Job

42 ‘Ẹre Job na wanniẹn e Jehova wẹẹ, 2 “Nian I rẹnrẹn wẹẹ, a i miẹn emwi nẹi gi uwẹ ru. Ẹ i mwẹ emwi ọkpa nọ rrọọ ruẹ ekhọe, ne u i khian sẹtin ru. 3 U nọ rẹn wẹẹ, vbọzẹ ne imẹ nọ ma rẹn na ye, na gbikhaẹn ye ẹmwẹ ẹwaẹn ruẹ? I guan vbekpa emwi ne I ma rẹn otọ ẹre, vbekpa emwi ọyunnuan nọ kpọlọ gberra ne I gha sẹtin rẹn. 4 U tama mwẹ wẹẹ ne I danmwehọ vbe u ghaa guan kevbe wẹẹ, ne I hia ne I rhie ewanniẹn ye ọta ne u nọ rẹn. 5 Ẹghẹ nii, emwi ne emwa ọvbehe tama mwẹ ọkpa ẹre I rẹnrẹn, sokpan, banbanna nian, mẹ ya aro mwẹ bẹghe nẹ. 6 Rhunmwuda ọni, ekhue ẹmwẹ ne I talọ hia mu mwẹ. I ro iro fi werriẹ vbe uwu ebubẹ kevbe emuẹn.” 7 E Jehova ghi gu e Job guan fo nẹ, ọ keghi khama Elifaz wẹẹ, “Ohu ruẹ kevbe ọse ruẹ eva wa mu mwẹ, rhunmwuda, wa ma guan ẹmwẹ ẹmwata vbekpa mwẹ zẹvbe ne Job ne ọguọmwadia mwẹ guan rẹn. 8 Banbanna nian, mu ẹmila ihinrọn kevbe ogho ihinrọn gie Job, ne uwa yae zọ ese ne egbe uwa. E Job gha na erhunmwu ne uwa, I gha vbe họn urhu ẹre, I i ghi ra vbe ru uwa vbene ọ te ma uwa. Wa ma ta ẹmwẹ ẹmwata vbekpa mwẹ zẹvbe ne irẹn ru.” 9 “Elifaz, e Bildad kevbe Zofa keghi ru zẹvbe ne Jehova tama iran, e Jehova keghi họn erhunmwu e Job. 10 Ugbẹnvbe Job ghi na erhunmwu ne esiọre eha nẹ, e Jehova keghi dọlegbe gi agbọn maan rẹn, ọ keghi viọ ukhukhu eva, ọghe emwi nọ te ka mwẹ nẹẹn. 11 Avbe etẹn e Job nikpia kevbe nikhuo kevbe avbe esiọre, keghi do gha tuẹ Job. Iran keghi fu ẹre ẹko rre vbekpa ọlọghọmwa ne Jehova kue nọ sunu daa ẹre. Ọkpọkpa vbe uwu iran keghi rhie igho kevbe oroka igoru nẹẹn. 12 E Jehova keghi fiangbe okiekie ẹdagbọn e Job, sẹ vbene ọ te ka fiangbe omuhẹn ọnrẹn. E Job kegha mwẹ ohuan arriaisẹn iwenẹ (14,000), e kamẹl arriaisẹn ehan (6,000), oghẹn ẹmila arriaisẹn eva (2,000) kevbe ekẹtẹkẹtẹ arriaisẹn (1,000). 13 Ọ keghi biẹlẹ emọ ikpia ihinrọn kevbe emọ ikhuo eha. 14 Ọ keghi he ovbi ẹre nokhuo ne ọdiọn Jamima, ne ukpogieva Kezia kevbe ne ọvbokhan nọ rrọọ, Keren Hapọk. 15 A ma vbe miẹn ikhuo ni ghaa mose vbe na ghee ivbi e Job vbe uhunmwu otagbọn hia. Erha iran keghi vbe gha ukhu ne iran, zẹvbe nọ ghae ne etẹn iran nikpia. 16 Vbe iyeke ọnọna, e Job keghi ya ukpo ikiọkhọe (140) vbe agbọn, ọ keghi tọ sẹrriọ wẹẹ ọ mu eyẹ kevbe ihiẹnhiẹn. 17 Ọ keghi wu vbe ọ khian ọmaẹn nẹ ghẹghẹghẹ.