Job
20 Ẹre Zofa ne ovbi e Naamat na wanniẹn wẹẹ, 2 “E Job, u wa vulo mwẹ ẹko kpa. I i ghi zin egbe, I gha wa guan. 3 Ẹmwẹ ne u guan rẹn, ẹbọ ẹre u tiere. Sokpan, I gha guara rhie ewanniẹn nuẹn. 4 Vbe nai na gbawawẹ, wẹ rẹnrẹn wẹẹ ke ẹghẹ nẹdẹ gha dee, vbe ẹghẹ na na yi ọmwa ye agbọn na okaro okaro, 5 a ma he miẹn ọmwa dan ọkpa ne egbe rọkhọe kpẹẹ vbe otọ. 6 Ọ sẹtin wan gbighidi, ọ ghi ya tan sẹ iso, ọ ghi kpọlọ sẹrriọ wẹẹ uhunmwu ẹnrẹn ghi gha dekaẹn ikpakpa iso, 7 sokpan, a gha hoho ẹre kua vbe ebubẹ. 8 Te a ra ho ẹre bẹkun vbe imina zẹvbe umian na miẹn vbe asọn. A i ghi dọlegbe miẹn ọnrẹn ọvbehe. 9 A ghi ho ẹre bẹkun vbe ehe nọ te ka ye; 10 ivbi ẹre ghi mu osa emwi nọ do hẹ hae vbe ọghe avbe ivbiogue. 11 Te egbe ẹre te yevbe ọghe ọvbokhan, ọ keghi vbe wegbe. Sokpan, ọ gha khian ebubẹ ban. 12 Ọkhọ rhiẹnrhiẹn ọnrẹn vbe unu sẹrriọ 13 nọ na koko eso ye unu nọ gha winhin so ẹre. 14 Sokpan, ọ ghi sẹ ẹko, ọ keghi gha rriara zẹvbe ne eruanikeruan gha ghi sẹtin rriara sẹ. 15 Ọmwa dan ghi kpa ẹfe nọ do hẹ ladian, Osanobua ghi rhie ẹre ke uwu ẹkpokhurhu ẹre ladian. 16 Emwi ne ọmwa dan mi re, te ọ yevbe eruan, te ọ gbe ẹre rua zẹvbe ne obi ẹyẹn dan sae. 17 Irẹn i ra gha rrọọ nọ miẹn ẹzẹ ofigbọn oliv, ra avbe ẹzẹ nọ lẹẹ owọn kevbe ewẹn ẹmila. 18 Te ọ ra sẹ emwi nọ miẹn ẹsọn yi hia rae; ẹ i ra miẹn otọ ya ya ẹfe ẹre ru, 19 rhunmwuda nọ na yan gbe iran, ọ na vbe gha zẹ ivbiogue kpokpo, ọ na ya iwegbe mu owa ne ọmwa ọvbehe bọe. 20 Ẹko i vuọn ufifimwẹ ọnrẹn. 21 Ọ gha rri evbare, ẹ i vbe kẹrre, banbanna nian, ẹfe ẹre sẹ ufomwẹ nẹ. 22 Umamwẹ ọnrẹn gha ghi sẹ ehe nọ gha sẹ, ukhuamwẹ ọkhọ hia, ghi do rẹnkhẹn ọnrẹn rua.