EBE JỌSHUA

1 E Mozis ne ọguọmwadia e Jehova ghi wu nẹ, e Jehova na tama e Jọshua* ne ovbi e Nọn, nọ ghaa ru iyobọ ne Mozis wẹẹ: 2 “E Mozis ne ọguọmwadia mwẹ wu nẹ, rhunmwuda ọni, mu egbe ne u fian e Jọdan rra, wẹ kevbe Ivbi Izrẹl hia, ne uwa gha rrie otọ ne I khian mu ne iran. 3 Ehe ke ehe ne uwa ya owẹ kaan, I gha muẹn ne uwa, zẹvbe ne I yan ma e Mozis. 4 Ke ato ya sẹ e Lẹbanọn, ẹre otọ ọghe uwa khian la. Ọ gha vbe ke Yufretis ne ẹzẹ nọkhua, ya sẹ Okun Nọkhua* nọ rre odẹ orrie.* Otọ ọghe Ivbi e Hẹt hia, ghi vbe gha re ọghe uwa. 5 Ọmwa rhọkpa i khian sẹtin khọnmiotọ yan ruẹ ẹdẹ. Vbene I mudia ne Mozis, erriọ ẹre I khian vbe mudia nuẹn. I i khian sẹ ruẹ rae, I i khian vbe yan gbuẹ. 6 Gha mwẹ udinmwẹ ne u vbe wegbe, rhunmwuda, wẹ ẹre ọ khian su iran na la otọ ne I tama avbe erha iran odede wẹẹ, I gha mu ne iran.

7 “Wẹ wa gha mwẹ udinmwẹ ne u vbe wegbe ẹsẹse, u ghi vbe gha lele Uhi hia ne Mozis ne ọguọmwadia mwẹ gbe nuẹn. Ghẹ rra avbe Uhi na, ne u mieke na gha ya ẹwaẹn ru emwi vbe ehe ne u rhirhi yo. 8 Gha guan kaẹn emwi nọ rre ebe Uhi na vbe ẹghẹ hia, u ghi gha tie ẹre, u ghi vbe gha muẹn roro* vbe asọn kevbe avan, ne u mieke na gha lele emwi hia na gbẹnnẹ ye uwu ẹre; ẹghẹ nii, emwi hia ne u ru ghi gha dinnodẹ, u ghi vbe gha ya ẹwaẹn ru emwi. 9 Mẹ ma ka tama ruẹ* ne u gha mwẹ udinmwẹ, kevbe ne u vbe wegbe ra? Ghẹ gi afianma fian ruẹ, ghẹ vbe gi ohan mu ruẹ, rhunmwuda, e Jehova ne Osanobua ruẹ gu ruẹ rrọọ, vbe ehe ke ehe ne u rhirhi yo.”

10 Ẹre Jọshua na ghi tama avbe ọkaolotu ọghe Izrẹl wẹẹ: 11 “Wa khian lele uwu agọ na, ne uwa gha tama emwa wẹẹ, ‘Wa si evbare koko, rhunmwuda, wa gha fian e Jọdan rra vbe ikpẹdẹ eha nọ dee, ne uwa ya yin otọ nii, ne Jehova ne Osanobua uwa wẹẹ irẹn khian mu ne uwa.’”

12 E Jọshua na tama Ivbi e Rubẹn, e Gad, kevbe obọ ọkpa vbe uniẹn e Manasẹ wẹẹ: 13 “Wa ghẹ mianmian Uhi ne Mozis ne ọguọmwadia e Jehova gbe ne uwa, nọ na wẹẹ, e Jehova ne Osa ọghe Izrẹl mu otọ na ne uwa nẹ, ọ gha vbe gi ẹkun sẹ uwa otọ. 14 Otọ ne Mozis mu ne uwa, nọ rre obọ vbe ediran vbe Jọdan ẹre amwẹ ọghe uwa, ivbi uwa kevbe emwirri ọghe uwa khian gha ye; sokpan, wa ne ivbiyokuo ni wegbe ghi mu egbe okuo, wa ghi fian e Jọdan rra, ne uwa ke odaro ne etiẹn uwa. Wa ghi gha ru iyobọ ne iran 15 a ghi te miẹn wẹẹ, e Jehova gi ẹkun sẹ etiẹn uwa otọ, zẹvbe nọ vbe gi ẹkun sẹ uwa otọ, ne iran vbe yin otọ nii ne Jehova ne Osanobua uwa khian mu ne iran. Iyeke ọni, wa ghi werriegbe gha rrie otọ na mu ne uwa, ne uwa ya yin ẹnrẹn, ọni ọre otọ ne Mozis ne ọguọmwadia e Jehova mu ne uwa, vbe odẹ ekẹn* ọghe Jọdan.”

16 Iran keghi wanniẹn e Jọshua wẹẹ: “Ma gha ru emwi hia ne u we ne ima ru, ma gha vbe yo ehe ke ehe ne u gie ima gha rrie. 17 Vbene ima ghaa họn ẹmwẹ ne Mozis, erriọ ima khian vbe gha họn ẹmwẹ nuẹn. Te Jehova ne Osanobua ruẹ gha mudia nuẹn, zẹvbe nọ mudia ne Mozis. 18 Ọmwaikọmwa nọ ma họn ẹmwẹ nuẹn, ra nọ ma ru vbene u khare, a ghi gbe ẹre rua. Sokpan, gha mwẹ udinmwẹ, ne u vbe wegbe.”

2 Vbe iran rre Shitim, e Jọshua ne ovbi e Nọn na fẹko gie ikpia eva, ne iran ya ba otọ e Kenan ghee. Ọ na tama iran wẹẹ: “Wa gha khian, ne uwa ya ba otọ nii ghee, katekate otọ e Jẹriko.” Ẹre iran na gha khian, iran na do sẹ owa igbiragia ọkpa na tie ẹre Rehab, iran na dia evba ya. 2 A keghi tama ọba e Jẹriko wẹẹ: “Ikpia eso ni re Ivbi Izrẹl rre vbe ota na, ne iran do ba otọ na ghee.” 3 Ẹre ọba e Jẹriko na gie uhunmwu gie Rehab wẹẹ: “Viọ avbe ikpia nii, ni rre owa ruẹ ladian, rhunmwuda, te iran rre do ba otọ na hia ghee.”

4 Sokpan, e Rehab keghi ya viọ ikpia eva nii lẹre. Ọ na ghi kha wẹẹ: “Ẹmwata nọ, iran gele sẹ emwa, sokpan, I ma rẹn ehe ne iran ke rre. 5 Ẹdẹ ghi mu, vbe ọ ghi bu ẹghẹ na khian ya khui urho ẹvbo, iran na kpa. I ma rẹn eke ne iran la ghee, sokpan, deghẹ uwa na zẹgiẹ khu iran, wa gha mu iran.” 6 (Vbọrhirhighayehẹ, vbe ẹghẹ na kha na, ọ viọ iran gha rrie uhunmwu owa ẹre nẹ, ọ na viọ iran lẹre ye uwu emwiokọ na tie ẹre eflaks* nọ kakae, na mwamwa ye evba.) 7 Ẹre ikpia nii ne ọba gie ẹre uhunmwu, na gualọ Ivbi Izrẹl nii ghee odẹ Ẹzẹ e Jọdan, vbe ehe ni ma dinmwi gbe vbọ; ikpia nii ghi wa ladian, a na khui urho ẹvbo nii.

8 Vbene Ivbi Izrẹl nii ghi te vbiẹ, e Rehab na bu iran gha rrie uhunmwu owa. 9 Ọ na tama iran wẹẹ: “I rẹnrẹn wẹẹ e Jehova gha mu otọ na ne uwa, ohan uwa wa vbe mu ima. Te afianma ghi wa fian emwa hia ni rre ẹvbo na, rhunmwuda uwa, 10 rhunmwuda, ma họn vbene Jehova ya ka amẹ nọ rre Okun Nọ Baa hẹ vbe odaro uwa, vbe uwa kpa hin Igipt rre, kevbe emwi ne uwa ru e Saihọn kevbe Ọg re, ni re ọba eva ọghe Ivbi Amọri, ne uwa gbelua vbe obọ nọkpa* ọghe Jọdan. 11 Vbe ima ghi họn ena hia, afianma na suẹn gha fian ima,* ohan ma vbe gi ọmwa rhọkpa mu okuo bu uwa gha dee, rhunmwuda, e Jehova ne Osanobua uwa, ọre Osa nọ khaevbisẹ yan agbọn kevbe ẹrinmwi. 12 Wa lahọ, wa ya eni e Jehova yan ma mwẹ wẹẹ, vbene I ya mwẹ ahoẹmwọmwa nẹi beghe ghee uwa, erriọ uwa khian vbe mwẹ ahoẹmwọmwa nẹi beghe ghee igiowa erha mwẹ; wa ghi vbe rhie emwi* mẹ, ne I ya rẹn wẹẹ, wa gha mu eyan ọghe uwa sẹ. 13 Te uwa gha tohan erha mwẹ, iye mwẹ, etẹn mwẹ nikpia kevbe etẹn mwẹ nikhuo, kevbe emwa iran hia, wa ghi vbe miẹn ima fan, ne ima ghẹ wulo.”

14 Ẹre ikpia nii na ghi tama rẹn wẹẹ: “Te Osanobua gha miẹn ima uhunmwu, deghẹ ima ma ru vbene ima khare! U ma na tama emwa emwi ne ima rhunmwuda ẹre rre, ma gha mwẹ ahoẹmwọmwa nẹi beghe daa ruẹ, ma ghi vbe mu eyan ọghe ima sẹ, vbe Jehova gha mu otọ na ne ima.” 15 Iyeke ọni, ọ na mu irri ladian, ikpia nii na ghi ya irri nii la ewindo tuorre, rhunmwuda, te a bọ owa ẹre ginna ekẹn ọghe ẹvbo nii. Uhiẹn, uhunmwu ekẹn na gbe lẹga ẹvbo nii, ẹre owa ẹre ghaa ye. 16 Ọ na ghi tama iran wẹẹ: “Wa gha rrie ikinkin ne oke ye, ne uwa ya lẹre ye evba vbe ikpẹdẹ eha, ne iran ni gualọ uwa khian ghẹ miẹn uwa. Iran gha ghi sẹ owa nẹ, wa ghi kpa.”

17 Ikpia nii na ghi tama rẹn wẹẹ: “Eyan ne u we ne ima yan ma ruẹ na, ma gha muẹn sẹ, 18 deghẹ u na dee irri nọ baa na ye ewindo ne ima khian la tuorre na, vbe ẹghẹ ne ima gha ya la ẹvbo na. U ghi we ne erhaa, iyuẹ, etuẹn, kevbe emwa hia ni rre igiowa ọghe erhaa gha die owa ruẹ. 19 Deghẹ ọmwa rhọkpa na ladian vbe owa ruẹ gha rrie orere, esagiẹn ọnrẹn ghi gha rre ọre uhunmwu, a i khian kae ye ima urhu. Sokpan, emwi gha sunu daa* ọmwa rhọkpa vbe owa ruẹ, esagiẹn ọmwa nii ghi gha rre ima uhunmwu. 20 Vbọrhirhighayehẹ, deghẹ u na tama emwa ọvbehe emwi ne ima rhunmwuda ẹre rre, ma i khian mu eyan ne u we ne ima yan ma ruẹ sẹ.” 21 E Rehab na ghi kha wẹẹ: “Gi ẹre gha ye vbene uwa khare.”

Ẹre ọ na gbe ọ khian ẹdẹ hia ne iran, iran na kpa. Iyeke ọni, ọ na dee irri nọ baa nii ye ewindo ẹre. 22 Ẹre iran na ghi kpa gha rrie ikinkin ne oke ye, iran na dia evba ya vbe ikpẹdẹ eha, a ghi te miẹn wẹẹ emwa ni gualọ iran, werriegbe gha rrie owa. A i miẹn odẹ ọkpa ne iran ma gualọ Ivbi Izrẹl nii la, sokpan, iran ma miẹn iran. 23 Ivbi Izrẹl eva nii keghi tuorre vbe uhunmwu oke, iran na fian ẹzẹ rra, iran na bu e Jọshua ne ovbi e Nọn. Iran keghi ta emwi hia nọ sunu ma rẹn. 24 Iran na ghi tama e Jọshua wẹẹ: “E Jehova mu otọ nii hia ne ima nẹ. Uhiẹn, te afianma ghi wa fian emwa ni rre ẹvbo nii, rhunmwuda ima.”

3 Ẹre Jọshua na kpaegbe vbe owiẹ fioro, irẹn vbe Ivbi Izrẹl hia na kpa hin e Shitim rre, iran na gha die ọkpẹn Ẹzẹ e Jọdan. Iran na vbiẹ evba ne ẹdẹ gbe, iran ke fian e Jọdan rra.

2 Ikpẹdẹ eha ghi gberra nẹ, avbe ọkaolotu ni rre uwu ẹbu iran, na khian lele uwu agọ nii, 3 iran na gha tama emwa wẹẹ: “Wa gha wa miẹn wẹẹ, Ivbi e Livai ni re ohẹn mu ẹkpẹti ile ọghe Jehova ne Osanobua uwa, wa ghi kpa vbe ehe ne uwa ye, ne uwa lelẹe. 4 Sokpan, wa ghi gi ibata ugie yan iyisẹn vbe ihe ihinrin nọ ya yan arriaisẹn eva (2,920)* gha rre uwu ẹkpo uwa kevbe ẹkpẹti ile nii, wa ghẹ sikẹ ọre gberra vberriọ, ne uwa mieke na rẹn odẹ ne uwa gha la rhunmwuda, wa ma he ka la odẹ na ẹdẹ.”

5 E Jọshua na ghi tama emwa nii wẹẹ: “Wa kpe egbe uwa huan, rhunmwuda vbe akhuẹ, e Jehova gha ru iwinna ọyunnuan vbe uwu ẹbu uwa.”

6 Ẹre Jọshua na tama avbe ohẹn wẹẹ: “Wa mu ẹkpẹti ile, ne uwa ke odaro ne emwa nikẹre.” Ẹre iran na mu ẹkpẹti ile nii, iran na ke odaro ne emwa nikẹre.

7 Ẹre Jehova na tama e Jọshua wẹẹ: “Ke ẹrẹna kpa, I gha suẹn gha mu uyi yọ ruẹ egbe vbe odaro Ivbi Izrẹl hia, ne iran mieke na rẹn wẹẹ, vbene I mudia ne Mozis, erriọ I khian vbe mudia nuẹn. 8 U ghi tama avbe ohẹn ni mu ẹkpẹti ile khian wẹẹ: ‘Wa gha wa sẹ okhiẹ Ẹzẹ e Jọdan, wa ghi laọ, ne uwa mudia vba.’”

9 E Jọshua na tama Ivbi Izrẹl wẹẹ: “Wa gha dee, ne uwa do danmwehọ ẹmwẹ ne Jehova ne Osanobua uwa tae.” 10 Ẹre Jọshua na ghi tama iran wẹẹ: “Nian, wa gha rẹn wẹẹ, Osanobua nọ rrọọ gele gu uwa rrọọ, ọ gha khulo Ivbi e Kenan, Ivbi e Hẹt, Ivbi e Hivi, Ivbi e Pẹriz, Ivbi e Gigashi, Ivbi Amọri kevbe Ivbi e Jibọs hin uwu ẹbu uwa rre. 11 Ghee ẹre, ẹkpẹti ile ọghe Osa nọ yan otagbọn hia ke odaro ne uwa, ọ gha ka la Ẹzẹ e Jọdan khẹ uwa. 12 Wa zẹ orhunmwu iweva (12) vbe uniẹn ọghe Izrẹl, orhunmwu ọkpọkpa vbe dọmwadẹ uniẹn, 13 owẹ ọghe avbe ohẹn ni mu Ẹkpẹti Ile ọghe Jehova, nọ re Osa nọ yan otagbọn hia, gha wa dekaẹn Ẹzẹ e Jọdan, amẹ nọ lẹẹ dee ghi wa dobọ yi, ọ ghi mudia vbe na ghee egbe ekẹn.”

14 Ivbi Izrẹl ghi kpa vbe eke ne iran bu agọ yi, vbene iran te fian Ẹzẹ e Jọdan rra, avbe ohẹn ni mu ẹkpẹti ile keghi ke odaro ne iran. 15 (Vbe ẹghẹ na kha na, te ẹzẹ e Jọdan wa ro gberra uwu, vbe ẹghẹ na ya rhọ emwiokọ). Avbe ohẹn ni mu Ẹkpẹti Ile khian, na do sẹ Ẹzẹ e Jọdan; vbene owẹ iran wa ya dekaan amẹ nọ rre okhiẹ ẹzẹ nii, 16 amẹ nọ lẹẹ dee na wa dobọ yi, ọ na mudia vbe na ghee egbe ekẹn vbe ihe ọkpa nọ wa kakabọ rree na tie ẹre Adam, nọ re ẹvbo nọ rre ọkpẹn e Zerẹtan, sokpan, amẹ nọ lẹẹ rrie Okun Araba, nọ re Okun Umwẹ* ma ghi gha lẹẹ, ọ na ka. Ẹre Ivbi Izrẹl na fian e Jọdan rra, vbe ehe nọ mu aro daa e Jẹriko. 17 Avbe ohẹn ni mu ẹkpẹti ile ọghe Jehova keghi mudia ye otọ nọ kae, vbe adesẹneva Ẹzẹ e Jọdan, Ivbi Izrẹl hia kegha la otọ nọ kae nii khian, a ghi te miẹn wẹẹ, iran hia fian Ẹzẹ e Jọdan rra.

4 Ivbi Izrẹl hia ghi fian Ẹzẹ e Jọdan rra nẹ, e Jehova na tama e Jọshua wẹẹ: 2 “Zẹ ikpia iweva (12) vbe uwu ẹbu Ivbi Izrẹl, ọkpọkpa vbe dọmwadẹ uniẹn, 3 u ghi tama iran wẹẹ: ‘Wa gha rrie eke ne avbe ohẹn mudia yi vbe adesẹneva ọghe Ẹzẹ e Jọdan, ne uwa viọ okuta iweva (12) vbe evba, wa ghi mwamwaẹn ye eke ne uwa khian vbiẹ ne ẹdẹ gbe.’”

4 Ẹre Jọshua na tie ikpia iweva (12) nii, nọ zẹ vbe dọmwadẹ uniẹn ọghe Izrẹl, 5 ọ na tama iran wẹẹ: “Wa gha rrie odaro Ẹkpẹti Ile ọghe Jehova ne Osanobua uwa, vbe adesẹneva ọghe Ẹzẹ e Jọdan, dọmwadẹ ọghẹe vbe uwu uwa ghi viọ okuta ọkpọkpa ye izabọ, dọmwadẹ okuta ghi mudia ye ihe dọmwadẹ uniẹn ọghe Izrẹl, 6 ọ ghi gha ye uwa ẹre rre vbekpa emwi ne Osanobua ru. Adeghẹ ivbi uwa* na ghi nọ uwa vbe akhuẹ wẹẹ, ‘Vbọzẹ ne uwa na viọ avbe okuta na ye emwa?’ 7 wa ghi tama iran wẹẹ: ‘Ne amẹ nọ lẹẹ vbe Ẹzẹ e Jọdan na dobọ yi rhunmwuda ẹkpẹti ile ọghe Jehova, ẹre ọ si ẹre. Avbe ohẹn ghi mu ẹkpẹti ile fian Ẹzẹ e Jọdan rra, ẹzẹ nii ma ghi gha lẹẹ. Te avbe okuta na khian gha ye Ivbi Izrẹl ẹre rre vbe ẹghẹ hia, vbekpa emwi nọ sunu na.’”*

8 Ivbi Izrẹl iweva (12) nii, keghi ru vbene Jọshua khare. Iran na viọ okuta iweva (12) vbe adesẹneva ọghe ẹzẹ e Jọdan, zẹvbe ne Jehova tama e Jọshua, nọ mieke na mudia ye ihe dọmwadẹ uniẹn ọghe Izrẹl. Iran keghi viọ avbe okuta nii gha rrie eke ne iran khian vbiẹ vbe asọn nii, iran na mwamwaẹn ye evba.

9 E Jọshua na vbe mwamwa okuta iweva (12) ye eke ne avbe ohẹn ni mu ẹkpẹti ile mudia yi, vbe adesẹneva ọghe Ẹzẹ e Jọdan, avbe okuta nii ye rre evba do fi ẹdẹnẹrẹ.

10 Avbe ohẹn ni mu Ẹkpẹti Ile na ye gha rre adesẹneva ọghe Ẹzẹ e Jọdan, a ghi te miẹn wẹẹ, Ivbi Izrẹl ru emwi hia ne Jehova we ne Jọshua tama iran ne iran ru. Iran keghi ru emwi hia vbene Mozis wa ya tama e Jọshua. Vbe uwu ẹghẹ na kha na, Ivbi Izrẹl na gha ya okhirhikhirhi fian Ẹzẹ e Jọdan rra. 11 Ivbi Izrẹl hia ghi wa fian ẹzẹ nii rra nẹ, avbe ohẹn ni mu Ẹkpẹti Ile ọghe Jehova na ghi fian ẹzẹ nii rra, sirra emwa hia. 12 Ivbi e Rubẹn, e Gad, kevbe obọ ọkpa vbe uniẹn e Manasẹ keghi mu egbe okuo, iran na fian Ẹzẹ e Jọdan rra, iran keghi ke odaro ne Ivbi Izrẹl, zẹvbe ne Mozis tama iran. 13 Ivbiyokuo ni re odẹ arriaisẹn iyeva (40,000) ni viọ emwi igbinna mwẹ, keghi fian Ẹzẹ e Jọdan rra vbe odaro e Jehova, gha rrie ato ọghe Jẹriko.

14 Vbe ẹdẹ ne ẹdẹrriọ, e Jehova keghi mu uyi ye Jọshua egbe sirra Ivbi Izrẹl hia, te iran wa gha rhie ọghọ nẹẹn* ya sẹ ẹdẹ nọ wu, vbene iran vbe ya gha rhie ọghọ ne Mozis.

15 Ẹre Jehova na ghi tama e Jọshua wẹẹ: 16 “Tama avbe ohẹn ni mu ẹkpẹti Uhi,* ne iran ladian vbe Ẹzẹ e Jọdan.” 17 Ẹre Jọshua na tama avbe ohẹn nii wẹẹ: “Wa ladian vbe Ẹzẹ e Jọdan.” 18 Avbe ohẹn ni mu ẹkpẹti ile ọghe Jehova keghi ke adesẹneva ọghe Ẹzẹ e Jọdan ladian, owẹ iran ghi wa dekaẹn otọ nọ kae, Ẹzẹ e Jọdan na werriegbe suẹn gha lẹẹ, ọ na ro gberra uwu, zẹvbe nọ ka ye.

19 Ikpẹdẹ nogie igbe ọghe uki nokaro, ẹre Ivbi Izrẹl fian Ẹzẹ e Jọdan rra, iran na bu agọ ye Gilgal, vbe odẹ ekẹn* ọghe eke ne otọ e Jẹriko lae.

