EBE RUT

1 Vbe ẹghẹ ọghe avbe ọbuohiẹn,* ukhunmwu kegha fi vbe otọ nii; okpia ọkpa keghi ke Bẹtlẹhẹm nọ rre otọ e Juda, gha rrie otọ* e Moab, ke irẹn ke ọvbokhan rẹn kevbe ivbi ẹre nikpia eva, iran na ya yin evba. 2 Eni okpia nii ọre Ẹlimẹlẹk,* eni amwẹ ọnrẹn na gha re Naomi,* eni ivbi ẹre nikpia eva na gha re Malọn* kevbe Kiliọn.* Ivbi Ẹfrata ni ke Bẹtlẹhẹm rre vbe otọ e Juda, ẹre iran ghaa khin. Iran kegha die otọ e Moab, iran na vbe dia evba ya.

3 Ẹghẹ eso ghi gberra nẹ, Ẹlimẹlẹk na wu sẹ e Naomi kevbe ivbi ẹre nikpia eva rae. 4 Vbene ẹghẹ ya khian, emọ ikpia eva nii na viọ ikhuo e Moab rọnmwẹ; eni ọkpa vbọ kegha re Ọpa, eni enọkpa na gha re Rut. Iran na gha rre evba vbe odẹ ukpo igbe. 5 E Malọn vbe Kiliọn na vbe wu, rhunmwuda ọni, e Naomi ma ghi gha mwẹ ọdọ, ọ ma ghi vbe gha mwẹ ọmọ. 6 Ẹre ọ na ghi wẹẹ irẹn gha kpa hin otọ e Moab rre, rhunmwuda, ọ họn wẹẹ e Jehova werriegbe fiangbe emwa rẹn nẹ kevbe wẹẹ, ọ vbe kpemehe evbare* ne iran; amwẹ ivbi ẹre na vbe mu egbe ne iran lele ẹre.

7 E Naomi keghi kpa hin e Moab rre, ke irẹn kevbe amwẹ ivbi ẹre. Iran ghi khian vbe odẹ, vbe iran rrie otọ e Juda, 8 e Naomi na tama amwẹ ivbi ẹre wẹẹ: “Wa werriegbe, ne uwa gha rrie owa iye uwa. Te Jehova gha mwẹ ahoẹmwọmwa nẹi beghe daa uwa, vbene uwa vbe mwẹ ahoẹmwọmwa nẹi beghe daa ivbi mwẹ vbe iran rre agbọn, kevbe imẹ. 9 Te Jehova gha gi uwa miẹn ọdọ rọnmwẹ, ẹkun ghi vbe sẹ uwa otọ vbe owa ọdọ ọghe uwa.”* Iyeke ọni, ọ na mu unu soso iran, iran na sa eve rua. 10 Iran na gha tama rẹn wẹẹ: “Ẹo, te ima khian lele ruẹ gha rrie ọghe emwa ruẹ.” 11 Sokpan, e Naomi na tama iran wẹẹ: “Ivbi mwẹ, wa werriegbe, ne uwa gha rrie owa. Vbe uwa khian ghi gu lele mwẹ? Mẹ gha ye sẹtin biẹlẹ emọ ikpia ne uwa gha rọnmwẹ ra? 12 Ivbi mwẹ, wa werriegbe gha rrie owa. Wa gha khian, rhunmwuda, I khian ọmaẹn gbe nẹ nọ gha rọnmwẹ ọdọ. Ọ gha khọnrẹn ne I rọnmwẹ ọdọ vbe asọn na, ne I vbe biẹlẹ emọ ikpia, 13 wa gha ma zin egbe khẹ iran ne iran ka waan rre nẹ? Wa gha rhunmwuda iran kha wẹẹ, wa i ghi rọnmwẹ ọdọ ra? Ivbi mwẹ, e Jehova mu aro nọ khọọ daa mwẹ nẹ, rhunmwuda ọni, te ẹmwẹ uwa wa da mwẹ, vbe I gha mu emwi nọ sunu daa uwa roro.”

