1 Samuẹl

27 E Devid keghi tama egbe ẹre wẹẹ, “E Sọl gha gbe mwẹ rua ẹdẹ ọkpa. Emwi nọ ke mẹ sẹ ne I gha ru ọrọre ne I lẹẹ fua gha rrie Filistia. Ẹghẹ nii, e Sọl i khian ghi gha gualọ mwẹ khian vbe otọ lzrẹl, ẹghẹ nii, l ghi do miẹn uhunmwu.” 2 Ẹre Devid kevbe emwa rẹn ni re arhin uri eha (600) na wa kpa, iran na bu Akis ne ovbi e Maọk ne ọba ọghe Gat. 3 E Devid kevbe emwa rẹn keghi gbe ẹkun sẹ otọ vbe Gat, iran kevbe ẹgbẹe ọghe iran. Amwẹ e Devid eva ighẹ Ahinoam nọ ke Jezrẹl rre kevbe Abigẹl ne amwẹ Nabal, nọ ke Kamẹl rre, vbe gha gu ẹre rre evba. 4 E Sọl ghi họn wẹẹ, e Devid lẹẹ gha rrie Gat, ọ ma ghi gha gualọe khian. 5 E Devid keghi tama Akis wẹẹ, “Adeghẹ ọse mwẹ ẹre u khin, rhie ovbi ẹvbo kherhe ọkpa mẹ, ne I yin ẹnrẹn, ọ ma khẹke ne I deba ruẹ gha rre igiogbẹ ọghe ẹvbo ruẹ.” 6 Ẹre Akis na mu e Ziklag nẹẹn. Ọna ẹre ọ si ẹre na na miẹn wẹẹ, avbe ọba e Juda ẹre ọ yan e Ziklag ke ẹghẹ nii gha dee. 7 E Devid keghi gbe uki enẹ irrọvbugie vbe Filistia. 8 E Devid kevbe emwa rẹn ghi mu igbinna gie emwa e Gẹsiọ, Gizi kevbe Amalẹk ni ka rre otọ nii dee yi, ke nẹkpo i mwẹ arria gha dee. Ọ ghi fu emwi ni rre otọ iran viọ, ya sẹ Siọ kevbe rhinrin ya sẹ lgipt, 9 ọ ghi gbele ikpia kevbe ikhuo ni rrọọ hia rua, ọ ghi viọ avbe ohuan, ẹmila, ekẹtẹkẹtẹ, ekamẹl, uhiẹn ya sẹ egbe ukpọn. Ọ ghi vbe werriegbe bu Akis. 10 Akis ghi nọ rẹn wẹẹ, “De odẹ ne u na ya hẹ rhu emwa vbe ẹghẹ na yi?” E Devid ghi tama rẹn wẹẹ odẹ ekẹn ọghe otọ e Juda nọ, ra otọ ọghe Ivbi e Jeramel ra otọ ne emwa e Ken ye. 11 E Devid ghi gbele emwa hia ke ikpia kevbe ikhuo, na ghẹ miẹn ọmwa nọ gha ya na iyẹn emwi ne irẹn vbe emwa rẹn ru vbe Gat. Erriọ ẹre Devid wa gha ru ẹre vbe ẹghẹ nọ yae vbe Filistia hia. 12 Akis keghi mu ẹtin yan e Devid, ọ wẹẹ, “Ivbi Izrẹl ne emwa rẹn khuiwu ẹre sẹrriọ wẹẹ, mẹ ẹre ọ khian gha ga ẹdẹdẹmwẹdẹ.”