Psalm

89 E Jehova, mẹ gha so ihuan ahoẹmwọmwa ruẹ nẹi beghe vbe ẹghẹ hia, I gha na iyẹn aguobọmwa ruẹ ẹdẹdẹmwẹdẹ. 2 Mẹ rẹnrẹn wẹẹ ahoẹmwọmwa ruẹ ọghe etẹbitẹ nọ, kevbe wẹẹ aguobọmwa ruẹ, te ọ ye gbain zẹvbe iso. 3 Wẹ khare wẹẹ, “I gu ọmwa ne I hannọ zẹ ta ile nẹ; l tama e Devid ne ọguọmwadia mwẹ nẹ wẹẹ: 4 ‘Ovbi uniẹn ruẹ ẹre ọ khian gha rri ọba khian. I gha gbe ebe gue uniẹn ruẹ ni rri ọba ẹdẹdẹmwẹdẹ!’” 5 Ẹrinmwi ya emwi ọyunnuan ne u ru so ihuan, iran ya aguobọmwa ruẹ so ihuan, Eo Jehova. 6 Ọmwa nọ yevbe ruẹ i rre ẹrinmwi Jehova. Gha nọ vbe uwu ivbi Osanobua nọ yevbe Jehova? 7 Te a wa rhie ọghọ ne Osanobua vbe iko ọghe emwa ni huanrẹn; te ohan ruẹ wa mu iran hia. 8 Eo Jehova ne Osa ọghe ivbiyokuo, ọmwa nọ mwẹ ẹtin vbe na ghee uwẹ i rrọọ, Eo Jah. Te uwẹ gia mu ẹtin yan. 9 Wẹ ẹre ọ kha yan okun nọ wegbe, wẹ ẹre ọ dọ uhumwẹ ọnrẹn ne ohu mu yọ. 10 U khọnmiotọ yan e Rehab, u keghi gbe ẹre rua. U ya ẹtin ruẹ nọkhua khọn avbe eghian ruẹ mu otọ. 11 Wẹ ẹre ọ yan ẹrinmwi kevbe agbọn, wẹ ẹre ọ yi agbọn kevbe emwi hia ni rre uwu ẹre. 12 Wẹ ẹre ọ yi odẹ okuọ kevbe ahọ; Oke Tabọ kevbe Oke Hẹmọn, iran hia ya oghọghọ so ihuan ghee ruẹ. 13 A miẹn vbene u mwẹ ẹtin hẹ! A miẹn vbene ẹtin ruẹ kpọlọ hẹ! 14 Ẹmwata kevbe uhunmwu ẹmwẹ, ẹre a gbe ẹyotọ arriọba ruẹ yan, ọmwa nọ gia mu ẹtin yan ẹre u khin, u vbe mwẹ ahoẹmwọmwa nẹi beghe. 15 Oghọghọ nọ ne iran ni so ihuan ya rho ruẹ. Eo Jehova, iran keghi rrọọ vbe uwu uwanmwẹ itohan ruẹ. 16 Rhunmwuda uwẹ, ẹre ọyẹnmwẹ na sẹ iran ne ebi ro, iran ghi vbe gha rho ruẹ ba ẹmwẹ umamwẹ ruẹ. 17 U keghi ya emwa ruẹ khian emwa ni wegbe, u na vbe mu uyi ye iran egbe. Te ima ghi mwẹ ẹtin yọ, rhunmwuda ne ẹmwẹ ima na yẹẹ ruẹ. 18 E Jehova, wẹ ẹre ọ zẹ ọmwa nọ degue ima, wẹ, Ọmwa Nọ Huanrẹn Ọghe Izrẹl, ẹre ọ rhie ọba mwa ne ima. 19 Vbe ẹghẹ nọ kpẹẹ fua, u tama eguọmwadia ruẹ ni guobọ ruẹ vbe umian wẹẹ, “Mẹ rhie iyobọ ne ovbiyokuo nọ hin usi nẹ, I vbe mu ẹkete nii ne ọmwa ne I hannọ zẹ, vbe uwu avbe emwa nii nẹ. 20 I ya e Devid ne ọguọmwadia mwẹ rri ọba nẹ, vbekpa ne I na sa ori nọhuanrẹn ye ọre uhunmwu. 21 Ẹtin mwẹ gha gu ẹre gha rrọọ vbe ẹghẹ hia, ẹtin mwẹ gha yae wegbe. 22 Obọ eghian rẹn i ra gba ẹre ẹdẹ, emwa dan i ra sẹtin muẹn gbotọ. 23 I gha rẹnkhẹn avbe eghian rẹn, I ghi vbe gbele iran ni khuiwu ẹre. 24 I gha hoẹmwẹ ọnrẹn, I ghi vbe guobọ ẹre ẹsẹse. I gha yae gha khọnmiotọ vbe ẹghẹ hia 34 Mẹ i ra so ile ne I gu ruẹ ta gọ, ra ne I kie werriegbe vbe emwi ne I ve ẹre re. 35 I ya eni mwẹ nọ huanrẹn yan nẹ uhukpa, ne ọre ọghe ẹdẹ hia, mẹ i ra ta ohoghe ma e Devid ẹdẹ. 36 Te ivbi uniẹn ọnrẹn khian gha rrọọ vbe ẹdẹdẹmwẹdẹ. Arriọba ọghẹe gha vbe gha rrọọ la ẹghẹ ne ovẹn gha vbe yunmwu la. 37 Ọ gha mudia gbain zẹ vbe uki ne osẹe ẹmwata nọ rre iso.”