Psalm
94 E Jehova, Osanobua nọ rri ọmwa oya ye ọkhọ, ẹre uwẹ khin; rhie izohu ruẹ ma! 2 Wẹ ẹre ọ bu ohiẹn emwa hia, kpaegbe, ne u ru avbe emwa ni tọn egbe mu emwi nọ ma iran. 3 Vbe avbe emwa dan gha ghọghọ kpẹẹ sẹ hẹ yi? Vbọ gha kpẹẹ sẹ hẹ Jehova? 4 Vbọ gha kpẹẹ sẹ hẹ yi, ighẹ ẹghẹ ne avbe emwa dan khian ya gha hio, ne iran gha ya emwi dan ne iran ru rhuọ? 5 Iran wa rẹnkhẹn emwa ruẹ Jehova, iran zẹ emwa ni re ọghuẹ kpokpo. 6 Iran gbele avbe ikhuo ni dẹgbẹe kevbe emọ nẹi mwẹ erha, iran keghi vbe gbele avbe ọrriọvbe ni rre otọ ima. 7 Iran khare wẹẹ, “E Jah ma bẹghe ima; Osanobua Izrẹl ma rhie aro yọ.” 8 Wa ne emwa mwẹ, vbe uwa na kọn de ọzuọ rua hẹ vberriọ yi? De ẹghẹ ne uwa gha ya rẹn emwi yi? 9 Osanobua nọ yi ehọ ima, ẹ i họn ẹmwẹ ra? Irẹn ẹre ọ yi aro ima, ẹ i bẹghe ra? 10 Irẹn ẹre ọ gbaroghe agbẹnvbo hia, ẹ i rri iran oya ye ọkhọ ra? Irẹn ẹre ọ ma emwa hia emwi, irẹn i mwẹ irẹnmwi ra? 11 E Jehova rẹn iro ne iran zẹ; ọ rẹn vbene iro ọghe iran re ọghe akpa hẹ. 12 E Jah, afiangbe nọ ne ọmwa ne uwẹ ma ẹre emwi, ọmwa ne uwẹ ma ẹre uhi ruẹ! 13 U rhie ikẹtin nẹẹn vbe ẹghẹ ibaro, a te do tọn uye na khian mu ọmwa dan fi. 14 E Jehova i khian he emwa rẹn yotọ, ẹ i khian fi iyeke gbe iran ni re ọghẹe. 15 A gha ye miẹn ẹmwata vbe uwu iko ibuohiẹn, emwa ẹmwata hia gha wa ya egbe ba ẹre. 16 De ọmwa nọ gu emwa dan gbinna mẹ yi? De ọmwa nọ gha deba mwẹ gbodan ghee emwa dan? 17 Akpawẹ ẹ i re Jehova nọ mudia mẹ, ọghomwẹ gha te fo nẹ. 18 Vbe I khare wẹẹ, “Te I khian ghi dee,” ahoẹmwọmwa ruẹ nẹi beghe, Eo Jehova, keghi da mwẹ yi. 19 Ẹghẹ ke ẹghẹ ne udu mwẹ ya mu waa, l na vbe gha hawa, u ghi fu mwẹ ẹko rre, u ghi vbe ya mwẹ gha sọyẹnmwẹ. 20 Wẹ vbe emwa ni rre ukpo ọdakha ne obọ iran ma huan gha sẹtin gha ru emwi kugbe, vbene iran na ya uhi mu ọmwa fi ẹmwẹ ra? 21 Iran keghi khuan khẹ emwa ẹmwata, iran vbe bu abe uwu gbe ọmwa nọ ma rri abe. 22 Sokpan, e Jehova ẹre ọ gbinna mẹ, Osanobua mwẹ ọre okuta nọ degue mwẹ. 23 Ọ gha rri iran oya ye emwi dan ne iran ru, ọ gha fuẹn iran rua ba ẹmwẹ orukhọ ọghe iran. E Jehova ne Osanobua mwa gha fuẹn iran rua.