2 Samuẹl

9 Ọ ghi sẹ ẹdọkpa, e Devid keghi nọ wẹẹ, “Ọmwa rhọkpa ye kẹ vbe ẹgbẹe ọghe Sọl ra? Adeghẹ ọ ye rrọọ, I hoo ne I ru ẹre ẹse rhunmwuda e Jonatan.” 2 Ọguọmwadia ọghẹ ẹgbẹe ọghe Sọl ọkpa na tie ẹre Ziba kegha rrọọ, iran na tama rẹn nọ bu e Devid. Ọba keghi nọ rẹn wẹẹ, “Uwẹ ọre Ziba ra?” Irẹn keghi wanniẹn wẹẹ, “Ghee ọguọmwadia ruẹ enọwanrẹn.” 3 Ọba keghi nọ rẹn wẹẹ, “Ọmwa rhọkpa ye kẹ vbe ẹgbẹe ọghe Sọl ne I gha tohan rẹn, ne I vbe ru ẹse nẹẹn zẹ vbene I yan ma Osanobua wẹẹ I gha ru ra?” E Ziba keghi wanniẹn wẹẹ, “Ọkpa ye kẹ vbe ivbi e Jonatan, uke nọ.” 4 Ọba keghi nọ rẹn wẹẹ, “Irẹn vbo nian?” E Ziba keghi wanniẹn wẹẹ, “Ọ rre owa Makiẹ ne ovbi Amiẹl nọ rre Lodeba.” 5 Ẹre Devid ne ọba na wẹẹ na ya rhie ẹre rre. 6 E Mẹfibosiẹt ne ovbi e Jonatan, nọ vbe re eyẹ ọghe Sọl ghi rre, ọ keghi ya ọghọ ghughẹ rre vbe odaro e Devid. E Devid keghi kha wẹẹ, “Mẹfibosiẹt!” Irẹn keghi wanniẹn wẹẹ, “Ghee ọguọmwadia ruẹ enọwanrẹn.” 7 E Devid keghi wanniẹn wẹẹ, “Ghẹ gi ohan muẹn, I gha tohan ruẹn rhunmwuda e Jonatan ne erhaa. l gha mu otọ ọghe Sọl ne erhaa odede hia nuẹn, u ghi vbe do gha rri evbare vbe etebul mwẹ vbe ẹghẹ hia.” 8 Mẹfibosiẹt keghi dọlegbe gbe uhunmwu kotọ, ọ wẹẹ, “Enọwanrẹn, mẹ ma maan vba ekita nọ wu. Vbua ghi na ru mwẹ ẹse nọ sẹ vbenian hẹ?” 9 Ẹre ọba ghi na tie Ziba ne ọguọmwadia e Sọl, ọ na tama rẹn wẹẹ, “I viọ emwi hia ni re ọghe Sọl kevbe igiowa ẹre ne Mẹfibosiẹt ne eyẹ ọghe Sọl ne arowa ruẹ. 10 Uwẹ, avbe ivbuẹ nikpia kevbe eguọmwadia ruẹ, ghi gba gha gbe ugbo nii ne ẹgbẹe ọghe Sọl ne arowa, uwa ghi vbe gha viọ emwiorhọ ẹre rrie owa, ne iran miẹn evbare gha re. Sokpan, etebul mwẹ ẹre Mẹfibosiẹt khian na gha rri evbare vbe ẹghẹ hia.” (E Ziba keghi mwẹ emọ ikpia ekesugie kevbe eguọmwadia ugie.) 11 E Ziba keghi wanniẹn wẹẹ, “I gha ru emwi hia ne u khare umogun.” Etebul ọghe ọba ẹre Mẹfibosiẹt na ghi gha rri evbare, zẹvbe ọkpa vbe uwu avbe ivbi ọba. 12 E Mẹfibosiẹt kegha mwẹ ọmọ okpia ọkpa nekherhe na tie eni ẹnrẹn Mika. Ẹgbẹe ọghe Ziba hia keghi khian eguọmwadia e Mẹfibosiẹt. 13 E Mẹfibosiẹt ne owẹ ọre eveva luẹluẹe, kegha rre Jerusalẹm, ọ na vbe gha rrie evbare ẹre hia vbe etebul ọba.