Job
20 I ma rẹn ọkpa, I ma rẹn eva, ekhọe mwẹ vbe dia. Sokpan, ẹmwẹ mwẹ ghi yevbe te I rri abe. Ẹmwẹ ne I ta hia ghi yevbe nọ bu abe gbe mwẹ. 21 I ma rẹn ọkpa I ma rẹn eva, sokpan mẹ i ghi zẹ yọ nian. Agbọn khan mwẹ nẹ. Emwi rhọkpa i ghi rrọọ. 22 U rri ase ra te u rri abe, te Osanobua ye fuẹn ima hia rua. 23 Ọmwa nọ ma ru khọọ gha wu vbe udemwurri, Osanobua ghi giẹ. 24 Osanobua mu agbọn na ne emwa dan, ọ rhu iran ni bu ohiẹn hia aro, adeghẹ ẹ i re Osa ẹre ọ ru ẹre, de ọmwa nọ ghi khin? 25 Ẹdagbọn mwẹ rhulẹ gberra khian, ọkpa nọ maan i rrọọ. 26 Agbọn mwẹ gberra, zẹvbe okọ nọ rhulẹ, okhian wa kẹ ọre zẹvbe oghohọn, nọ ra vin mu ofẹn. 27 I gha mumu ogiẹ ne I mianmian usẹ, 28 usẹ mwẹ hia ghi hihiẹ rre do gha runran mwẹ, I rẹnrẹn ighẹ Osanobua ka mwẹ bae ni rri abe nẹ. 29 Deghẹ a ka mwẹ bae nọ rri abe nẹ, vbia ghi ye domian ba? 30 Evbakhuẹ nọ gha kpe orukhọ mwẹ i rrọọ. 31 Osanobua fi mwẹ fi uye nọ gbiruẹn nẹ, uhiẹn ighẹ te ekhue mwẹ ghi mu avbe ukpọn mwẹ. 32 Akpawẹ ọmwa kẹkan ẹre Osanobua khin, te I gha zẹ ẹmwẹ wanniẹn ọnrẹn, ma gha gba gha rrie iko ya gui ẹzọ ima. 33 Sokpan, ọmwa nọ ra guan ye ẹmwẹ na ne ima ẹ i rrọọ. A i miẹn ọmwa nọ gha bu ohiẹn imẹ vbe Osanobua. 34 Ghẹ ghi rriọ mwẹ oya Osanobua: Hẹ avbe emwi ohan ruẹ kpa hin emwa rre. 35 Ohan i mu mwẹ, I gha wa guan rhunmwuda, I gba ẹko mwẹ.