EBE NA GBẸN GIE IVBI E ROM

1 E Pọl ne ọviẹn e Kristi Jesu, na tiere nọ do gha re ukọ, na vbe zẹ nọ gha kporhu iyẹn nọ maan ọghe Osanobua, ẹre ọ gbẹn ebe na rre. 2 Iyẹn nọ maan na, ẹre Osanobua loo avbe akhasẹ ọghẹe ya ta yotọ vbe Ebe Nọhuanrẹn ke ẹghẹ gha dee. 3 Ọni ọre iyẹn nọ dekaẹn Ovbi ẹre, nọ ghi do la uniẹn* e Devid rre vbe agbọn na. 4 Ọ keghi dewarorua wẹẹ Ovbi Osanobua nọ, rhunmwuda, Osanobua keghi ya orhiọn nọhuanrẹn ọghẹe huẹn ọnrẹn kpaegbe vbe idin. Enọyaẹnmwa e Jesu Kristi ẹre a guan kaẹn na. 5 Obọ ẹre, ẹre ima la miẹn ẹse ne kpataki.* Irẹn ẹre ọ vbe zẹ mwẹ ne I gha re ukọ, ne I ya ru iyobọ ne emwa ni rre agbẹnvbo hia, ne iran mieke na gha họn ẹmwẹ rhunmwuda amuẹtinyan ne iran mwẹ, ne iran vbe gha ya ọghọ ne eni ẹnrẹn. 6 Usun avbe agbẹnvbo ne Osanobua tiere nọ do gha re ọghe Jesu Kristi, ẹre uwa vbe khin. 7 Wa hia ni rre Rom ne Osanobua hoẹmwẹ ọnrẹn, nọ vbe tie nọ do gha re emwa ni huanrẹn, ẹre I gbẹn ebe na gie:

Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.

8 Vbe okaro, I ya eni Jesu Kristi kpọnmwẹ Osanobua rhunmwuda uwa hia, rhunmwuda, uhunmwu otagbọn hia ẹre a na họn ẹmwẹ amuẹtinyan ọghe uwa. 9 Ẹghẹ hia ẹre I ya so eni uwa vbe erhunmwu. Osanobua ne I ya ekhọe mwẹ hia rhie ugamwẹ nọhuanrẹn na, ne I vbe kporhu iyẹn nọ maan vbekpa Ovbi ẹre, gha sẹtin sẹ osẹ ye ọna. 10 Erhunmwu ne I na ọre ne I sẹtin rre do miẹn uwa, deghẹ iho ọghe Osanobua nọ. 11 Rhunmwuda, ọ kpẹẹ re ne I ke hoo ne I do miẹn uwa, ne I mieke na ghae afiangbe Osanobua sẹ uwa obọ, ne uwa mieke na deziẹn; 12 ra ne I wa kha wẹẹ, ne ima rhie igiọdu ne egbe lekpa amuẹtinyan ọghe ima; ọghe uwa gha rhie igiọdu ne imẹ, ọghe imẹ ghi vbe rhie igiọdu ne uwa.

13 Etẹn, I hoo ne uwa rẹn wẹẹ, ọ kpẹẹ re ne I te hoo ne I do miẹn uwa, sokpan, emwi eso ghi vbe mu idobo yọ, I i ghi vbe sẹtin rre. Te I te gha hoo ne I rre, ne iwinna mwẹ mieke na biẹ ọmọ esi vbe ehe ne uwa ye, zẹvbe nọ vbe ye vbe agbẹnvbo nikẹre. 14 Emwa hia ẹre I mwẹ ọnrẹn osa, ke Ivbi e Grik kevbe avbe ọrriọvbe,* ke emwa ni mwẹ ẹwaẹn kevbe nẹi mwẹ ẹwaẹn; 15 ọni ẹre ọ si ẹre nọ na bọbọ mwẹ egbe, ne I vbe do kporhu iyẹn nọ maan ma uwa ni rre Rom. 16 Ekhue iyẹn nọ maan i mu mwẹ. Uhiẹn, ọni ọre ẹtin ne Osanobua ya miẹn emwa hia ni mwẹ amuẹtinyan fan; Ivbi e Ju ẹre ọ ka sẹ ọre egbe, ọ na vbe do sẹ egbe Ivbi e Grik. 17 Iyẹn nọ maan na ẹre ọ ya emwa ni mwẹ amuẹtinyan do rẹn vbekpa iruemwiẹse ọghe Osanobua, ọna keghi ya amuẹtinyan ọghe iran wegbe sayọ, zẹvbe ne Ebe Nọhuanrẹn tae nọ na wẹẹ: “Amuẹtinyan ne ọmwa ata mwẹ, ẹre ọ khian yae gha rrọọ.”

18 Osanobua keghi ke ẹrinmwi rhie izohu ọghẹe ma vbe egbe emwa hia nẹi họn ẹmwẹ nẹẹn, kevbe ni mwẹ obọ vbe uyinmwẹ nọ ma khẹke; iran na i gi emwa rẹn ẹmwata, rhunmwuda uyinmwẹ dan ne iran yin. 19 Rhunmwuda, emwi hia ne iran gha sẹtin rẹn vbekpa Osanobua keghi rre odaro iran, te ọ wa dewarorua; Osanobua ẹre ọ ru ẹre ne aro iran da avbe emwi na hia. 20 Agharhemiẹn wẹẹ a i bẹghe Osanobua, a gha ghee emwi nọ yi ke na ya bu agbọn gha dee, a gha sẹtin rẹn aro ọmwa nọ khin, rhunmwuda, te aro ọmwa nọ khin wa rhiegbe ma vbe emwi hia nọ yi. Ena hia rhie ẹtin etẹbitẹ nọ mwẹ ma, ọ vbe rhie ẹre ma wẹẹ irẹn ọre Osanobua. Nọnaghiyerriọ, iran i miẹn emwi mu na wẹẹ, ẹre ọ si ẹre ne iran ma na rẹn Osanobua. 21 Agharhemiẹn wẹẹ iran rẹn Osanobua, iran ma rhie uyi nọ khẹke nẹẹn zẹvbe Osanobua, iran ma vbe kpọnmwẹ ọnrẹn, sokpan, iran na do khian emwa ni kọẹn kevbe nẹi roro emwi ẹse, ekhọe iran na vbe so ebiebi. 22 Iran te kha wẹẹ iran mwẹ ẹwaẹn, sokpan, akpa ẹre iran khin. 23 Ne iran gha te ya gha rhie uyi ne Osanobua nẹi wu nẹi kẹkẹ, iran na gha rhie uyi ne amazẹ ọghe emwa nagbọn ni ra wulo kẹkua, kevbe ọghe avbe ahianmwẹ, avbe aranmwẹ ni mwẹ owẹ enẹ kevbe ni ya ẹko hiọrọ.*

24 Nọnaghiyerriọ, Osanobua keghi he iran, ne iran gha yin uyinmwẹ osọnnọ zẹvbe nọ rre iran ekhọe, rhunmwuda ọni, emwi ekhue ẹre iran ghi ya egbe iran ru. 25 Iran te rẹn ẹmwata ọghe Osanobua, sokpan, iran na wẹẹ ohoghe ẹre iran khian yayi, iran na gha ya uhunmwu rhanmwẹ otọ ne emwi ne Osanobua yi, iran na vbe gha gae, ne iran gha te ya gha ga Osanobua nọ yi ẹre. Osanobua na, ẹre a gha rhie urhomwẹ na vbe etẹbitẹ. Isẹ. 26 Ọni ẹre ọ si ẹre ne Osanobua na sẹ iran rae, ne iran gha fifi ye emwi ọdọ vbe amwẹ; emwi ekhue ẹre ọna wa khin. Ikhuo ni rrọọ keghi loo egbe iran* ghee ihan, sokpan, ẹ i re erriọ ẹre Osanobua te mwamwaẹn yi. 27 Erriọ ẹre ikpia ni rrọọ vbe ye, iran i ghi tie ikhuo vbe ovbe zẹvbe ne Osanobua mwamwaẹn, ikpia ne ihua iran ẹre iran ghi rriarria lele, ikpia vbe ikpia ghi gha tie egbe vbe ovbe. Iran ghi gha gu egbe ru emwi oya emwi osọnnọ, erriọ ẹre iran vbe ya rri oya nọ khẹke ye emwi dan ne iran ru.

28 Ugbẹnvbe a miẹn wẹẹ, iran ma ghee ẹre wẹẹ Osanobua sẹ ne iran gha rẹn,* Osanobua keghi he iran, ne ekhọe iran gha gu iran zẹ iro dan, ọni ẹre ọ si ẹre ne iran na ru emwi nọ ma khẹke. 29 Uyinmwẹ dan hia keghi wa gua iran obọ ro, ọkhọ, arovbẹmwẹ, iba, ekhọe nọ vuọn ne igbọvo, izigha, okhọn, erẹrẹ kevbe ikhẹko. Iran vbe ta ọta wẹwẹwẹ, 30 iran ta egbe ọtakhọ, iran khuiwu Osanobua, iran i ghee ọmwa sẹ ọmwa, iran ghi gha tọn egbe mu, iran ghi gha rhuọ, iran ghi gha gualọ iba ne iran gha zẹ,* iran i họn ẹmwẹ ne evbibiẹ iran, 31 iran i mwẹ ẹwaẹn, iran i mu emwi na gba ta sẹ,* iran i mwẹ ẹnina ọmwa, iran i vbe tohan ọmwa. 32 Iran wa rẹn wẹẹ Osanobua khare wẹẹ, emwa ni ru emwi vberriọ gha ya uhunmwu khiẹ ọre. Ọrheyerriọ, te iran ye ru avbe emwi na; ẹ i vbe re ọni ọkpa, iran ghi vbe gha kpee obọ ne emwa ni ru ẹre.

2 Ọse mwẹ, adeghẹ u bu ohiẹn ọmwa ọvbehe, u ghi rẹn wẹẹ, wẹ i khian miẹn ẹmwẹ ọkpa ta wẹẹ ẹre ọ si ẹre ne u na ru vberriọ, ọmwa nọ rhirhi khọn ruẹ ne u gha khin; rhunmwuda, wẹ ghaa bu ohiẹn ọmwa ọvbehe, vbene uwẹ na vbe ru egbe emwi ne iran ru, u bu ohiẹn gbe egbuẹ nẹ. 2 Ma rẹnrẹn wẹẹ, adeghẹ Osanobua na bu ohiẹn emwa ni ru emwi vbenian, ohiẹn ẹmwata ẹre ọ buru.

3 Larre oo, wẹ nọ bu ohiẹn emwa ọvbehe, vbene uwẹ na vbe ru egbe emwi ne iran ru, te uwẹ roro ẹre wẹẹ ibuohiẹn Osanobua gha la uwẹ ban ra? 4 Ra, u ma gbọyẹmwẹ ye itohan nọkhua, ilekhue kevbe izinegbe ne Osanobua mwẹ ghee ruẹ ra? U ma rẹn wẹẹ, rhunmwuda ne Osanobua na tohan ruẹ, ẹre ọ si ẹre nọ na hia nọ ru iyobọ nuẹn ne u mieke na ro iro fi uyinmwẹ werriẹ ra? 5 Sokpan, ọmwa nọ ze vbe udu ẹre u khin, u ma vbe mu egbe ne u khian ya fi werriẹ. Rhunmwuda ọni, izohu Osanobua dee nuẹn vbe ẹdẹ nọ gha rhie izohu ọghẹe kevbe ibuohiẹn ẹmwata ọghẹe ma. 6 Osanobua gha ha osa ne dọmwadẹ ọghẹe zẹvbe ne iwinna rẹn khare: 7 nọ ne emwa ni gualọ uyi, ọghọ kevbe egbe nẹi sẹtin kẹkẹ, Osanobua gha ya arrọọ ọghe etẹbitẹ san iran ẹse deghẹ iran ma na gi egbe iwinna esi na ru wọọ iran; 8 sokpan, nọ ne iran ni gui ẹzọ ẹzọ, kevbe ni ru emwi dan, ne iran gha te ya gha ya ẹmwata Osanobua ru emwi, Osanobua gha werriẹ aro nọ khọọ daa iran, ọ ghi hihiẹ izohu ọghẹe yan iran. 9 Orueghe dee ne emwa hia ni ru emwi dan, egbe i khian rọkhọ iran; Ivbi e Ju ẹre ọ khian ka sẹ ọre egbe, ọ ke do sẹ egbe Ivbi e Grik. 10 Sokpan, nọ ne emwa ni ru emwi esi, uyi, ọghọ kevbe ọfunmwegbe ẹre ọ khian gha re ọghe iran; ọ gha ghi sẹ egbe Ivbi e Ju, ọ ghi vbe do sẹ egbe Ivbi e Grik. 11 Rhunmwuda, aro ọkpa ẹre Osanobua ya ghee emwa hia.

12 Emwa hia fẹẹrẹ nẹi rre ototọ uhi ni ru orukhọ gha wu, ọ gha khọnrẹn wẹẹ iran i rre ototọ uhi; sokpan, nọ ne emwa hia ni rre ototọ uhi, iran gha ru orukhọ, uhi nii ẹre a khian ya bu ohiẹn iran. 13 Ẹ i re rhunmwuda wẹẹ ọmwa họn uhi nii, ẹre ọ ya re ọmwa esi vbe aro Osanobua, sokpan, emwa ni lele uhi ọre emwa esi vbe aro ọre. 14 Deghẹ ivbi agbẹnvbo ọvbehe nẹi mwẹ uhi ne iran lele, na gha ya ekhọe obọ iran ru emwi ne uhi khare, agharhemiẹn wẹẹ iran i mwẹ uhi ne iran lele, ọni rhie ma wẹẹ iran mwẹ uhi vbe ekhọe iran. 15 Uyinmwẹ iran rhie ẹre ma wẹẹ, a gbẹnnẹ uhi nii ye ekhọe iran. Ekhọe iran zẹdia bu ase ne iran, ugbẹnso, ọ ghi vbe gha gu iran gui; odẹ vbenian ẹre iran ghi ya rẹn deghẹ emwi ne iran ru maan, ra ẹ i maan. 16 Erriọ ẹre ọ khian gha ye vbe ẹdẹ ne ẹdẹrriọ, vbe Osanobua gha loo e Kristi Jesu ya bu ohiẹn emwa ye emwi ne iran ru vbe ẹkhokho. Ọna rre usun iyẹn nọ maan ne I ya wewe.

17 U tie egbuẹ Ovbi e Ju, u mu ẹtin yan uhi, u vbe yae rhuọ wẹẹ ọguọmwadia Osanobua ẹre u khin. 18 U rẹn emwi ne Osanobua hoo ne u gha ru, u rẹn emwi nọ khẹke, rhunmwuda, a ma ruẹ ẹre nẹ* vbe Uhi e Mozis. 19 Ekhọe ruẹ muẹn nẹ wẹẹ, ọmwa nọ ma arhuaro odẹ, kevbe ukpa nọ baa yan emwa ni rre uwu ebiebi ẹre u khin. 20 U vbe yayi wẹẹ, ọmwa nọ dia emwa ni kọẹn ye odẹ, kevbe ọmwa nọ ma ibiẹka emwi ẹre u khin, rhunmwuda ne u na mwẹ irẹnmwi kherhe, kevbe ne u na rẹn ẹmwata nọ rre Uhi e Mozis. 21 Wẹ nọ ma emwa ọvbehe emwi, vbọzẹ ne u i na ma egbuẹ ẹre? Wẹ nọ kporhu wẹẹ, “Ghẹ rhaa,” wẹ rhaa ra? 22 Wẹ nọ kha wẹẹ, “Ghẹ ghẹẹ,”* wẹ ghẹẹ ra?* Wẹ ne ẹbọ sọnnọ, wẹ do emwi viọ vbe aro ẹbọ ra? 23 Wẹ nọ ya uhi rhuọ, wẹ ya ekhue mu Osanobua lekpa ne u na rra Uhi nii ra? 24 Zẹvbe ne Ebe Nọhuanrẹn khare, “te emwa ni rre uwu agbọn ghi ya unu kpamisikan ku eni Osanobua rhunmwuda uwa.”

