbe uwu uwa.

20 Wa gha si egbe koko ye efọnkpa ne uwa do rri Evbare Ota Ọghe Enọyaẹnmwa, wa i ru ẹre vbe odẹ nọ khẹke. 21 Rhunmwuda, ọ gha sẹ ẹghẹ na ya rriọẹ, ọ kẹ eso vbe uwu uwa ya rri evbare ota nẹ, rhunmwuda ọni, ohanmwẹ ghi gha gbe eso, ayọn ghi vbe gha gbe eso. 22 Wa i mwẹ owa obọ uwa ne uwa na re, ne uwa na da ra? Wa kue ghee iko ọghe Osanobua sẹ emwi? Vbọzẹ ne uwa na ya ekhue mu emwa nẹi mwẹ emwi rhọkpa ni rre uwu ẹbu uwa? De emwi ne imẹ khian ghi tama uwa nian? Ne I gha tian uwa ra? I i khian sẹtin tian uwa ye egbe emwi vbenian.

23 Obọ Enọyaẹnmwa ẹre I na miẹn emwi ne I ma uwa ẹre, ọni nọ wẹẹ, vbe asọn na ya Enọyaẹnmwa e Jesu dẹ, ọ keghi mu ebrẹd ọkpa, 24 ọ ghi kpọnmwẹ Osanobua nẹ, ọ na bunnọ ọnrẹn, ọ na kha wẹẹ: “Ọna mudia ye ihe egbe mwẹ, na ya zọ ese ne uwa. Wa gha ru ọna ya ye mwẹ rre.” 25 Erriọ ẹre ọ vbe ru ukpu nii vbe iran ghi rri evbare ota nẹ, ọ na wẹẹ: “Ukpu na mudia ye ihe ile ọghe ọgbọn, na ya esagiẹn mwẹ mu olọ gbe. Ẹghẹ ke ẹghẹ ne uwa ya wọẹn, wa gha ru ọna ya ye mwẹ rre.” 26 Ẹghẹ ke ẹghẹ ne uwa ya rri ebrẹd na, wa na vbe wọn vbe ukpu na, te uwa ya uwu ọghe Enọyaẹnmwa wewe, rhinrin ọ te ya rre.

27 Nọnaghiyerriọ, adeghẹ ọmwaikọmwa na re vbe ebrẹd nii, ọ na vbe wọn vbe ukpu ọghe Enọyaẹnmwa vbene ọ ma na khẹke ẹre, te ọmwa vberriọ ru khọọ ghee egbe kevbe esagiẹn ọghe Enọyaẹnmwa. 28 We ne dọmwadẹ ọghẹe ka gualọ otọ egbe ẹre ghee nẹ, iyeke ọni, ọ sẹtin re vbe ebrẹd nii, ọ sẹtin vbe wọn vbe ukpu nii. 29 Rhunmwuda, adeghẹ ọmwa ma na rẹn otọ emwi na ya egbe Enọyaẹnmwa kha, ọ na re, ọ na vbe da, te ọ bu ohiẹn gbe egbe ẹre vberriọ. 30 Ọni ẹre ọ si ẹre ne nibun vbe uwu uwa na ye vburriẹ vburriẹ, nibun vbe khuọnmwi, eso vbe wulo nẹ.* 31 Sokpan, adeghẹ ima na gualọ otọ egbe ima ghee, a i khian bu ohiẹn ima. 32 Vbọrhirhighayehẹ, a gha bu ohiẹn ima, te Jehova* dia ima ye odẹ, na ghẹ mieke na bu ohiẹn gbe ima, vbene a khian ya bu ohiẹn gbe agbọn na. 33 Nọnaghiyerriọ, etẹn mwẹ, wa gha si egbe koko ne uwa do rri Evbare Ota Ọghe Enọyaẹnmwa, wa gha mudia khẹ egbe. 34 Adeghẹ ne ohanmwẹ gbe rre uwu uwa, we nọ rri evbare vbe owa, na ghẹ do miẹn wẹẹ, te a khian ghi bu ohiẹn uwa, vbe ẹghẹ ne uwa gha ya si egbe koko. Vbe nọ dekaẹn ẹmwẹ nikẹre ni rre otọ, I gha rre, I gha zuze yọ.

12 Etẹn, vbe nọ dekaẹn ẹse na lekpa orhiọn nọhuanrẹn miẹn, I ma hoo ne uwa gha re emwa ni ma rẹn enaye. 2 Wa rẹnrẹn wẹẹ, vbe ẹghẹ ne uwa na gha rre uwu agbọn,* avbe amazẹ nẹi guan ẹre ọ ghaa khaevbisẹ vbe ẹdagbọn uwa, iran na vbe gha mu uwa rẹrẹ, wa na gha yo ehe ne iran rhirhi mu uwa uhunmwu daa. 3 Nian, I hoo ne uwa rẹn wẹẹ, a i miẹn ọmwa ne orhiọn Osanobua loo nọ gha sẹtin kha wẹẹ: “Ọmwa na fi ẹre unu ẹre Jesu khin!” A i vbe miẹn ọmwa nọ gha sẹtin kha wẹẹ: “Jesu ọre Enọyaẹnmwa!” vbe ẹ i re te orhiọn nọhuanrẹn dia ẹre.

4 Ẹse ọhẹ ughughan ẹre ọ rrọọ, sokpan, orhiọn ọkpa ẹre ọ rrọọ. 5 Iwinna ughughan ẹre a miẹn vbe ugamwẹ Osanobua, sokpan, Enọyaẹnmwa ọkpa ẹre a ru ẹre na. 6 Iwinna ughughan ẹre ọ rrọọ, sokpan, Osanobua ọkpa nii ẹre ọ rhie ẹtin ne emwa hia ya ru avbe iwinna na. 7 Sokpan, emwi ne orhiọn nọhuanrẹn ru iyobọ ne dọmwadẹ ọghẹe ya ru rhunmwuda umamwẹ ọghe emwa ọvbehe, keghi re nọ dewarorua. 8 Orhiọn nọhuanrẹn ru iyobọ ne emwa eso ya gha guan zẹvbe emwa ni mwẹ ẹwaẹn, orhiọn nọhuanrẹn nii vbe ru iyobọ ne emwa eso ya gha guan zẹvbe emwa ni mwẹ irẹnmwi, 9 orhiọn nọhuanrẹn nii ẹre ọ rhie amuẹtinyan ne emwa eso, orhiọn nọhuanrẹn nii ẹre ọ vbe rhie ẹtin na ya mu emwa egbe rran ne eso, 10 ọ ru iyobọ ne emwa eso ya gha winna iwinna ọyunnuan, ọ vbe ru ẹre ne eso gha ta ẹmwẹ akhasẹ, ọ rhie ẹwaẹn ne emwa eso ne iran ya sẹtin gha rẹn ẹmwẹ nọ ke obọ Osanobua rre kevbe nọ ma ke obọ ẹre rre; ọ ru iyobọ ne emwa eso ne iran ya gha zẹ ẹvbo ughughan,* ọ vbe ru ẹre, ne eso sẹtin gha zedu ẹvbo ughughan. 11 Sokpan, orhiọn ọkpa nii ẹre ọ ya emwa ru ena hia, ọ na rhie ẹre ne dọmwadẹ ọghẹe zẹvbe nọ yẹẹ ọre.