20 E Jọshua keghi mwamwa okuta iweva (12), ne iran viọ re vbe Ẹzẹ e Jọdan ye Gilgal. 21 Ọ na ghi tama Ivbi Izrẹl wẹẹ: “Ivbi uwa gha nọ erha iran vbe akhuẹ wẹẹ: ‘Vbe a ya avbe okuta na kha?’ 22 wa ghi tama ivbi uwa wẹẹ: ‘Ivbi Izrẹl keghi ya owẹ fian Ẹzẹ e Jọdan rra vbe otọ nọ kae, 23 vbe ẹghẹ ne Jehova na sirra iran ka Ẹzẹ e Jọdan, ne iran mieke na sẹtin fiaẹn rra, zẹvbe ne Jehova vbe sirra ima ka Okun Nọ Baa, ne ima mieke na sẹtin fiaẹn rra. 24 Te ọ ru ọna, ne emwa hia ni rre uhunmwu otagbọn mieke na rẹn vbene Jehova mwẹ ẹtin hẹ, ne uwa mieke na vbe gha mu ohan e Jehova ne Osanobua uwa vbe ẹghẹ hia.’”

5 Avbe ọba ọghe Ivbi Amọri hia ni ghaa rre odẹ orrie* ọghe Jọdan, kevbe avbe ọba ọghe Ivbi e Kenan hia ni ghaa rre ọkpẹn okun, ghi wa họn wẹẹ e Jehova ka Ẹzẹ e Jọdan, ne Ivbi Izrẹl mieke na sẹtin fiaẹn rra, afianma na suẹn gha fian iran,* ohan ma gi iran rhọkpa mu okuo gie Ivbi Izrẹl.*

2 Ẹghẹ nii, e Jehova na tama e Jọshua wẹẹ: “Ya okuta nọ wegbe ru abẹ eso, ne u werriegbe rhuẹ ikpia hia ni rre uwu ẹbu Ivbi Izrẹl.” 3 Ẹre Jọshua na ya okuta nọ wegbe ru abẹ eso, ọ na rhuẹ ikpia hia ni rre uwu ẹbu Ivbi Izrẹl vbe Gibiat-ha-aralọt.* 4 Emwi nọ si ẹre ne Jọshua na rhuẹ iran ẹre na khin: Ikpia hia ni rre uwu ẹbu Ivbi Izrẹl ni sẹ nẹ nọ yo okuo,* ni ladian vbe otọ Igipt, keghi wulo vbe iran khian vbe uwu ato, vbe iran ghi kpa hin otọ Igipt rre nẹ. 5 Iran hia ni kpa hin Igipt rre rhuẹ re, sokpan, iran hia na biẹlẹ vbe uwu ato vbe iran ghi kpa hin Igipt rre ma rhuẹ. 6 Ukpo iyeva (40) ẹre Ivbi Izrẹl ya gha khian vbe uwu ato, a ghi te miẹn wẹẹ agbẹnvbo nii hia wulo fo, ọni ọre, ikpia hia ni sẹ nẹ nọ yo okuo ni kpa hin otọ Igipt rre, ni ma họn ẹmwẹ ne Jehova. Te Jehova wa yan ma iran wẹẹ, irẹn i khian kue ne iran la otọ ne irẹn ne Jehova yan ma erha iran odede wẹẹ irẹn gha mu ne emwa rẹn,* ọni ọre otọ nọ kakabọ maan emwiokọ.* 7 Rhunmwuda ọni, ọ na ya ivbi iran rhie ihe iran. Iran na, ẹre Jọshua rhuẹ re; rhunmwuda, a ma rhuẹ iran vbe iran rre odẹ.

8 A ghi rhuẹ ikpia hia ni rre agbẹnvbo nii fo nẹ, iran ma kpa vbe eke ne iran ghaa ye vbe agọ nii, a ghi te miẹn wẹẹ arhuẹ ọghe iran rrie.

9 Ẹre Jehova na ghi tama e Jọshua wẹẹ: “I ban ukpọn efa ọghe Igipt hin uwa egbe rre nẹ.” Rhunmwuda ọni, e Gilgal* ẹre a ghi gha tie evba nii, eni nii ẹre a ye tie ẹre do fi ẹdẹnẹrẹ.

10 Ivbi Izrẹl na ye gha rre eke ne iran bu agọ yi vbe Gilgal, iran keghi do Ugie Alagberra vbe ẹghẹ ota, vbe ikpẹdẹ nogie iwenẹ (14) ọghe uki nii, vbe ato ọghe Jẹriko. 11 A ghi tie ẹre nodẹ na do Ugie Alagberra, iran na suẹn gha rri emwiokọ ọghe ẹvbo nii. Iran na vbe rri ebrẹd na ma ya eyist ru, kevbe emwiokọ na ranmwẹ vbe ẹdẹ ne ẹdẹrriọ. 12 Ẹdẹ ne Ivbi Izrẹl suẹn gha rri emwiokọ ni rre ẹvbo nii, ẹre iran ghi miẹn e mana sẹ;* iran na suẹn gha rri emwiokọ ni rre otọ e Kenan vbe ukpo nii, iran ma ghi gha miẹn e mana re.

13 E Jọshua kegha rre ọkpẹn e Jẹriko vbe ẹdẹ ọkpa, ọ ghi tọn uhunmwu mu, ọ na miẹn okpia ọkpa nọ da umozo yi, nọ mudia ye odaro ọre. E Jọshua keghi bu ẹre gha khian, ọ na nọ rẹn wẹẹ: “Obọ ọghe ima ẹre u ye ra, ra obọ ọghe avbe eghian ọghe ima?” 14 Ẹre okpia nii na wẹẹ: “Ẹo, sokpan, te I rre zẹvbe ọkaolotu ọghe ivbiyokuo ọghe Jehova.” E Jọshua keghi ya uhunmwu rhanmwẹ otọ nẹẹn, ọ na nọ rẹn wẹẹ: “De emwi ne enọyaẹnmwẹ hoo nọ tama ọguọmwadia ẹre?” 15 Ẹre ọkaolotu ivbiyokuo ọghe Jehova na ghi wanniẹn e Jọshua wẹẹ: “Kie ibata ruẹ, rhunmwuda, otọ nọhuanrẹn ẹre u mudia yi na.” E Jọshua keghi ru vberriọ vbobọvbobọ nii.

6 A keghi khui e Jẹriko gbua rhunmwuda Ivbi Izrẹl; ọmwa rhọkpa ma gha laọ, ọmwa rhọkpa ma vbe gha ladian.

2 E Jehova keghi tama e Jọshua wẹẹ: “Ghee ẹre, I mu e Jẹriko yọ ruẹ obọ nẹ, I vbe mu ọba e Jẹriko, kevbe ivbiyokuo ẹre ni wegbe yọ ruẹ obọ nẹ. 3 Wa ne ivbiyokuo ghi khian lẹga ẹvbo nii, uhukpa vbe ẹdẹ. Wa ghi ru ọna la ikpẹdẹ ehan. 4 U ghi we ne ohẹn ihinrọn viọ okpe* ihinrọn mwẹ obọ, ne iran ke odaro ne Ẹkpẹti Ile. Sokpan, ọ ghaa rre ẹdẹ nogie ihinrọn, wa ghi khian lẹga ẹvbo nii igba ihinrọn, iyeke ọni, avbe ohẹn ghi kpee avbe okpe nii. 5 Ivbiyokuo hia gha wa họn wẹẹ, a kpee avbe okpe nii,* iran ghi wa tu utumwẹ okuo. Ẹghẹ nii, ekẹn na gbe lẹga ẹvbo nii ghi de, dọmwadẹ ọghẹe ghi mu uhunmwu daa ẹvbo nii.”

6 Ẹre Jọshua ne ovbi e Nọn na tie avbe ohẹn, ọ na tama iran wẹẹ: “Wa mu ẹkpẹti ile, ohẹn ihinrọn ghi vbe viọ okpe ihinrọn mwẹ obọ, iran ghi ke odaro ne Ẹkpẹti Ile ọghe Jehova.” 7 Ọ na tama ivbiyokuo nii wẹẹ: “Wa khian lẹga ẹvbo nii, ivbiyokuo ni viọ emwi igbinna mwẹ, ghi ke odaro ne Ẹkpẹti Ile ọghe Jehova.” 8 Ohẹn ihinrọn ni viọ okpe ihinrọn mwẹ obọ vbe odaro e Jehova keghi ke odaro, iran na gha kpee avbe okpe nii, a na gha mu ẹkpẹti ile ọghe Jehova lele iran dee vbe iyeke, zẹvbe ne Jọshua ka tama iran. 9 Ẹre ivbiyokuo ni viọ emwi igbinna mwẹ, na ghi ke odaro ne avbe ohẹn ni ghaa kpee avbe okpe nii. Ivbiyokuo ni ke iyeke kegha lele Ẹkpẹti Ile dee, zẹvbe ne avbe ohẹn ya gha kpee avbe okpe nii yan egbe yan egbe.

10 E Jọshua ka tama ivbiyokuo nii nẹ wẹẹ: “Wa ghẹ go, wa ghẹ vbe gia họn urhu uwa. Wa ghẹ gi ẹmwẹ rhọkpa ke uwa unu ladian, a ghi te miẹn wẹẹ ọ sẹ ẹdẹ ne I gha tama uwa ne uwa go, ẹghẹ nii, wa ghi go.” 11 Ọ na we ne iran mu Ẹkpẹti Ile ọghe Jehova lẹga ẹvbo nii. Uhukpa ẹre iran mu ẹnrẹn ga, iyeke ọni, iran na werriegbe gha die agọ, iran na vbiẹ evba ne ẹdẹ gbe.

12 Ẹdẹ ghi gbe, e Jọshua na kpaegbe vbe owiẹ fioro, avbe ohẹn na mu Ẹkpẹti Ile ọghe Jehova, 13 ohẹn ihinrọn ni viọ okpe ihinrọn mwẹ, na ke odaro ne Ẹkpẹti Ile ọghe Jehova, iran na gha kpee avbe okpe nii yan egbe yan egbe. Ivbiyokuo ni viọ emwi igbinna mwẹ keghi ke odaro ne iran, vbene ivbiyokuo ni ke iyeke na gha lele Ẹkpẹti Ile ọghe Jehova dee, zẹvbe ne avbe ohẹn ya gha kpee avbe okpe nii khian. 14 Iran keghi khian lẹga ẹvbo nii uhukpa vbe ikpẹdẹ nogie eva, iyeke ọni, iran na werriegbe gha die eke ne iran bu agọ yi. Ikpẹdẹ ehan ẹre iran ru ọna la.

15 Ẹdẹ ghi wa gbe vbe ikpẹdẹ nogie ihinrọn, iran na kpaegbe, iran na khian lẹga ẹvbo nii vbene iran ka ru ẹre, igba ihinrọn ẹre iran khian lẹga ẹre. Ẹdẹrriọ ọkpa ẹre iran khian lẹga ẹvbo nii igba ihinrọn. 16 Ọ ghi wa gba vbe igba ihinrọn ne iran khian lẹga ẹvbo nii, avbe ohẹn na kpee avbe okpe nii, ẹre Jọshua na tama ivbiyokuo nii wẹẹ: “Wa go, rhunmwuda, e Jehova mu ẹvbo na ne uwa nẹ! 17 Te a khian fuẹn ẹvbo na kevbe emwi hia ni rre uwu ẹre rua; ọghe Jehova ẹre ehia khin. E Rehab ne igbiragia ọkpa kevbe emwa hia ni gu ẹre rre owa, ẹre a khian sẹrae, rhunmwuda nọ na viọ emwa ne ima gie ẹre uhunmwu lẹre. 18 Wa ghẹ sikẹ emwi rhọkpa na we na wabọ ọre rua, ne aro uwa ghẹ do wu yọ, ẹghẹ nii, wa ghi do rhie vbọ. Wa gha ru vberriọ, agọ ọghe Izrẹl ghi do deba emwi na khian wabọ ọre rua, rhunmwuda ne uwa na si ọlọghọmwa gie egbe uwa. 19 Sokpan, esiliva hia, igoru, kevbe avbe emwi na ya ekọpa kevbe ematọn ru, keghi re emwi nọhuanrẹn vbe aro e Jehova. Te ọ khẹke na viọ ehia ye aza ọghe Jehova.”

20 Ivbiyokuo nii ghi họn vbe a kpee okpe, iran na davan. Ivbiyokuo nii ghi wa tu utumwẹ okuo, ekẹn na gbe lẹga e Jẹriko na de. Iyeke ọni, ivbiyokuo nii na mu uhunmwu daa ẹvbo nii, iran na laọ, iran na ghi khọn rẹn mu otọ. 21 Iran na ya umozo fuẹn emwi hia ni ghaa rre ẹvbo nii rua, ke ikpia ke ikhuo, ke ọmaẹn ke ẹghele, ya sẹ egbe ẹmila, ohuan kevbe ekẹtẹkẹtẹ.

22 E Jọshua na tama ikpia eva ni ya ba otọ nii ghee wẹẹ: “Wa gha rrie owa igbiragia nii, wa gha sẹ evba, wa ghi rhie ẹre ladian, wa ghi vbe viọ emwa rẹn hia ladian, zẹvbe ne uwa yan ma rẹn.” 23 Ẹre ikpia eva nii* na gha khian, iran ghi sẹ evba, iran na rhie Rehab ladian, kẹ kevbe erhae, iyẹe, etiọnrẹn kevbe emwa rẹn hia; ọghe ne ẹmwata, ẹgbẹe ọre hia ẹre iran viọ ladian, iran na viọ iran hia gha rrie ihe ọkpa vbe a gha ladian vbe agọ ọghe Izrẹl, vbene emwi rhọkpa ma na ru iran.

24 Ẹre iran na giẹn ẹvbo nii kevbe emwi hia ni rrọọ mu otọ. Sokpan, iran na viọ avbe esiliva, igoru kevbe avbe emwi na ya ekọpa kevbe ematọn ru, ye aza ọghe owa e Jehova. 25 E Rehab ne igbiragia, igiowa ọghe erhae kevbe emwa rẹn hia, ẹre Jọshua sẹrae; e Rehab ye rre Izrẹl do fi ẹdẹnẹrẹ, rhunmwuda nọ na viọ emwa ne Jọshua gie ya ba otọ e Jẹriko ghee lẹre.

26 Uwu ẹghẹ na, ẹre Jọshua ya ta ẹmwẹ na:* “Ọmwaikọmwa nọ wẹẹ irẹn khian werriegbe bọ e Jẹriko, te ihẹn ọghe Jehova khian gha rre ọre uhunmwu. Te ovbi ẹre nọdiọn khian wu vbe ọ gha gbe ẹyotọ ọre, alagbodẹ ọghẹe ghi vbe wu, vbe ọ gha bọ avbe onurho ẹre.”

27 E Jehova kegha gu e Jọshua rrọọ, a na gha họn usi ẹre rre vbe ehe hia vbe otagbọn.

7 Sokpan, Ivbi Izrẹl ma lele emwi ne Osanobua tae, vbekpa avbe emwi na we ne iran wabọ ọre rua. Rhunmwuda, Ekan ne ovbi e Kamai, ne ovbi e Zabdai, ne ovbi e Zira, nọ ke uniẹn e Juda rre, keghi viọ emwi eso nọ te khẹke na wabọ ọre rua. Rhunmwuda ọni, e Jehova keghi suẹn gha mu ohu Ivbi Izrẹl.

2 Ẹre Jọshua na ke Jẹriko gie ikpia eso gha rrie Eai, nọ rre ọkpẹn e Bẹt-evin vbe odẹ ekẹn* ọghe Bẹtẹl, ọ na tama iran wẹẹ: “Wa gha khian ne uwa ya ba otọ nii ghee.” Ẹre ikpia nii na gha khian, iran na ya ba otọ Eai ghee. 3 Iran ghi rre, iran na tama e Jọshua wẹẹ: “Esa i rrọọ ne ivbiyokuo hia khian ya gha khian. Odẹ ivbiyokuo arriaisẹn eva (2,000) ra arriaisẹn eha (3,000) gha sẹtin khọnmiotọ yan Eai. Ọ ma khẹke ne ivbiyokuo hia wa gha khian, ne iran ghẹ ya loo ẹtin iran kua kẹkan, rhunmwuda, emwa ni rre evba i bun.”

4 Rhunmwuda ọni, ikpia ni rrie odẹ arriaisẹn eha (3,000) na gbe oke gha rrie eke ne iran ye. Sokpan, ikpia ni rre Eai ghi bu iran gha dee, iran na lẹẹ. 5 Ikpia ni rre Eai na gbele Ivbi Izrẹl ehan yan ọgban (36), iran na ke onurho ẹvbo nii khu iran ya sẹ e Shẹbarim,* iran kegha gbele Ivbi Izrẹl nii khian zẹvbe ne iran ya gha tuorre dee. Rhunmwuda ọni, ohan na do gha mu Ivbi Izrẹl, ẹtin na vbe fo iran.*

6 Ẹre Jọshua na yanghan ukpọn ye egbe ẹre urhu, ọ na lovbiẹ mu aro rhu otọ vbe odaro Ẹkpẹti Ile ọghe Jehova ya sẹ ẹghẹ ota, ke irẹn ke ediọn ni rre otọ Izrẹl, iran na gha zẹ ebubẹ ye uhunmwu. 7 E Jọshua na wẹẹ: “Eo, Enọyaẹnmwa ighẹ Jehova ne Udazi, vbọzẹ ne u na viọ ima la Ẹzẹ e Jọdan gberra, ne u na vbe viọ ima ye obọ Ivbi Amọri ne iran gbele ima rua? Akpawẹ ima rẹnrẹn, te ima gha te wa dia odẹ ekẹn* ọghe Jọdan ya! 8 Eo Jehova, lahọ ghẹ gui, vbia khian ghi ta nian, ugbẹnvbe a miẹn wẹẹ Ivbi Izrẹl lẹẹ ne eghian ọghe iran? 9 Ivbi e Kenan kevbe emwa nikẹre ni rre ẹvbo na gha ghi họn emwi nọ sunu na, iran ghi lẹga ima, iran ghi wabọ ima rua. Vbua khian ghi ya sinmwi oseghe ne eni ruẹ nọkhua hẹ?”

10 E Jehova na ghi wanniẹn e Jọshua wẹẹ: “Kpaegbe! Vbọzẹ ne u na lovbiẹ mu aro rhu otọ? 11 Izrẹl ru orukhọ nẹ, iran rra uhi ne I gbe ne iran. Iran do emwi eso viọ vbe uwu avbe emwi na we na wabọ ọre rua, iran na ya viọ ọre ba emwi iran, vbene ọmwa rhọkpa ma na rẹn. 12 Nọnaghiyerriọ, Ivbi Izrẹl i khian ghi sẹtin gha gu eghian iran khọn. Te iran khian lẹẹ ne eghian iran, rhunmwuda, iran ya egbe iran khian emwi nọ khẹke na wabọ ọre rua. I i khian ghi gha gu uwa rrọọ, vbe ẹ i re te uwa wabọ ọmwa nii, ne I we ne uwa wabọ ọre rua. 13 Kpaegbe ne u tama Ivbi Izrẹl wẹẹ, ‘Wa kpe egbe uwa huan, rhunmwuda, e Jehova ne Osa ọghe Izrẹl khare wẹẹ: “Eo Izrẹl, emwi nọ khẹke na wabọ ọre rua rre uwu ẹbu uwa. Wa i khian ghi sẹtin gha gu eghian uwa khọn, vbe ẹ i re te uwa rhie emwi nii nọ khẹke na wabọ ọre rua, hin uwu ẹbu uwa rre. 14 Owiẹ nakhuẹ wa hia ghi ladian; dọmwadẹ uniẹn gha ladian, uniẹn ne Jehova zẹ vbọ ghi vbe ladian, dọmwadẹ ẹgbẹe vbe uniẹn nii gha ladian, ẹgbẹe ne Jehova zẹ vbọ ghi vbe ladian, dọmwadẹ igiowa vbe ẹgbẹe nii gha ladian, igiowa ne Jehova zẹ vbọ ghi vbe ladian, dọmwadẹ ikpia ni rre igiowa nii ghi vbe ladian. 15 Ọmwa nii na miẹn emwi nọ khẹke na wabọ ọre rua vbe obọ ọre, a ghi ya erhẹn giẹn ọnrẹn rua, ke irẹn ke emwi hia nọ mwẹ, rhunmwuda, ọ rhie obọ gberra ile ne Jehova gu Ivbi Izrẹl ta, ọ na vbe ru emwi ekhue vbe uwu ẹbu Ivbi Izrẹl.”’”

16 E Jọshua ghi kpaegbe vbe owiẹ fioro vbe ẹdẹ nọ lelẹe, ọ na we ne Ivbi Izrẹl hia ladian, dọmwadẹ uniẹn na ladian, ẹre a na zẹ uniẹn e Juda. 17 Ọ na we ne dọmwadẹ ẹgbẹe ni rre uniẹn e Juda ladian, ẹre a na zẹ ẹgbẹe ọghe Zira, dọmwadẹ igiowa ni rre ẹgbẹe ọghe Zira ghi ladian, a na zẹ igiowa ọghe Zabdai. 18 Vbe okiekie, ọ na we ne dọmwadẹ ikpia ni rre igiowa ọghe Zabdai ladian, ẹre a na zẹ Ekan ne ovbi e Kamai, ne ovbi e Zabdai, ne ovbi e Zira, nọ ke uniẹn e Juda rre. 19 Ẹre Jọshua na tama Ekan wẹẹ: “Lahọ ovbi mwẹ, rhie ọghọ ne Jehova ne Osa ọghe Izrẹl, ne u miẹn orukhọ ruẹ kue ma rẹn. Lahọ, ta emwi ne u ru ma mwẹ. Ghẹ muẹn lẹre mẹ.”

20 Ekan na wanniẹn e Jọshua wẹẹ: “Ọghe ne ẹmwata, mẹ ẹre ọ ru orukhọ ghee Jehova ne Osa ọghe Izrẹl, emwi ne I ru na khin. 21 Vbe I ghi miẹn ukpọn ighobioye nọ mose na ru vbe Shaina, ekilo eva* ọghe esiliva kevbe igoru ne ukhuamwẹ ọnrẹn re ukhiọnmwẹ ekilo ọkpa* vbe uwu avbe emwi na viọ re vbe okuo, ọ na wa gha yẹẹ mwẹ, ẹre I na viọ ọre. I tọnnọ rẹn ye otọ vbe uwu ibọkpọ mwẹ, igho nọ rrọọ ẹre ọ ke otọ.”

