Psalm

135 Wa rho e Jah, wa rho eni e Jehova, wa ne eguọmwadia e Jehova, 2 ni mudia vbe owa e Jehova, vbe ọgua Osa ọghe Osanobua mwa. 3 Rho e Jehova rhunmwuda, irẹn maan, wa so ihuan urhomwẹ ghee eni ẹnrẹn, rhunmwuda, ọ mwẹ itohan. 4 Ọ zẹ e Jekọb ne egbe ẹre, Ivbi Izrẹl ne iran gha re ọghe irẹn. 5 Mẹ rẹnrẹn wẹẹ e Jehova kpọlọ, Enoyaẹnmwa kpọlọ sẹ avbe ẹbọ hia. 6 Emwi nọ khọn e Jehova ẹre ọ ru, vbe ẹrinmwi kevbe agbọn, vbe uwu okun kevbe avbe odin ni rre ototọ ẹre. 7 Ọ mu okpẹhoho okuku amẹ ke ehe ne agbọn sẹ gha dee, ọ ru ayan ne okpẹhoho, ọ keghi vbe kie okpẹhoho ke uwu aza ẹre ladian. 8 Ọ gbele emọdiọn ni rre Igipt hia, ọghe emwa nagbọn kevbe ọghe avbe aranmwẹ. 9 Evba ẹre ọ na winna iwinna ama kevbe ọyunnuan, nọ ya rri ọba kevbe ekhaẹmwẹ ọnrẹn hia oya. 10 Ọ rẹnkhẹn uhunmwu ẹvbo ni bun rua, ọ keghi vbe gbele avbe ọba ni mwẹ ẹtin, 11 e Saihọn ne ọba ọghe Ivbi Amọri, kevbe Ọg ne ọba ọghe Ivbi e Basian, kevbe avbe ọba ni rre Kenan hia. 12 Ọ mu otọ iran ne emwa rẹn, ọ muẹn ne Ivbi Izrẹl. 13 Eo Jehova, te eni ruẹ khian gha rrọọ vbe etẹbitẹ. Eo Jehova, te a khian gha họn okhekhe ruẹ, ke orre ya sẹ orre. 14 E Jehova gha gbinna ne emwa rẹn, ọ gha vbe tohan eguọmwadia ẹre. 15 Esiliva kevbe igoru, ẹre a ya manọ ẹbọ ọghe avbe uhunmwu ẹvbo, obọ emwa nagbọn ẹre a ya manọ iran. 16 lran mwẹ unu sokpan iran i sẹtin guan, kevbe aro, sokpan iran i sẹtin bẹghe, 17 iran mwẹ ehọ sokpan iran i họn ẹmwẹ, iran i kue sẹtin hiọnrọn. 18 Te iran ni ru iran, kevbe iran ni mu ẹtin yan iran, khian yevbe amazẹ ne iran maẹn. 19 Wa rho e Jehova, wa ne Ivbi Izrẹl, wa rho e Jehova wa ne ẹgbẹe ọghe Erọn! 20 Wa rho e Jehova, wa ne avbe Livai, wa rho e Jehova, wa hia ni gae. 21 Wa rho e Jehova vbe Zaiọn, vbe Jerusalẹm ne owa ẹre. Wa rho e Jah!