12 Abọ ughughan ẹre ọ rre egbe ọkpa. Agharhemiẹn wẹẹ, abọ ni rre egbe bun, egbe ọkpa ye nọ; erriọ ẹre egbe Kristi vbe ye. 13 Te a ya orhiọn ọkpa nii dinmwi ima hia ye egbe ọkpa, ke Ivbi e Ju kevbe Ivbi e Grik, ke eviẹn kevbe emwa nẹi re eviẹn, a na we ne ima hia wọn vbe orhiọn ọkpa nii.*

14 Ọghe ne ẹmwata, ẹ i re abọ ọkpa kẹkan ẹre ọ rre egbe, abọ nibun nọ. 15 Adeghẹ owẹ na kha wẹẹ, “Rhunmwuda ighẹ imẹ i re obọ, I i re ọkpa vbe abọ ni rre egbe,” ọni ma rhie ma wẹẹ, ẹ i gele re ọkpa vbe abọ ni rre egbe. 16 Adeghẹ ehọ na vbe kha wẹẹ, “Rhunmwuda ighẹ imẹ i re aro, I i re ọkpa vbe abọ ni rre egbe,” ọni ma vbe rhie ma wẹẹ, ẹ i gele re ọkpa vbe abọ ni rre egbe. 17 Akpawẹ aro ẹre egbe ima hia wa khin, de emwi ne ima gha te ya gha họn ẹmwẹ? Akpawẹ ehọ ẹre egbe ima hia wa khin, de emwi ne ima gha te ya gha họn ẹwia? 18 Sokpan, te Osanobua mwamwa abọ ughughan ni rre egbe, zẹvbe nọ yẹẹ ọre.

19 Akpawẹ abọ ọkpa ẹre ọ wa rre egbe hia, de vbene egbe gha te gha ye hẹ? 20 Sokpan, abọ ughughan ni rre egbe bun, ọrheyerriọ, egbe ọkpa ye nọ. 21 Aro i khian sẹtin tama obọ wẹẹ, “I i mwẹ emwi ne I ya ruẹ ru.” Uhunmwu i khian vbe sẹtin tama owẹ wẹẹ, “I i mwẹ emwi ne I ya ruẹ ru.” 22 Sokpan, avbe abọ ni rre egbe ne ima ghee wẹẹ, ẹ i mobọ mwẹ iyobọ nọ ye, wa mwẹ esa nọ ye. 23 Avbe abọ ni rre egbe ne ima ghee wẹẹ, ọ ma wa mobọ hin usi, ẹre ima mu tetete; ọni rhie ma wẹẹ, avbe abọ ni rre egbe ima, ne ima ma mobọ ka yọ, ẹre ima ghi gbaroghe sẹ. 24 Sokpan, avbe abọ ni mose vbe egbe ima i mobọ gualọ emwi rhọkpa. Vbọrhirhighayehẹ, te Osanobua mwamwa egbe ima, ọ na ru ẹre ne avbe abọ na ma mobọ ka yọ, gha re ne ima rhie uyi nọ sẹre na, 25 ne iwannegbe ghẹ do gha rre egbe, sokpan, ne dọmwadẹ abọ ni rrọọ gha zẹ ye ẹmwẹ egbe. 26 Adeghẹ abọ ọkpa vbe egbe na gha rre obalọ, abọ nikẹre hia ghi vbe gu ẹre miẹn obalọ nii; adeghẹ a vbe tian ọkpa vbọ, nikẹre hia ghi vbe gu ẹre ghọghọ.

27 Egbe Kristi ẹre uwa hia khin, dọmwadẹ ọghẹe vbe uwu uwa keghi re abọ ughughan ni rrọọ. 28 Iwinna ughughan ẹre Osanobua mu ne dọmwadẹ emwa ni rre iko: vbe okaro, ọ na zẹ eso ne iran gha re ukọ; nogieva, ọ na zẹ eso ne iran gha re akhasẹ; nogieha, ọ na zẹ eso ne iran gha re ọmamwaemwi; ẹre ọ na vbe rhie ẹtin ne eso ne iran ya gha winna iwinna ọyunnuan; ọ na vbe rhie ẹtin ne eso ne iran ya gha mu emwa egbe rran; ọ na ru ẹre ne eso gha ru iyobọ ne emwa ọvbehe; ne eso gha mu asanikaro; ọ na vbe rhie ẹtin ne eso ya gha zẹ ẹvbo ughughan.* 29 Iran hia ẹre ọ ma re ukọ? Iran hia ẹre ọ ma re akhasẹ? Iran hia ẹre ọ ma re ọmamwaemwi? Iran hia ẹre ọ ma winna iwinna ọyunnuan? 30 Iran hia ẹre ọ ma mwẹ ẹtin na ya mu emwa egbe rran? Iran hia ẹre ọ ma sẹtin zẹ ẹvbo ughughan?* Iran hia ẹre ọ ma sẹtin zedu? 31 Sokpan, wa ye gha hia vbe odẹ ke odẹ ne uwa gha mwẹ ẹse ọhẹ nọ sẹre. Ọrheyerriọ, I gha ma uwa odẹ nọ ghi maan sẹ ehia.

