EBE JỌN

1 Vbe omuhẹn, Ẹmwẹ nii kegha rrọọ, Ẹmwẹ nii na vbe gha gu Osanobua rrọọ, Ẹmwẹ nii kegha re osa.* 2 Ke omuhẹn gha dee, ẹre irẹn ke gha gu Osanobua rrọọ. 3 Irẹn ẹre Osanobua loo ro ya yi emwi hia, emwi ọkpa i rrọọ na yi, nọ ma la obọ ẹre rre.

Emwi na yi, 4 nọ la obọ ẹre rre, kegha re arrọọ. Arrọọ na ẹre ọ ghaa re ukpa ọghe emwa nagbọn. 5 Ukpa nii keghi baa vbe uwu ebiebi, sokpan, ebiebi ma sẹtin de yan rẹn.

6 Okpia ọkpa kegha rrọọ ne Osanobua gie rre; e Jọn ẹre a ghaa tie ẹre. 7 Te okpia na rre zẹvbe osẹ, ne irẹn mieke na do tama emwa vbekpa ukpa nii, ne emwa hia mieke na lekpa ẹre yayi. 8 Ẹ i re irẹn ẹre ọ ghaa re nene ukpa, sokpan, te irẹn rre do tama emwa vbekpa ukpa nii.

9 Vbe ẹghẹ na kha na, te ukpa ọghe ẹmwata nọ baa yan emwa nagbọn hia khian ghi rrie agbọn. 10 Irẹn ghaa rre agbọn, irẹn ẹre a vbe loo ya yi agbọn na, sokpan, agbọn ma rẹn ọnrẹn. 11 Ọ te gha die ẹvbo ẹre, sokpan, emwa rẹn ma miẹn ọnrẹn yi. 12 Sokpan, nọ ne emwa hia ni miẹn ọnrẹn yi, irẹn keghi rhie asẹ ne iran, ne iran ya khian ivbi Osanobua, rhunmwuda, iran rhie ẹre ma wẹẹ, iran mu ẹtin yan eni ẹnrẹn. 13 Ẹ i re esagiẹn emwa nagbọn ẹre a ya biẹ iran, a ma vbe biẹ iran rhunmwuda wẹẹ evbibiẹ iran hoo, ra emwa nagbọn hoo na biẹ iran, sokpan, Osanobua ọre Erha iran.

14 Ẹmwẹ nii na do gha re ọmwa nagbọn, ọ na do gha rre uwu ẹbu ima. Ma keghi bẹghe uyi ọghẹe, egbe uyi ne erha ọmọ rhie ne ukpọmọkpa nọ mwẹ; ọ keghi vuọn ne ẹse ọhẹ ọghe Osanobua* kevbe ẹmwata. 15 (E Jọn kegha ta ẹmwẹ ọnrẹn ma emwa. Uhiẹn, ọ na datu wẹẹ: “Ọna ọre ọmwa ne I ghaa guan kaẹn vbe I khare wẹẹ, ‘Ọmwa nọ lele mwẹ dee vbe iyeke, ke odaro mẹ nẹ, rhunmwuda, irẹn rrọọ nẹ, a ke biẹ mwẹ.’”) 16 Vbe uwu ọkpọkua ọghẹe, ẹre ima hia na miẹn ẹse ne kpataki* ne wọrhọwọrhọ. 17 Osanobua rhie Uhi la obọ e Mozis rre, sokpan, obọ e Jesu Kristi ẹre ima la miẹn ẹse ne kpataki* kevbe ẹmwata. 18 Ọmwa rhọkpa nọ he ya aro bẹghe Osanobua ẹdẹ i rrọọ; osa nii nọ re ukpọmọkpa, nọ rre eke ne Evbavba ye,* ẹre ọ gie aro ọmwa ne Osanobua khin ma emwa.

19 Ọna ọre emwi ne Jọn tae, vbe Ivbi e Ju gie avbe ohẹn kevbe Ivbi e Livai ke Jerusalẹm gha dee do nọ rẹn wẹẹ: “De ọmwa ne uwẹ khin?” 20 Ọ ma vbe ka gbe ẹre yo gbe ẹre rre, ọ na wa ya uhukpa wanniẹn iran wẹẹ: “Ẹ i re imẹ ọre Kristi.” 21 Iran na ghi nọ rẹn wẹẹ: “De ọmwa ne uwẹ ghi khin khekherriọ? Wẹ ọre Ẹlaija ra?” Ọ na wanniẹn wẹẹ: “Ẹo, ẹ i re imẹ.” Iran na vbe nọ rẹn wẹẹ: “Wẹ ọre Akhasẹ na wẹẹ ọ dee ra?” Ọ na wanniẹn wẹẹ: “Ẹo!” 22 Iran na tama rẹn wẹẹ: “De ọmwa ne u khin? Wẹ tama ima nian, ne ima miẹn ẹmwẹ tama iran ni gie ima uhunmwu. De ọmwa ne uwẹ ghi wẹẹ uwẹ khin na?” 23 Ọ na tama iran wẹẹ: “Mẹ ọre ọmwa nọ ghaa datu vbe uwu ato wẹẹ, ‘Wa ya odẹ ọghe Jehova* khian enọ diae,’ zẹvbe ne Aizaia ne akhasẹ tae.” 24 Avbe Farisi ẹre ọ gie iran na rre. 25 Ẹre iran na nọ rẹn wẹẹ: “Vbọ ghi zẹ ne uwẹ na dinmwi emwa ye amẹ, ugbẹnvbe a miẹn wẹẹ, u i re Kristi, ra Ẹlaija ra Akhasẹ na wẹẹ ọ dee?” 26 E Jọn na ghi wanniẹn iran wẹẹ: “Amẹ ẹre I dinmwi emwa yi. Orhunmwu ọkpa ne uwa ma rẹn, rre uwu ẹbu uwa, 27 nọ lele mwẹ dee vbe iyeke; I ma sẹ nọ gha rhan irri nọ rre ibata ẹre.” 28 E Bẹtani, vbe obọ nọkpa ọghe Jọdan, vbe eke ne Jọn na gha dinmwi emwa ye amẹ, ẹre avbe emwi na na sunu.

29 Vbe ẹdẹ nọ lelẹe, e Jọn keghi bẹghe Jesu vbe ọ bu ẹre dee; e Jọn na wẹẹ: “Ghee Oteghe Ohuan ọghe Osanobua nọ rhie orukhọ hin agbọn na rre! 30 Ọna ọre ọmwa ne I ghaa guan kaẹn vbe I khare wẹẹ: ‘Ọmwa nọ lele mwẹ dee vbe iyeke, ke odaro mẹ nẹ, rhunmwuda, irẹn rrọọ nẹ, a ke biẹ mwẹ.’ 31 Uhiẹn, mẹ ma te ka rẹn ọnrẹn, sokpan, evbọzẹe ne I na rre do gha dinmwi emwa ye amẹ, ọre na mieke na gie ẹre ma Ivbi Izrẹl.” 32 E Jọn vbe sẹ osẹ yọ, ọ na wẹẹ: “I keghi bẹghe orhiọn nọhuanrẹn, vbe ọ ke ẹrinmwi tuorre dee, ọ yevbe na ghee idu, ọ na rhuẹ yan rẹn. 33 Agharhemiẹn wẹẹ I ma te rẹn ọnrẹn, sokpan, Ọmwa nii nọ gie mwẹ ne I gha dinmwi emwa ye amẹ, keghi tama mwẹ wẹẹ: ‘Ọmwaikọmwa ne u miẹn wẹẹ orhiọn nọhuanrẹn tuorre do rhuẹ yan, ọmwa nii ẹre ọ dinmwi emwa ye uwu orhiọn nọhuanrẹn.’ 34 I miẹn ọnrẹn nẹ, I vbe sẹ osẹ yọ nẹ wẹẹ, irẹn ọre Ovbi Osanobua.”

35 Vbe ẹdẹ nọ ghi vbe lelẹe, e Jọn keghi mudia ke erhuanegbe ẹre eva. 36 Ọ ghi bẹghe Jesu vbe ọ khian gberra, ọ na kha wẹẹ: “Ghee Oteghe Ohuan ọghe Osanobua!” 37 Erhuanegbe Jọn eva nii ghi họn vbe ọ ta ẹmwẹ na, iran na ghi lele Jesu. 38 Jesu ghi ghee iyeke, ọ na bẹghe ẹre wẹẹ iran lele irẹn dee, ọ na ghi nọ iran wẹẹ: “Vbe uwa gualọ?” Iran na tama rẹn wẹẹ: “Rabai, de ehe ne u dia?” (Emwi na ya e Rabai kha vbe a gha zedu ẹre, ọre “Ọmamwaemwi.”) 39 Ọ na tama iran wẹẹ: “Wa larre, ne uwa do ghee ẹre.” Ẹre iran na lelẹe, iran na ya ghee ehe nọ dia. Iran na ghi tota kẹ vbe ẹdẹrriọ; odẹ ughaẹdẹ* nogie igbe* ẹre ẹghẹ ghaa ye. 40 Andru ne ọtiẹn e Saimọn Pita kegha re ọkpa vbe iran eva nii, ni lele Jesu vbe iran họn ẹmwẹ ne Jọn tae. 41 Ọtiọnrẹn ighẹ e Saimọn ẹre ọ ka wa miẹn, ọ na tama rẹn wẹẹ: “Ma miẹn e Mezaia nẹ” (evba ya e Mezaia kha, vbe a gha zedu ẹre, ọre “Kristi”). 42 Ẹre ọ na ghi rhie ẹre bu e Jesu. Jesu ghi ghee ẹre, ọ na tama rẹn wẹẹ: “Wẹ ọre Saimọn ne ovbi e Jọn; a ra gha tie ruẹ e Sifas” (evba yae kha ọre, “Pita”).

43 Vbe ẹdẹ nọ lelẹe, Jesu na wẹẹ irẹn rrie Galili. Ẹre ọ na miẹn e Filip, ọ na tama rẹn wẹẹ: “Do gha lele mwẹ khian.” 44 E Bẹtse-ada ẹre Filip ke rre, ẹvbo ọkpa ẹre irẹn vbe Andru kevbe Pita ke rre. 45 E Filip ghi miẹn e Nataniẹl, ọ na tama rẹn wẹẹ: “Ma miẹn ọmwa ne Mozis guan kaẹn vbe ebe Uhi, kevbe ne avbe Akhasẹ vbe gbẹn vbekpa ẹre. Ọni ọre Jesu ne ovbi e Josẹf, nọ ke Nazarẹt rre.” 46 Sokpan, e Nataniẹl na tama rẹn wẹẹ: “Emwi nọ maan rhọkpa gha sẹtin ke Nazarẹt ladian ra?” E Filip na tama rẹn wẹẹ: “Wẹ larre, ne u do ghee ẹre.” 47 Jesu ghi bẹghe Nataniẹl vbe ọ khian bu ẹre dee, ọ na suẹn gha ta ẹmwẹ ọnrẹn, ọ na wẹẹ: “Ghee ẹre oo! Ọna ẹre ọ gele re Ovbi Izrẹl nẹi ru ero.” 48 E Nataniẹl na ghi nọ rẹn wẹẹ: “Vbua ya rẹn mwẹ hẹ?” Jesu na tama rẹn wẹẹ: “I bẹghe ruẹ vbe ototọ erhan e fig, a te miẹn wẹẹ, e Filip do tie ruẹ.” 49 E Nataniẹl na wanniẹn wẹẹ: “Rabai, Ovbi Osanobua ẹre u khin, wẹ ọre Ọba ọghe Izrẹl.” 50 Jesu na wanniẹn ọnrẹn wẹẹ: “Rhunmwuda ne I na tama ruẹ wẹẹ, I bẹghe ruẹ vbe ototọ erhan e fig, ẹre u na yayi ra? U gha miẹn emwi ni sẹ ọna.” 51 Jesu na ghi tama rẹn wẹẹ: “Ne I ta ẹmwata ne uhunmwu ẹmwẹ ma uwa, wa gha bẹghe vbe ẹrinmwi gha kie yotọ, avbe odibosa ghi tuorre bu Ovbi ọmwa gha dee, nọ rre ghaa rre, nọ kpa ghi gha kpa.”

2 Ọ ghi rre ikpẹdẹ nogieha, iran kegha do ugie orọnmwẹ vbe Kena nọ rre Galili; iye Jesu kegha rre evba. 2 Iran vbe tie Jesu kevbe erhuanegbe ẹre gha die ugie orọnmwẹ nii.

3 Ọ ghi kẹ ekherhe ne ayọn fo, iye Jesu na do tama rẹn wẹẹ: “Iran i ghi mwẹ ayọn.” 4 Sokpan, Jesu keghi wanniẹn ọnrẹn wẹẹ: “Okhuo na, vbe ọni a ghi ya kaan imẹ vbe ruẹ hẹ?* Ẹghẹ mwẹ ma he sẹ.” 5 Ẹre iyẹe na tama iran ni ghae emwi vba wẹẹ: “Wa ru emwi nọ rhirhi we ne uwa ru.” 6 Na kha na, akhe amẹ ehan ọghe okuta kegha rre evba, ne emwa ya gha kpe obọ, iran ke rri evbare, zẹvbe ne uhi ọghe Ivbi e Ju khare; dọmwadẹ akhe na, gha sẹtin mu amẹ nọ sẹ omwa eva ra eha.* 7 Jesu keghi tama iran wẹẹ: “Wa sa amẹ vuọn avbe akhe na.” Iran keghi sa amẹ vuọn ehia sẹ unu. 8 Iyeke ọni, Jesu na tama iran wẹẹ: “Wa sa vbe amẹ na, ne uwa mu gie olaga ọghe ugie na.” Ẹre iran na gele ru vberriọ. 9 Olaga ọghe ugie nii keghi danmwẹ amẹ nii na ya khian ayọn, sokpan, ọ ma rẹn eke nọ ke rre (agharhemiẹn wẹẹ, eguọmwadia ni sa amẹ ni rre rẹnrẹn); ẹre olaga ọghe ugie nii na ghi tie ọdafẹn ọha, 10 ọ na tama rẹn wẹẹ: “Ayọn nọ maan sẹ, ẹre emwa ka mu ladian ne emwa da. Ayọn gha ghi suẹn gha gbe emwa nẹ, iran ke do mu ọghe kẹkan ladian. Sokpan, eban ẹre uwẹ ghi do mu ayọn nọ maan sẹ ladian.” 11 Ọna ọre emwi ọyunnuan nokaro ne Jesu ru. E Kena nọ rre Galili ẹre ọ na ru ẹre. Odẹ vbenian ẹre ọ ya rhie uyi ẹre ma, avbe erhuanegbe ẹre keghi mu ẹtin yan rẹn.

12 Vbe iyeke ọni, irẹn, iyẹe, etiọnrẹn nikpia kevbe erhuanegbe ẹre keghi kpa gha rrie Kapaniọm, sokpan, iran ma kpẹẹ vba.

13 Ugie Alagberra ọghe Ivbi e Ju ghi bu otọ nẹ, Jesu keghi kpa gha rrie Jerusalẹm. 14 Ọ ghi la ọgua Osa, ọ na miẹn emwa ni khiẹnnẹ ẹmila, ohuan kevbe idu, kẹ kevbe iran ni fian igho* ni tota ye aga ọghe iran. 15 Vbe Jesu ghi ku irri eso kugbe ya ru asan nẹ, ọ na khulo iran hia ni khiẹnnẹ ohuan kevbe ẹmila hin uwu ọgua Osa rre; ọ keghi zagha igho ọghe iran ni fian igho* kua, ọ na vbe ya eteburu ọghe iran uhunmwu rhu. 16 Ọ keghi tama iran ni khiẹn idu wẹẹ: “Wa viọ ena hia hin emwa rre! Wa ghẹ ghi ya owa Erha mwẹ khian eke na na do ẹki!” 17 Avbe erhuanegbe ẹre keghi yerre wẹẹ, a gbẹn ọnrẹn yotọ wẹẹ: “Ẹmwẹ owa ruẹ gha fian mwẹ re, ọ ghi gha yọn vbe uwu egbe mwẹ vbe na ghee erhẹn.”

18 Ẹre Ivbi e Ju na ghi nọ rẹn wẹẹ: “De iwinna ọyunnuan ne u gha sẹtin ru ye ima aro, ne ima ya rẹn wẹẹ, u mwẹ asẹ ne u ya ru avbe emwi na?” 19 Jesu na ghi wanniẹn iran wẹẹ: “Wa guọghọ ọgua Osa na sotọ; I gha ya ikpẹdẹ eha werriegbe bọe sẹ odukhunmwu.” 20 Ẹre Ivbi e Ju na ghi tama rẹn wẹẹ: “Ọgua Osa na ya ukpo ehan yan iyeva (46) bọ, ẹre uwẹ wẹẹ, u gha ya ikpẹdẹ eha bọ sẹ odukhunmwu ra?” 21 Sokpan, ọgua Osa nọ ghaa guan kaẹn ọre egbe ẹre. 22 A ghi huẹn Jesu kpaegbe nẹ vbe idin, erhuanegbe ẹre keghi yerre wẹẹ, ọ ka gha ta ẹmwẹ na, iran na ghi ya emwi ne ebe nọhuanrẹn tae yi kevbe ẹmwẹ ne Jesu tae.

23 Sokpan, vbe ẹghẹ nọ ya gha rre Jerusalẹm vbe ẹghẹ na ya gha do ugie Alagberra, emwa nibun keghi mu ẹtin yan rẹn* vbe iran ghi bẹghe emwi ọyunnuan nọ ghaa ru. 24 Sokpan, Jesu ma wa gba ẹko iran, rhunmwuda, ọ rẹn aro emwa ne iran hia khin. 25 Deba ọni, esa i rrọọ ne ọmwa khian ya tama rẹn vbene emwa nagbọn ye hẹ, rhunmwuda, ọ rẹn emwi nọ rre emwa ekhọe.

3 E Farisi ọkpa kegha rrọọ na tie ẹre Nikodimọs, ọkaolotu ọghe Ivbi e Ju ghaa nọ. 2 Ọ keghi bu e Jesu gha dee vbe asọn, ọ na tama rẹn wẹẹ: “Rabai, ma rẹnrẹn wẹẹ, ọmamwaemwi ne Osanobua gie rre ẹre u khin, rhunmwuda, ọmwa rhọkpa i rrọọ nọ gha sẹtin ru iwinna ọyunnuan ne uwẹ ru na, vbe ẹ i re te Osanobua gu ọmwa nii rrọọ.” 3 Jesu na ghi wanniẹn ọnrẹn wẹẹ: “Ne I ta ẹmwata ne uhunmwu ẹmwẹ ma ruẹ, ọmwa i khian sẹtin la* Arriọba Osanobua, vbe ẹ i re te a werriegbe biẹ ọre.”* 4 E Nikodimọs na ghi nọ rẹn wẹẹ: “Vbe a khian ya sẹtin werriegbe biẹ agikpa hẹ? Ọ gha ma ye sẹtin werriegbe la ẹko iyẹe, na werriegbe biẹ ọre?” 5 Jesu na ghi wanniẹn wẹẹ: “Ne I ta ẹmwata ne uhunmwu ẹmwẹ ma ruẹ, ọmwa nọ gha sẹtin la Arriọba Osanobua i rrọọ, vbe ẹ i re te a ya amẹ kevbe orhiọn biẹ ọre. 6 Ọmwa nagbọn* ẹre ọ biẹ ọmwa nagbọn,* orhiọn ẹre ọ vbe biẹ orhiọn. 7 Ghẹ gi ẹre kpa ruẹ odin, rhunmwuda ne I na tama ruẹ wẹẹ: Te a gha werriegbe biẹ uwa. 8 Ẹhoho sẹtin hoho ghee ehe nọ rhirhi khọn rẹn, u ghi gha họn vbe ọ ghaa la, sokpan, u ma rẹn ehe nọ ke dee, ra ehe nọ rrie. Erriọ ẹre ọ vbe ye ne ọmwaikọmwa na lekpa orhiọn biẹ.”

9 E Nikodimọs na ghi nọ rẹn wẹẹ: “De vbene egbe emwi vbenian khian ya sẹtin sunu hẹ?” 10 Jesu na ghi wanniẹn wẹẹ: “Ẹ i re ọmamwaemwi, ẹre uwẹ sie khin vbe otọ Izrẹl? Vbozẹ ne u ma na ghi rẹn ena hia? 11 Ne I ta ẹmwata ne uhunmwu ẹmwẹ ma ruẹ, emwi ne ima rẹnrẹn ẹre ima ta, emwi ne ima bẹghe, ẹre ima vbe sẹ osẹ yi; sokpan, wa ma miẹn osẹ ne ima sẹ yi. 12 I ta emwi nọ dekaẹn agbọn na ma uwa, wa ma yayi, I gha ghi ta ẹmwẹ ẹrinmwi ma uwa, ẹre uwa khian ghi na yayi ra? 13 Gberra ọni, ọmwa rhọkpa i rrọọ nọ he ka yo ẹrinmwi, sokpan, orhunmwu ọkpa nọ he ke ẹrinmwi gha die agbọn na, ọre Ovbi ọmwa. 14 Zẹvbe ne Mozis tọn ẹyẹn nii mu vbe uwu ato, erriọ ẹre a khian vbe tọn Ovbi ọmwa mu, 15 ne ọmwaikọmwa nọ yaeyi mieke na gha mwẹ arrọọ ọghe etẹbitẹ.

16 “Rhunmwuda, Osanobua hoẹmwẹ agbọn na sẹrriọ wẹẹ, ọ na rhie Ovbi ẹre ne ukpọmọkpa ne emwa nagbọn, ne ọmwaikọmwa nọ rhie ẹre ma wẹẹ irẹn mu ẹtin yan rẹn ghẹ fuan, sokpan, nọ gha mwẹ arrọọ ọghe etẹbitẹ. 17 Ẹ i re te Osanobua gie Ovbi ẹre gha die agbọn, nọ do bu ohiẹn agbọn na, sokpan, te ọ gie ẹre gha dee, ne agbọn mieke na la obọ ẹre miẹn imiẹnfan. 18 Ọmwaikọmwa gha rhie ẹre ma wẹẹ irẹn mu ẹtin yan rẹn, a i khian bu ohiẹn ọnrẹn. Sokpan, ọmwaikọmwa nọ ma rhie ẹre ma wẹẹ irẹn mu ẹtin yan rẹn, a bu ohiẹn ọnrẹn nẹ, rhunmwuda, ọ ma rhie ẹre ma wẹẹ irẹn mu ẹtin yan ukpọmọkpa* ọghe Osanobua. 19 Emwi na khian rhunmwuda ẹre bu ohiẹn emwa na khin: ukpa rrie agbọn na, sokpan, emwa nagbọn na hoẹmwẹ ebiebi, ne iran gha te ya hoẹmwẹ ukpa, rhunmwuda, emwi dan ẹre ọ gua iran obọ ro. 20 Ọmwaikọmwa nọ fuẹn vbe uwu emwi dan, ma hoẹmwẹ ukpa, ẹ i vbe sikẹ ukpa hiehie, ne emwi dan nọ ru ghẹ mieke na vẹ. 21 Sokpan, ọmwaikọmwa nọ ru emwi nọ khẹke, ẹre a miẹn vbe eke ne ukpa ye, ẹghẹ nii, ọ ghi dewarorua wẹẹ, ọ ru emwi vbene Osanobua gualọe yi.”

22 Iyeke ọni, Jesu kevbe erhuanegbe ẹre keghi kpa gha rrie avbe igue ni rre Judia, ọ na gu iran gha rre evba vbe ọwara ẹghẹ eso, ọ na gha dinmwi emwa ye amẹ.* 23 Sokpan, e Jọn na vbe gha dinmwi emwa ye amẹ vbe Inọn nọ ma rree gbe ne Selim, rhunmwuda, amẹ wa vuọn evba. Emwa na gha bu ẹre rre, ọ na gha dinmwi iran ye amẹ; 24 vbe ẹghẹ na kha na, a ma he mu e Jọn ye eghan.

25 Ọ ghaa mwẹ ẹghẹ ọkpa ne erhuanegbe Jọn kevbe Ovbi e Ju ọkpa ya gha muan ẹmwẹ vbekpa ilele ọghe akpehuan. 26 Ẹre iran na ghi bu e Jọn gha dee do tama rẹn wẹẹ: “Rabai, u ma miẹn okpia nii ne u ghaa ta ẹmwẹ ọnrẹn vbe ẹdẹrriọ, ne uwa gba gha rre obọ nọkpa ọghe Jọdan, ọ wa dinmwi emwa ye amẹ, emwa hia wa vbe bu ẹre yo.” 27 Ẹre Jọn na ghi wanniẹn wẹẹ: “Ọmwa rhọkpa i khian sẹtin gha mwẹ emwi rhọkpa, vbe ẹ i re te Osanobua rhie nẹẹn.* 28 Sirra uwa ẹre I na tae wẹẹ, ‘Ẹ i re imẹ ọre Kristi, sokpan, te a gie mwẹ karo nẹẹn.’ 29 Ọmwaikọmwa nọ yan ovbiọha ọre ọdafẹn ọha. Sokpan, ọsie ọdafẹn ọha gha mudia, ọ na họn vbe ọdafẹn ọha guan, ẹko ẹre ghi vuọn ne oghọghọ, rhunmwuda nọ na họn urhu ọdafẹn ọha. Erriọ ẹre ẹko mwẹ wa vbe vuọn ne oghọghọ. 30 Te iwinna ọmwa nii khian gha mwẹ alaghodaro yọ, sokpan, te ọghomwẹ khian gha dibu yọ.”

31 Ọmwa nọ ke odukhunmwu rre, ẹre ọ sẹ emwa hia. Ọmwa nọ ke agbọn na rre, agbọn na ẹre ọ ke rre; emwi nọ dekaẹn agbọn na, ẹre ọ vbe guan kaẹn. Ọmwa nọ ke ẹrinmwi rre, ẹre ọ sẹ emwa hia. 32 Emwi ne aro ọre sẹ kevbe emwi ne ehọ ọre họn, ẹre ọ sẹ osẹ yi, sokpan, ọmwa rhọkpa i miẹn ẹmwẹ ọnrẹn yi. 33 Ọmwaikọmwa gha miẹn osẹ ọghẹe yi, te ọmwa nii so igiẹ yọ wẹẹ, ọmwa ẹmwata ẹre Osanobua khin. 34 Ọmwa ne Osanobua gie keghi ta ẹmwẹ Osanobua, rhunmwuda, Osanobua gha khian rhie orhiọn ọghẹe ne ọmwa, ẹ i yae mwẹ akhaẹn. 35 Evbavba hoẹmwẹ Ovbi ẹre, ọ vbe viọ emwi hia ye ọre obọ nẹ. 36 Ọmwa nọ rhie ẹre ma wẹẹ irẹn mu ẹtin yan Ovbi Osanobua, ẹre ọ khian gha mwẹ arrọọ ọghe etẹbitẹ; ọmwaikọmwa nọ he ẹmwẹ ye Ovbi Osanobua obọ, arrọọ i khian sẹ ọre obọ, sokpan, izohu Osanobua ghi gha rre ọre uhunmwu.

