1 Ọba

22 Vbe owara ukpo eha Izrẹl kevbe Siria keghi gba gha rrọọ vbe ọfumwegbe 19 E Makaia keghi rhie tẹ wẹẹ “Danmwehọ vbene Jehova kha hẹ! I keghi bẹghe vbe Jehova tota ye ẹkete ọghẹe vbe ẹrinmwi, avbe odibo ẹre keghi mudia lẹga ẹre. 20 E Jehova keghi nọọn wẹẹ, ‘De ọmwa nọ gha mu Ehab rẹrẹ, nọ gha rrie Ramọt ne Giliẹd ne iran ya gbe ẹre rua?’ Eso vbe avbe odibosa nii keghi ta ẹmwẹ ọkpa, eso na vbe ta ọvbehe. 21 Orhiọn ọkpa keghi kpaegbe ladian, ọ na sikẹ e Jehova, ọ tama rẹn wẹẹ, ‘I gha rẹrẹ ọre.’ E Jehova keghi nọ wẹẹ, ‘Vbua ra ya ru ẹre hẹ?’ 22 Ọ na wẹẹ, ‘I gha yo ya ru ẹre ne avbe akhasẹ ọghe Ehab hia gha ta ohoghe.’ E Jehova keghi tama rẹn wẹẹ, ‘Gha khian ya rẹrẹ ọre, u gha sẹtin.’ 23 E Jehova ru ẹre nẹ, ne avbe akhasẹ ruẹ na hia gha ta ohoghe ma ruẹ. Sokpan, e Jehova tobọ ẹre tae nẹ wẹẹ, ọfuan dee nuẹn.” 24 Ẹre Zẹdekaia na sikẹ Makaia, ọ na gbe ubi ye ọre aro, ọ wẹẹ, “De ẹghẹ ne orhiọn e Jehova ghi vbe ya sẹ imẹ rae ya gha gu uwẹ guan yi?” 25 E Makaia keghi tama rẹn wẹẹ, “U gha rẹn vbene ọ ya sunu hẹ vbe ẹdẹ ne u gha lẹẹ la ughugha nọ rre iyeke owa ya lẹre.” 26 Ẹre Ehab ne ọba na tama ọkpa vbe uwu avbe emwa rẹn wẹẹ, “Mu e Makaia, ne iran rhie ẹre bu Amọn nọ re enogie ọghe ẹvbo, kevbe Joas ne ovbi ọba. 27 Tama iran ne iran fi ẹre fi uwu ẹwẹdọ, ne iran gha ya ebrẹd vbe amẹ koko ẹre, I te rre vbe egbe hẹnnẹdẹn.” 28 E Makaia keghi datu wẹẹ, “U gha ya egbe hẹnnẹdẹn rre, ọni rhie ma wẹẹ ẹi re Jehova ẹre ọ gie mwẹ uhunmwu.” Ọ keghi kha wẹẹ, “Uwa hia họn vbene I kha hẹ na!” 29 Ehab ne ọba Izrẹl kevbe Jehosiafat ne ọba e Juda, keghi gba mu okuo gha rrie Ramọt ne Giliẹd. 30 Ehab keghi tama e Jehosiafat wẹẹ, “A gha la okuo, I gha mu egbe vbe odẹ ne emwa i khian na rẹn mwẹ, sokpan uwẹ mu egbe ọba gha khian.” Rhunmwuda ọni, ọba Izrẹl ghi rrie okuo, ọ na mu egbe vbe odẹ ne emwa i khian na rẹn ọnrẹn. 31 Ọba e Siria keghi tama avbe ọkaokuo eva yan ọgban ni hin ikẹkẹ okuo wẹẹ: “Uwa ghẹ gu ọmwa rhọkpa ọvbehe gbinna, vbọ gberra ọba Izrẹl.” 32 Iran ghi bẹghe Jehosiafat ne ọba, iran na gha roro ẹre wẹẹ irẹn ọre ọba ọghe Izrẹl, iran keghi mu aro daa ẹre ne iran gu ẹre gbinna. Sokpan, ọ ghi tu ladian, 33 iran keghi rẹn wẹẹ ẹi re irẹn ọre ọba ọghe Izrẹl, ẹre iran na ghi sẹrae. 34 Sokpan, ovbi e Siria ọkpa keghi fi ifẹnmwẹ nọ ma ya kọn rẹn. Ọ keghi vba Ehab ne ọba ọghe Izrẹl vbe ehe na na ku ẹwu ematọn rẹn kugbe. Ẹre ọ na ghi kha wẹẹ, “Emwi vba mwẹ.” Ọ na wẹẹ ne ọmwa nọ gua ikẹkẹ okuo ẹre ladian hin odaro okuo rre. 35 Ẹghẹ ne okuo na wa ye yọn nii, Ehab ne ọba keghi sikuẹn ye uwu ikẹkẹ okuo ẹre, vbene ọ na mu aro daa Ivbi e Siria. Esagiẹn nọ ke ehe ne emwi na vba ẹre ladian keghi lẹẹ ghee otọ, ọ keghi vuọn ototọ ikẹkẹ okuo ẹre. Ọ ghi sẹ ẹghẹ ota, ọ na wu. 36 Owẹn ghi ra defua, iran keghi yae wewe ma emwa hia ne iran họn wẹẹ, “Wẹẹ ne dọmwadẹ ọghẹe gha rrie ẹvbo ẹre kevbe otọ ẹre!” 37 Erriọ ẹre Ehab ne ọba ya wu. A keghi mu ikun ẹnrẹn gha rrie Sameria na ya re ẹre. 38 Iran keghi ya kpe ikẹkẹ okuo ẹre vbe ẹzẹ e Sameria, evba ẹre avbe ekita na lalọ esagiẹn ọnrẹn, avbe igbiragia na vbe khuẹ vbe evba, zẹ vbene Jehova tae ighẹ ọ gha sunu.