Psalm

132 Eo Jehova, ghẹ mianmian e Devid, kevbe usẹ nọ sẹ hia. 2 E Jehova, ye eyan nọ yan rẹn rre, emwi nọ ve uwẹ ne Osanobua Nọkhua ọghe Jekọb re wẹẹ: 3 “Mẹ i khian yo owa mwẹ, ra ne I ya lovbiẹ, 4 mẹ i khian hẹwẹ ra ne I vbiẹ, 5 rhinrin mẹ te do miẹn ihe ọkpa ne Jehova, owa ne Osanobua Nọkhua ọghe Jekọb gha dia.” 6 Ma họn ẹmwẹ Ẹkpẹti Ile vbe Efrata, ma keghi miẹn ọnrẹn vbe ẹgbo. 7 Ma keghi kha wẹẹ, “Wa gi ima gha rrie owa Osanobua, wa gi ima ya ga vbe odaro ẹkete ẹre.” 8 Eo Jehova, gha die ọgua Osa ruẹ, yaba nene Ẹkpẹti Ile gha dee, nọ re ama ọghe ẹtin ruẹ, ne u do gha rre emwa na ẹdẹdẹmwẹdẹ. 9 Te avbe ohẹn ruẹ gha ru vbene ọ ke yi vbe ẹghẹ hia, te avbe emwa ruẹ gha wee ne oghọghọ. 10 Rhunmwuda e Devid ne ọguọmwadia ruẹ, ghẹ he ọba ne u hannọ zẹ ye otọ. 11 E Jehova keghi ru eyan ma e Devid, ẹ i mwẹ ọ ma mu eyan rẹn sẹ: “I gha ya ọkpa vbe uwu avbe ivbuẹ nikpia rri ọba, irẹn gha vbe rri ọba lele uwẹ. 12 Adeghẹ avbe ivbuẹ lele iyi mwẹ, kevbe avbe iyi ne I yi ne iran, ivbi iran gha vbe rri ọba lele uwẹ rhinrin ẹdẹ.” 13 E Jehova hannọ e Zaiọn zẹ nẹ, ọ hoo nọ yae ru owa ẹre. 14 “Ehe ne I khian gha ye ẹdẹdẹmwẹdẹ ẹre ọna khin, ehe ne I hoo ne I na gha khaevbisẹ nọ. 15 I gha viọ emwi ne Zaiọn gualọ hia nẹẹn wọrhọwọrhọ, I gha ya evbare vuọn avbe ivbiogue ni rrọọ ẹko. 16 I gha fiangbe emwi ne avbe ohẹn ni rrọọ ru hia, avbe emwa rẹn ghi gha wee, iran ghi gha so ihuan oghọghọ. 17 I gha ya ọkpa vbe uwu ivbi e Devid, ma ọba nọkhua vbe emwa na, emwa na, ẹre I gha na rhie ẹre mwẹ, ighẹ irriegie ọghe ọba ne I hannọ zẹ. 18 I gha ya ekhue gbe avbe eghian rẹn egbe, sokpan arriọba ẹre gha dunna, ọ ghi vbe gha muan yọ.”