22 Vbobọvbobọ nii, e Jọshua keghi gie emwa eso gha rrie ibọkpọ ọghe Ekan, ẹre iran na rhulẹ gha khian, iran ghi sẹ evba, iran na miẹn ukpọn nii vbe eke nọ muẹn lẹre yi vbe ibọkpọ ọre, igho nọ rrọọ ẹre ọ ke otọ. 23 Ẹre iran na viọ avbe emwi nii ladian vbe nene ibọkpọ, iran na viọ ẹre gie Jọshua kevbe Ivbi Izrẹl hia, iran na ghi viọ ẹre ye odaro e Jehova. 24 E Jọshua kevbe Izrẹl hia keghi rhie Ekan ne ovbi e Zira, iran na vbe viọ esiliva nii, ukpọn ighobioye kevbe igoru nii, deba ivbi ẹre nikpia, ivbi ẹre nikhuo, ẹmila ọghẹe, ekẹtẹkẹtẹ ọghẹe, ohuan ọghẹe, ẹwe ọghẹe, ibọkpọ ọghẹe, kevbe emwi hia nọ ghi re ọghẹe nẹ, iran na viọ ehia gha rrie Iya ọghe Ekọ. 25 E Jọshua na wẹẹ: “Vbọzẹ ne u na si ọlọghọmwa ye ima egbe? E Jehova gha vbe si ọlọghọmwa yọ ruẹ egbe vbe ẹrẹna.” Ẹre Ivbi Izrẹl hia na filo okuta gbe Ekan kevbe ẹgbẹe ọre, iyeke ọni, iran na giẹn iran rua. Erriọ iran ghi ya ya okuta gbele iran hia rua. 26 Iran keghi silo okuta ni bun yan ikun ẹnrẹn, avbe okuta nii ye rre evba do fi ẹdẹnẹrẹ. Iyeke ọni, e Jehova ma ghi gha mu ohu. Ọni ẹre ọ si ẹre na na tie evba nii Iya ọghe Ekọ* do fi ẹdẹnẹrẹ.

8 E Jehova keghi tama e Jọshua wẹẹ: “Ghẹ gi ohan muẹn ra ne afianma gha fian ruẹ. Viọ ivbiyokuo hia, ne uwa ya gu emwa ni rre Eai khọn. Ghee ẹre, I mu ọba ọghe Eai, emwa rẹn, ẹvbo ẹre, kevbe otọ ẹre hia nuẹn nẹ. 2 Vbene uwa ru e Jẹriko kevbe ọba ọghẹe, wa ghi vbe ru Eai kevbe ọba ọghẹe vberriọ, sokpan, wa sẹtin viọ emwi ni ghi kẹ vbe ẹvbo nii kevbe emwirri ni rrọọ. U ghi we ne ivbiyokuo eso lẹre ye iyeke ẹvbo nii.”

3 Ẹre Jọshua kevbe ivbiyokuo ẹre hia na gbe oke gha rrie Eai, ne iran ya gu emwa ni rre evba khọn. E Jọshua keghi zẹ ivbiyokuo arriaisẹn ọgban (30,000) ni wegbe ẹsẹse, ọ na we ne iran gha khian vbe asọn. 4 Ẹre ọ na tama iran wẹẹ: “Ghee ẹre, wa ya lẹre ye iyeke ẹvbo nii. Wa ghẹ khian rree ne ẹvbo nii gbe, wa hia ghi wa vbe mu egbe ye otọ. 5 Mẹ vbe ivbiyokuo hia ni gue mwẹ, ghi gha rrie ẹvbo nii; ikpia ni rre Eai gha ghi ladian ne iran do gu ima gbinna vbene iran ka ru ẹre, ma ghi lẹẹ ne iran. 6 Iran gha zẹ ima khu, ma ghi gha lẹẹ khian, ne iran mieke na kpa hin ẹvbo iran rre, ẹghẹ nii iran ghi wẹẹ, ‘Iran lẹẹ ne ima vbene iran ka vbe ru ẹre.’ Ma ghi gele lẹẹ ne iran. 7 Ẹghẹ nii, wa ghi ladian vbe ehe ne uwa lẹre yi, ne uwa khọn ẹvbo nii mu otọ. E Jehova ne Osa ọghe uwa gha mu ẹvbo nii ye uwa obọ, ne uwa fuẹn ọnrẹn rua. 8 Wa gha wa khọn ẹvbo nii mu otọ nẹ, wa ghi mu erhẹn yọ. Wa ghi ru vbene Jehova khare. Uhunmwu ne I gie uwa re, ẹre na khin.”

9 E Jọshua na ghi we ne iran gha khian, iran na gha rrie eke ne iran khian lẹre yi; iran keghi lẹre ye uwu ẹkpo e Bẹtẹl kevbe Eai, vbe odẹ orrie* ọghe Eai, vbene Jọshua kevbe ivbiyokuo nikẹre na vbiẹ ihe ọkpa vbe asọn nii.

10 E Jọshua ghi kpaegbe vbe owiẹ fioro, ọ na si ivbiyokuo hia koko, ẹre irẹn vbe ediọn ni rre otọ Izrẹl na su ivbiyokuo nii gha rrie Eai. 11 Ivbiyokuo hia ni lelẹe khian kegha rrie odaro ẹvbo nii. Iran na bu agọ ye odẹ okuọ* ọghe Eai, vbene iya na gha rre uwu ẹkpo iran kevbe Eai. 12 Na kha na, e Jọshua viọ ivbiyokuo arriaisẹn vbe ihe isẹn (5,000) lẹre ye uwu ẹkpo e Bẹtẹl kevbe Eai nẹ, vbe odẹ orrie* ọghe ẹvbo nii. 13 Ẹre ivbiyokuo ni bun sẹ na bu agọ ye odẹ okuọ* ọghe ẹvbo nii, sokpan, ivbiyokuo ni lẹre na gha rre odẹ orrie* ọghe nene ẹvbo, e Jọshua kegha rrie uwu iya* nii vbe asọn nii.

14 Ọba Eai ghi wa miẹn iran, irẹn vbe ikpia ni rre ẹvbo nii na rhulẹ ladian vbe owiẹ fioro, ne iran ya gu Ivbi Izrẹl gbinna vbe ihe ọkpa nọ mu aro daa iya. Sokpan, ọ ma rẹn wẹẹ, ivbiyokuo eso lẹre ye iyeke ẹvbo nii. 15 Ikpia ni rre Eai ghi mu okuo rre, e Jọshua kevbe Ivbi Izrẹl hia kegha rhulẹ khian vbe odẹ nọ rrie ato. 16 Ẹre a na si emwa hia ni rre ẹvbo nii koko, a na we ne iran zẹ iran khu; vbene iran ya gha khu e Jọshua khian, erriọ iran ya gha khian rree ne ẹvbo iran. 17 Ikpia hia ni rre Eai kevbe Bẹtẹl, ẹre ọ ladian ya khu Ivbi Izrẹl, ọkpa ma vbe kẹ vbọ. Iran keghi yan urho ẹvbo nii ye otọ, iran na gha khu Ivbi Izrẹl khian.

18 E Jehova keghi tama e Jọshua wẹẹ: “Niẹn ogala* nọ rrọọ ruẹ obọ daa Eai, rhunmwuda, I gha mu Eai yọ ruẹ obọ.” Ẹre Jọshua na ghi niẹn ogala* nọ rre ọre obọ daa ẹvbo nii. 19 E Jọshua ghi wa niẹn obọ daa ẹvbo nii, ivbiyokuo hia ni lẹre na zẹgiẹ ladian, iran na rhulẹ la ẹvbo nii, iran na khọn rẹn mu otọ. Vbe ọwara ọkpa nii, iran na wa mu erhẹn yọ.

20 Ikpia ni rre Eai ghi gbe aro ghee iyeke, iran na bẹghe ẹre wẹẹ ighogho wa vẹ ladian vbe ẹvbo iran, iran na vbe gha bẹghe nene ighogho vbe iso. Rhunmwuda ọni, iran ma ghi miẹn orhiọn ya lẹẹ gha rrie ehe rhọkpa. Ẹre Ivbi Izrẹl ni te lẹẹ rrie odẹ ato, na ghi werriẹ aro daa emwa ni khu iran khian. 21 E Jọshua kevbe Ivbi Izrẹl ni rre eke nọ ye ghi bẹghe ẹre wẹẹ, ivbiyokuo ni lẹre, khọn ẹvbo nii mu otọ nẹ kevbe wẹẹ, ighogho vẹ ladian vbe ẹvbo nii, iran na fi egbe werriegbe, iran na suẹn gha gu ivbiyokuo ọghe Eai gbinna. 22 Ivbi Izrẹl ni khọn ẹvbo nii mu otọ keghi ladian vbe ẹvbo nii, iran na bu ivbiyokuo ọghe Eai gha dee, ivbiyokuo ọghe Eai na do gha rre adesẹneva, Ivbi Izrẹl eso kegha rre odaro iran, vbene eso na gha rre iyeke iran. Iran na suẹn gha gbele ivbiyokuo ọghe Eai, a ma vbe miẹn ọkpa vbọ nọ miẹn uhunmwu, ra nọ lẹẹ re. 23 Iran ghi mu ọba Eai, iran ma gbe ẹre rua, iran na muẹn gie Jọshua.

24 Ivbi Izrẹl ghi ya umozo gbele ivbiyokuo ọghe Eai rua nẹ, ọni ọre ivbiyokuo ni te khu iran gha rrie ato, iran hia na werriegbe gha rrie Eai, iran na ya umozo gbele emwa hia ni rre evba rua. 25 Emwa hia ni wulo vbe ẹdẹrriọ, ke ikpia ke ikhuo, kegha re arriaisẹn iweva (12,000), ọni ọre emwa hia ni ghaa rre Eai. 26 E Jọshua ma rhie obọ nọ ya da ogala* yi sẹ otọ, a ghi te miẹn wẹẹ ọ fuẹn emwa hia ni ghaa rre Eai rua. 27 Vbọrhirhighayehẹ, Ivbi Izrẹl keghi viọ emwirri kevbe avbe emwi ni rre ẹvbo nii, zẹvbe ne Jehova tama e Jọshua.

28 Iyeke ọni, e Jọshua keghi giẹn Eai mu otọ, ọ na yae khian itowa, erriọ ẹre ọ ye ye do fi ẹdẹnẹrẹ. 29 E Jọshua keghi si ọba Eai rrọọ ye erhan, ya sẹ ẹghẹ ota. Vbene ẹdẹ ghi te mu, e Jọshua na we ne iran ya mu ikun ẹnrẹn tuorre, vbe erhan na si ẹre rrọọ yi. Ẹre iran na ya muẹn fua vbe onurho ẹvbo nii, iran na silo okuta ni bun yan rẹn, avbe okuta nii ye rre evba do fi ẹdẹnẹrẹ.

30 Ẹghẹ nii, e Jọshua na ghi bọ aka ne Jehova ne Osa ọghe Izrẹl vbe Oke Ibal, 31 zẹvbe ne Mozis ne ọguọmwadia e Jehova gbe uhi ne Ivbi Izrẹl ne iran gha ru ẹre, zẹvbe na vbe gbẹn ọnrẹn ye ebe Uhi e Mozis wẹẹ: “Wa ghi ya avbe okuta na ma he ya emadogua ọghe ematọn rhọkpa fian gbe aka.” Iran keghi zọ ese na giẹn ruan kevbe ese ọfunmwegbe gie Jehova vbe uhunmwu aka nii.

32 Ọ na ghi gbẹnnẹ uhi ne Mozis gbẹnnẹ sirra Ivbi Izrẹl ye avbe okuta nii. 33 Ivbi Izrẹl hia, ediọn ọghe iran, avbe ọkaolotu iran, kevbe avbe ọbuohiẹn ọghe iran keghi mudia ye obọ eveva ọghe Ẹkpẹti Ile vbe odaro Ivbi e Livai ni re ohẹn ni ghaa mu ẹkpẹti ile ọghe Jehova. Avbe ọrriọvbe kevbe emotọ vbe gha rre evba. A gha ghae emwa ni ghaa rre evba ye ihe eva, obọ ọkpa vbọ na mudia ye odaro Oke Gẹrizim, vbene emwa nikẹre na mudia ye odaro Oke Ibal (zẹvbe ne Mozis ne ọguọmwadia e Jehova ka tama iran), na mieke na fiangbe Ivbi Izrẹl. 34 Iyeke ọni, ọ na tie Uhi nii hia ladian, ke afiangbe ni rrọọ, ke ihẹn ni rrọọ, zẹvbe na wa ya gbẹn ọnrẹn ye ebe Uhi nii. 35 Ọkpa i rrọọ vbe ẹmwẹ ne Mozis tae, ne Jọshua ma tie ladian sirra Ivbi Izrẹl hia ni gbẹbu, ya sẹ egbe ikhuo, ibiẹka kevbe avbe ọrriọvbe ni ghaa rre uwu ẹbu iran.

9 Avbe ọba hia ni rre odẹ orrie,* avbe ọba ni rre ikinkin ne oke ye, ni rre ikinkin ọghe Shẹfila, ni rre ọkpẹn Okun Nọkhua,* kevbe ni rre odaro e Lẹbanọn, keghi họn emwi nọ sunu na. Ena ọre avbe ọba ọghe Ivbi e Hẹt, ọghe Ivbi Amọri, ọghe Ivbi e Kenan, ọghe Ivbi e Pẹriz, ọghe Ivbi e Hivi, kevbe ọghe Ivbi e Jibọs. 2 Iran ghi wa họn emwi nọ sunu na, iran hia na si uhunmwu koko, ne iran ya gu e Jọshua kevbe Ivbi Izrẹl khọn.

3 Ivbi e Gibiọn vbe họn wẹẹ, e Jọshua khọnmiotọ yan e Jẹriko kevbe Eai. 4 Ẹre iran na ya ẹwaẹn zẹ emwi ru, iran na viọ evbare ye ẹkpo nọ wiẹn nẹ, iran na muẹn yan ekẹtẹkẹtẹ ọghe iran, deba ẹkpo ohian nọ wiẹn nẹ, nọ sa re, na ghi werriegbe se. 5 Iran keghi viọ ibata nọ re kevbe na dọlọ yi nẹ ye owẹ, iran na vbe yọ ukpọn nọ wiẹn nẹ. Ebrẹd nọ kakae kevbe nọ guọghọ nẹ, ẹre iran viọ re. 6 Ẹre iran na bu e Jọshua gha rrie agọ vbe Gilgal, iran ghi sẹ evba, iran na tama e Jọshua kevbe avbe ọkaolotu ọghe Izrẹl wẹẹ: “Ehe nọ rree, ẹre ima ke rre. Lahọ, wa gu ima ta ile.” 7 Sokpan, avbe ọkaolotu ọghe Izrẹl keghi tama Ivbi e Hivi nii wẹẹ: “Vbọzẹ ne ima gha na gu uwa ta ile? A sẹtin miẹn wẹẹ ehe ne uwa ye ma rree gbe mwa.” 8 Iran na wanniẹn e Jọshua wẹẹ: “Eguọmwadia* ruẹ ma khin.”

Ẹre Jọshua na nọ iran wẹẹ: “De emwa ne uwa khin? De ehe ne uwa ke rre?” 9 Ẹre iran na tama rẹn wẹẹ: “Ehe nọ rree ẹre eguọmwadia ruẹ ke rre, rhunmwuda eni ọghe Jehova ne Osa ọghe uwa. Rhunmwuda, ma họn okhekhe ẹre kevbe emwi hia nọ ru vbe Igipt, 10 ma vbe họn emwi hia nọ ru ọba eva ọghe Ivbi Amọri re, ni ghaa rre obọ nọkpa* ọghe Jọdan, ọni ọre Saihọn ne ọba ọghe Hẹshbọn kevbe Ọg ne ọba ọghe Beshan, nọ ghaa rre Ashtarọt. 11 Rhunmwuda ọni, avbe ediọn kevbe emwa hia ni rre ẹvbo ima keghi tama ima wẹẹ, ‘Wa viọ evbare lele egbe ne uwa bu iran gha khian. Wa ghi tama iran wẹẹ: “Ma ra gha re eguọmwadia uwa; lahọ, wa gu ima ta ile.”’ 12 Ẹdẹ ne ima kpa vbe owa rre wẹẹ ima bu uwa dee, te avbe ebrẹd na ye gha tọn. Ghee nian, iran kaka nẹ, iran vbe guọghọ nẹ. 13 Ọghe ọgbọn ẹre avbe ẹkpo ohian na ghaa khin, vbe ima sa ayọn vuọn rẹn, sokpan, iran sa nẹ. Te ibata ima ghi re, ukpọn ima vbe wiẹn nẹ, rhunmwuda, eke ne ima ke dee i re otọ ne emwa.”

14 Ẹre avbe ọkaolotu ọghe Izrẹl na miẹn iran evbare eso,* sokpan, iran ma ka gualọ otọ ẹmwẹ na vbe obọ e Jehova. 15 Ẹre Jọshua na ghi gu iran ta ile ọghe ọfunmwegbe, ọ na wẹẹ irẹn i khian gbele iran rua. Avbe ọkaolotu ọghe Izrẹl na ghi yan wẹẹ, iran gha mu ẹmwẹ na sẹ.

16 Ọ ghi rre ikpẹdẹ eha ne iran gu iran ta ile, iran na do họn wẹẹ ikinkin nii ẹre iran ye, ehe ne iran ye ma vbe rree gbe. 17 Ẹre Ivbi Izrẹl na mu okhian gha rrie ẹvbo iran, ọ ghi rre ikpẹdẹ eha, iran keghi sẹ evba; ẹvbo iran kegha re Gibiọn, Kefaira, Bi-ẹrọt, kevbe Kiriat-jiẹrim. 18 Sokpan, Ivbi Izrẹl ma gu iran khọn, rhunmwuda, avbe ọkaolotu ọghe Izrẹl ya eni e Jehova ne Osa ọghe Izrẹl gu iran ta ile nẹ. Ẹre Ivbi Izrẹl hia na ghi suẹn gha gui ẹzọ uwu unu, rhunmwuda emwi ne avbe ọkaolotu na ru. 19 Rhunmwuda ọni, avbe ọkaolotu nii na ghi tama Ivbi Izrẹl hia wẹẹ: “Ugbẹnvbe a miẹn wẹẹ, ma ya eni e Jehova ne Osa ọghe Izrẹl gu iran ta ile nẹ, ma i khian sẹtin ru iran emwi rhọkpa. 20 Emwi ne ima gha ru na khin: Ma i khian gbele iran rua, ne Osanobua ghẹ do gha mu ohu ima, rhunmwuda ile ne ima gu iran ta.” 21 Avbe ọkaolotu nii na vbe kha wẹẹ: “Wa sẹ iran rae, sokpan, te iran khian gha yo oha erhan, iran ghi vbe gha sa amẹ ne Ivbi Izrẹl hia.” Ọna ọre emwi ne avbe ọkaolotu nii wẹẹ iran khian ru iran re.

22 E Jọshua keghi tie iran, ọ na nọ iran wẹẹ: “Vbọzẹ ne uwa na rẹrẹ ima, ne uwa na kha wẹẹ, ‘Ehe nọ rree ẹre ima ke rre,’ vbene a na miẹn wẹẹ, ehe ne uwa ye ma rree gbe mwa? 23 Ke eban kpa, emwa na tie ihẹn na ẹre uwa ghi khin. Eviẹn wa khian gha khin, te uwa khian gha yo oha erhan ne ima, wa ghi vbe gha sa amẹ na khian gha loo vbe owa ọghe Osa mwẹ.” 24 Iran na wanniẹn e Jọshua wẹẹ: “Te a wa tama ima ne eguọmwadia ruẹ wẹẹ, e Jehova ne Osanobua uwa tama e Mozis ne ọguọmwadia ẹre wẹẹ, irẹn gha mu otọ na hia ne uwa, ọ gha vbe sirra uwa wabọ emwa hia ni rrọọ. Rhunmwuda ọni, ohan uwa na do gha mu ima, rhunmwuda ma ma hoo ne ima wu, ọni ẹre ọ si ẹre ne ima na ru emwi ne ima ru na. 25 Nian, obọ ruẹ ma ghi ye. Ru ima emwi ke emwi ne u rẹnrẹn wẹẹ ọ maan.” 26 Ọna ọre emwi nọ ghi ru iran re; ọ na miẹn iran fan vbe obọ Ivbi Izrẹl, iran ma ghi gbele iran rua. 27 Sokpan ke ẹdẹrriọ kpa, e Jọshua na we ne iran gha yo oha erhan, ne iran vbe gha sa amẹ ne Ivbi Izrẹl hia khian gha loo, ya sẹ egbe na khian gha loo vbe aka ọghe Jehova, vbe ehe ne Osanobua zẹ, erriọ iran ye ru ẹre do fi ẹdẹnẹrẹ.

10 Adonai-zidẹk ne ọba e Jerusalẹm keghi họn wẹẹ, e Jọshua khọn Eai mu otọ, ọ vbe fuẹn ọnrẹn rua nẹ, kevbe wẹẹ, emwi nọ ru e Jẹriko kevbe ọba nọ kha yan rẹn, ẹre ọ vbe ru Eai kevbe ọba nọ kha yan rẹn. Ọ vbe họn vbene Ivbi e Gibiọn ya gu Ivbi Izrẹl ta ile ọghe ọfunmwegbe hẹ kevbe wẹẹ, uwu ẹbu Ivbi Izrẹl ẹre iran ghi ye. Ọ ghi wa họn ena hia, 2 afianma na suẹn gha fiaẹn, rhunmwuda, okpẹvbo ẹre Gibiọn ghaa khin, te ọ yevbe ọkpa vbe avbe ẹvbo ne ọba khaevbisẹ yan. Ọ kpọlọ sẹ Eai, ikpia hia ni rre evba wa vbe gua khọn okuo. 3 Rhunmwuda ọni, Adonai-zidẹk ne ọba ọghe Jerusalẹm keghi gie uhunmwu na gie Hoham ne ọba e Hẹbrọn, Pairam ne ọba e Jamọt, Jefaia ne ọba e Lekish, kevbe Dibiẹ ne ọba ọghe Ẹglọn: 4 “Wa do yọ mwẹ obọ, ne ima ya gu e Gibiọn gbinna, rhunmwuda, iran ya gu e Jọshua kevbe Ivbi Izrẹl ta ile ọghe ọfunmwegbe.” 5 Ẹre ọba isẹn ọghe Ivbi Amọri, ọni ọre ọba e Jerusalẹm, ọba e Hẹbrọn, ọba e Jamọt, ọba e Lekish, kevbe ọba ọghe Ẹglọn na ku obọ kugbe, ke iran ke ivbiyokuo ọghe iran, iran na lẹga e Gibiọn, ne iran mieke na gu iran khọn.

6 Ẹre Ivbi e Gibiọn na gie uhunmwu gie Jọshua vbe agọ vbe Gilgal, iran na wẹẹ: “Ghẹ yangbe eviẹn ruẹ. Zẹgiẹ gha dee! Do ru iyobọ ne ima, ne u vbe miẹn ima fan! Avbe ọba ọghe Ivbi Amọri hia ni rre ikinkin ne oke ye, ku obọ kugbe ne iran do gu ima khọn.” 7 Rhunmwuda ọni, e Jọshua kevbe ikpia hia ni khọn okuo, kevbe avbe ivbiyokuo ni wegbe na ke Gilgal gha khian.

