Diuteronomi

30 “Banbanna nian, I viọ emwi yotọ ne uwa, ne uwa zẹ vbọ, deghẹ afiangbe nọ ra ihẹn. Emwi na hia gha sunu nẹ vbe egbe uwa, ighẹ te uwa ghi rre uwu ẹbu emwa ni rre ehe ne Jehova ne Osanobua uwa zagha uwa kua yi, wa ghi yerre avbe emwi ne I we ne uwa na zẹ. 2 “Ẹkpo nii, wa kevbe avbe ivbi uwa ghi fi werriẹ bu e Jehova ne Osanobua uwa gha dee, wa ghi ya ekhọe uwa hia kevbe orhiọn uwa hia gha lele uhi ẹre, ne imẹ rhie ne uwa ẹrẹna. 3 Ẹghẹ nii, e Jehova ne Osanobua uwa gha tohan uwa. Ọ ghi viọ uwa werriegbe ke ẹvbo nọ zagha uwa yi gha dee, ọ ghi dọlegbe gie agbọn ma uwa. 11 “Uhi ne imẹ viọ ne uwa ẹrẹna ma lọghọ gbe na lele, ọ ma vbe gberra ne ẹtin uwa gha sẹ. 12 E i re odukhunmwu vbe iso ẹre ọ ye amawẹ wa ghi kha wẹẹ, ‘Gha ọ ghi ra yo iso ne ima nọ ya muẹn tuorre ne ima họẹn kevbe ne ima vbe gha yae ru emwi?’ 13 Vberriọ ẹ i vbe re iyeke okun nọkpa ẹre ọ ye amawẹ wa gha kha wẹẹ, ‘Gha ọ ghi ra fian okun rra nọ ya rhie ẹre gie ima, ne ima miẹn ehe na họẹn ne a vbe gha yae ru emwi?’ E i re erriọ, 14 ọ rre ehe ne uwa ye vbe emwa na, wa rẹn ọnrẹn, wa gha sẹtin tae ye uhunmwu banbanna nian, wa gha yae ru emwi. 16 Adeghẹ uwa ya uhi e Jehova ne Osanobua uwa ne imẹ rhie ne uwa vbe ẹrẹna gha ru emwi, adeghẹ uwa họn ẹmwẹ nẹẹn, uwa na viọ uhi ẹre hia ya gha ru emwi, ẹghẹ nii agbọn gha maan uwa, uwa ghi vbe khian okpẹvbo nọkhua ne emwa nibun ye. E Jehova ne Osanobua uwa ghi fiangbe uwa vbe otọ ne uwa ra ya yin na. 19 Te I tama uwa nian ne uwa zẹ vbọ, adeghẹ arrọọ nọ ra uwu, adeghẹ afíangbe nọ ra ihẹn. I keghi vbe tie agbọn vbe ẹrinmwi ne iran sẹ osẹe ye ne uwa zẹ vbọ. Arrọọ ẹre ọ khẹke ne uwa zẹ ne uwa vbe ivbi uwa mieke na gha rre agbọn. 20 Wa hoẹmwẹ e Jehova ne Osanobua uwa, wa gha họn ẹmwẹ nẹẹn ne uwa vbe rhikhan muẹn, wa gha ru vberriọ wa vbe ivbi uwa gha tọ vbe otọ nii ne irẹn ve wẹẹ, irẹn gha mu ne avbe erha uwa odede, Ebraham, Aizik kevbe Jekọb.”