13 Ọ gha khọnrẹn ne I gua gha zẹ ẹvbo ne emwa nagbọn zẹ kevbe ẹvbo ne avbe odibosa zẹ, adeghẹ I i mwẹ ahoẹmwọmwa, te I yevbe ẹgogo nọ tu gbanghangbanghan, ra ekpamaku* nọ tu gbẹingbẹin. 2 Ọ gha khọnrẹn ne I sẹtin gha ta ẹmwẹ akhasẹ, I na vbe sẹtin gha rẹn otọ ẹmwẹ oro nọhuanrẹn hia, ọ gha khọnrẹn ne I rẹn emwi hia, I na vbe gha mwẹ amuẹtinyan nọ gha sẹtin ya avbe oke vu hin ehe ne iran ye rre gha rrie ihe ọvbehe, sokpan, adeghẹ I i mwẹ ahoẹmwọmwa, I i mwẹ iyobọ* rhọkpa ne I ye. 3 Ọ gha khọnrẹn ne I ya emwi ne I mwẹ hia koko emwa ọvbehe, ọ gha khọnrẹn ne I vbe mu egbe ne I ya wu ne emwa, ne I mieke na gha mwẹ emwi ne I khian ya gha rhuọ, sokpan, adeghẹ I i mwẹ ahoẹmwọmwa, ere ọkpa i rrọọ ne I khian miẹn vbọ.

4 Ahoẹmwọmwa keghi mwẹ izinegbe, ọ vbe mwẹ ekhọe esi. Ahoẹmwọmwa i gbọvo. Ẹ i rhuọ, ẹ i tọn egbe mu, 5 ẹ i yin uyinmwẹ ọrhiae,* ẹ i gualọ ọghe enegbe ẹre ọkpa, ohu i rherhe muẹn. Ẹ i rhie emwi* ne emwa ru ẹre ye ekhọe. 6 Ẹ i ghọghọ ye emwi dan, sokpan, ẹmwata ẹre ọ sẹ ọre ọyẹnmwẹ. 7 Ọ ya egbe miẹn emwi hia, ọ ya emwi hia yi, ọ ya aro yọ wẹẹ emwi hia gha maan, ọ zin egbe emwi hia.

8 Ahoẹmwọmwa i fafa. Sokpan, nọ ne ẹtin na ya ta ẹmwẹ akhasẹ, a gha ho ẹre bẹkun; nọ ne ẹtin na ya zẹ ẹvbo ughughan,* ọ gha dobọ yi; nọ ne irẹnmwi nọ rrọọ nian, a gha ho ẹre bẹkun. 9 Irẹnmwi ne ima mwẹ kevbe ẹmwẹ akhasẹ ne ima ta, ukhiọnmwẹ ukhiọnmwẹ ẹre ehia khin. 10 Sokpan, nọ gbae nọ rrọọ gha ghi rre nẹ, ukhiọnmwẹ nọ rrọọ ghi khian ena ho bẹkun. 11 Ẹghẹ ne I na gha re ọvbokhan, I na gha guan vbe na ghee ọvbokhan, I na gha roro emwi vbe na ghee ọvbokhan, iziro mwẹ na vbe gha re ọghe ọvbokhan; sokpan, ugbẹnvbe I ghi da agikpa nẹ nian, I i ghi ru emwi ọvbokhan. 12 Te emwi ne ima bẹghe nian ye vbirrivbirri, vbene a miẹn wẹẹ ughegbe ematọn ẹre ima ghee, sokpan, ọ gha sẹ ẹghẹ nii, ma ghi do gha bẹghe ẹre ẹse, ghee mwẹ ghee ruẹ. Emwi ne I rẹnrẹn nian, ukhiọnmwẹ nọ, sokpan, ọ gha sẹ ẹghẹ nii, I gha rẹn ọnrẹn fo* zẹvbe ne Osanobua vbe rẹn mwẹ fo. 13 Vbọrhirhighayehẹ, emwi eha na, gha ye gha rrọọ: amuẹtinyan, ayayẹro,* ahoẹmwọmwa; sokpan, nọ ghi wa sẹ vbe uwu eha na, ọre ahoẹmwọmwa.

14 Wa hia ne uwa gha mwẹ ahoẹmwọmwa, ọrheyerriọ, wa ghi ya egbe hia gha gualọ ẹse na lekpa orhiọn nọhuanrẹn miẹn, katekate, ọghe na ya sẹtin ta ẹmwẹ akhasẹ. 2 Nọ ne ọmwa nọ zẹ ẹvbo ọvbehe,* ẹ i re emwa nagbọn ẹre ọ gu guan, sokpan, Osanobua nọ, rhunmwuda, ọmwa rhọkpa i danmwehọ, agharhemiẹn wẹẹ, ẹmwẹ oro nọhuanrẹn ẹre ọ ta lekpa ẹtin orhiọn nọhuanrẹn. 3 Vbọrhirhighayehẹ, ọmwa nọ ta ẹmwẹ akhasẹ keghi rhie ẹtin ye emwa iwu, ọ rhie igiọdu ne emwa, erriọ ẹre ẹmwẹ nọ ta vbe ya fu emwa ẹko rre. 4 Ọmwa nọ zẹ ẹvbo ọvbehe,* egbe ẹre ọkpa ẹre ọ ru iyobọ na, sokpan, ọmwa nọ ta ẹmwẹ akhasẹ, iko hia ẹre ọ ru iyobọ na. 5 I te wa hoo ne uwa hia sẹtin gha zẹ ẹvbo ughughan,* sokpan, nọ ghi wa yẹẹ mwẹ sẹ, ọre ne uwa gha ta ẹmwẹ akhasẹ. Ọghe ne ẹmwata, ọmwa nọ ta ẹmwẹ akhasẹ ẹre ọ maan sẹ ọmwa nọ zẹ ẹvbo ughughan,* sokpan a ma wẹẹ, ọmwa nọ zẹ ẹvbo ughughan* zedu ẹmwẹ nọ ta, ne iko hia mieke na miẹn ere vbọ. 6 Sokpan, etẹn, deghẹ I na rre vbe ẹghẹ na nian, I na do gha zẹ ẹvbo ughughan* ne uwa ma rẹn otọ re ma uwa, de iyobọ nọ khian gha ye ne uwa? Ẹ i khian gha mwẹ esa, vbe ẹ i re te I tama uwa vbekpa emwi ne Osanobua mu ma mwẹ, irẹnmwi, ẹmwẹ akhasẹ ra imamwaemwi.

