Job
17 “Ufomwẹ ẹdagbọn mwẹ rre nẹ. Egbe i re egbe ne I ghi ya sẹtin hiọnrọn; emwi nọ ghi kẹ mẹ i ghi rrọọ gberra idin. 2 I miẹn vbene emwa hia yan giẹ mwẹ hẹ. 3 Ẹmwata ẹre I ta na, Osanobua, miẹn mwẹ ẹmwẹ na vbe obọ. Ọmwa ọvbehe i ghi rrọọ nọ gha ya egbe ba mwẹ vbe ẹmwẹ ne I guan. 4 U gbin iran ekhọe ẹwaẹn nẹ. Ghẹ gi obọ iran ke ukhunmwu mẹ nian. 5 Vbene a tae nẹdẹ wẹẹ, ọmwa rhunmwuda igho ya ọsiọre na vbokho, ẹvbo ẹre ghi rri oya yọ. 6 Eban nian, te emwa ghi kpa itan na mẹ. Iran ghi do gha tulo asẹn yọ mwẹ aro. 7 Te akhiẹ ghi ra rhu mwẹ aro, te obọ kevbe owẹ mwẹ ghi ye mighan mighan vbe na ghee aghọnghọn. 8 lzegbe zẹ iran ni wẹẹ iran ta ẹmwata, ehia keghi kha wẹẹ, ọmwa dan ẹre I khin. 9 Iran ni khare wẹẹ adazẹ iran khin, wa dọlegbe rhie ye ekhọe wẹẹ iran rri ase. 10 Sokpan, iran gha do tẹn yọ mwẹ odaro, l i ra miẹn ọkpa kẹkan nọ waan vbọ. 11 Ẹghẹ mwẹ gberra nẹ; iro ekhọe mwẹ hia rriọkua; idaehọ mwẹ wirua. 12 Sokpan, avbe ọse mwẹ wẹẹ, asọn ighẹ avan nọ, iran wẹẹ uwanmwẹ sikẹ emwa na, sokpan mẹ rẹnrẹn ighẹ uwu ebiebi ẹre I ye. 13 Idaehọ ọkpa ne I mwẹ ọre ehe ne iran ni wulo nẹ ye. Ehe ne I gha na lovbiẹ gha vbiẹ vbe uwu ebiebi. 14 I ghi tie idin wẹẹ erha mwẹ nọ, avbe ọkhọe ni rriọ mwẹ, I ghi tie iran wẹẹ, iye mwẹ kevbe etẹn mwẹ nikhuo ẹre iran khin. 15 De ehe ne idaehọ ghi ye ye mwẹ re yi? Gha ọ ya aro kọ ọkpa? 16 Idaehọ i ra lele mwẹ gha khian, vbe I a gha rrie ehe ne iran ni wulo nẹ ye.”