14 Iran na werriegbe sa eve rua, iyeke ọni, Ọpa na mu unu soso iye ọdọ ọre, ọ na kpa. Sokpan, e Rut ma kpa.* 15 Ẹre Naomi na ghi kha wẹẹ: “Ogieva ruẹ werriegbe bu emwa rẹn kevbe osa ọghẹe nẹ. Wẹ vbe lele ẹre gha khian.”

16 Sokpan, e Rut na tama rẹn wẹẹ: “Lahọ, ghẹ ghi rinmwian mwẹ ne I sẹ ruẹ rae, ra ne I ghẹ ghi lele ruẹ; ehe ke ehe ne u yo, ẹre I khian yo, ehe ne u vbiẹ re, ẹre I khian vbe vbiẹ. Emwa ruẹ ghi gha re emwa mwẹ, Osanobua ruẹ ghi vbe gha re Osanobua mwẹ. 17 Ehe ne u wu yi, ẹre I khian vbe wu yi, evba ẹre a khian vbe ree mwẹ yi. Te Jehova gha rriọ mwẹ oya ẹsẹse, deghẹ emwi ke emwi na ya mwẹ sẹ ruẹ rae, vbọ gberra uwu.”

18 E Naomi ghi bẹghe ẹre wẹẹ, e Rut ma mu egbe nọ khian ya sẹ irẹn rae, ọ na ghi hẹwẹ, ọ ma ghi tama rẹn nọ kpa. 19 Iran eva na ghi gha khian, iran na do sẹ e Bẹtlẹhẹm. Iran ghi wa la e Bẹtlẹhẹm, ehe hia na lighua rhunmwuda iran. Ikhuo ni rre ẹvbo nii na gha kha wẹẹ: “E Naomi ghi wa na khin ra?” 20 Ọ na gha tama ikhuo nii wẹẹ: “Wa ghẹ ghi tie mwẹ e Naomi.* Wa gha tie mwẹ e Mera,* rhunmwuda, Osa ne Oghodua ẹre ọ ya agbọn lọghọ mwẹ.* 21 Te I wa gha mwẹ emwi hia vbe I kpa, sokpan, vbe I ghi dee nian, e Jehova na ya mwẹ fiabọ gha dee. Wa ghẹ ghi tie mwẹ e Naomi, rhunmwuda, e Jehova ẹre ọ werriẹ aro nọ khọọ daa mwẹ; Osa ne Oghodua ẹre ọ vbe si ọlọghọmwa yọ mwẹ egbe.”

22 Erriọ ẹre Naomi ghi ya ke otọ e Moab rre, ke irẹn ke Rut ne amwẹ ovbi ẹre, ne Ovbi e Moab. Iran kegha die Bẹtlẹhẹm vbe ẹghẹ na ya suẹn gha rhọ ebali.

2 Ọ ghaa mwẹ ọtiẹn ọdafẹn e Naomi ọkpa nọ wa kakabọ fe; e Boaz ẹre ọ ghaa re eni ẹnrẹn, ẹgbẹe ọkpa ẹre irẹn vbe Ẹlimẹlẹk ke rre.

2 Vbe asẹ ọkpa, e Rut ne Ovbi e Moab na tama e Naomi wẹẹ: “Lahọ, gu mwẹ gualọ ugbo ọkpa gha rrie. I gha miẹn ọmwa nọ tohan mwẹ, I ghi gha lele ẹre khian, I ghi gha rhọ vbe ebali na rhọ kẹ rre.” Ẹre Naomi na tama rẹn wẹẹ: “Gha khian ovbi mwẹ.” 3 Ẹre ọ na ghi kpa, ọ na ya gha rhọ emwiokọ ne emwa ni winna vbe ugbo rhọ kẹ rre. Ọ na do sẹ ugbo* ọghe okpia ọkpa na tie ẹre Boaz; ẹgbẹe ọkpa ẹre Boaz vbe Ẹlimẹlẹk ke rre. 4 Vbe ẹghẹ na kha na, e Boaz keghi ke Bẹtlẹhẹm rre, ọ na tama emwa ni rhọ emwiokọ vbe ugbo wẹẹ: “E Jehova gu uwa rrọọ.” Ẹre iran na wanniẹn wẹẹ: “E Jehova gha fiangbuẹ.”

