Diuteronomi

4 Gha khian lele Jehova ne Osa ruẹ, irẹn ẹre ọ khẹke ne u gha mu ohan rẹn, gha lele iyi ọghẹe, gha họn ẹmwẹ nẹẹn; irẹn ọkpa ẹre ọ khẹke ne u gha ga, ọ vbe khẹke ne u rhikhan muẹn. 5 Sokpan, deghẹ akhasẹ ra nọ rhan otọ imina bu ruẹ rre wẹẹ, ne u sọtẹ ghee Jehova ne Osanobua uwa, nọ fan uwa vbe imu ke otọ Igipt ne uwa na te gha re ọviẹn rre, uwa ghi gbe ẹre rua. Ọmwa dan, ẹre egbe ọmwa vberriọ khin, ọ hoo nọ gban uwa hin vbene Jehova wẹẹ ne u gha ru rre, rhunmwuda ọni, te ọ kere na gbe ẹre rua. Odẹ vberriọ, uwa gha sẹtin gbe ukhu ọkhọ vberriọ rua. 6 “Uhiẹn a sẹtin miẹn wẹẹ, ọtuẹn nokpia ra ovbuẹ nokpia ra nokhuo ra amwẹ ruẹ ne u hoẹmwẹ ọnrẹn ra ọtuẹn nọ sikẹ ruẹ sẹ, hoo nọ kọe yọ ruẹ ekhọe ne u suẹn gha gho ẹbọ ọvbehe, avbe ẹbọ ne uwẹ vbe avbe erhaa odede ma gho ẹdẹ. 7 Ọkpa vbe uwu iran sẹtin gha kọe yọ ruẹ ekhọe, ne u gha gho avbe ẹbọ ọghe emwa ne uwa gba yin kegbe ra nọ rre urria. 8 Ghẹ gi ẹre fi ekhọe ruẹ werriẹ, ghẹ kue zẹ ye ọre. Ghẹ tohan rẹn ra ne u mwẹ ẹnina daa ẹre, ghẹ vbe tan obọ gue ẹre. 9 Gbe ẹre rua! Uwẹ ghi gha re ọmwa okaro nọ gha ka fi okuta gbe ẹre, iyeke ọni, emwa ni dekẹe hia ghi vbe filo okuta gbe ẹre. 10 Filo okuta gbe ẹre rua, te ọ te hoo nọ bibi ruẹ odẹ hin ehe ne Jehova ne Osanobua ruẹ ye rre, ọmwa nọ fan ruẹ vbe imu vbe Igipt ne uwẹ na te gha re ọviẹn.