4 Enọyaẹnmwa keghi rẹn wẹẹ, avbe Farisi họn nẹ wẹẹ, emwa ni do gha deba irẹn* zẹvbe erhuanegbe kevbe ne irẹn dinmwi ye amẹ ẹre ọ bun sẹ ọghe Jọn— 2 sokpan, Jesu tobọre ma gha dinmwi emwa ye amẹ, erhuanegbe ẹre, ẹre ọ ghaa ru ẹre— 3 ẹre ọ na ghi kpa vbe Judia, ọ na werriegbe gha rrie Galili. 4 Sokpan, te ọ gha la e Sameria gberra. 5 Ọ keghi sẹ ẹvbo ọkpa na tie ẹre Saika vbe otọ e Sameria, nọ ma rree gbe ne otọ ne Jekọb mu ne ovbi ẹre ighẹ e Josẹf. 6 Uhiẹn, uhae ọghe Jekọb ghaa rre evba. Vbe ẹghẹ na kha na, egbe wọọ e Jesu nẹ nọ ya khian dee sin, ọ na ghi tota ye uhae nii. Odẹ ughaẹdẹ* nogie ehan* ghaa nọ.

7 Okhuo ọkpa ne Ovbi e Sameria keghi do sa amẹ. Jesu na tama rẹn wẹẹ: “Sa amẹ mẹ wọn.” 8 (Vbe ẹghẹ na kha na, erhuanegbe ẹre kpa gha rrie orere ẹvbo ya dẹ evbare.) 9 Ẹre okhuo e Sameria nii na nọ rẹn wẹẹ: “Vbọzẹ ne u na we ne imẹ ne Ovbi e Sameria sa amẹ ne uwẹ ne Ovbi e Ju wọn?” (Rhunmwuda, Ivbi e Ju kevbe Ivbi e Sameria i la ẹvbo egbe.) 10 Jesu na ghi wanniẹn ọnrẹn wẹẹ: “U ma rẹn ẹse ọhẹ ọghe Osanobua, u ma vbe rẹn aro ọmwa nọ tama ruẹ wẹẹ, ‘Sa amẹ mẹ wọn.’ U kpa rẹn, u gha te tama rẹn nọ sa amẹ nuẹn, ẹghẹ nii, ọ ghi sa amẹ ọghe arrọọ nuẹn.” 11 Okhuo nii na ghi tama rẹn wẹẹ: “Enọwanrẹn, wẹ i kue mwẹ ikoroba na ya sa amẹ, uhae na wa vbe dinmwi. De eke ne uwẹ ghi na miẹn amẹ ọghe arrọọ ne u guan kaẹn na? 12 E Jekọb ne erha ima odede ẹre ọ fian uhae na ne ima. Uhae na, ẹre irẹn, ivbi ẹre kevbe avbe ẹmila ọghẹe na vbe gha wọn amẹ. Te uwẹ ghi wẹẹ, wẹ sẹ e Jekọb ra?” 13 Jesu keghi wanniẹn ọnrẹn wẹẹ: “Ọmwaikọmwa nọ wọn amẹ vbe uhae na, ovbamẹ gha ye werriegbe gbe ẹre. 14 Sokpan, ọmwaikọmwa nọ wọn vbe amẹ ne I khian sa nẹẹn, ovbamẹ i ghi werriegbe gbe ọmwa nii hiehie. Amẹ ne I khian sa nẹẹn ghi do yevbe ẹzẹ vbe uwu egbe ẹre, ọ ghi yae gha mwẹ arrọọ ọghe etẹbitẹ.” 15 Okhuo nii na ghi tama rẹn wẹẹ: “Enọwanrẹn lahọ, sa mẹ vbe nene amẹ, ne ovbamẹ ghẹ ghi werriegbe gbe mwẹ, ne I ghẹ ghi vbe do gha sa amẹ vbe emwa.”

16 Ọ na ghi tama rẹn wẹẹ: “Gha khian, ya tie ọdafọn rre, ne uwẹ vbe ọre gba gha die emwa.” 17 Okhuo nii na wanniẹn wẹẹ: “I i mwẹ ọdọ.” Ẹre Jesu na tama rẹn wẹẹ: “Ẹmwata ẹre u tae, ne u na wẹẹ u i mwẹ ọdọ. 18 Rhunmwuda, ọdọ isẹn ẹre u ka gha mwẹ, okpia ne u gue na i vbe re ọdafọn. Ẹmwata ẹre u gele ta.” 19 Okhuo nii na ghi tama rẹn wẹẹ: “Enọwanrẹn, I wa bẹghe ẹre nian wẹẹ, akhasẹ ẹre u khin. 20 Uhunmwu oke na, ẹre avbe erha ima odede na gha ga Osanobua, sokpan, wa khian ghi kha, wa na wẹẹ, e Jerusalẹm ọkpa ẹre ọ khẹke na na gha ga Osanobua.” 21 Jesu na ghi tama rẹn wẹẹ: “Ne I ta ẹmwata ma ruẹ okhuo na, ẹghẹ dee na gha ya miẹn wẹẹ, wa i khian ghi gha ga Evbavba vbe uhunmwu oke na, ra vbe Jerusalẹm. 22 Wa ne Ivbi e Sameria ma rẹn ọmwa ne uwa ga; sokpan, ma ne Ivbi e Ju rẹn ọmwa ne ima ga, rhunmwuda, egbe Ivbi e Ju, ẹre imiẹnfan ke suẹn. 23 Vbọrhirhighayehẹ, ẹghẹ dee ne emwa ni gele ga Evbavba gha na ya orhiọn kevbe ẹmwata gae; ẹghẹ nii wa vbe sẹ nẹ nian. Vbene ẹmwata, egbe emwa vberriọ ẹre Evbavba hoo nọ gha ga irẹn. 24 Orhiọn ẹre Osanobua khin, te ọ khẹke ne emwa ni gae vbe gha ya orhiọn kevbe ẹmwata gae.” 25 Okhuo nii na tama rẹn wẹẹ: “I rẹnrẹn wẹẹ, e Mezaia na tie ẹre Kristi gha rre. Ọ gha rre, ọ gha rhan otọ emwi hia ma ima.” 26 Jesu na tama rẹn wẹẹ: “Mẹ nọ gu ruẹ guan na nọ.”

27 Vbe uwu ẹghẹ nii, ẹre erhuanegbe ẹre na rre. Ọ na wa kpa iran odin wẹẹ, Jesu gu okhuo guan. Sokpan, a ma miẹn ọkpa vbe uwu iran nọ nọ rẹn wẹẹ: “Vbua gualọ?” ra “Vbọzẹ ne u na gu okhuo na guan?” 28 Ẹre okhuo nii na sẹ akhe amẹ ọghẹe rae ye evba, ọ na kpa gha rrie orere ẹvbo, ọ na ya tama emwa ni rre evba wẹẹ: 29 “Wa larre oo, ne uwa do ghee okpia ọkpa nọ ta emwi hia ne I he ru ma mwẹ. Ọ ye mwẹ wẹẹ, irẹn ọre Kristi!” 30 Ẹre iran na ghi ke orere ẹvbo nii bu e Jesu gha dee.

31 Vbe ẹghẹ na kha na, erhuanegbe ẹre kegha tama rẹn wẹẹ: “Rabai, wẹ rri evbare.” 32 Sokpan, ọ keghi tama iran wẹẹ: “I mwẹ evbare ne I khian re, ne uwa ma rẹn vbekpa ẹre.” 33 Erhuanegbe ẹre na suẹn gha nọ egbe iran wẹẹ: “A ghi mu evbare gie ẹre yi?” 34 Jesu na ghi tama iran wẹẹ: “Evbare mwẹ ọre ne I ru iho ọghe ọmwa nọ gie mwẹ rre, ne I vbe ru iwinna nọ mu mẹ fo. 35 Ẹ i re uwa ẹre ọ wẹẹ uki enẹ ẹre ọ ghi kẹ, ọ ke sẹ ẹghẹ na ya rhọ emwiokọ? Ne I tama uwa: Wa tọn aro mu, ne uwa ghee ugbo, wa gha miẹn wẹẹ emwiokọ sẹ nẹ na rhọ. Vbene a wa guan na, 36 a suẹn gha ha osa ne ọmwa nọ rhọ emwiokọ nẹ, ọ vbe suẹn gha si emwiokọ ni khian gha rrọọ vbe etẹbitẹ koko nẹ, ne ẹko mieke na gha rhiẹnrhiẹn ọmwa nọ kọ emwiokọ kevbe nọ rhọ emwiokọ. 37 Rhunmwuda ọni, ẹmwata ẹre ẹmwẹ na khin: Ọmwa nọ kọ emwiokọ, ughaẹn, nọ rhọ ẹre, ughaẹn. 38 I gie uwa ladian, ne uwa ya rhọ emwiokọ ne uwa ma miẹn ẹsọn yi. Emwa ọvbehe miẹn ẹsọn yọ nẹ; te uwa ghi vbe deba iran rri ere okhuan ne iran khuaẹn.”

39 Ivbi e Sameria nibun ni rre orere ẹvbo nii keghi mu ẹtin yan rẹn, rhunmwuda ẹmwẹ ne okhuo nii tae, nọ na wẹẹ: “Ọ ta emwi hia ne I he ru ma mwẹ.” 40 Ivbi e Sameria nii ghi bu ẹre rre, iran na we nọ tota ke iran. Ọ na ghi gbe ikpẹdẹ eva vba. 41 Rhunmwuda ọni, emwa ọvbehe nibun keghi do yayi rhunmwuda ẹmwẹ ne Jesu tae. 42 Iran na ghi tama okhuo nii wẹẹ: “Ẹ i re rhunmwuda ẹmwẹ ne u tae ọkpa ẹre ọ ya ima yayi; sokpan, ma tobọ ima họn ẹmwẹ ne unu ẹnrẹn nẹ, ma vbe rẹn wẹẹ, okpia na ẹre ọ gele re ọmiọnmwafan ọghe agbọn na.”

43 Jesu ghi gbe ikpẹdẹ eva nẹ vba, ọ na kpa gha rrie Galili. 44 Jesu tobọre khare wẹẹ, a i rhie ọghọ ne akhasẹ vbe ẹvbo ẹre. 45 Ọ ghi sẹ e Galili, emwa ni rre evba keghi rhan obọ miẹn ọnrẹn yi, rhunmwuda, iran tobọ iran vbe yo ugie na do vbe Jerusalẹm, aro iran sẹ emwi hia ne Jesu ru vba.

46 Ọ na werriegbe gha die Kena nọ rre Galili, ọni ọre ehe nọ na ya amẹ khian ayọn. Ọ ghaa mwẹ okpia ọkpa vbe Kapaniọm, ne ovbi ẹre nokpia ghaa khuọnmwi. Ọkhaẹmwẹ ọba ẹre okpia na ghaa khin. 47 Okpia na ghi họn wẹẹ Jesu ke Judia gha die Galili, ọ na bu ẹre ya rinmwiaẹn, nọ gha die owa irẹn, nọ do mu ovbi irẹn nokpia egbe rran, rhunmwuda, te ovbi ẹre khian ghi wu. 48 Sokpan, Jesu na tama rẹn wẹẹ: “Wa i khian sẹtin yayi, vbe ẹ i re te uwa ya aro uwa miẹn iwinna ọyunnuan ughughan nẹ.” 49 Ọkhaẹmwẹ nii keghi tama rẹn wẹẹ: “Enọyaẹnmwa lahọ, lele mwẹ gha khian, nẹ ghẹ kẹ ovbi mwẹ nekherhe ya wu.” 50 Jesu na ghi tama rẹn wẹẹ: “Gha khian; egbe rran ovbuẹ nẹ.” Okpia nii keghi ya ẹmwẹ ne Jesu tae yi, ẹre ọ na kpa. 51 Sokpan, vbe ọ ghi khian, eguọmwadia ẹre na vba ẹre vbe odẹ. Iran na tama rẹn wẹẹ, egbe rran ovbi ẹre nẹ.* 52 Okpia nii na ghi nọ iran, ẹghẹ ne egbe ya rran rẹn. Iran na wanniẹn ọnrẹn wẹẹ: “Ughaẹdẹ* nogie ihinrọn* vbe nodẹ, ẹre evbirraro* nii ya fo vbe egbe ẹre.” 53 Ẹre erhae na ghi yerre wẹẹ, ẹghẹ nii zẹẹ, ẹre Jesu ya tama irẹn wẹẹ: “Egbe rran ovbuẹ nẹ.” Rhunmwuda ọni, irẹn kevbe emwa hia ni rre igiowa ẹre na ghi ya e Jesu yi. 54 Ọna ọre iwinna ọyunnuan nogieva ne Jesu ru, vbe ọ ke Judia gha die Galili.

5 Iyeke ọni, ọ keghi sẹ ẹghẹ ne Ivbi e Ju ya do ugie ọghe iran; ẹre Jesu na gha rrie Jerusalẹm. 2 Ọ ghaa mwẹ onurho ọkpa vbe Jerusalẹm na tie ẹre Onurho Ohuan. Odighi ọkpa kegha rre evba; emwi na tie odighi na vbe Hibru ọre Bẹtzeta. Ọlẹla* isẹn keghi lẹga odighi nii. 3 Avbe ọkhọnmwọ nibun, avbe arhuaro, avbe uke kevbe emwa ne obọ iran ra owẹ iran sikuẹn keghi lovbiẹ lele evba. 4* —— 5 Sokpan, ọ ghaa mwẹ okpia ọkpa nọ ghaa rre evba nii; ukpo eva i rrọọ vbe iyeva (38) ẹre ọ ye nọ ke khuọnmwi. 6 Jesu keghi bẹghe okpia nii vbe ọ lovbiẹ vba; ọ rẹnrẹn wẹẹ, ọ kpẹẹ re nọ ke khuọnmwi, ẹre ọ na ghi nọ rẹn wẹẹ: “U hoo ne egbe rran ruẹ ra?” 7 Okpia nọ khuọnmwi nii keghi wanniẹn ọnrẹn wẹẹ: “Enọwanrẹn, ẹghẹ ke ẹghẹ na ya lughu amẹ na, I i miẹn ọmwa nọ mu mwẹ fi uwu ẹre. Sokpan, I gha we ne I ya laọ, vbene I te sẹ evba, ọmwa ọvbehe laọ nẹ.” 8 Jesu na tama rẹn wẹẹ: “Kpaegbe! Kie ewa* ruẹ, ne u suẹn gha khian.” 9 Vbe ọwara ọkpa nii, egbe keghi rran okpia nii. Ọ na ghi kie ewa* ọghẹe, ọ na suẹn gha khian.

Ẹdẹ Ikẹtin ẹre ẹdẹrriọ ghaa khin. 10 Ivbi e Ju na suẹn gha tama okpia nii na mu ẹre egbe rran wẹẹ: “Ẹrẹna ọre Ẹdẹ Ikẹtin; rhunmwuda ọni, uhi ma kue yọ ne u mu ewa* nii vbe ẹrẹna.” 11 Sokpan, ọ na wanniẹn iran wẹẹ: “Ọmwa nọ mu mwẹ egbe rran ẹre ọ tama mwẹ wẹẹ, ‘Kie ewa* ruẹ, ne u suẹn gha khian.’” 12 Iran na ghi nọ rẹn wẹẹ: “De ọmwa nọ tama ruẹ ne u ‘kie ewa* ruẹ, ne u suẹn gha khian’?” 13 Sokpan, okpia nii ma rẹn ọmwa nọ mu ẹre egbe rran, rhunmwuda, Jesu fẹko la uwu ẹbu emwa ni ghaa rre evba nẹ.

14 Iyeke ọni, Jesu keghi miẹn okpia nii vbe ọgua Osa, ọ na tama rẹn wẹẹ: “Ghee ẹre, egbe rran ruẹ nẹ nian. Nọnaghiyerriọ, zobọ vbe orukhọ na ru, ne emwi nọ wegbe sẹ ọna ghẹ rruan ruẹ.” 15 Ẹre okpia nii na kpa, ọ na ya tama Ivbi e Ju wẹẹ, Jesu ẹre ọ mu irẹn egbe rran. 16 Rhunmwuda ọni, Ivbi e Ju kegha zẹ Jesu kpokpo, rhunmwuda nọ na gha ru emwi vbenian vbe Ẹdẹ Ikẹtin. 17 Sokpan, Jesu na tama iran wẹẹ: “Te Erha mwẹ ye winna do fi ebanban, ọni ẹre ọ si ẹre ne I na ye winna.” 18 Ọna ẹre ọ si ẹre ne Ivbi e Ju na kakabọ rhiegba yọ wẹẹ, te iran khian gbe Jesu rua, rhunmwuda, vbe aro iran, ẹ i wa re uhi Ẹdẹ Ikẹtin ọkpa ẹre ọ rra re, sokpan, ọ na vbe gha mu egbe ẹre ye ukpo ọghe Osanobua, ọ na gha tie Osanobua Erhae.

19 Ẹre Jesu na ghi wanniẹn iran wẹẹ: “Ne I ta ẹmwata ne uhunmwu ẹmwẹ ma uwa, ẹghẹ ọkpa i rrọọ, ne Ọmọ ya zẹ ọghe obọ ẹre ru, sokpan, emwi nọ miẹn wẹẹ Evbavba ru, ẹre irẹn vbe ru. Rhunmwuda, emwi ke emwi ne Evbavba ru, ẹre Ọmọ vbe ru. 20 Rhunmwuda, Evbavba hoẹmwẹ Ọmọ, ọ vbe ma ẹre emwi hia ne irẹn tobọ irẹn vbe ru. Ọ gha vbe ma ẹre emwi nọ sẹ enena, nọ mieke na yan uwa unu ruan. 21 Zẹvbe ne Evbavba huẹn emwa ni wulo kpaegbe, ọ ghi rhie arrọọ ne iran, erriọ ẹre Ọmọ vbe ya rhie arrọọ ne ọmwaikọmwa ne irẹn hoo ne irẹn rhie ẹre na. 22 Evbavba i tobọre bu ohiẹn ọmwaikọmwa, sokpan, ọ rhie asẹ hia ne Ọmọ nẹ, nọ ya gha bu ohiẹn emwa hia, 23 ne emwa hia mieke na gha rhie ọghọ ne Ọmọ zẹvbe ne iran vbe rhie ọghọ ne Evbavba. Ọmwaikọmwa nọ ma rhie ọghọ ne Ọmọ, ọmwa nii ma vbe rhie ọghọ ne Evbavba nọ gie ẹre gha dee. 24 Ne I ta ẹmwata ne uhunmwu ẹmwẹ ma uwa, ọmwaikọmwa nọ họn ẹmwẹ ne I tae, ọ na vbe ya Ọmwa nii nọ gie mwẹ rre yi, arrọọ ọghe etẹbitẹ gha sẹ ọre obọ; a i khian ghi bu ohiẹn uwu gbe ẹre, sokpan, ọ la uwu gberra gha rrie arrọọ nẹ.

25 “Ne I ta ẹmwata ne uhunmwu ẹmwẹ ma uwa, ẹghẹ dee ne emwa ni wulo gha ya họn urhu Ovbi Osanobua, emwa ni họn ẹmwẹ nẹẹn ghi do gha rrọọ; ẹghẹ nii sẹ nẹ nian. 26 Evbavba ọre ẹzi ọghe arrọọ,* rhunmwuda ọni, ọ vbe rhie asẹ ne Ọmọ nẹ, nọ vbe ya gha re ẹzi ọghe arrọọ. 27 Evbavba vbe rhie asẹ ne Ọmọ nẹ, nọ ya gha bu ohiẹn, rhunmwuda, Ovbi ọmwa ẹre Ọmọ khin. 28 Wa ghẹ gi ọna yan uwa unu ruan, rhunmwuda, ẹghẹ dee, ne iran hia ni rre uwu idin ayere gha ya họn urhu ẹre, 29 iran ghi ladian. A gha huẹn iran ni ru emwi esi kpaegbe ne iran gha rrọọ, a ghi huẹn iran ni ru emwi dan kpaegbe, na bu ohiẹn iran. 30 Ẹghẹ ọkpa i rrọọ ne I ya zẹ ọghe obọ mwẹ ru. Emwi ne Evbavba tama mwẹ ẹre I ya bu ohiẹn; I i vbe bu ohiẹn eku, rhunmwuda, I i ya emwi nọ rrọ mwẹ ekhọe ru emwi, sokpan, emwi ne Ọmwa nii nọ gie mwẹ rre hoo ne I ru, ẹre I ru.

31 “Adeghẹ imẹ ọkpa ẹre ọ sẹ osẹ ne egbe mwẹ, ẹmwẹ ne I ta i gia rhie zẹvbe osẹ ẹmwata. 32 Ọmwa ọvbehe rrọọ nọ sẹ osẹ mẹ, mẹ vbe rẹn wẹẹ, ẹmwẹ nọ ta vbekpa mwẹ, ẹmwata nọ. 33 Wa gie emwa bu e Jọn, ọ na vbe sẹ osẹ ẹmwata vbekpa mwẹ. 34 Vbọrhirhighayehẹ, ẹ i re te I gualọ ọmwa nọ khian sẹ osẹ mẹ, sokpan, te I wa ta avbe emwi na ma uwa, ne uwa mieke na miẹn fan. 35 Ukpa nọ baa kevbe nọ fi wainwain, ẹre okpia nii ghaa khin. Ukpa ọghẹe te ka gha bọbọ uwa egbe vbe ẹghẹ okaro, sokpan, ovbi ẹghẹ kherhe ẹre ọ ya bọbọ uwa egbe. 36 Sokpan, I mwẹ osẹ nọ sẹ ọghe Jọn, ọni ọre iwinna ne Evbavba mu mẹ ne I ru; avbe iwinna ne I ru na, ẹre ọ sẹ osẹ yọ wẹẹ, Evbavba ẹre ọ gie mwẹ rre. 37 Evbavba nọ gie mwẹ rre vbe sẹ osẹ mẹ. Wa ma he ka họn urhu ẹre ẹdẹ, wa ma he vbe miẹn ugbaro ọre ẹdẹ.* 38 Wa ma kọ ẹmwẹ ọnrẹn ye orhiọn, rhunmwuda, wa ma ya ọmwa nọ gie rre yi.

39 “Wa tie Ebe Nọhuanrẹn, rhunmwuda, wa roro ẹre wẹẹ, ọni gha ya arrọọ ọghe etẹbitẹ sẹ uwa obọ; sokpan, Ebe Nọhuanrẹn na kha na, ẹre ọ sẹ osẹ mẹ. 40 Ọrheyerriọ, wa ma hoo ne uwa bu mwẹ gha dee, ne uwa mieke na gha mwẹ arrọọ. 41 I i gualọ etian* vbe obọ emwa nagbọn, 42 sokpan, I rẹnrẹn wẹẹ, wa i mwẹ ahoẹmwọmwa ọghe Osanobua vbe ekhọe uwa. 43 Eni Erha mwẹ ẹre I ya rre, sokpan, wa ma miẹn mwẹ yi. Adeghẹ ọmwa ọvbehe na ya eni obọ ẹre rre, wa ghi miẹn ọnrẹn yi. 44 De vbene uwa khian ya sẹtin yayi hẹ, ugbẹnvbe a miẹn wẹẹ, etian* ne uwa ne emwa nagbọn rhie ne egbe, ẹre uwa gualọ, vbene uwa i na gualọ etian nọ ke obọ Osanobua ọkpa nọ rrọọ rre? 45 Vbọrhirhighayehẹ, wa ghẹ roro ẹre wẹẹ, I gha ba uwa ifiẹzọ ma Evbavba; sokpan, orhunmwu ọkpa rrọọ nọ ba uwa ifiẹzọ, ọni ọre Mozis ne uwa ya aro kọ. 46 Ọghe ne ẹmwata, akpawẹ uwa ya e Mozis yi, te uwa gha te vbe ya mwẹ yi, rhunmwuda, e Mozis gbẹnnẹ emwi ne I gha ru yotọ. 47 Sokpan, adeghẹ uwa ma ya ẹmwẹ nọ gbẹnnẹ yotọ yi, vbe uwa khian ghi ya ya ẹmwẹ ne I ta yi hẹ?”

6 Vbe iyeke ọni, Jesu keghi fian Okun e Galili rra; okun na ẹre a vbe tie ẹre Taibirias. 2 Emwa nibun kegha bi lelẹe khian, rhunmwuda, te aro iran wa gha sẹ iwinna ọyunnuan nọ ghaa ru, nọ ya gha mu emwa egbe rran. 3 Ẹre Jesu na ghi hin uhunmwu oke, ọ na gu erhuanegbe ẹre tota. 4 Na kha na, ugie Alagberra ọghe Ivbi e Ju bu otọ nẹ. 5 Jesu ghi tọn aro mu, ọ keghi bẹghe emwa ni bi dee; ọ na ghi nọ e Filip wẹẹ: “De eke ne ima khian na dẹ ebrẹd nọ gha sẹ iran na re?” 6 Sokpan, te ọ nọ rẹn ọta na, nọ ya danmwẹ ọnrẹn ghee, rhunmwuda, emwi nọ khian ru, rre ọre ekhọe nẹ. 7 E Filip na wanniẹn ọnrẹn wẹẹ: “A gha dẹ ebrẹd ọghe dinariọs* iyisẹn eva (200), ẹ i khian sẹ, ọ gha khọnrẹn na ghae ẹre kherhe kherhe ne iran.” 8 Ọkpa vbe erhuanegbe ẹre na tie ẹre Andru, nọ re ọtiẹn e Saimọn Pita keghi tama rẹn wẹẹ: 9 “Ghee ọvbokhan okpia ọkpa mwa, nọ mwẹ ebrẹd isẹn na ya ebali ru kevbe ehẹn eva ne giẹrẹ. Sokpan, vbe ọna khian ya sẹ emwa ọrhẹnrhẹn na re hẹ?”

10 Jesu na kha wẹẹ: “Wa tama iran ne iran tota.” Te irunmwu wa gba evba; ikpia ni tota ye evba kegha re odẹ orhunmwu arriaisẹn vbe ihe isẹn (5,000). 11 Jesu keghi viọ ebrẹd nii, ọ na kpọnmwẹ Osanobua, ẹre ọ na ghae ẹre ne iran ni tota; erriọ ẹre ọ ru ehẹn eva ne giẹre nii. Iran hia keghi re ne ẹko vuọn. 12 Ugbẹnvbe ẹko ghi vuọn iran nẹ, Jesu na tama erhuanegbe ẹre wẹẹ: “Wa si eni dekẹe koko, na ghẹ mu emwi rhọkpa rhia.” 13 Iran ghi si ebrẹd ebali nii ne iran re kẹ koko, ọ na vuọn okhuae iweva (12).

14 Emwa ghi bẹghe iwinna ọyunnuan nọ ru, iran na suẹn gha kha wẹẹ: “Ọna ọre nene Akhasẹ na wẹẹ ọ die agbọn.” 15 Jesu ghi bẹghe ẹre wẹẹ, iran khian do ya ẹtin vbe iwegbe mu irẹn, ne iran ma irẹn ọba, irẹn ọkpa na werriegbe gha rrie uhunmwu oke.