5 Ẹre Boaz na nọ ọkaolotu ọghe emwa ni rhọ emwiokọ wẹẹ: “De ẹgbẹe ne ọvbokhan okhuo na ke rre?” 6 Ẹre okpia nii, nọ re ọkaolotu ọghe emwa ni rhọ emwiokọ na wanniẹn wẹẹ: “Ovbi e Moab nọ, te ọ lele Naomi ke otọ* e Moab rre. 7 Vbe ọ rre, ọ na nọ mwẹ wẹẹ: ‘Lahọ, I gha sẹtin rhọ vbe ebali ne emwa ni winna rhọ kẹ rre* ra?’ Te ọ wa winna ke ne owiẹrẹ gha dee, ọ ma he kpẹẹ gbe nọ tota ye uwu okhogbo ban, nọ vbe hẹwẹ kherhe.”

8 Ẹre Boaz na ghi tama e Rut wẹẹ: “Danmwehọ ovbi mwẹ. Ghẹ yo ugbo ọvbehe ya rhọ emwiokọ na rhọ kẹ rre, ghẹ vbe yo ihe ọvbehe hiehie; gha lele ibiẹka ikhuo ni winna mẹ. 9 Gi aro ruẹ gha sẹ otọ vbe eke ne iran na rhọ emwiokọ, ne u vbe gha lele iran khian. I tama eguọmwadia mwẹ nikpia nẹ, ne iran ghẹ ya obọ kaan ruẹ.* Ovbamẹ ghaa gbuẹ, u ghi gha rrie eke ne avbe akhe amẹ ye, ne u wọn vbe amẹ ne eguọmwadia mwẹ nikpia sae.”

10 Ẹre Rut na diguẹ mu aro rhu otọ, ọ na nọ e Boaz wẹẹ: “Vbọzẹ ne u na ya obọ esi mu mwẹ, ne u na vbe mwẹ amuroro ghee mwẹ, agharhemiẹn wẹẹ ọrriọvbe ẹre I khin?” 11 E Boaz na wanniẹn ọnrẹn wẹẹ: “A tama mwẹ emwi hia ne u he ru ne iye ọdọ ruẹ, iyeke vbe ọdafọn ghi wu nẹ, kevbe vbene u ya sẹ erhaa vbe iyuẹ rae, u na vbe kpa hin ẹvbo ruẹ rre, u na bu emwa ne u ma rẹn ẹdẹ. 12 Te Jehova gha san ruẹ ẹse ye emwi hia ne u he ru; e Jehova ne Osa ọghe Izrẹl, ne u do lẹre ye ototọ ifuẹn ọnrẹn, gha vbe ha ruẹ osa nọ khẹke.”* 13 Ẹre Rut na tama rẹn wẹẹ: “Enọwanrẹn, u ru ẹse ne u na tohan mwẹ. U fu mwẹ ẹko rre, u na vbe rhie igiọdu mẹ, agharhemiẹn wẹẹ, I i re ọkpa vbe eguọmwadia ruẹ.”

14 Ọ ghi sẹ ẹghẹ na ya rri evbare, e Boaz na tama rẹn wẹẹ: “Larre ne u do rri evbare,* ne u vbe fi ebrẹd ruẹ ye uwu ayọn nọ kaẹn.”* Ẹre Rut na tota ke emwa ni rhọ emwiokọ vbe ugbo. E Boaz na ghi zẹ ebali na ranmwẹ nẹẹn, ọ na re, ẹko na vuọẹn, eso na vbe kẹ vbọ. 15 E Rut ghi kpaegbe nọ ya rhọ emwiokọ na rhọ kẹ rre,* e Boaz na tama eguọmwadia ẹre nikpia wẹẹ: “Wa gi ẹre rhọ vbe ebali na rhọ kẹ rre, wa ghẹ vbe kpokpo ẹre. 16 Wa ghẹ mianmian ya wiolo vbe ititi ebali viọ ku otọ nẹẹn, nọ miẹn rhọ vbe ọ ghaa dee, wa ghẹ vbe da ẹre obọ yi vbe ọ ghaa rhọ ọre.”