25 U ghaa lele uhi, ẹre arhuẹ ne u rhuẹ re na mwẹ esa; sokpan, deghẹ ọmwa nọ rra uhi ẹre u khin, ọ ghi yevbe na miẹn wẹẹ u ma zẹdẹ rhuẹ. 26 Nọnaghiyerriọ, deghẹ a na miẹn wẹẹ ọmwa nọ ma rhuẹ, ru emwi nọ khẹke zẹvbe ne Uhi khare, ọ ghi do yevbe na miẹn wẹẹ ọ rhuẹ re, ra ẹ i re erriọ? 27 Adeghẹ ọmwa nọ ma rhuẹ na gha lele Uhi, te ọmwa vberriọ ghi bu ohiẹn gbe uwẹ nọ rẹn nene Uhi, nọ vbe rhuẹ nẹ, nọ vbe ya gha rra Uhi. 28 Ẹ i re emwi na wa bẹghe vbe egbe ọmwa ẹre a ya rẹn ọmwa nọ gele re Ovbi e Ju, ẹ i vbe re arhuẹ ọghe ikpakpa ẹre ọ wa gele re arhuẹ. 29 Sokpan, ọmwa nọ gele re Ovbi e Ju, ekhọe ẹre ọ ye. Ẹ i re ọmwa lele uhi na gbẹn yotọ, ẹre a ya re ọmwa nọ rhuẹ re, sokpan, arhuẹ ọghe ẹmwata keghi re ọghe ekhọe, orhiọn nọhuanrẹn ẹre ọ ru ẹre. Osanobua ẹre ọ tian egbe ọmwa vberriọ, ẹ i re emwa nagbọn.

3 De ere na miẹn vbọ vbe a ghaa re Ovbi e Ju? De ere na vbe miẹn vbọ deghẹ a na rhuẹ? 2 Ere wa rrọọ ẹsẹse. Vbe okaro, iran ẹre Osanobua rhie ẹmwẹ ọnrẹn nọhuanrẹn na. 3 Adeghẹ eso vbe uwu iran na ghi khian emwa nẹi mwẹ amuẹtinyan vbo? Te ọni ghi rhie ma wẹẹ, Osanobua i re ọmwa nọ gia mu ẹtin yan ra? 4 Hiehie! Ọ gha khọnrẹn wẹẹ emwa ohoghe ẹre emwa hia ghi khin, te emwa gha rẹn Osanobua ye ọmwa ẹmwata, zẹvbe na gbẹn ọnrẹn yotọ wẹẹ: “U gha guan, te a gha rẹn wẹẹ ẹmwata ẹre u tae, u ghi vbe rriase vbe emwa gha ba ruẹ ifiẹzọ.” 5 Abakuru ọghe ima keghi ya emwa rẹn wẹẹ Osanobua ru emwi ẹse. Nọnaghiyerriọ, vbe ima khian ghi miẹn ta? Te Osanobua ghi ru emwi nọ ma gba ra, vbe ọ gha rri ima oya ra? (Emwi nọ rre emwa eso ekhọe ẹre imẹ ta na oo.) 6 Hiehie! Adeghẹ erriọ te nọ, vbe Osanobua khian ghi ya sẹtin bu ohiẹn agbọn na hẹ?

7 Deba ọni, deghẹ a na miẹn wẹẹ I ta ohoghe, emwa na lekpa ohoghe nii do rẹn wẹẹ ọmwa ẹmwata ẹre Osanobua khin, ọ na vbe ya iran gha rhie uyi nẹẹn sayọ, vbọ ghi zẹ ne emwa na bu ohiẹn mwẹ wẹẹ, ọmwa orukhọ ẹre I khin? 8 Ma i ghi wa kha wẹẹ, “Gia gha ru emwi dan, ne emwi esi mieke na lae rre”? ugbẹnvbe a miẹn wẹẹ, ọna ọre ohoghe ne emwa eso ba ima ẹre, ne iran na wẹẹ erriọ ẹre ima tae khian. A gha bu ohiẹn emwa vberriọ, zẹvbe nọ khẹke iran.

9 Nọnaghiyerriọ, te ima ne Ivbi e Ju ghi maan sẹ emwa ọvbehe ra? Ma ka tae nẹ sin wẹẹ, ke Ivbi e Ju, ke Ivbi e Grik, ototọ ẹtin orukhọ ẹre ima hia ye; 10 zẹvbe na gbẹn ọnrẹn yotọ: “Orhunmwu ọkpa i rrọọ nọ wa re ọmwa esi, ọkpa kẹkan i vbe rrọọ; 11 orhunmwu ọkpa i rrọọ nọ mwẹ ẹwaẹn; orhunmwu ọkpa i rrọọ nọ gualọ Osanobua. 12 Emwa hia fi iyeke gbe Osanobua nẹ, iran hia i ghi mwẹ emwi nọ gia ya ru; nọ ya obọ esi mu emwa ọvbehe i rre uwu iran rhọkpa, a gha wẹẹ ọkpa kẹkan nọ, ẹ i rrọọ.” 13 “Te ẹho ọghe iran yevbe idin na kie yotọ; iran keghi ya aranmwẹ iran mu emwa rẹrẹ.” “Ẹmwẹ nọ ke iran unu ladian yevbe obi ẹyẹn.” 14 “Ihẹn ihẹn ẹre iran tie, erriọ ẹre ẹmwẹ orriara vbe ya ke iran unu ladian.” 15 “Obọ wa kẹ iran vbọ gha de ọghe na da esagiẹn.”* 16 “Omurhia ẹre a rẹn iran yi, erriọ ẹre iran vbe ya si obalọ ye emwa egbe, 17 iran ma rẹn odẹ ọfunmwegbe.” 18 “Iran ma rẹn emwi na tie ẹre imuohan Osanobua.”

19 Ma rẹnrẹn wẹẹ emwi hia ni rre nene Uhi, emwa hia ni rre ototọ Uhi nii ẹre ọ kaan rẹn. Rhunmwuda ọni, ọmwa rhọkpa i ghi kha wẹẹ irẹn ma rẹn ọkpa rẹn eva, emwa hia ni rre agbọn ghi gha re nọ rriabe, nọ khẹke ne Osanobua rri ọre oya. 20 Nọnaghiyerriọ, Osanobua i khian ka ọmwa* rhọkpa ye ọmwa ata rhunmwuda wẹẹ ọ lele uhi. Uhiẹn, uhi nii ẹre ọ ya ima rẹn emwi ne orukhọ gele khin.

21 Sokpan, vbe ẹghẹ na nian, ọ dewarorua wẹẹ, ọmwa gha sẹtin gha re ọmwa ata vbe odaro Osanobua, vbe nẹi na lele uhi; Uhi kevbe ẹmwẹ ne avbe Akhasẹ gbẹnnẹ yotọ vbe so igiẹ ye ọna. 22 Sokpan, emwa hia ni ghi mu ẹtin yan e Jesu Kristi nẹ, Osanobua gha ka iran ya emwa ata. Ẹ i lele ẹvbo ne iran ke rre, aro ọkpa ẹre ọ ya ghee ehia. 23 Rhunmwuda, emwa hia ru orukhọ nẹ, iran vbe khian rree ne uyi ọghe Osanobua nẹ. 24 Sokpan, Osanobua keghi ru iran ẹse, nọ na ka iran ye emwa ata. Odẹ nọ ya ru ọna, ọre nọ na ru ẹse ne kpataki* ne iran, ọ na we ne Kristi Jesu do dẹ iran werriegbe. 25 Te Osanobua ya e Jesu zọ ese, ne emwa nagbọn mieke na werriegbe gha re ọse irẹn,* deghẹ iran na mu ẹtin yan esagiẹn ọghe Jesu. Te Osanobua ru ọna, nọ ya rhie ẹre ma wẹẹ ọmwa ata ẹre irẹn khin, rhunmwuda, ọ kegha zin egbe lele emwa nagbọn, ọ na gha ya orukhọ ne iran ru vbe ẹghẹ nọ gberra bọ iran. 26 Ọmwa gha mu ẹtin yan e Jesu, Osanobua ghi kae ye ọmwa ata. Odẹ vberriọ, te Osanobua vbe rhie ẹre ma ima ni rrọọ vbe ẹghẹ na wẹẹ, ọmwa ata ẹre irẹn khin.

27 De emwi ne ima khian ghi gha rhuọ ba? Ẹ i rrọọ. Rhunmwuda ighẹ ọmwa ru vbene uhi khare ẹre ọ khian ghi gha rhuọ ba ra? Hiehie! Emwi ọkpa ne ima khian gha rhuọ ba, ọre rhunmwuda ighẹ ima lele uhi ọghe amuẹtinyan. 28 Emwi ne ima rẹnrẹn ọre wẹẹ, ọmwa nọ mwẹ amuẹtinyan ẹre a ka ye ọmwa ata, ẹ i re ọmwa nọ lele emwi ne uhi khare. 29 Osanobua i wa re Osa ọghe Ivbi e Ju ọkpa. Irẹn ẹre ọ vbe re Osa ọghe avbe agbẹnvbo nikẹre, ra ẹ i re erriọ? Osa ọghe agbẹnvbo nikẹre ẹre irẹn vbe khin. 30 Ugbẹnvbe a miẹn wẹẹ Osanobua ọkpa ẹre ọ rrọọ, ọ gha ka emwa ni rhuẹ re ye emwa ata rhunmwuda amuẹtinyan ne iran mwẹ. Ọ gha vbe ka emwa ni ma rhuẹ ye emwa ata rhunmwuda amuẹtinyan ne iran mwẹ. 31 Te ima khian ghi so uhi nii gọ rhunmwuda amuẹtinyan ọghe ima ra? Ẹo! Nọghayayerriọ, te ima da uhi nii yi.

4 Nọnaghiyerriọ, vbe ima khian miẹn ta vbekpa ere nọ miẹn ighẹ Ebraham ne erha ima odede ne ima la uniẹn ọnrẹn rre? 2 Vbe igiemwi, akpawẹ emwi ne Ebraham ru, ẹre a gu kae ye ọmwa ata, ọ gha te miẹn emwi nọ gha ya rhuọ, sokpan, ẹ i sẹtin rhuọ vbe odaro Osanobua. 3 De emwi ne ebe nọhuanrẹn khare? Ọ wẹẹ, “Ebraham mu ẹtin yan e Jehova,* ẹre a na kae ye ọmwa ata.” 4 Adeghẹ a na ha osa ne ọmwa nọ winnaẹn, ẹ i re te a yae ru ẹre ẹse, sokpan, te ọ winna yọ.* 5 Vbọrhirhighayehẹ, adeghẹ ọmwa na mu ẹtin yan Osanobua, Osanobua gha rhunmwuda amuẹtinyan ọghe ọmwa nii kae ye ọmwa ata, agharhemiẹn wẹẹ ọmwa nii ma winna yọ. Osanobua ọre ọmwa nọ gha sẹtin ka ọmwa orukhọ ye ọmwa ata. 6 Ọna ẹre Devid ghaa kha vbe ẹghẹ nọ na guan kaẹn ọyẹnmwẹ nọ sẹ ọmwa ne Osanobua ka ye ọmwa ata, agharhemiẹn wẹẹ ọ ma te winna yọ: 7 “Oghọghọ nọ ne emwa nii na ya orukhọ ọghe iran bọ, na vbe gbe gue orukhọ ọghe iran; 8 oghọghọ nọ ne ọmwa nii, ne Jehova* ma ka orukhọ ọghẹe ye ọre urhu.”

9 Oghọghọ na guan kaẹn na, ọghe iran ni rhuẹ re ọkpa nọ ra, ra ọ vbe kaan emwa ni ma rhuẹ? Rhunmwuda, ma khare wẹẹ: “A keghi ka Ebraham ye ọmwa ata, rhunmwuda amuẹtinyan ọghẹe.” 10 De ẹghẹ na ya kae ye ọmwa ata? Vbe ọ rhuẹ re nẹ nọ ra, ra vbe ọ ma he rhuẹ? Ẹghẹ nọ ma na he rhuẹ nọ, ẹ i re vbe ọ rhuẹ nẹ. 11 Osanobua keghi tama rẹn nọ rhuẹ zẹvbe ama nọ so igiẹ yọ wẹẹ, irẹn kae ye ọmwa ata rhunmwuda amuẹtinyan nọ ghaa mwẹ vbe ẹghẹ nọ ma na he rhuẹ, nọ mieke na gha re erha emwa hia ni ghi mwẹ amuẹtinyan nẹ, agharhemiẹn wẹẹ iran ma rhuẹ; ẹghẹ nii, Osanobua ghi ka iran ye emwa ata. 12 Ebraham ghi vbe gha re erha emwa ni rhuẹ re. Sokpan, ẹ i wa re erha emwa ni rhuẹ re ọkpa, ọ ghi vbe gha re erha emwa ni lele ukpowẹ ọghẹe, ni vbe mwẹ egbe amuẹtinyan nọ ghaa mwẹ. Ọni ọre egbe amuẹtinyan ne erha mwa ighẹ Ebraham ghaa mwẹ vbe ẹghẹ nọ ma na he rhuẹ.

13 Osanobua tama Ebraham wẹẹ, uhunmwu otagbọn gha khian ọghẹe kevbe ọghe ivbi ẹre.* Ẹ i re rhunmwuda wẹẹ, Ebraham lele uhi, ẹre ọ ya Osanobua ru eyan na. Sokpan, evbọzẹe ọre ne Osanobua na kae ye ọmwa ata, rhunmwuda amuẹtinyan ọghẹe. 14 Adeghẹ a na miẹn wẹẹ, rhunmwuda ighẹ ọmwa lele uhi, ẹre emwi na ve khian na sẹ ọre obọ, amuẹtinyan ghi khian emwi nẹi mwẹ esa, ẹghẹ nii, emwi na ve ghi dihoi rua. 15 Ẹmwata nọ rrọọ ọre wẹẹ, izohu ẹre Uhi si rre, sokpan, eke ne uhi i ye, a i rra uhi vba.

16 Osanobua keghi ru eyan ma Ebraham rhunmwuda amuẹtinyan nọ ghaa mwẹ; ẹse ne kpataki,* ẹre Osanobua ru nẹẹn, nọ na ru eyan na ma rẹn. Ọna ẹre ọ zẹe ne ive nii gha na sẹ ivbi ẹre* hia obọ. Ẹ i wa re iran ni lele Uhi ọkpa ẹre ive nii khian sẹ ọre obọ, sokpan, ọ gha vbe sẹ obọ emwa ni mwẹ egbe amuẹtinyan ne Ebraham ghaa mwẹ. Ebraham na, ọre erha ima hia. 17 (Erriọ ẹre ọ wa ye zẹvbe na gbẹn ọnrẹn yotọ wẹẹ: “I zẹ ruẹ nẹ ne u gha re erha agbẹnvbo nibun.”) Ebraham keghi rhie amuẹtinyan na ma vbe odaro Osanobua, nọ re Osa nọ ya emwa ni wu khian eni ghi rrọọ, ọ ghi vbe gha ta ẹmwẹ emwi nẹi rrọọ vbene a miẹn wẹẹ ọ rrọọ.* 18 Agharhemiẹn wẹẹ Ebraham ma ghi te ya aro yọ wẹẹ irẹn gha biẹ, ọ kegha mwẹ ilẹkẹtin wẹẹ irẹn gha khian erha agbẹnvbo nibun, rhunmwuda nọ na mu ẹtin yan emwi ne Osanobua khare, nọ na wẹẹ: “Erriọ ẹre ivbuẹ* khian gha ye.” 19 Agharhemiẹn wẹẹ, amuẹtinyan ọghẹe ma beghe, ọ kegha ghee ẹre wẹẹ, egbe irẹn wu nẹ (ugbẹnvbe a miẹn wẹẹ, ukpo iyisẹn [100] ẹre ọ ghaa ye). Ọ na vbe gha ghee ẹre wẹẹ, e Sera khian ọmaẹn gbe nẹ, nọ gha biẹ.* 20 Sokpan, rhunmwuda ive ne Osanobua ve, ọ ma mwẹ ẹghẹ ne amuẹtinyan ọghẹe ya beghe; sokpan, amuẹtinyan ọghẹe keghi yae khian enọ wegbe, ọ na gha rhie uyi ne Osanobua. 21 Ọ na vbe gha mwẹ ilẹkẹtin wẹẹ, Osanobua gha sẹtin mu eyan nọ yan rẹn sẹ. 22 Nọnaghiyerriọ, “a na kae ye ọmwa ata.”