16 Vbọ ghi sẹ ẹghẹ ota, erhuanegbe ẹre na gha rrie okun. 17 Iran keghi la okọ, ne iran fian okun rra gha rrie Kapaniọm. Vbe ẹghẹ na kha na, ebi ro nẹ, sokpan, Jesu ma he ye bu iran rre. 18 Deba ọni, okun nii na gha vba yo vba rre, rhunmwuda okpẹhoho nọ ghaa la. 19 Sokpan, iran ghi gua okọ la odẹ ibiriki eha ra enẹ* nẹ, iran na bẹghe Jesu vbe ọ ya owẹ khian lele uhunmwu amẹ dee; ọ ghi sikẹ ọkpẹn okọ, ohan na suẹn gha mu iran. 20 Sokpan, Jesu na tama iran wẹẹ: “Mẹ nọ; wa ghẹ gi ohan mu uwa!” 21 Ẹre iran na ghi ghọghua, iran na we nọ la uwu okọ; vbọ ma he kpẹẹ vba, iran keghi sẹ eke ne iran rrie.

22 Ẹdẹ ghi gbe, emwa ni gbẹbu ye obọ nọkpa vbe okun nii keghi miẹn wẹẹ, okọ rhọkpa i rre evba. Okọ nekherhe ọkpa te ka gha rre evba, sokpan, Jesu ma lele erhuanegbe ẹre la okọ nii, erhuanegbe ẹre ọkpa ẹre ọ la okọ kpa. 23 Sokpan, okọ eso keghi ke Taibirias rre, iran na gha die ọkpẹn eke ne emwa na rri ebrẹd, vbe Enọyaẹnmwa ghi kpọnmwẹ Osanobua nẹ. 24 Emwa ni gbẹbu ghi bẹghe ẹre wẹẹ, Jesu vbe erhuanegbe ẹre i rre evba, iran na la okọ gha rrie Kapaniọm, ne iran ya gualọ e Jesu.

25 Ugbẹnvbe iran ghi miẹn Jesu vbe obọ nọkpa vbe okun nii, iran na nọ rẹn wẹẹ: “Rabai, de ẹghẹ ne u ya sẹ ediran?” 26 Jesu na wanniẹn iran wẹẹ: “Ne I ta ẹmwata ne uhunmwu ẹmwẹ ma uwa, ẹ i re te uwa gualọ mwẹ, rhunmwuda ne uwa na miẹn emwi ọyunnuan ne I ru. Sokpan, rhunmwuda ebrẹd nii ne uwa re vuọn ẹko, ẹre ọ ya uwa gualọ mwẹ. 27 Wa ghẹ miẹn ẹsọn ye evbare nọ sẹtin rhia, sokpan, wa miẹn ẹsọn ye evbare nẹi rhia, nọ rhie arrọọ ọghe etẹbitẹ ne ọmwa, ne Ovbi ọmwa gha rhie ne uwa; rhunmwuda, Osanobua ne Erha mwa tobọre rhie obọ ye ẹmwẹ ọnrẹn nẹ, nọ ya rhie ẹre ma wẹẹ irẹn miẹn ọnrẹn yi.”

28 Ẹre iran na ghi nọ rẹn wẹẹ: “De emwi ne Osanobua hoo ne ima gha ru?” 29 Jesu na wanniẹn iran wẹẹ: “Emwi ne Osanobua we ne uwa gha ru, ọre ne uwa mu ẹtin yan ọmwa nii,* ne irẹn gie rre.” 30 Iran na tama rẹn wẹẹ: “De iwinna ọyunnuan ne u gha ru ye ima aro, ne ima mieke na ya ruẹ yi? De emwi ne u gha ru? 31 Avbe erha ima odede rri e mana vbe uwu ato zẹvbe ne Ebe Nọhuanrẹn khare, nọ na wẹẹ: ‘Ọ ke ẹrinmwi rhie evbare ne iran, ne iran re.’” 32 Jesu keghi wanniẹn iran wẹẹ: “Ne I ta ẹmwata ne uhunmwu ẹmwẹ ma uwa, e Mozis ma rhie evbare nọ ke ẹrinmwi rre ne uwa, sokpan, Erha mwẹ keghi rhie evbare ne evbare* nọ ke ẹrinmwi rre ne uwa. 33 Evbare nọ ke obọ Osanobua rre, ọre ọmwa nii nọ ke ẹrinmwi gha dee do rhie arrọọ ne agbọn.” 34 Iran na ghi tama rẹn wẹẹ: “Enọyaẹnmwa, gha rhie evbare na ne ima vbe ẹghẹ hia.”

35 Jesu na tama iran wẹẹ: “Mẹ ọre evbare ọghe arrọọ. Ọmwaikọmwa nọ bu mwẹ gha dee, ohanmwẹ i khian ghi werriegbe gbe ẹre hiehie, ọmwaikọmwa nọ vbe mu ẹtin yan mwẹ,* ovbamẹ i khian ghi werriegbe gbe ẹre hiehie. 36 Zẹvbe ne I ka tama uwa, wa miẹn mwẹ nẹ, sokpan, wa ma yayi. 37 Emwa hia ne Evbavba viọ mẹ gha bu mwẹ gha dee. Adeghẹ ọmwaikọmwa na bu mwẹ gha dee, mẹ i khian khu ẹre werriegbe hiehie; 38 rhunmwuda, te I ke ẹrinmwi gha dee, ne I do ru emwi ne ọmwa nọ gie mwẹ rre hoo, ẹ i re ne I do ru ọghe obọ mwẹ. 39 Emwi ne ọmwa nọ gie mwẹ rre hoo, ọre ne I ghẹ gi ọkpa wii vbe uwu iran nọ viọ mẹ, sokpan, ne I huẹn iran kpaegbe vbe ẹdẹ okiekie. 40 Emwi ne Erha mwẹ hoo ọre wẹẹ, ọmwaikọmwa nọ miẹn Ọmọ yi, ọ na vbe mu ẹtin yan rẹn,* arrọọ ọghe etẹbitẹ ghi sẹ ọre obọ, I ghi vbe huẹn ọnrẹn kpaegbe vbe ẹdẹ okiekie.”

41 Ẹre Ivbi e Ju na suẹn gha gui ẹzọ uwu unu, rhunmwuda nọ na kha wẹẹ, “Mẹ ọre evbare nọ ke ẹrinmwi rre.” 42 Iran na suẹn gha kha wẹẹ: “Ọna i re Jesu ne ovbi e Josẹf? Ma rẹn erhae vbe iyẹe nian. Vbe ọ ghi gu kha wẹẹ, ẹrinmwi ẹre irẹn ke rre?” 43 Jesu na wanniẹn iran wẹẹ: “Wa ghẹ ghi gui ẹzọ uwu unu. 44 Ọmwa nọ gha sẹtin bu mwẹ gha dee i rrọọ, vbe ẹ i re te Evbavba nọ gie mwẹ rre si ẹre rre, I ghi vbe huẹn ọnrẹn kpaegbe vbe ẹdẹ okiekie. 45 Avbe Akhasẹ gbẹn ọnrẹn yotọ nẹ wẹẹ: ‘E Jehova* gha ma iran hia emwi.’ Ọmwaikọmwa nọ danmwehọ Evbavba, ọ na vbe ruẹ emwi vbe obọ ẹre, ọ gha bu mwẹ gha dee. 46 Ọna ma rhie ma wẹẹ ọmwa rhọkpa miẹn Evbavba nẹ. Sokpan, ọmwa nii nọ ke ehe ne Osanobua ye rre, ẹre ọ he miẹn Evbavba. 47 Ne I ta ẹmwata ne uhunmwu ẹmwẹ ma uwa, ọmwaikọmwa nọ yayi, arrọọ ọghe etẹbitẹ gha sẹ ọre obọ.

48 “Mẹ ọre evbare ọghe arrọọ. 49 Avbe erha uwa odede rri e mana vbe uwu ato, sokpan, te iran ye wulo. 50 Sokpan, ọmwaikọmwa nọ rri evbare na nọ ke ẹrinmwi rre, ẹ i khian wu. 51 Mẹ ọre evbare ọghe arrọọ, nọ ke ẹrinmwi rre. Ọmwaikọmwa nọ rri evbare na ghi gha rrọọ vbe etẹbitẹ; ẹmwata nọ rrọọ ọre wẹẹ, evbare ne I khian rhie ne emwa, ọre efun egbe mwẹ ne I khian ya fiohan ne agbọn, ne iran mieke na miẹn fan.”

52 Ẹre Ivbi e Ju na suẹn gha gu egbe iran muan ẹmwẹ, iran na gha kha wẹẹ: “De vbene okpia na khian ya sẹtin rhie efun egbe ẹre ne ima re hẹ?” 53 Ẹre Jesu na ghi tama iran wẹẹ: “Ne I ta ẹmwata ne uhunmwu ẹmwẹ ma uwa, vbe ẹ i re te uwa rri efun egbe ọghe Ovbi ọmwa, ne uwa vbe wọn esagiẹn ọnrẹn, wa i khian sẹtin gha mwẹ arrọọ.* 54 Ọmwaikọmwa nọ rri efun egbe mwẹ, ọ na vbe wọn esagiẹn mwẹ, arrọọ ọghe etẹbitẹ ghi sẹ ọre obọ, I ghi vbe huẹn ọnrẹn kpaegbe vbe ẹdẹ okiekie; 55 rhunmwuda, efun egbe mwẹ ọre evbare ne evbare,* esagiẹn mwẹ ọre ayọn ne ayọn.* 56 Ọmwaikọmwa nọ rri efun egbe mwẹ, ọ na vbe wọn esagiẹn mwẹ, ọmwa nii ghi gu mwẹ gha rrọọ vbe akugbe, mẹ ghi vbe gu ẹre gha rrọọ vbe akugbe. 57 Evbavba nọ rrọọ, ẹre ọ gie mwẹ rre, rhunmwuda ẹre, ẹre imẹ na rrọọ. Erriọ vbe ye, ọmwaikọmwa nọ rri efun egbe mwẹ, gha vbe gha rrọọ rhunmwuda mwẹ. 58 Ọna ọre evbare nọ ke ẹrinmwi rre. Ọ ma yevbe egbe evbare ne avbe erha uwa odede re, ne iran na ye wulo. Ọmwaikọmwa nọ rri evbare na, ghi gha rrọọ vbe etẹbitẹ.” 59 E sinagọg* nọ rre Kapaniọm ẹre Jesu na ta ẹmwẹ na hia, vbe ọ ma emwa emwi.

60 Vbe iran ghi họn ẹmwẹ na, nibun vbe erhuanegbe ẹre na kha wẹẹ: “Ẹmwẹ na wegbe gbe oo; de ọmwa nọ gha sẹtin rhan ehọ yotọ gha danmwehọ ẹmwẹ na?” 61 Ugbẹnvbe Jesu ghi rẹn wẹẹ, erhuanegbe ẹre gui ẹzọ uwu unu rhunmwuda ẹmwẹ ne irẹn tae, ọ na nọ iran wẹẹ: “Te ọna ghi ya uwa bọ iro eveva na ra? 62 Vbọ khian ghi wa gha ye hẹ, deghẹ Ovbi ọmwa na sirra uwa kpa gha rrie ehe nọ ka gha ye? 63 Orhiọn ẹre ọ rhie arrọọ ne ọmwa; efun i mwẹ esa nọ ye hiehie. Ẹmwẹ ne I tama uwa na, orhiọn kevbe arrọọ nọ. 64 Sokpan, eso vbe uwu uwa rrọọ ni ma yayi.” Rhunmwuda, ke omuhẹn gha dee ẹre Jesu ya rẹn emwa ni ma yayi kevbe ọmwa nọ khian yae dẹ. 65 Jesu na ghi tama iran wẹẹ: “Ọni ẹre ọ si ẹre ne I na tama uwa wẹẹ, ọmwa rhọkpa i rrọọ nọ gha sẹtin bu mwẹ gha dee, vbe ẹ i re te Evbavba kue yọ.”

66 Rhunmwuda ọni, erhuanegbe ẹre nibun na kpa, iran na werriegbe ya gha ru emwi ne iran te ka sẹrae; iran ma ghi gha lelẹe khian. 67 Ẹre Jesu na ghi nọ iran Iweva nii wẹẹ: “Wa vbe vbo, te uwa khian vbe lele iran ra?” 68 Saimọn Pita keghi wanniẹn ọnrẹn wẹẹ: “Enọyaẹnmwa, de ọmwa ne ima khian bu? Wẹ ẹre ọ ta ẹmwẹ nọ rhie arrọọ ọghe etẹbitẹ ne ọmwa. 69 Ma rẹnrẹn wẹẹ, wẹ ọre Ọmwa Nọhuanrẹn Ọghe Osanobua, ma vbe ya ọna yi.” 70 Jesu keghi wanniẹn iran wẹẹ: “Mẹ ẹre ọ tobọ mwẹ hannọ uwa iweva na, ra ẹ i re erriọ? Sokpan, esu* ẹre ọkpa vbe uwu uwa khin.” 71 E Judas ne ovbi e Saimọn Iskariọt ẹre ọ ghaa guan kaẹn, rhunmwuda, irẹn ẹre ọ khian ya e Jesu dẹ, agharhemiẹn wẹẹ, ọkpa vbe uwu iran Iweva nii ghaa nọ.

7 Iyeke ọni, Jesu kegha mu okhian* lele Galili khian, ọ ma hoo nọ mu okhian lele otọ e Judia, rhunmwuda, te Ivbi e Ju ghaa hoo ne iran gbe ẹre rua. 2 Sokpan, vbe ẹghẹ na nian, Ugie Ibọkpọ* ọghe Ivbi e Ju bu otọ nẹ. 3 Rhunmwuda ọni, etiọnrẹn nikpia na tama rẹn wẹẹ: “Kpa hin emwa na rre, ne u gha rrie Judia, ne erhuanegbe ruẹ ni rre evba mieke na vbe miẹn iwinna ne u ru. 4 Rhunmwuda, ọmwa nọ hoo na rẹn ọnrẹn, ẹ i ru emwi rhọkpa lẹre. Ugbẹnvbe a miẹn wẹẹ, u ru avbe emwi na, gi agbọn rẹn aro ọmwa ne u khin.” 5 A ye ta ena ta na, etiọnrẹn ma mu ẹtin yan rẹn.* 6 Jesu na ghi tama iran wẹẹ: “Ẹghẹ mwẹ ma he sẹ. Sokpan, ọghe uwa lughaẹn, wa sẹtin gha khian vbe ẹghẹ nọ rhirhi khọn uwa. 7 Emwi ọkpa i rrọọ nọ khian ya agbọn na gha khẹko uwa, sokpan, iran khẹko mwẹ, rhunmwuda ne I na tama iran wẹẹ iwinna ne iran ru i maan. 8 Wa gha rrie nene ugie; mẹ ma he mu egbe ne I khian ya yo, rhunmwuda, ẹghẹ mwẹ ma he wa sẹ.” 9 Ọ ghi gu iran guan fo nẹ, ọ na ye gha rre Galili.

10 Sokpan, etiọnrẹn ghi kpa gha rrie ugie nii nẹ, irẹn na vbe gha khian, sokpan, ọ ma gi emwa bẹghe ẹre vbe ọ khian. 11 Ivbi e Ju keghi suẹn gha gualọe khian vbe ugie nii, iran na gha kha wẹẹ: “Okpia nii vbo yi?” 12 Emwa ni rre evba na gha na iyẹn ọnrẹn. Eso na gha kha wẹẹ: “Ọmwa esi nọ.” Eso na vbe kha wẹẹ: “Ẹ i re ọmwa esi. Te ọ mu emwa rẹrẹ.” 13 Sokpan, a ma miẹn ọmwa rhọkpa nọ ta ẹmwẹ ọnrẹn vbe idagbo, rhunmwuda ne ohan Ivbi e Ju na gha mu iran.

14 Vbọ ghi rre odẹ ikpẹdẹ enẹ ne ugie nii ya suẹn, Jesu na la uwu ọgua Osa, ọ na suẹn gha ma emwa emwi. 15 Ọ keghi wa kpa Ivbi e Ju odin, iran na gha kha wẹẹ: “Vbe oko na ya rẹn Ebe Nọhuanrẹn sẹrriọ hẹ yi, ugbẹnvbe a miẹn wẹẹ, ọ ma yo owebe?”* 16 Jesu na ghi wanniẹn iran wẹẹ: “Emwi ne I ma emwa ẹre i re ọghe obọ mwẹ, sokpan, ọghe ọmwa nọ gie mwẹ rre nọ. 17 Adeghẹ ọmwaikọmwa hoo nọ ru emwi ne Osanobua hoo, ọ gha rẹn deghẹ emwi ne I ma emwa ẹre, obọ Osanobua ẹre ọ ke rre, ra ẹmwẹ obọ mwẹ ẹre I ta. 18 Ọmwaikọmwa nọ zẹ ẹmwẹ obọ ẹre ta, uyi egbe ẹre, ẹre ọ gualọ; sokpan, ọmwaikọmwa nọ gualọ uyi ọghe ọmwa nọ gie ẹre uhunmwu, ọnọna ọre ọmwa ata, nai miẹn emwi dan vbe obọ ẹre. 19 Ẹ i re Mozis ẹre ọ gbẹnnẹ Uhi rhie ne uwa? Sokpan, wa rhọkpa i lele Uhi nii. Vbọzẹ ne uwa na hoo ne uwa gbe mwẹ ruan?” 20 Emwa ni gbẹbu na wanniẹn ọnrẹn wẹẹ: “Orhiọn dan ẹre ọ loo ruẹ. De ọmwa nọ hoo nọ gbuẹ rua?” 21 Jesu na wanniẹn iran wẹẹ: “Emwi ọyunnuan ọkpa kẹkan ẹre I wa ru, ọ na wa yan uwa hia unu ruan. 22 Wa yerre wẹẹ, e Mozis ẹre ọ we ne uwa gha rhuẹ—sokpan, ẹ i re ẹghẹ e Mozis ẹre ọ ya suẹn, ẹghẹ ọghe avbe erha uwa odede ẹre ọ suẹnrẹn—ke ẹghẹ nii gha dee, ẹre uwa ke rhuẹ emọ ikpia, uhiẹn vbe ẹdẹ ikẹtin. 23 Adeghẹ uwa rhuẹ emọ ikpia vbe ẹdẹ ikẹtin, rhunmwuda ne uwa ma na hoo ne uwa rra Uhi e Mozis, vbọ ghi zẹ ne uwa na mu ohu mwẹ, rhunmwuda ne I na mu ọmwa egbe rran vbe ẹdẹ ikẹtin? 24 Wa ghẹ gha ya emwi ne uwa bẹghe bu ohiẹn, sokpan, wa gha bu ohiẹn ata.”

25 Emwa eso ni rre Jerusalẹm na suẹn gha kha wẹẹ: “Ọna i re okpia ne iran hoo ne iran gbua? 26 Ẹ i re irẹn ẹre ọ guan vbe azagba na? A ma miẹn ọmwa nọ gu ẹre guan. Te iran ni khaevbisẹ ghi rẹn nẹ wẹẹ, irẹn ẹre ọ gele re Kristi ra? 27 Sokpan, ma rẹn ehe ne okpia na ke rre; e Kristi gha rre, ọmwa rhọkpa i khian rẹn ehe nọ ke rre.” 28 Vbe Jesu ghi ma emwa emwi vbe ọgua Osa, ọ keghi tọn urhu ẹre mu, ọ na kha wẹẹ: “Wa rẹn mwẹ, wa vbe rẹn ehe ne I ke rre. I ma ya ẹtin obọ mwẹ rre, sokpan, Ọmwa ẹre ọ gie mwẹ rre; Ọmwa nii nọ gie mwẹ rre gele rrọọ, wa ma rẹn ọnrẹn. 29 Sokpan, I rẹn ọnrẹn, rhunmwuda, mẹ ẹre ọ ya zẹ ihe egbe; irẹn ẹre ọ gie mwẹ rre.” 30 Iran na suẹn gha gualọ vbene iran khian ya muẹn hẹ, sokpan, a ma miẹn ọmwa nọ ya obọ kaan rẹn, rhunmwuda, ẹghẹ ọre ma he sẹ. 31 Ọrheyerriọ, emwa nibun ni gbẹbu vba keghi mu ẹtin yan rẹn, iran na gha kha wẹẹ: “E Kristi gha rre, ọ gha ma ru iwinna ọyunnuan nọ sẹ ọghe okpia na?”

32 Ugbẹnvbe avbe Farisi ghi họn wẹẹ, emwa ni gbẹbu ta ẹmwẹ na vbekpa e Jesu, ke iran kevbe avbe ọkaolotu ohẹn keghi gie avbe ọgbalegbe, ne iran ya mu e Jesu. 33 Ẹre Jesu na ghi kha wẹẹ: “I gha gu uwa gha rrọọ vbe ovbi ẹghẹ kherhe, I ke bu Ọmwa nii nọ gie mwẹ rre. 34 Wa gha gualọ mwẹ, sokpan, wa i khian miẹn mwẹ, wa i khian vbe sẹtin rrie ehe ne I ye.” 35 Ivbi e Ju na ghi suẹn gha gu egbe guan wẹẹ: “De ehe ne okpia na rrie yi, nọ na wẹẹ, ma i khian sẹtin miẹn irẹn? Te ọ khian ghi bu Ivbi e Ju ni zagha lele otọ e Grik ra, nọ ya gha ma Ivbi e Grik emwi ra? 36 Vbọ yae kha nọ na wẹẹ, ‘Wa gha gualọ mwẹ, sokpan, wa i khian miẹn mwẹ, wa i khian vbe sẹtin rrie ehe ne I ye’?”

37 Ikpẹdẹ nokiekie ọghe ugie nii, ẹre ọ wa re ogiete ẹre.* Vbe ẹdẹrriọ, Jesu keghi kpaegbe, ọ na tọn urhu mu, ọ na kha wẹẹ: “Ọmwaikọmwa ne ovbamẹ gbe, we nọ bu mwẹ gha dee, nọ do wọn amẹ. 38 Vbe nọ dekaẹn ọmwaikọmwa nọ mu ẹtin yan mwẹ, ebe nọhuanrẹn khare wẹẹ: ‘Ẹzẹ nọ rhie arrọọ ne ọmwa, ghi gha ke uwu egbe ẹre lẹẹ ladian.’” 39 Vbọrhirhighayehẹ, te Jesu ta ẹmwẹ na, rhunmwuda orhiọn nọhuanrẹn nọ gha rherhe sẹ iran obọ ighẹ emwa ni mu ẹtin yan rẹn; vbe ẹghẹ na kha na, orhiọn nọhuanrẹn ma he sẹ iran obọ, rhunmwuda, Osanobua ma he mu e Jesu ye ukpo nọ yo. 40 Eso vbe uwu iran ni gbẹbu ghi họn ẹmwẹ nọ tae na, iran na gha kha wẹẹ: “Ọna ẹre ọ gele re nene Akhasẹ.” 41 Eso na gha kha wẹẹ: “Ọna ọre nene Kristi.” Sokpan, eso na gha kha wẹẹ: “E Galili ẹre a wẹẹ e Kristi khian ke rre ra? 42 Ẹ i re uniẹn e Devid ẹre ebe nọhuanrẹn wẹẹ e Kristi khian la rre? Ọ ma vbe kha wẹẹ, e Bẹtlẹhẹm nọ re igue ne Devid ghaa ye, ẹre Kristi khian ke rre ra?” 43 Rhunmwuda ọni, iwannegbe keghi la uwu ẹkpo emwa ni gbẹbu rhunmwuda ẹre. 44 Eso te gha hoo ne iran muẹn, sokpan, a ma miẹn ọmwa nọ ya obọ kaan rẹn.

45 Avbe ọgbalegbe na werriegbe bu avbe ọkaolotu ohẹn kevbe avbe Farisi; iran na nọ avbe ọgbalegbe nii wẹẹ: “Vbọzẹ ne uwa ma na muẹn rre?” 46 Ẹre avbe ọgbalegbe nii na wanniẹn wẹẹ: “Ma ma he miẹn ọmwa nọ guan vbe okpia na ẹdẹ.” 47 Avbe Farisi na ghi tama iran wẹẹ: “Te uwa ghi vbe rre usun emwa nọ mu rẹrẹ ra? 48 Wa he miẹn enọ mu ẹtin yan rẹn vbe uwu iran ni khaevbisẹ, ra avbe Farisi ra? 49 Wa ma miẹn emwa ni gbẹbu na, ni ma rẹn Uhi, emwa na fi ẹre unu ẹre iran khin.” 50 E Nikodimọs, nọ ka bu e Jesu rre vbe asẹ ọkpa, nọ vbe gha re ọkpa vbe avbe Farisi keghi tama iran wẹẹ: 51 “Zẹvbe ne Uhi ima khare, ọmwa ma na zẹ enunu ẹnrẹn nẹ, na vbe gualọ otọ emwi nọ ru nẹ, a vbe bu abe gbe ẹre ra?” 52 Iran na ghi wanniẹn ọnrẹn wẹẹ: “Wẹ i te re Ovbi e Galili, vbe uwẹ a na guan vbenian hẹ? Ya tie Ebe Nọhuanrẹn ne u ghee ẹre, u gha miẹn wẹẹ akhasẹ rhọkpa i khian ke Galili rre.”*

8 12 Jesu keghi werriegbe gha gu iran guan, ọ na wẹẹ: “Mẹ ọre ukpa ọghe agbọn na. Ọmwaikọmwa nọ lele mwẹ, ẹ i khian zẹdẹ khian vbe uwu ebiebi hiehie, sokpan, ọ ghi gha mwẹ ukpa ọghe arrọọ.” 13 Ẹre avbe Farisi na tama rẹn wẹẹ: “Wẹ tobọ ruẹ ẹre ọ sẹ osẹ ne egbuẹ; sokpan, osẹ ne u sẹ i re ẹmwata.” 14 Jesu na ghi wanniẹn iran wẹẹ: “Ọ gha khọnrẹn wẹẹ imẹ tobọ mwẹ ẹre ọ sẹ osẹ ne egbe mwẹ, sokpan, osẹ ne I sẹ, ọghe ẹmwata nọ, rhunmwuda, I rẹn ehe ne I ke rre, I vbe rẹn ehe ne I rrie. Sokpan, wa ma rẹn ehe ne I ke rre kevbe ehe ne I rrie. 15 Ikpakpa ẹre uwa ghee ya bu ohiẹn;* sokpan, mẹ i zẹdẹ bu ohiẹn ọmwa rhọkpa hiehie. 16 Uhiẹn, deghẹ I na kue bu ohiẹn ọmwa, ohiẹn ẹmwata ẹre I bu, rhunmwuda, ẹ i re imẹ ọkpa ẹre ọ rrọọ; Evbavba nọ gie mwẹ rre gu mwẹ rrọọ. 17 A vbe gbẹn ọnrẹn ye Uhi ọghe uwa wẹẹ: ‘Orhunmwu eva gha ghi sẹ osẹ ye emwi nẹ, u ghi rẹn wẹẹ ẹmwata nọ.’ 18 Mẹ ẹre ọ tobọ mwẹ sẹ osẹ ne egbe mwẹ, Evbavba nọ gie mwẹ rre vbe sẹ osẹ mẹ.” 19 Iran na ghi nọ rẹn wẹẹ: “De ehe ne Erhaa ye?” Jesu na wanniẹn wẹẹ: “Wa ma rẹn mwẹ, amaiwẹ Erha mwẹ. Akpawẹ uwa rẹn mwẹ, te uwa gha te vbe rẹn Erha mwẹ.” 20 Ẹghẹ nọ ya gha ma emwa emwi vbe ehe ne ẹkpẹti na viọ igho yi ye vbe ọgua Osa, ẹre ọ ya ta ẹmwẹ na. Sokpan, ọmwa rhọkpa ma muẹn vbe ẹghẹ nii, rhunmwuda, ẹghẹ ọre ma he sẹ.