8 E Jehova na ghi tama e Jọshua wẹẹ: “Ghẹ gi ohan iran muẹn, rhunmwuda, I viọ iran hia yọ ruẹ obọ nẹ. Ọkpa vbe uwu iran nọ gha sẹtin khọnmiotọ yan ruẹ i rrọọ.” 9 E Jọshua kevbe ivbiyokuo ẹre keghi ya asọn ohoho khian ke Gilgal gha dee. Iran na ya gu iran khọn vbe ẹghẹ ne iran ma roro, iran ma kọ. 10 E Jehova keghi si olighi vbe otighi ye iran egbe vbe iran ghi miẹn Ivbi Izrẹl. Ivbi Izrẹl keghi gbele iran ni bun rua vbe Gibiọn. Iran keghi khu iran la odẹ na la vbe a ghaa gbe oke rrie Bẹt-horọn, Ivbi Izrẹl na gha gbele iran khian vbe odẹ nii, ya sẹ Azika kevbe Makida. 11 Vbe iran ghi tuorre dee vbe Bẹt-horọn vbe iran lẹẹ ne Ivbi Izrẹl, e Jehova keghi ru ẹre ne esia ni kọnkọn gha ke orere iso dele gbe iran, ya sẹ Azika, iran hia keghi wulo. Uhiẹn, iran ne esia gbele bun sẹ ne Ivbi Izrẹl ya umozo gbele.

12 Ẹdẹ ne Jehova khọnmiotọ yan Ivbi Amọri sirra Ivbi Izrẹl, ẹre Jọshua tama e Jehova vbe odaro Ivbi Izrẹl wẹẹ:

13 Rhunmwuda ọni, ovẹn* keghi mudia hii, uki ma vbe kpa hin eke nọ ye rre a ghi te miẹn wẹẹ, agbẹnvbo Izrẹl khọnmiotọ yan eghian ọghe iran. A ma gbẹn ẹmwẹ na ye ebe Jesha ra? Ovẹn* keghi mudia hii vbe adesẹneva iso, ọ na yunmwu la ẹdẹ ohoho. 14 A ma he ka miẹn egbe ẹdẹ vberriọ, a ma ghi vbe werriegbe miẹn egbọre ke ẹghẹ nii gha dee, ne Jehova na danmwehọ ọmwa nagbọn, rhunmwuda, te Jehova ghaa gbinna ne Ivbi Izrẹl.

15 Iyeke ọni, e Jọshua kevbe ivbiyokuo ọghe Izrẹl hia na werriegbe gha rrie agọ vbe Gilgal.

16 Vbe uwu ẹghẹ na kha na, ọba isẹn nii keghi lẹẹ gha rrie Makida, iran na ya lẹre ye uwu uvun okuta nọ rre evba. 17 Emwa eso keghi do tama e Jọshua wẹẹ: “Emwa miẹn ọba isẹn na, vbe iran ya lẹre ye uvun okuta nọ rre Makida.” 18 Ẹre Jọshua na wẹẹ: “Wa werriẹ okuta nikhua ya gue ehe na la la uvun okuta nii, wa ghi vbe viọ emwa ye evba, ne iran gha khẹ ọre. 19 Sokpan, wa nikẹre ghi ye gha khian, wa ghẹ mudia. Wa zẹ eghian uwa khu, wa ghi gha gbele iran vbene iran ya lẹẹ khian. Wa ghẹ gi iran lẹẹ la ẹvbo iran, rhunmwuda, e Jehova ne Osa ọghe uwa viọ iran ye uwa obọ nẹ.”

20 E Jọshua kevbe ivbiyokuo Izrẹl keghi gbele iran ni bun rua, sẹrriọ wẹẹ, iran rhọkpa ma ghi kẹ, vbọ gberra iran ni lẹẹ la avbe ẹvbo na gbe ekẹn ga. 21 Iyeke ọni, ivbiyokuo nii hia na werriegbe bu e Jọshua gha rrie agọ vbe Makida, vbene emwi rhọkpa ma na ru iran. Ohan ma ghi gi ọmwa rhọkpa werriegbe fi unu gie Ivbi Izrẹl. 22 E Jọshua na ghi kha wẹẹ: “Wa werriẹ avbe okuta nii hin ehe na la la uvun nii rre, ne uwa viọ ọba isẹn nii bu mwẹ gha dee.” 23 Ẹre iran na viọ ọba isẹn nii ladian vbe uvun okuta nii, iran na viọ iran gie Jọshua. Ọba isẹn na ọre ọba e Jerusalẹm, ọba e Hẹbrọn, ọba e Jamọt, ọba e Lekish, kevbe ọba ọghe Ẹglọn. 24 Iran ghi viọ avbe ọba nii sẹ eke ne Jọshua ye, ọ na si ivbiyokuo Izrẹl hia koko, ọ na tama avbe ọkaolotu ọghe ivbiyokuo ni lele ẹre gha rrie okuo wẹẹ: “Wa larre. Wa rhie owẹ yan avbe ọba na ẹyaẹn.”* Ẹre iran na gha dee, iran na rhie owẹ yan avbe ọba nii ẹyaẹn.* 25 E Jọshua na ghi tama iran wẹẹ: “Wa ghẹ gi ohan mu uwa, ra ne afianma gha fian uwa. Wa gha mwẹ udinmwẹ, ne uwa vbe wegbe, rhunmwuda, ọna ọre emwi ne Jehova khian ru daa eghian uwa hia, ne uwa gu khọn.”

26 Ẹre Jọshua na gbele iran rua, ọ na silo iran rrọọ ye erhan isẹn, iran na gha rre uhunmwu avbe erhan nii, ya sẹ ẹghẹ ota. 27 Ovẹn ghi dero nẹ, e Jọshua na we na viọ ikun iran tuorre vbe uhunmwu avbe erhan nii, na ya viọ iran ku uvun okuta ne iran te lẹre yi. Ẹre a na ghi werriẹ avbe okuta nikhua gue ehe na la la uvun okuta nii, iran wa ye rre evba do fi ẹdẹnẹrẹ.

28 Ẹdẹrriọ, ẹre Jọshua khọnmiotọ yan e Makida, ọ na ya umozo gbele emwa hia ni rrọọ rua. Ọ na gbe ọba ọghe Makida kevbe emwa* hia ni rre ẹvbo nii rua, ọ ma gi ọmwa rhọkpa vbe ẹvbo nii miẹn uhunmwu. Emwi nọ ru ọba e Jẹriko re, ẹre ọ vbe ru ọba ọghe Makida re.

29 Ẹre Jọshua kevbe ivbiyokuo ọghe Izrẹl hia na ke Makida gha rrie Libna, iran na ya gu iran khọn. 30 E Jehova na vbe mu e Libna kevbe ọba ọghẹe ye Ivbi Izrẹl obọ, iran keghi khọn rẹn mu otọ, iran na ya umozo gbele emwa* hia ni rrọọ rua, iran ma gi ọmwa rhọkpa miẹn uhunmwu vbọ. Emwi ne iran ru ọba e Jẹriko re, ẹre iran vbe ru ọba ọghe Libna re.

31 Iyeke ọni, e Jọshua kevbe ivbiyokuo ọghe Izrẹl hia na ke Libna gha rrie Lekish, iran na lẹga ẹre, iran na suẹn gha gu iran gbinna. 32 E Jehova keghi rhie Lekish ye Ivbi Izrẹl obọ, iran na khọnmiotọ yan rẹn vbe ikpẹdẹ nogie eva. Iran na ya umozo gbele emwa* hia ni rrọọ rua, vbene iran vbe ru e Libna.

33 Ẹre Horam ne ọba ọghe Giza na gha rrie Lekish, nọ ya ru iyobọ ne iran, sokpan, e Jọshua na gbe ẹre rua, ke irẹn ke ivbiyokuo ẹre hia, ọkpa ma vbe kẹ vbọ.

34 Ẹre Jọshua kevbe ivbiyokuo ọghe Izrẹl hia na ke Lekish gha rrie Ẹglọn, iran na lẹga ẹre, iran na suẹn gha gu iran gbinna. 35 Ẹdẹrriọ ẹre iran khọnmiotọ yan Ẹglọn, iran na ya umozo gbele emwa hia ni rrọọ rua. Vbe ẹdẹ ne ẹdẹrriọ, iran keghi gbele emwa* hia ni rre evba rua, vbene iran vbe ru e Lekish.

36 Iyeke ọni, e Jọshua kevbe ivbiyokuo ọghe Izrẹl hia keghi ke Ẹglọn gha rrie Hẹbrọn, iran na ya gu iran khọn. 37 Iran na khọn e Hẹbrọn mu otọ kevbe igue hia ni rrọọ, iran na ya umozo gbele emwa* hia ni rre ẹvbo nii rua, ya sẹ egbe ọba ọghe iran, iran ma gi ọmwa rhọkpa vbe ẹvbo nii miẹn uhunmwu. E Jọshua na fuẹn e Hẹbrọn rua, ọ na gbele emwa* hia ni rrọọ, zẹvbe nọ vbe ru Ẹglọn.

38 Vbe okiekie, e Jọshua kevbe ivbiyokuo ọghe Izrẹl hia na gha rrie Dibiẹ, iran na ya gu iran khọn. 39 Ọ na khọn e Dibiẹ mu otọ kevbe igue hia ni rrọọ, iran na ya umozo gbele emwa* hia ni rre ẹvbo nii rua, ya sẹ egbe ọba ọghe iran, iran ma gi ọmwa rhọkpa vbe ẹvbo nii miẹn uhunmwu. Emwi nọ ru e Hẹbrọn re, kevbe emwi nọ ru e Libna kevbe ọba ọghẹe re, ẹre ọ vbe ru e Dibiẹ kevbe ọba ọghẹe re.

40 E Jọshua na khọnmiotọ yan avbe ẹvbo ni rre ikinkin ne oke ye, ikinkin ọghe Nẹgẹb, ọghe Shẹfila, avbe ẹvbo ni rre ikinkin ne oke na haan, kevbe avbe ọba ọghe iran. Ọ ma sẹ ọmwa rhọkpa rae vbe avbe ẹvbo nii; ọ na fuẹn emwa hia* ni rre evba rua, zẹvbe ne Jehova ne Osa ọghe Izrẹl khare. 41 E Jọshua na khọn iran mu otọ, ke Kedẹsh-bania ya sẹ e Gaza kevbe otọ e Goshẹn hia, ya sẹ e Gibiọn. 42 Ẹghẹ ọkpa, ẹre Jọshua ya khọnmiotọ yan avbe ọba na kevbe otọ iran, rhunmwuda, e Jehova ne Osa ọghe Izrẹl ẹre ọ ghaa gbinna ne Ivbi Izrẹl. 43 Ẹre Jọshua kevbe ivbiyokuo ọghe Izrẹl hia, na ghi werriegbe gha rrie agọ vbe Gilgal.

11 E Jebin ne ọba ọghe Hezọr ghi wa họn emwi nọ sunu na, ọ na gie uhunmwu gie Jobab ne ọba ọghe Medọn, ọ na vbe gie uhunmwu gie ọba ọghe Shimrọn, ọba ọghe Akshaf, 2 avbe ọba ni rre ikinkin ne oke ye vbe odẹ okuọ,* iran ni rre otọ nọ rriẹ* vbe odẹ ahọ* ọghe Kinẹrẹt, iran ni rre ikinkin ọghe Shẹfila, kevbe iran ni rre ehe ne oke na haan vbe Dọ, vbe odẹ orrie,* 3 Ivbi e Kenan ni rre odẹ ekẹn* kevbe odẹ orrie,* Ivbi Amọri, Ivbi e Hẹt, Ivbi e Pẹriz, Ivbi e Jibọs ni rre ikinkin ne oke ye, kevbe Ivbi e Hivi ni rre ẹzi Oke Hẹmọn vbe otọ e Mizpa. 4 Ẹre iran na viọ ivbiyokuo hia ne iran mwẹ ladian, iran wa bun ẹsẹse, te iran yevbe ikpekhae ni rre ọkpẹn okun, iran na vbe viọ ẹsin kevbe ikẹkẹ okuo ni bun. 5 Avbe ọba na na wẹẹ iran gha miẹn egbe vbe ihe ọkpa, ẹre iran hia na gha die ehe ne amẹ na lẹẹ ladian vbe ọkpẹn e Mẹrọm, iran na bu agọ ye evba, ne iran mieke na gu Ivbi Izrẹl khọn.

6 Ẹre Jehova na tama e Jọshua wẹẹ: “Ghẹ gi ohan iran muẹn, rhunmwuda, vbe odẹ ẹghẹ na vbe akhuẹ, I gha viọ iran hia ye uwa obọ, ne uwa gbele iran rua. Wa ghi ya ẹsin ọghe iran khian nẹi ghi sẹtin khian, wa ghi vbe giẹn ikẹkẹ okuo ọghe iran rua.” 7 E Jọshua kevbe ivbiyokuo ọghe Izrẹl hia keghi mu igbinna gie iran, vbe ẹghẹ ne iran ma ya aro yi, vbe ehe ne amẹ na lẹẹ ladian vbe ọkpẹn e Mẹrọm. 8 E Jehova keghi viọ iran ye Ivbi Izrẹl obọ, Ivbi Izrẹl na khọnmiotọ yan iran, Ivbi Izrẹl na vbe khu iran ya sẹ e Saidọn Ne Okpẹvbo kevbe Misrefọt-meim kẹ kevbe Iya ọghe Mizpa vbe odẹ ekẹn,* Ivbi Izrẹl na gha gbele iran khian, a ghi te miẹn wẹẹ erhọkpa ma ghi kẹ. 9 E Jọshua keghi ru iran emwi hia ne Jehova tama rẹn nọ ru iran re; ọ na ya ẹsin ọghe iran khian nẹi ghi sẹtin khian, ọ na vbe giẹn ikẹkẹ okuo ọghe iran rua.

10 E Jọshua keghi werriegbe, ọ na ya khọnmiotọ yan e Hezọr, ọ na ya umozo gbe ọba ọghe Hezọr rua, rhunmwuda, e Hezọr ẹre ọ ka gha re ọkaolotu ọghe avbe arriọba na. 11 Iran keghi ya umozo gbele emwa* hia ni rre ẹvbo nii, iran na fuẹn iran hia rua. Iran ma gi ọmwa rhọkpa vbe ẹvbo nii miẹn uhunmwu. Ẹre iran na ghi giẹn e Hezọr sẹ otọ. 12 E Jọshua keghi khọnmiotọ yan avbe ẹvbo ne avbe ọba na kha yan, ọ na ya umozo gbele avbe ọba na rua. Ọ na fuẹn iran rua, zẹvbe ne Mozis ne ọguọmwadia e Jehova khare. 13 Vbọrhirhighayehẹ, Ivbi Izrẹl ma giẹn ẹvbo rhọkpa nọ ghaa rre otọ nọ yo, vbọ gberra e Hezọr; e Hezọr ọkpa, ẹre Jọshua giẹn rẹn. 14 Ivbi Izrẹl keghi viọ emwirri kevbe emwi nikẹre ni rre ẹvbo nii. Sokpan, iran na ya umozo gbele emwa hia ni ghaa rrọọ, a ghi te miẹn wẹẹ, ọmwa rhọkpa ma ghi kẹ vbọ. Iran ma gi ọmwa rhọkpa vbe ẹvbo nii miẹn uhunmwu. 15 Emwi hia ne Jehova tama e Mozis ne ọguọmwadia ẹre, ẹre Mozis tama e Jọshua, e Jọshua keghi ru vberriọ zẹẹ. Ọ keghi ru emwi hia ne Jehova tama e Mozis, ọ ma sẹ ọkpa rae vbọ.

16 E Jọshua keghi khọn ẹvbo na hia mu otọ, ọni ọre ikinkin ne oke ye, ikinkin ọghe Nẹgẹb, otọ e Goshẹn hia, ikinkin e Shẹfila, ikinkin ọghe Araba, ikinkin ne oke ye vbe otọ Izrẹl kevbe Shẹfila* ni rrọọ, 17 ke Oke Helak nọ rre ọkpẹn e Siyẹ, ya sẹ e Bel-gad vbe Iya ọghe Lẹbanọn, vbe ẹzi Oke Hẹmọn, ọ keghi khọnmiotọ yan avbe ọba ọghe iran, ọ na gbele iran rua. 18 E Jọshua keghi gu avbe ọba na khọn okuo la ẹghẹ nọ taẹn vbe otọ. 19 A ma miẹn ẹvbo ọkpa nọ gu Ivbi Izrẹl ta ile ọghe ọfunmwegbe, vbọ gberra Ivbi e Hivi ni ghaa rre Gibiọn. Ivbi Izrẹl keghi gu avbe ẹvbo nikẹre khọn okuo, iran na khọnmiotọ yan iran. 20 E Jehova keghi sẹ iran rae ne iran rri vbe ekhọe, ne iran gha gu Ivbi Izrẹl khọn okuo, ne irẹn mieke na fuẹn iran rua vbe nẹi na tohan iran. Te ọ khẹke na wabọ iran rua, zẹvbe ne Jehova tama e Mozis.

21 Vbe ẹghẹ na kha na, e Jọshua keghi wabọ Ivbi Enak* rua vbe ikinkin ne oke ye, vbe Hẹbrọn, e Dibiẹ, Enab, ikinkin hia ne oke ye vbe Juda kevbe ikinkin hia ne oke ye vbe Izrẹl. E Jọshua keghi fuẹn iran kevbe ẹvbo iran rua. 22 Ivbi Enak* rhọkpa ma ghi kẹ vbe otọ Izrẹl; e Gaza, e Gat, kevbe Ashdọd ọkpa ẹre iran ghi gha ye. 23 E Jọshua keghi khọnmiotọ yan otọ nii hia, zẹvbe ne Jehova tama e Mozis. E Jọshua keghi mu avbe otọ na ne Ivbi Izrẹl, nọ gha re ukhu ọghe iran. Ọ na ghae ẹre ne dọmwadẹ uniẹn, zẹvbe nọ khẹke iran. A ma ghi gha khọn okuo vbe ẹvbo nii.

12 Ena ọre ọba ọghe avbe ẹvbo ne Ivbi Izrẹl khọnmiotọ yan, ne iran vbe miẹn ẹre otọ vbe odẹ ekẹn* ọghe Jọdan, ke Iya ọghe Anọn ya sẹ Oke Hẹmọn kevbe ikinkin ọghe Araba hia vbe odẹ ekẹn:* 2 E Saihọn ne ọba ọghe Ivbi Amọri nọ ghaa rre Hẹshbọn. Irẹn ẹre ọ ghaa khaevbisẹ yan Aroa, nọ ghaa rre okhiẹ ọghe Iya ọghe Anọn. Ke adesẹneva Iya ọghe Anọn, ya sẹ Iya ọghe Jebọk kevbe ikinkin nii hia, kegha re ọghẹe. A gha ghae otọ e Giliẹd ye ihe eva, irẹn ẹre ọ ghaa khaevbisẹ yan obọ ọkpa vbọ. Iya ọghe Jebọk ọre ehe ne otọ ọghe Ivbi Amọn lae. 3 Irẹn ẹre ọ vbe gha kha yan ikinkin ọghe Araba; ke Okun ọghe Kinẹrẹt* ya sẹ Okun ọghe Araba, nọ re Okun Umwẹ,* ya sẹ odẹ ekẹn* vbe ehe ne Bẹt-jẹshimọt ye, ke evba kpa gha rrie odẹ ahọ,* vbe ehe ne oke na haan vbe Pisga.

4 Iran vbe khọn e Ọg ne ọba ọghe Beshan miẹn ẹre otọ. Ọkpa vbe usun Ivbi e Rẹfeim ni ghi kẹ, ẹre Ọg ghaa khin. Ashtarọt kevbe Ẹdriai ẹre ọ ghaa ye, 5 irẹn ẹre ọ ghaa khaevbisẹ yan ikinkin ne Oke Hẹmọn ye, kevbe Salẹk, kevbe otọ e Beshan hia, ya sẹ eke ne uwu ọghe Ivbi e Gẹshọ kevbe Me-akat lae, kevbe obọ ọkpa vbe otọ e Giliẹd vbe a gha ghae ẹre ye ihe eva, ya sẹ eke ne otọ e Saihọn ne ọba ọghe Hẹshbọn lae.

6 E Mozis ne ọguọmwadia e Jehova kevbe Ivbi Izrẹl hia keghi khọnmiotọ yan iran, iyeke ọni, e Mozis ne ọguọmwadia e Jehova keghi mu otọ iran ne Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ, nọ gha re ọghe iran.

7 Ena ọre ọba ọghe avbe ẹvbo ne Jọshua kevbe Ivbi Izrẹl khọnmiotọ yan vbe odẹ orrie* ọghe Jọdan, ke Bel-gad vbe Iya ọghe Lẹbanọn, ya sẹ Oke Helak, nọ rre ọkpẹn e Siyẹ. Iyeke ọni, e Jọshua keghi mu otọ iran ne uniẹn ọghe Izrẹl, zẹvbe nọ khẹke dọmwadẹ uniẹn. 8 Avbe otọ na kegha rre ikinkin ne oke ye, ikinkin ọghe Shẹfila, ikinkin ọghe Araba, avbe ehe ne oke na haan, uwu ato, ikinkin ọghe Nẹgẹb, ọni ọre otọ ọghe Ivbi e Hẹt, Ivbi Amọri, Ivbi e Kenan, Ivbi e Pẹriz, Ivbi e Hivi kevbe Ivbi e Jibọs. Ena ọre avbe ọba ne Ivbi Izrẹl khọnmiotọ yan:

13 Nian, e Jọshua khian ọmaẹn nẹ, te ọ ghi bu ẹghẹ nọ khian ya wu. Ẹre Jehova na ghi tama rẹn wẹẹ: “U khian ọmaẹn nẹ; sokpan, otọ ne uwa ma he khọnmiotọ yan wa ye bun. 2 Ena ọre otọ ni ghi kẹ: ikinkin ọghe Ivbi e Filistia hia, kevbe ọghe Ivbi e Gẹshọ 3 (ke abọ ọghe Ẹzẹ e Nail* nọ rre odẹ ekẹn* ọghe Igipt, ya sẹ uwu ọghe Ẹkrọn vbe odẹ okuọ,* na te ka ba ikinkin ọghe Ivbi e Kenan) deba ikinkin ọghe avbe ọkaolotu isẹn ọghe Ivbi e Filistia, ọni ọre otọ ọghe Ivbi e Gaza, Ivbi Ashdọd, Ivbi Ashkẹlọn, Ivbi e Gat, kevbe Ivbi Ẹkrọn; otọ ọghe avbe Avim 4 gha rrie odẹ ahọ;* otọ e Kenan hia; e Mẹ-ara, nọ re ọghe Ivbi e Saidọn, gha rrie Efẹk, ya sẹ uwu ọghe Ivbi Amọri; 5 otọ Ivbi e Gibal kevbe otọ e Lẹbanọn hia gha rrie odẹ ekẹn,* ke Bel-gad vbe ẹzi Oke Hẹmọn gha rrie Libo-hemat;* 6 ikinkin hia ne oke ye, ke Lẹbanọn gha rrie Misrefọt-meim; kevbe otọ hia ne Ivbi e Saidọn ye. I gha khulo iran hia ladian* sirra Ivbi Izrẹl. Emwi ne u gha ru, ọre ne u mu avbe otọ na ne Ivbi Izrẹl, nọ gha re ukhu ọghe iran, zẹvbe ne I ka tama ruẹ. 7 Nian, u ghi ghae otọ na ne uniẹn ihinrin ọghe Izrẹl, kevbe obọ ọkpa vbe uniẹn e Manasẹ, nọ gha re ukhu ọghe iran.”