17 Ọ na ye gha rhọ emwiokọ na rhọ kẹ rre vbe ugbo nii ya sẹ ẹghẹ ota. Ọ ghi gbe ebali hia nọ rhọ re, ukhuamwẹ ọnrẹn na gha re odẹ ekilo owọrọ (11)* ọghe ebali. 18 Ẹre Rut na mu ebali nii, ọ na gha rrie owa. Ọ ghi sẹ owa, iye ọdọ ọre na miẹn ebali nọ rhọ re vbe ugbo. E Rut keghi mu evbare nọ re kẹ vbe ugbo ne iye ọdọ ọre, ọni ọre evbare nọ kẹ re, vbe ẹko ghi vuọẹn nẹ.

19 Ẹre iye ọdọ ọre na wẹẹ: “De eke ne u na rhọ emwiokọ vbe ẹrẹna? De eke ne u na winna? Te Osanobua gha fiangbe ọmwa nii, nọ mwẹ amuroro ghee ruẹ.” Ọ na ghi suẹn gha ta ẹmwẹ ọmwa nọ yan ugbo nọ na winna ma iye ọdọ ọre. Ọ na wẹẹ: “E Boaz, ẹre a tie okpia nọ yan ugbo ne I na winna vbe ẹrẹna.” 20 Ẹre Naomi na tama amwẹ ovbi ẹre wẹẹ: “Te Jehova nọ re Osa nọ mwẹ ahoẹmwọmwa nẹi beghe daa emwa ni rre agbọn kevbe ni wulo, gha fiangbe ẹre.” E Naomi na vbe kha wẹẹ: “Ọtiẹn ọdafẹn mwẹ ẹre nene okpia vbe khin. Ọkpa vbe usun emwa ni mwẹ asẹ nọ khian ya dẹ ima werriegbe, ẹre vbe nọ.” 21 Ẹre Rut ne Ovbi e Moab na tama e Naomi wẹẹ: “Ọ vbe tama mwẹ wẹẹ, ‘Gha lele eguọmwadia mwẹ khian, a ghi te miẹn wẹẹ iran rhọ emwiokọ hia ni rre ugbo mwẹ fo.’” 22 E Naomi na tama e Rut ne amwẹ ovbi ẹre wẹẹ: “Ovbi mwẹ, u gha lele eguọmwadia ẹre nikhuo winna vbe ugbo ẹre, ẹre ọ khian maan sẹ, rhunmwuda, u gha yo ugbo emwa ọvbehe, iran sẹtin ya obọ dan mu ruẹ.”

23 Ẹre ọ na fẹko gha lele eguọmwadia e Boaz nikhuo, ọ na gha rhọ emwiokọ vbe ugbo e Boaz, a ghi te miẹn wẹẹ ẹghẹ na ya rhọ ebali kevbe ewit sẹ ufomwẹ. Ọ na ye gha rre ọghe iye ọdọ ẹre.

3 Ẹre Naomi ne iye ọdọ ọre na ghi tama rẹn wẹẹ: “Ovbi mwẹ, I i ghi gualọ ọdọ nuẹn, ne ẹkun mieke na sẹ ruẹ otọ vbe owa obọ ruẹ, ne agbọn mieke na vbe maan ruẹ? 2 Ọtiẹn ọdafọn mwẹ ẹre Boaz khin. Eguọmwadia ẹre nikhuo, ẹre u vbe gha lele khian. Ọ gha khan emwiokọ vbe eke na na wiẹn emwiokọ vbe asọn na. 3 Rhunmwuda ọni, ya khuẹ, ne u ya ori nọ winhin wuo; iyeke ọni, u ghi viọ ukpọn yọ, ne u gha rrie eke na na wiẹn emwiokọ. Ghẹ gi ẹre rẹn wẹẹ u rre, vbe ẹ i re te ọ rri evbare fo nẹ.* 4 Ọ gha lovbiẹ, u ghi hia ne u rẹn eke nọ lovbiẹ yi; iyeke ọni, u ghi wee ukpọn hin ọnrẹn owẹ rre, ne u lovbiẹ ye ọkpẹn owẹ ọre. Ọ gha tama ruẹ emwi ne u gha ru.”