21 Ọ na ghi werriegbe tama iran wẹẹ: “I gha kpa; wa gha vbe gualọ mwẹ, sokpan, te uwa khian wulo ye uwu orukhọ ọghe uwa. Wa i khian sẹtin yo ehe ne I rrie.” 22 Ivbi e Ju na suẹn gha kha wẹẹ: “Nọ na wẹẹ, ‘Wa i khian sẹtin yo ehe ne I rrie,’ te irẹn khian ghi gbe egbe ẹre rua ra?” 23 Ọ na ghi tama iran wẹẹ: “Ototọ vbe ediran ẹre uwa ke rre; sokpan, odukhunmwu ẹre imẹ ke rre. Agbọn na ẹre uwa ke rre; sokpan, ẹ i re agbọn na ẹre imẹ ke rre. 24 Ọni ẹre ọ si ẹre ne I na tama uwa wẹẹ: Wa gha wulo ye uwu orukhọ ọghe uwa. Rhunmwuda, adeghẹ uwa ma yayi wẹẹ imẹ ọre ọmwa ne I kha wẹẹ I khin, te uwa khian wulo ye uwu orukhọ ọghe uwa.” 25 Iran na ghi nọ rẹn wẹẹ: “De ọmwa ne uwẹ khin yi?” Jesu na wanniẹn iran wẹẹ: “Mẹ ma rẹn emwi nọ si ẹre ne I na ye gu uwa gbe agbanmwẹ. 26 Emwi bun ne I khian ta vbekpa uwa kevbe ne I gha vbe bu ohiẹn ọnrẹn. Vbene ẹmwata, Ọmwa nii nọ gie mwẹ rre i ta ohoghe hiehie, emwi ne I họn vbe unu ẹnrẹn, ẹre I ta vbe agbọn na.” 27 Ọ ma vẹ ne iran rẹn wẹẹ, Evbavba ẹre ọ ghaa guan kaẹn. 28 Jesu na ghi tama iran wẹẹ: “Wa gha ghi si Ovbi ọmwa rrọ nẹ, ẹre uwa khian na rẹn ọmwa ne I gele khin, wa ghi vbe do rẹn wẹẹ, I i ya ẹmwẹ obọ mwẹ ru emwi; sokpan, emwi ne Evbavba ma mwẹ ẹre, ẹre I ta. 29 Ọmwa nii nọ gie mwẹ rre gu mwẹ rrọọ; ọ ma fi iyeke gbe mwẹ, rhunmwuda, ẹghẹ hia ẹre I ya ru emwi nọ yẹẹ ọre.” 30 Zẹvbe nọ ya gha ta ẹmwẹ na, emwa nibun keghi mu ẹtin yan rẹn.

31 Ẹre Jesu na ghi tama Ivbi e Ju ni yaeyi wẹẹ: “Adeghẹ uwa na gha ya ẹmwẹ mwẹ ru emwi vbe ẹghẹ hia, erhuanegbe mwẹ ẹre uwa gele khin, 32 ẹghẹ nii, wa gha rẹn ẹmwata, ẹmwata nii ghi vbe fan uwa.” 33 Iran na ghi wanniẹn ọnrẹn wẹẹ: “Ivbi Ebraham ẹre ima khin; ma ma he ru ọviẹn lele ọmwa rhọkpa ẹdẹ. Vbọ ghi zẹ ne u na wẹẹ, ‘Wa gha khian ena fan fua’?” 34 Jesu na wanniẹn iran wẹẹ: “Ne I ta ẹmwata ne uhunmwu ẹmwẹ ma uwa, deghẹ ọmwaikọmwa na gha ru orukhọ, ọviẹn orukhọ nọ. 35 Yevbesọni, ọviẹn i khian sẹtin gha rre owa arowa ẹre khian; ọmọ ẹre ọ khian sẹtin gha rrọọ vberriọ. 36 Nọnaghiyerriọ, deghẹ Ovbi Osanobua na fan uwa fua, wa ghi gele gha re emwa na fan fua. 37 I rẹnrẹn wẹẹ ivbi Ebraham ẹre uwa khin. Sokpan, wa gualọ vbene uwa khian ya gbe mwẹ ruan hẹ, rhunmwuda, ẹmwẹ ne I ta i mu uwa ekhọe. 38 Emwi ne I bẹghe vbe I gu Erha mwẹ rrọọ ẹre I ta, sokpan, emwi ne uwa họn vbe unu erha uwa, ẹre uwa ya ru emwi.” 39 Iran na ghi wanniẹn ọnrẹn wẹẹ: “Ebraham ọre erha ima.” Jesu na ghi tama iran wẹẹ: “Akpawẹ ivbi Ebraham ẹre uwa gele khin, te uwa gha te vbe gha ru emwi vbene Ebraham ru ẹre. 40 Sokpan, wa gualọ vbene uwa khian ya gbe mwẹ ruan hẹ nian, mẹ nọ ta ẹmwata ne I họẹn vbe unu Osanobua ma uwa. Ebraham ma ru egbe ọna. 41 Emwi ne erha uwa ru, ẹre uwa vbe ru.” Iran na tama rẹn wẹẹ: “Ma i re emọ na biẹ vbe oghẹ;* Erha ọkpa ẹre ima wa mwẹ, ọni ọre Osanobua.”

42 Jesu na ghi tama iran wẹẹ: “Akpawẹ Osanobua ọre Erha uwa, te uwa gha te hoẹmwẹ mwẹ, rhunmwuda, Osanobua ẹre ọ gie mwẹ rre, ọni ẹre ọ si ẹre ne I na rre emwa. Ẹ i re ẹtin obọ mwẹ ẹre I ya rre, sokpan, irẹn ẹre ọ gie mwẹ rre. 43 Vbọzẹ ne uwa ma na rẹn otọ ẹmwẹ ne I ta? Rhunmwuda, wa i khian sẹtin rhie ẹmwẹ ne I tae. 44 Esu ọre erha uwa, emwi nọ yẹẹ ọre, ẹre uwa hoo ne uwa gha ru. Izigha wa gha nọ ke otọ gha dee, ọ ma mudia gbain vbe odẹ ẹmwata, rhunmwuda, ẹmwata i rre ọre ekhọe. Ọ gha ta ohoghe, aro ọmwa nọ khin ẹre ọ wa rhie ma nii, rhunmwuda, ọhọnhoghe nọ, irẹn ẹre ọ vbe re erha ohoghe. 45 Nọ ne imẹ, ẹmwata ẹre I tama uwa, sokpan, wa ma ya mwẹ yi. 46 Gha nọ vbe uwu uwa, nọ gha sẹtin si agbada vbe unu tae wẹẹ I ru khọọ? Adeghẹ ẹmwata ẹre I ta, vbọzẹ ne uwa ma na ghi ya mwẹ yi? 47 Ọmwa nọ re ọghe Osanobua keghi danmwehọ ẹmwẹ Osanobua. Ọna ẹre ọ si ẹre ne uwa i na danmwehọ, rhunmwuda, wa i re ọghe Osanobua.”

48 Ẹre Ivbi e Ju na tama rẹn wẹẹ: “U bẹghe ẹre wẹẹ ẹmwata ẹre ima tae, ne ima na kha wẹẹ, ‘Ovbi e Sameria ẹre u khin kevbe wẹẹ, orhiọn dan ẹre ọ loo ruẹ.’” 49 Jesu na wanniẹn wẹẹ: “Orhiọn dan i loo mwẹ. Te I rhie ọghọ ne Erha mwẹ, sokpan, wa i rhie ọghọ mẹ. 50 I i gualọ uyi ne egbe mwẹ; Ọmwa ọkpa rrọọ nọ hoo na rhie uyi mẹ, irẹn ẹre ọ vbe re nọ bu ohiẹn. 51 Ne I ta ẹmwata ne uhunmwu ẹmwẹ ma uwa, adeghẹ ọmwaikọmwa na gha ya ẹmwẹ mwẹ ru emwi, ọmwa nii i khian wu hiehie.” 52 Ivbi e Ju na tama rẹn wẹẹ: “Eban ẹre ọ gele wa vẹ ne ima rẹn wẹẹ, orhiọn dan loo ruẹ. Ebraham wu, avbe akhasẹ vbe wulo, wẹ khian ghi kha, u na wẹẹ, ‘Adeghẹ ọmwaikọmwa na gha ya ẹmwẹ mwẹ ru emwi, ọmwa nii i khian wu hiehie.’ 53 Ebraham ne erha ima ma wu ra? Wẹ ma kpọlọ sẹ ọre? Avbe akhasẹ vbe wulo. De ukpo ne uwẹ ghi ka egbuẹ yi na?” 54 Jesu na wanniẹn wẹẹ: “Adeghẹ I na gha rhie uyi ne egbe mwẹ, uyi ne I mwẹ i mwẹ esa nọ ye. Erha mwẹ ẹre ọ mu uyi yọ mwẹ egbe, ọmwa ne uwa wẹẹ ọre Osanobua uwa. 55 Ọrheyerriọ, wa ma he rẹn ọnrẹn, sokpan, mẹ rẹn ọnrẹn. I gha kha wẹẹ I ma rẹn ọnrẹn, I ghi yevbe uwa ne emwa ohoghe. Sokpan, mẹ wa rẹn ọnrẹn, I vbe ya ẹmwẹ ọnrẹn ru emwi. 56 Ebraham ne erha uwa kegha ghọghọ ẹsẹse rhunmwuda nọ na ya aro ye ẹdẹ ne I gha rre; aro ọre sẹ ọre, ọ na ghọghua.” 57 Ẹre Ivbi e Ju na ghi tama rẹn wẹẹ: “Wẹ nọ ma he sẹ ukpo ekigbesiyeha (50), u gha kha wẹẹ u miẹn Ebraham nẹ.” 58 Jesu na ghi tama iran wẹẹ: “Ne I ta ẹmwata ne uhunmwu ẹmwẹ ma uwa, a te miẹn wẹẹ a biẹ Ebraham, mẹ rrọọ nẹ.” 59 Ẹre iran na ghi rhọ ikpẹ okuta vbe otọ ne iran filo ẹre gbe ẹre, sokpan, Jesu keghi lẹre, ọ na ladian hin uwu ọgua Osa rre.

9 Vbe ọ ghi gberra khian, ọ keghi miẹn okpia ọkpa nọ rhu aro ke ẹko rre. 2 Erhuanegbe ẹre keghi nọ rẹn wẹẹ: “Rabai, de ọmwa nọ ru orukhọ nọ si ẹre na na biẹ okpia na arhuaro? Okpia na nọ ra, ra evbibiẹ ọre?” 3 Jesu na wanniẹn wẹẹ: “Ẹ i re okpia na, ra evbibiẹ ọre ẹre ọ ru orukhọ, sokpan, te ọ ye vberriọ, na mieke na lekpa ẹre bẹghe iwinna Osanobua. 4 Te ima gha ru iwinna ọghe Ọmwa nii nọ gie mwẹ rre, vbene ẹdẹ ma na he mu na; rhunmwuda, ẹdẹ gha mu nẹ ban, ọmwa rhọkpa i khian ghi sẹtin winna. 5 Ugbẹnvbe I ye rre agbọn na, mẹ ọre ukpa nọ baa yan agbọn.” 6 Ọ ghi ta ẹmwẹ na nẹ, ọ na tu asẹn ye otọ, ọ na yae fuẹn ekẹn, ọ na yae wuo aro okpia nii, 7 ọ na tama rẹn wẹẹ: “Ya kpe aro ruẹ vbe odighi ọghe Siloam” (evba yae kha vbe a gha zedu ẹre, ọre “Na Gie”). Ọ na gele ya kpe aro ọre; ẹghẹ nọ ghi ya werriegbe rre, ọ bẹghe nẹ.

8 Ẹre emwa ni rre ẹdogbo ẹre kevbe emwa ni ka miẹn ọnrẹn vbe ọ ghaa rinmwian emwa emwi, na gha kha wẹẹ: “Ọna i re okpia nii nọ tota rinmwian emwa emwi ra?” 9 Eso na wẹẹ: “Irẹn nọ.” Eso na wẹẹ: “Ẹo, te ọ khọ ọre.” Nene okpia na gha tama iran wẹẹ: “Mẹ nọ.” 10 Ẹre iran na ghi nọ rẹn wẹẹ: “Vbe aro ruẹ a ghi ya rhan hẹ?” 11 Ọ na wanniẹn iran wẹẹ: “Okpia nii na tie ẹre Jesu, ẹre ọ fuẹn ekẹn ya wuo mwẹ aro, ọ na tama mwẹ wẹẹ, ‘Ya kpe aro ruẹ vbe Siloam.’ Ẹre I na gele ya kpe aro mwẹ vbe evba, I na suẹn gha bẹghe.” 12 Ẹre iran na ghi nọ rẹn wẹẹ: “Nene okpia vbo nian?” Ọ na wẹẹ: “I ma rẹn.”

13 Iran keghi rhie okpia nii nọ te ka rhu aro bu avbe Farisi. 14 Emwi ghi wa ho aro, ẹdẹ ne Jesu fuẹn ekẹn ya wuo okpia nii aro kegha re Ẹdẹ Ikẹtin. 15 Okpia nii ghi sẹ evba, avbe Farisi na werriegbe suẹn gha nọ rẹn vbene ọ ya suẹn gha bẹghe hẹ. Ọ na tama iran wẹẹ: “Ọ keghi fuẹn ekẹn ya wuo mwẹ aro, ẹre I na ya kpe ẹre, I na suẹn gha bẹghe.” 16 Eso vbe uwu avbe Farisi nii na suẹn gha kha wẹẹ: “Ẹ i re Osanobua ẹre ọ gie okpia na rre, rhunmwuda, ẹ i lele uhi Ẹdẹ Ikẹtin.” Eso na vbe wẹẹ: “De vbene ọmwa orukhọ khian ya sẹtin ru egbe iwinna ọyunnuan vberriọ hẹ?” Iwannegbe kegha rre uwu ẹkpo iran. 17 Iran na werriegbe nọ okpia nii nọ te rhu aro wẹẹ: “De emwi ne uwẹ khian ghi ta vbekpa okpia na, ugbẹnvbe a miẹn wẹẹ, aro ruẹ ẹre ọ rhan rẹn?” Nene okpia na kha wẹẹ: “Akhasẹ nọ.”

18 Sokpan, Ivbi e Ju ma yayi wẹẹ okpia na te ka rhu aro, amaiwẹ te a rhan rẹn aro. Ẹre iran na ghi tie evbibiẹ ọre. 19 Iran na ghi nọ evbibiẹ ọre wẹẹ: “Ovbi uwa ne uwa wẹẹ, a biẹ ọre arhuaro na khin ra? Vbe ọ ghi ya suẹn gha bẹghe hẹ nian?” 20 Evbibiẹ ọre keghi wanniẹn iran wẹẹ: “Ma rẹnrẹn wẹẹ ovbi ima na khin, kevbe wẹẹ, te a biẹ ọre arhuaro. 21 Sokpan, vbene ọ ghi ya suẹn gha bẹghe hẹ, ma ma rẹn; ma ma vbe rẹn ọmwa nọ rhan rẹn aro. Wa nọ rẹn. Ẹ i ghi re ọvbokhan. Ọ gha sẹtin zẹ enunu ẹnrẹn.” 22 Rhunmwuda ne evbibiẹ ọre na gha mu ohan Ivbi e Ju, ẹre ọ ya iran ta ẹmwẹ na, rhunmwuda, Ivbi e Ju tae nẹ wẹẹ, ọmwaikọmwa nọ tae ladian wẹẹ Jesu ọre Kristi, a ghi kan ọmwa nii fua vbe sinagọg.* 23 Ọna ẹre ọ si ẹre ne evbibiẹ ọre na kha wẹẹ: “Ẹ i ghi re ọvbokhan. Wa nọ rẹn ọta.”

24 Ẹre iran na werriegbe tie okpia nii nọ te rhu aro, iran na tama rẹn wẹẹ: “Rhie uyi ne Osanobua; ma rẹnrẹn wẹẹ ọmwa orukhọ ẹre okpia nii khin.” 25 Ọ na wanniẹn iran wẹẹ: “Adeghẹ ọmwa orukhọ nọ oo, mẹ ma rẹn. Emwi ne I rẹnrẹn ọre wẹẹ, I te ka rhu aro, sokpan, te I ghi bẹghe nian.” 26 Iran na ghi nọ rẹn wẹẹ: “Vbọ ru ruẹ hẹ yi? De vbene ọ ya rhan ruẹ aro hẹ?” 27 Ọ na wanniẹn iran wẹẹ: “Iyaa, I ka tama uwa nẹ nian, sokpan, wa ma danmwehọ mwẹ. De emwi ne uwa ghi hoo ne uwa ye họn vbọ na? Te uwa hoo ne uwa vbe khian erhuanegbe ẹre ra?” 28 Ẹre iran na gha zaan rẹn, iran na wẹẹ: “Wẹ ọre ọrhuanegbe okpia nii, sokpan, erhuanegbe Mozis ẹre ima khin. 29 Ma rẹnrẹn wẹẹ, Osanobua gu e Mozis guan, sokpan, nọ ne okpia na, ma ma rẹn ehe nọ ke rre.” 30 Okpia nii na ghi wanniẹn iran wẹẹ: “Wa vbe ghee ogiemwi oo! Ọmwa nọ sẹtin rhan mwẹ aro, ẹre uwa wẹẹ, wa ma rẹn ehe nọ ke rre! 31 Ma rẹnrẹn wẹẹ Osanobua i danmwehọ emwa orukhọ, sokpan, ọmwaikọmwa nọ mu ohan Osanobua kevbe nọ ru emwi nọ hoo, ẹre Osanobua danmwehọ ọre. 32 Ke ẹghẹ gha dee, a ma he vbe họẹn ẹdẹ wẹẹ, ọmwa rhan aro ọmwa na biẹ ọre arhuaro. 33 Adeghẹ ẹ i re Osanobua ẹre ọ gie okpia na rre, ẹ i ghẹ te sẹtin ru emwi rhọkpa.” 34 Iran keghi wanniẹn ọnrẹn wẹẹ: “Wẹ na biẹ, biẹ orukhọ, wẹ ẹre ọ ghi vbe ma ima emwi ra?” Ẹre iran na sua ẹre ladian!

35 Jesu keghi họn wẹẹ iran sua ẹre ladian; ọ ghi miẹn ọnrẹn, ọ na nọ rẹn wẹẹ: “Wẹ mu ẹtin yan Ovbi ọmwa ra?” 36 Okpia nii na wanniẹn wẹẹ: “Enọwanrẹn, lahọ de ọmwa nọ khin, ne I mieke na mu ẹtin yan rẹn?” 37 Jesu na tama rẹn wẹẹ: “U miẹn ọnrẹn nẹ, uhiẹn, irẹn ẹre ọ wa gu ruẹ guan na.” 38 Okpia nii na ghi kha wẹẹ: “I wa mu ẹtin yan rẹn, Enọyaẹnmwa.” Ẹre ọ na ghi gbe uhunmwu kotọ ne Jesu. 39 Ẹre Jesu na ghi kha wẹẹ: “Te I rrie agbọn na, na mieke na bu ohiẹn emwa, ne emwa ni rhu aro sẹtin gha bẹghe, emwa ni bẹghe ghi do rhu aro.” 40 Avbe Farisi ni ghaa gu ẹre rre evba ghi họn ẹmwẹ nọ tae na, iran na nọ rẹn wẹẹ: “Te uwẹ ghi ya ọna kha wẹẹ, te ima vbe rhu aro ra?” 41 Jesu na tama iran wẹẹ: “Akpawẹ te uwa rhu aro, wa i ghẹ te gha mwẹ orukhọ rhọkpa. Sokpan, ne uwa na ghi kha nian wẹẹ, ‘Ma bẹghe,’ orukhọ ọghe uwa rre uwa uhunmwu.”

10 “Ne I ta ẹmwata ne uhunmwu ẹmwẹ ma uwa, ọmwa nọ ma la onurho la ogba ọghe ohuan, ọ na ya mu ogba na gba ga ẹre hin, ọ na la evba laọ, oyi ẹre ọmwa nii khin, izigan vbe nọ. 2 Sokpan, ọmwa nọ la onurho laọ, ọre ọmwa nọ su avbe ohuan nii. 3 Ukọ onurho ghi kie urho nẹẹn, avbe ohuan nii ghi danmwehọ ọre vbe iran gha họn urhu ẹre. Ọ ghi tie eni avbe ohuan ọghẹe, ọ ghi su iran ladian. 4 Ọ gha ghi viọ avbe ohuan ọghẹe hia ladian nẹ, ọ ghi ke odaro ne iran, avbe ohuan nii ghi lelẹe, rhunmwuda, iran rẹn urhu ẹre. 5 Iran i khian lele orhunmwuyẹn hiehie, te iran khian lẹẹ nẹẹn, rhunmwuda, iran ma rẹn urhu erhunmwuyẹn.” 6 Jesu ru igiemwi na ma iran, sokpan, iran ma rẹn otọ ẹmwẹ nọ ghaa tama iran.

7 Jesu na werriegbe kha wẹẹ: “Ne I ta ẹmwata ne uhunmwu ẹmwẹ ma uwa, mẹ ọre onurho ne avbe ohuan la. 8 Emwa hia ne I te rre do mu akpa mwẹ yọ, oyi kevbe izigan ẹre ehia khin; sokpan, avbe ohuan nii ma danmwehọ iran. 9 Mẹ ọre onurho; ọmwaikọmwa nọ la ehe ne I ye la owa, a gha miẹn ọnrẹn fan. Ọmwa nii ghi sẹtin gha la owa, ọ ghi vbe gha ladian, ọ ghi vbe miẹn evbare* gha re. 10 Oyi i wa gheghe rre, vbe ẹ i re te ọ do rhaa, ra nọ do izigha, ra nọ mu emwi rhia. Te imẹ rre, ne emwa mieke na gha rrọọ, iran ghi vbe gha rrọọ vbe etẹbitẹ. 11 Mẹ ọre ọsuohuan nọ maan; ọsuohuan nọ maan ẹre ọ mu egbe nọ ya wu ne avbe ohuan rẹn. 12 Adeghẹ a na rhie ọmwa nẹi re ọsuohuan vbe iwinna, nọ gha gbaroghe avbe ohuan, a na vbe miẹn wẹẹ, ẹ i re ọmwa nii ẹre ọ yan avbe ohuan nii, ekita oha* ghaa dee, ọmwa nii ghi lẹẹ sẹ avbe ohuan nii rae. Ekita oha* nii ghi munọ enọ gha munọ vbọ, ọ ghi zagha nikẹre kua. 13 Te ọmwa nii na rhie re vbe iwinna lẹẹ fua rhunmwuda, te ọ winna ye igho ẹre, iwinna avbe ohuan nii ma vbe muẹn. 14 Mẹ ọre ọsuohuan nọ maan. I rẹn avbe ohuan mwẹ, avbe ohuan mwẹ vbe rẹn mwẹ, 15 zẹvbe ne Evbavba rẹn mwẹ, mẹ na vbe rẹn Evbavba; I vbe mu egbe ne I ya wu ne avbe ohuan mwẹ.

16 “I vbe mwẹ avbe ohuan ọvbehe nẹi rre oghẹn* na. I gha vbe viọ iran rre, iran gha danmwehọ mwẹ; ẹghẹ nii, iran ghi do gha re oghẹn ohuan ọkpa, iran ghi vbe gha mwẹ ọsuohuan ọkpa. 17 Evbavba hoẹmwẹ mwẹ, rhunmwuda, I mu egbe ne I ya wu, ne arrọọ mwẹ mieke na dọlegbe sẹ mwẹ obọ. 18 Ọmwa rhọkpa i khian sẹtin miẹn mwẹ arrọọ mwẹ, sokpan, imẹ ẹre ọ tobọ mwẹ kha wẹẹ I gha wu. I mwẹ asẹ ne I khian ya kha wẹẹ I gha wu, I vbe mwẹ asẹ ne I khian ya miẹn arrọọ mwẹ werriegbe. Ọna ọre emwi ne Erha mwẹ we ne I ru.”

19 Ẹmwẹ na keghi werriegbe si iwannegbe ye ẹkpo Ivbi e Ju. 20 Iran nibun na gha kha wẹẹ: “Orhiọn dan ẹre ọ loo okpia na, ẹrherhe ẹre ma vbe gba. Vbọzẹ ne uwa na danmwehọ ọre?” 21 Eso na wẹẹ: “Ọmwa ne orhiọn dan loo i sẹtin ta egbe ẹmwẹ vbenian. Orhiọn dan gha ma sẹtin rhan aro emwa ni rhu aro?”

