Nehimaia

5 Ọ ghi kpẹẹ fua kherhe, nibun vbe uwu avbe emwa nii, ikpia kevbe ikhuo kegha gui ẹzọ Ivbi e Ju ne ihua iran. 2 Eso kegha kha wẹẹ, “Ma mwẹ emwa nibun vbe ẹgbẹe ima, te ima gha gualọ evbare ne ima miẹn ehe na sẹtin gha rre agbọn.” 3 Emwa ọvbehe eso keghi vbe kha wẹẹ, “Te ima gha mu otọ ima ye agbeghae, deba ogba azara ọghe ima, kevbe owa ima, ne ohanmwẹ ghẹ miẹn ehe na gbe ima.” 4 Emwa ọvbehe eso keghi vbe kha wẹẹ, “Te ima gha mọmọ igho ya ha osa na hae ne ọba ye ugbo kevbe ogba azara. 5 Ivbi agbẹnvbo ọkpa ẹre ima vbe avbe Ju ne ihomwa gba khin. Vbene ivbi iran maan sẹ, ẹre ivbi ima vbe maan sẹ. Sokpan te ima ya ivbi ima ru ọviẹn. A khiẹnnẹ eso vbe uwu ivbi ima nikhuo zẹvbe eviẹn nẹ. Ọghe ima fo rhunmwuda, a miẹn ima ugbo kevbe ogba azara ọghe ima.” 6 I ghi họn ẹzọ ne iran gui, ohu keghi mu mwẹ. 7 I keghi ta ku avbe ọkaolotu kevbe iran ni rre ukpo vbe uwu iran, I na tama iran wẹẹ, “Wa ghẹ zẹ etẹn uwa kpokpo.” I keghi tie iko ọgbakha ne iran do guan ye ẹmwẹ na, 8 I tama iran wẹẹ, “Te ima hia vbene ẹtin ima sẹ, na ya gha dẹlẹ iran werriegbe ighẹ Ivbi e Ju ni khiẹnnẹ egbe iran zẹvbe eviẹn ne avbe orhunmwuyẹn, banbanna nian, te uwa ghi sua avbe etẹn uwa ne iran gha khiẹnnẹ ẹgbe iran ne uwa ne Ivbi e Ju ne ihua iran.” Avbe ọkaolotu nii keghi hunwan kpọkpọkpọ, iran ma miẹn ẹmwẹ ta. 9 Ẹre imẹ ghi na kha wẹẹ, “Emwi ne uwa ru na i maan. Ọ te khẹke ne uwa ya ọghọ ne Osanobua, ne uwa ru emwi nọ kere. Ẹghẹ nii, wa i khian rhie otọ ne avbe eghian ọghe ima, iran nẹi re Ju, ne iran ya gha zaan ima. 10 Mẹ gi avbe emwa na mọmọ igho kevbe ọka vbe obọ mwẹ, rhunmwuda ọni, te I ghi mwẹ ivbi otu kevbe emwa ni winna mẹ. Banbanna nian, wa gia ya ehia ma iran, ne iran ghẹ ghi ha osa. 11 Wa ya emwi ne iran rri osa ẹre hia ma iran, igho ra ọka ra ayọn ra ofigbọn oliv. Wa vbe fannọ emwi iran hia ne iran vbene a wa tae na, ugbo, ogba azara, ogba oliv kevbe owa!” 12 Avbe ọkaolotu nii keghi kha wẹẹ, “Ma gha ru vbene u khare, ma gha viọ avbe emwi iran ne iran, ma i ghi vbe si iran osa.” I keghi tie avbe ohẹn, I na wẹẹ ne avbe ọkaolotu vẹn ihẹn vbe sirra iran wẹẹ, iran gha ru vbene iran khare. 13 I keghi ban ọza ne I mu gba ẹkun, I na bọnmwẹ ọnrẹn, I na kha wẹẹ, “Vbenian ẹre Osanobua ra bọnmwẹ uwa nẹi mu eyan ne uwa yan rẹn sẹ. Osanobua gha miẹn uwa owa kevbe emwi ne uwa mwẹ hia, ẹ i vbe sẹ emwi ọkpa rae ne uwa.” Emwa hia ni rre evba keghi kha wẹẹ, “Isẹ.” Iran keghi rho e Jehova. Avbe ọkaolotu keghi vbe ru vbene iran yan rẹn. 14 Vbe ukpo iweva ne I ya gha re nọ khaevbisẹ yan e Juda, ke ukpo nọ gba vbe ugie ne Atakzaziz ya gha re ọgbaisi, ya sẹ ukpo eva yan ọgban nọ yae, ke imẹ kevbe etẹn mwẹ, nọ rri evbare nọ khẹke mwẹ zẹvbe nọ khaevbisẹ, ẹ i rrọọ. 15 Iran hia ni ghaa re nọ khaevbisẹ ọ te do sẹ mwẹ egbe, ihẹ ẹre iran ghaa khin ne emwa nii, iran kegha miẹn iran igho esiliva iyeva vbe ẹdẹ zẹvbe igho evbare kevbe ọghe ayọn. Uhiẹn ighẹ te eguọmwadia iran ghaa sẹ emwa nii usẹ. Sokpan, I ma ru vberriọ, rhunmwuda, te I ya ọghọ ne Osanobua. 16 I na mu aro daa ekẹn nii na gbe, I ma vbe si ẹfe gha koko. Emwa hia ni winna mẹ keghi vbe deba iwinna ekẹn nii na gbe. 17 Emwa ne imẹ ghaa koko, ra ne I ghaa rhie evbare na vbe etebul mwẹ kegha re igbe yan ikiọkhọe (150) vbe Ivbi e Ju kevbe avbe ọkaolotu iran, vbene a ma na ka emwa ni ke ẹvbo ni lẹga ima bu mwẹ gha dee, ba ẹre. 18 Emwi ne I ya koko iran vbe ẹdẹ kegha re ẹmila ọkpa, ohuan ehan ne egbe maan sẹ, kevbe ọkhọkhọ nibun. Ikpẹdẹ igbigbe ẹre I ya dọlegbe mu ayọn ọgbọn ladian ne iran. Sokpan, I rẹn ihẹ ọrhẹnrhẹn ne emwa nii mu, rhunmwuda ọni, I ma vbe wẹẹ ne iran gha ha mwẹ osa zẹvbe nọ khẹke nọ khaevbisẹ. 19 Osanobua, lahọ, u ghi ye mwẹ rre vbe nọ maan, vbekpa emwi hia ne I ru ne avbe emwa na.