8 Obọ nọkẹre vbe uniẹn e Manasẹ, Ivbi e Rubẹn, kevbe Ivbi e Gad keghi mu otọ* ne Mozis ne ọguọmwadia e Jehova mu ne iran, vbe odẹ ekẹn* ọghe Jọdan: 9 otọ na keghi ke Aroa kpa, nọ rre okhiẹ ọghe Iya ọghe Anọn, kevbe ẹvbo nọ rre adesẹneva ọghe nene iya, otọ nọ rriẹ hia ni rre ehe nọ yo vbe ọkpẹn e Mẹdiba, ya sẹ e Daibọn; 10 kevbe avbe ẹvbo ọghe Saihọn ne ọba ọghe Ivbi Amọri, nọ ghaa khaevbisẹ vbe Hẹshbọn, ya sẹ ehe ne uwu ọghe Ivbi Amọn lae; 11 kevbe otọ e Giliẹd kevbe ikinkin ọghe Ivbi e Gẹshọ kevbe ọghe Ivbi e Me-akat, kevbe Oke Hẹmọn hia kevbe otọ e Beshan hia, ya sẹ e Salẹka; 12 otọ hia ne Ọg ne ọba ọghe Beshan kha yan. Ashtarọt kevbe Ẹdriai ẹre Ọg ghaa ye. (Ọkpa vbe usun Ivbi e Rẹfeim ni ghi kẹ, ẹre irẹn ghaa khin.) E Mozis keghi khọnmiotọ yan iran, ọ na khulo iran kua.* 13 Sokpan, Ivbi Izrẹl ma khulo Ivbi e Gẹshọ kevbe Ivbi e Me-akat ladian,* Ivbi e Gẹshọ kevbe Ivbi e Me-akat ye rre uwu ẹbu Ivbi Izrẹl do fi ẹdẹnẹrẹ.

14 Uniẹn ọghe Livai ọkpa, ẹre ọ ma ghae ukhu na. Avbe ese na giẹn rẹn, na zọ gie Jehova ne Osa ọghe Izrẹl, ẹre ọ ghaa re ukhu ọghe iran, zẹvbe nọ ka yan ma iran.

15 Iyeke ọni, e Mozis keghi ghae ukhu ne dọmwadẹ ẹgbẹe ni rre uniẹn ọghe Rubẹn, 16 otọ ọghe iran keghi ke Aroa kpa, nọ rre okhiẹ ọghe Iya ọghe Anọn, kevbe ẹvbo nọ rre adesẹneva ọghe nene iya, kevbe otọ nọ rriẹ hia ni rre ehe nọ yo vbe ọkpẹn e Mẹdiba; 17 e Hẹshbọn kevbe igue hia ni rre uwu ẹre, ni rre otọ nọ rriẹ vbe ehe nọ yo, e Daibọn, Bemọt-bel, Bẹt-bel-mi-ọn, 18 Jehaz, Kẹdẹmọt, Mẹfa-at, 19 Kiriateim, Sibma, kevbe Zirẹt-sheha nọ rre oke nọ rre ọkpẹn iya,* 20 Bẹt-piyọ, ehe ne oke na haan vbe Pisga, Bẹt-jẹshimọt, 21 avbe ẹvbo ni rre otọ nọ yo, kevbe otọ hia ne Saihọn ne ọba ọghe Ivbi Amọri khaevbisẹ yan. E Hẹshbọn, ẹre ọ ke gha khaevbisẹ. E Mozis keghi khọnmiotọ yan rẹn, kevbe avbe ọkaolotu ọghe Ivbi e Midian. Avbe ọkaolotu na ọre Ivai, Rikẹm, Zọọ, Họ, kevbe Riba. Ikinkin nii, ẹre iran ghaa ye. Ototọ e Saihọn ẹre iran vbe gha ye. 22 E Belam ne ovbi e Biọ, nọ miẹn aro, ghaa rre usun emwa ne Ivbi Izrẹl ya umozo gbele. 23 E Jọdan ẹre uwu ọghe Ivbi e Rubẹn lae; ikinkin na, ẹre ọ ghaa re ukhu ọghe dọmwadẹ ẹgbẹe vbe uniẹn e Rubẹn, deba avbe ẹvbo kevbe igue ni rre uwu ẹre.

24 Deba ọni, e Mozis keghi ghae ukhu ne dọmwadẹ ẹgbẹe ni rre uniẹn ọghe Gad, 25 ikinkin ọghe iran ẹre otọ e Jeza ghaa ye, kevbe otọ hia ni rre Giliẹd, kevbe obọ ọkpa vbe a gha ghae otọ ọghe Ivbi Amọn ye ihe eva, ya sẹ Aroa, nọ mu aro daa e Raba; 26 ke Hẹshbọn gha rrie Remat-mizpa kevbe Bẹtonim; ke Mehaneim gha rrie uwu ọghe Dibiẹ; 27 kevbe avbe ẹvbo ni rre uwu iya,* ọni ọre Bẹt-heran, Bẹt-nimra, Sọkọt, kevbe Zefọn, ni re ẹvbo nikẹre ni rre ikinkin ne Saihọn ne ọba ọghe Hẹshbọn khaevbisẹ yan, uwu ọghe iran keghi ke odẹ ekẹn* ọghe Jọdan gha rrie okhiẹ ọghe Okun e Kinẹrẹt* vbe odẹ ahọ.* 28 Ena ẹre ọ ghaa re ukhu na ghae ne dọmwadẹ ẹgbẹe ni rre uniẹn ọghe Gad, deba avbe ẹvbo kevbe igue ni rre uwu ẹre.

29 Deba ọni, e Mozis keghi mu avbe otọ na ne dọmwadẹ ẹgbẹe ni rre obọ ọkpa vbe uniẹn e Manasẹ, nọ gha re ukhu ọghe iran: 30 Mehaneim kevbe otọ e Beshan hia, otọ hia ne Ọg ne ọba ọghe Beshan kha yan, kevbe igue* hia ni rre Jeyẹ vbe Beshan, ẹvbo iyeha (60). 31 A keghi mu Ashtarọt kevbe Ẹdriai ni re ẹvbo ne Ọg ne ọba ọghe Beshan ghaa khaevbisẹ yan, kevbe obọ ọkpa vbe a gha ghae otọ e Giliẹd ye ihe eva, ne uniẹn ọghe Mekiẹ ne ovbi e Manasẹ, ọni ọre obọ ọkpa vbe a gha ghae dọmwadẹ ẹgbẹe ni ke uniẹn ọghe Mekiẹ rre ye ihe eva.

32 Ena ẹre ọ ghaa re ukhu ne Mozis ghae ne iran, vbe iran rre otọ nọ rriẹ nọ rre ato ọghe Moab, vbe odẹ ekẹn* ọghe Jọdan, vbe ọkpẹn e Jẹriko.

33 Sokpan, e Mozis ma ghae ukhu ne uniẹn e Livai, e Jehova ẹre ọ ghaa re ukhu ọghe iran, zẹvbe nọ ka yan ma iran.

14 Ọna ọre ukhu nọ sẹ Ivbi Izrẹl obọ vbe otọ e Kenan, ne Ẹlieza ne ohẹn, e Jọshua ne ovbi e Nọn, kevbe avbe ọkaẹgbẹe ni rre dọmwadẹ uniẹn ọghe Izrẹl mu ne iran, nọ gha re ukhu ọghe iran. 2 Uta ẹre a ya ghae ukhu na ne uniẹn ihinrin ọghe Izrẹl, kevbe obọ ọkpa vbe uniẹn e Manasẹ, zẹvbe ne Jehova tama e Mozis. 3 E Mozis ka ghae ukhu ne uniẹn ọghe Izrẹl eva ni ghi kẹ, kevbe obọ nọkẹre vbe uniẹn e Manasẹ nẹ. Odẹ ekẹn* ọghe Jọdan, ẹre otọ ọghe iran ghaa ye. Sokpan, ọ ma ghae ukhu ne uniẹn e Livai, vbene ọ ghae ne uniẹn nikẹre. 4 A kegha ghee Ivbi e Josẹf zẹvbe uniẹn eva, ọni ọre Manasẹ kevbe Ifrem; a ma mu otọ ne Ivbi e Livai zẹvbe ukhu ọghe iran. Sokpan, ẹvbo ne iran khian gha ye, otọ ne emwirri ọghe iran khian na gha rri irunmwu, kevbe ehe ne iran khian viọ emwi iran yi, ẹre a mu ne iran vbe otọ nii. 5 Ẹre Ivbi Izrẹl na ghi ghae nene otọ, zẹvbe ne Jehova tama e Mozis.

6 Ikpia eso vbe uniẹn e Juda keghi bu e Jọshua gha rrie Gilgal. E Kelẹb ne ovbi e Jẹfunẹ ne Ovbi e Kinaz keghi tama e Jọshua wẹẹ: “U rẹn emwi ne Jehova ne Osa ọghe ẹmwata tama e Mozis ne ọguọmwadia ẹre, vbekpa imẹ vbe ruẹ vbe Kedẹsh-bania. 7 Ukpo iyeva (40) ẹre I ghaa ye, vbe Mozis ne ọguọmwadia e Jehova ke Kedẹsh-bania gie mwẹ, ne I ya ba otọ e Kenan ghee. I ghi rre, I na do na iyẹn ẹmwata ma rẹn. 8 Agharhemiẹn wẹẹ, etẹn mwẹ ne ima gba gha khian, na iyẹn nọ ya ohan gha mu Ivbi Izrẹl, I na ye ya ekhọe hia họn ẹmwẹ ne Jehova ne Osanobua mwẹ. 9 Ẹdẹrriọ ẹre Mozis yan rẹn wẹẹ: ‘Te otọ hia ne u ya owẹ khian la, khian gha re ọghuẹ kevbe ọghe ivbuẹ ke ẹghẹ na kpa, rhunmwuda ne u na ya ekhọe hia họn ẹmwẹ ne Jehova ne Osanobua mwẹ.’ 10 Nian, e Jehova ẹre ọ zẹ ighẹ I ye rre agbọn zẹvbe nọ yan rẹn. Ukpo isẹn yan iyeva (45) ẹre ọ ghi ye na, ne Jehova ru eyan na ma e Mozis, vbe ẹghẹ ne Ivbi Izrẹl na gha rre uwu ato; nian, ukpo isẹn yan iyenẹ (85) ẹre I ghi ye. 11 I wa ye wegbe vbene I ghaa ye, vbe ẹdẹ ne Mozis gie mwẹ ne I ya ba otọ nii ghee. Vbene I ghaa mwẹ ẹtin vbe ẹghẹ nii, erriọ ẹre I wa ye mwẹ ẹtin nian. I gha ye sẹtin khọn okuo, I gha vbe sẹtin ru emwi ni bun ọvbehe. 12 Nọnaghiyerriọ, mu ikinkin na ne oke ye mẹ, zẹvbe ne Jehova yan rẹn vbe ẹghẹ nii. U họn vbe ẹghẹ nii wẹẹ, Ivbi Enak ghaa rre evba kevbe wẹẹ, ẹvbo na gbe ekẹn ga, ẹre iran ghaa ye. Sokpan, I rẹnrẹn wẹẹ* e Jehova gha mudia mẹ, I gha vbe khulo iran ladian zẹvbe ne Jehova yan rẹn.”

13 Ẹre Jọshua na ghi fiangbe Kelẹb ne ovbi e Jẹfunẹ, ọ na vbe mu e Hẹbrọn nẹẹn, nọ gha re ukhu ẹre. 14 Ọni ẹre ọ si ẹre ne Hẹbrọn na ghi do gha re ọghe Kelẹb ne ovbi e Jẹfunẹ ne Ovbi e Kinaz, ukhu ọghẹe ẹre ghi nọ do fi ẹdẹnẹrẹ, rhunmwuda nọ na ya ekhọe hia lele Jehova ne Osa ọghe Izrẹl. 15 E Kiriat-aba ẹre a ka gha tie Hẹbrọn (okpọmwa ẹre Aba ghaa khin vbe uwu ẹbu Ivbi Enak). Iyeke ọni, a ma ghi gha khọn okuo vbe ẹvbo nii.

15 Otọ na mu* ne dọmwadẹ ẹgbẹe vbe uniẹn e Juda keghi ke uwu ọghe Idọm kpa, ya sẹ ato ọghe Zin, kevbe ikinkin ọghe Nẹgẹb vbe odẹ ahọ.* 2 Eke ne Okun Umwẹ* sẹ, ẹre uwu ọghe iran nọ rre odẹ ahọ ke kpa, ọni ọre ọkpẹn okun vbe odẹ ahọ.* 3 Ọ na vbe ya sẹ odẹ ahọ* ọghe Akrabim vbe a ghaa gbe oke khian, ọ na ke evba gha rrie Zin, ọ na vbe ke odẹ ahọ* ọghe Kedẹsh-bania kpa gha rrie Hẹzrọn, ya sẹ Ada, ọ na ke evba gha rrie odẹ e Kaka. 4 Ọ na ke evba gha rrie Azmọn, ọ na vbe ya sẹ Iya* ọghe Igipt; Okun* ẹre uwu ọghe iran sẹ. Ọna ẹre ọ ghaa re uwu ọghe uniẹn e Juda, vbe odẹ ahọ.*

5 Uwu ọghe iran vbe odẹ ekẹn* keghi ke Okun Umwẹ* kpa, ya sẹ ehe ne ẹzẹ e Jọdan sẹ, vbene uwu ọghe iran nọ rre odẹ okuọ* na gha rre ọkpẹn okun, ọni ọre ehe ne ẹzẹ e Jọdan sẹ. 6 Uwu ọghe iran keghi ya sẹ e Bẹt-họgla, ọ na ke evba gha rrie odẹ okuọ* ọghe Bẹt-araba, ọ na vbe ke evba ya sẹ ehe ne okuta ọghe Bohan ne ovbi e Rubẹn ye. 7 Nene uwu na vbe ya sẹ e Dibiẹ vbe Iya* ọghe Ekọ, ọ na vbe ke evba gha rrie Gilgal vbe odẹ okuọ.* Odaro ehe na la, vbe a ghaa gbe oke rrie Adọmim, vbe odẹ okuọ* ọghe nene iya ẹre Gilgal ye. Ọ na vbe ke evba ya sẹ ehe ne amẹ na lẹẹ ladian vbe Ẹn-shimẹsh, ọ na ya fo vbe Ẹn-rogẹl. 8 Nene uwu keghi vbe ya sẹ Iya ọghe Ovbi e Hinọm, ọ na ke evba gha rrie ehe ne oke na haan vbe ẹvbo ọghe Ivbi e Jibọs vbe odẹ ahọ,* ọni ọre Jerusalẹm. Ọ na vbe ya sẹ uhunmwu oke nọ mu aro daa Iya ọghe Hinọm vbe odẹ orrie,* ya sẹ ehe ne Iya* ọghe Rẹfeim sẹ vbe odẹ okuọ.* 9 A na vin uwu nii, ke uhunmwu oke gha rrie ehe ne amẹ na lẹẹ ladian vbe Nẹftoa, ya sẹ avbe ẹvbo ni rre Oke ọghe Ifrọn; uwu nii keghi ya sẹ e Be-ala, ọni ọre Kiriat-jiẹrim. 10 Nene uwu keghi ke Be-ala vbe odẹ orrie,* gha rrie Oke Siyẹ, ọ na ke evba ya sẹ okhiẹ ọghe Oke Ji-arim vbe odẹ okuọ,* ọni ọre Kẹsalọn, ọ na vbe ke evba gha rrie Bẹt-shimẹsh; ke evba kpa, ọ na vbe gha rrie Timnah. 11 Uwu nii keghi vbe la eke ne oke na haan vbe Ẹkrọn vbe odẹ okuọ,* a na vbe vin uwu nii ya sẹ e Shikẹrọn, ọ na ke evba gha rrie Oke Be-ala, ọ na vbe ke evba gha rrie Jabniẹl; okun ẹre nene uwu sẹ.

12 Okhiẹ ọghe Okun Nọkhua,* ẹre uwu nii lae vbe odẹ orrie.* Ọna ọre uwu ọghe ehe ne otọ ọghe dọmwadẹ ẹgbẹe vbe uniẹn e Juda lae.

13 E Jọshua keghi mu otọ ne Kelẹb ne ovbi e Jẹfunẹ, vbe ikinkin ọghe uniẹn e Juda, zẹvbe ne Jehova tama e Jọshua. Otọ nọ mu nẹẹn ọre Kiriat-aba (Aba ẹre ọ ghaa re erha Enak), ọni ọre, Hẹbrọn. 14 Ẹre Kelẹb na ghi khulo emwa ni ke uniẹn ọghe ivbi e Enak eha hin evba rre, ọni ọre Shishai, Ahaiman, kevbe Talmai. 15 Ẹre ọ na ke evba gha rrie Dibiẹ, ọ na ya gu emwa ni rre evba khọn. (E Kiriat-sifa ẹre a ka gha tie Dibiẹ.) 16 E Kelẹb keghi kha wẹẹ: “Ọmwaikọmwa nọ sẹtin mu okuo gha rrie Kiriat-sifa, ọ na vbe khọn rẹn mu otọ, I gha rhie Aksa ne ovbi mwẹ nokhuo nẹẹn, nọ gha re ọvbokhan rẹn.” 17 Ọtniẹl ne ovbi e Kinaz ne ọtiẹn e Kelẹb keghi khọn ẹvbo nii mu otọ. Ẹre Kelẹb na rhie Aksa ne ovbi ẹre nokhuo nẹẹn, nọ gha re ọvbokhan rẹn. 18 Aksa ghi rrie owa, ọ na gha kpikpi ọdafẹn ọnrẹn nọ tama erha irẹn nọ mu otọ nẹẹn. Ẹre Aksa na tuorre vbe ekẹtẹkẹtẹ.* Erhae na ghi nọ rẹn wẹẹ: “Vbua hoo ne I ru nuẹn?” 19 Ẹre Aksa na wẹẹ: “Lahọ mu otọ ọvbehe mẹ. Rhunmwuda, odẹ ahọ* ẹre u na ka mu otọ mẹ; vbe mu e Gọlọt-meim* mẹ.” Ẹre ọ na mu e Gọlọt Nọ Ke Odukhunmwu kevbe Gọlọt Nọ Kotọ nẹẹn.

20 Ena ọre ukhu ọghe dọmwadẹ ẹgbẹe vbe uniẹn e Juda.

21 Avbe ẹvbo ni ghi do khian ọghe uniẹn e Juda vbe odẹ ahọ,* vbe ọkpẹn eke ne uwu ọghe Idọm lae kegha re: E Kabziẹl, Ida, e Jegọ, 22 e Kaina, e Daimona, Adeda, 23 e Kidẹsh, e Hezọr, Itnan, 24 e Zif, e Tilẹm, e Bi-elọt, 25 e Hezọr-hadata, kevbe Kiriọt-hẹzrọn, ọni ọre, Hezọr, 26 Emam, e Shima, e Moleda, 27 e Heza-gada, e Hẹshmọn, e Bẹt-pẹlẹt, 28 e Heza-shual, e Biẹ-shiba, e Biziotaia, 29 e Be-ala, Aiẹm, Izẹm, 30 Ẹltolad, e Kisol, e Họma, 31 e Ziklag, e Madmana, e Sansana, 32 e Lebeọt, e Shilhim, Ein, kevbe Rimọn; avbe ẹvbo na kegha re ọkpa i rrọọ vbe ọgban (29), iran vbe gha mwẹ igue ọghe iran.

33 Avbe ẹvbo ni ghaa rre ikinkin ọghe Shẹfila ẹre na khin: Ẹshtaọl, e Zora, Ashna, 34 e Zanoa, Ẹn-genim, e Tapua, Inam, 35 e Jamọt, Adọlam, e Sokoh, Azika, 36 e She-areim, Aditeim, kẹ kevbe Gẹdira kevbe Gẹdiroteim;* ehia kegha re ẹvbo iwenẹ (14) kevbe avbe igue ni rrọọ.

37 E Zinan, e Hadasha, e Migdal-gad, 38 e Dailian, e Mizpa, e Jọkti-ẹl, 39 e Lekish, e Bọzka, Ẹglọn, 40 e Kabọn, e Lamam, e Kitlish, 41 e Gẹdirọt, e Bẹt-degọn, e Ne-ama, kevbe Makida; ehia kegha re ẹvbo enẹ i rrọọ vbe ugie (16) kevbe avbe igue ni rrọọ.

42 E Libna, Ita, Eshan, 43 Ifta, Ashna, e Nizib, 44 e Kaila, Akzib, kevbe Marishah; ehia kegha re ẹvbo ihinrin kevbe avbe igue ni rrọọ.

45 Ẹkrọn kevbe avbe ẹvbo ni lẹga ẹre kevbe avbe igue ni rrọọ; 46 ke Ẹkrọn gha rrie odẹ orrie,* avbe otọ hia ni rre ọkpẹn Ashdọd kevbe avbe igue ni rrọọ.

47 Ashdọd, avbe ẹvbo ni lẹga ẹre kevbe avbe igue ni rrọọ; e Gaza, avbe otọ ni lẹga ẹre kevbe avbe igue ni rrọọ, ya sẹ Iya ọghe Igipt, Okun Nọkhua,* kevbe ikinkin ni rre ọkpẹn ọnrẹn.

48 Avbe ẹvbo ni rre ikinkin ne oke ye kegha re Shemiẹ, e Jatiẹ, e Sokoh, 49 e Dana, e Kiriat-sana, ọni ọre Dibiẹ, 50 Enab, Ẹshtimọ, Enim, 51 e Goshẹn, e Holọn, kevbe Gailo; ehia kegha re ẹvbo owọrọ (11) kevbe avbe igue ni rrọọ.

52 Arab, e Duma, Ishan, 53 e Jenim, e Bẹt-tapua, Afika, 54 e Họmta, e Kiriat-aba, ọni ọre Hẹbrọn, kevbe Zaiọ; ehia kegha re ẹvbo ihinrin kevbe avbe igue ni rrọọ.

55 E Meọn, e Kamẹl, e Zif, e Jọta, 56 e Jẹzriẹl, e Jọkdi-am, e Zanoa, 57 e Ke-in, e Gibia, kevbe Timnah; ehia kegha re ẹvbo igbe kevbe avbe igue ni rrọọ.

58 E Halhọl, e Bẹt-zọ, e Gidọ, 59 e Me-arat, e Bẹt-enọt, kevbe Ẹltikọn; ehia kegha re ẹvbo ehan kevbe avbe igue ni rrọọ.

60 E Kiriat-bel, ọni ọre Kiriat-jiẹrim, kevbe Raba; ehia kegha re ẹvbo eva kevbe avbe igue ni rrọọ.

61 Avbe ẹvbo ni ghaa rre uwu ato ọre Bẹt-araba, e Midin, e Sekeka, 62 e Nibshan, Ẹvbo Umwẹ kevbe Ẹn-gẹdi; ehia kegha re ẹvbo ehan kevbe avbe igue ni rrọọ.

