1 Ọba

5 Ke omuhẹn gha dee, ọsie Devid ẹre Hiram ne ọba ọghe Taia ghaa khin, ọ ghi họn wẹẹ e Solomọn rri ọba lele Devid ne erhae, ọ keghi gie ukọ bu ẹre gha khian. 2 E Solomọn keghi gie uhunmwu na werriegbe gie Hiram wẹẹ, 3 “U rẹnrẹn wẹẹ e Devid ne erha mwẹ ma sẹtin bọ Ọgua Osa na na ga e Jehova ne Osanobua ẹre, rhunmwuda, kugbakẹghẹ ẹre ọ ya gha gu avbe eghian ni rre ẹvbo ni lẹga ẹre khọn, a te do miẹn wẹẹ, e Jehova rhie ẹre obọ yan avbe eghian rẹn hia uhunmwu. 4 Sokpan, banbanna nian, e Jehova ne Osanobua mwẹ rhie ọfunmwegbe mẹ nẹ vbe ehe ni lẹga mwẹ hia. I i mwẹ eghian, I i vbe fian afianma odekun igbinna. 5 E Jehova tama erha mwẹ ighẹ Devid wẹẹ, ovbuẹ ne I gha ya rri ọba lele ruẹ ẹre ọ khian bọ owa mẹ. I mu egbe nian ne I ya bọ Ọgua Osa nii, ehe na gha na gha ga e Jehova ne Osanobua mwẹ. 6 Rhunmwuda ọni, gie emwa ruẹ gha rrie Lebanọn, ne iran ya gbele igẹdu ye otọ mẹ. Emwa mwẹ gha deba iran winna. Emwi ne u ghi wẹẹ ne I ha emwa ruẹ re, I gha hae. Zẹ vbene uwẹ rẹnrẹn, emwa mwẹ i gua tọnnọ erhan vbene emwa ruẹ ye.” 7 E Hiram ghi họn uhunmwu ne Solomọn gie, ẹko keghi rhiẹnrhiẹn ọnrẹn ẹsẹse, ọ na wẹẹ, “Urhomwẹ nọ ne Jehova vbe ẹrẹna, nọ na rhie ọmọ nọ waan vberriọ ne Devid nọ rri ọba yan okpẹvbo na.” 8 Ẹre Hiram ghi na gie na tama e Solomọn wẹẹ, “I họn uhunmwu ne u gie, I vbe mu egbe ne I ya ru vbene u nọ rẹn, I gha viọ avbe sida kevbe erhan ọwegbe nii rre. 9 Emwa mwẹ gha viọ avbe igẹdu nii, ke Lebanọn gha die okun kevbe ne iran gbalọe kugbe zẹvbe okọ, ne iran guae lele ọkpẹn ẹzẹ gha die ehe ne u hoo. Emwa mwẹ ghi do rhan rẹn vbe evba, emwa ruẹ ẹre ọ ghi yan rẹn ke evba kpa. Zẹvbe nọ kan uwẹ vbọ, I hoo ne u viọ evbare gie emwa mwẹ.” 10 Ẹre Hiram na viọ e sida erhan ọwegbe, ne Solomọn hoo hia gie ẹre. 11 E Solomọn keghi viọ igarawa ẹlubọ arriaisẹn iyisẹn (100,000) kevbe egalọn ofigbọn oliv na ma gua arriaisẹn igbe yan iyisẹn (110,000) gie Hiram ukpukpo nọ ya gha koko emwa rẹn. 12 E Jehova keghi mu eyan rẹn sẹ, ọ na rhie ẹwaẹn ne Solomọn ọfunmwegbe kegha rre ẹkpo Hiram kevbe Solomọn, iran keghi gba rhie obọ ọse ma khin ye ebe. 13 Emwa ne Solomọn ya ẹtin munọ gha winna, kegha re arriaisẹn ọgban (30,000) vbe otọ Izrẹl hia. 14 Ọ keghi rhie Adoniram yọ nọ gha gbaroghe iran. Ọ keghi gha iran ye oka eha ne arhin arriaisẹn igbe (10,000) ye, oka ọkpọkpa ghi gha gbe uki ọkpọkpa vbe Lebanọn, kevbe uki eva vbe owa. 15 E Solomọn keghi vbe mwẹ arhin arriaisẹn iyenẹ (80,000) vbe ẹvbo uhunmwu oke, iran kegha gbe okuta, iran ni ka ẹre kegha re arriaisẹn ekigbe siyenẹ (70,000). 16 Ọ keghi viọ arhin iyisẹn irrọ vbe uri eva yan arriaisẹn eha (3,300) ne iran gha gbaroghe iwinna ne iran winna. 17 Zẹ vbene Solomọn ne ọba gie, iran keghi giagia okuta nikhua kevbe ni mose na ya gbe ẹyotọ ọghe Ọgua Osa.