Psalm
139 Eo Jehova, wẹ danmwẹ mwẹ ghee nẹ, u vbe rẹn mwẹ nẹ. 2 U rẹn emwi ne I ru hia, urria gbaan ẹre u na rẹn iro ekhọe mwẹ hia. 3 Wẹ bẹghe mwẹ, deghẹ te I winna ra te I hẹwẹ, u rẹn emwi ne I ru hia. 4 Uhiẹn vbe I te guan ladian, eo Jehova, u rẹn ẹmwẹ ne I ra ta nẹ. 5 Te u wa lẹga mwẹ vbe egbe hia; u keghi ya ẹtin ruẹ degue mwẹ. 6 Irẹnmwi vberriọ dinmwi gbe, ọ gberra ne I gha sẹtin rẹn otọ ẹre. 7 De ehe ne I gha yo, ne I gha na lẹẹ fe ruẹ? De ehe ne I gha na sẹtin lẹẹ hin ehe ne u ye rre? 8 Deghẹ I hin odukhunmwu la ẹrinmwi, wẹ ra gha rre evba; adeghẹ I ya lovbiẹ ye ehe ne iran ni wulo nẹ ye, wẹ ra gha rre evba. 9 Adeghẹ te I tin fua gberra owẹn owiẹ, ra ehe nọ ghi rree sẹ vbe orrie, 10 wẹ ra gha rre evba ne u su mwẹ, u ra gha rre evba ne u yọ mwẹ obọ. 11 I sẹtin tama ebiebi nọ rhie mwẹ lẹre, ra ne uwanmwẹ nọ rre ehe ne I ye khian ebiebi, 12 sokpan ebiebi i so vbe ehe ne u ye, te asọn ye gboo zẹvbe ogiavan. Ebiebi kevbe uwanmwẹ, ọkpa eveva khin nuẹn. 13 Wẹ ẹre ọ yi ihẹnmwẹ mwẹ, wẹ ẹre ọ si mwẹ koko vbe ẹko iye mwẹ. 14 I rhie urhomwẹ nuẹn rhunmwuda, odẹ ọghe ọyunnuan kevbe odẹ ọghe ọkpaodin ẹre u ya yi mwẹ. Iwinna ruẹ keghi re ọghe ọyunnuan, mẹ wa rẹn ọna ẹsẹsẹmwẹse. 15 Ẹghẹ na ya gha mwamwa ugboloko mwẹ, vba hẹko si iran koko vbe uwu ẹko iye mwẹ, ẹghẹ ne I na gha hẹko wan vbe evba, uwẹ rẹn nẹ wẹẹ, I rre evba. 16 U bẹghe mwẹ nẹ, a ke biẹ mwẹ, inu ẹdẹ na ghae mẹ, a gbẹnnẹ ehia yotọ nẹ vbe uwu ebe ruẹ, vbe erhọkpa ma he suẹn. 17 Osanobua, u miẹn vbene ọ yẹẹ mwẹ hẹ, vbe I ghaa mu ẹmwẹ ruẹ roro! U miẹn vbene iran wa bun hẹ! 18 I gha we ne I ka iran, iran gha bun sẹ ikpekhae ne otọ. I gha rhiọrre, ehe ne u ye ẹre I ye ye. 21 Eo Jehova, u miẹn vbe ohu iran ni ma hoẹmwẹ ruẹ mu mwẹ hẹ! U miẹn vbe iran ni sọtẹ ghee ruẹ sọnnọ mwẹ hẹ! 22 Te I wa khuiwu iran! Te I wa ka iran ba eghian mwẹ. 23 Gualọ otọ mwẹ Nọyaẹnmwa, ne u rẹn vbene ekhọe mwẹ ye hẹ; danmwẹ mwẹ ghee, ne u rẹn iro ekhọe mwẹ. 24 Gualọ otọ ẹre miẹn, adeghẹ emwi dan rre uwu imẹ, ne u su mwẹ la odẹ etẹbitẹ.