Psalm

69 Osanobua, miẹn mwẹ fan, amẹ vuọn sẹ mwẹ ẹyaẹn nẹ. 2 Te I dinmwi ye uwu ọrho nọ dinmwi, otọ nọ kae i rrọọ, uwu odin ẹre I wa ye, te ubimwẹ amẹ ghi ra gbe mwẹ ye ẹzẹ. 3 Egbe wọọ mwẹ ne I ya tu nọ iyobọ, urhu mwẹ vbe kaka, te aro mwẹ ghi vboo ne I ya gualọ iyobọ ruẹ. 4 Iran ni wa gheghe khuiwu mwẹ bun sẹ eto ne uhunmwu mwẹ. Avbe eghian mwẹ ni khuiwu mwẹ, vbene I ma na ru emwi rhọkpa wa bun, iran vbe hoo ne iran gbe mwẹ rua. Ẹtin vbe iwegbe ẹre iran ya we ne I ha osa emwi ne I ma rhie. 5 Osanobua, a ma viọ orukhọ mwẹ lẹre nuẹn, wẹ rẹn vbene I kọn sẹ hẹ. 6 Ghẹ gu mwẹ ya ekhue mu iran ni mu ẹtin iran yan ruẹ Osa ne Udazi, e Jehova ne Osa ọghe ivbiyokuo! Ghẹ gu mwẹ fa iran ni ga Osanobua Izrẹl rua. 7 Rhunmwuda ruẹ, ẹre a na tie ihẹn mẹ, na na vbe ya ekhue rhu mwẹ ginna otọ. 8 Te I yevbe orhunmwuyẹn ne avbe etẹn mwẹ, zẹvbe ọrriọvbe ne ẹgbẹe mwẹ. 9 Ẹmwẹ owa ruẹ fian mwẹ re, ọ yọn vbe uwu egbe mwẹ vbe na ghee erhẹn, Ozan ne iran zaan ruẹ, uhunmwu mwẹ ẹre ehia ye. 10 I yo aguẹ ya mu egbe mwẹ rriotọ, emwa keghi gha zaan mwẹ. 11 I viọ ukpọn akhiẹ ye egbe, iran na vbe gha giẹ mwẹ. 12 Ẹmwẹ mwẹ ẹre iran ta khian vbe odẹ, mẹ ẹre avbe ọdayọn ghi ya so ihuan. 13 Sokpan zẹvbe ọghomwẹ, mẹ gha na erhunmwu ghee ruẹ Jehova. Osanobua, zẹ ẹmwẹ wanniẹn mwẹ, vbe ẹghẹ nọ khọn ruẹ. Zẹ ẹmwẹ wanniẹn mwẹ, rhunmwuda wẹ muẹn sẹ ighẹ eyan ne u yan rẹn wẹẹ, u gha miẹn ọmwa fan. 14 Miẹn mwẹ fan ne I ghẹ dinmwi ye uwu ọrho, miẹn mwẹ fan vbe obọ avbe eghian mwẹ, ne I fe vbe obọ odin amẹ. 15 Ghẹ gi amẹ nii lẹẹ rhu mwẹ, ghẹ gi ẹzẹ gbe mwẹ ye uwu odin, ra ne I dinmwi la uwu idin. 16 Rhie ewanniẹn mẹ Jehova, vbe umamwẹ ahoẹmwọmwa ruẹ nẹi beghe, vbe uwu itohan ruẹ nọkhua, gbe bu mwẹ rre! 17 Ghẹ rhiegbe lẹre ne ọguọmwadia ruẹ, uwu ibaro nọkhua ẹre I ye na, zẹ ẹmwẹ wanniẹn mwẹ nian. 18 Bu mwẹ gha dee ne u do miẹn mwẹ fan, rhan mwẹ yotọ hin obọ avbe eghian mwẹ. 19 U rẹnrẹn vbene emwa rhovbiẹ mwẹ hẹ, vbene iran fa mwẹ rua kevbe vbene iran ya oya mẹ hẹ, u bẹghe avbe eghian mwẹ hia. 20 Ihẹn ne iran tie ya ẹkokoudu mwẹ wagha, emwi hia wa khan mwẹ. Te I te rhie aro ye itohan, sokpan, I ma miẹn, I te rhie aro ye egberọkhọmwẹ sokpan, ọ ma sẹ mwẹ obọ. 21 Ẹghẹ ne ohanmwẹ na gha gbe mwẹ, iran keghi rhie eruan mẹ, ẹghẹ ne ovbamẹ na gha gbe mwẹ, iran keghi mu okikan gu mwẹ. 22 Gi evbare ọghe iran do gha re akobẹ ne iran, Gi ẹfe ọghe iran vbe gha re ifi ne iran. 23 Gi ebiebi so ye iran aro, ne iran ghẹ mieke na bẹghe odẹ, ne u gi ugboloko ẹkun gha kpee iran. 24 Hihiẹ ohu ruẹ yan iran, gi obọ izohu ruẹ vba iran. 25 Te agọ iran gha dihoi rua, a i khian miẹn ọmwa nọ gha miẹn uhunmwu vbe owa ukpọn ọghe iran. 30 I gha so ihuan ya rho Osanobua, I gha kpọnmwẹ ọnrẹn, ne I ya rhie ukpọlọmwẹ ọnrẹn ma. 31 Ọna gha yẹẹ e Jehova sẹ ne I gha mu ẹmila nẹẹn, ra ne I ya ẹkhuia nọ dido zọ ese nẹẹn.