Job
22 Ẹre Elifaz ne ovbi ẹvbo na tie ẹre Tẹman na wanniẹn wẹẹ, 2 “Ọmwa ọkpa rrọọ ra, gia kha wẹẹ irẹn ẹre ọ ghi wa waan sẹ, nọ mwẹ emwi nọ ye ne Osanobua ra? 3 Emwi esi ne u ru vbe zẹ ẹfe ku Osanobua ra, ne u na maan, mwẹ emwi nọ ru nẹẹn ra? 4 Ẹ i re ne u na mu ohan Osanobua ẹre ọ si ẹre nọ na zẹ ọkan muẹn, nọ na tie ruẹ ye erhan ẹzọ. 5 Rhunmwuda ne u na ru orukhọ nọ sẹrriọ nọ. Rhunmwuda emwi dan ne u ru hia nọ. 6 Ne ọtuẹn miẹn ehe na ha osa nọ rriọ re, u keghi miẹn ẹre ukpọn hia, u ma ghi vbe sẹ ọkpa rae nẹẹn rhie kinnọ ẹkun. 7 U ma sa amẹ ne iran ne egbe wọọ re wọn, u ma rhie evbare ne ne ohanmwẹ gbe. 8 Rhunmwuda ne u na mwẹ ukpo ẹtin ne u ye, u keghi rhan obọ gba otọ hia. 9 Ẹ i re te u ma ru iyobọ ne avbe ikhuo ni dẹgbẹe ọkpa, sokpan deba ọni, u keghi do avbe emọ nẹi mwẹ erha emwi hẹ, u na gha ru iran khọọ. 10 Eban nian, uye hia lẹga ruẹ, ohan ọbanban ẹre ọ ghi muẹn na. 11 Ebiebi so sẹrriọ wẹẹ, u i ghi bẹghe odẹ, ẹzẹ lẹẹ rhuẹ ginna otọ. 12 Ẹ i re ehe nọ yo sẹ vbe ẹrinmwi ẹre Osanobua ye? Ọ ghi gha ghee avbe orhọnmwẹ ginna otọ, egbe ne iran rhe ya rre ehe nọ yo. 13 Sevba, te uwẹ ye nọ wẹẹ, ‘De emwi ne Osanobua rẹnrẹn? Ikpakpa iso degue ẹre nẹ, vbọ ghi na sẹtin gha bu ohiẹn ima hẹ?’ 14 Te uwẹ roro wẹẹ ikpakpa iso nọ mwẹ imi degue ẹre odẹ, vbe ehe nọ na khian vbe uwu nọ rre ẹkpo agbọn vbe ẹrinmwi. 15 “Ẹ i re te uwẹ ghi wa tae nẹ nian wẹẹ, odẹ ne ọmwa dan lele, ẹre uwẹ ra vbe gha la? 16 Sokpan, orogho lẹẹ iran gha rrie, vbe ọ ma he sẹ ẹghẹ iran. 17 Avbe emwa ni he Osanobua ye otọ ẹre ena khin, iran na yayi wẹẹ, ẹ i miẹn emwi ru iran re. 18 Vberriọ, Osanobua ẹre ọ zẹ agbọn nọ maan iran. (Mẹ ma rẹn vbene emwa dan roro iro hẹ.) 19 Emwa esi ghi gha ghọghọ, emwa ni ma rri abe ghi vbe gha giẹ, vbe iran gha miẹn ighẹ a rri emwa dan oya. 20 A fuẹn emwi hia ne ọmwa dan mwẹ rua, erhẹn keghi giẹn emwi ke emwi nọ te kẹ. 21 “E Job, ya dọlọ ne Osanobua ruẹ, ghẹ ghi kae ye oghian ruẹ; u gha lae vberriọ, ọ gha fiangbuẹ. 22 Gha ya emwi nọ ma ruẹ re ru emwi; rhie ẹmwẹ ọnrẹn mwẹ vbe ekhọe ruẹ.