23 Vbọrhirhighayehẹ, ẹ i re rhunmwuda ẹre ọkpa, ẹre a gu gbẹn ẹmwẹ na ighẹ a “kae ye ọmwa ata,” 24 sokpan, a vbe rhunmwuda ima gbẹn ọnrẹn, ma na khian ka ye emwa ata, rhunmwuda ne ima na ya Osanobua yi, nọ huẹn Enọyaẹnmwa e Jesu kpaegbe vbe idin. 25 Osanobua keghi kue ne emwa gbe ẹre rua, nọ miehe na wu ye orukhọ ọghe ima, a na huẹn ọnrẹn kpaegbe na mieke na ka ima ye emwa ata.

5 Nọnaghiyerriọ, ugbẹnvbe a miẹn wẹẹ, a ka ima ye emwa ata nẹ rhunmwuda amuẹtinyan ọghe ima, ma gha sẹtin gu Osanobua gha rrọọ vbe ọfunmwegbe,* rhunmwuda emwi ne Enọyaẹnmwa e Jesu Kristi ru ne ima. 2 Obọ ẹre, ẹre Osanobua la ru ẹse ne kpataki* ne ima, rhunmwuda amuẹtinyan ọghe ima; nọnaghiyerriọ, gi ima gha ghọghọ,* rhunmwuda uyi Osanobua ne ima ya aro yi. 3 Ẹ i vbe re ọni ọkpa, gi ima vbe gha ghọghọ* vbe ima ghaa rre ọlọghọmwa, ugbẹnvbe ima rẹnrẹn wẹẹ, ọlọghọmwa ẹre ọ biẹ izinegbe; 4 izinegbe ọghe ima ẹre ọ khian ya Osanobua miẹn ima yi; Osanobua gha miẹn ima yi, ma ghi gha mwẹ ayayẹro,* 5 ayayẹro* na i khian ya ima gbe I ma rẹn vbe okiekie; rhunmwuda, Osanobua ya ahoẹmwọmwa ọghẹe vuọn ima ekhọe nẹ. Orhiọn nọhuanrẹn nọ ya ru ima ẹse ẹre ọ ya ru ọna.

6 Rhunmwuda, vbe ẹghẹ ne ima na gha vburriẹ, e Kristi keghi wu ne emwa dan, vbe ẹghẹ na mwamwa yọ. 7 Ọ gha lọghọ, a ke do miẹn ọmwa nọ gha wu ne ọmwa nọ lele uhi; sokpan, egbọre a gha miẹn ọmwa nọ gha sẹtin wẹẹ irẹn gha wu ne ọmwa esi. 8 Sokpan, Osanobua keghi rhie ẹre ma wẹẹ irẹn hoẹmwẹ ima, rhunmwuda, ẹghẹ ne ima ya gha re emwa orukhọ, e Kristi na wu ne ima. 9 Ugbẹnvbe a miẹn wẹẹ, a rhunmwuda esagiẹn ọnrẹn ka ima ye emwa ata nẹ, ẹ i mwẹ a ma la obọ ẹre miẹn ima fan vbe izohu Osanobua. 10 Ẹghẹ ne ima na gha re eghian Osanobua, Osanobua keghi lekpa uwu ọghe Ovbi ẹre gu ima ru adọlọ, nọnaghiyerriọ, ẹ i mwẹ ọ ma ya arrọọ ọghe Ovbi ẹre miẹn ima fan, ugbẹnvbe ima ghi gu ẹre ru adọlọ nẹ. 11 Ẹ i vbe re ọni ọkpa, te ima ghi vbe sọyẹnmwẹ ne ima na re ọsie Osanobua rhunmwuda emwi ne Enọyaẹnmwa e Jesu Kristi ru; vbene ẹmwata, irẹn ẹre ọ zẹe ighẹ ima sẹtin do gha re ọsie Osanobua.

12 Obọ orhunmwu ọkpa ẹre orukhọ la la agbọn na, orukhọ na vbe rhie uwu mwẹ obọ gha dee, erriọ ẹre uwu ghi ya sẹ egbe emwa hia, rhunmwuda, iran hia ru orukhọ nẹ—. 13 Orukhọ ka rre agbọn na nẹ, a te miẹn wẹẹ Uhi rre, sokpan, deghẹ uhi i rrọọ, a i ka orukhọ ye ọmwa rhọkpa urhu. 14 Vbọrhirhighayehẹ, ke ẹghẹ Adam do sẹ ẹghẹ e Mozis, uwu kegha khaevbisẹ yan emwa, uhiẹn ya sẹ egbe emwa ni ma ru orukhọ vbene Adam ru. Adam kegha yevbe ọmwa nii na wẹẹ ọ dee.

15 Sokpan, ẹse ne Osanobua ru ne ima i yevbe orukhọ ọghe Adam. Adeghẹ emwa nibun ya uhunmwu ye ẹmwẹ orukhọ ọghe orhunmwu ọkpa, inu ghi nọ ne ẹse ne kpataki* ọghe Osanobua kevbe ẹse ọhẹ ọghẹe ne ima miẹn la obọ orhunmwu ọkpa nọ vbe ru ẹse ne kpataki* ne ima, nọ re Jesu Kristi? Ẹ i mwẹ emwa nibun ma miẹn ere vbọ! 16 Deba ọni, alughaẹn rre ẹse ọhẹ nọ ke obọ Osanobua rre kevbe emwi na la orukhọ ọghe orhunmwu ọkpa miẹn. Rhunmwuda orukhọ ne orhunmwu ọkpa ru, a keghi bu abe gbe emwa nagbọn, sokpan, ẹse ne Osanobua ru ne emwa, ọre nọ na ka emwa ye emwa ata agharhemiẹn wẹẹ emwa orukhọ ẹre iran khin. 17 Rhunmwuda orukhọ ọghe orhunmwu ọkpa, uwu keghi suẹn gha khaevbisẹ. Inu ghi nọ ne emwa ni miẹn ẹse ne kpataki* ne wọrhọwọrhọ ọghe Osanobua, ne Osanobua vbe rhie ẹse ọhẹ ọghẹe na, nọ zẹe ighẹ iran do khian emwa ata? Ẹ i mwẹ iran ma gha rrọọ, iran ghi vbe gha khaevbisẹ la obọ orhunmwu ọkpa rre, nọ re Jesu Kristi!

18 Orukhọ ọkpa ne ọmwa ru, keghi ya emwa hia khian ena bu ohiẹn uwu gbe. Erriọ vbe ye, emwi esi ọkpa ne ọmwa ru, keghi ya emwa ughughan khian ena ka ye emwa ata, ne arrọọ khian sẹ ọre obọ. 19 Zẹvbe ne iyenhọ ọghe orhunmwu ọkpa ya emwa nibun khian emwa orukhọ, erriọ ẹre ahẹnmwẹ ọghe orhunmwu ọkpa gha vbe ya emwa nibun khian emwa ata vbe odaro Osanobua. 20 Te a mu Uhi rre, na mieke na rẹn vbene emwa ru orukhọ sẹ hẹ. Sokpan, zẹvbe ne emwa nagbọn ya gha ru orukhọ sayọ, erriọ ẹre ẹse ne kpataki* ọghe Osanobua ya gha mu otọ yọ. 21 Rhunmwuda vbọ khin? Zẹvbe ne orukhọ ya gha khaevbisẹ, ọ na vbe rhie uwu lele egbe, erriọ ẹre ẹse ne kpataki* ọghe Osanobua khian vbe gha khaevbisẹ, a ghi ka emwa ye emwa ata, ẹghẹ nii, arrọọ ọghe etẹbitẹ ghi sẹ iran obọ, la obọ Enọyaẹnmwa e Jesu Kristi.

6 De emwi ne ima khian ghi ta? Te ima khian ghi ye gha fuẹn vbe uwu orukhọ ra, ne ẹse ne kpataki* ọghe Osanobua mieke na gha mu otọ yọ ra? 2 Hiehie! Ugbẹnvbe a miẹn wẹẹ, ma wu nẹ vbọ gha de ọghe orukhọ, vbe ima khian ghi ye gha fuẹn vbe uwu ẹre ba? 3 Ra, wa ma rẹn wẹẹ, ma hia ni dinmwiamẹ ye uwu e Kristi Jesu, uwu nọ wu ẹre a vbe dinmwi ima yi ra? 4 Na na dinmwi ima ye uwu nọ wu nii, te a ghi ree ima ba irẹn, ne ẹdagbọn ima mieke na khian ọghe ọgbọn, zẹvbe ne Evbavba huẹn e Kristi kpaegbe vbe idin lekpa uyi ọghẹe. 5 Adeghẹ ima gu e Kristi rrọọ vbe akugbe rhunmwuda ne ima na wu vbene irẹn wu, ma gha vbe gu ẹre gha rrọọ vbe akugbe rhunmwuda ne ima khian na rhiọ kpaegbe vbene irẹn vbe rhiọ kpaegbe. 6 Rhunmwuda, ma rẹnrẹn wẹẹ, ẹghẹ na na kan rẹn mu erhan, a vbe kan uyinmwẹ nẹdẹ nọ te gua ima obọ ro ba ẹre, ne egbe ima nọ vuọn ne orukhọ ghẹ ghi kha yan ima, ẹghẹ nii, ma i khian ghi gha re eviẹn orukhọ. 7 Rhunmwuda, ọmwa gha wu nẹ, a faẹn fua nẹ vbe obọ orukhọ nọ ru.*

8 Yevbesọni, adeghẹ ima deba e Kristi wu, ma yayi wẹẹ ima gha vbe gu ẹre gha rrọọ. 9 Rhunmwuda, ma rẹnrẹn wẹẹ, ugbẹnvbe a huẹn e Kristi kpaegbe nẹ, ẹ i khian ghi werriegbe wu; uwu i ghi mwẹ ẹtin vbe egbe ẹre hiehie. 10 Rhunmwuda, te irẹn wu uhukpa, nọ mieke na wabọ orukhọ rua, ẹ i khian ghi vbe dọlegbe wu. Sokpan, te irẹn ghi rrọọ nian, nọ mieke na gha ru emwi ne Osanobua hoo. 11 Erriọ vbe ye, ọ khẹke ne uwa vbe ka egbe uwa ye emwa ni wulo, vbọ gha de ọghe orukhọ, sokpan, wa ghi gha re emwa ni rrọọ, ne uwa mieke na gha ru emwi ne Osanobua hoo, zẹvbe emwa ni lele Kristi Jesu.

12 Nọnaghiyerriọ, wa ghẹ gi orukhọ gha khaevbisẹ vbe egbe uwa, na ghẹ do miẹn wẹẹ, emwi ne egbe uwa gualọ ẹre uwa ghi ru. 13 Wa ghẹ zẹ egbe uwa obọ ne orukhọ, ne uwa yae gha ru emwi dan, sokpan, wa zẹ egbe uwa obọ ne Osanobua zẹvbe emwa ni te wu, na ghi do huẹn kpaegbe; wa ghi vbe zẹ egbe uwa obọ ne Osanobua, ne uwa yae gha ru emwi esi. 14 Rhunmwuda, ọ ma khẹke ne orukhọ gha khaevbisẹ yan uwa, ugbẹnvbe a miẹn wẹẹ, wa i ghi rre ototọ uhi, sokpan, ototọ ẹse ne kpataki* ọghe Osanobua ẹre uwa ghi ye.

15 Ugbẹnvbe a miẹn wẹẹ, ma i ghi rre ototọ uhi, sokpan, ototọ ẹse ne kpataki* ọghe Osanobua ẹre ima ghi ye, te ima khian ghi rhunmwuda ọni gha ru orukhọ ra? Hiehie! 16 Wa ma rẹn wẹẹ, adeghẹ uwa na zẹ egbe obọ ne ọmwaikọmwa zẹvbe eviẹn, wa na vbe gha họn ẹmwẹ nẹẹn, eviẹn ọmwa nii ẹre uwa khin? Adeghẹ uwa na gha re eviẹn orukhọ, uwu ẹre ọ khian kẹrikian, sokpan, adeghẹ eviẹn Osanobua ẹre uwa khin, wa na vbe gha họn ẹmwẹ nẹẹn, wa ghi gha re emwa ata. 17 Agharhemiẹn wẹẹ, eviẹn orukhọ ẹre uwa te khin, I kpọnmwẹ Osanobua wẹẹ, banbanna nian, te uwa ghi ya ekhọe hia lele emwi na ma uwa ẹre. 18 Ugbẹnvbe a miẹn wẹẹ, a fan uwa hin obọ orukhọ rre nẹ, eviẹn iruemwiẹse ẹre uwa ghi khin. 19 Ẹmwẹ ne emwa gha rẹn otọ re, ẹre I tama uwa na, rhunmwuda orukhọ nọ rre uwa egbe; zẹvbe ne uwa ka ya zẹ egbe uwa obọ, ne uwa na do gha re eviẹn ọghe emwi osọnnọ kevbe emwi dan, ne uwa mieke na gha ru emwi dan, te ọ vbe khẹke nian ne uwa zẹ egbe uwa obọ zẹvbe eviẹn ọghe iruemwiẹse, ne uwa mieke na gha ru emwi nọhuanrẹn. 20 Ẹghẹ ne uwa na gha re eviẹn orukhọ, esa ma gha rrọọ ne uwa ya gha ru emwi esi.

21 Sokpan, de ere ne uwa ghi miẹn vbe uyinmwẹ ne uwa ghaa yin vbe ẹghẹ nii? Nian, te ekhue emwi ne uwa te ka ru ghi mu uwa. Uwu ọre okiekie avbe emwi vberriọ. 22 Sokpan, ugbẹnvbe a miẹn wẹẹ, a fan uwa nẹ vbe obọ orukhọ, kevbe wẹẹ, eviẹn Osanobua ẹre uwa ghi vbe khin, te uwa ghi mwẹ uyinmwẹ nọhuanrẹn; arrọọ ọghe etẹbitẹ ẹre uwa khian lae miẹn. 23 Rhunmwuda, uwu ẹre a ya ha osa orukhọ, sokpan, ẹse ọhẹ ne Osanobua rhie ne ọmwa, ọre arrọọ ọghe etẹbitẹ nọ la obọ Enọyaẹnmwa e Kristi Jesu rhie ne ima.

