Psalm
141 Eo Jehova, I kpe tie ruẹ, yọ mwẹ obọ nian! Danmwehọ mwẹ vbe I ra gha kpe tie ruẹ. 2 Rhan obọ miẹn erhunmwu mwẹ yi zẹvbe eturari, obọ ne I viọ ghee okhunmwu zẹvbe izọese ota. 3 Eo Jehova, rhie ọkhẹ yọ mwẹ unu, kevbe ọbodẹ ye onurho akhuarhamwunu mwẹ. 4 Ghẹ gu mwẹ gha hoo ne I ru emwi nọ ma gba, ra ne I deba emwa dan vbe uyinmwẹ ọkhọ ọghe iran. I i gha gu iran rri evbare kugbe ẹdẹ. 5 Ọmwa esi gha fi mwẹ emwi, ọ rhie ma wẹẹ, ọ mwẹ ahoẹmwọmwa nẹi beghe daa mwẹ, ọ gha gbe mwẹ hin ọkhọ rre, ọ ghi yevbe ori na ya wuo mwẹ uhunmwu, I ghi wa miẹn ọnrẹn yi. Te I khian ye gha na erhunmwu ne iran, uhiẹn vbe iran gha rre uwu ibavbaro. 6 A gha sua avbe iran ni khaevbisẹ yan iran, kevbe oke okuta gbe otọ nẹ, emwa nii gha miẹn kue wẹẹ ẹmwata ẹre I tae. 7 Zẹvbe erhan na sọ re, na vbe giẹgiẹ ye otọ, erriọ ugboloko iran zagha lele ọkpẹn idin. 8 Sokpan, te imẹ ye mu ẹtin yan ruẹ khian, e Jehova ne Osanobua mwẹ. Wẹ ẹre I lẹgbinna, ghẹ gu mwẹ wu. 9 Degue mwẹ hin obọ ifi ne iran khuẹn khẹ mwẹ, degue mwẹ hin obọ akobẹ emwa dan nii. 10 Te emwa dan gha dele ye ifi iran tobọ iran, vbene imẹ gha na la evba gberra vbe hẹnnẹdẹn.