22 Ẹghẹ nii ẹre a ya do Ugie Ayafiohan vbe Jerusalẹm; ẹghẹ oni* ghaa nọ. 23 Jesu kegha khian lele ọlẹla ọghe Sọlomọn.* 24 Ẹre Ivbi e Ju na ma ga ẹre, iran na gha tama rẹn wẹẹ: “Ọ kpẹẹ re ne ima ke khẹ ne u tama ima deghẹ uwẹ ọre Kristi. Adeghẹ uwẹ gele nọ, wẹ wa tama ima, ne ima rẹn ne ima ye vbọ.” 25 Jesu na wanniẹn iran wẹẹ: “I ka tama uwa nẹ, sokpan, wa ma yayi. Avbe iwinna ne I ya eni Erha mwẹ winna, ẹre ọ sẹ osẹ mẹ. 26 Wa ma yayi, rhunmwuda, wa i re ohuan mwẹ. 27 Avbe ohuan mwẹ danmwehọ mwẹ. Mẹ rẹn iran, iran vbe lele mwẹ. 28 I gha rhie arrọọ ọghe etẹbitẹ ne iran; iran i khian fuan ẹdẹ. Ọmwa rhọkpa i rrọọ nọ gha sẹtin sanmwẹ iran rhie vbe obọ mwẹ. 29 Emwi ne Erha mwẹ viọ mẹ, hin usi sẹ emwi ọvbehe hia. Ọmwa rhọkpa i rrọọ nọ gha sẹtin sanmwẹ iran rhie vbe obọ Erha mwẹ. 30 Ọkpa ẹre imẹ vbe Evbavba khin.”*

31 Ẹre Ivbi e Ju na werriegbe rhọ ikpẹ okuta vbe otọ, ne iran filo ẹre gbe ẹre. 32 Jesu keghi tama iran wẹẹ: “Sirra uwa ẹre I na gha winna iwinna esi nibun ne Evbavba mu mẹ. Vbe uwu iwinna na, de ne uwa khian rhunmwuda ẹre filo okuta gbe mwẹ vbọ?” 33 Ivbi e Ju keghi wanniẹn ọnrẹn wẹẹ: “Ẹ i re rhunmwuda iwinna esi, ẹre ima khian gu filo okuta gbuẹ, sokpan, emwi nọ khian ya ima ru vberriọ ọre wẹẹ, te u rhooro; wẹ ne ọmwa kẹkan, u gha ya egbuẹ khian osa.” 34 Jesu na wanniẹn iran wẹẹ: “Osanobua ma tae vbe Uhi ọghe uwa wẹẹ, ‘I khare wẹẹ: “Wa keghi re osa”’?* 35 Adeghẹ Osanobua tie iran ‘osa’ ighẹ emwa ne irẹn ye ẹmwẹ ọnrẹn bu ohiẹn gbe, vbene ima na rẹn wẹẹ, a i sẹtin fi ẹmwẹ ne ebe nọhuanrẹn tae werriẹ, 36 vbọ ghi zẹ ne uwa na tama mwẹ wẹẹ, ‘U rhooro,’ rhunmwuda ne I na kha wẹẹ, ‘Ovbi Osanobua ẹre I khin’? Mẹ ne Evbavba kpe huan nẹ, nọ vbe gie gha die agbọn. 37 Adeghẹ ẹ i re iwinna Erha mwẹ ẹre I ru, wa ghẹ ya mwẹ yi. 38 Sokpan, deghẹ iwinna nii ẹre I winna, agharhemiẹn wẹẹ, wa ma ya mwẹ yi, wa vbe ya avbe iwinna nii yi, ne uwa mieke na rẹn, ne uwa vbe kọe ye orhiọn wẹẹ, Evbavba gu mwẹ rrọọ vbe akugbe, mẹ vbe gu Evbavba rrọọ vbe akugbe.” 39 Iran na te werriegbe hia ne iran muẹn, sokpan, ọ keghi lẹẹ fe iran.

40 Jesu keghi dọlegbe fian Ẹzẹ e Jọdan rra gha rrie eke ne Jọn na ka gha dinmwi emwa ye amẹ, ọ na dia evba ya. 41 Emwa nibun na bu ẹre gha dee, iran na gha kha wẹẹ: “E Jọn ma ru iwinna ọyunnuan rhọkpa. Sokpan, emwi hia fẹẹrẹ ne Jọn tae vbekpa okpia na, ẹmwata wa nọ.” 42 Emwa nibun ni rre evba keghi mu ẹtin yan rẹn.

11 Okpia ọkpa na tie ẹre Lazarọs kegha khuọnmwi; e Bẹtani ẹre ọ ke rre. Igue na, ẹre Meri kevbe ọtiọnrẹn nokhuo ighẹ e Mata ke vbe rre. 2 E Meri na, ẹre ọ tue ori nọ winhin yan Enọyaẹnmwa, ọ na vbe ya eto ẹre ka ẹre owẹ; ọtiọnrẹn nokpia ighẹ e Lazarọs, ẹre ọ khuọnmwi na. 3 Etiẹn e Lazarọs nikhuo keghi gie uhunmwu gie Jesu wẹẹ: “Enọyaẹnmwa, ọse ruẹ ne u hoẹmwẹ ọnrẹn khuọnmwi.” 4 Ugbẹnvbe Jesu ghi họn ẹmwẹ na, ọ na kha wẹẹ: “Ẹ i re uwu ẹre ọ khian gha re okiekie emianmwẹ na, sokpan, te a khian yae rhie uyi ne Osanobua, na mieke na vbe lekpa ẹre rhie uyi ne Ovbi Osanobua.”

5 Te Jesu wa hoẹmwẹ e Mata kevbe ọtiọnrẹn nokhuo kevbe Lazarọs. 6 Sokpan, vbe Jesu ghi họn wẹẹ egbe ma rran e Lazarọs, ọ na ye gbe ikpẹdẹ eva vbe ehe nọ ghaa ye. 7 Iyeke ọni, ọ na tama erhuanegbe ẹre wẹẹ: “Gi ima werriegbe gha rrie Judia.” 8 Erhuanegbe ẹre na tama rẹn wẹẹ: “Rabai, Ivbi e Judia ni ghaa hoo ne iran gbuẹ rua vbọ ma he kpẹẹ gbe na, ẹre uwẹ ye werriegbe rrie ẹvbo iran ra?” 9 Jesu na wanniẹn wẹẹ: “Ke ẹghẹ ne ẹdẹ ya waan, ya sẹ ẹghẹ ne ebi ya ro, keghi re ughaẹdẹ* iweva (12), ra ẹ i re erriọ? Adeghẹ ọmwaikọmwa na gha khian vbe ebi ma he ro, emwi rhọkpa i khian rrua ẹre owẹ, rhunmwuda, ọ ya awanwan ọghe agbọn na bẹghe odẹ. 10 Sokpan, adeghẹ ọmwaikọmwa khian vbe uwu ebiebi, ọ ghi rrua owẹ, rhunmwuda, ẹ i mwẹ ukpa vbe uwu egbe ẹre.”

11 Ọ ghi ta ẹmwẹ na hia nẹ, ọ na rhie te ẹre wẹẹ: “Lazarọs ne ọse ima vbiẹ, sokpan, I rrie evba ne I ya huẹn ọnrẹn.” 12 Erhuanegbe ẹre na ghi tama rẹn wẹẹ: “Enọyaẹnmwa, adeghẹ te ọ vbiẹ, egbe gha rran rẹn nian.” 13 Emwi ne Jesu ghaa guan kaẹn ọre wẹẹ, e Lazarọs wu nẹ. Sokpan, te iran te gha roro ẹre wẹẹ, ovbe kẹkan ẹre Jesu ghaa guan kaẹn. 14 Ẹre Jesu na ghi wa gbe ẹre ẹho rua ma iran wẹẹ: “Lazarọs wu nẹ. 15 I wa ghọghọ wẹẹ I ma gha rre evba, rhunmwuda, umamwẹ ọghe uwa nọ, ọ gha ya uwa yayi. Wa gi ima bu ẹre gha khian.” 16 Ẹre Tọmọs, na ghaa tie ẹre Ivin Eva, na ghi tama erhuanegbe nikẹre wẹẹ: “Gi ima vbe lelẹe, a i rẹn deghẹ iran na gbe ẹre rua, ma ghi vbe wu lelẹe.”

17 Vbe Jesu ghi sẹ evba, ọ na do bẹghe ẹre wẹẹ, ikpẹdẹ enẹ ẹre ọ ghi ye na ne Lazarọs ke rre uwu idin. 18 E Bẹtani ma rree gbe ne Jerusalẹm; ke evba gha rrie Jerusalẹm keghi re odẹ ibiriki eva.* 19 Ivbi e Ju nibun keghi bu e Mata kevbe Meri rre, ne iran do fu iran ẹko rre, rhunmwuda ọtẹn iran nọ wu. 20 E Mata ghi họn wẹẹ Jesu dee, ọ na ya vba ẹre vbe odẹ; sokpan, e Meri keghi tota ye owa. 21 E Mata na ghi tama e Jesu wẹẹ: “Enọyaẹnmwa, u kpa gha rre emwa, ọtẹn mwẹ i ghẹ te wu. 22 Ọrheyerriọ, I wa ye rẹn wẹẹ, emwi ke emwi ne u nọ Osanobua re, ọ gha ru ẹre nuẹn.” 23 Jesu na tama rẹn wẹẹ: “Ọtuẹn gha rhiọ kpaegbe.” 24 E Mata na tama rẹn wẹẹ: “I rẹnrẹn wẹẹ, ọ gha rhiọ kpaegbe vbe ẹghẹ na khian ya huẹn emwa kpaegbe vbe ẹdẹ okiekie.” 25 Jesu na tama rẹn wẹẹ: “Mẹ ọre arhiọkpaegbe kevbe arrọọ. Ọmwaikọmwa nọ mu ẹtin yan mwẹ* gha dobọ wu, ọ gha werriegbe gha rrọọ; 26 ọmwaikọmwa nọ rre agbọn, nọ mu ẹtin yan mwẹ,* ẹ i khian wu hiehie. Wẹ ya ọna yi ra?” 27 Ọ na wanniẹn ọnrẹn wẹẹ: “Ẹẹn, Enọyaẹnmwa. I wa yayi wẹẹ, wẹ ọre Kristi ne Ovbi Osanobua, na wẹẹ ọ die agbọn.” 28 Ọ ghi ta ẹmwẹ na fo nẹ, ọ na kpa ya tie ọtiọnrẹn ighẹ e Meri. Ọ na fẹko tama rẹn wẹẹ: “Ọmamwaemwi rre nẹ, ọ tie ruẹ.” 29 E Meri ghi họn ẹmwẹ na, ọ na zẹgiẹ gua kpaegbe, ọ na bu e Jesu.

30 Vbe ẹghẹ na kha na, Jesu ma he sẹ igue ne iran ye. Ehe ne Mata na ya vba ẹre, ẹre ọ ye ye. 31 Ivbi e Ju ni ghaa fu e Meri ẹko rre vbe uwu owa, ghi bẹghe ẹre wẹẹ e Meri gua kpaegbe, ọ vbe ladian, iran na lelẹe. Te iran ghaa roro ẹre wẹẹ, te ọ khian ya viẹ vbe eke na ree ọtiọnrẹn yi. 32 Vbe Meri ghi sẹ eke ne Jesu ghaa ye, ọ na bẹghe Jesu; ọ na ghi fan fi iguẹ* vbe akharha ẹre, ọ na tama rẹn wẹẹ: “Enọyaẹnmwa, u kpa gha rre emwa, ọtẹn mwẹ i ghẹ te wu.” 33 Jesu ghi bẹghe ẹre wẹẹ e Meri viẹ, kevbe wẹẹ, Ivbi e Ju ni lelẹe rre vbe viẹ, ibiẹ ọre hia na wa balọ ẹre rua, ọ na gele dae ẹsẹse. 34 Jesu na nọ iran wẹẹ: “Vbe uwa ree ẹre yi?” Iran na tama rẹn wẹẹ: “Enọyaẹnmwa, do ghee ẹre.” 35 Ameve keghi rhọọ kua vbe aro e Jesu. 36 Ẹre Ivbi e Ju ni rre evba, na ghi suẹn gha kha wẹẹ: “Eo, ọ te gele wa hoẹmwẹ ọnrẹn oo!” 37 Sokpan, eso vbe uwu iran na kha wẹẹ: “Ẹ i re okpia na, ẹre ọ sie rhan aro okpia nii nọ rhu aro? Vbọ ghi zẹ nọ ma na ru ẹre, ne Lazarọs ghẹ wu?”

38 Ẹko hia na werriegbe rriara e Jesu rua. Iyeke ọni, ọ na gha rrie eke na ree ẹre yi. Idin na fian ye uwu okuta ghaa nọ, a na vbe ya okuta gue ẹre unu. 39 Jesu na tama iran wẹẹ: “Wa werriẹ okuta nii hin.” E Mata ne ọtiẹn e Lazarọs nọ wu, na tama rẹn wẹẹ: “Enọyaẹnmwa, ọ ra gha wia nẹ, rhunmwuda, ikpẹdẹ enẹ ẹre ọ ghi wa ye na.” 40 Jesu na tama rẹn wẹẹ: “Mẹ ma ka tama ruẹ wẹẹ, deghẹ u na yayi, u gha miẹn uyi ọghe Osanobua?” 41 Ẹre iran na ghi werriẹ okuta nii hin. Jesu na ghi tọn aro mu ghee odukhunmwu, ọ na wẹẹ: “Evbavba, I kpọnmwọọn, rhunmwuda, u họn erhunmwu mwẹ nẹ. 42 Vbene ẹmwata, I rẹnrẹn wẹẹ, ẹghẹ hia ẹre u ya họn erhunmwu mwẹ; sokpan, te I ta ẹmwẹ na rhunmwuda emwa ni gbẹbu mwa, ne iran mieke na yayi wẹẹ, wẹ ẹre ọ gie mwẹ rre.” 43 Ọ ghi ta ẹmwẹ na hia nẹ, ọ na go tie ẹre wẹẹ: “Lazarọs, ladian!” 44 Okpia nii nọ wu keghi ladian, ke irẹn kevbe ukpọn na ya vbuọ ọre obọ vbe owẹ kevbe aro. Jesu na ghi tama iran wẹẹ: “Wa rhan rẹn, ne uwa gi ẹre gha khian.”

45 Ugbẹnvbe Ivbi e Ju nibun ni do tuẹ e Meri ghi ya aro iran miẹn emwi nọ sunu, iran na mu ẹtin yan e Jesu. 46 Sokpan, eso vbe uwu iran keghi kpa ya tama avbe Farisi, emwi ne Jesu ru. 47 Rhunmwuda ọni, avbe ọkaolotu ohẹn kevbe avbe Farisi keghi tie iko e Sanhẹdrin,* iran na kha wẹẹ: “De emwi ne ima khian ghi ru nian? Rhunmwuda, okpia na wa ru iwinna ọyunnuan nibun! 48 Ma gha wa sẹ okpia na rae vbenian, iran hia gha mu ẹtin yan rẹn. Ẹghẹ nii, Ivbi e Rom ghi rre, iran ghi do miẹn ima ehe nọhuanrẹn* kevbe ẹvbo ima.” 49 Sokpan, ọkpa vbe uwu iran na tie ẹre Keyafas, nọ ghaa re ogie ohẹn vbe ukpo nii, keghi tama iran wẹẹ: “Wa ma zẹdẹ rẹn emwi rhọkpa hiehie. 50 Wa ma rẹn wẹẹ umamwẹ ọghe uwa nọ, ne orhunmwu ọkpa wu ne ẹvbo ohoho, na khian ya miẹn wẹẹ, a fuẹn ẹvbo ohoho rua?” 51 Ẹ i re ẹwaẹn obọ ẹre, ẹre ọ ya ta ẹmwẹ na, sokpan, rhunmwuda nọ na gha re ogie ohẹn vbe ukpo nii, Osanobua keghi loo ẹre ya tae yotọ wẹẹ, Jesu gha wu ne agbẹnvbo. 52 Ẹ i re te ọ khian wa wu ne agbẹnvbo kẹkan, sokpan, te ọ khian vbe si ivbi Osanobua ni zagha lele ehe ughughan koko. 53 Ke ẹdẹrriọ kpa, iran keghi suẹn gha so uma ne iran khian ya gbe ẹre rua.

54 Rhunmwuda ọni, Jesu ma ghi gha khian vbe idagbo vbe uwu ẹbu Ivbi e Ju, sokpan, ọ na gha rrie ẹvbo ọkpa na tie ẹre Ifrem, nọ sikẹ ato; irẹn vbe erhuanegbe ẹre na ya dia odọ ya. 55 Vbe ẹghẹ na kha na, ugie Alagberra ọghe Ivbi e Ju bu otọ nẹ. Vbene ọ te sẹ ẹghẹ Alagberra nii, emwa nibun ni ke dọmwadẹ ẹvbo rre kegha rrie Jerusalẹm, ne iran mieke na kpe egbe iran huan zẹvbe ne uhi khare. 56 Iran na si koko vbe ọgua Osa, iran na gha ya aro gualọ e Jesu, iran na gha nọ egbe iran wẹẹ: “Ọ gha kue zẹdẹ rrie ugie na yi?” 57 Sokpan, avbe ọkaolotu ohẹn kevbe avbe Farisi tama emwa nẹ wẹẹ, adeghẹ ọmwaikọmwa na rẹn eke ne Jesu ye, we nọ do tama iran, ne iran mieke na muẹn.

12 Jesu keghi sẹ e Bẹtani vbọ ghi kẹ ikpẹdẹ ehan na do ugie Alagberra; evba nii ẹre Lazarọs ne Jesu huẹn kpaegbe vbe idin ghaa ye. 2 lran keghi le evbare ota ya mu ọghọ ye ọre egbe vbe evba. E Mata kegha ghae evbare ne iran. E Lazarọs ghaa rre usun emwa ni deba e Jesu gha rri evbare.* 3 E Meri keghi mu ohoho ọgọ* ọghe ori ighobioye nọ winhin na ya e nad nọ maan ru, ọ na tue ẹre ye owẹ e Jesu, ọ na vbe ya eto ẹre ka ẹre owẹ. Uwinhinmwẹ ori nii keghi gba owa nii hia. 4 Sokpan, e Judas Iskariọt nọ khian yae dẹ, nọ vbe gha re ọkpa vbe erhuanegbe ẹre, keghi kha wẹẹ: 5 “Vbọzẹ na ma na khiẹn ori nọ winhin na vbe dinariọs* iyisẹn eha (300), na ghae igho na miẹn vbọ ne ivbiogue?” 6 Ẹ i re rhunmwuda wẹẹ ọ mwẹ ẹnina ivbiogue, ẹre ọ gu ta ẹmwẹ na, sokpan, oyi ghaa nọ. Irẹn ẹre ẹkpẹti igho ghaa gue, ẹghẹ hia ẹre ọ ya gha do igho rhie vbọ. 7 Jesu na ghi kha wẹẹ: “Zẹ okhuo na obọ vbe ẹkun, ne u gi ẹre ru emwi nọ ru, nọ mieke na yae mu egbe yotọ khẹ ẹdẹ irorinmwi mwẹ. 8 Rhunmwuda, ẹghẹ hia ẹre ivbiogue khian ya gha rre uwu ẹbu uwa, sokpan, ẹ i re ẹghẹ hia, ẹre imẹ khian ya gha gu uwa rrọọ.”

9 Na kha na, Ivbi e Ju nibun keghi họn wẹẹ Jesu rre, ẹre iran na gha dee. Sokpan, ẹ i wa re rhunmwuda e Jesu ọkpa ẹre iran na rre; te iran vbe rre do ghee Lazarọs nọ huẹn kpaegbe vbe idin. 10 Avbe ọkaolotu ohẹn na vbe so uma, ne iran ya gbe Lazarọs rua, 11 ugbẹnvbe a miẹn wẹẹ, rhunmwuda ẹre, ẹre Ivbi e Ju nibun na gha yo ehe ne Jesu ye, nọ ghi ya iran do mu ẹtin yan rẹn.

12 Ẹdẹ ghi gbe, emwa nibun ni rrie ugie nii, keghi họn wẹẹ Jesu die Jerusalẹm. 13 Ẹre iran na ghi viọ ewanmwẹ mwẹ obọ, iran na bu e Jesu. Iran na suẹn gha wee, iran na wẹẹ: “Lahọ, miẹn ọnrẹn fan! Afiangbe nọ ne ọmwa nii nọ rre vbe eni e Jehova!* Afiangbe nọ ne Ọba Izrẹl!” 14 Jesu ghi miẹn ovbi ekẹtẹkẹtẹ, ọ na hin ẹnrẹn, zẹvbe na gbẹn ọnrẹn yotọ wẹẹ: 15 “Ghẹ gi ohan mu ruẹ, ovbi e Zaiọn nokhuo. Ghee oo! Ọba ruẹ dee, ọ hin ovbi ekẹtẹkẹtẹ.” 16 Avbe erhuanegbe ẹre ma te rẹn emwi na ya avbe emwi na kha, sokpan, vbe a ghi mu uyi ye Jesu egbe nẹ, iran na do yerre wẹẹ, Ebe Nọhuanrẹn ka tae yotọ wẹẹ ena hia gha sunu vbe egbe ẹre.

17 Emwa ni ghaa rre evba vbe Jesu huẹn e Lazarọs kpaegbe vbe idin, kegha tama emwa, emwi ne iran ya aro iran miẹn. 18 Ọna ẹre ọ si ẹre ne emwa na vẹ bu e Jesu, rhunmwuda, iran họn vbekpa iwinna ọyunnuan na ne Jesu ru. 19 Avbe Farisi na ghi suẹn gha tama egbe iran wẹẹ: “Wa ma bẹghe ẹre wẹẹ, eke ne ima ye ẹre ima ye ye? Ghee! Agbọn vbe ẹrinmwi wa kpee lelẹe khian.”

20 Vbe ẹghẹ na kha na, Ivbi e Grik eso vbe gha rre usun emwa ni rre do ga Osanobua vbe ugie nii. 21 Ivbi e Grik na, keghi bu e Filip gha dee. E Bẹtse-ada nọ rre Galili ẹre Filip ke rre. Iran na tama e Filip wẹẹ: “Enọwanrẹn, ma te hoo ne ima miẹn Jesu.” 22 E Filip keghi do tama Andru. Andru vbe Filip na gba ya tama e Jesu.

23 Sokpan, Jesu keghi wanniẹn iran wẹẹ: “Ẹghẹ sẹ nẹ na khian ya mu uyi ye Ovbi ọmwa egbe. 24 Ne I ta ẹmwata ne uhunmwu ẹmwẹ ma uwa, vbe ẹ i re te ikpẹ e wit ọkpa de ye otọ nẹ, nọ do kẹkẹ* vbe uwu otọ, ikpẹ e wit ọkpa nii ye nọ; sokpan, deghẹ ọ na kẹkẹ* nẹ, ẹghẹ nii ẹre ọ khian na mọ ọmọ nibun. 25 Ọmwaikọmwa nọ hoẹmwẹ arrọọ* ọghẹe gbe, arrọọ* ọghẹe ghi wii ẹre, sokpan, ọmwaikọmwa nọ khuiwu arrọọ* ọghẹe vbe agbọn na, te ọ da arrọọ* ọghẹe yi khẹ arrọọ ọghe etẹbitẹ nọ dee. 26 Adeghẹ ọmwaikọmwa hoo nọ gha re ọguọmwadia mwẹ, we nọ gha lele mwẹ khian, rhunmwuda, ehe ne imẹ rhirhi gha ye, ẹre ọguọmwadia mwẹ khian vbe gha ye. Adeghẹ ọmwaikọmwa na gha re ọguọmwadia mwẹ, Evbavba gha mu uyi ye ọmwa nii egbe. 27 Orhiọn mwẹ ma ghi sotọ nian. Vbia khian ghi ta? Lahọ Evbavba, miẹn mwẹ fan vbe ne I ye na. Vbọrhirhighayehẹ, ọna ẹre ọ mu mwẹ rre. 28 Evbavba, rhie uyi ye eni ruẹ.” Ẹre urhu ọkpa na ke ẹrinmwi guan rre wẹẹ: “I rhie uyi ye eni mwẹ nẹ. I gha vbe werriegbe ru ẹre.”

29 Emwa ni mudia vba ghi họn, iran na gha kha wẹẹ avannukhunmwu ẹre ọ vaẹn. Eso na wẹẹ: “Odibosa ẹre ọ gu ẹre guan.” 30 Jesu na wanniẹn iran wẹẹ: “Ẹ i re rhunmwuda mwẹ, ẹre uwa na họn urhu na, sokpan, rhunmwuda uwa nọ. 31 Ẹghẹ sẹ nẹ nian, na ra ya bu ohiẹn agbọn na; te a khian khu ọmwa nọ kha yan agbọn na fua. 32 Sokpan, nọ ne imẹ, a gha tọn mwẹ mu hin otọ rre nẹ, I gha si emwa ughughan kẹ egbe.” 33 Te ọ wa gha ta ẹmwẹ na, nọ ya gi emwa rẹn aro uwu ne irẹn khian wu. 34 Emwa ni gbẹbu na ghi wanniẹn ọnrẹn wẹẹ: “Uhi khare wẹẹ, te Kristi khian gha rrọọ vbe etẹbitẹ. Vbọ ghi zẹ ne uwẹ na ghi kha nian wẹẹ, te a khian tọn Ovbi ọmwa mu hin otọ rre? Gha re nene Ovbi ọmwa na?” 35 Jesu na ghi tama iran wẹẹ: “Ukpa gha ye gha baa vbe uwu ẹbu uwa vbe ovbi ẹghẹ kherhe. Wa ye gha khian, vbene uwa na ye mwẹ ukpa na, ne ebiebi ghẹ do so gue uwa; ọmwaikọmwa nọ khian vbe uwu ebiebi ma rẹn ehe nọ rrie. 36 Wa mu ẹtin yan ukpa,* vbene uwa na ye mwẹ ukpa nian, ne uwa mieke na do gha re ivbi ukpa.”

Jesu ghi ta ẹmwẹ na nẹ, ọ na kpa, ọ na ya lẹre, ne iran ghẹ miẹn ọnrẹn. 37 Agharhemiẹn wẹẹ, ọ ru iwinna ọyunnuan nibun ye iran aro, iran ma ye mu ẹtin yan rẹn, 38 ne ẹmwẹ ne Aizaia ne akhasẹ tae mieke na sẹ, nọ na wẹẹ: “E Jehova,* de ọmwa nọ mu ẹtin yan ẹmwẹ nọ họn vbe unu ima?* De ọmwa na he gie ekuabọ ọghe Jehova* ma?” 39 Aizaia vbe ta evbọzẹe ne iran ma na sẹtin yayi; ọ khare wẹẹ: 40 “Ọ rhu iran aro nẹ, ọ na vbe ya ekhọe iran khian enọ wegbe, ne iran ghẹ mieke na ya aro iran bẹghe, ne ẹmwẹ na tae ghẹ vbe la iran ekhọe. Ẹghẹ nii, iran i khian ghi kie werriegbe, ne I mu iran egbe rran.” 41 Te Aizaia ta ẹmwẹ na hia, rhunmwuda nọ na miẹn uyi ọghe Kristi, ọ na vbe ta ẹmwẹ ọnrẹn. 42 Ọrheyerriọ, iran nibun ni khaevbisẹ na ye mu ẹtin yan rẹn, sokpan, ohan ma gi iran rhiegbe ladian wẹẹ, iran mu ẹtin yan e Jesu rhunmwuda avbe Farisi, na ghẹ mieke na khulo iran fua vbe sinagọg;* 43 rhunmwuda, uyi ne iran miẹn vbe obọ emwa nagbọn, ẹre ọ yẹẹ iran sẹ ọghe Osanobua.