7 Etẹn, wa ma rẹn wẹẹ, ọmwa ghaa rre agbọn, ẹre Uhi na mwẹ ẹtin vbe egbe ẹre ra? (Iran ni rẹn uhi ẹre I gu guan na.) 2 Vbe igiemwi, okhuo nọ rọnmwẹ ọdọ nẹ, uhi dee ẹre ginna ọdọ ẹre vbe ọdọ ẹre ghaa rre agbọn; sokpan, adeghẹ ọdọ ẹre na wu, a ghi faẹn hin uhi ọghe ọdọ ẹre rre. 3 Adeghẹ okhuo nii na ya rọnmwẹ okpia ọvbehe vbene ọdọ ẹre na ye rre agbọn, te ọ ru oghẹ* vberriọ. Sokpan, adeghẹ ọdọ ẹre na wu, ẹ i ghi rre ototọ uhi ọghe ọdọ ẹre, ẹghẹ nii, ọ gha rọnmwẹ ọdọ ọvbehe, ọ ma ru oghẹ.*

4 Erriọ vbe ye, etẹn mwẹ, egbe Kristi ya uwa khian eni wulo nẹ vbọ gha de ọghe Uhi. Nian, ọghe ọmwa nii na huẹn kpaegbe vbe idin ẹre uwa ghi khin, ne ima mieke na gha mọ ọmọ esi ne Osanobua. 5 Rhunmwuda, ẹghẹ ne ima na gha ru emwi ne egbe ima gualọ, Uhi keghi ya ima rẹn wẹẹ, emwi dan ne egbe ima gualọ, ẹre ọ ya ima ru orukhọ; orukhọ ẹre ọ si uwu. 6 Nian, a fannọ ima hin obọ Uhi rre nẹ, rhunmwuda, ma wulo nẹ vbọ gha de ọghe emwi ni te mu idobo ye ima egbe, ne ima mieke na do gha re eviẹn Osanobua ne orhiọn nọhuanrẹn dia, ẹ i re eviẹn ne uhi na gbẹnnẹ yotọ dia.

7 De emwi ne ima khian ghi ta? Te ima khian ghi kha wẹẹ, orukhọ ẹre nene Uhi ghi khin ra?* Hiehie! Vbene ẹmwata, Uhi ẹre ọ ya mwẹ rẹn emwi ne orukhọ khin. Vbe igiemwi, I i ghẹ te rẹn wẹẹ orukhọ nọ, ne aro ọmwa gha wu ye emwi ẹrrẹe, akpawẹ Uhi ma kha wẹẹ: “Ghẹ ya aro ye emwi ẹrrẹe.” 8 Sokpan, orukhọ keghi miẹn ehe la la mwẹ egbe rhunmwuda iyi na, nọ ghi ya mwẹ rẹn wẹẹ te aro mwẹ wu ye emwi ughughan. Ẹghẹ ne uhi ma na gha rrọọ, orukhọ i vbe rrọọ. 9 Uhiẹn, mẹ ka gha rre agbọn dee yi vbe ẹghẹ ne uhi ma na gha rrọọ. Sokpan, uhi ghi rre, orukhọ keghi werriegbe rhiọ kpaegbe, mẹ na ghi wu. 10 I na do bẹghe ẹre wẹẹ, iyi nọ te khẹke nọ ya mwẹ gha rre agbọn keghi gbe mwẹ ruan. 11 Orukhọ keghi miẹn ehe la la mwẹ egbe, ọ na loo iyi nii ya mu mwẹ rẹrẹ, ọ na vbe gbe mwẹ ruan. 12 Nene Uhi tobọre, emwi nọhuanrẹn nọ, emwi nọhuanrẹn ẹre nene iyi vbe khin, ọ gbae, erriọ ẹre ọ vbe ya maan.

13 Te ọni ghi rhie ma wẹẹ, emwi nọ maan ẹre ọ ghi si uwu nọ gbe mwẹ ra? Hiehie! Sokpan, orukhọ ẹre ọ si uwu nọ gbe mwẹ, ne emwa mieke na rẹn emwi ne orukhọ gele khin, ọ ghi vbe dewarorua wẹẹ irẹn ẹre ọ lekpa emwi nọ maan si uwu nọ gbe mwẹ. Iyi nii ẹre ọ ghi yae dewarorua wẹẹ, orukhọ i zẹdẹ maan hiehie. 14 Ma rẹnrẹn wẹẹ, orhiọn nọhuanrẹn ẹre Osanobua loo ro ya rhie nene Uhi ne ima,* sokpan, nọ ne imẹ, ọmwa kẹkan na khiẹn ne orukhọ ẹre I khin. 15 Mẹ ma ghi rẹn emwi ne imẹ ru. Rhunmwuda, ẹ i re emwi nọ rrọ mwẹ ekhọe ẹre I gele ru, sokpan, emwi nọ sọnnọ mwẹ ẹre I ru. 16 Vbọrhirhighayehẹ, I rẹnrẹn wẹẹ Uhi te maan, sokpan, emwi ne I ma hoo ne I ru, ẹre I ye ru. 17 Ọni nọ wẹẹ, ẹ i re imẹ ẹre ọ wa gele ru avbe emwi na, sokpan, orukhọ nọ rrọ mwẹ egbe ẹre ọ ya mwẹ khian. 18 I rẹnrẹn wẹẹ, ọmwa orukhọ ẹre I khin, emwi nọ maan rhọkpa i rre uwu imẹ; rhunmwuda, agharhemiẹn wẹẹ emwi nọ maan te yẹẹ mwẹ na ru, I i sẹtin ru ẹre. 19 Mẹ i sẹtin ru emwi nọ maan ne I te hoo ne I ru, sokpan, emwi dan nẹi te rrọ mwẹ orhiọn, ẹre I ru. 20 Adeghẹ emwi ne I ma hoo ne I ru, ẹre I ru, ọni rhie ma wẹẹ, ẹ i re imẹ ẹre ọ ru ẹre, sokpan, orukhọ nọ rrọ mwẹ egbe nọ.

21 Emwi ne imẹ ghi do bẹghe na khin: I ghaa hoo ne I ru emwi esi, emwi dan ẹre ekhọe mwẹ gu mwẹ zẹ iro ẹre. 22 Ọghe ne ẹmwata, vbe uwu ekhọe mwẹ, uhi Osanobua te wa yẹẹ mwẹ, 23 sokpan, ọ mwẹ uhi ọvbehe nọ rre uwu egbe mwẹ nọ gu uhi nọ rre ekhọe mwẹ khọn, nọ ghi do ya mwẹ khian ọviẹn ọghe uhi orukhọ nọ rrọ mwẹ egbe. 24 Ọ sẹ mwẹ sẹ egbe mwẹ! De ọmwa nọ khian miẹn mwẹ fan vbe obọ egbe mwẹ na, nọ khian ya si mwẹ gbua? 25 I kpọnmwẹ Osanobua wẹẹ, ọ loo Enọyaẹnmwa e Jesu Kristi ya miẹn mwẹ fan! Nọnaghiyerriọ, ọviẹn ọghe uhi Osanobua ẹre I khin vbe ekhọe mwẹ, sokpan, egbe mwẹ na gha re ọviẹn ọghe uhi orukhọ.

8 Nọnaghiyerriọ, a i khian bu ohiẹn gbe emwa ni gu e Kristi Jesu rrọọ vbe akugbe. 2 Rhunmwuda, uhi ọghe orhiọn nọ ya ọmwa mwẹ arrọọ vbe a ghaa gu e Kristi Jesu rrọọ vbe akugbe, fan ruẹ nẹ vbe obọ uhi ọghe orukhọ kevbe ọghe uwu. 3 Emwi ne Uhi e Mozis ma sẹtin ru rhunmwuda ne emwa nagbọn na re emwa orukhọ kevbe ni vburriẹ, ẹre Osanobua ru, nọ na gie Ovbi ẹre gha dee, nọ mu akpa emwa nagbọn ni mwẹ orukhọ yọ, nọ do wabọ orukhọ rua; erriọ ẹre a ya bu ohiẹn gbe orukhọ nọ rre egbe ọmwa, 4 ne ima mieke na gha ru emwi nọ khẹke zẹvbe ne Uhi khare, ọni ọre ima nẹi ru emwi vbene egbe ima gualọ, sokpan, orhiọn nọhuanrẹn ẹre ọ dia ima ya ru emwi ne ima ru. 5 Rhunmwuda, emwa ni ru emwi ne egbe iran gualọ, ẹre ọ rhie ekhọe ye emwi ne egbe gualọ; sokpan, emwa ne orhiọn nọhuanrẹn loo, ẹre ọ rhie ekhọe ye emwi ne orhiọn nọhuanrẹn gualọ. 6 Adeghẹ ọmwa na rhie ekhọe ye emwi ne egbe gualọ, uwu ẹre ọ kẹrikian, sokpan, adeghẹ emwi ne orhiọn nọhuanrẹn gualọ ẹre ọmwa rhie ekhọe yi, arrọọ ghi sẹ ọre obọ, ọ ghi vbe gha mwẹ ọfunmwegbe; 7 rhunmwuda, ọmwa gha rhie ekhọe ye emwi ne egbe gualọ, ọmwa nii ghi khian oghian Osanobua, rhunmwuda, egbe i lele uhi Osanobua, ẹghẹ ọkpa i rrọọ nọ khian vbe ya sẹtin lelẹe. 8 Nọnaghiyerriọ, iran ni ru emwi ne egbe iran gualọ, i khian sẹtin ya ẹko rhiẹnrhiẹn Osanobua.

9 Sokpan, nọ ne uwa, wa i ru emwi ne egbe uwa gualọ, sokpan, emwi ne orhiọn Osanobua gualọ ẹre uwa ru, ọni ọre deghẹ orhiọn Osanobua na gele gha rre uwu uwa. Sokpan, adeghẹ ọmwaikọmwa i mwẹ orhiọn e Kristi, ọmwa vberriọ i re ọghe Kristi. 10 Sokpan, adeghẹ uwa vbe Kristi na gha rrọọ vbe akugbe, orhiọn ghi ya uwa gha rrọọ rhunmwuda iruemwiẹse, ọ gha khọnrẹn ne egbe uwa wu rhunmwuda orukhọ. 11 Adeghẹ orhiọn ọmwa nii nọ huẹn Jesu kpaegbe na gha rre uwu uwa, ọmwa nii nọ huẹn Kristi Jesu kpaegbe gha vbe ya egbe uwa nọ sẹtin wu khian enọ ghi rrọọ, lekpa orhiọn rẹn nọ rre uwu uwa.

12 Rhunmwuda ọni, etẹn, ọ ma khẹke ne ima kue ne egbe ima gha loo ima ya ru emwi nọ gualọ; 13 rhunmwuda, adeghẹ uwa na gha ru emwi ne egbe uwa gualọ, ẹ i mwẹ uwa ma wulo; sokpan, adeghẹ uwa na kue ne orhiọn nọhuanrẹn ru iyobọ ne uwa ya gbe ẹre rua, ighẹ emwi ne egbe uwa ru, wa ghi gha rrọọ. 14 Emwa hia ne orhiọn Osanobua loo, ivbi Osanobua ẹre iran gele khin. 15 Rhunmwuda, orhiọn ne Osanobua rhie ne uwa, ma ya uwa khian eviẹn, ne uwa werriegbe do gha mu ohan, sokpan, orhiọn ne Osanobua rhie ne uwa keghi re nọ ya uwa khian emwa ne Osanobua ya ye emọ; orhiọn na ẹre ọ ya ima datu wẹẹ: “Abba,* Evbavba!” 16 Orhiọn nii ẹre ọ sẹ osẹ ma orhiọn ima wẹẹ, ivbi Osanobua ẹre ima khin. 17 Ugbẹnvbe a miẹn wẹẹ, ivbi Osanobua ẹre ima khin, arevbukhu nọ mwamwa khẹ ivbi ẹre gha vbe sẹ ima obọ, ma ghi vbe gu e Kristi ghae vbe arevbukhu ọghẹe. Vbọrhirhighayehẹ, te ima gha ka deba e Kristi rri oya, ne ima mieke na vbe ghae vbe uyi na khian mu ye ọre egbe.

18 Mẹ ghee ẹre wẹẹ, oya ne ima re vbe ẹghẹ na nian, ma sẹ emwi rhọkpa vbe a gha yae gie uyi nọ gha rhiegbe ma vbe egbe ima. 19 Emwi hia na yi wa rhie aro ye odẹ gha khẹ ẹghẹ ne Osanobua khian ya viọ ivbi ẹre ladian na miẹn. 20 A keghi ya emwi na yi khian nẹi mwẹ esa, agharhemiẹn wẹẹ, ẹ i re erriọ ẹre emwi na yi te gualọe yi; ọmwa nọ ya ehia khian nẹi mwẹ esa, ẹre ọ kue yọ nọ gha yerriọ, sokpan, ọ na ru ẹre ne iran gha mwẹ emwi ne iran ya aro yi, 21 ọni nọ wẹẹ, emwi na yi nọ te re eviẹn ọghe ọkẹkua ghi khian ena fan fua, iran ghi do gha mwẹ afanvbirri nọ hin usi ne ivbi Osanobua mwẹ. 22 Rhunmwuda, ma rẹnrẹn wẹẹ, emwi na yi hia wa koko khiẹkhiẹ egbe, erriọ ẹre iran vbe ya rre uwu obalọ do sẹ ebanban. 23 Deba ọni, ma tobọ ima ni mwẹ orhiọn nọhuanrẹn nọ re emwi okaro* nọ sẹ ima obọ vbe uwu emwi hia ne Osanobua khian ya ru ima ẹse, vbe khiẹkhiẹ egbe, zẹvbe ne ima ya rhie aro ye odẹ gha khẹ ẹghẹ ne Osanobua khian ya ya ima ye emọ, ẹghẹ nii, ọ ghi fan ima hin egbe ọghe ima na rre, rhunmwuda, Jesu dẹ ima werriegbe nẹ. 24 Ẹghẹ na ya miẹn ima fan, ẹre ima ya suẹn gha ya aro ye afiangbe na; sokpan, adeghẹ emwi na ya aro yi na ghi sẹ obọ nẹ, ọni i ghi re emwi na ya aro yi. Wa he vbe miẹn ọmwa nọ rhie aro ye odẹ gha khẹ emwi nọ rre ọre obọ nẹ ra? 25 Sokpan, adeghẹ ima na ya aro ye emwi ne ima ma he bẹghe, ẹghẹ nii, ma ghi fẹko zin egbe, ma ghi vbe rhie aro ye odẹ gha khẹ ọre.

26 Erriọ vbe ye, orhiọn nọhuanrẹn vbe ru iyobọ ne ima, vbe ẹghẹ ne ima ma ya wegbe; nọ ya baa ọre wẹẹ, ugbẹnso, ma i rẹn emwi ne ima khian nọ vbe erhunmwu vbene ọ te khẹke. Sokpan, orhiọn nọhuanrẹn ẹre ọ ghi rinmwian ne ima, ọ ghi do gu ima ta emwi nọ da ima vbe orhiọn, ne ẹmwẹ ne unu ma sẹtin ta ladian. 27 Osanobua nọ bẹghe emwi nọ rre ekhọe, rẹn otọ emwi ne orhiọn nọhuanrẹn we ne irẹn ru ne emwa ni huanrẹn, rhunmwuda, emwi hia ne orhiọn nọhuanrẹn nọ, gua iho ọghe Osanobua ro.

28 Ma rẹnrẹn wẹẹ, te emwi hia ne Osanobua ru gua egbe ro; emwi nọ si ẹre ne Osanobua na ru ẹre vberriọ, ọre rhunmwuda umamwẹ ọghe emwa ni hoẹmwẹ ọnrẹn, ọni ọre emwa na zẹ zẹvbe nọ gua iho ọghẹe ro; 29 rhunmwuda, emwa ne irẹn ka wa gha yẹrẹro, ẹre irẹn zẹ yotọ, ne iran do gha yevbe Ovbi irẹn, ne Ovbi ẹre mieke na gha re ọmọ ọdiọn vbe uwu ẹbu etẹn nibun. 30 Yevbesọni, emwa ne irẹn zẹ, ẹre irẹn tiere; emwa ne irẹn tiere, ẹre irẹn vbe ka ye emwa ata. Emwa ne irẹn ka ye emwa ata, ẹre irẹn vbe mu uyi ye ọre egbe.