7 Erriọ vbe ye ne avbe emwi na kpee nẹi mwẹ arrọọ, ọre ẹrere* nọ ra akpata.* Adeghẹ ọmwa nọ kpee ẹrere ra akpata na gha kpee emwi ọkpọkpa, vbene ọ ma na fi obọ werriẹ, vbe a khian ghi ya rẹn emwi nọ kpee hẹ? 8 Adeghẹ ọmwa nọ kpee okpe ma na kpee ẹre ẹse, de ọmwa nọ khian mu egbe okuo? 9 Erriọ vbe ye, vbe ẹ i re te a miẹn wẹẹ ẹmwẹ nọ gia rherhe rẹn otọ re, ẹre ọ ladian vbe unu uwa, vbe a khian ya rẹn ẹmwẹ ne uwa ta hẹ? Sokpan uwa ma wa gha guan ye ẹhoho. 10 A sẹtin miẹn wẹẹ, ẹvbo ughughan na zẹ wa bun vbe agbọn na,* ọrheyerriọ, ọkpa i rrọọ nẹi mwẹ emwi na yae kha. 11 Adeghẹ I i họn ẹvbo ne ọmwa zẹ, eghọẹn ẹre imẹ khin vbe eke ne ọmwa nii ye, ọmwa nọ zẹ ẹvbo nii ghi vbe gha re eghọẹn vbe eke ne imẹ ye. 12 Erriọ vbe ye, deghẹ uwa hoo ne uwa gha mwẹ ẹse ughughan ne Osanobua ya we ọmwa lekpa orhiọn nọhuanrẹn, wa ghi hia vbe odẹ ke odẹ ne uwa gha mwẹ ọnrẹn sayọ, ne uwa mieke na sẹtin yae gha ru iyobọ ne iko.

13 Nọnaghiyerriọ, we ne ọmwa nọ zẹ ẹvbo ọvbehe* na erhunmwu nọ sẹtin gha zedu ẹre. 14 Rhunmwuda, adeghẹ I na gha ya ẹvbo ne emwa ma rẹn otọ re na erhunmwu, ẹse ne Osanobua ya we mwẹ lekpa orhiọn nọhuanrẹn, ẹre ọ na erhunmwu nii, sokpan, ekhọe mwẹ i rre evba. 15 Nọnaghiyerriọ, vbia khian ghi ru? I gha ya ẹse ne Osanobua ya we ọmwa lekpa orhiọn nọhuanrẹn na erhunmwu, I ghi vbe ya ekhọe mwẹ na erhunmwu. I gha ya ẹse ne Osanobua ya we ọmwa lekpa orhiọn nọhuanrẹn so ihuan urhomwẹ, I ghi vbe ya ekhọe mwẹ so ihuan urhomwẹ. 16 Vbe ẹ i re erriọ, adeghẹ u na gha ya ẹse ne Osanobua ya we ruẹ lekpa orhiọn nọhuanrẹn kpọnmwẹ Osanobua, de vbene ọmwa kẹkan nọ rre uwu ẹbu uwa khian ya gbe “Isẹ” ye erhunmwu ekpọnmwẹ ne u na hẹ, ugbẹnvbe ọ ma rẹn otọ ẹmwẹ ne u ta? 17 Ẹmwata nọ wẹẹ, erhunmwu ekpọnmwẹ ruẹ te wa maan, sokpan, ẹ i mwẹ iyobọ nọ ye ne ogieva ruẹ. 18 I kpọnmwẹ Osanobua wẹẹ ẹvbo ne I sẹtin zẹ bun sẹ ọghe uwa. 19 Vbọrhirhighayehẹ, vbe I ghaa rre iko, I ta ẹmwẹ isẹn nọ ke ekhọe mwẹ rre,* ne I miehe na sẹtin ma emwa ọvbehe emwi ẹre ọ maan sẹ, na khian ya miẹn wẹẹ, I talọ ẹmwẹ arriaisẹn vbe ihe igbe na ma rẹn otọ re.

20 Etẹn, wa ghẹ gha yevbe ibiẹka vbe odẹ ne uwa ya roro emwi,* sokpan, wa gha re ibiẹka vbọ gha de ọghe emwi dan na ru; wa ghi gha re eniwanrẹn vbe odẹ ne uwa ya roro emwi.* 21 A gbẹn ọnrẹn ye ebe Uhi wẹẹ: “E Jehova* khare wẹẹ, ‘I gha loo ẹvbo* ọghe avbe ọrriọvbe kevbe ẹmwẹ* ọghe eghọẹn ya gu emwa na guan, ọrheyerriọ, iran i khian ye danmwehọ mwẹ.’” 22 Nọnaghiyerriọ, ne Osanobua na yae we ọmwa na sẹtin gha zẹ ẹvbo ughughan,* ẹ i re rhunmwuda emwa iyayi, sokpan, rhunmwuda emwa ni ma yayi nọ; sokpan, ne Osanobua na yae we ọmwa na sẹtin gha ta ẹmwẹ akhasẹ, ẹ i re rhunmwuda emwa ni ma yayi, sokpan, rhunmwuda emwa iyayi nọ. 23 Adeghẹ iko hia na si egbe koko ye ihe ọkpa, iran na gha zẹlẹ ẹvbo ughughan,* a na miẹn wẹẹ emwa kẹkan ra emwa ni ma yayi na wa la uwu ẹbu nii, ẹ i re te iran khian kha wẹẹ ẹrherhe uwa ma gba? 24 Sokpan, adeghẹ uwa hia na gha ta ẹmwẹ akhasẹ, ọmwa nẹi re ọmwa iyayi ra ọmwa kẹkan na la uwu ẹbu uwa, ẹmwẹ hia nọ họẹn ghi dia ẹre ye odẹ, ọ ghi vbe yae roro enegbe ẹre ghee. 25 Ẹghẹ nii, iro nọ zẹ vbe ekhọe ọre ghi khian enọ dewarorua, ọ ghi ya uhunmwu rhanmwẹ otọ ne Osanobua, ọ ghi gha kha wẹẹ: “Osanobua wa gele gu uwa rrọọ.”