63 Ikpia ni rre Juda ma sẹtin khulo Ivbi e Jibọs ni ghaa rre Jerusalẹm ladian. Rhunmwuda ọni, Ivbi e Juda kevbe Ivbi e Jibọs, ẹre ọ ghi gba rre Jerusalẹm do fi ẹdẹnẹrẹ.

16 Otọ nọ ghi sẹ uniẹn e Josẹf obọ vbe a ghi yan uta yọ nẹ, keghi ke Ẹzẹ e Jọdan vbe ọkpẹn e Jẹriko kpa, gha rrie ehe ne amẹ na lẹẹ ladian vbe odẹ ekẹn* vbe Jẹriko, ọ na ke evba la uwu ato nọ rre odaro e Jẹriko, ọ na ya ladian vbe ikinkin ne oke ye vbe ọkpẹn e Bẹtẹl. 2 Ọ keghi ke Bẹtẹl nọ rre ọkpẹn e Lọz, ya sẹ Atarọt, nọ re uwu ọghe Ivbi Aki, 3 ọ na ke evba gha rrie uwu ọghe Ivbi e Jaflẹt vbe odẹ orrie,* ọ na vbe ke evba ya sẹ uwu ọghe Bẹt-horọn Nọ Ke Otọ kevbe Giza; okun ẹre nene uwu sẹ.

4 E Manasẹ kevbe Ifrem ne ivbi e Josẹf, na ghi mu otọ na ghae ne iran. 5 Uwu ọghe dọmwadẹ ẹgbẹe ni rre uniẹn ọghe Ifrem, ẹre na khin: Uwu ọghe otọ ọghe iran vbe odẹ ekẹn* kegha re Atarọt-ada, ọ na ya sẹ e Bẹt-horọn Nọ Rre Odukhunmwu, 6 nene uwu keghi ya sẹ okun. E Mikmitat kegha rre odẹ okuọ,* nene uwu keghi ya sẹ e Te-anak-shailo vbe odẹ ekẹn,* ọ na ke evba gha rrie odẹ ekẹn* ọghe Jenoa. 7 Ọ na vbe ke Jenoa gha rrie Atarọt kevbe Ne-ara, ọ na ya sẹ e Jẹriko, ọ na vbe ke evba gha rrie Jọdan. 8 Nene uwu keghi ke Tapua gha rrie Iya* ọghe Kenah vbe odẹ orrie,* okun ẹre nene uwu sẹ. Ọna ọre ukhu ọghe dọmwadẹ ẹgbẹe vbe uniẹn ọghe Ifrem; 9 a vbe mu ẹvbo eso kevbe avbe igue ni rrọọ ne uniẹn ọghe Ifrem, vbe eke ne ukhu ọghe uniẹn e Manasẹ ye.

10 Sokpan, iran ma khulo Ivbi e Kenan ni ghaa rre Giza ladian, Ivbi e Kenan wa ye rre uwu ẹbu Ivbi Ifrem do fi ẹdẹnẹrẹ. Iwinna nọ wegbe, ẹre iran ghi ya Ivbi e Kenan ru.

17 A ghi yan uta yọ, a na mu otọ ọghe uniẹn e Manasẹ ne iran, rhunmwuda, e Manasẹ ẹre ọ ghaa re ovbi e Josẹf nọdiọn. E Mekiẹ ẹre ọ ghaa re ovbi e Manasẹ nọdiọn, irẹn ẹre ọ vbe gha re erha e Giliẹd; ugbẹnvbe a miẹn wẹẹ, ovbiyokuo ghaa nọ, otọ e Giliẹd kevbe Beshan keghi sẹ ọre obọ. 2 A na vbe ghae otọ ne dọmwadẹ ẹgbẹe ni ghaa rre obọ nọkẹre vbe uniẹn e Manasẹ, ọni ọre, ivbi Abi-iza, ivbi e Hilẹk, ivbi Asriẹl, ivbi e Shikẹm, ivbi e Hifa, kevbe ivbi e Shimaida. Ena ẹre ọ ghaa re ivbi e Manasẹ ne ovbi e Josẹf, ọni ọre ivbi e Manasẹ nikpia kevbe ẹgbẹe ọghe iran. 3 Sokpan, e Zẹlofẹhad ne ovbi e Hifa, ne ovbi e Giliẹd, ne ovbi e Mekiẹ, ne ovbi e Manasẹ, ma gha mwẹ emọ ikpia rhọkpa, emọ ikhuo ọkpa ẹre ọ ghaa mwẹ. Eni ivbi ẹre nikhuo ọre Mala, Noa, Họgla, Milka, kevbe Tiẹza. 4 Ẹre iran na bu Ẹlieza ne ohẹn, e Jọshua ne ovbi e Nọn kevbe avbe ọkaolotu, iran na wẹẹ: “E Jehova ẹre ọ tama e Mozis nọ ghae ukhu ne ima, vbene a vbe ghae ukhu ne etiẹn erha ima nikpia.” Ẹre ọ na ghi ghae ukhu ne iran, vbene a vbe ghae ne etiẹn erha iran nikpia, zẹvbe ne Jehova khare.

5 Vbọ gberra otọ e Giliẹd kevbe Beshan, ni ghaa rre obọ nọkpa* ọghe Jọdan, a vbe mu otọ igbe ọvbehe ne Manasẹ, 6 rhunmwuda, vbene a ghae otọ ne ikpia ni rre uniẹn e Manasẹ, erriọ ẹre a vbe ghae otọ ne ikhuo ni rre uniẹn e Manasẹ, otọ e Giliẹd na ghi do gha re ọghe ivbi e Manasẹ nikẹre.

7 Uwu ọghe Manasẹ keghi ke Asha ya sẹ e Mikmitat, nọ mu aro daa e Shikẹm. Nene uwu na vbe ke odẹ ahọ,* ya sẹ otọ ne ivbi Ẹn-Tapua ghaa ye. 8 Otọ e Tapua keghi do gha re ọghe Manasẹ, sokpan, e Tapua nọ rre uwu ọghe Manasẹ kegha re ọghe uniẹn ọghe Ifrem. 9 Uwu nii keghi ya sẹ Iya* ọghe Kenah, vbe odẹ ahọ* ọghe nene iya. Ẹvbo Ifrem eso vbe gha rre eke ne avbe ẹvbo ọghe Manasẹ ghaa ye. Uwu ọghe Manasẹ kegha rre odẹ okuọ* ọghe nene iya; okun ẹre ọ sẹ. 10 Otọ nọ rre odẹ ahọ* kegha re ọghe Ifrem, vbene otọ nọ rre odẹ okuọ* na gha re ọghe Manasẹ; okun ẹre uwu ọghe Manasẹ lae. Ọ* keghi ya sẹ ikinkin ọghe Asha vbe odẹ okuọ,* ọ na vbe ya sẹ ikinkin ọghe Isaka vbe odẹ ekẹn.*

11 Vbe ikinkin ọghe Isaka kevbe Asha, a na mu otọ e Bẹt-shi-an kevbe avbe ẹvbo ni lẹga ẹre ne Manasẹ, deba Ibli-am kevbe avbe ẹvbo ni lẹga ẹre, emwa ni rre Dọ kevbe avbe ẹvbo ni lẹga ẹre, emwa ni rre Ẹn-dọ kevbe avbe ẹvbo ni lẹga ẹre, emwa ni rre Te-anak kevbe avbe ẹvbo ni lẹga ẹre, kevbe emwa ni rre Mẹgido kevbe avbe ẹvbo ni lẹga ẹre. Ẹvbo eha na ni rre oke* kegha re ọghe Manasẹ.

12 Sokpan, uniẹn e Manasẹ ma sẹtin khulo emwa ni rre avbe ẹvbo na ladian; Ivbi e Kenan keghi ze vbe udu, iran ma kpa hin otọ nii rre. 13 Ivbi Izrẹl ghi wegbe sẹ vbene iran ka ye, iran na suẹn gha ya Ivbi e Kenan ru iwinna nọ wegbe. Sokpan, Ivbi Izrẹl ma khulo Ivbi e Kenan hia kua.

14 Ivbi e Josẹf keghi tama e Jọshua wẹẹ: “Vbọzẹ ne u na mu otọ ne kherhe na ne ima?* Ma wa bun ẹsẹse, rhunmwuda, te Jehova wa fiangbe ima.” 15 E Jọshua keghi wanniẹn iran wẹẹ: “Deghẹ uwa gele bun, wa gha rrie ẹgbo ọghe Ivbi e Pẹriz kevbe Rẹfeim, wa ghi fie ẹre, ne uwa gha rre evba, ugbẹnvbe a miẹn wẹẹ, avbe ikinkin ne oke ye vbe Ifrem ma ghi gua uwa.” 16 Ẹre ivbi e Josẹf na wẹẹ: Ikinkin ne oke ye kherhe ne ima gbe, Ivbi e Kenan hia ni rre otọ nọ yevbe iya,* mwẹ ikẹkẹ okuo nọ mwẹ umozo nọ taẹn vbe owẹ ọre,* ke Ivbi e Kenan ni rre Bẹt-shi-an kevbe ẹvbo ni lẹga ẹre, kevbe iran ni rre Iya* ọghe Jẹzriẹl. 17 Ẹre Jọshua na tama Ifrem vbe Manasẹ, ne ivbi e Josẹf wẹẹ: “Wa gele wa bun, wa vbe mwẹ ẹtin ẹsẹse, te ọ khẹke ne otọ na khian mu ne uwa gberra ọkpa, 18 nọnaghiyerriọ, a gha mu ikinkin ne oke ye ba ẹre ne uwa. Agharhemiẹn wẹẹ ẹgbo nọ, wa ghi ya fie ẹre, ọ ghi gha re ehe ne otọ ọghe uwa sẹ. Rhunmwuda, te uwa khian khulo Ivbi e Kenan ladian, agharhemiẹn wẹẹ iran wegbe kevbe wẹẹ, iran mwẹ ikẹkẹ okuo nọ mwẹ umozo nọ taẹn vbe owẹ ọre.”*

18 Ẹre Ivbi Izrẹl hia na ghi si egbe koko vbe Shailo, iran na bọ ibọkpọ na na si egbe koko ye evba, rhunmwuda, iran khọnmiotọ yan ẹvbo nii nẹ. 2 Sokpan, uniẹn ọghe Izrẹl ihinrọn ye rrọọ, na ma he ghae ukhu na. 3 Ẹre Jọshua na tama Ivbi Izrẹl wẹẹ: “Vbọ khian kpẹẹ sẹ hẹ, wa ke ya yin otọ ne Jehova ne Osa ọghe avbe erha uwa odede mu ne uwa? 4 Wa zẹ ikpia eha vbe dọmwadẹ uniẹn, I gha gie iran, ne iran khian la otọ nii hia, iran ghi vinnọẹn ye ebe* vbene otọ ọghe dọmwadẹ uniẹn ye hẹ kevbe ehe nọ lae. Iyeke ọni, iran ghi werriegbe bu mwẹ gha dee. 5 Iran ghi ghae otọ nii ye ihe ihinrọn. E Juda ghi ye gha rre otọ ọghẹe vbe odẹ ahọ,* sokpan, Ivbi e Josẹf ghi ye gha rre otọ ọghe iran vbe odẹ okuọ.* 6 Wa ghi vinnọẹn ye ebe, vbene otọ nii ye hẹ, ne uwa ghae ẹre ye ihe ihinrọn, iyeke ọni, wa ghi rhie nene ebe gu mwẹ, I gha yan uta yọ ne uwa vbe emwa na, vbe odaro e Jehova ne Osa mwa. 7 Sokpan, ukhu i khian sẹ Ivbi e Livai obọ, rhunmwuda, ukhu ọghe iran ọre ne iran gha ga zẹvbe ohẹn ọghe Jehova; ukhu ne Mozis ne ọguọmwadia e Jehova ghae ne uniẹn e Gad, uniẹn e Rubẹn, kevbe obọ ọkpa vbe uniẹn e Manasẹ vbe odẹ ekẹn* ọghe Jọdan, sẹ iran obọ nẹ.”

8 Ikpia na gie, na mu egbe ne iran gha khian, ẹre Jọshua na tama iran wẹẹ: “Wa khian la otọ nii hia, ne uwa vinnọẹn ye ebe, vbene otọ nii ye hẹ, iyeke ọni, wa ghi bu mwẹ gha dee. I gha yan uta yọ ne uwa, vbe odaro e Jehova vbe Shailo.” 9 Ẹre ikpia nii na kpa, iran na khian la otọ nii hia, iran na vinnọẹn ye ebe, vbene otọ nii ye hẹ, iran na vbe gbẹnnẹ ehe ne dọmwadẹ ẹvbo ye ladian. Iran keghi ghae otọ nii hia ye ihe ihinrọn, iran na vbe gbẹnnẹ emwi hia ye ebe. Iyeke ọni, iran na werriegbe bu e Jọshua gha die agọ vbe Shailo. 10 E Jọshua na gu iran yan uta yọ vbe odaro e Jehova, vbe Shailo. Evba nii, ẹre Jọshua na ghae otọ nii ne Ivbi Izrẹl, ọ na mu ọkpọkpa ne dọmwadẹ uniẹn.

11 A ghi yan uta nokaro, ọghe Bẹnjamin na ladian, ọni ọre ọghe dọmwadẹ ẹgbẹe vbe uniẹn e Bẹnjamin. Otọ nọ sẹ iran obọ kegha rre uwu ẹkpo ivbi e Juda kevbe ivbi e Josẹf. 12 E Jọdan ẹre uwu ọghe iran ke suẹn vbe odẹ okuọ,* nene uwu keghi ya sẹ ehe ne oke na haan vbe Jẹriko vbe odẹ okuọ,* ọ na ke evba gha rrie ikinkin ne oke ye vbe odẹ orrie,* ọ na vbe ke evba gha rrie ato ọghe Bẹt-evin. 13 Nene uwu keghi vbe ke evba gha rrie Lọz, vbe ehe ne oke na haan vbe odẹ ahọ* ọghe Lọz, ọni ọre Bẹtẹl; ọ na vbe ke evba gha rrie Atarọt-ada, nọ rre uhunmwu oke vbe odẹ ahọ* ọghe Bẹt-horọn Nọ Kotọ. 14 Evba nii, ẹre uwu nọ rre odẹ orrie* ke suẹn. Ọ keghi ke oke nọ rre odẹ ahọ* ọghe Bẹt-horọn, gha rrie odẹ ahọ;* e Kiriat-bel ẹre ọ ya sẹ, ọni ọre Kiriat-jiẹrim, nọ rre otọ e Juda. Ọni ọre uwu ọghe uniẹn e Bẹnjamin, vbe odẹ orrie.*

15 Eke ne Kiriat-jiẹrim sẹ, ẹre uwu ọghe iran vbe odẹ ahọ* ke kpa, nene uwu keghi vbe gha rrie odẹ orrie;* ọ na ke evba gha rrie eke ne amẹ na lẹẹ ladian vbe Nẹftoa. 16 Nene uwu keghi ya sẹ ọkpẹn oke nọ mu aro daa Iya ọghe Ovbi e Hinọm, nọ rre Iya* ọghe Rẹfeim vbe odẹ okuọ,* ọ na vbe ke evba gha rrie Iya ọghe Hinọm, ya sẹ ehe ne oke na haan vbe ẹvbo ọghe Ivbi e Jibọs vbe odẹ ahọ,* ọ na ke evba gha rrie Ẹn-rogẹl. 17 Nene uwu keghi ke odẹ okuọ* gha rrie Ẹn-shimẹsh, ọ na ke evba gha rrie Gẹlailọt, nọ rre odaro ehe na la vbe a ghaa gbe oke rrie Adọmim, ọ na vbe ke evba ya sẹ ehe ne okuta ọghe Bohan ne ovbi e Rubẹn ye. 18 Ọ na ke evba gha rrie eke ne oke na haan vbe odẹ okuọ* vbe odaro Araba, ọ na vbe ke evba ya sẹ Araba vbe ototọ. 19 Nene uwu keghi vbe ya sẹ eke ne oke na haan vbe odẹ okuọ* ọghe Bẹt-họgla; ọkpẹn Okun Umwẹ* vbe odẹ okuọ* ẹre uwu nii sẹ, vbe ehe ne ẹzẹ e Jọdan sẹ vbe odẹ ahọ.* Ọna ẹre ọ ghaa re ehe ne uwu nii lae vbe odẹ ahọ.* 20 E Jọdan ẹre ọ ghaa re ehe ne uwu nii lae vbe odẹ ekẹn.* Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn e Bẹnjamin, ọni ọre ehe hia ne uwu ọghe iran lae.

21 Ena ẹre ọ ghaa re ẹvbo ọghe dọmwadẹ ẹgbẹe vbe uniẹn e Bẹnjamin: e Jẹriko, e Bẹt-họgla, Imẹk-kizẹz, 22 e Bẹt-araba, e Zẹmareim, e Bẹtẹl, 23 Avim, e Pera, Ọfra, 24 e Kifa-amọnai, Ọfnai, kevbe Giba; ehia kegha re ẹvbo iweva (12) kevbe avbe igue ni rrọọ.

25 E Gibiọn, e Rema, e Bi-ẹrọt, 26 e Mizpa, e Kefaira, e Mozah, 27 e Rikẹm, Ipi-ẹl, e Tarala, 28 e Zilah, e Ha-ilẹf, e Jẹbusi, ọni ọre Jerusalẹm, e Gibia, kevbe Kiriat; ehia kegha re ẹvbo iwenẹ (14) kevbe avbe igue ni rrọọ.

Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn e Bẹnjamin.

19 A ghi yan uta nogie eva, ọghe Simiọn na ladian, ọni ọre ọghe dọmwadẹ ẹgbẹe ni rre uniẹn e Simiọn. Otọ nọ sẹ e Juda obọ, ẹre a na fian otọ* ne iran. 2 Otọ* ọghe iran kegha re Biẹ-shiba kevbe Shiba, Moleda, 3 Heza-shual, Bela, Izẹm, 4 Ẹltolad, Bitul, Họma, 5 Ziklag, Bẹt-makabọt, Heza-susa, 6 Bẹt-lebeọt, kevbe Sheruhẹn; ehia kegha re ẹvbo iweha (13) kevbe avbe igue ni rrọọ; 7 Ein, Rimọn, Ita, kevbe Eshan; ehia kegha re ẹvbo enẹ kevbe avbe igue ni rrọọ; 8 deba igue hia ni lẹga avbe ẹvbo na, ya sẹ e Belat-biyẹ, ọni ọre Rema nọ rre odẹ ahọ.* Ọna ọre ukhu na ghae ne dọmwadẹ ẹgbẹe vbe uniẹn e Simiọn. 9 A keghi fian vbe otọ ọghe uniẹn e Juda, mu ne uniẹn ọghe Simiọn, nọ gha re ukhu ọghe iran. Rhunmwuda, otọ nọ sẹ uniẹn e Juda obọ kpọlọ ne iran gbe. Rhunmwuda ọni, uniẹn e Simiọn na do gha mwẹ otọ, vbe uwu eke ne otọ* ọghe uniẹn e Juda ye.

10 A ghi yan uta nogie eha, ọghe Zẹbulọn na ladian, ọni ọre ọghe dọmwadẹ ẹgbẹe ni rre uniẹn e Zẹbulọn. Eke ne otọ* ọghe iran lae keghi ya sẹ e Serid. 11 Uwu ọghe iran kegha rrie Mariẹl vbe odẹ orrie,* ọ na ya sẹ e Dabẹshẹt, ọ na vbe ke evba gha rrie iya* nọ rre odaro e Jọkni-am. 12 Ọ keghi ke Serid vbe odẹ ahọ,* ọni ọre odẹ ehe ne ovẹn ke yan rre, gha rrie uwu ọghe Kislọt-tebọ, ọ na ke evba gha rrie Dabẹrat, ọ na vbe ke evba gha rrie Jefaia. 13 Ọ na ke evba gha rrie Gat-hifa vbe odẹ ahọ,* ọni ọre odẹ ehe ne ovẹn ke yan rre, ọ na ke evba gha rrie Ẹt-kezin, ọ na vbe ke evba gha rrie Rimọn, ọ na vbe ya sẹ e Niya. 14 Vbe odẹ okuọ,* nene uwu na vbe la ghee odẹ Hanatọn; Iya ọghe Ifta-ẹl ẹre ọ sẹ, 15 kevbe Katat, Nehalal, Shimrọn, Aidala, kevbe Bẹtlẹhẹm; ehia kegha re ẹvbo iweva (12) kevbe avbe igue ni rrọọ. 16 Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn e Zẹbulọn. Ena ẹre ọ ghaa re ẹvbo iran, kevbe avbe igue ni rrọọ.

17 A ghi yan uta nogie enẹ, ọghe Isaka na ladian, ọni ọre ọghe dọmwadẹ ẹgbẹe ni rre uniẹn ọghe Isaka. 18 Uwu ọghe iran keghi ya sẹ Jẹzriẹl, Kẹsọlọt, Shunẹm, 19 Hafareim, Shaiọn, Anaherat, 20 Rabit, Kishiọn, Ibẹz, 21 Remẹt, Ẹn-genim, Ẹn-hada, kevbe Bẹt-pazẹz. 22 Nene uwu keghi ya sẹ e Tebọ, Shehazuma kevbe Bẹt-shimẹsh; e Jọdan ẹre uwu ọghe iran sẹ; ehia kegha re ẹvbo enẹ i rrọọ vbe ugie (16) kevbe avbe igue ni rrọọ. 23 Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn ọghe Isaka. Ena ẹre ọ ghaa re ẹvbo iran, kevbe avbe igue ni rrọọ.

24 A ghi yan uta nogie isẹn, ọghe Asha na ladian, ọni ọre ọghe dọmwadẹ ẹgbẹe ni rre uniẹn ọghe Asha. 25 Uwu ọghe iran kegha rre ọkpẹn e Hẹlkat, Helai, Bitẹn, Akshaf, 26 Alamẹlẹk, Emad, kevbe Maishal. Ọ na gha rrie Kamẹl vbe odẹ orrie,* ọ na vbe ya sẹ e Shaihọ-libnat, 27 nene uwu keghi werriegbe gha rrie Bẹt-degọn vbe odẹ ekẹn,* ọ na ya sẹ uwu ọghe Zẹbulọn, ọ na vbe ke evba gha rrie Iya ọghe Ifta-ẹl vbe odẹ okuọ,* ọ na vbe ya sẹ e Bẹt-imẹk kevbe Ni-aiẹl, ọ na ke evba gha rrie Kebọl vbe obọ iye ọmwa, 28 ọ na vbe gha rrie Ibrọn, Rihọb, Hammọn, kevbe Kenah, ọ na ya sẹ e Saidọn Ne Okpẹvbo. 29 Nene uwu keghi werriegbe gha rrie Rema, ọ na ya sẹ e Taia, nọ re ẹvbo na gbe ekẹn ga. Ke evba kpa, ọ na werriegbe gha rrie Hosa; okun ẹre nene uwu sẹ, vbe ikinkin ọghe Akzib, 30 Ọma, Efẹk, kevbe Rihọb; ehia kegha re ẹvbo eva yan ugie (22) kevbe avbe igue ni rrọọ. 31 Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn ọghe Asha. Ena ẹre ọ ghaa re ẹvbo iran, kevbe avbe igue ni rrọọ.

