Nehimaia

8 Vbene ọ ghi te sẹ uki nogie ihinrọn, Ivbi Izrẹl hia keghi gbe ẹkun sotọ vbe ẹvbo edọmwadẹ ọghẹe. Vbe uki nokaro ọghe uki nii, iran hia ke do si egbe koko vbe Jerusalẹm, vbe ehe ne otọ na vbe aro vbe uwu Urho Amẹ. Iran keghi we ne Ẹzra ne ohẹn kevbe nọ rẹn uhi ne Jehova rhie la obọ e Mozis gie Ivbi Izrẹl, mu ebe nene uhi rre. 2 Ẹre Ẹzra ghi na mu nene ebe gha die ehe ne iran hia si egbe koko yi, ikpia, ikhuo kevbe ibiẹka ni waan sẹ nọ gha rẹn emwi na guan yan, vbe ikpẹdẹ nokaro ọghe uki nogie ihinrọn. 3 Evba nii ẹre ọ na ke owiẹ tie ebe nii ma iran ya sẹ ogiavan, iran hia keghi wa kakabọ gha danmwehọ ẹre. 4 Ẹzra keghi mudia yan ekpatako na kan yo ghee ukhunmwu khẹ emwi na. Avbe ikpia na keghi mudia ye ọre obọ erha ọmwa: e Matitaia, e Siẹma, Anaia, Uraia, e Hilkaia kevbe Maasẹia. Iran na keghi vbe mudia ye ọre obọ iye ọmwa: e Pẹdaia, e Misiaẹl, e Malkija, e Hasium, e Hasbadana, e Zẹkaraia kevbe Mẹsiulam. 5 Ehe ne Ẹzra na mudia yan ekpatako nii nọ yo sẹ iran hia, iran keghi tan aro ye ọre egbe. Ọ ghi wa wee ebe nii ọwarọkpa, ehia keghi wa kpaegbe mudia. 6 Ẹzra keghi kha wẹẹ, “Wa rho e Jehova, ne Osanobua nọkhua!” Emwa nii hia keghi viọ obọ daa odukhunmwu, iran keghi kha wẹẹ, “Isẹ!” Iran na diguẹ gae, vbene iran na viọ aro rhu otọ. 7 Iyeke ọni, iran keghi kpaegbe, iran na mudia ye ihe iran, avbe Ivbi e Livai keghi rhan otọ nene Uhi ma iran: e Jẹsua, e Bani, e Siẹrebia, e Jamin, Akub, e Siabetai, e Hodaia, e Maaseia, e Kelita, Azaraia, e Jozabad, e Hanan, kevbe Pelaia. 8 Iran kegha ya urhu nọ lae tie ebe nii, ebe Uhi ọghe Osa ọghe ẹmwata, iran na gha rhan otọ re; ọna keghi ru iyobọ ne emwa nii ya rẹn otọ ebe na ghaa tie. 9 Ẹre Nehimaia nọ ghaa re gọvina vbe ẹghẹ nii, Ẹzra ne ohẹn kevbe nọ rẹn nene Uhi, kevbe avbe Ivbi e Livai ni ghaa rhan otọ nene Uhi ma emwa nii, na tama iran wẹẹ, “Ẹdẹnẹrẹ na, ẹdẹ nọhuanrẹn nọ ne Jehova ne Osanobua uwa rhunmwuda ọni, wa ghẹ khiẹ ra ne uwa vbe gha viẹ. 10 Banbanna nian, wa gha rrie owa ne uwa rri evbare esi, wa fian vbe evbare uwa ne iran nẹi mwẹ, ne uwa vbe sa ne iran vbe ayọn uwa. Ẹdẹ nọhuanrẹn ẹre ẹrẹna khin ne Nọyaẹnmwa rhunmwuda ọni, wa ghẹ khiẹ. Oghọghọ ne Jehova rhie ne uwa, gha ya uwa wegbe. 11 Avbe Ivbi e Livai keghi la uwu ẹbu iran, iran na gha bọ iran, iran na gha tama iran wẹẹ ne iran ghẹ khiẹ vbe ẹdẹ nọhuanrẹn vberriọ. 12 Rhunmwuda ọni, emwa nii hia ke gha rrie owa. Iran na ya re, iran na da vbe ẹko rhiẹnrhiẹnmwẹ, iran na ghae ne emwa ọvbehe vbe emwi ne iran mwẹ rhunmwuda, emwi na tie ma iran, la iran ehọ.