26 Nọnaghiyerriọ, etẹn, vbọ ghi khẹke ne uwa ru nian? Wa gha si egbe koko, orhunmwu ọkpa ghi so ihuan urhomwẹ, ọmwa ọvbehe ghi gha ma emwa emwi, ọvbehe ghi gha ta ẹmwẹ emwi ne Osanobua mu ma rẹn, ọmwa ọvbehe ghi gha zẹ ẹvbo ọvbehe,* ọvbehe ghi vbe gha zedu. Wa gi emwi hia ne uwa ru gha re nọ gha rhie igiọdu ne ọmwa. 27 Adeghẹ ọmwa khian zẹ ẹvbo ọvbehe* vbe uwu ẹbu uwa, we nẹ ghẹ gberra orhunmwu eva ra eha, iran ghi gha guan ọsegbe ọsegbe, ọmwa ghi vbe gha rre evba nọ khian gha zedu ẹmwẹ ne iran ta. 28 Sokpan, adeghẹ ọmwa rhọkpa i rrọọ nọ khian zedu, we nẹ ghẹ zẹdẹ guan vbe iko, sokpan, we nọ gha gu egbe ẹre kevbe Osanobua guan. 29 Avbe akhasẹ ghaa rre evba, eva ra eha vbe uwu iran ẹre ọ khẹke nọ guan, emwa nikẹre ghi hia ne iran rẹn otọ ẹmwẹ ne iran ta. 30 Sokpan, adeghẹ Osanobua na gie uhunmwu gie ọkpa vbe uwu emwa ni tota ye evba, ọmwa nọ te ka guan ghi dobọ yi. 31 Wa hia gha sẹtin gha ta ẹmwẹ akhasẹ ọsegbe ọsegbe, ne emwa hia mieke na miẹn emwi ruẹ vbọ, ọ ghi vbe rhie igiọdu ne iran. 32 Ọ khẹke ne avbe akhasẹ gha ya ẹwaẹn loo ẹse ne Osanobua ya we iran lekpa orhiọn nọhuanrẹn, nọ zẹe ighẹ iran sẹtin ta ẹmwẹ akhasẹ. 33 Rhunmwuda, Osanobua i re Osa ọghe olighi vbe otighi, sokpan, Osa ọghe ọfunmwegbe nọ.

Zẹvbe nọ ye vbe iko ọghe emwa ni huanrẹn hia, 34 ọ khẹke ne ikhuo gha hunwan vbe iko, rhunmwuda, a ma kue yọ ne iran gha guan. Sokpan, te ọ khẹke ne iran gha mu egbe rriotọ, zẹvbe ne Uhi vbe tae. 35 Adeghẹ ọ mwẹ emwi eso ne iran hoo ne iran rẹn otọ re, we ne iran nọ ọdafẹn iran vbe owa, rhunmwuda, emwi ekhue nọ deghẹ okhuo na gha guan vbe uwu iko.

36 Obọ uwa ẹre ẹmwẹ Osanobua ke rre ra, ra uwa ọkpa ẹre a tae ma?

37 Adeghẹ ọmwaikọmwa na gha roro ẹre wẹẹ akhasẹ ẹre irẹn khin, ra irẹn mwẹ ẹse ọhẹ ọghe orhiọn nọhuanrẹn, te ọ gha kue yọ wẹẹ, emwi ne I gbẹn gie uwa na, iyi ọghe Enọyaẹnmwa nọ. 38 Sokpan, adeghẹ ọmwaikọmwa ma ka ẹmwẹ na yọ, a i khian vbe ka ọmwa nii yọ.* 39 Nọnaghiyerriọ etẹn mwẹ, wa ye gha hia ne uwa gha ta ẹmwẹ akhasẹ, sokpan, ọni ma we ne uwa ghẹ ghi zẹ ẹvbo ughughan.* 40 Sokpan, wa ghi gha ru emwi hia vbe odẹ nọ khẹke, wa ghi vbe gi emwi hia gha khian hẹnnẹhẹnnẹ.*

15 Banbanna nian etẹn, I hoo ne I ye uwa ẹre rre, iyẹn nọ maan ne I kporhu ẹre ma uwa, ne uwa miẹn yi, ne uwa vbe dayi gbain. 2 Iyẹn nọ maan nii ne I kporhu ẹre ma uwa, ẹre ọ vbe miẹn uwa fan nian, deghẹ uwa na ye daeyi gbain, sokpan a ma wẹẹ, te uwa do khian emwa iyayi kua kẹkan.

3 Emwi na ma mwẹ ẹre, rre usun emwi okaro ne I ma uwa ẹre, ọni nọ wẹẹ, e Kristi wu ye orukhọ ọghe ima zẹvbe ne Ebe Nọhuanrẹn khare; 4 a keghi ree ẹre, a na vbe huẹn ọnrẹn kpaegbe vbe ikpẹdẹ nogieha, zẹvbe ne Ebe Nọhuanrẹn khare; 5 kevbe wẹẹ, ọ rhiegbe ma e Sifas,* iyeke ọni, ọ na vbe rhiegbe ma iran Iweva nii. 6 Iyeke ọni, ọ keghi rhiegbe ma etẹn ni gberra iyisẹn vbe ihe isẹn (500) vbe uhukpa, nibun sẹ vbe uwu iran ye gu ima rrọọ do fi ebanban, agharhemiẹn wẹẹ, eso vbe wulo nẹ.* 7 Iyeke ọni, ọ keghi rhiegbe ma e Jems, ọ na vbe do rhiegbe ma avbe ukọ hia. 8 Sokpan, vbe okiekie ehia, ọ keghi rhiegbe ma mwẹ, vbene a miẹn wẹẹ, ọmọ nọ ma sẹ uki, ẹre irẹn rhiegbe ma.

9 Rhunmwuda, mẹ ẹre ọ ghi kanmwa sẹ vbe uwu avbe ukọ hia, I ma vbe sẹ na gha tie ẹre ukọ, rhunmwuda, te I ghaa zẹ iko ọghe Osanobua kpokpo. 10 Sokpan, rhunmwuda ẹse ne kpataki* ọghe Osanobua, ẹre I na re emwi ne I khin vbe ẹdẹnẹrẹ. Ẹse ne kpataki* nọ ru mẹ, ọ ma ru ẹre kua kẹkan, rhunmwuda, I kakabọ winna sẹ iran hia nikẹre; ọrheyerriọ, ẹ i re ẹtin obọ mwẹ ẹre I ya ru ẹre, sokpan, ẹse ne kpataki* ọghe Osanobua, ẹre ọ zẹe ighẹ I sẹtin ru vberriọ. 11 Vbọrhirhighayehẹ, ọre imẹ ẹre ọ ma uwa emwi, ra iran nọ, ọna ọre emwi ne ima kporhu ẹre, ọna ẹre uwa vbe yayi.