44 Sokpan, Jesu keghi tọn urhu mu, ọ na wẹẹ: “Ọmwaikọmwa nọ mu ẹtin yan mwẹ, ẹ i re imẹ ọkpa ẹre ọ mu ẹtin yan, sokpan, ọ vbe mu ẹtin yan Ọmwa nii nọ gie mwẹ rre; 45 ọmwaikọmwa nọ miẹn mwẹ, vbe miẹn Ọmwa nii nọ gie mwẹ rre. 46 Te imẹ rrie agbọn na zẹvbe ukpa, ne ọmwaikọmwa nọ mu ẹtin yan mwẹ ghẹ mieke na ye gha rre uwu ebiebi. 47 Sokpan, ọmwaikọmwa nọ họn ẹmwẹ ne I tae, nọ ma yae ru emwi, I i khian bu ohiẹn ọnrẹn; rhunmwuda, I ma rre do bu ohiẹn agbọn na, sokpan, te I rre do miẹn agbọn fan. 48 Ọmwaikọmwa nọ ma ka mwẹ yọ, nọ ma vbe miẹn ẹmwẹ ne I tae yi, ọmwa rrọọ nọ ra bu ohiẹn ọnrẹn. Ẹmwẹ ne I tae, ẹre ọ khian bu ohiẹn ọnrẹn vbe ẹdẹ okiekie. 49 Ẹ i re ẹmwẹ obọ mwẹ ẹre I tae, sokpan, Evbavba nọ gie mwẹ rre, ẹre ọ tobọre tama mwẹ emwi ne I gha ta, kevbe emwi ne I gha ma emwa ẹre. 50 I rẹnrẹn wẹẹ, emwi nọ rhirhi we na ru, arrọọ ọghe etẹbitẹ ẹre ọ rhie ne ọmwa. Rhunmwuda ọni, emwi ke emwi ne Evbavba rhirhi we ne I ta, ẹre I wa ta zẹẹ.”

13 A te miẹn wẹẹ a do ugie Alagberra, Jesu rẹn nẹ wẹẹ, ẹghẹ sẹ nẹ, ne irẹn khian ya kpa hin agbọn na rre, ne irẹn bu Evbavba. Ọ hoẹmwẹ iran ni re ọghẹe vbe agbọn na, te ọ wa hoẹmwẹ iran ya sẹ ufomwẹ. 2 Iran kegha rri evbare ota. Vbe ẹghẹ na kha na, Esu rhie ẹre ye ekhọe Judas Iskariọt ne ovbi e Saimọn nẹ, nọ ya e Jesu dẹ. 3 Jesu rẹnrẹn wẹẹ, Evbavba viọ emwi hia ye irẹn obọ nẹ, ọ vbe rẹn wẹẹ, eke ne Osanobua ye ẹre irẹn ke rre, kevbe wẹẹ, te irẹn vbe bu Osanobua khian. 4 Rhunmwuda ọni, ọ keghi kpaegbe vbe ehe ne iran na rri evbare ota, ọ na kie ẹwu nọ yọ ke odukhunmwu ye efọnkpa. Ọ keghi rhie ukpọn na ya khiẹn egbe, ọ na yae gba ẹkun. 5 Iyeke ọni, ọ na sa amẹ ye ọkpan, ọ na suẹn gha kpe erhuanegbe ẹre owẹ, ọ na vbe gha ya ukpọn na ya khiẹn egbe nọ ya gba ẹkun ka iran owẹ. 6 Ọ ghi sẹ eke ne Saimọn Pita ye, e Saimọn Pita na nọ rẹn wẹẹ: “Enọyaẹnmwa, te uwẹ ra kpe mwẹ owẹ ra?” 7 Jesu na wanniẹn ọnrẹn wẹẹ: “U i khian sẹtin rẹn otọ emwi ne I ru nian, sokpan, u gha rẹn otọ re vbe okiekie.” 8 E Pita keghi tama rẹn wẹẹ: “I i khian kue ne u kpe mwẹ owẹ, I i kue ẹdẹ na wu.” Jesu na ghi wanniẹn ọnrẹn wẹẹ: “Adeghẹ u ma kue ne I kpe ruẹ owẹ, u ghi rẹn wẹẹ, emwi rhọkpa ma ghi kaan mwẹ kaan ruẹ.” 9 E Saimọn Pita na ghi wanniẹn ọnrẹn wẹẹ: “Enọyaẹnmwa, adeghẹ erriọ nọ, ẹ i re owẹ mwẹ ọkpa ẹre u khian kpe, wa vbe kpe obọ mwẹ kevbe uhunmwu mwẹ ba ẹre.” 10 Jesu na ghi tama rẹn wẹẹ: “Ọmwa gha khuẹ nẹ, egbe ẹre hia huan nẹ. Emwi ọkpa kẹkan nọ khian ghi ru, ọre nọ wa rria owẹ. Wa te wa huan, sokpan, ẹ i wa re uwa hia.” 11 Jesu rẹn ọmwa nọ khian ya irẹn dẹ. Ọni ẹre ọ si ẹre nọ na kha wẹẹ: “Ẹ i re uwa hia ẹre ọ huanrẹn.”

12 Ọ ghi kpe iran owẹ nẹ, ọ na werriegbe mu ẹwu nọ yọ ke odukhunmwu yọ, ọ na ghi ya tota vbe eke ne eteburu ye. Ọ na nọ iran wẹẹ: “Wa rẹn emwi nọ si ẹre, ne I na ru emwi ne I ru na ra? 13 Wa tie mwẹ ‘Ọmamwaemwi’ kevbe ‘Enọyaẹnmwa.’ Ẹre I gele khin, wa ma baeku hiehie. 14 Adeghẹ imẹ ne Enọyaẹnmwa kevbe Ọmamwaemwi kpe uwa owẹ, te ọ vbe khẹke* ne uwa gha kpe egbe owẹ. 15 Igiemwi ẹre I rhie yotọ ne uwa. Emwi ne I ru ne uwa na, wa vbe gha ru ẹre ne emwa ọvbehe. 16 Ne I ta ẹmwata ne uhunmwu ẹmwẹ ma uwa, ọviẹn ma sẹ enarẹn; ọmwa na gie ẹre uhunmwu ma vbe kpọlọ sẹ nọ gie ẹre uhunmwu. 17 Ugbẹnvbe uwa ghi rẹn ena hia nẹ, u miẹn vbene agbọn gha rhiẹnrhiẹn uwa hẹ, deghẹ uwa na yae ru emwi. 18 Ẹ i re uwa hia ẹre I kha; rhunmwuda, I rẹn emwa ne I zẹ. Sokpan, te ọ sunu vberriọ, ne ẹmwẹ ne ebe nọhuanrẹn tae miehe na sẹ, nọ khare wẹẹ: ‘Ọmwa nii nọ rri evbare* mwẹ, ẹre ọ ghi solo mwẹ owẹ.’* 19 Te imẹ ghi tama uwa nian, a te miẹn wẹẹ ọ sunu. Ẹghẹ nii, ọ gha ghi sunu, wa ghi do rẹn wẹẹ imẹ ọre ọmwa nii ne ako ọghe ebe nọhuanrẹn na guan kaẹn. 20 Ne I ta ẹmwata ne uhunmwu ẹmwẹ ma uwa, ọmwa nọ rhirhi miẹn ọmwaikọmwa ne I gie rre yi, vbe miẹn mwẹ yi; ọmwa nọ rhirhi miẹn mwẹ yi, vbe miẹn ọnrẹn yi ighẹ Ọmwa nii nọ gie mwẹ rre.”

21 Jesu ghi ta ẹmwẹ na nẹ, orhiọn rẹn ma ghi sotọ. Ẹre ọ na ghi tae ladian wẹẹ: “Ne I ta ẹmwata ne uhunmwu ẹmwẹ ma uwa, ọkpa vbe uwu uwa gha ya mwẹ dẹ.” 22 Erhuanegbe ẹre na suẹn gha ghee egbe aro aro, iran ma rẹn ọmwa ne Jesu ghaa guan kaẹn. 23 Ọkpa vbe erhuanegbe Jesu, ne Jesu wa hoẹmwẹ ọnrẹn keghi tota ke Jesu.* 24 Ẹre Saimọn Pita na ya aro tie nene ọrhuanegbe, ọ na nọ rẹn wẹẹ: “De ọmwa nọ kha yi?” 25 Ọrhuanegbe nii keghi ya egbe gọ yan e Jesu ẹwẹ, ọ na nọ rẹn wẹẹ: “Enọyaẹnmwa, de ọmwa nọ khin?” 26 Jesu na wanniẹn wẹẹ: “Ọmwa ne I gha rhie ebrẹd ne I ya rhanmwẹ na, ẹre nọ.” Ọ ghi ya ebrẹd nii rhanmwẹ nẹ, ọ na rhie ne Judas ne ovbi e Saimọn Iskariọt. 27 E Judas ghi miẹn ọnrẹn ebrẹd nii nẹ, Setan na suẹn gha loo ẹre.* Jesu na ghi tama rẹn wẹẹ: “Gi obọ kẹ vbe emwi ne u hoo ne u ru.” 28 Sokpan, iran hia ne iran gba gha rre eteburu ma rẹn emwi nọ si ẹre nọ na ta ẹmwẹ na ma rẹn. 29 Eso na kue gha roro ẹre wẹẹ, te Jesu ghaa tama e Judas nọ ya dẹlẹ emwi ne iran khian loo ya do ugie, ra nọ ya ghae emwi ne ivbiogue, rhunmwuda, irẹn ẹre ẹkpẹti igho ghaa gue. 30 E Judas ghi miẹn Jesu ebrẹd nii nẹ, ọ na wa ladian vbe ọwara ọkpa nii. Vbe ẹghẹ na kha na, asọn ghaa nọ.

31 E Judas ghi kpa nẹ, Jesu na wẹẹ: “Banbanna nian, te a ghi mu uyi ye Ovbi ọmwa egbe, a vbe la egbe ẹre rhie uyi ne Osanobua. 32 Osanobua tobọre ẹre ọ khian mu uyi ye ọre egbe, ọ gha wa vbe ru ẹre vbobọvbobọ. 33 Ivbi mwẹ ni ghaan,* ovbi ẹghẹ kherhe ẹre I khian ghi ya gu uwa gha rrọọ. Wa gha gualọ mwẹ; sokpan, vbene I ka tama Ivbi e Ju, te I ghi vbe tama uwa nian wẹẹ, ‘Wa i khian sẹtin yo ehe ne I rrie.’ 34 Uhi ọgbọn ne I khian gbe ne uwa nian ọre wẹẹ, wa gha hoẹmwẹ egbe; zẹvbe ne I hoẹmwẹ uwa, wa ghi vbe gha hoẹmwẹ egbe vberriọ. 35 Adeghẹ uwa na hoẹmwẹ egbe, ẹre emwa hia khian na rẹn wẹẹ, erhuanegbe mwẹ ẹre uwa khin.”

36 E Saimọn Pita na nọ rẹn wẹẹ: “Enọyaẹnmwa, vbua rrie yi?” Jesu na wanniẹn ọnrẹn wẹẹ: “U i khian sẹtin lele mwẹ gha rrie ehe ne I rrie nian, sokpan, u gha rre vbe okiekie.” 37 E Pita na ghi tama rẹn wẹẹ: “Enọyaẹnmwa, vbọzẹ ne I i khian na sẹtin leluẹ nian? I mu egbe ne I ya wu ba ẹmwẹ ruẹ.” 38 Jesu na ghi wanniẹn wẹẹ: “Wẹ gha gele sẹtin wu ba ẹmwẹ mwẹ ra? Ne I ta ẹmwata ne uhunmwu ẹmwẹ ma ruẹ, ẹ i kẹ ọkpa ya viẹ hiehie, u ke siẹn mwẹ igba eha.”

14 “Wa ghẹ gi emwi rhọkpa kpokpo uwa vbe orhiọn. Wa mu ẹtin yan Osanobua;* wa vbe mu ẹtin yan mwẹ.* 2 Ehe na dia wa bun vbe owa Erha mwẹ. Akpawẹ ẹ i gele ye vberriọ, I gha te tama uwa. Sokpan, erriọ gele nọ, ọni ẹre ọ si ẹre ne I na khian, ne I ya mwamwa ehe khẹ uwa vba. 3 Adeghẹ I na kpa ya mwamwa ehe khẹ uwa, I gha werriegbe rre, ne I do tobọ mwẹ viọ uwa gha rrie owa mwẹ, ne uwa miehe na gha rre ehe ne imẹ vbe ye. 4 Wa rẹn odẹ na la sẹ ehe ne imẹ rrie na.”

5 E Tọmọs na ghi tama rẹn wẹẹ: “Enọyaẹnmwa, ma ma rẹn ehe ne u rrie. Vbe ima khian ghi ya rẹn odẹ na la sẹ ọre hẹ?”

6 Jesu na tama rẹn wẹẹ: “Mẹ ọre odẹ, ẹmwata kevbe arrọọ. Ọmwa nọ gha sẹtin bu Evbavba gha dee i rrọọ, vbe ẹ i re te ọ la obọ mwẹ. 7 Akpawẹ uwa gele rẹn mwẹ, wa gha te vbe rẹn Erha mwẹ; ke eban kpa nian, wa rẹn ọnrẹn nẹ, wa vbe miẹn ọnrẹn nẹ.”

8 E Filip na tama rẹn wẹẹ: “Enọyaẹnmwa, gie Evbavba ma ima, ọni ọkpa ẹre ima wa gualọ.”

9 Jesu na tama rẹn wẹẹ: “E Filip, eban ẹre ima vbe uwa ke rrọọ ra, ne u ma na he ye rẹn mwẹ? Ọmwaikọmwa nọ miẹn mwẹ nẹ, vbe miẹn Evbavba nẹ. Vbọ ghi zẹ ne u na kha wẹẹ, ‘Gie Evbavba ma ima’? 10 Wẹ ma yayi wẹẹ, I gu Evbavba rrọọ vbe akugbe, Evbavba vbe gu mwẹ rrọọ vbe akugbe? Ẹ i re ẹmwẹ obọ mwẹ ẹre I tama uwa, sokpan, Evbavba nọ gu mwẹ rrọọ vbe akugbe, ẹre ọ winna iwinna rẹn. 11 Ne I na tama uwa wẹẹ, I gu Evbavba rrọọ vbe akugbe, Evbavba vbe gu mwẹ rrọọ vbe akugbe, ọ khẹke ne uwa ya mwẹ yi. Sokpan, deghẹ ọni ma sẹ, wa rhunmwuda avbe iwinna nii yayi. 12 Ne I ta ẹmwata ne uhunmwu ẹmwẹ ma uwa, ọmwaikọmwa nọ mu ẹtin yan mwẹ* gha ru egbe iwinna ne I ru; ọ gha kue ru iwinna ni sẹ enena, rhunmwuda, I rrie ehe ne Evbavba ye. 13 Deba ọni, emwi ke emwi ne uwa nọ rẹn vbe eni mwẹ, I gha ru ẹre ne uwa, na mieke na la egbe Ọmọ rhie uyi ne Evbavba. 14 Adeghẹ uwa na nọ emwi ke emwi vbe eni mwẹ, I gha ru ẹre.

15 “Adeghẹ uwa hoẹmwẹ mwẹ, wa gha lele uhi mwẹ. 16 I gha tama Evbavba nọ rhie ọyọmwabọ* ọvbehe ne uwa, irẹn gha rhie ọyọmwabọ nii ne uwa nọ gu uwa gha rrọọ vbe etẹbitẹ. 17 Ọni ọre orhiọn ẹmwata ne agbọn i khian sẹtin miẹn yi, rhunmwuda, iran i bẹghe ẹre, amaiwẹ te iran khian rẹn ọnrẹn. Sokpan, wa rẹn ọnrẹn, rhunmwuda, ọ gu uwa rrọọ, ọ vbe rre uwu uwa. 18 Mẹ i khian sẹ uwa rae ye uwu akhiẹ.* I gha werriegbe bu uwa rre. 19 Vbe nẹi khian ghi kpẹẹ gbe, agbọn i khian ghi miẹn mwẹ. Sokpan, wa gha miẹn mwẹ, rhunmwuda, mẹ rrọọ, te uwa khian vbe gha rrọọ. 20 Vbe ẹdẹ ne ẹdẹrriọ, wa gha rẹn wẹẹ, I gu Erha mwẹ rrọọ vbe akugbe kevbe wẹẹ, wa gu mwẹ rrọọ vbe akugbe, mẹ vbe gu uwa rrọọ vbe akugbe. 21 Ọmwaikọmwa nọ rhan obọ miẹn uhi mwẹ yi, ọ na vbe gha lelẹe, ọmwa vberriọ ẹre ọ hoẹmwẹ mwẹ. Ọmwaikọmwa nọ hoẹmwẹ mwẹ, Erha mwẹ ghi vbe hoẹmwẹ ọnrẹn; erriọ ẹre imẹ khian vbe hoẹmwẹ ọnrẹn, I ghi gele gie egbe mwẹ ma rẹn.”

22 E Judas (ẹ i re Judas Iskariọt nọ rrọọ) keghi nọ rẹn wẹẹ: “Enọyaẹnmwa, vbọsiẹ ne u ma na hoo ne u gie egbuẹ ma agbọn, ne u khian na do gie egbuẹ ma ima?”

23 Jesu na wanniẹn ọnrẹn wẹẹ: “Adeghẹ ọmwaikọmwa na hoẹmwẹ mwẹ, ọ gha ya ẹmwẹ ne I tae ru emwi, Erha mwẹ ghi vbe hoẹmwẹ ọnrẹn. Ẹghẹ nii, mẹ vbe Erha mwẹ ghi bu ẹre gha dee, do gu ẹre gha rrọọ. 24 Ọmwaikọmwa nọ ma hoẹmwẹ mwẹ, ẹ i ya ẹmwẹ ne I tae ru emwi. Ẹmwẹ ne I tama uwa i re ẹmwẹ obọ mwẹ, sokpan, ọghe Evbavba nọ gie mwẹ rre nọ.

25 “Te I ta ẹmwẹ na hia ma uwa, vbene I na ye gu uwa rrọọ. 26 Sokpan, ọyọmwabọ nii nọ re orhiọn nọhuanrẹn, ne Evbavba gha gie rre vbe eni mwẹ, gha ma uwa emwi hia, ọ ghi vbe ye uwa ẹre rre, emwi hia ne I tama uwa. 27 I sẹ ọfunmwegbe rae ne uwa; I ya ọfunmwegbe mwẹ we uwa. I ma rhie ẹre ne uwa vbene agbọn ya rhie ẹre ne emwa. Wa ghẹ gi emwi rhọkpa kpokpo uwa vbe orhiọn, wa ghẹ vbe gi ohan mu uwa hiehie. 28 Wa họn vbe I tama uwa wẹẹ, ‘I gha kpa, sokpan, I gha vbe werriegbe bu uwa rre.’ Adeghẹ uwa hoẹmwẹ mwẹ, te uwa khian gha ghọghọ wẹẹ I bu Evbavba khian, rhunmwuda, Evbavba kpọlọ sẹ mwẹ. 29 Te I ta ena hia ma uwa vbene ọ te sunu, ne uwa mieke na yayi vbọ gha sunu. 30 I i khian ghi mobọ ta ẹmwẹ nọ bun gbe, rhunmwuda, ọmwa nọ kha yan agbọn na dee, sokpan, ẹ i mwẹ asẹ vbe egbe mwẹ.* 31 Sokpan, ne agbọn mieke na rẹn wẹẹ I hoẹmwẹ Evbavba, emwi ne Evbavba we ne I ru, ẹre I wa ru zẹẹ. Wa kpaegbe, ne uwa gia kpa hin emwa rre.

15 “Mẹ ọre vaẹn ne vaẹn,* Erha mwẹ ọre enọ gbaroghe ẹre. 2 Ọ gha miẹn abọ ke abọ nẹi mọ vbe egbe mwẹ, ọ ghi fiaẹn fua. Ọ gha miẹn nọ mọ vbọ, ọ ghi kpannọ igẹngẹn* ọnrẹn kua, nọ mieke na gha mọ ẹsẹse; ẹghẹ nii, ọ ghi khian nẹi mwẹ orra. 3 Wa khian nẹi mwẹ orra* nẹ, rhunmwuda ẹmwẹ ne I tama uwa. 4 Wa ye gha gu mwẹ rrọọ vbe akugbe, mẹ gha vbe gha gu uwa rrọọ vbe akugbe. Abọ erhan e vaẹn i khian sẹtin mọ, vbe ẹ i re te ọ sikan mu erhan e vaẹn. Erriọ vbe ye, wa i khian sẹtin mọ, vbe ẹ i re te uwa ye gha gu mwẹ rrọọ vbe akugbe. 5 Mẹ ọre erhan e vaẹn; wa ọre avbe abọ ni rrọọ. Ọmwaikọmwa nọ ye gu mwẹ gha rrọọ vbe akugbe, mẹ na vbe gu ẹre gha rrọọ vbe akugbe, ọ ghi gha mọ ẹsẹse. Wa i khian sẹtin ru emwi rhọkpa hiehie, vbe ẹ i re te imẹ rhie obọ ba ẹre. 6 Adeghẹ ọmwaikọmwa i ghi gu mwẹ rrọọ vbe akugbe, a ghi fiaẹn fua vbe na ghee abọ erhan, ọ ghi kaka. Emwa ghi do koko avbe abọ erhan nii, iran ghi ya hẹ ọre ku erhẹn, iran ghi giẹn ruan. 7 Adeghẹ uwa na ye gu mwẹ gha rrọọ vbe akugbe, wa na vbe kọ ẹmwẹ mwẹ ye ekhọe, emwi ke emwi ne uwa nọ rẹn gha sẹ uwa obọ. 8 Adeghẹ uwa na ye gha mọ ọmọ nibun, wa na vbe gha rhie ẹre ma wẹẹ, erhuanegbe mwẹ ẹre uwa khin, emwa ghi rhunmwuda ọni gha rhie uyi ne Erha mwẹ. 9 Vbene Evbavba hoẹmwẹ mwẹ, erriọ ẹre I vbe hoẹmwẹ uwa; wa dobọ mu ahoẹmwọmwa mwẹ. 10 Adeghẹ uwa na gha lele uhi mwẹ, ahoẹmwọmwa ne I mwẹ ne uwa i khian fafa, zẹvbe ne ahoẹmwọmwa ne Evbavba mwẹ mẹ ma vbe fafa, rhunmwuda ne I na lele uhi ẹre.

11 “Te I ta ẹmwẹ na hia ma uwa, ne ọyẹnmwẹ nọ sẹ mwẹ mieke na vbe gha sẹ uwa, ọyẹnmwẹ nọ sẹ uwa ghi vbe gha re nọ sẹ otọ ẹko. 12 Uhi ne imẹ yi ne uwa na khin: Wa gha hoẹmwẹ egbe, zẹvbe ne imẹ vbe hoẹmwẹ uwa. 13 Ahoẹmwọmwa nọ sẹ ọre i rrọọ, ne ọmwa wu ne avbe ọsiọre. 14 Ọse mwẹ ẹre uwa khin, deghẹ uwa na gha lele uhi ne I gbe ne uwa. 15 I i ghi tie uwa eviẹn, rhunmwuda, ọviẹn ma rẹn emwi ne arowa ẹre rẹnrẹn. Sokpan, ọse ẹre I ghi tie uwa re, rhunmwuda, emwi hia ne I họn vbe unu Erha mwẹ, I ta ehia ma uwa nẹ. 16 Ẹ i re uwa ẹre ọ zẹ mwẹ, sokpan, mẹ ẹre ọ zẹ uwa; I na we ne uwa ya gha mọ, ọmọ ne uwa mọ ghi vbe gha re nẹi fo vbe otọ. Ẹghẹ nii, emwi ke emwi ne uwa nọ Evbavba re vbe eni mwẹ, ọ gha ru ẹre ne uwa.

17 “Te I yi avbe uhi na ne uwa, ne uwa mieke na hoẹmwẹ egbe. 18 Adeghẹ agbọn na gha khẹko uwa, wa ghi rẹn wẹẹ, iran ka khẹko mwẹ nẹ, iran ke do gha khẹko uwa. 19 Akpawẹ ọghe agbọn na ẹre uwa khin, agbọn na gha te hoẹmwẹ uwa zẹvbe ọghẹe. Sokpan, ugbẹnvbe a miẹn wẹẹ, wa i re ọghe agbọn na, rhunmwuda, I zẹ uwa hin agbọn na rre nẹ, ọna ẹre ọ si ẹre ne agbọn na khẹko uwa. 20 Wa ghẹ mianmian ẹmwẹ ne I ka tama uwa, ne I na wẹẹ: Ọviẹn ma sẹ enarẹn. Adeghẹ iran na zẹ mwẹ kpokpo, iran gha vbe zẹ uwa kpokpo; adeghẹ iran na ya ẹmwẹ mwẹ ru emwi, iran gha vbe ya ọghe uwa ru emwi. 21 Ne uwa na re erhuanegbe mwẹ, ẹre ọ khian ya iran ru uwa avbe emwi na hia, rhunmwuda, iran ma rẹn Ọmwa nii nọ gie mwẹ rre. 22 Akpawẹ I ma rre do gu iran guan, iran i ghẹ te rriabe orukhọ rhọkpa. Sokpan, banbanna nian, iran i ghi miẹn emwi ne iran khian mu na wẹẹ, ọ ya iran ru orukhọ. 23 Ọmwaikọmwa nọ khẹko mwẹ, te ọ vbe khẹko Erha mwẹ. 24 Akpawẹ I ma sirra iran ru iwinna ọyunnuan ne ọmwa rhọkpa ma he ka ru, iran i ghẹ te rriabe orukhọ rhọkpa; sokpan, iran miẹn mwẹ nẹ, iran na gha khẹko mwẹ, iran na vbe gha khẹko Erha mwẹ ba ẹre. 25 Sokpan, te ọna sunu, ne ẹmwẹ na gbẹn ye ebe Uhi iran mieke na sẹ, nọ khare wẹẹ: ‘Iran khẹko mwẹ, vbene I ma na mwẹ emwi rhọkpa ne I ru iran re.’ 26 Ẹghẹ nọ gha ya rre ighẹ ọyọmwabọ nii, nọ re orhiọn ẹmwata, ne I khian gie ke ehe ne Evbavba ye gha dee, nọ vbe ke obọ Evbavba rre, ọ gha sẹ osẹ mẹ; 27 te uwa tobọ uwa khian vbe sẹ osẹ mẹ, rhunmwuda, ke otọ gha dee, ẹre uwa ke gu mwẹ rrọọ.

16 “Te I ta ẹmwẹ na hia ma uwa, ne uwa ghẹ mieke na rrua owẹ. 2 Emwa gha khu uwa fua vbe sinagọg.* Uhiẹn, ẹghẹ dee na gha ya miẹn wẹẹ, ọmwaikọmwa nọ gbe uwa rua ghi gha roro ẹre wẹẹ, Osanobua ẹre irẹn yae ga. 3 Iran gha ru ena hia rhunmwuda, iran ma rẹn Evbavba, iran ma vbe rẹn mwẹ. 4 Vbọrhirhighayehẹ, te I ta ena hia ma uwa, a i rẹn vbọ gha sẹ ẹghẹ nọ khian ya sunu, wa ghi yerre wẹẹ I ka tae ma uwa nẹ.

