1 Ọba

13 Zẹ vbene Jehova gie ẹre, akhasẹ ọkpa keghi ke Juda gha rrie Bẹtẹl, ọ keghi sẹ evba vbe ẹghẹ ne Jẹroboam ya mudia ye ọkpẹn aka nọ khian na zọ ese. 2 Zẹ vbene Jehova gie, akhasẹ nii keghi ya yan aka nii, ọ wẹẹ: “Aka o, aka, ọna ọre ẹmwẹ ne Jehova khare: ‘A gha biẹ ọmokpia ọkpa ne Devid, a ghi gha tie eni ọmọ nii e Josaia. Ọ gha gbele avbe ohẹn ni do gha zọ ese vbe aka na, uhunmwu ruẹ ẹre ọ khian na vbe giẹn ugboloko emwa hia, ni do gha zọ ese vbe emwa na.’” 3 Ọ keghi ru emwi ọyunnuan ọkpa vbe ẹdẹrriọ, ọ na wẹẹ: Ọna ọre ama ọghe emwi ne Jehova wẹẹ ọ gha sunu: Aka na gha guọghọ rua, a gha zagha emuẹn ni rrọọ kua. 4 Ugbẹnvbe Jẹroboam ne ọba ghi họn ẹmwẹ na, ọ keghi niẹn obọ daa ẹre, ọ wẹẹ, “Uwa mu okpia nii!” Vbe ọwarọkpa nii, obọ ọba keghi zeze, sẹrriọ wẹẹ ọ ma ghi sẹtin si ẹre werriegbe. 5 Aka nii keghi wannọ ye ihe eva, emuẹn nọ rrọọ na kharha ku otọ zẹ vbene akhasẹ nii tae vbe eni e Jehova. 6 E Jẹroboam ne ọba keghi tama akhasẹ nii wẹẹ, “Lahọ na erhunmwu gie Jehova ne Osanobua ruẹ mẹ, ne u tama rẹn nọ dọlọ obọ mwẹ yi.” Akhasẹ nii keghi na erhunmwu gie Jehova, a keghi dọlọ obọ ọba yi. 7 Ọba keghi khama akhasẹ nii wẹẹ, “Lele mwẹ gha rrie owa ne u do rri evbare kherhe, I gha san ruẹ ẹse ye emwi ne u ru na.” 8 Akhasẹ nii keghi wanniẹn wẹẹ, “Ọ gha khọnrẹn ne u waa ẹfe ruẹ hia ye ihe eva, u na mu obọ ọkpa mẹ vbọ, I i lele ruẹ ra ne I guẹ re, ra ne I guẹ da. 9 E Jehova tama mwẹ nẹ wẹẹ, ‘Ghẹ rri ebrẹd, ghẹ wọn amẹ, ghẹ vbe la odẹ ne u la rre gha rrie.’” 10 Rhunmwuda ọni, ọ ma la odẹ nọ la rre, sokpan, ọ keghi la odẹ ọvbehe. 14 Ọ keghi lele akhasẹ nii, ọ na do vba ẹre vbe ọ tota ye ototọ erhan nọkhua. Ẹre ọ na nọ rẹn wẹẹ: “Uwẹ ọrọre akhasẹ nọ ke Juda rre ra?” Ọ keghi wanniẹn wẹẹ: “Mẹ nọ.” 15 Irẹn tama rẹn wẹẹ, “Lele mwẹ gha die owa ne u do rri evbare kherhe.” 16 Sokpan, akhasẹ nọ ke Juda rre nii keghi tama rẹn wẹẹ, “I i khian sẹtin lele ruẹ gha rrie owa, I i khian vbe kue ne u mu ọghọ yọ mwẹ egbe ra ne I deba ruẹ rri ebrẹd ra ne I wọn amẹ vbe emwa na. 17 Rhunmwuda, e Jehova tama mwẹ nẹ wẹẹ ne I ghẹ re, ne I ghẹ da ra ne I la odẹ ne I la rre gha rrie.” 18 Ẹre akhasẹ ne ediọnmwa nọ rre Bẹtẹl nii na tama rẹn wẹẹ, “Akhasẹ vbene uwẹ khin, ẹre imẹ vbe khin, e Jehova ẹre ọ vbe gie odibo ẹre gu mwẹ wẹẹ ne I rhie ruẹ gha rrie owa, ne I ya mu ọghọ yọ ruẹ egbe.” (Sokpan ohoghe ẹre akhasẹ ne ediọnmwa nii ghaa ta.) 19 Ẹre akhasẹ nọ ke Juda rre nii na lele akhasẹ ne ediọnmwa nii gha rrie, ọ na ya gu ẹre rri evbare. 20 Ugbẹnvbe iran ghi rre etebul nii, ẹmwẹ ọghe Jehova keghi bu akhasẹ ne ediọnmwa nii rre, 21 ọ na davan tama akhasẹ nọ ke Juda rre wẹẹ, “E Jehova khare wẹẹ, rhunmwuda ne u ma na họn ẹmwẹ ne irẹn tae, u ma ru emwi nọ wẹẹ ne u ru, 22 sokpan u na werriegbe ya rri evbare vbe ehe nọ tama ruẹ wẹẹ, ne u ghẹ na rri evbare, u gha wu, a i khian vbe re ruẹ ye idin ẹgbẹe ruẹ.”