12 Sokpan, adeghẹ a kporhu ẹre khian wẹẹ, e Kristi rhiọ kpaegbe vbe idin, vbọ ghi zẹ ne eso vbe uwu uwa na kha wẹẹ, a i khian huẹn emwa ni wulo kpaegbe? 13 Adeghẹ ẹmwata gele nọ wẹẹ a i khian huẹn emwa ni wulo kpaegbe, ọni rhie ma wẹẹ, a ma huẹn e Kristi kpaegbe. 14 Sokpan, adeghẹ a ma huẹn e Kristi kpaegbe, ọni rhie ma wẹẹ, te ima kporhu kua kẹkan, amuẹtinyan ọghe uwa i vbe mwẹ esa hiehie. 15 Yevbesọni, adeghẹ ẹmwata gele nọ wẹẹ, a i khian huẹn emwa ni wulo kpaegbe, ọni vbe rhie ma wẹẹ, emwa ni sẹ osẹ ohoghe khian vbekpa Osanobua ẹre ima khin, te ima ghi vbe ba Osanobua ohoghe vberriọ, rhunmwuda, ma tae khian wẹẹ, ọ huẹn e Kristi kpaegbe vbe idin, vbene ọ ma na gele huẹn ọnrẹn kpaegbe. 16 Rhunmwuda, adeghẹ ẹmwata gele nọ wẹẹ, a i khian huẹn emwa ni wulo kpaegbe, ọni rhie ma wẹẹ, a ma huẹn e Kristi kpaegbe. 17 Deba ọni, adeghẹ a ma huẹn e Kristi kpaegbe, ọni rhie ma wẹẹ amuẹtinyan ọghe uwa i mwẹ esa; ọ vbe rhie ma wẹẹ, te uwa ye fuẹn vbe uwu orukhọ ọghe uwa. 18 Ọni vbe rhie ma wẹẹ, nọ ne emwa ni gu e Kristi rrọọ vbe akugbe ni wulo nẹ,* ọghe iran wa vbe fo nẹ vberriọ. 19 Adeghẹ agbọn na ọkpa ẹre ọ na mwẹ esa ighẹ emwi ne ima rhunmwuda ẹre ya e Kristi yi, ọni rhie ma wẹẹ, vbe uwu emwa hia nọ khẹke na gha gbe ọsọre na, ma ẹre ọ ghi wa khọọ sẹ.

20 Sokpan, ẹmwata nọ rrọọ ọre wẹẹ, a huẹn e Kristi kpaegbe vbe idin; vbe uwu emwa hia ni he wulo,* irẹn ọre ọmọ nokaro. 21 Ugbẹnvbe a miẹn wẹẹ, obọ orhunmwu ọkpa ẹre uwu la rre, erriọ ẹre arhiọkpaegbe ọghe emwa ni wulo khian vbe la obọ orhunmwu ọkpa rre. 22 Zẹvbe na miẹn wẹẹ, Adam ẹre ọ si ẹre ne emwa hia na wulo, emwa hia gha vbe khian enọ rrọọ rhunmwuda e Kristi. 23 Ọkade ọkade ẹre a khian ya huẹn dọmwadẹ ọghẹe kpaegbe: E Kristi ne ọmọ nokaro ẹre ọ ka rhiọ kpaegbe, iyeke ọni, iran ni re ọghe Kristi ghi do rhiọ kpaegbe vbe ẹghẹ ne Kristi gha ya rre. 24 Iyeke ọni, ufomwẹ ghi do rre, vbe Kristi gha mu Arriọba nii ye obọ Osanobua nẹ, nọ re Osa ọghẹe kevbe Erhae. Ẹghẹ nii, ọ ghi ya arriọba hia, ọdakha hia kevbe ẹtin hia khian ena ho bẹkun. 25 Rhunmwuda, ẹ i mwẹ ọ ma khaevbisẹ zẹvbe ọba, a te miẹn wẹẹ Osanobua viọ eghian ọghẹe hia ye ototọ owẹ ọre. 26 Oghian nokiekie na khian wabọ ọre rua ọre uwu. 27 Osanobua “viọ emwi hia ye ototọ owẹ ọre.” Sokpan, nọ na wẹẹ ‘a viọ emwi hia ye ototọ ẹre,’ ọ dewarorua wẹẹ, a ma ka Ọmwa nii nọ viọ emwi hia ye ototọ ẹre ba ẹre. 28 Sokpan, a gha ghi viọ emwi hia ye ototọ ẹre nẹ, Ọmọ ghi vbe rhiegbe ẹre ye ototọ Osanobua nọ viọ emwi hia ye ototọ irẹn, ẹghẹ nii, Osanobua ghi wa gha khaevbisẹ yan emwa hia.*

29 Vbe ẹ i re erriọ, iran ni dinmwiamẹ ne iran mieke na gha re emwa ni wulo ghi vbo? Vbe iran khian ghi khian hẹ? Adeghẹ a i khian zẹdẹ huẹn emwa ni wulo kpaegbe, vbọ ghi zẹ ne iran na dinmwiamẹ vbe odẹ vberriọ? 30 Vbọ ghi zẹ ne ima na rhie uhunmwu mwẹ atata obọ vbe ẹghẹ hia? 31 Ẹdẹgbegbe ẹre I ya miẹn egbe mwẹ vbe agbanmwẹ idin. Ẹmwata ẹre ọna wa khin, te ọ wa vbe yevbe uhiomwẹ ne I ya uwa ne etẹn mwẹ hio, rhunmwuda ne uwa na re eguọmwadia Enọyaẹnmwa e Kristi Jesu. 32 Adeghẹ I gu avbe aranmwẹ ni khọọ gbinna vbe Ẹfisọs vbene emwa ọvbehe vbe ye,* de ere nọ rrọọ mẹ? Adeghẹ ẹmwata gele nọ wẹẹ, a i khian huẹn emwa ni wulo kpaegbe, ọni nọ wẹẹ, ma ghi vbe deba emwa gha kha wẹẹ, “Wa gia gha re, na gha da, rhunmwuda, akhuẹ, ma hia wulo kua.” 33 Wa ghẹ gi ọmwa rhọkpa mu uwa rẹrẹ.* Emwa dan na gu mu obọ ẹre ọ mu uyinmwẹ esi rhia. 34 Wa dọlegbe rhie ẹwaẹn ye uhunmwu, ne uwa gha ru emwi nọ maan; wa ghẹ gha ru orukhọ. Eso vbe uwu uwa i mwẹ irẹnmwi ọghe Osanobua. Te I ta ẹmwẹ na ma uwa, ne ekhue egbe uwa mieke na gha mu uwa.