31 Nọnaghiyerriọ, vbe ima khian ghi miẹn ta vbekpa ena hia? Adeghẹ Osanobua rre ima iyeke, de ọmwa nọ gha sẹtin mu aro daa ima? 32 Ugbẹnvbe ọ sẹtin zẹ Ovbi ẹre obọ ne ima, nọ mieke na yae fiohan ne ima hia, wa ma yayi wẹẹ, ọ gha vbe ya emwi nikẹre hia ru ima ẹse ra? 33 Gha nọ, nọ gha sẹtin ba emwa ne Osanobua zẹ ifiẹzọ? Osanobua tobọre ẹre ọ tae wẹẹ, irẹn ka iran ye emwa ata nẹ. 34 De ọmwa nọ khian sẹtin bu ohiẹn gbe iran? E Kristi Jesu ọre ọmwa nọ wu, gberra ọni, a na vbe huẹn ọnrẹn kpaegbe. Vbene a guan na nian, ọ rre obọ erha ọmwa ọghe Osanobua, irẹn ẹre ọ vbe rinmwian ne ima.

35 De ọmwa nọ gha sẹtin wannọ ima hin ahoẹmwọmwa ọghe Kristi rre? Orueghe nọ ra, ọlọghọmwa nọ ra, ukpokpo nọ ra, ohanmwẹ nọ ra, a ma miẹn ukpọn rhuan* nọ ra, ẹbe nọ ra, ra umozo? 36 Zẹvbe ne Ebe Nọhuanrẹn khare: “Ẹghẹ hia ẹre ima ya rre agbanmwẹ idin rhunmwuda ruẹ; te emwa ghi vbe ghee ima zẹvbe ohuan na ra ya gbelua.” 37 Sokpan, vbe uwu ena hia, te ima khian khọnmiotọ fẹfẹfẹ, vbe ẹtin ọmwa nii nọ hoẹmwẹ ima. 38 Rhunmwuda, vbe nai na gbe awawẹ, I wa rẹn wẹẹ, emwi rhọkpa i khian sẹtin wannọ ima hin ahoẹmwọmwa ọghe Osanobua rre, ọre uwu nọ, ra arrọọ, ra avbe odibosa, ra arriọba, ra emwi ni rrọọ nian, ra emwi ni dee vbe odaro, ra ẹtin, 39 ra uyomwẹ, ra udinmwimwẹ, ra emwi ke emwi na ghi yi nẹ. Ena rhọkpa i khian sẹtin wannọ ima hin ahoẹmwọmwa ọghe Osanobua rre, nọ lekpa Enọyaẹnmwa e Kristi Jesu mwẹ ghee ima.

9 Zẹvbe ọrhuanegbe Kristi, ẹmwata ẹre I ta; I ma ta ohoghe. Ekhọe mwẹ ne orhiọn nọhuanrẹn dia vbe kue yọ wẹẹ, ẹmwata ẹre I ta, 2 vbe I gha kha wẹẹ, ekhọe mwẹ vuọn ne akhiẹ kevbe obalọ nẹi fo. 3 Ọ gha te wa gha maan, akpawẹ imẹ ẹre a wannọ hin egbe Kristi rre zẹvbe ọmwa na fi ẹre unu, rhunmwuda etẹn mwẹ ne ivbi ẹvbo mwẹ, 4 ni re Ivbi Izrẹl. Iran ẹre Osanobua ya ye emọ, ọ na vbe mu uyi ye iran egbe. Iran ẹre ọ vbe gu ta ile, ọ na yi Uhi ne iran, ọ na vbe kie odẹ ne iran, ne iran gha rhie ugamwẹ nọhuanrẹn nẹẹn. Iran ẹre ọ vbe ru eyan ma. 5 Uniẹn ọghe avbe erha ima odede ẹre iran la rre, uniẹn iran ẹre Kristi vbe la rre vbe a biẹ ọre vbe agbọn na. Osanobua nọ khaevbisẹ yan emwi hia, ẹre a gha rhie urhomwẹ na vbe ẹdẹdẹmwẹdẹ. Isẹ.

6 Sokpan, ẹ i re te I ya ọna kha wẹẹ, te ẹmwẹ Osanobua de fua. Rhunmwuda, ẹ i re emwa hia ni la uniẹn Izrẹl rre, ẹre ọ gele re “Ivbi Izrẹl.” 7 Deba ọni, ẹ i re iran hia ẹre ọ gele re ivbi Ebraham rhunmwuda ighẹ iran ke uniẹn Ebraham* rre; rhunmwuda, Osanobua tama Ebraham wẹẹ, “Emọ* ni ke uniẹn Aizik rre, ẹre a khian ka ye ivbuẹ.” 8 Ọni rhie ma wẹẹ, ẹ i re ivbi Ebraham hia ẹre ọ gele re ivbi Osanobua, sokpan, emọ na biẹlẹ rhunmwuda eyan ne Osanobua yan ma Ebraham, ẹre a ka ye ivbi Ebraham.* 9 Eyan ne Osanobua yan ma Ebraham na khin: “Vbenian vbe ukpo nọ dee, I gha werriegbe rre, ẹghẹ nii, e Sera ghi biẹ ọmokpia.” 10 Ẹ i vbe re ọni ọkpa, erriọ ẹre ọ vbe gha ye vbe ẹghẹ ne Rebeka ya gha hanmwa ivin eva ne Aizik ne erha mwa odede; 11 Osanobua keghi rhie ẹre ma wẹẹ, ẹ i re iwinna ne ọmwa ru, ẹre irẹn ya zẹ ọmwa, sokpan, ọmwa ne irẹn hoo ne irẹn zẹ, ẹre irẹn zẹ. Ọni ẹre ọ si ẹre na na miẹn wẹẹ, a te biẹ iran eva, vbene iran ma na he ru emwi esi rhọkpa ra emwi dan, 12 Osanobua keghi tama iye iran wẹẹ: “Nọdiọn ẹre ọ khian gha re ọviẹn ọghe nekherhe.” 13 Zẹvbe na gbẹn ọnrẹn yotọ vbe Ebe Nọhuanrẹn, Osanobua khare wẹẹ: “I hoẹmwẹ e Jekọb, sokpan, I ma hoẹmwẹ Isọ.”*

14 Nọnaghiyerriọ, te ima ghi ya ọna kha wẹẹ, te Osanobua ru emwi nọ ma gba ra? Hiehie! 15 Rhunmwuda, irẹn tama e Mozis wẹẹ: “Ọmwaikọmwa ne I hoo ne I tohan rẹn, ẹre I tohan rẹn, ọmwaikọmwa ne I vbe hoo ne I lekhue ẹre, ẹre I lekhue ẹre.” 16 Nọnaghiyerriọ, ẹ i re rhunmwuda emwi ne ọmwa hoo, ra ẹrhiọn ne ọmwa loo ro,* sokpan, obọ Osanobua nọ mwẹ itohan ẹre ọ ye. 17 Vbe ebe nọhuanrẹn, Osanobua keghi tama e Fero wẹẹ: “Emwi nọ si ẹre ne I na ye sẹ ruẹ rae ọre wẹẹ, ne I miehe na la egbe ruẹ rhie ẹtin mwẹ ma, kevbe ne I miehe na ya eni mwẹ khian ena rẹnrẹn vbe uhunmwu otagbọn hia.” 18 Ọni rhie ma wẹẹ, ọmwaikọmwa ne Osanobua hoo nọ tohan rẹn, ẹre ọ tohan rẹn, sokpan, ọmwaikọmwa nọ hoo nọ ze vbe udu, Osanobua ghi rhie ẹghẹ nẹẹn nọ ya ze vbe udu.

19 Nọnaghiyerriọ, wa sẹtin gha roro ẹre wẹẹ: “Vbọ ghi zẹ ne Osanobua na ye bẹghe emwi ne ima ma ru ẹse? Irẹn gha tae nẹ wẹẹ erriọ ẹre irẹn hoo ne emwi gha ye, ọmwa rhọkpa gha sẹtin fi ẹre werriẹ ra?” 20 Sokpan, wẹ ne ọmwa kẹkan, vbua ka egbuẹ yi, ne u na zẹ ẹmwẹ wanniẹn Osanobua?* Emwi na ya obọ ma vbe nọ ọmwa nọ maẹn wẹẹ: “Vbọzẹ ne u na ma mwẹ vbenian yi?” 21 Wẹ ma rẹn wẹẹ, ọmakhe mwẹ asẹ yan obuẹ nọ ya ma akhe ra? Ọ gha ghi fuẹn obuẹ yotọ nẹ, ọ sẹtin fian vbọ ya ma akhe na loo ye emwi nọ hin usi; ọ sẹtin vbe fian vbọ ya ma akhe na loo ye emwi nọ ma hin usi. 22 Adeghẹ Osanobua zin egbe vbe egbe emwa ni ru emwi nọ sọnnọ ọnrẹn,* ni re emwa nọ khẹke na guọghua, ọ na vbe gha mu ẹmwẹ iran wuo egbe, agharhemiẹn wẹẹ ọ te hoo nọ rhie ohu ẹre kevbe ẹtin ẹnrẹn ma, emwi dan ma nọ? 23 Emwi dan ma vbe nọ, adeghẹ te Osanobua ru ọna, nọ ya rhie uyi ọghẹe nọkhua ma emwa ne irẹn tohan rẹn,* ni re emwa ne irẹn mwamwa uyi nii khẹ ke otọ gha dee? 24 Ma na, ẹre irẹn mwamwa uyi nii khẹ, ma ne irẹn tiere vbe uwu ẹbu Ivbi e Ju kevbe ivbi agbẹnvbo ọvbehe. 25 Te ọ vbe yevbe ẹmwẹ nọ tae vbe ebe Hosia, nọ na wẹẹ: “Emwa nẹi te re emwa mwẹ, I gha tie iran ‘emwa mwẹ,’ okhuo ne I ma te hoẹmwẹ ọnrẹn, I gha tie ẹre ‘ne I hoẹmwẹ ọnrẹn’; 26 eke na na tama iran wẹẹ, ‘Wa i re emwa mwẹ,’ evba nii ẹre a khian na tie iran ‘ivbi Osanobua nọ rrọọ.’”

27 Yevbesọni, Aizaia keghi ya ẹmwẹ na wewe vbekpa Izrẹl: “Agharhemiẹn wẹẹ Ivbi Izrẹl bun vbe na ghee ikpekhae ni rre ọkpẹn okun, ibozẹghẹ ẹre a khian miẹn fan vbe uwu iran. 28 Rhunmwuda, e Jehova* gha do bu ohiẹn agbọn na, ọ ghi mu olọ gbe ohiẹn nọ buru, ọ ghi vbe tae ẹgiẹgiẹ.”* 29 Te ọ vbe yevbe ẹmwẹ ne Aizaia tae yotọ, nọ na wẹẹ: “Vbe ẹ i re ne Jehova* ne Osa ọghe ivbiyokuo na sẹ uniẹn* ọghe ima eso rae ne ima, emwi nọ rruan e Sọdọm ẹre ọ gha te rruan ima, te ima gha te vbe yevbe Gomorra.”

30 Adeghẹ erriọ ghi nọ, vbe ima khian ghi kha hẹ nian? Ọni nọ wẹẹ, ivbi agbẹnvbo ọvbehe keghi do khian emwa na ka ye emwa ata rhunmwuda amuẹtinyan ọghe iran, agharhemiẹn wẹẹ iran ma winna yọ; 31 sokpan, nọ ne Ivbi Izrẹl, agharhemiẹn wẹẹ iran te gha hia ne iran gha lele uhi, ne iran mieke na khian emwa ata, iran na ye baeku. 32 Vbọsiẹ? Rhunmwuda, iran ma gha mwẹ amuẹtinyan, sokpan, iran na gha roro ẹre wẹẹ, emwi ne iran ru, ẹre a khian ya ka iran ye emwa ata. Iran keghi rrua owẹ vbe “okuta nọ rrua ọmwa owẹ”; 33 zẹvbe ne Ebe Nọhuanrẹn tae, nọ na wẹẹ: “Ghee oo! I gha mu okuta nọ rrua ọmwa owẹ ye Zaiọn kevbe okuta nọkhua nọ mu ọmwa gbe otọ, sokpan, ọmwa nọ mu ẹtin yan rẹn i khian gbe I ma rẹn.”

10 Etẹn, ekhọe mwẹ hia ẹre I ya hoo ne iran miẹn fan, ọni ẹre I vbe rinmwian Osanobua re. 2 Rhunmwuda, mẹ gha sẹtin sẹ osẹ yọ wẹẹ, iran te hia ne iran gha ya oyaya ga Osanobua, sokpan, te ọ ma ghi wa gua irẹnmwi ọghe Osanobua ro. 3 Rhunmwuda ne iran ma na rẹn emwi nọ khẹke vbe odaro Osanobua, iran kegha hia ne iran mu uhi obọ iran gbọọ, rhunmwuda ọni, iran ma ghi gha ru emwi nọ gha ya Osanobua ka iran ye emwa ata. 4 E Kristi ẹre ọ mu Uhi nii sẹ ufomwẹ, na mieke na miẹn wẹẹ, ọmwaikọmwa ghaa mwẹ amuẹtinyan,* a ghi kae ye ọmwa ata.

5 Emwi ne Mozis gbẹn na khin vbe nọ dekaẹn vbene ọmwa ya re ọmwa ata hẹ vbe ọ ghaa lele Uhi: “Ọmwa nọ ru avbe emwi na, gha lekpa iran gha rrọọ.” 6 Sokpan, vbe nọ dekaẹn vbene ọmwa ya re ọmwa ata hẹ vbe ọ ghaa mwẹ amuẹtinyan, Ebe Nọhuanrẹn khare wẹẹ: “Ghẹ tae vbe ekhọe ruẹ wẹẹ, ‘De ọmwa nọ khian yo ẹrinmwi?’ Ọni nọ wẹẹ, de ọmwa nọ khian ya mu e Kristi tuorre? 7 Ra, ‘De ọmwa nọ khian gha rrie uwu uvun nẹi mwẹ otọ?’ Ọni nọ wẹẹ, de ọmwa nọ khian ya huẹn e Kristi kpaegbe vbe idin?” 8 De emwi ne Ebe Nọhuanrẹn tae? Ọ wẹẹ: “Nene ẹmwẹ sikẹ ruẹ, ọ rrọ ruẹ unu, ọ vbe rrọ ruẹ ekhọe”; ọni ọre “ẹmwẹ” ọghe amuẹtinyan ne ima kporhu ẹre. 9 Adeghẹ u na ya unu ruẹ tae vbe idagbo wẹẹ Jesu ọre Enọyaẹnmwa, u na vbe yayi* vbe ekhọe ruẹ wẹẹ Osanobua huẹn ọnrẹn kpaegbe vbe idin, u gha miẹn fan. 10 Rhunmwuda, ekhọe ẹre a ya mwẹ amuẹtinyan nọ ya ọmwa khian ọmwa ata, sokpan, unu ẹre a ya ta ẹmwẹ amuẹtinyan nii vbe idagbo, ọ ghi ya ọmwa miẹn fan.

