Ihuan ọghe Solomọn

4 A miẹn vbene u mose hẹ enida mwẹ, a miẹn vbene aro ruẹ fi hẹ wainwain zẹvbe ukpọn ne u rhie gue uharo. Eto ruẹ gha bi yo bi rre zẹvbe oghẹn ẹwe ni rhulẹ rrie ototọ oke Giliad. 2 Akọn ruẹ wa fuọfua zẹvbe ohuan na da kpolo ẹre eto, a na khuẹ ọre, ọkpa nọ kpaẹn fua i vbe rrọọ ehia keghi mudia ye umwọnmwẹ. 3 Akhuarhamwunu ruẹ yevbe ovbiọza ododo, u miẹn vbene iran mose hẹ vbe u gha guan! Irho ruẹ fi wainwain zẹvbe uwu ukpọn ne u rhie gue uharo. 4 Ẹyaẹn ruẹ yevbe orrẹ e Devid, ọ ye runmurunmu, ọ keghi rriẹ zẹvbe emwiurhu, ọ yevbe asa ne ivbiyokuo arriaisẹn lẹga. 5 Ewẹn ruẹ yevbe ivbi uzo, zẹvbe ẹrhuẹ eva ni rria vbe iyokho otọ. 6 I gha mudia vbe uhunmwu oke oziya, uhunmwu oke eturari rhinrin ẹhoho owiẹ te do gha hoho na ho ebiebi bẹkun. 7 A miẹn vbene u mose hẹ enida mwẹ; a miẹn vbe u ye kereghede hẹ! 8 Lele mwẹ ke Oke Lebanọn gha dee, ovbiọha mwẹ lele mwẹ ke Lebanọn gha dee. Tuorre ke uhunmwu Oke Amana gha dee ke uhunmwu Oke Sena kevbe Oke Hẹmọn gha dee, ehe ne avbe oduma kevbe akpakomiza ye. 9 Vbene u ya ghee ọmwa, ikpẹ amiẹnmiẹn mwẹ kevbe ovbiọha mwẹ, deba emwi urhu ne u mu ye urhu la mwẹ uhunmwu nẹ sin. 10 Ahoẹmwọmwa ruẹ ye egbe mu mwẹ, ikpẹ amiẹnmiẹn kevbe ovbiọha mwẹ. Ahoẹmwọmwa ruẹ maan sẹ ayọn, ori ruẹ winhin sẹ ori ke ori hia. 11 Orhiẹnrhiẹn owọn rre unu ruẹ enida mwẹ, aranmwẹ ruẹ, owọn kevbe ewẹn nọ mẹ. Uwinhinmwẹ e Lebanọn hia rre ukpọn ruẹ. 12 Ikpẹ amiẹnmiẹn mwẹ kevbe ovbiọha mwẹ, ogba ẹkhokho ẹre nọ, ogba na gbe ekẹn ga, ovbi ẹzẹ ọghe obọ mwa, 13 Evba nii, ivbi erhan na waan. Ehia waan rẹn zẹvbe ogba emwiokọ e pomegranet, iran keghi mọ ọmọ nọ maan sẹ. Avbe hena kevbe nad, 14 avbe safrọn, e kalamus, e sinamọn rrọọ ra eturari ughughan, avbe oziya kevbe alọi hia zọ vbọ deba uwinhinmwẹ ọzẹzẹ. 15 Ivbi ẹzẹ ẹre ọ gbe amẹ khakha ogba nii, avbe ẹzẹ ne amẹ na lẹẹ, ivbi ẹzẹ ni lẹẹ ke oke Lebanọn tuorre. 16 Kpaegbe ẹhoho odẹ Okuọ, ẹhoho odẹ Ekẹn, hoho ye ogba mwẹ, ya uwinhinmwẹ vuọn ẹhoho hia. Gi enida mwẹ gha die uwu ogba ẹre, nọ do rri ọmọ erhan nọ maan sẹ vbọ.