Psalm
51 Tohan mwẹ Osanobua, rhunmwuda ahoẹmwọmwa ruẹ nẹi beghe. Rhunmwuda itohan ruẹ nọ kpọlọ, khiẹn orukhọ mwẹ. 2 Khuẹ emwi dan mwẹ hia kua, ne u vbe khuẹ mwẹ huan hin orukhọ mwẹ rre. 3 Mẹ miẹn abakuru mwẹ hia kue; ẹghẹ hia ẹre I ya mu ẹmwẹ orukhọ mwẹ roro. 4 I ru khọọ ghee ruẹ nẹ, uwẹ ọkpa ẹre I ru khọọ ghee, I keghi vbe ru emwi ne uwẹ ka ye orukhọ. Rhunmwuda ọni, u rriase vbe u buohiẹn mwẹ, emwi nọ kere ẹre u ru, vbe u bu abe gbe mwẹ. 5 Ọmwa orukhọ ẹre I wa khin, ke na ya biẹ mwẹ gha dee, I keghi wa vuọn ne orukhọ ke ẹdẹ na biẹ mwẹ kpa. 6 Ekhọe nọ diae kevbe ẹmwata ẹre uwẹ hoo; ya ẹwaẹn ruẹ vuọn ekhọe mwẹ. 7 Khiẹn orukhọ mwẹ, mẹ gha huan, khuẹ mwẹ, mẹ gha fua sẹ isonorhọ. 8 Gu mwẹ họn urhu oghọghọ kevbe ọyẹnmwẹ. Agharhemiẹn ighẹ u lọkọ mwẹ, u vbe rẹnkhẹn mwẹ ruan nẹ, ẹko mwẹ gha ye dọlegbe rhiẹnrhiẹn. 9 Rhie aro hin orukhọ mwẹ rre, ne u vbe khiẹn emwi dan mwẹ hia ne I he ru. 10 Yi ekhọe nọ hianrẹn ye uwu imẹ Osanobua, ne u vbe mu ekhọe ọgbọn nọ guobọ ruẹ ye uwu imẹ. 11 Ghẹ kan mwẹ fua hin ehe ne u ye rre, ghẹ vbe miẹn mwẹ orhiọn nọhuanrẹn ruẹ. 12 Rhie oghọghọ imiẹnfan ruẹ dọlegbe mẹ, ru iyobọ mẹ ne I gha họn ẹmwẹ nuẹn. 13 Ẹghẹ nii, mẹ gha ma avbe emwa orukhọ uhi ruẹ, iran ghi dọlegbe bu ruẹ gha dee. 14 Gu mwẹ miẹn uhunmwu vbe abe esagiẹn, mẹ gha ya oghọghọ na iyẹn ẹmwata ruẹ. 15 Eo Jehova, yọ mwẹ obọ ne I guan, mẹ gha vbe gha rho ruẹ. 16 Wẹ i gualọ ese, te I gha te zọ ghee ruẹ. Ẹko ruẹ i vbe rhiẹnrhiẹn ye ese na giẹn ruan. 17 Izọese mwẹ, ọre ekhọe nọ mu egbe rriotọ Osanobua, wẹ i ra he ekhọe nọ mu egbe rriotọ, kevbe nọ roro iro fi uyinmwẹ werriẹ. 18 Osanobua, tohan e Zaiọn, ne u yi ọre obọ, dọlegbe gbe ekẹn e Jerusalẹm. 19 Ẹghẹ nii, ẹko gha rhiẹnrhiẹn ruẹ ye ese ẹmwata. Ma gha vbe zọ ese na giẹn ruan kevbe ese ekhuia ẹmila vbe ogiukpo ruẹ.