11 Rhunmwuda, ebe nọhuanrẹn khare wẹẹ: “Ọmwa rhọkpa i rrọọ nọ mu ẹtin yan rẹn, nọ khian gbe I ma rẹn.” 12 Alughaẹn i rrọọ ne Ivbi e Ju kevbe Ivbi e Grik. Enọyaẹnmwa ọkpa ẹre ima hia mwẹ, erriọ ẹre ọ vbe ya tue afiangbe yan emwa hia ni datie ẹre. 13 Rhunmwuda, “emwa hia ni datie eni e Jehova,* gha miẹn fan.” 14 Vbọrhirhighayehẹ, vbe iran khian ya datie ẹre hẹ deghẹ iran ma mu ẹtin yan rẹn? Sokpan, de vbene iran khian ya mu ẹtin yan rẹn hẹ, deghẹ iran ma họn vbekpa ẹre? De vbene iran khian vbe ya họn vbekpa ẹre hẹ deghẹ ọmwa ma kporhu ma iran? 15 De vbene iran khian ya kporhu hẹ, vbe ẹ i re te a gie iran? Zẹvbe na gbẹn ọnrẹn yotọ: “U miẹn vbene owẹ iran ni ya iyẹn nọ maan* wewe mose hẹ!”

16 Sokpan, ẹ i re iran hia fẹẹrẹ ẹre ọ rhan obọ miẹn iyẹn nọ maan yi. Rhunmwuda, Aizaia khare wẹẹ: “E Jehova,* de ọmwa nọ mu ẹtin yan ẹmwẹ nọ họn vbe unu ima?”* 17 Emwi ne ọmwa họn ẹre ọmwa mu ẹtin yan. Ikporhu na kpee vbekpa e Kristi, ẹre ọ ya ọmwa họn enene ẹmwẹ. 18 Sokpan, ọta ne imẹ ghi nọ na khin: Iran ma họn ẹmwẹ nii ra? Iran wa họn! Uhiẹn, Ebe Nọhuanrẹn khare wẹẹ: “Te a wa họn urhu iran vbe otagbọn hia, erriọ ẹre iyẹn ne iran ya wewe, vbe sẹ ehe ne agbọn sẹ kevbe ehe nọ rhanmwẹ.” 19 I na vbe nọ wẹẹ, Ivbi Izrẹl ma gele rẹn otọ re ra? E Mozis ẹre ọ ka wa rhie ewanniẹn ye ẹmwẹ na, ọ na wẹẹ: “I gha ru emwi nọ gha ya uwa gha gbọvo ẹvbo na ma ka yọ; I gha ru emwi nọ gha ya uwa gha mu ohu ẹvbo nẹi mwẹ ẹwaẹn.” 20 Sokpan, Aizaia keghi kakabọ din, ọ na wẹẹ: “Emwa ni ma gualọ mwẹ ẹre ọ ghi do miẹn mwẹ; I keghi rhiegbe mwẹ ma emwa nẹi nọ ẹmwẹ mwẹ.” 21 Sokpan, vbe ọ ghi guan kaan Ivbi Izrẹl, ọ na wẹẹ: “Ẹdẹ ohoho ẹre I ya rhan obọ rua ne I miẹn iran yi ighẹ emwa nẹi họn ẹmwẹ kevbe ni ze vbe udu.”

11 Te imẹ ghi nọ nian wẹẹ: Te Osanobua ghi he emwa rẹn ra? Hiehie! Mẹ tobọ imẹ, Ovbi Izrẹl ẹre I khin, ovbi Ebraham* nọ ke uniẹn e Bẹnjamin rre ẹre I khin. 2 Osanobua ma he emwa rẹn, ne irẹn ka wa gha yẹrẹro.* Wa ma ghi yerre ẹmwẹ ne ebe nọhuanrẹn tae vbekpa Ẹlaija, vbe ẹghẹ nọ na gha gui ẹzọ Ivbi Izrẹl ma Osanobua ra? 3 Ọ na wẹẹ: “E Jehova,* iran gbele avbe akhasẹ ruẹ hia rua nẹ, iran vbe guọghọ avbe ogiukpo ruẹ sotọ, mẹ ọkpa kẹkan ẹre ọ ghi wa kẹ, vbene a wa guan na, iran vbe hoo ne iran gbe mwẹ ruan.” 4 Sokpan, de ewanniẹn ne Osanobua ghi rhie nẹẹn? Ọ wẹẹ: “I ye mwẹ orhunmwu arriaisẹn ihinrọn (7,000) ni ma he diguẹ ne Bel.” 5 Erriọ ẹre ọ wa vbe ye vbe ẹghẹ na. Ibozẹghẹ emwa ye rrọọ ne Osanobua zẹ rhunmwuda ẹse ne kpataki* nọ ru ne iran. 6 Adeghẹ ẹse ne kpataki* ẹre Osanobua ru ne iran, ọni rhie ma wẹẹ, iran ma winna yọ; rhunmwuda, akpawẹ te iran winna yọ, ẹ i ghẹ te gia ta wẹẹ, ẹse ne kpataki* ẹre a ru ne iran.

7 De emwi ne ima khian ghi ta? Emwi ne Ivbi Izrẹl wa fie gualọ khian ma sẹ iran obọ, sokpan, emwa na zẹ ẹre ọ ghi sẹ ọre obọ. Te ekhọe iran nikẹre ghi gbin, 8 zẹvbe na gbẹn ọnrẹn yotọ wẹẹ: “Osanobua keghi bọ iran ye ovbe nọ dinmwi, ọ na viọ aro nai ya bẹghe kevbe ehọ nẹi họn ẹmwẹ ne iran, do sẹ ẹdẹnẹrẹ.” 9 E Devid vbe kha wẹẹ: “Gi evbare ne iran re* do gha re akobẹ kevbe ifi nọ ra munọ iran, ọ ghi vbe gha re okuta nọ ra munọ iran gbe otọ, iran ghi vbe rri oya ye emwi ne iran ru. 10 Gi ebiebi so ye iran aro, ne iran ghẹ mieke na bẹghe odẹ; gi iran gha rre ighughẹ khian vbe ẹdagbọn iran hia.”

11 Te imẹ ghi nọ nian wẹẹ: Ẹghẹ ne Ivbi e Ju na rrua owẹ, te iran wa dele guọghua ra? Hiehie! Sokpan, vbe ẹghẹ ne iran ya zẹ owẹ ihan, odẹ keghi kie ne ivbi agbẹnvbo ọvbehe ya miẹn fan, nọ mieke na gha da Ivbi e Ju.* 12 Adeghẹ owẹ ihan ne iran zẹ, zẹ ẹfe ku agbọn, adeghiyeke ọghe iran na vbe zẹ ẹfe ku ivbi agbẹnvbo ọvbehe, vbọ khian ghi wa gha ye hẹ, deghẹ a na si iran hia fẹẹrẹ koko?

13 Wa ne ivbi agbẹnvbo ọvbehe ẹre imẹ ghi gu guan nian. Ugbẹnvbe a miẹn wẹẹ, ukọ na gie bu ivbi agbẹnvbo ọvbehe ẹre I khin, te I wa ya iwinna mwẹ hio, 14 ughaghe I gha ru ẹre vberriọ, ọ sẹtin gha da ivbi ẹvbo mwẹ,* ẹghẹ nii, eso vbe uwu iran ghi vbe do miẹn fan. 15 Ugbẹnvbe a miẹn wẹẹ, odẹ kie ne emwa ni rre uwu agbọn ya do gu Osanobua ru adọlọ rhunmwuda ne Osanobua na he Ivbi e Ju, inu ghi nọ vbe ọ gha ghi miẹn iran yi? Ọ ghi yevbe na miẹn wẹẹ, te iran te wu, sokpan, a na werriegbe huẹn iran kpaegbe! 16 Yevbesọni, adeghẹ abọ nokaro na fian yotọ vbe eflawa na fuẹn na huan, ọni rhie ma wẹẹ, eflawa nii hia na fuẹn vbe huan; adeghẹ inian erhan na huan, ọni rhie ma wẹẹ, avbe abọ ọre vbe huan.

17 Vbọrhirhighayehẹ, a keghi giagia abọ eso kua vbe erhan ọliv nii, a na do viọ uwa ye nene erhan ọliv, agharhemiẹn wẹẹ ọliv nọ rre oha ẹre uwa khin, te uwa ghi vbe gu abọ nikẹre ghae vbe amẹ nọ ke inian ọliv nii rre. 18 Rhunmwuda ọni, ghẹ gha roro ẹre wẹẹ u maan sẹ avbe abọ* na giagia kua. Adeghẹ u na gha roro ẹre wẹẹ u maan sẹ iran,* u ghi yerre wẹẹ, ẹ i re uwẹ ẹre ọ da inian erhan nii yi, sokpan, inian erhan nii ẹre ọ da ruẹ yi. 19 U sẹtin gha kha nian wẹẹ: “Te a giagia abọ eso kua, na mieke na do mu mwẹ yọ.” 20 Ẹmwata ẹre ọni khin! Te a giagia iran kua rhunmwuda ne iran i na mwẹ amuẹtinyan. Sokpan, rhunmwuda ne uwẹ na mwẹ amuẹtinyan ẹre ọ zẹe ne u na rre evba. Vbọrhirhighayehẹ, ghẹ rhunmwuda ọni do gha hio, sokpan, gi ohan gha mu ruẹ. 21 Adeghẹ Osanobua giagia abọ ne abọ ni ka wa gha rre evba kua, ọni rhie ma wẹẹ, ọ gha vbe sẹtin fian ruẹ fua. 22 Ọna ya ima rẹn vbene Osanobua mwẹ ekhọe itohan hẹ kevbe vbene ọ vbe khọọ hẹ. Ọ keghi khọọ mu iran ni dele kua, sokpan, ọ keghi tohan ruẹ; ọ gha ye gha ru vberriọ deghẹ u na mudia ẹse, vbe ẹ i re erriọ, te ọ khian vbe fian ruẹ fua. 23 Nọ ne avbe abọ na giagia kua nii, a gha werriegbe viọ iran ye erhan nii deghẹ iran na werriegbe gha mwẹ amuẹtinyan, rhunmwuda, Osanobua gha sẹtin werriegbe viọ iran yọ. 24 Adeghẹ a giagia uwa ke erhan ọliv nọ rre oha rre, a na do viọ uwa ba erhan ọliv na kọ ye ọkpẹn owa, agharhemiẹn wẹẹ ẹ i re erriọ ẹre a te ya ru ẹre, inu ghi nọ ne abọ ni ka wa gha rre erhan ọliv nii? Ẹ i khian lọghọ a ke werriegbe viọ iran ba erhan ne iran ka gha ye!

25 Etẹn, I hoo ne uwa rẹn ẹmwẹ oro nọhuanrẹn na, ne uwa ghẹ do gha roro ẹre wẹẹ, wa mwẹ ẹwaẹn gbe: Ivbi Izrẹl eso ze vbe udu, erriọ ẹre ọ khian gha ye, a te miẹn wẹẹ, ivbi agbẹnvbo ọvbehe na khian viọ rre gbae. 26 Odẹ vbenian ẹre a khian ya miẹn Ivbi Izrẹl hia fan. Zẹvbe na gbẹn ọnrẹn yotọ: “Ọmiọnmwafan gha ke Zaiọn rre, ọ ghi rhie uyinmwẹ dan hin uniẹn e Jekọb rre. 27 Ọna ọre ile ne I khian gu iran ta, vbe I gha rhie orukhọ ọghe iran hin iran egbe rre nẹ.” 28 Ẹmwata nọ wẹẹ, eghian iyẹn nọ maan ẹre iran khin, sokpan, ne iran na re eghian iyẹn nọ maan, wa keghi do miẹn ere vbọ; sokpan, zẹvbe emwa ne Osanobua zẹ, Osanobua keghi hoẹmwẹ iran rhunmwuda avbe erha iran odede. 29 Osanobua gha ru ẹse ne emwa, ọ na vbe hannọ emwa zẹ, ẹ i gbe I ma rẹn yọ. 30 Emwa nẹi họn ẹmwẹ ne Osanobua ẹre uwa ka gha khin, sokpan, te a ghi tohan uwa nian rhunmwuda iyenhọ ọghe Ivbi e Ju. 31 Erriọ vbe ye, ugbẹnvbe a miẹn wẹẹ, iyenhọ ọghe iran ẹre ọ ghi zẹe ighẹ a tohan uwa, a gha vbe tohan iran zẹvbe na vbe tohan uwa. 32 Te Osanobua sẹ iran hia rae, ne iran gha re eviẹn ọghe iyenhọ, nọ mieke na vbe tohan iran hia.

33 U miẹn vbene Osanobua fe hẹ! U miẹn vbene ẹwaẹn kevbe irẹnmwi ọghẹe dinmwi hẹ! De ọmwa nọ gha sẹtin rẹn otọ vbene ọ ya bu ohiẹn kevbe vbene ọ ya ru emwi hẹ? 34 Zẹvbe ne Ebe Nọhuanrẹn khare: “De ọmwa nọ rẹn ekhọe Jehova?* De ọmwa nọ bu ẹre ude?” 35 Ra, “de ọmwa nọ he rhie emwi nẹẹn mọmọ ẹdẹ, nọ miehe na werriegbe ha ẹre nẹẹn?” 36 Rhunmwuda, irẹn ẹre ọ yi emwi hia, irẹn ẹre ọ zẹe ighẹ iran vbe rrọọ, ọghẹe ẹre ehia vbe khin. Uyi nọ nẹẹn vbe ẹdẹdẹmwẹdẹ. Isẹ.

12 Rhunmwuda ọni etẹn, I ya itohan ọghe Osanobua rinmwian uwa, ne uwa ya egbe uwa fiohan ne Osanobua zẹvbe emwi izọese nọ rre agbọn, nọhuanrẹn kevbe ne Osanobua gha miẹn yi. Ọna ọre ugamwẹ nọhuanrẹn ne uwa rhie ne Osanobua zẹvbe ne uwa ya loo ẹrherhe ọghe uwa. 2 Wa ghẹ ghi ru emwi vbene agbọn na* ru ẹre, sokpan, wa fi ekhọe uwa werriẹ, ne uwa mieke na gha re emwa ni wa fi werriẹ fẹfẹfẹ, ẹghẹ nii, wa ghi sẹtin tobọ uwa rẹn iho ọghe Osanobua nọ maan, nọ yẹẹ ọre kevbe nọ gbae.

3 Rhunmwuda ẹse ne kpataki* ne Osanobua ru mẹ, I hoo ne I tama uwa hia wẹẹ, wa ghẹ gha ka egbe uwa ye ukpo nọ gberra ukpo nọ khẹke ne uwa ka egbe uwa yi. Sokpan, dọmwadẹ ọghẹe ghi gha roro emwi ẹse, zẹvbe nọ gua amuẹtinyan ne Osanobua rhie* ne dọmwadẹ ọghẹe ro. 4 Abọ ughughan ni rre egbe bun, sokpan, iwinna ughughan ẹre iran ru vbe egbe. 5 Erriọ vbe ye, agharhemiẹn wẹẹ ima bun, egbe ọkpa na kukugbe ba e Kristi ẹre ima khin; zẹvbe ne dọmwadẹ abọ ni rre egbe ye, erriọ ẹre a vbe ku ima kugbe zẹvbe ọkpa. 6 Rhunmwuda ọni, dọmwadẹ ọghẹe vbe uwu ima mwẹ emwi ughughan ne Osa ya we ẹre, rhunmwuda ẹse ne kpataki* ne Osanobua ru ne ima. Adeghẹ na gha ta ẹmwẹ akhasẹ ẹre a ya we ima, gi ima gha ta ẹmwẹ akhasẹ nii zẹvbe ne amuẹtinyan ọghe ima sẹ; 7 adeghẹ iwinna ugamwẹ nọ, wa gi ima ye gha ru iwinna ugamwẹ na khian; nọ ne ọmwa nọ ma emwa emwi, we nọ ye gha ma emwa emwi; 8 nọ rhie igiọdu* ne emwa, we nọ ye gha rhie igiọdu* ne emwa; nọ zẹ emwi obọ,* we nọ gha ya ekhọe hia ru ẹre; we ne ọmwa nọ mu asanikaro* gha ru iwinna rẹn ẹse;* we ne ọmwa nọ tohan emwa ọvbehe gha ya oghọghọ ru ẹre.

