Psalm

66 Wa we uwemwẹ oghọghọ ya rho Osanobua, wa ne emwa hia. 2 Wa so ihuan uyi gie eni ẹnrẹn, wa rhie urhomwẹ uyi nẹẹn. 3 Wa tama Osanobua wẹẹ, “A miẹn vbe emwi ne u ru hia re ọyunnuan hẹ! Ẹtin ruẹ kpọlọ sẹ vberriọ wẹẹ, te avbe eghian ruẹ hia ya ohan de fi iguẹ vbe odaro ruẹ. 4 Emwa hia ni rre agbọn ẹre ọ ga ruẹ, iran ghi gha so ihuan urhomwẹ ghee ruẹ, iran ghi gha so ihuan urhomwẹ ghee eni ruẹ.” 5 Wa do ghee iwinna ne Osanobua winnaẹn, iwinna ọyunnuan rẹn vbe uwu ẹbu emwa. 6 Ọ ya okun khian otọ nọ kae, avbe erha mwa odede keghi ya owẹ fian ẹzẹ rra. Ma ghọghọe ye emwi nọ ru vbe evba nii. 7 Ẹtin ẹnrẹn ẹre ọ ya khaevbisẹ, rhinrin ẹdẹ. Ọ rhie aro yotọ vbe egbe avbe agbẹnvbo. Wa ghẹ gi avbe etẹ gha tọn egbe mu. 8 Wa rho Osanobua mwa wa ne agbẹnvbo hia. Wa gha ya urhu nọ lae rhie urhomwẹ nẹẹn. 9 Irẹn ẹre ọ gi ima gha rre agbọn, Ọ ma vbe gi ima dele. 10 Osanobua, wẹ danmwẹ ima ghee nẹ; zẹvbe na kpe esiliva vbe erhẹn, erriọ ẹre uwẹ danmwẹ ima ghee. 11 U gi ima dele ye irri, u keghi vbe mu ihẹ nọkhua yan ima uhunmwu. 12 U gi avbe eghian ima ya owẹ rhilo ima muotọ; ma la erhẹn kevbe uromwẹ amẹ gberra sokpan, banbanna nian, u viọ ima gha die ehe ne ẹbe i ye. 13 I gha viọ ese na giẹn ruan rrie owa ruẹ, I gha viọ emwi ne I ve ye urhu guẹ. 14 Emwi ne l we I gha viọ rre, vbe ẹghẹ ne I na gha rre ọlọghọmwa, I gha viọ ẹre rre. 15 I gha mu ohuan rre na giẹn ọnrẹn vbe ogiukpo, l gha ya ẹmila kevbe ẹwe zọ ese, ighogho ẹre ghi gha la ghee iso. 16 Wa danmwehọ, wa hia ni ya ọghọ ne Osanobua, mẹ gha vbe ta emwi nọ ru mẹ ma uwa. 17 I kpee tie ẹre wẹẹ nọ yọ mwẹ obọ, I ya ihuan rho ẹre. 18 Akpawẹ iziro dan rhọkpa rrọọ mwẹ ekhọe, e Jehova i ghẹ họn erhunmwu mwẹ. 19 Sokpan, Osanobua gele họn ọghomwẹ nẹ, ọ vbe danmwehọ erhunmwu mwẹ. 20 I rho Osanobua, rhunmwuda, ọ ma fieghe uhunmwu ye erhunmwu mwẹ, ra nọ dobọ re yi ighẹ ahoẹmwọmwa ọghẹe nẹi beghe, nọ mwẹ daa mwẹ.