Psalm

27 E Jehova ọre uwanmwẹ mwẹ kevbe imiẹnfan mwẹ, de ọmwa ne ohan rẹn gha mu mwẹ? E Jehova ẹre ọ degue mwẹ hin uwu ẹbe hia, afianma i ghi fian mwẹ. 2 Ugbẹnvbe iran ne emwa dan dekun mwẹ, iran keghi dele. 3 Ọ gha khọnrẹn wẹẹ, te okuo ghae ga mwẹ, afianma i ra fian mwẹ, ọ gha khọn avbe eghian, we ne iran dekun mwẹ, te imẹ gha ye mu ẹtin yan Osanobua. 4 Emwi ọkpa, ẹre imẹ nọ e Jehova re, emwi ọkpa nii ẹre I vbe hoo, ọni ọre ne imẹ gha rre uwu owa e Jehova vbe ẹdẹdẹmwẹdẹ. Ne I gha ya ọyunnuan ghee iwinna rẹn, nọ gha ma mwẹ odẹ. 5 Ọ gha degue mwẹ vbe ẹghẹ ibavbaro, ọ gha rhie mwẹ lẹre vbe uwu ọgua Osa ẹre, vbe nai na mwẹ ẹbe. Ọ ghi vbe gi ẹkun sẹ mwẹ otọ vbe uhunmwu okuta nọ yo. 6 Erriọ ẹre I gha na khọnmiotọ vbe uhunmwu avbe eghian mwẹ ni lẹga mwẹ. I gha ya urhu oghọghọ nọ la zọ ese vbe uwu ọgua Osa ẹre. I gha so ihuan, I gha rho e Jehova. 7 Họn ọghomwẹ Jehova vbe I gha datie ruẹ, tohan mwẹ ne u vbe zẹ ẹmwẹ wanniẹn mwẹ. 8 Ẹghẹ ne uwẹ na kha wẹẹ, “Wa larre do gha ga mwẹ.” Mẹ keghi wanniẹn wẹẹ, “Jehova, I gha rre.” 9 Ghẹ rhiegbe lẹre mẹ, ghẹ mu ohu mwẹ, ghẹ khu ọguọmwadia ruẹ werriegbe, wẹ ọre nọ yọ mwẹ obọ dee ẹdẹ, ghẹ sẹ mwẹ rae, ghẹ fi iyeke gbe mwẹ, Osanobua ne ọmiọnmwafan mwẹ. 10 Erha mwẹ vbe iye mwẹ sẹtin he mwẹ yotọ, sokpan, e Jehova gha gbaroghe mwẹ. 11 E Jehova, ma mwẹ emwi ne u hoo ne I ru, ne u vbe rhie mwẹ la odẹ ne ẹbe i ye, rhunmwuda, eghian ne I mwẹ wa bun. 12 Ghẹ sẹ mwẹ rae ne avbe eghian mwẹ, ni ya ohoghe kevbe a yan khẹ ọmwa gu mwẹ gbinna. 13 De vbene I gha te khian ẹmwẹ agbọn mwẹ hẹ, akpawẹ I i mwẹ amuẹtinyan wẹẹ, I gha miẹn umamwẹ ọghe Jehova vbe otọ emwa ni ye rre agbọn. 14 Mu ẹtin yan e Jehova, gha mwẹ udinmwẹ, ghẹ gi ẹtin fuẹ. Mu ẹtin yan e Jehova.