9 Wa gi ahoẹmwọmwa ọghe uwa gha re nọ sẹ otọ ẹko. Wa gi emwi dan gha sọnnọ uwa; wa rhikhan mu emwi esi. 10 Wa hoẹmwẹ egbe zẹvbe etẹn, ne uwa vbe gha mwẹ ẹnina daa egbe. Ọ gha de ọghe ọghọ na rhie ne egbe, wa ghi mu asanikaro.* 11 Wa gha re nọ wegbe obọ,* wa ghẹ gha re obẹrure.* Gi orhiọn nọhuanrẹn gha ya uwa mwẹ oyaya. Wa gha ga e Jehova* zẹvbe eviẹn. 12 Wa gi emwi ne uwa ya aro yi gha ya uwa sọyẹnmwẹ. Wa gha zin egbe ọlọghọmwa. Wa ghẹ gi egbe erhunmwu na na wọọ uwa. 13 Wa gha ghae emwi ne uwa mwẹ ne emwa ni huanrẹn zẹvbe nọ khẹke iran. Wa gha re emwa ni mu ọghọ ye ọmwa egbe. 14 Wa gha na erhunmwu ne iran ni zẹ uwa kpokpo; wa gha na erhunmwu ne iran, wa ghẹ tie ihẹn ne iran. 15 Wa gu enọ ghọghọ gha ghọghọ; wa ghi gu enọ viẹ gha viẹ. 16 Vbene uwa ya ghee egbe uwa, erriọ ẹre ọ khẹke ne uwa ya gha ghee emwa ọvbehe; wa ghẹ rhie aro ye emwi nikhua, sokpan, wa gha rhie aro ye emwi nekherhe. Wa ghẹ gha roro ẹre wẹẹ, wa mwẹ ẹwaẹn gbe.

17 Ọmwa gha ru uwa khọọ, wa ghẹ vbe ya ọkhọ ha ẹre nẹẹn werriegbe. Wa hia ne uwa gha ru emwi ne emwa hia ka ye nọ maan.* 18 Adeghẹ emwi nọ gha guẹ ru nọ, hia ne u gha gu emwa hia rrọọ vbe ọfunmwegbe. 19 Etẹn mwẹ ne I hoẹmwẹ ọnrẹn, wa ghẹ rria ikhi ne egbe uwa, sokpan, wa gi Osanobua rhie izohu ọghẹe ma; rhunmwuda, a gbẹn ọnrẹn yotọ wẹẹ: “E Jehova* khare wẹẹ, ‘Mẹ ẹre ọ khian rria ikhi; I gha ha ẹre werriegbe.’” 20 Sokpan, “adeghẹ ohanmwẹ gbe oghian ruẹ, rhie evbare nẹẹn re; ovbamẹ ghaa gbe ẹre, sa amẹ nẹẹn wọn; u gha ru vberriọ, te uwẹ hihiẹ ugiọnmwẹ erhẹn ye ọre uhunmwu nii.”* 21 Ghẹ gi obọ emwi dan ke ukhunmwu nuẹn, sokpan, gha ru emwi nọ maan, ne u mieke na khọnmiotọ yan emwi dan.

13 Ọ khẹke ne emwa hia gha họn ẹmwẹ ne emwa ni rre ukpo ọdakha, rhunmwuda, ọmwa i khian sẹtin gha mwẹ ọdakha rhọkpa, vbe ẹ i re te Osanobua kue yọ; nọ ne iran ni rre ukpo ọdakha nian, Osanobua ẹre ọ kue yọ ne iran gha rre evba. 2 Nọnaghiyerriọ, ọmwaikọmwa nọ gbodan ghee iran ni rre ukpo ọdakha, te ọ gbodan ghee emwi ne Osanobua mwamwaẹn; ibuohiẹn ẹre ọmwa vberriọ ya obọ ẹre si gie egbe ẹre. 3 Emwa ni ru emwi dan ẹre ọ mu ohan iran ni khaevbisẹ, sokpan, iran ni ru emwi esi i mu ohan iran. Adeghẹ u ma hoo ne u gha mu ohan iran ni khaevbisẹ, gha ru emwi esi, iran gha tian ruẹ; 4 rhunmwuda, emwa ne Osanobua ya winna ẹre iran khin. Rhunmwuda umamwẹ ruẹ, ẹre iran na ru iwinna ne iran ru. Sokpan, u ghaa ru emwi dan, gi afianma gha fian ruẹ, rhunmwuda, ọ mwẹ emwi ne iran gu da umozo yi. Emwa ne Osanobua ya winna ẹre iran khin, te iran rri emwa ni ru emwi dan oya.

5 Nọnaghiyerriọ, ọ wa khẹke ne uwa gha họn ẹmwẹ ne iran ni rre ukpo ọdakha. Ẹ i wa re rhunmwuda ne iran ghẹ rri uwa oya ọkpa, sokpan, ne ekhọe uwa ghẹ vbe gha fi uwa uwẹnrhiẹn. 6 Ọna ẹre ọ si ẹre ne uwa na vbe zẹ igho uhunmwu; rhunmwuda, Osanobua ẹre iran winna na, zẹvbe ne iran ya ru emwi ne ivbi ẹvbo. 7 Wa rhie emwi nọ khẹke dọmwadẹ ọghẹe nẹẹn: nọ we ne uwa gha ha igho uhunmwu, wa ghi ha igho uhunmwu nẹẹn; ọmwa nọ nọ uwa ihako, wa ghi ha oko gie ẹre; nọ we ne uwa gha mu ohan irẹn, wa ghi gha mu ohan rẹn; nọ we ne uwa rhie ọghọ ne irẹn, wa ghi gha rhie ọghọ nẹẹn.

8 Wa ghẹ gha mwẹ ọmwa rhọkpa osa, sokpan, osa ọkpa ne uwa khian gha mwẹ ọmwa re, ọre ne uwa hoẹmwẹ egbe; ọmwaikọmwa nọ hoẹmwẹ ogieva ẹre mu enene uhi sẹ nẹ. 9 Uhi nii khare wẹẹ, “Ghẹ ghẹẹ,* ghẹ do izigha, ghẹ rhaa, ghẹ ya aro ye emwi ẹrrẹe.” Avbe uhi na kevbe avbe uhi nikẹre hia, uwu uhi ọkpa na ẹre iran ye, ọni ọre: “Te u gha hoẹmwẹ ogieva ruẹ zẹvbe ne u hoẹmwẹ egbuẹ.” 10 Ọmwa gha hoẹmwẹ ogieva ẹre, ẹ i khian ru ogieva ẹre emwi khọọ; nọnaghiyerriọ, ọmwa nọ hoẹmwẹ emwa ọvbehe ẹre ọ gele lele nene uhi.

11 Ọ khẹke ne uwa gha ru vberriọ, rhunmwuda, wa rẹnrẹn wẹẹ ẹghẹ nọ khẹke ne uwa ya rhiọrre vbe ovbe, ẹre a wa ye na. Rhunmwuda, ẹghẹ na, ẹre imiẹnfan ọghe ima ya sikẹ otọ sẹ vbene ọ ghaa ye vbe ima khian emwa iyayi. 12 Asọn khian buan nẹ; te ẹdẹ khian ghi gbe.* Nọnaghiyerriọ, wa gi ima mu iwinna ebiebi fua, ne ima hẹ emwi igbinna ọghe ukpa ye egbe. 13 Gi ima gha yin uyinmwẹ ọghe emwa ni rẹn enegbe, uyinmwẹ nọ gha gia yin vbe ogiavan. Ọ ma khẹke ne ima gha mwẹ obọ vbe iku na na gbe izabọbọ ẹwia* kevbe ayọn na da gbe egbe, alama oghẹ, uyinmwẹ ifavbaro,* okhọn, kevbe igbọvo. 14 Sokpan, wa mu Enọyaẹnmwa e Jesu Kristi yọ vbe na ghee ukpọn, ne uwa ghẹ gha zẹ iro vbene uwa khian ya ru emwi ne egbe uwa gualọ hẹ.

14 Wa gha rhan obọ miẹn iran yi ighẹ emwa ne amuẹtinyan ọghe iran ma wegbe, sokpan, wa ghẹ gha bu ohiẹn emwa ne iziro ọghe iran lughaẹn ne ọghe uwa.* 2 Ọmwa ne amuẹtinyan rẹn wegbe gha sẹtin rri emwi ke emwi, sokpan, nọ ne ọmwa ne amuẹtinyan rẹn ma wegbe, ebe ebe ẹre ọ re. 3 We ne ọmwa nọ rri emwi hia ghẹ ya aro tila ọmwa nẹi re rua, we ne ọmwa nẹi re ghẹ vbe bu ohiẹn ọmwa nọ re, rhunmwuda, Osanobua vbe miẹn ọnrẹn yi. 4 Gha re uwẹ, ne u khian na gha bu ohiẹn ọguọmwadia ẹrrẹe? Arowa ẹre, ẹre ọ khian tae deghẹ ọ yin ẹse,* ra ọ ma yin ẹse.* Vbene ẹmwata, ugbẹnvbe a miẹn wẹẹ e Jehova* ẹre ọ ru iyobọ nẹẹn, ọ gha sẹtin mudia ẹse vbe aro ọre.

5 Emwa eso roro ẹre wẹẹ, ẹdẹ eso ru ekpataki sẹ eso, vbene eso na roro ẹre wẹẹ ọkpa ẹre ehia khin; ọ khẹke ne emwi ne dọmwadẹ ọghẹe yayi mu ẹre ekhọe. 6 Ọmwa nọ ka ẹdẹ ọkpa ye enọ ru ekpataki, te ọ ru ẹre nọ ya rhie uyi gie Jehova.* Ọmwa nọ rri evbare hia, te ọ vbe yae rhie uyi gie Jehova,* ugbẹnvbe a miẹn wẹẹ, te ọ kpọnmwẹ Osanobua ye evbare nii; ọmwa nẹi vbe re, te ọ vbe yae rhie uyi gie Jehova,* ọrheyerriọ, te ọ ye kpọnmwẹ Osanobua. 7 Orhunmwu ọkpa nọ rrọọ ne egbe ẹre i rre uwu ima, nọ vbe wu ne egbe ẹre ọkpa i vbe rrọọ. 8 Rhunmwuda, adeghẹ ima rre agbọn, e Jehova* ẹre ima rrọọ na, adeghẹ ima vbe wu, e Jehova* ẹre ima vbe wu na. Rhunmwuda ọni, ọre te ima rre agbọn, ra te ima wu, ọghe Jehova* ẹre ima khin. 9 Uhiẹn, ọna ẹre ọ si ẹre ne Kristi na wu, ọ na vbe rhiọ kpaegbe, nọ mieke na gha re Arowa iran ni wulo kevbe ni rrọọ.

10 Larre oo, vbọzẹ ne u na bu ohiẹn ọtuẹn? Ra, vbọzẹ ne u na ya aro tila ọtuẹn rua? Wẹ ma rẹn wẹẹ, te ima hia khian mudia ye odaro Osanobua nọ bu ohiẹn ima* ra? 11 Rhunmwuda, a gbẹn ọnrẹn yotọ wẹẹ: “E Jehova* khare wẹẹ, ‘Vbene imẹ na rrọọ, emwa hia gha diguẹ vbe odaro mwẹ, emwa hia ghi vbe ya unu iran tae wẹẹ, imẹ ọre Osanobua.’” 12 Nọnaghiyerriọ, dọmwadẹ ọghẹe vbe uwu ima gha na iyẹn egbe ẹre ma Osanobua.

13 Rhunmwuda ọni, ọ ma khẹke ne ima ghi gha bu ohiẹn egbe, nọghayayerriọ, ma ghi ta mu olọ yan rẹn wẹẹ, ma i khian ru emwi nọ gha ya ọtẹn ima rrua owẹ, ra nọ gha mu idobo ye ọre egbe. 14 Zẹvbe ọrhuanegbe Enọyaẹnmwa e Jesu, I rẹnrẹn wẹẹ, a i miẹn emwi nọ ma huan, I i vbe gbe awawẹ ye ọna hiehie; sokpan, ọmwa gha ka emwi ye enọ ma huan, ọni ẹre ọ khian ya emwi nii khian enọ ma huan vbe aro ọre. 15 Adeghẹ evbare ne u re na gha mwẹ vbene ọ ye ọtuẹn hẹ vbe egbe, ọni rhie ma wẹẹ, u i ghi ya ahoẹmwọmwa ru emwi. Ghẹ gia miẹn wẹẹ evbare ne u re, ẹre ọ ghi do ya ọtuẹn ne Kristi wu na khian enọ wirua.* 16 Nọnaghiyerriọ, wa ghẹ gi emwi esi ne uwa ru do khian ena ghi ta ẹmwẹ ọnrẹn ọghe dan. 17 Ẹ i re emwi ne ima re, ra ne ima da, ẹre ọ khian ya ima la Arriọba Osanobua, sokpan, emwi nọ khian ya ima laọ, ọre iruemwiẹse, ọfunmwegbe, kevbe ọyẹnmwẹ ne orhiọn nọhuanrẹn rhie ne ọmwa. 18 Ọmwaikọmwa nọ ga e Kristi vbenian zẹvbe ọviẹn, ẹmwẹ ọnrẹn ghi gha yẹẹ Osanobua kevbe emwa nagbọn.

19 Nọnaghiyerriọ, wa gi ima hia ne ima gha ru emwi ke emwi nọ gha rhie ọfunmwegbe rre, ma ghi vbe gha hia ne ima gha ru emwi nọ gha rhie ẹtin ye egbe iwu. 20 Wa ghẹ ghi rhunmwuda evbare mu iwinna Osanobua rhia. Ẹmwata nọ wẹẹ, a i miẹn emwi* nọ ma huan, sokpan, ọ keghi zẹ ẹbe* deghẹ ọmwa na rri emwi ke emwi nọ gha ya emwa ọvbehe rrua owẹ. 21 Ọ gha maan sẹ ne u ghẹ rri emiowo, ra ne u ghẹ da ayọn, ra ne u ghẹ ru emwi ke emwi nọ gha sẹtin ya ọtuẹn rrua owẹ. 22 Gi iyayi ne u mwẹ gha rre ẹkpo uwẹ vbe Osanobua. Oghọghọ nọ ne ọmwa nii ne ekhọe ọre ma bu ohiẹn gbe, vbe ọ gha ru emwi ne irẹn ghee re wẹẹ ọ maan. 23 Sokpan, deghẹ ọ na gha bọ iro eveva ye ẹmwẹ evbare nọ khian re, ọ na ye rriọẹ, ọ rriabe nẹ, rhunmwuda, ẹ i re amuẹtinyan ẹre ọ yae rriọẹ. Emwi ke emwi ne ọmwa ma ya amuẹtinyan ru, orukhọ nọ.

15 Ọ khẹke ne ima ni wegbe gha kpa iran ni ma wegbe ihẹ, ẹ i re ne ima wa gha ru emwi nọ yẹẹ ima. 2 Gi edọmwadẹ ọghẹe vbe uwu ima gha ru emwi nọ gha yẹẹ ogieva ẹre kevbe nọ gha maan nẹẹn, nọ mieke na rhie ẹrhiọn ye ọre iwu. 3 Uhiẹn, ẹ i re ọghe enegbe ẹre, ẹre Kristi ghaa ru, sokpan, zẹvbe na gbẹn ọnrẹn yotọ: “Ozan ne iran zaan ruẹ, uhunmwu mwẹ ẹre ehia ye.” 4 Rhunmwuda, emwi hia na gbẹnnẹ yotọ vbe Ebe Nọhuanrẹn vbe ẹghẹ nọ kpẹẹ fua, te a gbẹnnẹ ọnrẹn na ya ma ima emwi, na mieke na miẹn wẹẹ, rhunmwuda izinegbe ọghe ima kevbe ifuẹko ne Ebe Nọhuanrẹn rhie ne ọmwa, ma ghi gha mwẹ emwi ne ima ya aro kọ. 5 Te Osanobua ne izinegbe kevbe ifuẹko ke obọ ẹre rre, gha ya uwa gha mwẹ egbe ekhọe ne Kristi Jesu ghaa mwẹ, 6 ne uwa mieke na koko gha ya urhu* ọkpa rhie urhomwẹ ne Osanobua kevbe Erha ọghe Enọyaẹnmwa e Jesu Kristi.