32 A ghi yan uta nogie ehan, ọghe Naftalai na ladian, ọni ọre ọghe dọmwadẹ ẹgbẹe ni rre uniẹn e Naftalai. 33 E Hilẹf kevbe okperhan nọ rre Ze-ananim, ẹre uwu ọghe iran ke kpa, ọ na gha rrie Adami-nikẹb kevbe Jabniẹl, ya sẹ e Lakọm; e Jọdan ẹre nene uwu sẹ. 34 Nene uwu keghi werriegbe gha rrie Aznọt-tebọ vbe odẹ orrie,* ọ na ke evba gha rrie Hukkọk, ọ na ya sẹ e Zẹbulọn vbe odẹ ahọ,* ọ na ya sẹ Asha vbe odẹ orrie,* ọ na vbe ya sẹ e Juda, vbe odẹ ekẹn* ọghe Jọdan. 35 Avbe ẹvbo na gbe ekẹn ga kegha re Zidim, Zẹẹ, Hamat, Rakat, Kinẹrẹt, 36 Adama, Rema, Hezọr, 37 Kidẹsh, Ẹdriai, Ẹn-hezọ, 38 Yairọn, Migdal-ẹl, Horẹm, Bẹt-enat, kevbe Bẹt-shimẹsh; ehia kegha re ẹvbo ọkpa i rrọọ vbe ugie (19) kevbe avbe igue ni rrọọ. 39 Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn e Naftalai. Ena ẹre ọ ghaa re ẹvbo iran, kevbe avbe igue ni rrọọ.

40 A ghi yan uta nogie ihinrọn, ọghe Dan na ladian, ọni ọre ọghe dọmwadẹ ẹgbẹe ni rre uniẹn e Dan. 41 Uwu ọghe otọ* ọghe iran kegha re Zora, Ẹshtaọl, Ishimẹsh, 42 She-alabin, Aijalọn, Itla, 43 Ilọn, Timnah, Ẹkrọn, 44 Ẹltikẹ, Gibẹtọn, Belat, 45 Jihọd, Bẹnẹ-birak, Gat-rimọn, 46 Mi-jakọn, kevbe Rakọn, nene uwu keghi mu aro daa e Jọpa. 47 Sokpan, otọ ọghe Dan kherhe ne iran gbe. Rhunmwuda ọni, iran na ya gu emwa ni rre Lẹshẹm gbinna, iran na khọnmiotọ yan iran, ẹre iran na ya umozo gbele iran rua. Iyeke ọni, iran na ya e Lẹshẹm khian ọghe iran, iran na ghi gha rre evba, iran na vbe fi eni e Lẹshẹm werriẹ khian e Dan, nọ re eni erha iran odede. 48 Ọna ẹre ọ ghaa re ukhu na ghae ne dọmwadẹ ẹgbẹe vbe uniẹn ọghe Dan. Ena ẹre ọ ghaa re ẹvbo iran, kevbe avbe igue ni rrọọ.

49 Erriọ ẹre a ghi ya ghae otọ nọ khian gha re ukhu ọghe dọmwadẹ uniẹn, kevbe ikinkin nọ khian gha ye. Iyeke ọni, Ivbi Izrẹl keghi fian vbe otọ ọghe iran mu ne Jọshua, nọ gha re ukhu ọghẹe. 50 Ọ na we na mu e Timnat-sira ne irẹn, nọ rre ikinkin ne oke ye vbe Ifrem, ẹre iran na mu nẹẹn, zẹvbe ne Jehova khare. Ọ na werriegbe bu ẹvbo nii, ọ na ghi dia evba ya.

51 Ena ẹre ọ ghaa re ukhu ne Ẹlieza ne ohẹn, e Jọshua ne ovbi e Nọn, kevbe avbe ọkaẹgbẹe ni rre uniẹn ọghe Izrẹl yan uta ya ghae vbe Shailo, vbe odaro e Jehova, vbe onurho ọghe ibọkpọ na na si egbe koko. Erriọ ẹre iran ghi ya ghae otọ nii hia fo.

20 Ẹre Jehova na ghi tama e Jọshua wẹẹ: 2 “Tama Ivbi Izrẹl wẹẹ, ‘Wa zẹ avbe ẹvbo ne emwa khian gha lẹẹ yo, zẹvbe ne I ka tama e Mozis nọ tama uwa, 3 ne ọmwa nọ gbe ọmwa rua, vbene ọ ma na gheghe ru ẹre, ra vbe nẹi na re ẹmwẹ ọnrẹn,* mieke na lẹẹ gha rrie evba. Avbe ẹvbo na ghi gha re ugue ne uwa, ne obọ ọmwa nọ khian rria ikhi ne ọmwa na gbe rua, ghẹ mieke na vba ọmwa nọ gbe ọmwa rua. 4 Te ọ khẹke ne ọmwa nii nọ gbe ọmwa rua, lẹẹ gha rrie ọkpa vbe ẹvbo nii, ọ ghi mudia ye onurho ọghe nene ẹvbo, ọ ghi ta emwi nọ sunu ma ediọn ni rre evba. Iyeke ọni, iran ghi gi ẹre la ẹvbo nii, iran ghi rhie ehe nẹẹn dia, ọ ghi vbe gu iran gha rre evba. 5 Adeghẹ ọmwa nọ khian rria ikhi na gha khu ọmwa nii dee, ọ ma khẹke ne iran mu ọmwa nii nọ gbe ọmwa rua, ne ọmwa nọ khu ẹre dee. Rhunmwuda, ẹ i re te ọ gheghe gbe ẹre rua, ọ ma ka vbe gha mu ohu ẹre. 6 Ọ ghi gha rre ẹvbo nii, a ghi te miẹn wẹẹ a bu ohiẹn ọnrẹn sirra emwa ni gbẹbu. Ọ ghi dia evba ya, ya sẹ ẹghẹ ne ogie ohẹn nọ rre ukpo vbe ẹghẹ nii gha ya wu. Iyeke ọni, ọmwa nii nọ gbe ọmwa rua, ghi werriegbe gha rrie owa ẹre, vbe ẹvbo nọ ke lẹẹ gha dee.’”

7 Rhunmwuda ọni, iran keghi ya avbe ẹvbo na khian ni huanrẹn: E Kidẹsh nọ rre Galili vbe ikinkin ne oke ye vbe Naftalai, e Shikẹm nọ rre ikinkin ne oke ye vbe Ifrem, kevbe Kiriat-aba, ọni ọre Hẹbrọn, nọ rre ikinkin ne oke ye vbe Juda. 8 Vbe obọ nọkpa ọghe Jọdan vbe odẹ ekẹn* ọghe Jẹriko, iran keghi zẹ e Biza nọ rre ato vbe otọ nọ rriẹ, vbe ikinkin ọghe uniẹn e Rubẹn. Iran na vbe zẹ e Remọt nọ rre Giliẹd vbe ikinkin ọghe uniẹn e Gad, kevbe Golan nọ rre Beshan vbe ikinkin ọghe uniẹn e Manasẹ.

9 Ena ẹre ọ ghi gha re ẹvbo na zẹ ne Ivbi Izrẹl, kevbe avbe ọrriọvbe ni rre uwu ẹbu iran. Avbe ẹvbo na, ẹre ọmwaikọmwa nọ gbe ọmwa rua, vbene ọ ma na gheghe ru ẹre gha lẹẹ yo, ne ọmwa nọ khian rria ikhi ghẹ gbe ẹre rua, vbene ọ te sẹ ẹghẹ na khian ya bu ohiẹn ọnrẹn sirra emwa ni gbẹbu.

21 Avbe ọkaẹgbẹe ni rre uniẹn e Livai keghi bu e Ẹlieza ne ohẹn, e Jọshua ne ovbi e Nọn, kevbe avbe ọkaẹgbẹe nikẹre ni rre uniẹn ọghe Izrẹl. 2 Avbe ọkaẹgbẹe ni rre uniẹn e Livai na tama iran vbe Shailo vbe otọ e Kenan wẹẹ, “E Jehova keghi loo e Mozis ya tama Ivbi Izrẹl, ne iran mu ẹvbo eso ne ima gha dia ne ima, kevbe otọ ne emwirri ọghe ima khian na gha rri irunmwu.” 3 Ivbi Izrẹl keghi mu ẹvbo eso ne Ivbi e Livai; otọ na mu ne Ivbi Izrẹl ẹre avbe ẹvbo na ghaa ye. Iran na vbe mu otọ eso ne iran, ne emwirri ọghe iran khian na gha rri irunmwu, zẹvbe ne Jehova khare.

4 A ghi yan uta yọ, ọghe avbe ẹgbẹe ọghe Kohat na ladian. Ẹre a na mu ẹvbo iweha (13) vbe otọ ọghe uniẹn e Juda, uniẹn e Simiọn, kevbe uniẹn e Bẹnjamin ne Ivbi e Livai ni ke uniẹn ọghe Erọn ne ohẹn rre.

5 A keghi mu ẹvbo igbe, vbe avbe ẹvbo na mu ne ẹgbẹe ni rre uniẹn ọghe Ifrem, uniẹn e Dan, kevbe obọ ọkpa vbe uniẹn e Manasẹ, ne Ivbi e Kohat ni ghi kẹ.

6 A keghi mu ẹvbo iweha (13) ne Ivbi e Gẹshọn, vbe avbe ẹvbo na mu ne ẹgbẹe ni rre uniẹn ọghe Isaka, uniẹn ọghe Asha, uniẹn e Naftalai, kevbe obọ ọkpa vbe uniẹn e Manasẹ vbe Beshan.

7 A na mu ẹvbo iweva (12) ne avbe ẹgbẹe ọghe Mẹrerai, vbe ẹvbo nọ sẹ uniẹn e Rubẹn, uniẹn e Gad, kevbe uniẹn e Zẹbulọn obọ.

8 Erriọ Ivbi Izrẹl ghi ya mu avbe ẹvbo na ne Ivbi e Livai, kevbe otọ ne emwirri ọghe iran khian na gha rri irunmwu, iyeke vbe iran ghi yan uta yọ nẹ, zẹvbe ne Jehova loo e Mozis ya tama iran.

9 Rhunmwuda ọni, a keghi mu avbe ẹvbo na khian sunu yi na, ni rre otọ ọghe uniẹn e Juda kevbe uniẹn e Simiọn 10 ne Ivbi e Erọn, ni ke ẹgbẹe ọghe Kohat rre, vbe uniẹn e Livai, rhunmwuda, iran ẹre a ka gha mu otọ na, vbe a yan uta. 11 Iran keghi mu e Kiriat-aba ne iran (Aba ẹre ọ ghaa re erha Enak), ọni ọre, Hẹbrọn, nọ rre ikinkin ne oke ye vbe Juda, kevbe avbe ẹvbo ni lẹga ẹre ne emwirri na rri irunmwu. 12 Sokpan, iran keghi mu otọ ugbo kevbe avbe igue ni rre ẹvbo nii ne Kelẹb, ne ovbi e Jẹfunẹ.

13 A keghi mu e Hẹbrọn kevbe avbe otọ ne emwirri na rri irunmwu, ne ivbi Erọn ne ohẹn, nọ gha re ẹvbo ne ọmwa nọ gbe ọmwa rua khian gha lẹẹ yo. A na vbe mu e Libna ba ẹre, kevbe otọ ni rrọọ ne emwirri na rri irunmwu, 14 e Jatiẹ kevbe avbe otọ ni rrọọ ne emwirri na rri irunmwu, Ẹshtemoa kevbe avbe otọ ni rrọọ ne emwirri na rri irunmwu, 15 e Holọn kevbe avbe otọ ni rrọọ ne emwirri na rri irunmwu, e Dibiẹ kevbe avbe otọ ni rrọọ ne emwirri na rri irunmwu, 16 Ein kevbe avbe otọ ni rrọọ ne emwirri na rri irunmwu, e Jọta kevbe avbe otọ ni rrọọ ne emwirri na rri irunmwu, e Bẹt-shimẹsh kevbe avbe otọ ni rrọọ ne emwirri na rri irunmwu; ehia kegha re ẹvbo ihinrin, vbe otọ ọghe uniẹn eva na.

17 Avbe ẹvbo na mu vbe uniẹn e Bẹnjamin kegha re: Gibiọn kevbe avbe otọ ni rrọọ ne emwirri na rri irunmwu, e Giba kevbe avbe otọ ni rrọọ ne emwirri na rri irunmwu, 18 Anatọt kevbe avbe otọ ni rrọọ ne emwirri na rri irunmwu, Almọn kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

19 Ẹvbo hia na mu ne ivbi Erọn ni re ohẹn, kegha re iweha (13), kevbe avbe otọ ni rrọọ ne emwirri na rri irunmwu.

20 A na mu ẹvbo eso vbe otọ ọghe uniẹn Ifrem, ne ẹgbẹe ọghe Kohat nikẹre ni vbe re Ivbi e Livai. Uta ẹre a ya ghae avbe otọ na ne iran. 21 Iran na mu otọ ne iran, ne ọmwa nọ gbe ọmwa rua khian gha lẹẹ yo, ọni ọre otọ e Shikẹm nọ rre ikinkin ne oke ye vbe Ifrem, kevbe avbe otọ ni rrọọ ne emwirri na rri irunmwu, e Giza kevbe avbe otọ ni rrọọ ne emwirri na rri irunmwu, 22 e Kibzeim kevbe avbe otọ ni rrọọ ne emwirri na rri irunmwu, kẹ kevbe Bẹt-horọn kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

23 Avbe ẹvbo na viọ re vbe uniẹn e Dan kegha re: Ẹltikẹ kevbe avbe otọ ni rrọọ ne emwirri na rri irunmwu, e Gibẹtọn kevbe avbe otọ ni rrọọ ne emwirri na rri irunmwu, 24 Aijalọn kevbe avbe otọ ni rrọọ ne emwirri na rri irunmwu, e Gat-rimọn kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

25 Avbe ẹvbo na viọ re vbe obọ ọkpa vbe uniẹn e Manasẹ kegha re: E Te-anak kevbe avbe otọ ni rrọọ ne emwirri na rri irunmwu, kevbe Gat-rimọn kevbe otọ ni rrọọ ne emwirri na rri irunmwu; ẹvbo eva ẹre iran ghaa khin.

26 Ẹvbo hia ni ghi sẹ ẹgbẹe Kohat nikẹre obọ kegha re igbe, deba avbe otọ ni rrọọ ne emwirri na rri irunmwu.

27 A na mu ẹvbo eso, vbe avbe ẹvbo na mu ne obọ ọkpa vbe uniẹn e Manasẹ, ne Ivbi e Gẹshọn ni ke uniẹn e Livai rre, nọ gha re ẹvbo ne ọmwa nọ gbe ọmwa rua khian gha lẹẹ yo. Ẹvbo na mu ne iran ọre, e Golan nọ rre Beshan kevbe avbe otọ ni rrọọ ne emwirri na rri irunmwu, kẹ kevbe Bi-ẹshtera kevbe avbe otọ ni rrọọ ne emwirri na rri irunmwu; ẹvbo eva ẹre iran ghaa khin.

28 Avbe ẹvbo na viọ re vbe uniẹn ọghe Isaka kegha re: Kishiọn kevbe avbe otọ ni rrọọ ne emwirri na rri irunmwu, e Dabẹrat kevbe avbe otọ ni rrọọ ne emwirri na rri irunmwu, 29 e Jamọt kevbe avbe otọ ni rrọọ ne emwirri na rri irunmwu, kẹ kevbe Ẹn-genim kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

30 Avbe ẹvbo na viọ re vbe uniẹn Asha kegha re: E Maisha kevbe avbe otọ ni rrọọ ne emwirri na rri irunmwu, Abdọn kevbe avbe otọ ni rrọọ ne emwirri na rri irunmwu, 31 e Hẹkat kevbe avbe otọ ni rrọọ ne emwirri na rri irunmwu, kẹ kevbe Rihọb kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

32 Avbe ẹvbo na viọ re vbe uniẹn e Naftalai kegha re: ẹvbo ne ọmwa nọ gbe ọmwa rua khian gha lẹẹ yo, ọni ọre Kidẹsh nọ rre Galili kevbe avbe otọ ni rrọọ ne emwirri na rri irunmwu, e Hamọt-dọ kevbe avbe otọ ni rrọọ ne emwirri na rri irunmwu, kẹ kevbe Katan kevbe avbe otọ ni rrọọ ne emwirri na rri irunmwu; ehia kegha re ẹvbo eha.

33 Ẹvbo hia ni ghi sẹ edọmwadẹ ẹgbẹe ọghe Ivbi e Gẹshọn obọ, kegha re ẹvbo iweha (13) kevbe avbe otọ ni rrọọ ne emwirri na rri irunmwu.

34 A keghi viọ ẹvbo eso, vbe avbe ẹvbo na mu ne uniẹn e Zẹbulọn ne avbe ẹgbẹe ọghe Mẹrerai, ọni ọre Ivbi e Livai ni ghi kẹ. Ẹvbo na mu ne iran ọre: E Jọkni-am kevbe avbe otọ ni rrọọ ne emwirri na rri irunmwu, e Kata kevbe avbe otọ ni rrọọ ne emwirri na rri irunmwu, 35 e Dimna kevbe avbe otọ ni rrọọ ne emwirri na rri irunmwu, kẹ kevbe Nehalal kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

36 Avbe ẹvbo na mu vbe uniẹn e Rubẹn kegha re: E Biza kevbe avbe otọ ni rrọọ ne emwirri na rri irunmwu, e Jehaz kevbe avbe otọ ni rrọọ ne emwirri na rri irunmwu, 37 e Kẹdẹmọt kevbe avbe otọ ni rrọọ ne emwirri na rri irunmwu, e Mẹfa-at kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

38 Avbe ẹvbo na mu vbe uniẹn e Gad kegha re: ẹvbo ne ọmwa nọ gbe ọmwa rua khian gha lẹẹ yo, ọni ọre Remọt nọ rre Giliẹd kevbe avbe otọ ni rrọọ ne emwirri na rri irunmwu, e Mehaneim kevbe avbe otọ ni rrọọ ne emwirri na rri irunmwu, 39 e Hẹshbọn kevbe avbe otọ ni rrọọ ne emwirri na rri irunmwu, kẹ kevbe Jeza kevbe avbe otọ ni rrọọ ne emwirri na rri irunmwu; ehia kegha re ẹvbo enẹ.

40 Ẹvbo hia ni ghi sẹ edọmwadẹ ẹgbẹe ọghe Ivbi e Mẹrerai obọ, ọni ọre Ivbi e Livai nikẹre, kegha re iweva (12).

41 Avbe ẹvbo ni rre otọ Izrẹl, na mu ne Ivbi e Livai kegha re erẹnrẹn yan iyeva (48), deba avbe otọ ni rrọọ ne emwirri na rri irunmwu. 42 Otọ ne emwirri na rri irunmwu, keghi lẹga edọmwadẹ ẹvbo na; erriọ avbe ẹvbo na hia wa gha ye.

43 Erriọ e Jehova ghi ya mu otọ hia ne Ivbi Izrẹl, ọni ọre otọ nọ yan rẹn wẹẹ irẹn gha mu ne avbe erha iran odede. Iran keghi ya avbe otọ na khian ọghe iran, iran na ghi gha rre evba. 44 Deba ọni, e Jehova keghi gi ẹkun sẹ iran otọ vbe ehe hia, zẹvbe nọ yan ma avbe erha iran odede, eghian rhọkpa ma vbe sẹtin khọnmiotọ yan iran. E Jehova keghi viọ eghian iran hia ye iran obọ. 45 Ẹmwẹ* ọkpa ma de fua vbe emwi ni maan hia, ne Jehova ve igiowa ọghe Izrẹl re; te ehia wa sunu zẹvbe nọ tae.

22 Ẹre Jọshua na tie Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ, 2 ọ na tama iran wẹẹ: “Wa ru emwi hia ne Mozis ne ọguọmwadia e Jehova tama uwa ne uwa ru nẹ, wa vbe ru emwi hia ne I tama uwa ne uwa ru. 3 Ọ ma mwẹ ẹghẹ ọkpa ne uwa ya yangbe etiẹn uwa, ke ẹghẹ nii gha dee, do fi ẹdẹnẹrẹ; te uwa wa vbe lele uhi ọghe Jehova ne Osanobua uwa. 4 E Jehova ne Osanobua uwa gi ẹkun sẹ etiẹn uwa otọ nẹ, zẹvbe nọ yan ma iran. Rhunmwuda ọni, wa gha rrie owa uwa, vbe otọ ne Mozis ne ọguọmwadia e Jehova mu ne uwa, vbe obọ nọkpa* ọghe Jọdan. 5 Emwi ne uwa gha ru, ọre ne uwa hẹko gha lele iyi kevbe Uhi ne Mozis ne ọguọmwadia e Jehova yi ne uwa, ọni ọre, ne uwa hoẹmwẹ e Jehova ne Osanobua uwa, ne uwa gha khian lele odẹ ọre, ne uwa gha ya uhi ẹre ru emwi, ne uwa rhikhan muẹn, ne uwa vbe ya ekhọe hia kevbe ẹdagbọn* uwa hia gae.”

6 Iyeke ọni, e Jọshua na na erhunmwu ne iran,* ọ na we ne iran gha khian, ẹre iran na ghi gha rrie owa. 7 E Mozis ka mu otọ e Beshan ne obọ ọkpa vbe uniẹn e Manasẹ nẹ; e Jọshua na do mu otọ nọ rre odẹ orrie* ọghe Jọdan, ne obọ nọkẹre vbe uniẹn e Manasẹ, ne iran vbe etẹn iran gba gha rre odọ. E Jọshua ghi we ne iran gha rrie owa, ọ na na erhunmwu ne iran,* 8 ọ na wẹẹ: “Wa viọ emwi ewe ni bun, ne uwa gha rrie owa, kevbe emwirri ni bun, deba esiliva kevbe igoru, ekọpa kevbe ematọn, kevbe ukpọn ni bun ẹsẹse. Wa viọ avbe emwi ne uwa viọ re vbe obọ emwa ne uwa khọnmiotọ yan, ne uwa vbe etiẹn uwa gba ghae ẹre.”

9 Iyeke ọni, Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ keghi kpa hin eke ne Ivbi Izrẹl nikẹre ye rre, vbe Shailo nọ rre otọ e Kenan. Iran na werriegbe gha rrie otọ e Giliẹd, nọ re otọ na mu ne iran ne iran gha ye, zẹvbe ne Jehova loo e Mozis ya tama iran. 10 Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ ghi sẹ ikinkin ọghe Jọdan vbe otọ e Kenan, iran na bọ ogiukpo nọkhua ye evba. 11 Ẹghẹ eso ghi gberra, Ivbi Izrẹl nikẹre keghi họn wẹẹ: “Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ, ya bọ ogiukpo ye uwu ọghe otọ e Kenan, vbe obọ ọghe Ivbi Izrẹl, vbe ikinkin ọghe Jọdan.” 12 Ivbi Izrẹl ghi họn emwi nọ sunu na, iran hia na si egbe koko vbe Shailo, ne iran ya gu iran gbinna.

