Nehimaia

28 Ma ne Ivbi Izrẹl, avbe ohẹn, avbe Ivbi e Livai, iran ni khẹ Ọgua Osa, avbe ikpemaba Ọgua Osa, iran ni winna vbe Ọgua Osa, kevbe iran nikẹre hia, na miẹn wẹẹ, ọ ru vbene Uhi Osanobua khare, ma na wannọ egbe ima hin ehe ne avbe erhunmwuyẹn ni rre otọ ima ye rre, ma do deba avbe amwẹ ọghe ima, deba avbe ivbi ima hia, ni waan sẹ nẹ nọ gha rẹn otọ ẹre. 29 Ma deba avbe ọkaolotu ima vẹn ihẹn yọ wẹẹ, te ima khian gha ya Uhi Osanobua ru emwi, uhi nọ rhie ne Mozis ne ọguọmwadia ẹre rhie rre, kevbe wẹẹ ma gha ru zẹvbe ne Jehova ne Nọyaẹnmwa khare, ma gha rhie uhi ẹre mwẹ, ma ghi vbe gha ru vbene ọ hoo. 30 Ma i khian rhie okhuo vbe uwu avbe orhunmwuyẹn ni rre ehe ne ima ye. 31 Avbe orhunmwuyẹn gha mu ọka ra emwi ọvbehe gie ima dẹ vbe ẹdẹ ikẹtin ra vbe ẹdẹ iruemwi ọvbehe, ma i khian dẹ. Ukpo nọ ya gba vbe ihinrọn hia, ma i khian gbe ugbo vbe otọ na, ma ghi vbe ya osa ma emwa hia ni rri osa. 32 Ukpukpo ma gha zẹ obọ ọkpa vbe a gha ghae uwan ne kherhe ọghe esiliva ye ihe erẹnrẹn, na miẹn ya gha ha osa emwi na loo vbe Ọgua Osa. 33 Ma gha viọ avbe emwi na rre na ya gha ru ugamwẹ vbe Ọgua Osa: ebrẹd itaemwi, ọka imuohan ẹdẹgbegbe, aranmwẹ na gha giẹn ya gha zọ ese ẹdẹgbegbe, emwi na ya zọ ese vbe Ẹdẹ ikẹtin, Ugie Ọghe Uki Ọgbọn, kevbe avbe ugie ọvbehe, avbe emwi imuohan ni dekẹe, emwi izọese na ya khiẹn orukhọ Ivbi Izrẹl kua kevbe avbe emwi ọvbehe hia na ghi gualọ vbe Ọgua Osa. 34 Ma kevbe avbe ohẹn kevbe avbe Ivbi e Livai gha yan uta yọ ukpukpo, na ya rẹn ẹwae nọ gha viọ erhan rre, na ya giẹn ese na zọ ghee Jehova ne Osanobua mwa, zẹvbe ne Uhi khare. 35 Ukpukpo, ma gha viọ avbe emwiokọ ne ima gha rhọọ ya gha mu ohan vbe Ọgua Osa, kevbe avbe ọmerhan nọ ka gha vboo vbe emwiokọ ọghe ima. 36 Emọ ikpia hia ne ima ka gha biẹlẹ, ma gha viọ iran bu ohẹn vbe Ọgua Osa na ya iran fi ohan ne Osanobua vbe evba, zẹvbe ne Uhi khare. Erriọ ima gha vbe ya ọmọ okaro ne ẹmila ọghe ima, ẹwe ọghe ima kevbe ohuan ọghe ima biẹlẹ, fi ohan. 37 Ma gha mu igharhuarhua na ya amẹ gbe, ne ima ya ọka na ka gha fian vbe ugbo ima rre gie avbe ohẹn, erriọ vbe nọ ne emwi imuohan nikẹre, ayọn, ofigbọn oliv kevbe avbe ọmerhan na rhọọ re ughughan. Ma gha viọ a ghae ye ihe igbe ọghe emwiokọ ọghe ima gie avbe Ivbi e Livai ni koko a ghae ye ihe igbe vbe agọ ne ima na gbe ugbo. 38 Avbe Ivbi e Livai ghaa koko a ghae ye ihe igbe vbe obọ emwa, avbe ohẹn ni re ivbi uniẹn Erọn ghi mudia ke iran, avbe Ivbi e Livai ghi viọ obọ ọkpa vbe uwu igbe vbe a ghae ye ihe igbe ne iran koko, ye aza vbe Ọgua Osa na miẹn gha loo vbe Ọgua Osa. 39 Ivbi Izrẹl kevbe avbe Ivbi e Livai ghi viọ emwi ne emwa zẹ nii, ighẹ ọka, ayọn, kevbe ofigbọn oliv gha rrie uwu aza na viọ avbe ọkpan na loo vbe Ọgua Osa yi, ehe ne iran vbe dia ighẹ avbe ohẹn ne iwinna sẹ ọre egbe vbe Ọgua Osa kevbe avbe iran ni khẹ Ọgua Osa kevbe avbe iran ni so ihuan vbe Ọgua Osa.