Itan

3 Gbẹnnẹ iran ye ikpianbọ ruẹ; Gbẹnnẹ iran ye ekhọe ruẹ. 6 Ẹghẹ ọkpa, I ke rhie aro la ewindo owa mwẹ ladian gha ghee orere. 7 I keghi bẹghe emwa ni ma he rẹn agbọn, I na bẹghe igbama ọkpa ne ẹwaẹn ma gba na, vbe uwu ẹbu ihua ẹre. 8 Ọ keghi gha lele ore khian, ọ na la ẹkhokho ọkpa ne okhuo ọkpa ye. Ọ keghi la ọkpẹn owa ẹre gberra 9 vbe ota, vbe ebi ro nẹ. 10 Ẹre okhuo na, na do dekun ẹnrẹn, okhuo na keghi mu egbe vbe igbiragia, ọmwa erẹrẹ nọ. 11 Okhuo na kegha re ọmwa nọ fa vbe aro, kevbe ne ohan i mu, nọ wa va ore khian. 12 Ọ gha mudia ye adesẹ ore, ọ vbe gha rhie ẹki, erriọ ẹre a vbe ya miẹn ọnrẹn vbe ọkpẹn ẹkhokho. 13 Ọ keghi viọ obọ kinnọ igbama na urhu, ọ ye unu soso ẹre unu, ọ rhie aro fi ẹre uwu aro, ọ na tama rẹn wẹẹ, 14 “Ẹdẹnẹrẹ ẹre I yo imuohan, emiowo nọ sẹ mwẹ obọ, na ya zọ ese gue mwẹ. 15 Rhunmwuda ọni, I keghi ladian ne I do gualọ ruẹ, I ke wa gha hoo ne I miọn, ma miẹn ighẹ u wa rre nian! 16 Ukpọn eto ovbiohuẹ, na ya ẹmu mu vbe Igipt, ẹre I ya waa ukpo mwẹ. 17 I gbe ori nọ winhin khakhae, avbe oziya, aloe kevbe esinamọn. 18 Larre, gi ima gba ya sọyẹnmwẹ egbe ne ẹdẹgbe. Agbọn gha rhiẹnrhiẹn ẹsẹse vbe imẹ vbe ruẹ gha sikan mu egbe urhu. 19 Ọdafẹn mwẹ i rre owa, ehe nọ rrie wa rree. 20 Ọ rhie igho nọ kpọlọ mwẹ obọ, ẹi he dee ọ te ya sẹ uzọla eva.” 21 Erriọ ya mu ẹre rẹrẹ. Ọ na deyọ rhunmwuda ọta nọ rhiẹnrhiẹn. 22 Ọ keghi wa lelẹe kpa vbe ọwara ọkpa nii, vbene ẹmila rrie ehe na khian na gbe ẹre, ra ẹrhuẹ nọ rhulẹ rrie ifi, 23 ehe ne ifẹnmwẹ gha na ha ẹre ẹkokoudu gberra. Ọ keghi yevbe ahianmwẹ nọ khian tin la ifi, ọ ma rẹn wẹẹ te irẹn rhie uhunmwu mwẹ atatabọ. 24 Rhunmwuda ọnii nian, ivbi mwẹ, wa danmwehọ mwẹ. Wa rhie ehọ ye ẹmwẹ ne I ta. 25 Wa ghẹ gie ẹmwẹ okhuo vberriọ la uwa aro, wa ghẹ bibi lelẹe. 26 Ikpia nibun ẹre ẹbe he rruan rhunmwuda ẹre, ikpia ni he ya uhunmwu khiọ ẹmwẹ ọnrẹn bun gbe. 27 U gha yo owa ẹre, idin ruẹ ẹre u tọnnọ. Odẹ na na fian uwu re.