13 Ẹre Ivbi Izrẹl na gie Finihas, ne ovbi Ẹlieza ne ohẹn bu Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ vbe otọ e Giliẹd, 14 ọkaolotu igbe na lele ẹre, dọmwadẹ ọkaolotu na, kegha re ọkaẹgbẹe vbe dọmwadẹ igiowa ni rre uniẹn ọghe Izrẹl. Ọkaẹgbẹe ẹre iran vbe gha khin, vbe uwu ẹbu ikpia arriaisẹn ni bun ni rre Izrẹl. 15 Iran ghi sẹ eke ne Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ ye vbe otọ e Giliẹd, iran na tama iran wẹẹ:

16 “Ọna ọre emwi ne emwa ọghe Jehova tae: ‘Vbọzẹ ne uwa na fi iyeke gbe Osa ọghe Izrẹl? Wa sẹ e Jehova rae, wa na ya bọ ogiukpo ọghe obọ uwa, wa na vbe sọtẹ daa e Jehova. 17 Orukhọ ne ima ru vbe Pi-ọr ma sẹ ra? Wa mianmian oya ne Jehova rri agbẹnvbo Izrẹl re nẹ ra? Te ima ye rri oya yọ do fi ẹdẹnẹrẹ. 18 Wa rẹn emwi nọ ka sunu, sokpan wa khian vbe werriegbe fi iyeke gbe Jehova! Wa gha sọtẹ daa e Jehova vbe ẹrẹna, akhuẹ, ọ ghi do gha mu ohu Ivbi Izrẹl hia. 19 Nian, deghẹ te uwa roro wẹẹ, otọ na mu ne uwa ma huan, wa gha die otọ ọghe Jehova, vbe ehe ne ibọkpọ ọghe Jehova ye, ne ima gba gha rre evba. Sokpan, wa ghẹ sọtẹ daa e Jehova, wa ghẹ vbe bọ ogiukpo ọghe obọ uwa ba ogiukpo na ka bọ ne Jehova ne Osa ọghe ima, ne ima ghẹ do khian emwa isọtẹ. 20 Vbe ẹghẹ ne Ekan ne ovbi e Zira ma na họn ẹmwẹ ne Osanobua, nọ na ya viọ avbe emwi na we na guọghua, Osanobua na gha mu ohu agbẹnvbo Izrẹl hia. Sokpan, ẹ i re irẹn ọkpa ẹre ọ wu ye orukhọ nọ ru.’”

21 Ẹre Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ na wanniẹn avbe ọkaolotu ọghe Izrẹl* wẹẹ: 22 “E Jehova ne Osa nọ kpọlọ sẹ avbe osa nikẹre rẹn emwi nọ sunu! E Jehova ne Osa nọ kpọlọ sẹ avbe osa nikẹre, rẹn emwi nọ si ẹre ne ima na ru emwi ne ima ru na, Ivbi Izrẹl gha vbe rẹn. Deghẹ ima sọtẹ daa e Jehova kevbe wẹẹ, ma ma vbe họn ẹmwẹ nẹẹn, ẹ i khian miẹn ima fan. 23 Deghẹ te ima bọ aka ọghe obọ ima, ne ima mieke na fi iyeke gbe Jehova kevbe ne ima gha zọ ese na giẹn ruan, izọese emwiokọ kevbe izọese ọfunmwegbe, te Jehova khian rri ima oya yọ. 24 Ẹo, te ima ru ọna, rhunmwuda ne ima na gha fian afianma wẹẹ, vbe odaro, ivbi uwa sẹtin nọ ivbi ima wẹẹ: ‘Vbọ kaan uwa kaẹn Jehova ne Osa ọghe Izrẹl? 25 E Jehova ya e Jọdan vin uwu ne ima vbe uwa ne Ivbi e Rubẹn kevbe Gad nẹ. Emwi nọ kaan ugamwẹ e Jehova ma kaan uwa.’ Ẹghẹ nii, ivbi uwa ghi do mu idobo ye ivbi ima egbe, ne iran ghẹ ga* e Jehova.

26 “Ẹre ima na ghi kha wẹẹ, ‘Wa gi ima bọ ogiukpo ọghe obọ ima, ẹ i re na khian na gha zọ ese na giẹn ruan, ra avbe ese ọvbehe, 27 sokpan, te ima we nọ gha re osẹ ne ima vbe uwa, kevbe ivbi ima* wẹẹ, ma ra gha zọ ese na giẹn ruan, ese ọfunmwegbe kevbe avbe ese ọvbehe, ne ima ya rhie ẹre ma wẹẹ, ma ga e Jehova; ne ivbi uwa ghẹ do tama ivbi ima vbe odaro wẹẹ: “Emwi nọ kaan ugamwẹ e Jehova ma kaan uwa.”’ 28 Ẹre ima na ghi kha wẹẹ, ‘Deghẹ iran na ghi ta ẹmwẹ na ma ima kevbe ivbi ima vbe odaro,* ma ghi kha wẹẹ: “Ghee ogiukpo ne avbe erha ima odede bọe, nọ vbe yevbe ogiukpo ọghe Jehova. Ẹ i re te a bọe na gha yae zọ ese na giẹn rẹn, ra na gha yae ru izọese ọvbehe, sokpan, te a bọe nọ gha re osẹ ne ima vbe uwa.”’ 29 Ma i khian sọtẹ daa e Jehova, ne ima vbe fi iyeke gbe Jehova, lekpae ne ima gha na bọ ogiukpo na na zọ ese na giẹn rẹn, na na ru izọese emwiokọ, kevbe avbe izọese ọvbehe, vbọ gberra ogiukpo ọghe Jehova ne Osa mwa, nọ rre odaro ibọkpọ ọghẹe.”

30 E Finihas ne ohẹn, avbe ọkaolotu ọghe Izrẹl, kevbe avbe ọkaolotu ọghe ikpia arriaisẹn ni bun ni rre Izrẹl ni lele ẹre, ghi họn ẹmwẹ ne ivbi e Rubẹn, e Gad, kevbe Manasẹ tae, ọ na wa yẹẹ iran. 31 Ẹre Finihas ne ovbi Ẹlieza ne ohẹn na tama ivbi e Rubẹn, e Gad, kevbe Manasẹ wẹẹ: “Nian, ma rẹnrẹn wẹẹ e Jehova gu ima rrọọ, rhunmwuda, wa ma ru orukhọ ghee Jehova. Nọnaghiyerriọ, e Jehova i khian ghi rri ima oya.”

32 Iyeke ọni, e Finihas ne ovbi Ẹlieza ne ohẹn, kevbe avbe ọkaolotu ne iran gba gha khian, na ke ehe ne Ivbi e Rubẹn, kevbe Gad ye vbe otọ e Giliẹd gha rrie otọ e Kenan, iran na ya na iyẹn ma Ivbi Izrẹl nikẹre. 33 Ivbi Izrẹl ghi họn ẹmwẹ ne iran tae, ọ na wa yẹẹ iran. Ẹre Ivbi Izrẹl na ghi gha rho Osanobua, iran ma ghi werriegbe tae wẹẹ, iran gha gu Ivbi e Rubẹn kevbe Ivbi e Gad gbinna, ne iran vbe fuẹn ẹvbo iran rua.

34 Ẹre Ivbi e Rubẹn kevbe Ivbi e Gad na ghi he ogiukpo nii eni,* rhunmwuda, iran khare wẹẹ, “osẹ nọ ne ima wẹẹ, e Jehova ọre Osa ọghe ẹmwata.”

23 Ẹghẹ eso* ghi gberra nẹ, ne Jehova ghi ya rhie ọfunmwegbe ne Ivbi Izrẹl vbe obọ eghian ni lẹga iran, na kha na, e Jọshua khian ọmaẹn nẹ, te ọ ghi vbe bu ẹghẹ nọ khian ya wu, 2 ọ na tie Ivbi Izrẹl hia, avbe ediọn, avbe ọkaolotu, avbe ọbuohiẹn, kevbe iran ni mwẹ asẹ vbe ẹvbo, ọ na tama iran wẹẹ: “I khian ọmaẹn nẹ; te ọ ghi vbe bu ẹghẹ ne I khian ya wu. 3 Aro uwa sẹ emwi hia ne Jehova ne Osa ọghe uwa ru avbe agbẹnvbo na re, nọ mieke na ru iyobọ ne uwa, rhunmwuda, e Jehova ne Osa ọghe uwa, ẹre ọ ghaa gbinna ne uwa. 4 Ghee ẹre, uta ẹre I ya ghae otọ ọghe avbe agbẹnvbo ni ghi kẹ, kevbe otọ ọghe avbe agbẹnvbo ne I khọnmiotọ yan, ke Jọdan ya sẹ Okun Nọkhua* vbe odẹ orrie,* I na mu ehia ne dọmwadẹ uniẹn ne uwa ke rre, nọ gha re ukhu ọghe uwa. 5 E Jehova ne Osa ọghe uwa ẹre ọ ghaa viọ iran hin odẹ rre ne uwa, ọ na vbe gu uwa khulo iran ladian,* ne uwa mieke na ya otọ ọghe iran khian ọghe uwa, zẹvbe ne Jehova ne Osa ọghe uwa yan ma uwa.

6 “Nian, wa ghi gha mwẹ udinmwẹ ẹsẹse, ne uwa mieke na gha ru emwi hia na gbẹnnẹ ye ebe Uhi e Mozis. Wa ghẹ rhie owẹ gberra erhọkpa vbọ. 7 Wa ghẹ vbe gu avbe agbẹnvbo ne uwa gba rrọọ gha mu obọ. Wa ghẹ sunu ye eni avbe ẹbọ ọghe iran, wa ghẹ vbe yae vẹn ihẹn. Wa ghẹ ga avbe ẹbọ ọghe iran, ra ne uwa ya uhunmwu rhanmwẹ otọ ne iran. 8 Sokpan, wa rhikhan mu e Jehova ne Osa ọghe uwa, zẹvbe ne uwa ru ẹre dee yi, do fi ẹdẹnẹrẹ. 9 E Jehova gha sirra uwa khulo avbe agbẹnvbo nikhua kevbe ni wegbe hin otọ ọghe iran rre. Do fi ẹdẹnẹrẹ, ọmwa rhọkpa ma he sẹtin khọnmiotọ yan uwa. 10 Orhunmwu ọkpa kẹkan vbe uwu uwa, gha zẹ orhunmwu arriaisẹn khu, rhunmwuda, e Jehova ne Osa ọghe uwa, ẹre ọ gbinna ne uwa, zẹvbe nọ yan ma uwa. 11 Rhunmwuda ọni, wa hoẹmwẹ e Jehova ne Osa ọghe uwa. Wa gha ru vberriọ, wa ghi gha re emwa ni ma fi egbe rua.

12 “Sokpan, deghẹ uwa na fi iyeke gbe Osanobua, wa na do gha gu emwa ni ghi kẹ vbe avbe agbẹnvbo na mu obọ, wa vbe iran na gha rọnmwẹ egbe, wa vbe iran na vbe gha ru emwi kugbe, 13 wa ghi rẹn wẹẹ, e Jehova ne Osa ọghe uwa i khian ghi gha khulo avbe agbẹnvbo na ladian* ne uwa. Iran ghi do yevbe akobẹ kevbe ifi ne uwa, iran ghi yevbe asan na ya bolo uwa iyeke, iran ghi vbe yevbe igban vbe aro uwa, a ghi te miẹn wẹẹ, wa gbẹro vbe otọ nọ maan na, ne Jehova ne Osa ọghe uwa mu ne uwa.

14 “Nian, te I khian ghi wu, dọmwadẹ ọghẹe vbe uwu uwa rẹnrẹn vbe ekhọe ọre kevbe orhiọn* rẹn wẹẹ, ẹmwẹ ọkpa ma he de fua vbe emwi ni maan hia, ne Jehova ne Osa ọghe uwa ve uwa re. Te ehia wa sunu zẹvbe nọ tae. Ọkpa ma vbe de fua vbọ. 15 Vbene emwi ni maan hia ne Jehova ne Osa ọghe uwa ve uwa ẹre, ya sẹ vbe egbe uwa, erriọ emwi dan hia ne Jehova yan rẹn, khian vbe sẹ vbe egbe uwa, ọ ghi vbe wabọ uwa hin otọ nọ maan na rre, ne Jehova ne Osa ọghe uwa mu ne uwa. 16 Deghẹ uwa na rra uhi ne Jehova ne Osa ọghe uwa gbe ne uwa, wa na ya gha ga avbe ẹbọ ọvbehe, wa na vbe gha ya uhunmwu rhanmwẹ otọ ne iran, e Jehova ghi suẹn gha mu ohu uwa, wa ghi vbe rherhe wulo vbe otọ nọ maan nọ mu ne uwa.”

24 E Jọshua keghi si uniẹn ọghe Izrẹl hia koko vbe Shikẹm, ẹre ọ na tie avbe ediọn, avbe ọkaolotu, avbe ọbuohiẹn, kevbe iran ni mwẹ asẹ vbe otọ Izrẹl, ẹre iran hia na mudia ye odaro Osanobua ọghe ẹmwata. 2 E Jọshua na tama iran hia wẹẹ: “Ọna ọre emwi ne Jehova ne Osa ọghe Izrẹl khare, ‘Obọ nọkpa ọghe Ẹzẹ nii,* ẹre avbe erha uwa odede ghaa ye vbe ẹghẹ nọ kpẹẹ fua, deba e Tira nọ ghaa re erha Ebraham kevbe erha e Nehọ. Ẹbọ ughughan ẹre iran ghaa ga.

3 “‘Ẹghẹ eso ghi gberra nẹ, I na rhie Ebraham ne erha uwa odede vbe obọ nọkpa ọghe Ẹzẹ nii,* I na rhie ẹre la otọ e Kenan hia, I na vbe ya uniẹn ọnrẹn* khian nọ bun. Ẹre I na ghi fiangbe ẹre, ọ na do biẹ Aizik; 4 Aizik na vbe biẹ e Jekọb kevbe Isọ. Ẹghẹ eso ghi gberra, I na mu Oke Siyẹ ne Isọ nọ gha re ọghẹe; e Jekọb kevbe ivbi ẹre na gha rrie Igipt. 5 Ọ ghi zẹ kpẹẹ, I na gie Mozis kevbe Erọn ne iran do ru iyobọ ne uwa, I na rri Ivbi Igipt oya, iyeke ọni, I na viọ uwa ladian vbe Igipt. 6 Vbe ẹghẹ ne I na gha viọ avbe erha uwa ladian vbe otọ Igipt, iran na do sẹ eke ne okun ye, Ivbi Igipt na ya ikẹkẹ okuo kevbe ẹsin gha khu iran khian, iran na khu iran ya sẹ Okun Nọ Baa. 7 Iran na suẹn gha tu tie Jehova, ẹre ọ na ghi ru ẹre ne ebiebi gha rre uwu ẹkpo uwa kevbe Ivbi Igipt. Ọ na ru ẹre ne okun lẹẹ rhu Ivbi Igipt, aro uwa vbe sẹ emwi ne I ru vbe Igipt. Iyeke ọni, wa na ghi gha rre uwu ato vbe ukpo* ni bun.

8 “‘Ẹre I na viọ uwa gha die otọ ọghe Ivbi Amọri ni ghaa rre obọ nọkpa* ọghe Jọdan, iran na gu uwa khọn. Sokpan, I na viọ iran ye uwa obọ, ne uwa mieke na ya otọ ọghe iran khian ọghe uwa, I na vbe sirra uwa wabọ iran rua. 9 Iyeke ọni, e Belak ne ovbi e Zipọ, ne ọba e Moab, na ya gu Ivbi Izrẹl khọn. Ọ na gie na tie Belam ne ovbi e Biọ, nọ do tie ihẹn ne uwa. 10 Sokpan, I ma danmwehọ e Belam. Rhunmwuda ọni, ọ na ghi na erhunmwu ne uwa inugba nọ khin, I na vbe miẹn uwa fan vbe obọ ọre.

11 “‘Iyeke ọni, wa keghi fian e Jọdan rra gha die Jẹriko. Avbe ọkaolotu* ọghe Jẹriko, Ivbi Amọri, Ivbi e Pẹriz, Ivbi e Kenan, Ivbi e Hẹt, Ivbi e Gigashi, Ivbi e Hivi, kevbe Ivbi e Jibọs keghi gu uwa khọn, sokpan, I keghi viọ iran hia ye uwa obọ. 12 I na ru ẹre ne iro han iran* vbene uwa te sẹ eke ne iran ye, ẹre iran na sirra uwa lẹẹ kua, vbene ọ vbe gha ye ne ọba eva ọghe Ivbi Amọri. Ẹ i re umozo kevbe uhanbọ ọghe uwa ẹre ọ ya iran lẹẹ. 13 I keghi mu otọ ne uwa ma miẹn ẹsọn yi, kevbe avbe ẹvbo ne uwa ma bu ne uwa, wa na dia ẹre ya. Evaẹn kevbe oliv ne uwa ma kọ, ẹre uwa ghi rhọọ.’

14 “Nọnaghiyerriọ, wa gha mu ohan e Jehova, ne uwa gha ya ekhọe nọhuanrẹn kevbe ẹkoata gae. Wa viọ avbe ẹbọ ne avbe erha uwa odede ghaa ga vbe obọ nọkpa ọghe Ẹzẹ nii,* kevbe ne iran ghaa ga vbe otọ Igipt kua, ne uwa gha ga e Jehova. 15 Nian, deghẹ emwi dan nọ vbe aro uwa ne uwa ga e Jehova, wa zẹ ọmwa ne uwa gha ga vbe ẹdẹnẹrẹ, deghẹ avbe ẹbọ ne avbe erha uwa odede ghaa ga vbe obọ nọkpa ọghe Ẹzẹ nii* nọ, ra avbe ẹbọ ọghe Ivbi Amọri ni yan otọ ne uwa ye na. Sokpan, nọ ne imẹ vbe igiowa mwẹ, e Jehova ẹre ima gha ga.”

16 Ẹre iran na ghi wanniẹn wẹẹ: “Ma i khian sẹtin fi iyeke gbe Jehova, ne ima do gha ga avbe ẹbọ ọvbehe. 17 E Jehova ne Osanobua mwa ẹre ọ viọ ima kevbe avbe erha ima ladian vbe otọ Igipt, ne ima na gha re eviẹn; irẹn ẹre ọ ru avbe iwinna ọyunnuan nikhua* na sirra ima, irẹn ẹre ọ ghaa su ima khian vbe ehe hia ne ima lae, irẹn ẹre ọ vbe su ima la otọ ẹvbo ughughan ne ima la gberra. 18 E Jehova keghi khulo emwa hia ni ka gha rre otọ na kua, ya sẹ egbe avbe Ivbi Amọri. Nọnaghiyerriọ, e Jehova ẹre ima khian vbe ga, rhunmwuda, irẹn ọre Osa ọghe ima.”

19 E Jọshua keghi tama iran wẹẹ: “Wa i khian sẹtin ga e Jehova, rhunmwuda, Osa nọhuanrẹn nọ; Osa nọ hoo na gha ya ekhọe hia ga irẹn ọkpa kẹkan, ẹre irẹn khin. Irẹn i khian ya abakuru* kevbe orukhọ ọghe uwa bọ uwa. 20 Deghẹ uwa na fi iyeke gbe Jehova, wa na ya gha ga avbe ẹbọ ọvbehe, ọ gha rri uwa oya, ọ ghi vbe wabọ uwa rua, agharhemiẹn wẹẹ ọ ka gha maan ne uwa dee yi.”

21 Sokpan, iran keghi tama e Jọshua wẹẹ: “E Jehova ẹre ima gha ga!” 22 Ẹre Jọshua na tama iran wẹẹ: “Wa ẹre ọ sẹ osẹ gbe egbe uwa, rhunmwuda, wa tobọ uwa ẹre ọ khare wẹẹ, e Jehova ẹre uwa gha ga.” Ẹre iran na ghi kha wẹẹ: “Osẹ ẹre ima khin.”

23 “Nọnaghiyerriọ, wa viọ avbe ẹbọ ọghe avbe agbẹnvbo ọvbehe ni gue uwa kua, ne uwa ya ekhọe hia gha lele Jehova ne Osa ọghe Izrẹl.” 24 Ẹre iran na tama e Jọshua wẹẹ: “Ma gha ga e Jehova ne Osanobua mwa, ma gha vbe họn ẹmwẹ nẹẹn!”

25 E Jọshua na gu iran ta ile vbe ẹdẹrriọ. Ọ na vbe yi iyi kevbe ilele ne iran vbe Shikẹm. 26 Iyeke ọni, e Jọshua na gbẹnnẹ ẹmwẹ na, ye ebe Uhi ọghe Osanobua. Ọ na mu okuta nọkhua, ọ na ya muẹn ye ototọ okperhan, nọ rre ọkpẹn ehe nọhuanrẹn ọghe Jehova.

27 E Jọshua na tama iran wẹẹ: “Ghee ẹre! Okuta na ẹre ọ khian gha re osẹ ne ima, rhunmwuda, ọ họn emwi hia ne Jehova tama ima. Okuta na ghi gha re osẹ, ne uwa ghẹ mieke na siẹn Osa ọghe uwa.” 28 Ẹre Jọshua na ghi we ne iran gha khian, dọmwadẹ ọghẹe na ghi gha rrie otọ na mu nẹẹn.

29 Iyeke ena hia, e Jọshua ne ovbi e Nọn, ne ọguọmwadia e Jehova, keghi wu vbe ọ rre ukpo igbe yan iyisẹn (110). 30 Ẹre iran na ghi ya ree ẹre ye ikinkin na na mu otọ nẹẹn vbe Timnat-sira, nọ rre ikinkin ne oke ye vbe Ifrem, vbe odẹ okuọ* ọghe Oke Ge-ash. 31 Ivbi Izrẹl na ye gha ga e Jehova, vbe ẹghẹ ne Jọshua ya gha rre agbọn, kevbe ẹghẹ ne ediọn hia ni ghaa rrọọ vbe Jọshua ghi wu nẹ, ya gha rre agbọn. Avbe ediọn na bẹghe emwi hia ne Jehova ru ne Ivbi Izrẹl.

32 Iran keghi ree ugboloko e Josẹf, ne Ivbi Izrẹl viọ ke Igipt gha dee ye Shikẹm, vbe otọ ne Jekọb ya e kesita* iyisẹn (100) dẹ vbe obọ ivbi e Hemọ, ne erha e Shikẹm; ọ na do gha re ukhu ọghe ivbi e Josẹf.

33 Ẹlieza ne ovbi Erọn na vbe wu. Ẹre iran na ya ree ẹre ye Otọ Nọ Yo Ọghe Finihas ne ovbi ẹre, na mu nẹẹn vbe ikinkin ne oke ye vbe Ifrem.