5 Ẹre ọ na ghi wanniẹn ọnrẹn wẹẹ: “I gha ru emwi hia ne u we ne I ru.” 6 Iyeke ọni, ọ na gha rrie eke na na wiẹn emwiokọ, ọ na ru emwi hia ne iye ọdọ ọre tama rẹn nọ ru. 7 Na kha na, e Boaz kegha re, ọ na gha da, ẹko na wa gha rhiẹnrhiẹn ọnrẹn. Iyeke ọni, ọ na ya lovbiẹ ye ọkpẹn eke na si emwiokọ gboo yi. Ẹre Rut na fẹko gha rrie eke ne Boaz lovbiẹ yi, ọ na wee ukpọn hin ọnrẹn owẹ rre, ọ na lovbiẹ ye evba. 8 Ọ ghi rre ogiasọn, e Boaz na suẹn gha guọ zẹzẹzẹ. Ọ ghi we ne irẹn fi egbe werriẹ, ọ na bẹghe ẹre wẹẹ, okhuo ọkpa lovbiẹ ye ọkpẹn owẹ ọre. 9 Ẹre Boaz na wẹẹ: “Gha ọna khin?” Ẹre Rut na wẹẹ: “E Rut ne ọguọmwadia ruẹ nọ. Ya ẹwu ruẹ gue mwẹ, rhunmwuda, u mwẹ asẹ ne u khian ya dẹ ima werriegbe.” 10 Ẹre Boaz na wẹẹ: “Te Jehova gha fiangbuẹ ovbi mwẹ. Emwi ne u ka ru rhie ẹre ma wẹẹ, u mwẹ ahoẹmwọmwa nẹi beghe, sokpan, emwi ne u ghi ru nian keghi yae dewarorua, rhunmwuda, u gha te sẹtin gualọ igbama rọnmwẹ, ọre te ọ fe ra ọ ma fe, sokpan, u ma ru vberriọ. 11 Rhunmwuda ọni, ghẹ fian afianma ovbi mwẹ. I gha ru emwi hia ne u khare, rhunmwuda, emwa hia vbe ẹvbo na rẹnrẹn wẹẹ, okhuo esi ẹre u khin. 12 Ẹmwata nọ wẹẹ, I mwẹ asẹ ne I khian ya dẹ uwa werriegbe, sokpan, ọmwa ọvbehe rrọọ nọ vbe mwẹ asẹ nii, nọ sikẹ uwa sẹ mwẹ. 13 Lahọ, vbiẹ emwa ne ẹdẹ gbe; deghẹ ọ na wẹẹ irẹn gha dẹ ruẹ werriegbe vbe owiẹ nakhuẹ, ọ maan! We nọ dẹ ruẹ werriegbe. Sokpan, deghẹ ọ ma hoo nọ dẹ ruẹ werriegbe, I ya eni e Jehova ne Osanobua nọ rrọọ vẹn ihẹn wẹẹ, I gha dẹ ruẹ werriegbe. Lahọ, lovbiẹ mwa na ne ẹdẹ gbe.”

14 Ẹre Rut na lovbiẹ ye ọkpẹn owẹ ọre ne ẹdẹ gbe; vbene ẹdẹ te suẹn gha wan, ọ na kpaegbe, ne ọmwa rhọkpa ghẹ mieke na bẹghe ẹre. E Boaz na wẹẹ: “Ghẹ gi ọmwa rhọkpa rẹn wẹẹ, okhuo ghaa die eke na na wiẹn emwiokọ.” 15 Ọ na vbe kha wẹẹ: “Mu ẹwu ne guọrọ ne u yọe rre, ne u rhan rẹn rua.” Ẹre ọ na ru vberriọ, ẹre Boaz na tue okhuae ehan ọghe ebali* yọ, ọ na kpa ẹre mu nẹẹn nọ mu gha khian, iyeke ọni, e Boaz na la uwu e Bẹtlẹhẹm.

