Psalm
116 I hoẹmwẹ e Jehova rhunmwuda ọ họn urhu mwẹ, vbe I ghaa rinmwiaẹn nọ ru iyobọ mẹ. 2 Ọ danmwehọ mwẹ, vbe ẹghẹ ne I rhirhi ya kpe tie ẹre. 3 Ẹbe ọghe uwu te lẹga mwẹ; orrirri idin te lẹga mwẹ; ohan kevbe ohawa te khian gbe mwẹ rua. 4 Ẹghẹ nii, ẹre imẹ na kpe tie Jehova: “E Jehova, lahọ, miẹn mwẹ fan!” 5 E Jehova mwẹ itohan, ọ vbe maan, ọmwa nọ vuọn ne ẹnina, ẹre Osanobua mwa khin. 6 E Jehova keghi gbogba ga emwa nẹi mwẹ ẹwaẹn, ẹghẹ ne I na gha rre uwu ẹbe, ọ miẹn mwẹ fan. 7 Ghẹ ghi fian afianma, wẹ ne ekhọe mwẹ, rhunmwuda, e Jehova ru mwẹ ẹse nẹ. 8 Ọ miẹn mwẹ fan hin uwu rre, ọ ka mwẹ ameve, ọ ma gi obọ gba mwẹ. 9 Rhunmwuda ọni, ẹre imẹ na khian vbe odaro e Jehova, vbe otọ iran ni rre agbọn. 10 I mwẹ amuẹtinyan, agharhemiẹn wẹẹ I khare wẹẹ; A rẹnkhẹn mwẹ rua nẹ. 11 Ohan na gha mu mwẹ, I na kha wẹẹ, “A i miẹn ọmwa nọ gia mu ẹtin yan.” 12 De emwi ne imẹ gha rhie ne Jehova, rhunmwuda ẹse hia nọ he ru mẹ? 13 I gha mu ayọn izọhẹ gie Jehova, ne I ya kpọnmwọn rẹn rhunmwuda nọ na miẹn mwẹ fan kevbe wẹẹ, I gha tu tie eni ọghe Jehova. 14 I gha ha e Jehova emwi ne I ve ẹre re, vbe ehe ne emwa rẹn hia gbe ẹbu yi. 15 Ọ kakabọ da e Jehova vbe emwa rẹn ni mwẹ ẹkoata gha wu. 16 Ọguọmwadia ruẹ mẹ khin Jehova, te imẹ ga uwẹ, zẹvbe ne iye mwẹ vbe ru ẹre, wẹ miẹn mwẹ fan vbe obọ uwu nẹ. 17 I gha zọ ese ekpọnmwẹ ghee ruẹ, I ghi vbe tu tie eni e Jehova. 18 I gha ha emwi ne I ve nuẹn Jehova vbe ehe ne emwa ruẹ hia gbe ẹbu yi, 19 Vbe ehe nọhuanrẹn ọghe ọgua Osa ruẹ vbe Jerusalẹm. Wa rho e Jehova!