“Emwi nọ si ẹre, ne I ma na ka ta ena hia ma uwa, ọre ne I na gha gu uwa rrọọ. 5 Sokpan, I khian bu Ọmwa nọ gie mwẹ rre nian; ọrheyerriọ, a ma miẹn ọkpa vbe uwu uwa nọ nọ mwẹ wẹẹ, ‘Vbua rrie?’ 6 Sokpan, rhunmwuda ne I na ta ena hia ma uwa, te orriara ghi gba uwa ẹko. 7 Vbọrhirhighayehẹ, ne I ta ẹmwata ma uwa, umamwẹ ọghe uwa nọ ne I khian na kpa. Rhunmwuda, I ma na kpa, ọyọmwabọ nii i khian sẹtin bu uwa gha dee; sokpan, I gha kpa, I ghi gie ẹre bu uwa gha dee. 8 Ọ gha rre, ọ gha gi agbọn rẹn vbe odẹ nọ dewarorua, emwi ne orukhọ khin, emwi ne iruemwiẹse khin, kevbe emwi ne ibuohiẹn khin: 9 vbe okaro, ọ gha gi iran rẹn emwi ne orukhọ khin, rhunmwuda, iran ma mu ẹtin yan mwẹ;* 10 ọ gha vbe gi iran rẹn emwi ne iruemwiẹse khin, rhunmwuda, I khian bu Evbavba gha khian, wa i khian ghi werriegbe miẹn mwẹ; 11 ọ ghi vbe gi iran rẹn emwi ne ibuohiẹn khin, rhunmwuda, a bu ohiẹn ọmwa nọ kha yan agbọn na nẹ.

12 “I te ye mwẹ emwi nibun ne I khian tama uwa, sokpan, egbe uwa i sẹtin rrọ re nian. 13 Vbọrhirhighayehẹ, orhiọn ẹmwata* nii gha ghi rre, ọ ghi dia uwa la ehe ne ẹmwata hia ye, ẹ i khian zẹ ẹmwẹ obọ ẹre ta, sokpan, ẹmwẹ nọ họn ẹre ọ khian ta, ọ ghi vbe ta emwi nọ khian sunu vbe odaro ma uwa. 14 Ọ gha rhie uyi mẹ, rhunmwuda, ọ gha do tama uwa, emwi nọ miẹn vbe obọ mwẹ. 15 Emwi hia ne Erha mwẹ mwẹ, ọghomwẹ vbe nọ. Ọni ẹre ọ si ẹre ne I na tama uwa wẹẹ, emwi ne orhiọn ẹmwata nii miẹn vbe obọ mwẹ, ẹre ọ khian tama uwa. 16 Vbe nẹi khian ghi kpẹẹ gbe, wa i ghi miẹn mwẹ; vbe ovbi ẹghẹ kherhe vba, wa ghi werriegbe miẹn mwẹ.”

17 Ẹre eso vbe erhuanegbe ẹre na gha tama egbe iran wẹẹ: “Ọ tama ima wẹẹ, ‘Vbe nẹi khian ghi kpẹẹ gbe, wa i ghi miẹn mwẹ; vbe ovbi ẹghẹ kherhe vba, wa ghi werriegbe miẹn mwẹ.’ Ọ vbe kha wẹẹ, ‘rhunmwuda, I khian bu Evbavba gha khian.’ Vbọ ya ena hia kha?” 18 Ẹre iran na gha kha wẹẹ: “Vbọ yae kha nọ na wẹẹ, ‘ovbi ẹghẹ kherhe’? Ma ma rẹn emwi nọ guan kaẹn oo.” 19 Jesu rẹnrẹn wẹẹ, iran hoo ne iran nọ irẹn ọta, ẹre ọ na ghi nọ iran wẹẹ: “Te uwa nọ egbe uwa ọta ra, rhunmwuda ne I na kha wẹẹ: ‘Vbe nẹi khian ghi kpẹẹ gbe, wa i ghi miẹn mwẹ; vbe ovbi ẹghẹ kherhe vba, wa ghi werriegbe miẹn mwẹ’? 20 Ne I ta ẹmwata ne uhunmwu ẹmwẹ ma uwa, wa gha khiẹ, wa ghi vbe gha so, sokpan, agbọn ghi gha ghọghọ; agharhemiẹn wẹẹ uwa gha khiẹ, a gha ya akhiẹ ọghe uwa khian oghọghọ. 21 Emwi ubiẹmwẹ ghaa ru okhuo, obalọ* nọkhua ẹre ọ ye, rhunmwuda, ẹghẹ ọghẹe sẹ nẹ. Sokpan, ọ gha ghi biẹ ọmọ nii nẹ, ẹ i ghi ye obalọ nọ miẹn rre, rhunmwuda, ọ biẹ sotọ nẹ. Ọyẹnmwẹ oyẹnmwẹ, ẹre ọ khian ghi gha sẹ ọre. 22 Erriọ ẹre ọ vbe ye ne uwa, rhunmwuda, wa gha khiẹ nian; sokpan, I gha werriegbe miẹn uwa, ẹghẹ nii, ekhọe uwa ghi vuọn ne oghọghọ, ọmwa rhọkpa i khian sẹtin miẹn uwa oghọghọ nii. 23 Ọ gha sẹ ẹdẹ ne ẹdẹrriọ, wa i khian ghi nọ mwẹ ọta rhọkpa. Ne I ta ẹmwata ne uhunmwu ẹmwẹ ma uwa, deghẹ uwa na nọ Evbavba emwi ke emwi vbe eni mwẹ, ọ gha ru ẹre ne uwa. 24 Vbene ọ te sẹ ẹghẹ na, wa ma he nọ emwi rhọkpa vbe eni mwẹ. Wa nọ, ọ gha sẹ uwa obọ; ẹghẹ nii, ọyẹnmwẹ nọ sẹ uwa ghi gha re nọ sẹ otọ ẹko.

25 “Itan ẹre I ya ta ẹmwẹ na hia ma uwa. Ẹghẹ dee na gha ya miẹn wẹẹ, I i khian ghi ya itan gu uwa guan, sokpan, I ghi gbe emwi hia ẹho rua ma uwa, vbekpa Evbavba. 26 Vbe ẹdẹ ne ẹdẹrriọ, wa gha nọ Evbavba emwi vbe eni mwẹ; ẹ i re te I ya ọna kha wẹẹ, mẹ ẹre ọ khian gha gu uwa nọ emwi. 27 Rhunmwuda, Evbavba tobọre hoẹmwẹ uwa rhunmwuda ne uwa na hoẹmwẹ mwẹ, kevbe ne uwa na vbe yayi wẹẹ, imẹ ọre ọmwa ne Osanobua gie rre. 28 Te I rrie agbọn na zẹvbe ọmwa ne Evbavba ya zẹ ihe egbe. Te imẹ khian ghi kpa hin agbọn na rre na, ne I bu Evbavba.”

29 Erhuanegbe ẹre na kha wẹẹ: “Ẹn hẹn! Eban ẹre uwẹ gbe ẹmwẹ ẹho rua ma ima, ẹ i re ne u na ka kpa itan. 30 Ma wa rẹn nian wẹẹ, u rẹn emwi hia; esa i rrọọ ne ọmwa khian ya nọ ruẹ ọta. Ọna wa ya ima rẹn wẹẹ, Osanobua ẹre ọ gie ruẹ rre.” 31 Jesu na wanniẹn iran wẹẹ: “Wa gele yayi nian ra? 32 Ghee ẹre! Ẹghẹ dee, uhiẹn, ẹghẹ nii sẹ nẹ nian, ne dọmwadẹ ọghẹe vbe uwu uwa khian ya zagha kua, dọmwadẹ ọghẹe ghi zẹ odẹ owa ẹre, wa ghi sẹ mwẹ rae. Vbọrhirhighayehẹ, ẹ i re imẹ ọkpa ẹre ọ rrọọ, rhunmwuda, Evbavba gu mwẹ rrọọ. 33 Te I ta ẹmwẹ na hia ma uwa, ne uwa mieke na lekpa mwẹ gha mwẹ ọfunmwegbe. Wa gha rri oya vbe agbọn na, sokpan, wa ghẹ fian afianma!* I khọn agbọn na mu otọ nẹ.”

17 Jesu ghi ta ẹmwẹ na hia nẹ, ọ na tọn aro mu ghee ẹrinmwi, ọ na wẹẹ: “Evbavba, ẹghẹ sẹ nẹ nian. Mu uyi ye ovbuẹ egbe, ne ovbuẹ mieke na vbe rhie uyi nuẹn. 2 U rhie asẹ nẹẹn nọ ya gha khaevbisẹ yan emwa hia, nọ mieke na sẹtin rhie arrọọ ọghe etẹbitẹ ne emwa hia ne u viọ nẹẹn. 3 Emwi nọ khian ya iran gha mwẹ arrọọ ọghe etẹbitẹ, ọre ne iran do rẹn uwẹ* ne Osanobua ọkpa nọ re ọghe ẹmwata, kevbe ọmwa nii ne u gie rre, nọ re Jesu Kristi. 4 I rhie uyi nuẹn nẹ vbe agbọn na, rhunmwuda, I ru iwinna ne u mu mẹ fo nẹ. 5 Nọnaghiyerriọ nian, Evbavba, mu uyi yọ mwẹ egbe, egbe uyi ne I ka gha mwẹ vbe I gu ruẹ rrọọ, a te miẹn wẹẹ a yi agbọn na.

6 “I gi emwa ne u viọ mẹ vbe agbọn na rẹn eni ruẹ nẹ. Ọghuẹ ẹre iran ghaa khin, u na viọ iran mẹ, iran vbe ya ẹmwẹ ruẹ ru emwi.* 7 Iran rẹn nẹ nian wẹẹ, emwi hia ne u viọ mẹ, obọ ruẹ ẹre ọ ke rre; 8 rhunmwuda, emwi ne I họn vbe unu ruẹ, I tama iran nẹ, iran vbe miẹn ọnrẹn yi nẹ. Iran na gele do rẹn wẹẹ, te I rre zẹvbe ọmwa ne u ya zẹ ihe egbe, iran na vbe yayi wẹẹ, wẹ ẹre ọ gie mwẹ rre. 9 Te imẹ ghi mu ẹmwẹ iran ye erhunmwu nian; I ma na erhunmwu ne agbọn na, sokpan, ẹmwẹ iran ne u viọ mẹ, ẹre I mu ye erhunmwu, rhunmwuda, ọghuẹ ẹre iran khin. 10 Emwi hia ne I mwẹ, ọghuẹ nọ, emwi hia ne uwẹ vbe mwẹ, ọghomwẹ vbe nọ; a vbe rhie uyi mẹ nẹ vbe uwu ẹbu iran.

11 “I i khian ghi gha rre agbọn na nian, rhunmwuda, I bu ruẹ dee. Sokpan, iran ye rre agbọn na. Evbavba Nọhuanrẹn, lahọ gbaroghe iran, rhunmwuda eni ruẹ ne u mu mẹ, ne iran mieke na gha re ọkpa,* zẹvbe ne imẹ vbe ruẹ vbe re ọkpa.* 12 Ẹghẹ ne I na gha gu iran rrọọ, I na gha gbaroghe iran, rhunmwuda eni ruẹ ne u mu mẹ; I vbe tan ifuẹn gue iran, a ma miẹn nọ fuan vbe uwu iran, vbọ gberra ovbi ọfuan. Evbọzẹe nọ na vbe yerriọ, ọre ne ẹmwẹ ne ebe nọhuanrẹn tae mieke na sẹ. 13 Sokpan, mẹ bu ruẹ dee nian. Te I ta ẹmwẹ na hia vbe agbọn na, ne ọyẹnmwẹ nọ sẹ mwẹ mieke na gha sẹ iran, ọ ghi vbe sẹ iran otọ ẹko. 14 Ẹmwẹ ne u tama mwẹ, I tama iran nẹ, sokpan, agbọn khẹko iran, rhunmwuda, iran i re ọghe agbọn na, zẹvbe ne imẹ i vbe re ọghe agbọn na.

15 “I ma we ne u viọ iran hin agbọn na rre, sokpan, te I we ne u gha gbaroghe iran, ne obọ ọmwa dan nii ghẹ vba iran. 16 Iran i re ọghe agbọn na, vbene imẹ i vbe re ọghe agbọn na. 17 Ya ẹmwata kpe iran huan;* ẹmwata ẹre ẹmwẹ ruẹ khin. 18 Zẹvbe ne uwẹ gie imẹ gha die agbọn, erriọ ẹre imẹ vbe gie iran la uwu agbọn. 19 I keghi kpe egbe mwẹ huan rhunmwuda iran, na mieke na ya ẹmwata kpe iran huan.

20 “Ẹ i re iran na ọkpa ẹre I na erhunmwu na, sokpan, I vbe na erhunmwu ne emwa ni gha lekpa ikporhu ọghe iran do ya mwẹ yi. 21 Ẹghẹ nii, iran hia ghi do gha re ọkpa, zẹvbe ne uwẹ ne Evbavba vbe ya gu mwẹ rrọọ vbe akugbe, mẹ na vbe gu uwẹ gha rrọọ vbe akugbe. Iran ghi vbe gu ima gha rrọọ vbe akugbe, ne agbọn mieke na yayi wẹẹ, wẹ ẹre ọ gie mwẹ rre. 22 Uyi ne u mu yọ mwẹ egbe, I vbe muẹn ye iran egbe nẹ, ne iran mieke na gha re ọkpa, zẹvbe ne imẹ vbe ruẹ vbe re ọkpa. 23 Mẹ gu iran rrọọ vbe akugbe, wẹ vbe gu imẹ rrọọ vbe akugbe, ne iran mieke na gele gha re ọkpa.* Ẹghẹ nii, agbọn ghi do rẹn wẹẹ, wẹ ẹre ọ gie mwẹ rre, kevbe wẹẹ, u hoẹmwẹ iran zẹvbe ne u vbe hoẹmwẹ mwẹ. 24 Evbavba, I hoo ne emwa ne u viọ mẹ gha rre ehe ne I ye, ne iran mieke na gha bẹghe uyi ne u mu yọ mwẹ egbe, rhunmwuda, vbene a te yi agbọn na, u hoẹmwẹ mwẹ nẹ. 25 Erha nọ ru emwi nọ gbae, vbene ẹmwata, agbọn ma rẹn ruẹ, sokpan, mẹ rẹn ruẹ; iran na ne u viọ mẹ, vbe do rẹn nẹ wẹẹ, wẹ ẹre ọ gie mwẹ rre. 26 I gi iran rẹn eni ruẹ nẹ, erriọ ẹre I khian ye gha ru ẹre khian, ne iran mieke na vbe gha mwẹ egbe ahoẹmwọmwa ne u mwẹ mẹ, mẹ vbe iran ghi vbe gha rrọọ vbe akugbe.”

18 Jesu ghi ta ẹmwẹ na hia nẹ, irẹn vbe erhuanegbe ẹre keghi fian Iya e Kidrọn* gberra gha rrie eke ọkpa ne ogba ọkpa ghaa ye, iran na la uwu ogba nii. 2 E Judas nọ khian yae dẹ vbe rẹn evba nii, rhunmwuda, Jesu vbe erhuanegbe ẹre wa mobọ gha yo evba. 3 Rhunmwuda ọni, e Judas keghi viọ ivbiyokuo eso gha dee, kevbe avbe ọgbalegbe ne avbe ọkaolotu ohẹn kevbe avbe Farisi gie lelẹe, iran na gha die evba nii; iran na viọ ukpa kevbe emwi igbinna mwẹ obọ. 4 Vbe ẹghẹ na kha na, Jesu rẹn emwi hia nọ khian sunu daa irẹn nẹ; rhunmwuda ọni, ọ na khian sikẹ iran, ọ na nọ iran wẹẹ: “De ọmwa ne uwa gualọ?” 5 Iran na wanniẹn ọnrẹn wẹẹ: “Jesu ne Ovbi e Nazarẹt.” Ọ na tama iran wẹẹ: “Mẹ nọ.” Na kha na, e Judas nọ yae dẹ vbe gu iran mudia vba.

6 Sokpan, vbe Jesu ghi tama iran wẹẹ, “Mẹ nọ,” iran na sikẹ iyeke, iran na dele gbe otọ. 7 Ọ na werriegbe nọ iran wẹẹ: “De ọmwa ne uwa gualọ?” Iran na wẹẹ: “Jesu ne Ovbi e Nazarẹt.” 8 Jesu na wanniẹn wẹẹ: “I ka tama uwa nẹ ban wẹẹ imẹ nọ. Adeghẹ imẹ ẹre uwa gualọ, wa gi iran na kpa.” 9 Te ọna sunu, ne ẹmwẹ nọ ka ta mieke na sẹ, nọ na wẹẹ: “Vbe uwu iran hia ne u viọ mẹ, ọkpa i rrọọ nọ wiri vbọ.”

10 Vbe ẹghẹ na kha na, umozo ghaa gue Saimọn Pita. Ọ na wa yuo ẹre ladian, ọ na fian ehọ nọ rre obọ erha ọmwa ọghe ọviẹn ọghe ogie ohẹn fua. Eni ọviẹn nii ọre Malkọs. 11 Sokpan, Jesu keghi tama e Pita wẹẹ: “Rhie umozo na ye ako ẹre. Wẹ ma rẹn wẹẹ, te ọ khẹke ne I wọn vbe ukpu* ne Evbavba mu mẹ ra?”

12 Ẹre ivbiyokuo nii kevbe ọkaokuo, kẹ kevbe avbe ọgbalegbe ne Ivbi e Ju gie rre na mu e Jesu, iran na gbae. 13 Iran na ka rhie ẹre gha rrie ọghe Anas, nọ ghaa re erha ọvbokhan e Keyafas; e Keyafas na, ẹre ọ ghaa re ogie ohẹn vbe ukpo nii. 14 Uhiẹn, e Keyafas na ẹre ọ ka tama Ivbi e Ju wẹẹ, orhunmwu ọkpa wu ne ẹvbo ohoho ẹre ọ khian fu iran egbe sẹ.

15 Na kha na, Saimọn Pita kevbe ọrhuanegbe ọvbehe kegha lele Jesu khian. Ogie ohẹn rẹn ọrhuanegbe nii, rhunmwuda ọni, ọ na sẹtin lele Jesu la otọ ẹghodo ọghe ogie ohẹn, 16 sokpan, e Pita keghi mudia ye onurho vbe orere. Ọrhuanegbe nọkpa nii ne ogie ohẹn rẹnrẹn, keghi ya gu ukọ onurho guan, ọ na ghi rhie Pita la owa. 17 Ọvbokhan okhuo nọ re ukọ onurho vbe evba, na ghi nọ e Pita wẹẹ: “Ẹ i re ọkpa vbe erhuanegbe okpia na ẹre uwẹ vbe khin?” E Pita na wẹẹ: “I i re ọre oo.” 18 Vbe ẹghẹ na kha na, avbe eviẹn kevbe avbe ọgbalegbe keghi mudia lẹga erhẹn ne iran koko, iran na gha ya egbe ghae ẹre, rhunmwuda oni nọ ghaa fi. E Pita na vbe deba iran mudia vba, ọ na gha ya egbe ghae erhẹn.

19 Ọkaolotu ohẹn kegha zọlọ e Jesu ọta vbekpa erhuanegbe ẹre kevbe emwi nọ ma emwa ẹre. 20 Jesu na wanniẹn ọnrẹn wẹẹ: “Azagba ẹre I na kporhu ma emwa. Ẹghẹ hia ẹre I ya ma emwa emwi vbe sinagọg* kevbe ọgua Osa; evba nii ẹre Ivbi e Ju hia na si egbe koko. Emwi rhọkpa i rrọọ ne I tae vbe ẹkhokho. 21 Vbua ghi nọ mwẹ ọta ba? Nọ iran ni danmwehọ mwẹ nian. Iran rre emwa, iran gha tama ruẹ emwi ne I ma emwa ẹre.” 22 Ọ ghi ta ẹmwẹ na hia nẹ, ọkpa vbe ọgbalegbe ni mudia vba keghi gbe ubi ye Jesu aro, ọ na wẹẹ: “Ọkaolotu ohẹn ẹre uwẹ gu guan vberriọ?” 23 Jesu na wanniẹn ọnrẹn wẹẹ: “Adeghẹ ẹmwẹ dan ẹre I tae, u ghi tae nian; sokpan, deghẹ ẹmwata ẹre I tae, vbọzẹ ne u na fi mwẹ emwi?” 24 Ẹre Anas na we na rhie ẹre bu e Keyafas ne ogie ohẹn; te a wa ye gbae vbe ẹghẹ na kha na.

25 E Saimọn Pita na ye gha rre eke nọ na gha ya egbe ghae erhẹn. Ẹre iran na ghi nọ rẹn wẹẹ: “Ẹ i re ọkpa vbe erhuanegbe okpia na ẹre uwẹ vbe khin?” Ọ keghi siẹn, ọ na wẹẹ: “I i re ọre oo.” 26 Ọkpa vbe eviẹn ọghe ogie ohẹn, nọ ghaa re ọtiẹn okpia ne Pita fian ẹre ehọ fua keghi nọ e Pita wẹẹ: “Ẹ i re uwẹ ẹre imẹ miẹn, nọ mudia kẹ vbe uwu ogba nii ra?” 27 Sokpan, e Pita na vbe werriegbe siẹn ọnrẹn; vbe ọwara ọkpa nii, ọkpa keghi viẹ.

28 Iran na ghi rhie Jesu kpa hin ọghe Keyafas rre, iran na rhie ẹre gha rrie ọghe gọvinọ. Vbe ẹghẹ na kha na, owiẹ fioro ghi nọ; sokpan, iran tobọ iran ma la owa e gọvinọ nii, ne iran ghẹ ya khian enọ ma huan, ne iran mieke na sẹtin rri evbare Alagberra. 29 E Pailet na ghi ladian bu iran gha dee, ọ na nọ iran wẹẹ: “De ẹzọ ne uwa gu okpia na gui yi?” 30 Iran na wanniẹn ọnrẹn wẹẹ: “Adeghẹ okpia na ma ru emwi dan,* ma i ghẹ te muẹn guẹ nian.” 31 E Pailet na ghi tama iran wẹẹ: “Wa muẹn, ne uwa ya tobọ uwa bu ohiẹn ọnrẹn zẹvbe nọ gua uhi ọghe uwa ro.” Ẹre Ivbi e Ju na tama rẹn wẹẹ: “A ma rhie asẹ ne ima, ne ima ya gbe ọmwa rhọkpa rua.” 32 Te ọna sunu, nọ mieke na sẹ ighẹ ẹmwẹ ne Jesu ka ta vbekpa aro uwu ne irẹn khian wu.

33 E Pailet ne gọvinọ na werriegbe la owa, ọ na tie Jesu, ọ na nọ rẹn wẹẹ: “Wẹ ọre Ọba ọghe Ivbi e Ju ra?” 34 Jesu na wanniẹn wẹẹ: “Ẹwaẹn obọ ruẹ, ẹre uwẹ ya nọ mwẹ ọta na ra, ra te iran ta ẹmwẹ mwẹ ma ruẹ?” 35 E Pailet na wanniẹn wẹẹ: “Ovbi e Ju ẹre imẹ ma khin? Emwa ruẹ kevbe avbe ọkaolotu ohẹn ẹre ọ mu ruẹ bu mwẹ gha dee. Vbua ru?” 36 Jesu na wanniẹn wẹẹ: “Arriọba mwẹ i re ọghe agbọn na. Akpawẹ ọghe agbọn na, ẹre Arriọba mwẹ khin, te ekpayẹ mwẹ gha te gbinna mẹ, na ghẹ mu mwẹ ye obọ Ivbi e Ju. Sokpan, ọ vẹ na rẹn wẹẹ, Arriọba mwẹ i re ọghe ediran.” 37 Ẹre Pailet na ghi nọ rẹn wẹẹ: “Te uwẹ ghi ya ọna kha wẹẹ, ọba ẹre uwẹ khin ra?” Jesu na wanniẹn wẹẹ: “Wẹ tobọ ruẹ ẹre ọ tae na wẹẹ ọba ẹre I khin. Emwi nọ si ẹre na na biẹ mwẹ, nọ vbe ya mwẹ gha die agbọn na, ọre ne I do sẹ osẹ ye ẹmwata. Ọmwaikọmwa nọ ghi rre obọ ọghe ẹmwata nẹ gha danmwehọ mwẹ.” 38 E Pailet na nọ rẹn wẹẹ: “Vbọ re ẹmwata?”

Vbe ọ ghi nọ rẹn ọta na nẹ, ọ na werriegbe ladian bu Ivbi e Ju, ọ na tama iran wẹẹ: “I ma miẹn emwi dan rhọkpa ne okpia na ru. 39 Levba sevba, wa rẹnrẹn wẹẹ, ẹghẹ ke ẹghẹ ne uwa ya do ugie Alagberra, ẹre I ya fan orhunmwu ọkpa ne uwa. Wa hoo ne I fan Ọba ọghe Ivbi e Ju ne uwa ra?” 40 Iran na werriegbe gha go, iran na wẹẹ: “Ghẹ fan okpia na, fan e Barabas ne ima!” Izigan ẹre Barabas ghaa khin.

19 E Pailet na we ne iran rhie Jesu kpa, ne iran ya asan bolo ẹre egbe. 2 Ivbiyokuo keghi ya igban do ẹrhu ẹde mu ye ọre uhunmwu, iran na vbe rhuan ẹre ukpọn nọ baa.* 3 Iran na gha bu ẹre rre, do gha tama rẹn wẹẹ: “U gha tọ, u kpẹẹ re, Ọba ọghe Ivbi e Ju!” Iran na vbe gha gbe ubi ye ọre aro. 4 E Pailet na werriegbe gha rrie orere, ọ na ya tama iran wẹẹ: “Wa ghee ẹre! Te I rhie ẹre ladian bu uwa gha dee, ne uwa mieke na rẹn wẹẹ, I ma miẹn emwi dan rhọkpa nọ ru.” 5 Jesu na ghi ladian orere, ke irẹn kevbe ẹrhu ẹde na ya igban do nọ rre ọre uhunmwu, kevbe ukpọn nọ baa* ne iran rhuan ẹre. E Pailet na ghi tama iran wẹẹ: “Nene okpia na khin oo!” 6 Ugbẹnvbe avbe ọkaolotu ohẹn kevbe avbe ọgbalegbe ghi miẹn ọnrẹn, iran na gha go wẹẹ: “Kan rẹn mu erhan! Kan rẹn mu erhan!”* E Pailet na ghi tama iran wẹẹ: “Wa muẹn khekherriọ, ne uwa tobọ uwa ya kan rẹn mu erhan,* rhunmwuda, I ma bẹghe emwi dan rhọkpa nọ ru.” 7 Ivbi e Ju na wanniẹn ọnrẹn wẹẹ: “Ma mwẹ uhi ne ima lele; zẹvbe ne uhi ima khare, ọ khẹke ne okpia na wu, rhunmwuda, ọ wẹẹ ovbi Osanobua ẹre irẹn khin.”