16 Ẹre Rut na bu iye ọdọ ọre, iye ọdọ ọre na nọ rẹn wẹẹ: “Ovbi mwẹ, vbua khian hẹ?”* Ẹre ọ na tama rẹn emwi hia ne Boaz ru nẹẹn. 17 Ọ na vbe tama iye ọdọ ọre wẹẹ: “Ọ vbe mu okhuae ehan* ọghe ebali na mẹ, ọ na tama mwẹ wẹẹ, ‘I ma hoo ne u fiabọ bu iye ọdọ ruẹ.’” 18 Ẹre Naomi na tama rẹn wẹẹ: “Ovbi mwẹ, zin egbe nẹ, a ghi te miẹn wẹẹ, u rẹn vbene emwi hia khian de hẹ, rhunmwuda, okpia na ma na zuze ye ẹmwẹ na nẹ vbe ẹrẹna, ẹ i hẹwẹ.”

4 E Boaz kegha rrie* onurho ẹvbo nii, ọ ghi sẹ evba, ọ na tota. Vbe uwu ẹghẹ nii, okpia nii nọ mwẹ asẹ nọ khian ya dẹ okhuo nii werriegbe, ne Boaz ka guan kaẹn, kegha gberra. Ẹre Boaz na tama rẹn wẹẹ: “Ọse* mwẹ, larre ne u do tota.” Ẹre nene okpia na bu ẹre gha khian, ọ na ya tota. 2 Ẹre Boaz na tie ediọn igbe vbe ẹvbo nii, ọ na tama iran wẹẹ: “Lahọ, wa tota.” Ẹre iran na tota.

3 Ẹre Boaz na tama okpia nii wẹẹ: “E Naomi werriegbe ke otọ e Moab rre, ọ gha hoo nọ khiẹn otọ ọghe Ẹlimẹlẹk ne ọtẹn ima. 4 Ẹre I na we ne I gu ruẹ rẹn, ne I vbe tama ruẹ ne u dẹ ọre werriegbe, sirra emwa hia ni rre emwa na, kevbe ediọn ọghe ẹvbo na. Deghẹ u gha hoo ne u dẹ otọ na werriegbe, u sẹtin dẹ ọre. Sokpan, deghẹ u ma hoo ne u dẹ ọre, u ghi tama mwẹ ne I mieke na rẹn, rhunmwuda, wẹ ẹre ọ sikẹ iran sẹ, mẹ ẹre ọ ghi zẹ lele ruẹ.” Ẹre okpia nii na wẹẹ: “I gha dẹ ọre werriegbe.” 5 Ẹre Boaz na tama rẹn wẹẹ: “Ẹdẹ ne u gha dẹ otọ nii vbe obọ e Naomi, te u khian vbe dẹ ọre vbe obọ e Rut ne Ovbi e Moab, nọ re amwẹ okpia nii nọ wu, ne ukhu ọghe okpia nii nọ wu mieke na ye gha re ọghe ivbi ẹre, ne eni ẹnrẹn ghẹ vbe wii.” 6 Ẹre okpia nii na wẹẹ: “I i khian sẹtin dẹ otọ nii werriegbe, rhunmwuda, I gha ru vberriọ, ukhu mwẹ i ghi sẹ emwi rhọkpa. U sẹtin loo asẹ mwẹ ya dẹ otọ nii werriegbe, rhunmwuda, I i khian sẹtin dẹ ọre.”