7 Nọnaghiyerriọ, wa gha rhan obọ miẹn egbe yi,* zẹvbe ne Kristi vbe rhan obọ miẹn uwa yi.* Egbe emwi vbenian ẹre ọ rhie uyi gie Osanobua. 8 Te imẹ ghi tama uwa nian wẹẹ, e Kristi keghi khian ọguọmwadia iran ni rhuẹ re, nọ mieke na gi iran rẹn wẹẹ, ọmwa ẹmwata ẹre Osanobua khin, ẹghẹ nii, iran ghi rẹn wẹẹ, eyan nọ yan ma avbe erha iran odede i khian de fua, 9 ivbi agbẹnvbo ọvbehe ghi vbe gha rhie uyi ne Osanobua rhunmwuda itohan ọghẹe. Zẹvbe ne Ebe Nọhuanrẹn khare: “Ọni ẹre ọ si ẹre ne I gha na rho ruẹ vbe uwu ẹbu avbe agbẹnvbo, I gha vbe so ihuan ya rho eni ruẹ.” 10 Ọ vbe kha wẹẹ: “Wa gha ghọghọ, wa ne avbe agbẹnvbo, ke uwa kevbe emwa ọghe Osanobua.” 11 Ọ na vbe kha wẹẹ: “Wa rho e Jehova,* wa ne avbe agbẹnvbo hia, gi emwa hia gha rho ẹre.” 12 Aizaia na vbe kha wẹẹ: “Inian ọkpa gha zọọ ladian vbe Jẹsi, nọ khian gha khaevbisẹ yan avbe agbẹnvbo; irẹn ẹre avbe agbẹnvbo khian ya aro kọ.” 13 Te Osanobua nọ ya ọmwa mwẹ emwi nọ ya aro yi, gha ya uwa gha mwẹ oghọghọ kevbe ọfunmwegbe ẹsẹsẹmwẹse rhunmwuda ne uwa na mu ẹtin yan rẹn, ne uwa mieke na gha mwẹ ilẹkẹtin wẹẹ, emwi ne uwa ya aro yi gha sẹ uwa obọ, vbe ẹtin orhiọn nọhuanrẹn.

14 Etẹn mwẹ, mẹ wa rẹn wẹẹ, te emwi ni maan hia wa gba uwa obọ, erriọ ẹre uwa vbe ya rẹn emwi ẹsẹse, kevbe wẹẹ, wa vbe sẹtin rhie ibude ne egbe.* 15 Vbọrhirhighayehẹ, te I gbẹn ebe na gie uwa ne I ya ta ẹmwata ma uwa, ne I vbe ye uwa ẹre rre, emwi eso nọ khẹke ne uwa gha ru. Emwi nọ ya mwẹ ru vberriọ, ọre rhunmwuda ẹse ne kpataki* ne Osanobua ru mẹ, 16 nọ na zẹ mwẹ ne I gha re ọguọmwadia e Kristi Jesu, ne I mieke na gha kporhu iyẹn nọ maan ọghe Osanobua ma ivbi agbẹnvbo ọvbehe. Te I ru iwinna nọhuanrẹn na, ne avbe agbẹnvbo na mieke na gha re izọese ne Osanobua gha miẹn yi, kevbe na ya orhiọn nọhuanrẹn kpe huan.

17 Te I wa ghọghọ rhunmwuda ne I na re ọrhuanegbe Kristi Jesu, ne I na vbe ru iwinna Osanobua. 18 I i khian ya unu kaan emwi ne imẹ tobọ imẹ ru, vbọ gberra emwi ne Kristi loo mwẹ ya ru, ne ivbi agbẹnvbo ọvbehe mieke na do gha họn ẹmwẹ ne Osanobua, lekpa ẹmwẹ ne I tae kevbe emwi ne I ru. 19 Te iran ghi họn ẹmwẹ ne Osanobua, rhunmwuda iwinna ọyunnuan ughughan ne orhiọn nọhuanrẹn ọghe Osanobua loo mwẹ ya ru. Ọni ẹre ọ zẹe ne I na sẹtin kporhu iyẹn nọ maan ẹsẹsẹmwẹse vbekpa e Kristi, ke Jerusalẹm kpa, wa ya sẹ Ilirikọm. 20 Emwi ne I ghaa mwẹ vbe ekhọe, ọre ne I ghẹ kporhu iyẹn nọ maan vbe ehe ne emwa na ka ya eni e Kristi wewe nẹ, ne I ghẹ mieke na gha bọ owa yan ẹyotọ ne ọmwa ọvbehe ka gbe nẹ; 21 sokpan, zẹvbe na gbẹn ọnrẹn yotọ: “Emwa na ma he ka ta ẹmwẹ ọnrẹn ma, gha miẹn ọnrẹn, emwa ni ma he ka họn ẹmwẹ ọnrẹn, gha rẹn otọ re.”

22 Ọna ẹre ọ vbe si ẹre ne I ma na he ye sẹtin rre do miẹn uwa, agharhemiẹn wẹẹ, ẹ i re avbiẹ inugba ẹre I te gha hoo ne I ru vberriọ. 23 Sokpan, vbene a guan na nian, eke ọkpa i rrọọ vbe avbe ikinkin na ne I ma he kporhu la. Deba ọni, ukpo nibun* ẹre ọ ghi ye na, ne I ke hoo ne I do miẹn uwa. 24 Rhunmwuda ọni, I gha hoo ne I do miẹn uwa vbe I ghaa rrie Spen, ne ima ya egbe rhorho egbe. I gha ghi gu uwa gbe ẹghẹ eso nẹ vba, I gha vbe hoo ne uwa su mwẹ sẹ odẹ, vbe I gha khian kpa. 25 Sokpan, banbanna nian, I gha ka mu okhian gha rrie Jerusalẹm, ne I ya ru iyobọ ne emwa ni huanrẹn. 26 Rhunmwuda, etẹn ni rre Masẹdonia kevbe Akeya keghi ya ekhọe hia viọ emwi ne iran mwẹ ladian, na ya ru iyobọ ne emwa ni huanrẹn ne obọ ma sẹ ọre ni rre Jerusalẹm. 27 Vbene ẹmwata, ekhọe hia ẹre iran gele ya ru ẹre; a gha we na ghee ẹre, te iran yevbe emwa ni mwẹ Ivbi e Ju osa, rhunmwuda, Ivbi e Ju ẹre ọ ghae emwi ne iran miẹn vbe obọ Osanobua* ne ivbi agbẹnvbo ọvbehe. Nọnaghiyerriọ, te ọ vbe khẹke ne avbe agbẹnvbo na ya emwi ewe ne iran mwẹ ru iyobọ ne iran. 28 I gha ghi viọ emwi ne iran ya ru iyobọ ne etẹn ni rre Jerusalẹm ye iran obọ nẹ, I ghi mu uhunmwu daa e Spen. I ghaa rrie Spen, I gha van tuẹ uwa. 29 Yevbesọni, I rẹnrẹn wẹẹ I ghaa dee do miẹn uwa, afiangbe ne wọrhọwọrhọ nọ ke obọ e Kristi rre gha lele mwẹ rre.

30 Banbanna nian etẹn, I ya Enọyaẹnmwa e Jesu Kristi kevbe ahoẹmwọmwa ne orhiọn nọhuanrẹn rhie ne ọmwa rinmwian uwa, ne uwa kakabọ gha mu ẹmwẹ mwẹ ye erhunmwu, vbene imẹ vbe na ne egbe mwẹ vbe ediran. 31 Wa na erhunmwu na miẹn mwẹ fan vbe obọ iran ni ma yayi ni rre Judia, wa ghi vbe na erhunmwu, ne emwa ni huanrẹn ni rre Jerusalẹm rhan obọ miẹn iwinna ne I khian ya ru vba yi. 32 Ọ ghaa yerriọ, I ghi sẹtin ya ekhọe ọyẹnmwẹ bu uwa gha dee deghẹ iho ọghe Osanobua nọ, ẹghẹ nii, ma ghi ya egbe rhorho egbe. 33 Te Osanobua ne ọfunmwegbe ke obọ ẹre rre gha gu uwa hia gha rrọọ! Isẹ.

16 I hoo ne I gie ọtẹn ima nokhuo ọkpa na tie ẹre Fibi ma uwa, nọ ga vbe iko nọ rre Sẹnkria, 2 ne uwa mieke na rhan obọ miẹn ọnrẹn yi vbe eni Enọyaẹnmwa, vbe odẹ nọ khẹke emwa ni huanrẹn, wa ghi vbe ru iyobọ nọ rhirhi gha gualọ nẹẹn, rhunmwuda, irẹn tobọ irẹn ka ru iyobọ ne emwa nibun nẹ, do sẹ egbe imẹ.

3 Wa tuẹ e Priska kevbe Akuila mẹ oo, iran ne ima gba winna ne Kristi Jesu, 4 ni vbe rhie uhunmwu mwẹ atata obọ ba ẹmwẹ mwẹ. Mẹ kevbe iko hia ni rre agbẹnvbo ọvbehe we ne uwa gu ima kpọnmwẹ iran. 5 Wa vbe tuẹ etẹn ni rre iko nọ rre owa iran mẹ oo. Wa ghi vbe tuẹ ọtẹn mwẹ nọ ghaan ighẹ Ẹpinẹtọs; irẹn rre usun emwa ni ka wa gha ya e Kristi yi vbe otọ Esia. 6 Wa tuẹ e Meri, nọ wa kakabọ miẹn ẹsọn ye ẹmwẹ uwa. 7 Wa wẹẹ Andrọnikọs kevbe Junias do, ẹgbẹe ọkpa ẹre imẹ vbe iran na ke rre, ma ẹre ọ vbe gba gha rre eghan. Te avbe ukọ wa rẹn iran ẹsẹse; iran ya e Kristi yi nẹ ọ kpẹẹ re, mẹ ke do yayi.

8 Wa tuẹ Ampliyetọs mẹ, ọna ọre ọtẹn mwẹ nọ ghaan, ne ima gba re erhuanegbe Enọyaẹnmwa. 9 Wa tuẹ Ọbenọs ne ima gba winna ne Kristi mẹ, wa ghi vbe wẹẹ ẹre do ighẹ e Stekis ne ọtẹn mwẹ nọ ghaan. 10 Wa tuẹ Apẹlis ne ẹmwẹ ọnrẹn yẹẹ e Kristi mẹ oo. Wa ghi wẹẹ iran ni rre igiowa ọghe Aristọbulọs do. 11 Wa tuẹ e Hẹrodiọn ne ima gba re ẹgbẹe ọkpa mẹ. Wa ghi vbe tuẹ iran ni ya Enọyaẹnmwa yi, ni rre igiowa ọghe Nasisọs. 12 Wa we Traifina kevbe Traifosa do, ena ọre ikhuo ni wa ya egbe hia winna ne Enọyaẹnmwa. Wa vbe tuẹ e Pẹsis ne ọtẹn ima nokhuo nọ ghaan mẹ, rhunmwuda, egbe hia ẹre ọ vbe ya winna ne Enọyaẹnmwa. 13 Wa tuẹ e Rufọs ne Enọyaẹnmwa zẹ, wa ghi vbe tuẹ iyẹe nọ vbe re iye mwẹ mẹ oo. 14 Wa tuẹ Asinkritọs, e Fligọn, e Hẹmis, e Patrobas, e Hẹmas kevbe etẹn ni rre ehe ne iran ye. 15 Wa we Filologọs kevbe Julia do, deba e Nirọs vbe ọtiọnrẹn nokhuo, kẹ kevbe Olimpas kevbe emwa ni huanrẹn hia ni rre ehe ne iran ye. 16 Wa tuẹ egbe, ne uwa vbe mu unu soso egbe zẹvbe etẹn. Iko ọghe Kristi hia gie na tuẹ uwa.

17 Banbanna nian etẹn, I rinmwian uwa ne uwa gha rhie aro sotọ vbe egbe iran ni si iwannegbe kevbe ni rrua emwa ọvbehe owẹ, iran ni gbodan ghee emwi na ma uwa ẹre nẹ; wa gha lẹẹ ne emwa vberriọ. 18 Rhunmwuda, emwa vberriọ i re eviẹn Enọyaẹnmwa e Kristi, sokpan, iran keghi re eviẹn ọghe emwi ne egbe iran* gualọ. Iran ghi gha loo ẹmwẹ nọ rhiẹnrhiẹn kevbe aranmwẹ na ya rẹrẹ ọmwa ya bibi iran odẹ, ighẹ emwa ni ma rẹn enaye. 19 Nọ ne uwa, te agbọn hia wa rẹn uwa ye emwa ni họn ẹmwẹ, ọni ẹre ọ si ẹre ne ẹmwẹ uwa na ya mwẹ sọyẹnmwẹ. Vbọrhirhighayehẹ, I hoo ne uwa gha re emwa ni fiẹnro emwi esi na ru, sokpan, wa ghi gha re emwa ni ma rẹn ọkpa rẹn eva, vbọ gha de ọghe emwi dan na ru. 20 Vbe nẹi khian ghi kpẹẹ gbe, Osanobua ne ọfunmwegbe ke obọ ẹre rre gha guọghọ e Setan ye ototọ owẹ ọghe uwa. Te Enọyaẹnmwa e Jesu gha ru ẹse ne kpataki* ne uwa.

21 E Timoti ne ima gba winna giotuẹ uwa oo, erriọ ẹre Lusiọs, e Jesin kevbe Sosipata ne ima gba re ẹgbẹe ọkpa vbe giotuẹ uwa.

22 Mẹ ne Tẹtiọs nọ gbẹnnẹ ẹmwẹ ni rre ebe na yotọ, ya eni Enọyaẹnmwa giotuẹ uwa.

23 E Geyọs ne I dia owa ẹre ya, na vbe do iko vbe owa ẹre vbe giotuẹ uwa. Ẹrastọs nọ da igho yi ne ẹvbo, kevbe ọtiọnrẹn nokpia ighẹ e Kuatọs vbe gie na tuẹ uwa. 24* ——

25 Osanobua gha sẹtin ya uwa mudia gbain lekpa iyẹn nọ maan ne I ya wewe kevbe ikporhu na kpee vbekpa e Jesu Kristi. Iyẹn nọ maan na keghi guaẹro, ẹmwẹ oro nọhuanrẹn na te rhie lẹre ke ẹghẹ nọ kpẹẹ fua gha dee, na ghi do ya voro. 26 Banbanna nian, ẹmwẹ oro nọhuanrẹn na, khian ena rẹnrẹn nẹ. Ẹmwẹ ne avbe akhasẹ gbẹnnẹ yotọ vbe Ebe Nọhuanrẹn, ẹre ọ ya agbẹnvbo hia do rẹn ẹmwẹ oro nọhuanrẹn na. Osa ọghe etẹbitẹ ẹre ọ we na ta ẹmwẹ oro na ma agbẹnvbo hia, ne iran mieke na mu ẹtin yan irẹn, ne iran gha họn ẹmwẹ nẹẹn. 27 Osanobua ọkpa ọre ogie ẹwaẹn; uyi nọ nẹẹn vbe etẹbitẹ lekpa e Jesu Kristi. Isẹ.