35 Vbọrhirhighayehẹ, ọmwa sẹtin gha nọ wẹẹ: “Vbe a khian ya huẹn emwa ni wulo kpaegbe hẹ? De aro egbe ne iran khian gha mwẹ vbe a gha huẹn iran kpaegbe?” 36 Wẹ ne akpa vbe abobo! U gha kọ emwiokọ, ẹ i re te emwiokọ nii ka wu nẹ ọ ke zọọ ra? 37 U gha khian kọ emwiokọ, ọre wit nọ ra emwiokọ ọvbehe, ikpẹ kẹkan ẹre u khian rhie ye otọ, ẹ i re emwi ne emwiokọ nii gha khian vbe ọ gha waan nẹ, ẹre u khian kọ; 38 sokpan, Osanobua ẹre ọ rhie egbe ne emwiokọ nii, zẹvbe nọ gualọe yi, ọ ghi rhie egbe ọghe dọmwadẹ emwiokọ ne iran. 39 Efun egbe ughughan ẹre a miẹn, a miẹn ọghe emwa nagbọn, a miẹn ọghe ẹmila, a miẹn ọghe ahianmwẹ, a vbe miẹn ọghe ehẹn. 40 Egbe ọghe emwa ni rre ẹrinmwi rrọọ, egbe ọghe emwa ni rre agbọn na vbe rrọọ; egbe ọghe emwa ni rre ẹrinmwi mwẹ ose ọghẹe, vbene egbe ọghe emwa ni rre agbọn na, na vbe mwẹ ose ọghẹe. 41 Ovẹn mwẹ ose ọghẹe, uki, ose ọvbehe, avbe orhọnmwẹ, ose ọvbehe, uhiẹn, ose ọghe avbe orhọnmwẹ vbe lughaẹn ne egbe.

42 Erriọ vbe ye ne arhiọkpaegbe ọghe emwa ni wulo. A gha mu iran ye otọ vbe iran gha wu, iran ghi kẹkua; a gha ghi huẹn iran kpaegbe, iran ghi do gha mwẹ egbe nẹi sẹtin kẹkẹ. 43 A gha mu iran ye otọ, iran ghi ye khọrhiọn khọrhiọn; a gha ghi huẹn iran kpaegbe, iran ghi ye mose mose. A gha mu iran ye otọ, iran ghi ye vburriẹ vburriẹ; a gha ghi huẹn iran kpaegbe, iran ghi do gha mwẹ ẹtin. 44 Egbe ọghe agbọn na ẹre iran mwẹ vbe a gha mu iran ye otọ; sokpan, a gha huẹn iran kpaegbe, iran ghi do gha mwẹ egbe ọghe orhiọn. Adeghẹ a miẹn egbe ọghe agbọn na, ọni rhie ma wẹẹ, a vbe miẹn egbe ọghe orhiọn. 45 Rhunmwuda, Ebe Nọhuanrẹn khare wẹẹ: “Okpia nokaro nọ re Adam keghi khian ọmwa* nọ rrọọ.” Sokpan, Adam nokiekie keghi khian orhiọn nọ rhie arrọọ ne ọmwa. 46 Vbọrhirhighayehẹ, ẹ i re egbe ọghe orhiọn ẹre ọ karo. Sokpan, ọghe agbọn na ẹre a ka miẹn, iyeke ọni, a ghi do miẹn ọghe orhiọn. 47 Agbọn na ẹre okpia nokaro ke rre, ekẹn ẹre a ya yi ẹre; okpia nogieva nọ rrọọ na ke ẹrinmwi rre. 48 Emwa ni rre agbọn na, na ya ekẹn yi, keghi yevbe ọmwa nii na ya ekẹn yi; iran ni rre ẹrinmwi keghi yevbe ọmwa nii nọ ke ẹrinmwi rre. 49 Zẹvbe ne ima te ka gha yevbe ọmwa nii na ya ekẹn yi, erriọ ẹre ima khian vbe gha yevbe ọmwa nii nọ ke ẹrinmwi rre.

50 Sokpan, ne I ta ọna ma uwa etẹn, efun kevbe esagiẹn i sẹtin la Arriọba Osanobua; emwi nọ sẹtin kẹkẹ i khian vbe sẹtin rri emwi nẹi sẹtin kẹkẹ vbe ukhu. 51 Gu mwẹ ta oro ọkpa ma uwa: Ma hia i khian wa wulo,* sokpan, a gha fi ima hia werriẹ; 52 udomwurri ẹre ọna khian ya sunu, vbe ibuanro ọkpa, vbe a gha kpee okpe nokiekie. Okpe nii gha ghi tu, a ghi huẹn emwa ni wulo kpaegbe, iran ghi gha mwẹ egbe nẹi sẹtin kẹkẹ, a ghi vbe fi ima werriẹ. 53 Emwi nọ sẹtin kẹkẹ ghi mu emwi nẹi sẹtin kẹkẹ yọ, emwi nọ vbe sẹtin wu ghi mu emwi nẹi sẹtin wu yọ. 54 Sokpan, vbe ẹghẹ ne emwi nọ sẹtin kẹkẹ gha ya mu emwi nẹi sẹtin kẹkẹ yọ, emwi nọ sẹtin wu na vbe mu emwi nẹi sẹtin wu yọ, ẹmwẹ na gbẹn yotọ ghi do sẹ, nọ khare wẹẹ: “A mi uwu re nẹ vbe etẹbitẹ.” 55 “Uwu, akhọnmiotọ ruẹ vbo? Uwu, obi ruẹ vbo?” 56 Obi nọ si uwu ọre orukhọ, emwi nọ ya orukhọ zẹ ẹtin ọre Uhi.* 57 Sokpan, a kpọnmwẹ Osanobua, nọ na lekpa Enọyaẹnmwa e Jesu Kristi rhie akhọnmiotọ ne ima!