8 E Pailet ghi họn ẹmwẹ ne iran ghaa ta, ohan na werriegbe kakabọ gha muẹn. 9 E Pailet na werriegbe la uwu owa,* ọ na nọ e Jesu wẹẹ: “Vbua ke rre?” Sokpan, Jesu ma zẹ ẹmwẹ rhọkpa wanniẹn ọnrẹn. 10 E Pailet na tama rẹn wẹẹ: “Vbọzẹ ne u ma na hoo ne u gu mwẹ guan yi? U ma rẹn wẹẹ, I mwẹ asẹ ne I khian ya fan ruẹ fua, I vbe mwẹ asẹ ne I khian ya we na gbuẹ rua?”* 11 Jesu na wanniẹn ọnrẹn wẹẹ: “U i khian sẹtin gha mwẹ asẹ rhọkpa vbe egbe mwẹ, vbe ẹ i re te a ke ẹrinmwi rhie asẹ nii nuẹn. Rhunmwuda ọni, ọmwa nọ mu mwẹ guẹ, ẹre ọ rriabe nọ sẹre.”

12 Rhunmwuda ọni, e Pailet na ye gha gualọ vbene ọ khian ya fan e Jesu hẹ, sokpan, Ivbi e Ju na gha go wẹẹ: “U gha fan okpia na, ọni rhie ma wẹẹ, u i re ọsie Siza. Ọmwaikọmwa nọ mu egbe ẹre ye ukpo ọba, oghian e Siza nọ.”* 13 E Pailet ghi họn ẹmwẹ na, ọ na rhie Jesu ladian orere; e Pailet keghi tota ye aga ibuohiẹn vbe eke na tie ẹre Iba Ọghe Okuta, sokpan, Ivbi e Hibru na gha tie ẹre Gabata. 14 Ẹdẹrriọ kegha re ẹdẹ na ya mu egbe yotọ khẹ ugie Alagberra; odẹ ughaẹdẹ* nogie ehan* ẹre ẹghẹ ghaa ye. E Pailet na ghi tama Ivbi e Ju wẹẹ: “Wa ghee ọba ọghe uwa oo!” 15 Sokpan, iran na gha go wẹẹ: “Gbe ẹre rua! Gbe ẹre rua!* Kan rẹn mu erhan!”* E Pailet na nọ iran wẹẹ: “Te uwa we ne I gbe ọba ọghe uwa rua ra?” Avbe ọkaolotu ohẹn keghi wanniẹn wẹẹ: “E Siza ọkpa ẹre ima rẹn ye ọba ima.” 16 Ọ na ghi rhie Jesu ne iran, ne iran ya kan rẹn mu erhan.

Iran na ghi rhie Jesu kpa. 17 Jesu na ghi dada erhan irrioya* ọghẹe, ọ na gha rrie eke na tie ẹre Isi Ugboloko Uhunmwu,* ne Ivbi e Hibru tie ẹre Gọlgọta. 18 Iran keghi kan e Jesu mu erhan vbe evba nii, iran na vbe si ikpia eva rrọ ye erhan vbe evba, ọkpa rre ọre obọ erha ọmwa, nọkpa na gha rre ọre obọ iye ọmwa, vbene Jesu na gha rre adesẹneva iran. 19 E Pailet keghi vbe gbẹn emwi mu ye erhan irrioya* na kan e Jesu yi, emwi nọ gbẹn yọ ọre: “Jesu ne Ovbi e Nazarẹt, nọ re Ọba ọghe Ivbi e Ju.” 20 Ivbi e Ju nibun ẹre ọ tie emwi nọ gbẹn na, rhunmwuda, eke na na kan e Jesu mu erhan wa sikẹ orere ẹvbo; e Hibru, e Latin kevbe Grik ẹre a vbe ya gbẹn ọnrẹn. 21 Vbọrhirhighayehẹ, avbe ọkaolotu ohẹn ọghe Ivbi e Ju keghi tama e Pailet wẹẹ: “Ẹ i re ‘Ọba ọghe Ivbi e Ju,’ ẹre ọ khẹke ne u gbẹn yọ. Sokpan, ẹmwẹ ne okpia na tae, nọ na wẹẹ, ‘Mẹ ọre Ọba ọghe Ivbi e Ju,’ ẹre ọ khẹke ne u gbẹn yọ.” 22 E Pailet na wanniẹn wẹẹ: “I gbẹn emwi ne I hoo ne I gbẹn nẹ, a i ghi fi ẹre werriẹ.”

23 Ivbiyokuo ghi kan e Jesu mu erhan nẹ, iran na viọ ẹwu nọ yọ ke odukhunmwu, iran na ghae ẹre ye ihe enẹ, dọmwadẹ ọghẹe na rhie ẹre ọkpọkpa. Iran keghi vbe mu ẹwu nọ yọ ke otọ, na wa do ke odukhunmwu ya sẹ otọ; ẹ i mwẹ ehe na na dọlọe kugbe. 24 Iran na ghi tama egbe iran wẹẹ: “Wa ghẹ gia yanghaẹn, sokpan, wa gia yan uta yọ, na mieke na rẹn ọmwa nọ gha muẹn.” Te ọna sunu, ne ẹmwẹ ne ebe nọhuanrẹn tae mieke na sẹ, nọ khare wẹẹ: “Iran keghi ghae ukpọn mwẹ ne egbe iran, iran na vbe yan uta ye ukpọn mwẹ.” Erriọ ẹre ivbiyokuo nii gele ru ẹre.

25 Na kha na, e Meri ne iye Jesu kevbe ọtiọnrẹn nokhuo,* keghi mudia ye ọkpẹn erhan irrioya* ọghe Jesu; e Meri ne amwẹ e Klopas kevbe Meri Magdalin vbe gha rre evba. 26 Jesu ghi bẹghe iyẹe kevbe ọrhuanegbe nii ne irẹn hoẹmwẹ ọnrẹn, vbe iran mudia ye evba, ọ na tama iyẹe wẹẹ: “Okhuo na, ghee ovbuẹ!” 27 Ọ na vbe tama ọrhuanegbe nii wẹẹ: “Ghee iyuẹ!” Ke ẹghẹ nii kpa, ọrhuanegbe nii keghi rhie ẹre gha rrie owa nọ ya tota ke irẹn.

28 Vbọ ma he kpẹẹ vba, vbe Jesu ghi rẹn nẹ wẹẹ, irẹn ru emwi hia na waa irẹn ẹre nẹ, ọ na kha wẹẹ: “Ovbamẹ gbe mwẹ.” Te ọ ta ẹmwẹ na, ne ẹmwẹ ne ebe nọhuanrẹn tae mieke na sẹ. 29 Akhe ọkpa kegha rre evba, ne ayọn nọ kaẹn vuọẹn. Iran na fi ihiọn ye uwu ayọn nọ kaẹn nii, iran na rhie ẹre ye erhan e hisọp,* iran na muẹn ye ọre unu. 30 Jesu ghi danmwẹ ayọn nọ kaẹn nii, ọ na kha wẹẹ: “A ru ẹre nẹ!”* Ọ ghi vbokho uhunmwu rre, ọ na kpan udu.*

31 Ivbi e Ju keghi bu e Pailet gha khian, iran na we nọ gie emwa, ne iran ya bunnọ owẹ ọghe emwa ni rre uhunmwu erhan irrioya,* ne iran vbe viọ ikun iran kpa. Emwi nọ ya iran ta ẹmwẹ na ọre wẹẹ, ẹdẹrriọ ẹre ọ ghaa re ẹdẹ Imuegbeyotọ, iran ma hoo ne ikun orinmwi ye gha rre uhunmwu erhan irrioya* vbe Ẹdẹ Ikẹtin (rhunmwuda, Ẹdẹ Ikẹtin nọkhua wa gha nọ). 32 Ivbiyokuo ghi sẹ ehe na na kan e Jesu mu erhan, iran na bunnọ owẹ okpia nokaro, kevbe ọghe nogieva. 33 Sokpan, iran ghi sẹ ehe ne Jesu ye, iran na do miẹn wẹẹ, ọ kẹ ọre ya wu nẹ; rhunmwuda ọni, iran ma ghi bunnọ ọnrẹn owẹ. 34 Sokpan, ọkpa vbe ivbiyokuo nii keghi so asoro ye ọre efẹn, ẹre esagiẹn kevbe amẹ na ladian. 35 Ọmwa ne aro ọre sẹ emwi na, ẹre ọ do na iyẹn na, ẹmwẹ nọ tae keghi re ẹmwata. Irẹn vbe rẹn wẹẹ ẹmwata ẹre irẹn tae, ne uwa miehe na vbe yayi. 36 Vbene ẹmwata, te ena hia sunu, ne ẹmwẹ ne ebe nọhuanrẹn tae mieke na sẹ, nọ khare wẹẹ: “A i khian bun* ugboloko ọghẹe rhọkpa.” 37 Ako ọvbehe vbe ebe nọhuanrẹn vbe kha wẹẹ: “Iran gha ghee ọmwa ne iran ya asoro so.”

38 Ọ ghaa mwẹ okpia ọkpa na tie ẹre Josẹf, ne Ovbi Arimatia. Ọrhuanegbe Jesu ghaa nọ, sokpan, te ọ ghaa rhiegbe ẹre lẹre, rhunmwuda ne ohan Ivbi e Ju na gha muẹn. Vbe ena hia ghi sunu nẹ, okpia na keghi bu e Pailet gha khian, ọ na ya nọ rẹn deghẹ ọ gha kue ne irẹn mu ikun e Jesu; e Pailet na gele kue yọ. Ẹre ọ na gha khian, ọ na ya mu ikun e Jesu kpa. 39 E Nikodimọs na vbe rre, ọ na mu oziya* kevbe alọe na gua* kugbe rre, nọ gha khua sẹ odẹ ekilo eha yan ọgban (33).* E Nikodimọs na, ẹre ọ ka bu e Jesu gha dee vbe asọn ọkpa. 40 Iran keghi mu ikun e Jesu, iran na ya ukpọn e linẹn na tue emwi ni winhin yi vbuọ ọre, zẹvbe ne Ivbi e Ju ru ẹre, vbe iran gha khian ree orinmwi. 41 Ọ ghaa mwẹ ogba ọkpa nọ ghaa rre ọkpẹn eke na na gbe Jesu rua,* idin okuta ọkpa na da fian kegha rre uwu ogba nii, a ma he ka mu ọmwa rhọkpa yọ ẹdẹ. 42 Rhunmwuda ne ẹdẹrriọ na gha re ẹdẹ Imuegbeyotọ ọghe Ivbi e Ju, kevbe wẹẹ, idin okuta nii vbe sikẹ evba, iran na wa mu e Jesu ye evba.

20 Ọ ghi rre ikpẹdẹ nokaro vbe uzọla, Meri Magdalin kegha die idin ọghe Jesu vbe owiẹ fioro, vbe ẹdẹ ma he wan. Ọ ghi sẹ evba, ọ na miẹn wẹẹ, a mu okuta na ya gue idin nii hin evba rre nẹ. 2 Ẹre ọ na rhulẹ bu e Saimọn Pita kevbe ọrhuanegbe nọkpa, ne Jesu hoẹmwẹ ọnrẹn, ọ na tama iran wẹẹ: “Iran mu ikun Enọyaẹnmwa hin idin rre nẹ, ma ma rẹn eke ne iran ghi muẹn yi.”

3 Ẹre Pita kevbe ọrhuanegbe nọkpa na gha rrie idin nii. 4 Iran eva na gbe atata owẹ ye ulẹ, sokpan, ọrhuanegbe nọkpa na rhulẹ sẹ e Pita rae ye iyeke, irẹn ẹre ọ ghi ka sẹ idin nii khẹ ọre. 5 Ọ ghi yọn ghee uwu ẹre, ọ keghi bẹghe ukpọn e linẹn na ya vbuọ e Jesu, sokpan, ọ ma la uwu ẹre. 6 Saimọn Pita nọ lelẹe dee vbe iyeke na vbe rre. Ọ ghi la uwu idin nii, ukpọn e linẹn nii ẹre ọ vbe miẹn vba. 7 Ukpọn na ya vbuọ ọre uhunmwu kegha rre evba, sokpan, ọ ma deba ukpọn nikẹre, a na vbuọ ọre ye efọnkpa. 8 Ọrhuanegbe nọkpa nọ ka sẹ idin nii na vbe la uwu ẹre, ọ ghi miẹn emwi na hia, ọ na ya ẹmwẹ na tama iran yi. 9 Vbe ẹghẹ na kha na, iran ma he ye rẹn otọ emwi ne ebe nọhuanrẹn tae, nọ na wẹẹ ọ gha rhiọ kpaegbe vbe idin. 10 Ẹre avbe erhuanegbe nii na ghi kpa gha rrie owa.

11 Sokpan, e Meri ma kpa, ọ na ye mudia ye evba, ọ na gha viẹ. Vbe uwu ẹghẹ nọ ya gha viẹ nii, ọ na niẹn urhu ghee uwu idin nii, 12 ọ keghi bẹghe odibosa eva ni yọ ukpọn nọfua, iran na tota ye eke na te mu ikun e Jesu yi; ọkpa na tota ye eke na mu ẹre uhunmwu daa, nọkpa na tota ye eke na viọ ọre owẹ daa. 13 Iran na nọ rẹn wẹẹ: “Okhuo na, vbua gu viẹ?” Ọ na tama iran wẹẹ: “Iran mu Enọyaẹnmwẹ kpa, I ma rẹn eke ne iran ghi muẹn yi.” 14 Ọ ghi ta ẹmwẹ na nẹ, ọ na gbaro ghee iyeke, ọ keghi bẹghe Jesu vbe ọ mudia ye evba, sokpan, ọ ma rẹn wẹẹ, Jesu nọ. 15 Jesu na nọ rẹn wẹẹ: “Okhuo na, vbua gu viẹ? De ọmwa ne u gualọ?” E Meri na te gha roro ẹre wẹẹ, ọmwa nọ gbaroghe ogba nii nọ, ẹre ọ na tama rẹn wẹẹ: “Enọwanrẹn, deghẹ uwẹ ẹre ọ muẹn, lahọ tama mwẹ eke ne u muẹn yi, ne I ya muẹn vbe evba nii.” 16 Jesu na tama rẹn wẹẹ: “Meri!” E Meri ghi gbaro ghee iyeke, ọ na zẹ e Hibru ma rẹn, ọ na wẹẹ: “Raboni!” (emwi na yae kha ọre, “Ọmamwaemwi!”) 17 Jesu na tama rẹn wẹẹ: “Ghẹ ghi rhikhan mu mwẹ, rhunmwuda, I ma he ye bu Evbavba. Sokpan, bu etẹn mwẹ, ne u ya tama iran wẹẹ, ‘I khian kpa bu Erha mwẹ kevbe Erha uwa, Osanobua mwẹ kevbe Osanobua uwa.’” 18 Meri Magdalin keghi rre do na iyẹn na ma erhuanegbe Jesu, ọ na wẹẹ: “I miẹn Enọyaẹnmwa nẹ!” Ọ na ghi tama iran, emwi ne Jesu tama rẹn.

19 Vbọ ghi rre ẹghẹ ota vbe ikpẹdẹ nokaro ọghe uzọla nii, Jesu keghi bu erhuanegbe ẹre rre. Na kha na, erhuanegbe ẹre khui urho ke egbe yi vbe ihe ọkpa, rhunmwuda ne ohan Ivbi e Ju na gha mu iran. Iran ghi ghee, Jesu wa mudia ye uwu ẹbu iran, ọ na tama iran wẹẹ: “Ọfunmwegbe gu uwa rrọọ.” 20 Ọ ghi ta ẹmwẹ na nẹ, ọ na ma iran obọ ẹre kevbe efẹn ọnrẹn. Erhuanegbe ẹre na ghọghua vbe iran bẹghe Enọyaẹnmwa. 21 Jesu na werriegbe tama iran wẹẹ: “Ọfunmwegbe gu uwa rrọọ. Zẹvbe ne Evbavba gie mwẹ rre, erriọ ẹre imẹ khian vbe gie uwa.” 22 Ọ ghi ta ẹmwẹ na nẹ, ọ na woo* yan iran, ọ na tama iran wẹẹ: “Wa miẹn orhiọn nọhuanrẹn. 23 Adeghẹ uwa na yabọ ọmwaikọmwa nọ ru orukhọ, ọni rhie ma wẹẹ, a yabọe nẹ; adeghẹ uwa ma yabọe, ọni rhie ma wẹẹ, a ma he yabọe.”

24 Sokpan, e Tọmọs na ghaa tie ẹre Ivin Eva, nọ ghaa re ọkpa vbe iran Iweva nii, ma gha rre evba vbe ẹghẹ ne Jesu ya rre. 25 Ẹre erhuanegbe nikẹre na gha tama rẹn wẹẹ: “Ma miẹn Enọyaẹnmwa nẹ!” Sokpan, ọ na tama iran wẹẹ: “Emwi ọkpa nọ khian ya mwẹ yayi ọre wẹẹ, I gha miẹn ọnrẹn, I ghi ghee ẹre deghẹ ama ise rre ọre obọ, I ghi vbe ziẹn ikpianbọ mwẹ ye eke na kan ise yi vbe obọ ọre, deba ọni, I ghi vbe ziẹn obọ ye ọre efẹn; vbe ẹ i re erriọ, I i yayi ẹdẹ na wu.”

26 Vbe ikpẹdẹ erẹnrẹn ghi gberra nẹ, erhuanegbe Jesu na werriegbe khui egbe ye uwu owa; vbe ẹghẹ na kha na, e Tọmọs ghaa gu iran rre evba. Jesu keghi la owa, agharhemiẹn wẹẹ iran te khui urho. Ọ na tama iran wẹẹ: “Ọfunmwegbe gu uwa rrọọ.” 27 Iyeke ọni, Jesu na tama e Tọmọs wẹẹ: “Ghee obọ mwẹ, ne u ziẹn ikpianbọ ruẹ yọ; vbe rhie obọ ruẹ rre, ne u ziẹn ọnrẹn yọ mwẹ efẹn. Ghẹ ghi gbe awawẹ, ne u yayi.” 28 E Tọmọs na wanniẹn ọnrẹn wẹẹ: “Enọyaẹnmwẹ kevbe Osa mwẹ!” 29 Jesu na ghi nọ rẹn wẹẹ: “Rhunmwuda ne uwẹ na ghi bẹghe mwẹ na, ọni ẹre ọ si ẹre ne uwẹ na yayi ra? Oghọghọ nọ ne iran ni yayi, agharhemiẹn wẹẹ aro iran ma sẹ ọre.”

30 Vbene ẹmwata, Jesu keghi vbe sirra erhuanegbe ẹre winna iwinna ọyunnuan nibun na ma gbẹn ye ebe* na. 31 Sokpan, te a gbẹnnẹ enena yotọ, ne uwa mieke na yayi wẹẹ, Jesu ọre Kristi, ne Ovbi Osanobua, rhunmwuda, wa gha yayi, wa ghi lekpa eni ẹnrẹn gha mwẹ arrọọ.

21 Iyeke ọna, Jesu keghi werriegbe rhiegbe ma erhuanegbe ẹre vbe Okun e Taibirias. Vbene ọ ya sunu na khin. 2 Saimọn Pita, e Tọmọs (na vbe tie ẹre Ivin Eva), e Nataniẹl nọ ke Kena nọ rre Galili rre, ivbi e Zẹbẹdi kevbe erhuanegbe Jesu eva ọvbehe keghi koko gha rre ihe ọkpa. 3 Saimọn Pita na tama iran nikẹre wẹẹ: “I khian ya gbe ehẹn.” Iran na tama rẹn wẹẹ: “Ma gha leluẹ.” Ẹre iran na ladian, iran na ya la okọ, sokpan, iran ma mu ehẹn rhọkpa vbe asọn nii.

4 Vbọrhirhighayehẹ, vbe ẹdẹ khian ghi gbe, Jesu keghi mudia ye ọkpẹn okun nii, sokpan, erhuanegbe ẹre ma rẹn wẹẹ irẹn nọ. 5 Jesu na nọ iran wẹẹ: “Ivbi mwẹ, wa mwẹ emwi* rhọkpa na re vba ra?” Iran na wanniẹn ọnrẹn wẹẹ: “Ẹo!” 6 Ẹre Jesu na tama iran wẹẹ: “Wa fi ọga ọghe uwa fi obọ erha ọmwa okọ na, obọ uwa gha vba ehẹn eso.” Ẹre iran na gele ru vberriọ, sokpan, iran ma ghi sẹtin si ọga nii la uwu okọ, rhunmwuda, ehẹn ne iran munọ wa gha bun. 7 Ọrhuanegbe nii ne Jesu hoẹmwẹ ọnrẹn keghi tama e Pita wẹẹ: “Enọyaẹnmwa nọ!” Saimọn Pita ghi wa họn wẹẹ Enọyaẹnmwa nọ, ọ na mu ẹwu nọ yọ ke odukhunmwu yọ, rhunmwuda, te ọ te kie egbe yotọ;* ọ na san fi uwu okun. 8 Sokpan, erhuanegbe nikẹre keghi gua okọ nekherhe rre, iran na gha si ọga nii ne ehẹn vuọn dee, rhunmwuda, eke ne iran ghaa ye vbe uwu okun ma rree gbe ne oke, odẹ ibata iyisẹn vbe ihe eha (300)* ghaa nọ.

9 Iran ghi sẹ oke, iran na do vba erhẹn na koko ye evba, a viọ ehẹn yọ, ebrẹd vbe gha rre evba. 10 Jesu na tama iran wẹẹ: “Wa viọ ehẹn eso rre vbe ehẹn ne uwa munọ ban.” 11 Ẹre Saimọn Pita na la okọ, ọ na ya si ọga nii ne ehẹn ni kọnkọn vuọn gha die oke; ehẹn eha yan ekigbesiyeha nọ ya yan iyisẹn (153) ẹre ọ ghaa rre uwu ẹre. Agharhemiẹn wẹẹ ehẹn nọ ghaa rre uwu ọga nii wa bun, ọga nii ma sọọ. 12 Jesu na tama iran wẹẹ: “Wa larre, ne uwa do rri evbare owiẹ.” A ma miẹn ọkpa vbe erhuanegbe ẹre ne ohan gi ẹre nọ rẹn wẹẹ: “De ọmwa ne u khin?” rhunmwuda, iran rẹnrẹn wẹẹ Enọyaẹnmwa nọ. 13 Jesu keghi ya mu ebrẹd nii, ọ na rhie ne iran, erriọ ẹre ọ vbe ru avbe ehẹn nii. 14 Ọna ẹre ọ ya gba vbe ukpogieha ne Jesu he ya rhiegbe ma erhuanegbe ẹre, ke obọ na ya huẹn ọnrẹn kpaegbe vbe idin.

15 Iran ghi rri evbare owiẹ nii fo nẹ, Jesu na nọ e Saimọn Pita wẹẹ: “Saimọn ne ovbi e Jọn, wẹ hoẹmwẹ mwẹ sẹ avbe emwi na ra?” Ọ na wanniẹn ọnrẹn wẹẹ: “Ẹẹn, Enọyaẹnmwa, u rẹnrẹn wẹẹ I hoẹmwẹ ruẹ.” Jesu na ghi tama rẹn wẹẹ: “Gha koko avbe oteghe ohuan mwẹ.” 16 Jesu na werriegbe nọ rẹn ukpogieva wẹẹ: “Saimọn ne ovbi e Jọn, u hoẹmwẹ mwẹ ra?” Ọ na wanniẹn ọnrẹn wẹẹ: “Ẹẹn, Enọyaẹnmwa, u rẹnrẹn wẹẹ I hoẹmwẹ ruẹ.” Jesu na ghi tama rẹn wẹẹ: “Gha gbaroghe avbe ohuan mwẹ ne giẹrẹ.” 17 Jesu na werriegbe nọ rẹn ukpogieha wẹẹ: “Saimọn ne ovbi e Jọn, u hoẹmwẹ mwẹ ra?” Ẹko ma ghi rhiẹnrhiẹn e Pita rhunmwuda ne Jesu na nọ rẹn ukpogieha wẹẹ: “U hoẹmwẹ mwẹ ra?” Ẹre Pita na ghi tama rẹn wẹẹ: “Enọyaẹnmwa, u rẹn emwi hia nian; u rẹnrẹn wẹẹ I hoẹmwẹ ruẹ.” Jesu na ghi tama rẹn wẹẹ: “Gha koko avbe ohuan mwẹ ne giẹrẹ. 18 Ne I ta ẹmwata ne uhunmwu ẹmwẹ ma ruẹ, ẹghẹ ne u na gha rre ọvbokhan, wẹ ẹre ọ tobọ ruẹ yọ ẹwu ruẹ, u ghi gha rrie ehe nọ rhirhi khọn ruẹ. Sokpan, u gha ghi khian ọmaẹn nẹ, u ghi niẹn obọ ruẹ, ọmwa ọvbehe ghi yọ ruẹ ẹwu, ọ ghi mu ruẹ gha rrie ehe nọ ma te khọn ruẹ.” 19 Te Jesu ta ẹmwẹ na, nọ ya gie aro uwu ne Pita khian wu, nọ gha rhie uyi ne Osanobua. Jesu ghi ta ẹmwẹ na nẹ, ọ na tama e Pita wẹẹ: “Ye gha lele mwẹ khian.”

20 E Pita ghi gbaro ghee iyeke, ọ na bẹghe ọrhuanegbe nii ne Jesu hoẹmwẹ ọnrẹn, nọ ya egbe gọ yan e Jesu ẹwẹ vbe ẹghẹ ne iran ya gha rri evbare ota, nọ vbe nọ e Jesu wẹẹ: “Enọyaẹnmwa, de ọmwa nọ khian ya ruẹ dẹ?” 21 Ugbẹnvbe Pita ghi bẹghe ẹre, ọ na nọ e Jesu wẹẹ: “Enọyaẹnmwa, okpia na vbe vbo?” 22 Jesu na wanniẹn ọnrẹn wẹẹ: “Adeghẹ I hoo nọ wa gha rre agbọn, a te miẹn wẹẹ I rre, vbọ kaan ruẹ vbọ? Wẹ wa ye gha lele mwẹ khian.” 23 Rhunmwuda ọni, erhuanegbe Jesu kegha tae khian vbe uwu ẹbu iran* wẹẹ, ọrhuanegbe nii i khian wu hiehie. Vbọrhirhighayehẹ, Jesu ma kha wẹẹ ẹ i khian wu hiehie, sokpan, emwi nọ tae ọre wẹẹ: “Adeghẹ I hoo nọ wa gha rre agbọn, a te miẹn wẹẹ I rre, vbọ kaan ruẹ vbọ?”

24 Ọrhuanegbe nii ẹre ọ na iyẹn na hia, irẹn ẹre ọ vbe gbẹnnẹ ọnrẹn yotọ; ma rẹnrẹn wẹẹ, ẹmwata ẹre ọ tae.

25 Uhiẹn, emwi nibun ọvbehe wa ye rrọọ ne Jesu ru. Akpawẹ te a gbẹnnẹ ehia yotọ ọkpọkpa, I ma yayi wẹẹ, agbọn na hia gha te gua ebe* na gbẹnnẹ ọnrẹn yi.