7 Vbe ẹghẹ nẹdẹ vbe otọ Izrẹl, ilele na lele vbe nọ dekaẹn asẹ na ya dẹ emwi werriegbe, kevbe na ya mu emwi ne ọmwa nọ ghi yan rẹn ẹre na khin: Orhunmwu ọkpa ghi kie ibata rhie ne nọkpa, erriọ ẹre emwa ya gha mu olọ gbe emwi ne iran gba rhie obọ yi vbe ẹghẹ nii, vbe otọ Izrẹl. 8 Rhunmwuda ọni, okpia nii ghi tama e Boaz wẹẹ, “Wẹ dẹ otọ nii werriegbe,” nene okpia na kie ibata ẹre. 9 Ẹre Boaz na ghi tama avbe ediọn kevbe emwa hia ni rre evba wẹẹ: “Wa hia ọre osẹ mwẹ vbe ẹrẹna wẹẹ, I dẹlẹ emwi hia ni re ọghe Ẹlimẹlẹk, e Malọn, kevbe Kiliọn werriegbe vbe obọ e Naomi. 10 I gha vbe rhie Rut ne Ovbi e Moab, ne ọvbokhan e Malọn rọnmwẹ, ne ukhu ọghe okpia nii nọ wu mieke na ye gha re ọghe ivbi ẹre, ne eni ẹnrẹn ghẹ vbe wii, ne etiọnrẹn kevbe emwa ni rre ẹvbo na ghẹ mieke na mianmian eni okpia nii nọ wu. Osẹ ẹre uwa hia khin vbe ẹrẹna.”

11 Ẹre ediọn kevbe emwa hia ni ghaa rre onurho ẹvbo nii na ghi kha wẹẹ: “Osẹ ẹre ima hia khin! Te Jehova gha gi okhuo ne u khian rhie na, gha yevbe Rechẹl vbe Lia, ni biẹlẹ emọ ni ghi do khian agbẹnvbo* ọghe Izrẹl. Te agbọn gha maan ruẹ vbe Ẹfrata, a ghi vbe gha họn usi ruẹ rre vbe Bẹtlẹhẹm. 12 Te emọ ne Jehova khian la obọ ọvbokhan okhuo na viọ nuẹn, gha ya ẹgbẹe ruẹ do yevbe ọghe Pirẹz, nọ re ọmọ ne Tema biẹ ne Juda.”

13 Ẹre Boaz na ghi rhie Rut gha rrie owa, ọ na do gha re ọvbokhan rẹn. Ọ keghi gu e Rut ru emwi ọdọ vbe amwẹ, iyeke ọni, e Jehova na ru ẹre nọ gha hanmwa, ọ na do biẹ ọmọ okpia. 14 Ẹre ikhuo ni rre Bẹtlẹhẹm na ghi tama e Naomi wẹẹ: “Urhomwẹ nọ ne Jehova; irẹn ẹre ọ ru ẹre ne ọmwa dẹ uwa werriegbe vbe ẹrẹna. Te a gha ya eni* ẹnrẹn wewe vbe otọ Izrẹl! 15 Ọmọ* na gha ya ruẹ* werriegbe gha ghọghọ,* ọ gha vbe gbaroghe ruẹ vbe u gha khian ọmaẹn nẹ, rhunmwuda, e Rut ne amwẹ ovbuẹ nọ hoẹmwẹ ruẹ ẹre ọ biẹ ọre, ọ* vbe maan sẹ emọ ikpia ihinrọn vbe aro ruẹ.” 16 E Naomi keghi mu ọmọ nii mwẹ obọ, ọ na ghi suẹn gha koko ẹre.* 17 Ikhuo ni rre ẹdogbo nii na ghi he ọmọ nii eni. Iran na wẹẹ: “A biẹ ọmọ okpia ọkpa ne Naomi”; eni ne iran he ọmọ nii re, ọre Obẹd. Irẹn ọre erha e Jẹsi, ne erha e Devid.

18 Uniẹn ọghe Pirẹz, ẹre na khin: E Pirẹz ẹre ọ biẹ e Hẹzrọn; 19 e Hẹzrọn na biẹ e Ram; e Ram na biẹ Aminadab; 20 Aminadab na biẹ e Nashọn; e Nashọn na biẹ e Salmọn; 21 e Salmọn na biẹ e Boaz; e Boaz na biẹ Obẹd; 22 Obẹd na biẹ e Jẹsi; e Jẹsi na biẹ e Devid.