58 Nọnaghiyerriọ etẹn mwẹ ni ghaan, wa mudia gbain, ne uwa ghẹ beghe. Wa gha mwẹ iwinna nibun ne uwa ru ne Enọyaẹnmwa vbe ẹghẹ hia; wa ghi yerre wẹẹ, ẹsọn ne uwa miẹn ne Enọyaẹnmwa, ẹ i re te uwa miẹn ọnrẹn kua kẹkan.

16 Vbe nọ dekaẹn igho na zẹ ya ru iyobọ ne emwa ni huanrẹn, wa sẹtin vbe ru emwi ne I we ne avbe iko ni rre Galetia ru. 2 Vbe ikpẹdẹ nokaro vbe uzọla uzọla, dọmwadẹ ọghẹe vbe uwu uwa ghi zẹ emwi kọ zẹvbe ne ẹkpo ẹre khua sẹ, ne uwa ghẹ ghi vbe gha gbokhuo igho na koko vbe I gha rre. 3 Sokpan, I gha sẹ evba, I gha tama ikpia ne uwa zẹ, vbe ebe ne uwa gbẹn gu mwẹ, ne iran viọ izọhẹ ne uwa ya ekhọe hia ru gha rrie Jerusalẹm. 4 Adeghẹ a na miẹn wẹẹ, ọ vbe khẹke ne imẹ gha khian, iran ghi wa lele mwẹ gha khian.

5 Sokpan, I gha do miẹn uwa vbe I gha la e Masẹdonia fo nẹ, rhunmwuda, odẹ e Masẹdonia ẹre I khian la; 6 egbọre I gha gbe ẹghẹ eso vbe ehe ne uwa ye, uhiẹn, I sẹtin wa tota ke uwa la ẹghẹ oni* fo, ne uwa mieke na su mwẹ sẹ odẹ vbe I ghaa rrie ehe ne I rrie. 7 Rhunmwuda, I ma hoo na miẹn wẹẹ, te I wa do van tuẹ uwa kẹkan nian vbe I gha khian gberra. I hoo ne I wa kpẹẹ vbe ehe ne uwa ye, adeghẹ e Jehova* hoo. 8 Sokpan, I gha ye gha rre Ẹfisọs ya sẹ ẹghẹ na khian ya do Ugie Pẹntikọst, 9 rhunmwuda, ẹkpotọ wa kie mẹ ẹsẹsẹmwẹse ne I ya winna iwinna nọkhua, sokpan, eghian nibun lẹga mwẹ.

10 Adeghẹ e Timoti na rrie ehe ne uwa ye, wa ghẹ gi ẹre mu ohan emwi rhọkpa vbe ọ ghaa rre uwu ẹbu uwa, rhunmwuda, te ọ vbe winna iwinna e Jehova* vbene imẹ vbe ye. 11 Rhunmwuda ọni, wa ghẹ gi ọmwa rhọkpa ya aro gbe ẹre re. Ọ gha khian kpa, wa ghi gbe ọ khian ẹdẹ hia nẹẹn vbe ọfunmwegbe, nọ mieke na bu mwẹ gha dee, rhunmwuda, te I wa rhie aro ye odẹ gha khẹ ọre, deba etẹn nikẹre.

12 Nọ ne ọtẹn ima nokpia ighẹ Apọlọs, I wa kakabọ rinmwiaẹn ne irẹn vbe etẹn nikẹre do miẹn uwa. Sokpan, ọ ma he hoo nọ rre nian; vbe nọ rhirhi gha ye hẹ, ọ gha miẹn obọ, ọ gha rre.

13 Wa khẹ ye egbe,* wa mudia gbain vbe iyayi uwa,* wa gha mwẹ udinmwẹ,* wa ghi vbe khian enọ wegbe. 14 Wa gha ya ahoẹmwọmwa ru emwi hia ne uwa ru.

15 Wa rẹnrẹn wẹẹ emwa ni rre igiowa ọghe Stẹfanas ọre emwa okaro* ni ka gha yayi vbe Akeya, kevbe wẹẹ, iran wa vbe ya ekhọe hia rhiegbe ye ẹmwẹ iyobọ na ru ne emwa ni huanrẹn. Te I ghi rinmwian uwa nian etẹn, 16 ne uwa vbe gha mu egbe rriotọ ne emwa vberriọ kevbe iran hia ni ku ekhọe gbe ya winna ẹsẹsẹmwẹse. 17 Sokpan, I wa ghọghọ wẹẹ e Stẹfanas, Fọtunetọs kevbe Akeikọs rre emwa, rhunmwuda, iyobọ nọ te khẹke ne uwa ru akpawẹ uwa rre emwa, ẹre iran ru mẹ. 18 Iran wa mu orhiọn mwẹ kevbe ọghe uwa sotọ. Nọnaghiyerriọ, wa gha rhie ọghọ ne ikpia vberriọ.

19 Avbe iko ni rre Esia wẹẹ uwa do. Akuila vbe Priska kevbe emwa hia ni do iko vbe owa iran, ya ekhọe hia giotuẹ uwa zẹvbe eguọmwadia Enọyaẹnmwa. 20 Etẹn hia ni rre ediran wẹẹ uwa do. Wa tuẹ egbe, ne uwa vbe mu unu soso egbe zẹvbe etẹn.

21 Mẹ ne Pọl vbe giotuẹ uwa, mẹ tobọ mwẹ ẹre ọ ya obọ mwẹ gbẹn ọnrẹn.

22 Ọmwaikọmwa nọ ma hoẹmwẹ Enọyaẹnmwa, te ọ khẹke na fi ẹre unu. Eo Enọyaẹnmwa, lahọ gha dee! 23 Te Enọyaẹnmwa e Jesu gha ru ẹse ne kpataki* ne uwa. 24 I hoo ne I gi uwa rẹn wẹẹ, I hoẹmwẹ uwa hia ni gu e Kristi Jesu rrọọ vbe akugbe.